No pudi sedu justu si no tene fe na Jeova i mostral na ke ku no ta fasi

1. Ora ku no pensa na fe di Abraon, kal purgunta ku no pudi fasi no kabesa?

MANGA di jintis obi faladu di Abraon, ma maioria delis sibi puku kusas aserka del. Ma bu sibi manga di kusas aserka di Abraon. Pur isemplu, bu sibi di kuma Abraon comadu di “pape di tudu kilis ku fia”. (Rom 4:11) Talves bu pudi fasi bu kabesa es purgunta: ‘Sera ki N pudi tene fe forti suma Abraon?’ Sin, bu pudi.

2. Pabia ki importanti studa isemplu di Abraon? (Tiagu 2:​22, 23)

² Un di manera ku no pudi tene fe suma di Abraon, i ora ku no studa si isemplu. Pabia di ordi ku Deus dal, Abraon bai pa un tera lunju, i mora na tendas pa manga di anus, tambi i staba pruntu pa sakrifika si fiju ki ama ciu, ku sedu Isaki. Es kusas ki fasi ta mostra fe garandi ki tene. Fe ku Abraon tene pul pa i tene fabur di Deus, i pa i sedu si amigu. (Lei Tiagu 2:​22, 23.) Jeova misti pa anos tudu, i pa bo tambi, bu tene si fabur i sedu si amigu. Pabia di kila, Jeova usa si spiritu santu pa Paulu ku Tiagu fala di isemplu di Abraon. No na fala di si isemplu suma ki faladu na Romanus kapitulu 4 ku Tiagu kapitulu 2. Tudu es dus kapitulu fala di un kusa importanti aserka di Abraon.

3. Kal versikulu di Biblia ku Paulu ku Tiagu fala del?

³ Tantu Paulu suma Tiagu usa palabras ku sta na Kumsada 15:​6, ku fala sin: “Abron fia na SIÑOR; si fiansa pui Deus i ocal justu.” Jeova ta oja un algin suma justu ora ki tene si fabur. I un kusa dimiradu pa un algin imperfeitu ku ta fasi pekadu ojadu suma justu pa Deus! Talves bu misti pa Deus ojau suma algin justu. Kila pudi sedu. Gosi no na bin aprindi pabia ku Jeova coma Abraon di justu, i ke ku no dibi di fasi pa no comadu tambi justu.  

NO DIBI DI TENE FE PA SEDU JUSTU

4. Ke ku ta tujinu sedu justu?

⁴ Na si karta pa Romanus, Paulu fala di kuma tudu jintis ta peka. (Rom 3:23) Pa kila, kuma ku Deus pudi oja un algin suma justu i tambi tene si fabur? Pa juda tudu kristons di bardadi oja resposta des purgunta, Paulu fala di isemplu di Abraon.

5. Pabia ku Jeova coma Abraon di justu? (Romanus 4:​2-4)

⁵ Jeova coma Abraon di justu oca ki staba na tera di Kanaan. Pabia ku Jeova coma Abraon di justu? Sera ki i pabia Abraon ta kumpriba diritu Lei di Moisés? I ka pabia di kila. (Rom 4:13) Es Lei dadu pa nason di Israel mas di 400 anu dipus ku Deus coma Abraon di justu. Ma, pabia ku Jeova coma Abraon di justu? Pabia di bondadi ku Jeova mostra pa pekaduris ku ka mersi, i coma Abraon di justu pabia di si fe. — Lei Romanus 4:​2-4.

6. Pabia ku Jeova ta coma un pekadur di justu?

⁶ Paulu fala sin aserka di algin ku tene fe na Deus: “Si fiansa ta pui Deus i ojal justu. Davi konta mesmu kusa oca i fala kuma, sortiadu i ki omi ku Deus oja kuma i justu, sin i jubi pa si obra. I fala: ‘Sortiadu i kilis ku se maldadi sta purdadu, se pekadu kubridu. Sortiadu i ki algin ku Siñor ka pui si pekadu riba di si kabesa.’” (Rom 4:​5-8; Sal 32:​1, 2) Deus ta purda o kubri pekadu di kilis ku tene fe nel. Jeova ta purda elis di manera kompletu. I ta oja ki jintis suma justu pabia di se fe.

7. Na kal sintidu ku servus di Deus di tempu pasadu seduba justu?

⁷ Mesmu manera ku Abraon, Davi ku utrus servus fiel di pasadu ojadu suma justu, e kontinua sedu jintis imperfeitu ku ta fasi pekadu. Ma pabia di se fe, Deus ta ojaba elis suma justu, prinsipalmenti ora ki kompara elis ku kilis ku ka ta adoral. (Ef 2:12) Suma ku Paulu splika na si karta, no dibi di tene fe pa pudi tene amisadi ku Deus. I kila ku kontisi ku Abraon, ku Davi, i kila tambi ku pudi kontisi ku nos.

