¿Piti Dios can?

1. Taita Diostaca ¿imamundati cazuna canchi?

Taita Diosmi tuqui cosascunata rrashca. Paica siempremi tiyishca y siempremi tiyisha catinga (Salmo 90:2). Bibliapi tiyishca alli noticiacunaca Taita Diosmundami shamun (1 Timoteo 1:11). Ñucunchimu causita cushcamundami paillata cazuna canchi. Revelación (Apocalipsis) 4:11​ta liyi.

2. Taita Diosca ¿imashinati can?

Taita Diostaca ni pi na rricushcachu, paica shuc espiritumi. Na ñucunchi cuenta tulluyuc, aichayucchu paica ñucunchitashi yallimi can (Juan 1:18; 4:24). Inshaca Taita Diostaca ¿imashinati rricsi pudinchi? Paipu tuqui rreshcacunata rricushami Taita Dios ima laya cashcata rricsi pudinchi. Tuqui laya granocunata, sisacunata, frutacunata rreshami ñucunchita achcata juyishcata, pai achca yuyita charishcatashi yachanchi. Jagua cielota, cai allpata, estrellacunata rricushami achca poderta charishcatashi yachanchi. Romanos 1:20​ta liyi.

Taita Diostaca ¿imashinati mas rricsi pudinchi? Bibliata liyishami paimunda yachi pudinchi. Bibliami Taita Dios gentecunata imashina rricushcata yachachin. Shinaiti pai ima munashcata, pai imata mana munashcatashimi rricuchin. Bibliaca gentecuna mana allita rracpi, allita rracpi imashina Taita Dios sintirishcatashimi yachachin. Salmo 103:7-10​ta liyi.

3. Taita Diosca ¿ima shutiti can?

Jesusca: Jagua cielopi cac ñucunchi Taita Dios, jambu jucha illac shutica jatunyachishca cachun nirca (Mateo 6:9). Aunque tauca gentecuna Taita Dios, Taita Amito nisha rricsicpishi Taita Diosca shuc shutillatami charin. Paipu duñu shutica Jehovami can. Español shimipica Jehova o Yavemi can. Bibliapica: Gentecuna yachachun jambu shuti Jehova cashcata. Janllami tuqui cai allpamunda ashtaguan jatun cangui nin. Salmo 83:18​ta liyi (82:19 guaquin Bibliacunapi).

Guaquin Bibliacunapica Jehovata churanapu rrandica Taita Dios, Mandac Dios nishami churashcacuna. Pero callarillapitimi mas de 7 mil vueltacunata Jehova shutica ña Bibliacunapica escribishca carca. Jesusca gentecunamu Taita Diosmunda yachachingapuca siempremi Diospu shutita utilizador carca. Juan 17:26​ta liyi.

Cai uchilla peliculata rricui: ¿Taita Diosca shuc shutita charinchu?

4. Taita Diosca ¿ñucunchimunda precuparinchu?

Taita Dios ñucunchimunda precuparishaca ¿imamundati achca llaquicuna tiyachun saquishca? Guaquin gentecunaca Diosmi castigacun, paimi llaquicunata churacun nincuna. Pero chica na ciertochu can. Santiago 1:13​ta liyi.

Jehova Diosca ñucunchillati imashina causanata agllachunmi saquishca. Paita cazunami alli canmu (Josué 24:15). Guaquin gentecunaca mana allicunatami rran chimundami achca llaquicuna tiyan. Chita rricushami Taita Diosca achcata llaquirin. Génesis 6:5, 6​ta liyi.

Ñucunchita achcata juyishcamundami Jehova Diosca contento, alli causachun munan. Chimundami nanicunata, tuqui cai mana alli cosascunatashi ñalla tucuchinga. Pero Taita Diosca ¿imamundati llaquicuna tiyachun saquishca? Caitaca pagina 16 y 17​pimi mas yachashun. 2 Pedro 2:9 y 3:7, 13​ta liyi.

5. Taita Diospumuca ¿imashinati juchuyi pudinchi?

Taita Diosca paita mañachunmi munan. Paita mañeshami paipumu juchuyi pudinchi, paica cada unomundami precuparin (Salmo 65:2; 145:18). Chimundami pandaricpishi ñucunchita perdonangapu listo can. Paita cazungapu esforzaricushcatashimi rricucun. Ñucunchi juchayuccuna cashashi Taita Diospumu juchuyi pudinchimi. Salmo 103:12-14 y Santiago 4:8​ta liyi.

Taita Dios ñucunchimu causita cushcamundami paitaca tuqui shunguguan juyana canchi (Marcos 12:30). Paita juyishcata rricuchingapuca paimunda yachana, paita cazunami canchi. Shina rreshami paipumu mas juchuyashun. 1 Timoteo 2:4 y 1 Juan 5:3​ta liyi.