Taita Diosca ¿imaputi cai allpata rrarca?

1. Taita Diosca ¿imaputi cai allpata rrarca?

Taita Diosca cai allpataca gentecuna causachunmi rrarca. Adan y Evata rrashaca mana jagua cielopi causachunchu rrarca. Taita Diosca ñami angelcunata jagua cielopi causachun rrarca (Job 38:4, 7). Jehova Diosca Adantaca shuc alaja, maravilla pushtupimi causachun churarca. Chi maravilla pushtuca Eden shutimi carca (Génesis 2:15-17). Taita Diosca munarcami Adan paipu guaguacunandi cai allpapi contento, mana guañushalla para siempre causachun. Salmo 37:29 y 115:16​ta liyi.

Callaripica Eden pushtuca fichillaguami carca. Adan y Evaca guaguacunata charishami tuqui cai allpa Eden shina cachun fichi, fichi mirachina carca (Génesis 1:28). Cai allpaca gentecuna causachunmi can. Chimundami cai allpaca nunca na tucuringa. Salmo 104:5​ta liyi.

Cai uchilla peliculata rricui: Taita Diosca ¿imaputi cai Allpataca rrarca?

2. Cai allpaca ¿imamundati mana shuc paraiso shina can?

Taita Diospu mandashcata na cazushcamundami Adan y Evataca chi alaja pushtumunda llucchisha cacharca. Chimundami chi paraiso allpaca chingarirca. Bibliapica cai allpaca milli, mana alli gentecunaguan jundami can nin (Job 9:24). Génesis 3:23, 24​ta liyi.

Taita Dios ñucunchimu alaja, maravilla causita cugrishcataca ¿shucutichu cungarishca? Mana, mana cungarishcachu. Paipu nishcataca siempremi factachin (Isaías 45:18). Imashina callaripi cai allpa carca shinaitimi Taita Diosca ñalla shuc alaja paraisota cunga. Salmo 37:11, 34​ta liyi.

3. Cai allpaca ¿imashinati cutin shuc alaja paraiso tucunga?

Taita Diospu Reinopi Jesus rey cashcamundami cai allpataca shuc alaja paraisota rranga. Jesusca angelcunandimi Armagedon guerrapi tuqui milli, mana alli gentecunata tucuchinga. Adan y Evata pandachic milli, mana alli Diablotashi guaranga guatacunatami güichquesha churanga. Cutin Taita Diosta cazuccunataca Jesusca cuidanga, salvangami. Paicunaca cai allpallapiti shuc alaja paraisopi, mana guañushalla para siempre causangacuna. Revelación (Apocalipsis) 20:1-3 y 21:3, 4​ta liyi.

4. Llaquicunaca ¿imaurashi tucuringa?

Taita Diosca ñallami llaquicunata tucuchinga. ¿Imamundati shina ninchi? Jesusca achca llaquicunata rricushami tucuri funllacunapi ña causacushcata yachanguichi nirca. Mateo 24:3, 7-14, 21, 22​ta liyi.

Jesusca jagua cielomunda guaranga guatacunata mandeshami tuqui cai llaquicunata tucuchinga (Isaías 9:6, 7; 11:9). Taita Diosta cazuccunapu juchacunatashi perdonanga. Shinaiti Jesusca unguicunata, guañuicunata, yuyicyanatashimi tucuchinga. Isaías 25:8 y 33:24​ta liyi.

5. Cai alaja, maravilla allpapica ¿picunati causangacuna?

Taita Diosta cazuccunallami cai alaja, maravilla allpapi causangacuna (1 Juan 2:17). Jesusca paipu caticcunamuca alli shunguta charic gentecunata mashquesha, Taita Diospu ñaupupi imashina alli rricurinata yachachinguichi nirca. Taita Diosca cunun funllacunapica achca gentecunamumi chi alaja, maravilla allpapi causachun yachachicun (Sofonías 2:3). Testigo de Jehovacunapu tandanacuna guasimu rrishami achca gentecunaca imashina alli taita, alli guarmi, alli guagua canata Bibliapi yachacun. Miqueas 4:1-4​ta liyi.