Diablota cazushcamundaca ¿imati tucurca?

Taita Diosta na cazushcamundami Adanshi, Evashi guañurca. Génesis 3:6, 23

Evaca culebrata cazushami, na micuchun nishca yuramunda micurca. Jipamuca Adanmushi cararca. Chimi Adanshi micurca.

Taita Dios mandashcata na cazushaca, Adan Evaca shuc jatun juchatami rrarca. Chimundami Diosca paicunataca, chi alaja Eden pushtumunda llucchisha cacharca.

Shinami Adanshi, Evashi, paicunapu guaguacunashi juyipota causimu callarirca. Jipamucari yuyicyesha guañurcacuna. Paicuna guañushaca ni cielomu, ni maimushi na rrircacunachu, chipimi tucurircacuna.

Guañushcacunaca allpallatimi tucun. Chimundami nimata na rri pudincuna. Génesis 3:19

Tuquicuna Adanpu, Evapu guaguacuna cashcamundami guañunchi. Guañushcacunaca nimata na uyanchu, na rricunchu, nimata na rri pudincunachu (Eclesiastés 9:5, 10).

Taita Jehova Diosca, gentecuna guañuchunca na munarcachu. Ashtaguanshi mana guañushalla causachunmi munarca. Chimundami guañushcacunataca ñalla causachinga. Jehova Diosta paicuna cazushaca, mana guañushalla, uni unitami causangacuna.