KUMA KU FE KU KE KU NO TA FASI STA LIGADU KU N̈UTRU?

8-9. Kal ideias eradu ku alguns ta tene aserka di ke ku Paulu ku Tiagu skirbi, i pabia di ke?

⁸ Pa manga di anus, lideris riliẑiosu diskuti ciu aserka di kal ligason ku ten entri fe ku ke ku no ta fasi. Alguns lideris riliẑiosu ta nsina di kuma, tudu ke ku un algin pirsisa di fasi pa sedu salvu i fia na Siñor Jesus Kristu. Talves bu pudi obi elis e na fala: “Seta Jesus i bu na sedu salvu.” Te mesmu lideris riliẑiosu pudi usa palabras di Paulu ku fala sin: “Deus oja kuma i justu, sin i jubi pa si obra.” (Rom 4:6) Ma utrus ta fala di kuma bu pudi “salva bu kabesa” si bu ta bai perigrinason i fasi utrus kusas ku ta faladu na igreẑa. Talves e ta usa palabras ku sta na Tiagu 2:24 ku fala sin: “Omi ocadu justu pabia di ke ki fasi; i ka son pa fe.”

⁹ Alguns skirbiduris riliẑiosu ta fia na kusas diferenti. E pensa di kuma Paulu ku Tiagu ka konkorda ku n̈utru aserka di ke ku un algin dibi di fasi pa tene fabur di Deus. Alguns lideris riliẑiosu ta nsina di kuma Paulu fia di kuma un algin pirsisa so di tene fe pa pudi tene fabur di Deus, ma Tiagu fia di kuma algin pirsisa di fasi bon kusas. Un pursor riliẑiosu fala di kuma Tiagu ka ntindi pabia ku Paulu fala di kuma un algin pirsisa so di tene fe pa sedu justu, i Tiagu ka konkorda ku ke ku Paulu fala. Ma i Jeova ku usa si spiritu pa Paulu ku Tiagu skirbi ke ke skirbi. (2 Tim 3:16) Ma i ten un manera simplis pa oja di kuma e konkorda ku n̈utru. No dibi di jubi kapitulus antis i dipus di se kartas pa pudi ntindi minjor ke ke skirbi.

10. Ke ku palabra “kumpri” ku Paulu falaba del signifika? (Romanus 3:​21, 28) (Jubi tambi diseñus.)

¹⁰ Ke ku signifika palabra “kumpri” o ke ku no ta fasi, ku Paulu fala del na Romanus 3 ku 4? I staba na fala di “kumpri lei”, ku sedu Lei di Moisés ku dadu na Monti Sinai. (Lei Romanus 3:​21, 28.) Na tempu di Paulu, parsiba di kuma alguns kristons judeus pensaba di kuma e dibi di kontinua sigi Lei di Moisés. Pa kila, Paulu usa isemplu di Abraon pa mostra di kuma un algin ka pirsisa di sigi Lei di Moisés pa pudi sedu justu. Ma Paulu splika di kuma no pirsisa di tene fe. Es i nkoraẑanti pabia i ta nsinanu di kuma si no tene fe na Deus ku Kristu no pudi tene fabur di Deus.

11. Kal tipu di “obras” ku Tiagu fala del?

¹¹ Pa utru ladu, “obras” ku Tiagu fala del na kapitulu 2 i ka mesmu ku “kumpri lei” ku Paulu fala del. Tiagu staba na fala di obras o kusas ku kristons dibi di fasi na se vida di kada dia. Es kusas ta mostra si un kriston tene fe di bardadi o nau. Gosi no na fala di dus isemplu ku Tiagu usa.

12. Kuma ku Tiagu splika ligason ku ten entri fe ku ke ku no ta fasi? (Jubi tambi diseñus.)

¹² Na purmeru isemplu, Tiagu fala di kuma Kristons ka dibi di fasi skuju ora ke na lida ku utrus. Pa judanu ntindi es pontu i usa isemplu di un omi ku mostra fabur pa un algin riku, ma i ka mostra fabur pa un algin koitadi. Tiagu mostra di kuma es omi pudi fala di kuma i tene fe, ma sera ki ke ki fasi ta mostra di kuma i tene fe? (Tiagu 2:​1-5, 9) Na sugundu isemplu, Tiagu fala di un algin ku oja ‘un ermon macu o femia ku ten falta di ropa o kumida’ ma ku ka dal ajuda ki pirsisa del. Mesmu si ki algin fala di kuma i tene fe, ke ki fasi ta mostra di kuma i ka tene fe. Suma ku Tiagu skirbi, “ku fe son, si i ka mostra na kil ku si dunu fasi, i sta mortu.” — Tiagu 2:​14-17.

