Purguntas Di Kilis Ku Ta Lei No Publikasons

Dipus ku Jesus padidu, pabia ku José ku Maria kontinua na Belen en ves di riba pa se kasa na Nazaré?

Biblia ka fala nada. Ma, i fala di kusas interesanti ku pudi leba elis na toma es disison.

Un anju fala Maria di kuma i na bin preña i padi un fiju. Kontra anju konta es mensaẑen, José ku Maria staba na Nazaré, un sidadi di Galileia. (Luk 1:26-31; 2:4) Dipus ke bin di Ejitu, e riba pa Nazaré. Jesus kirsi la, i bin sedu Nazarenu. (Mat 2:19-23) E ku manda no ta pensa di Nazaré, ora ku no na fala di Jesus, José ku Maria.

Maria tene un parenti di nomi Elizabeti ku mora na Judá. Elizabeti i minjer di saserdoti Zakarias. I bin sedu mame di Jon Batista. (Luk 1:5, 9, 13, 36) Maria bai visita Elizabeti, i fika ku el duranti tris mis na Judá. Dipus, Maria riba pa Nazaré. (Luk 1:39, 40, 56) E ku manda Maria kunsi zonas di Judá.

Ku tempu, José obdisi ordi di “bai marka si kabesa” o reẑista. Pa kila, José sai di Nazaré i bai pa Belen, “nunde ku Davi padidu nel”, tambi nunde ki profetizadu di kuma Mesias na padidu. (Luk 2:3, 4; 1 Sam 17:15; 20:6; Mik 5:2) Dipus ku Maria padi Jesus la, José ka pensaba fasi un bias kumpridu pa riba pa Nazaré ku un bebe ku kumsa padidu. E fika na Belen. Di la pa Jerusalen i serka di 9 kilometru. Asin, i na seduba mas fasil pa relis, leba se fiju pa templu i fasi oferta suma ku lei ta iziẑi. — Sir 12:2, 6-8; Luk 2:22-24.

Anju di Deus falaba ja Maria di kuma, si fiju na dadu “renu di Davi”, tambi i na “rena” suma Rei. Sera ki José ku Maria pensaba di kuma i importanti manera ku Jesus padidu nunde ku Davi padidu nel? (Luk 1:32, 33; 2:11, 17) Talves e pensaba di kuma i minjor pa e kontinua la i pera te ora ku Deus bin konta elis ke ke dibi di fasi.

No ka sibi kantu tempu ke staba na Belen kontra omis ku ta studaba strelas ciga. Ma, na ki tempu, familia di José moraba ja na un kasa. Se fiju ka seduba un bebe, ma i seduba ja un “mininu”. (Mat 2:11) Parsi kuma, en ves de riba pa Nazaré, e kontinua mora na Belen pa un tempu.

Erodis da ordi pa “tudu mininus ku staba na Belen . . . di dus anu pa bas” matadu. (Mat 2:16) José ku Maria risibi avisu di anju aserka des ordi, asin e kuri e bai pa Ejitu juntu ku Jesus, i e fika la te oca Erodis muri. Mas tardi, José bai ku si familia pa Nazaré. Pabia ke ka riba pa Belen? Pabia na ki mesmu tempu, fiju di Erodis, Arkelau, staba na rena na Judeia, i seduba un omi mau. Tambi anju avisa José di pirigu di bai pa Belen. Na Nazaré, José na pudiba kria Jesus ku suguransa suma un servu fiel di Deus. — Mat 2:19-22; 13:55; Luk 2:39, 52.

I pudi sedu kuma, José muri antis di Jesus yabri kamiñu pa vida na seu. Pa kila, José na bin lantandadu pa vivi li na Tera. Manga di jintis na bin kunsil i sibi mas atraves del propi, pabia ku el ku Maria e kontinua na Belen dipus ku Jesus padidu.