Bibliapi tiyishca consejocunaca ¿imashinati ñucunchita ayudan?

1. Taita Diospu ayudataca ¿imamundati minishtinchi?

Taita Dios ñucunchita rrashcamundami tuquita alli yachan. Paica ñucunchitaca achcatami juyan, ñucunchimundashi precuparin. Taita Diosca mana ñucunchilla causachunchu rrarca (Jeremías 10:23). Imashinami uchilla guaguacuna taitacunapu ayudata minishtin shinaitimi ñucunchishi Taita Diospu ayudata minishtinchi (Isaías 48:17, 18). Taita Diosca Bibliapi alaja consejocunata cushami ñucunchita achcata juyishcata rricuchin. 2 Timoteo 3:16​ta liyi.

Taita Diospu mandeshcacuna, consejocunami cunun funllacunapi, shamuc funllacunapishi alli causangapu ayudan. Taita Dios ñucunchita rrashcamundami ñucunchita ayudachun saquina canchi. Salmo 19:7, 11 y Revelación (Apocalipsis) 4:11​ta liyi.

2. Bibliaca ¿imashinati ñucunchita ayudan?

Bibliapi tiyishca consejocunaca alli decisioncunata agllachunmi ayudan. Bibliapica guaquin leycunashimi tiyan. Cai leycunaca ima alli cashcata o ima mana alli cashcatami rricuchin (Deuteronomio 22:8). Taita Diospu consejocunata ñucunchi causipi factachingapuca alli yuyeshami imatashi rrana canchi (Proverbios 2:10-12). Por ejemplo Bibliaca Taita Dios ñucunchimu causita cushcatami yachachin. Cai consejomi ñucunchita trabajopi, guasipi, maimu rricpishi cuidadota charichun ayudan. Hechos 17:28​ta liyi.

3. ¿Majin mandashcacunati ashtaguan valishca can?

Jesusca cai ishqui mandashcacunami ashtaguan valishca can nirca. 1) Taita Diosta rricsina, paita tuqui shunguguan juyana shinaiti guañungacama paita cazuna. Chimundami cai mandashcata tuqui ñucunchi decisioncunapi factachina canchi (Proverbios 3:6). Cai mandashcacunata factachishaca contento, allimi causashun. Shinaiti shamuc funllacunapica mana guañushalla para siempremi causashun. Mateo 22:36-38​ta liyi.

2) Shinaiti Jesusca tuquicunapura apanacusha causachunmi yachachirca (1 Corintios 13:4-7). Cai mandashcata factachishaca Taita Dios gentecunata juyishca shinami, ñucunchishi gentecunata juyashun. Mateo 7:12 y 22:39, 40​ta liyi.

4. Taita Diospu consejocunaca ñucunchi alli causangapuca ¿imashinati ayudan?

Taita Diospu consejocunaca familia ucupi tandalla, juyanacusha causanchunmi ayudan (Colosenses 3:12-14). Shinaiti Bibliapu consejocunaca cazadocuna toda la vida ishquindi allita causachunshimi ayudan. Génesis 2:24​ta liyi.

Taita Diospu mandashcacunata cazushaca trabajota charishun shinaiti contentomi caushashun. Por ejemplo guaquin trabajocunapica Biblia yachachishca shina causaccunatami mashcancuna mana shua, mana llulla, mana quilla gentecuna cashcamunda (Proverbios 10:4, 26; Hebreos 13:18). Shinaiti Diospu yachachishcacunaca Taita Diosta primer lugarpi churesha, minishtirishca cosascunallaguan alli, contento causachunshimi ayudan. Mateo 6:24, 25, 33 y 1 Timoteo 6:8-10​ta liyi.

Bibliapu consejocunaca alli saludta charichunshimi ayudan. Por ejemplo Bibliaca shingayanaca jatun juchami can nin. Cai consejota cazushaca alli saludta charishun, llaquicunapishi na urmashunchu (Proverbios 14:30; 22:24, 25; 23:20). Bibliaca guaquinpica fichilla tragota ubiachunmi saquin. Shinashi mana demos ubianachu canchi (Salmo 104:15; 1 Corintios 6:10). Bibliapu consejocunami alli yuyesha, allita rrasha causangapu ayudan (Salmo 119:97-100). Taita Diospu consejocunataca na ñucunchita ayudashcallamundallachu cazuna canchi. Taita Diosta jatunyachingapumi cazuna canchi. Mateo 5:14-16​ta liyi.