¿Guañushcacunaca causaringachushi?

1. ¿Guañushcacunaca causaringachu?

Betania llactamu Jesus chayacpica paipu amigo Lazaroca ñami chuscu funllacunata guañushca carca. Jesusca Lazaro pambashca pushtumumi Marta Mariandi rrirca. Chipica rratoitimi achca gentecuna montonarirca. Marta, Mariashi paipu turi Lazarota Jesus causachicpica ¿imashinashi sintirircacuna? Juan 11:21-24, 38-44​ta liyi.

Bibliapica guañushca gentecunaca causaringami nin. Martaca allimi yacharca Jehova Dios guañushca gentecunata cai allpallapiti cutin causachigrishcata. Job 14:14, 15​ta liyi.

2. Guañushca jipaca ¿imati tucunchi?

Gentecunaca ñutu allpamundami rrashca canchi (Génesis 2:7; 3:19). Ñucunchica mana almata charinchichu. Chimundami guañushca jipaca mana causasha catinchi. Guañucpica ñucunchi yuyica chingarinmi chimi nimata na yuyanchi, nimata na sintinchi, nimata na rri pudinchi. Chimundami Lazaro causarishaca cutishuc ladopi, cutishuc vida tiyishcamundaca na parrlarca. Eclesiastés 9:5, 6, 10​ta liyi.

Guaquin gentecunaca infiernopimi Taita Diosca guañushcacunata castigacun nin. Chica ¿ciertochu can? Mana, mana ciertochu. Imashina Bibliapi ña rricushcanchi guañushcacunaca nimata na sintinchu. Guañushcacuna infiernomumi rrin nisha yachachishcacunaca llullami can. Shina nishaca Taita Diostami degana juchachincuna. Taita Diosca gentecunataca na castiganchu. Jeremías 7:31​ta liyi.

Cai uchilla peliculata rricui: Guañushca jipaca ¿imati tucunchi?

3. Guañushcacunaguan ¿parrli pudinchichu?

Guañushcacunaca nimata na uyanchu, nimata na parrlanchu (Salmo 115:17). Guañushcacuna causesha catishcata crichingapumi guaquin milli angelcunaca guañushca gentecuna cuenta tucun (2 Pedro 2:4). Chimundami Taita Diosca guañushcacunaguan parrlachunca na munan. Deuteronomio 18:10, 11​ta liyi.

4. ¿Picunati causaringa?

Achca guaranga guañushca gentecunami cutin cai allpallapiti causangapu causaringacuna. Taita Diosta mana rricsishcamunda na alli cosascunata rrashcacunashi causaringacunami. Lucas 23:43 y Hechos 24:15​ta liyi.

Guañushcacuna cutin causarishaca Taita Diosmundami yachi pudingacuna. Paicunaca Jesuspi crinata, paita cazunatashimi yachangacuna (Revelación [Apocalipsis] 20:11-13). Chita rreshami mana guañushalla para siempre cai allpallapiti causangacuna. Juan 5:28, 29​ta liyi.

5. Taita Diosca ¿imamundati guañushcacunata causachinga?

Gentecunata achcata juyishcamundami Taita Diosca guañushcacunata causachinga. Taita Dios paipu churi Jesusta ñucunchipu juchachunamunda guañuchun cachashcamundami guañushcacuna causarigrishcata crinchi. Guañushcacuna causaricpica ¿pitati rricusha ningui? Juan 3:16 y Romanos 6:23​ta liyi.