13. Kal isemplu ku Tiagu usa pa mostra di kuma no pirsisa di tene fe i na mesmu tempu fasi bon kusas? (Tiagu 2:​25, 26)

¹³ Tiagu fala di isemplu di Raabi ku mostra fe i na mesmu tempu i fasi bon kusas. (Lei Tiagu 2:​25, 26.) I obi faladu di Jeova, i sibiba di kuma Jeova staba na juda israelitas. (Jos 2:​9-11) Ke ki fasi mostra di kuma i tene fe. Pabia di si fe i proteẑi dus israelitas kontra se vida staba na pirigu. Pabia di kila, Raabi comadu di justu, pabia suma Abraon i seduba imperfeitu tambi i ka ta sigiba Lei di Moisés. Isemplu di Raabi mostra di kuma i importanti dimas tene fe i mostral pa ke ku no ta fasi.

14. Pabia ku no pudi fala di kuma ke ku Paulu ku Tiagu skirbi ka tene kontradison?

¹⁴ Paulu ku Tiagu sta so na splika fe ku ke ku no ta fasi na dus maneras diferenti. Paulu staba na splika kristons judeus di kuma nunka e ka na tene fabur di Deus so ora ke kumpri Lei di Moisés. Tiagu staba na fala di kuma tudu kristons pirsisa di mostra se fe pa bon kusas ke ta fasi pa utrus.

15. Kal ki alguns manera ku no pudi mostra no fe pa ke ku no ta fasi? (Jubi tambi fotos.)

¹⁵ Jeova ka fala di kuma si no misti comadu di justu no dibi di fasi mesmu kusa ku Abraon fasi. Na bardadi, i ten manga di manera ku no pudi mostra di kuma no tene fe pa ke ku no ta fasi. No pudi risibi diritu kilis ku kumsa bin pa kongregason, juda ermons ku irmas ku pirsisa di ajuda i fasi bon kusas pa no familia. Es tudu i kusas ku ta kontenta Deus i tisi si benson. (Rom 15:7; 1 Tim 5:​4, 8; 1 Jon 3:18) Un di manera mas importanti di mostra kuma no tene fe, i ora ku no ta pega tesu na prega bon noba pa utrus. (1 Tim 4:16) Anos tudu no pudi mostra pa ke ku no ta fasi di kuma no tene fe di kuma purmesas di Jeova na bin kumpri i sigi si kamiñu i minjor. Si no fasi kila, no pudi tene sertesa di kuma Deus na ojanu suma justu, tambi i na comanu di si amigus.

KONSENTRA NA NO SPERANSA NA AUMENTA NO FE

16. Kal speransa ku Abraon tene i kuma ki mostra fe nel?

¹⁶ Na Romanus kapitulu 4 no pudi aprindi utru lison importanti aserka di Abraon. Nes kapitulu no aprindi di kuma no dibi di kontinua pera te ora ku no speransa kumpri. Jeova purmiti di kuma atraves di Abraon “manga di nason” na bensuadu. Pensa na speransa bonitu ku Abraon tene! (Kum 12:3; 15:5; 17:4; Rom 4:17) Ma mesmu oca ku Abraon teneba 100 anu i Sara teneba 90, fiju ki purmitidu ka padidu inda. Pa pekaduris, i parsiba di kuma i ka pusivel pa Abraon ku Sara tene un fiju. Es seduba un testi garandi pa rel. Ma “Abraon, pabia di si fe, i tenba speransa kuma i na fasiduba pape di manga di nason”. (Rom 4:​18, 19) Ku tempu, Abraon bin oja ke ki na peraba. I bin sedu pape di Isaki, fiju ki na peraba pa manga di tempu. — Rom 4:​20-22.

17. Kuma no sibi di kuma no pudi ojadu suma justu i sedu amigus di Deus?

¹⁷ No pudi tene fabur di Deus, ojadu suma justu i sedu amigus di Deus, suma Abraon. Es ku Paulu mistiba fala oca ki skirbi: “E palabra kuma Deus ocal justu i ka sta skritu son pa [Abraon], ma tambi pa nos ku na ocadu justu, anos ku fia na Deus ku lantanda Jesus”. (Rom 4:​23, 24) Suma Abraon no pirsisa di tene fe na Jeova, fasi ke ki bon i tene konfiansa forti di kuma ke ku Jeova purmiti na kumpri. Paulu kontinua papia di no speransa na kapitulu 5 di Romanus i no na fala del na studu ku na bin.