Diospu Reinoca ¿imati can?

1. Diospu Reinoca ¿imati can?

Jagua cielopi shuc gobiernomi can. Cai gobiernoca gentecunapu tuqui gobiernocunata tucuchishami mandanga. Shinami Taita Diospu nishcata cai allpapi, jagua cielopishi factachinga. Cai gobiernollami tuqui ñucunchi alli causachun ayudanga. Chimundami ñucunchi minishtishca gobierno can. ¿Nachu caica shuc alli noticia can? Daniel 2:44; Mateo 6:9, 10 y 24:14​ta liyi.

Pero ¿piti cai gobiernopi mandanga? Taita Diosca paipu churi Jesustami cai gobiernopi mandachun agllashca. Revelación (Apocalipsis) 11:15​ta liyi.

Cai uchilla peliculata rricui: Diospu Reinoca ¿imati can?

2. Jesusca ¿imamundati shuc alli mandac canga?

Gentecunata achcata juyishcamunda, allita rradorr cashcamundami Jesusca alli mandac canga (Mateo 11:28-30). Gentecunata ayudangapuca achca podertami charin. Jesus guañushca jipaca jagua cielomumi rrirca. Paica Taita Diospu alli ladopimi paimu mandanata cungacama shuyacurca (Hebreos 10:12, 13). Cununca Taita Diosca ñami Jesustaca mandachun saquishca. Daniel 7:13, 14​ta liyi.

3. Jesusca ¿paillachu mandanga?

Bibliapica Jesusguan jagua cielomunda mandachunmi Taita Diosca ashalla gentecunata agllashca nin. Daniel 7:27​pica paicunataca limpio, jucha illac nincunami. Taita Diosca Jesuspu apostolcunatarimi Jesusguan mandachun agllarca. Cununcamami Taita Diosca alli jaricunata, alli guarmicunata Jesusguan mandachun agllacun. Cai agllashca gentecunallami guañushca jipaca Jesusguan mandangapu jagua cielomu rringacuna. Juan 14:1-3 y 1 Corintios 15:42-44​ta liyi.

Jesus nishca shinaca ashalla gentecunami jagua cielomu rrin (Lucas 12:32). Inshaca ¿mashna gentecunati jagua cielomu rringacuna? 144 mil agllashca gentecunallami Jesusguan jagua cielopi mandangapu rringacuna. Revelación 14:1​ta liyi.

4. Jesus ña mandemu callarishaca ¿imatati rrarca?

Jesusca 1914 guatapimi mandemu callarirca. Jesus mandemu callarishaca Diablota, paipu milli angelcunatashimi jagua cielomunda cai allpamu shitarca.a Chimundami Diabloca achcata fiñarisha mundo enteropi gentecunata llaquichicun (Revelación 12:7-10, 12). Chi funllamundami causica jinchi tucushca. Bibliaca terremotocuna, guerracuna, milli mana alli unguicuna, yariquicunashi tiyanga nirca. Tuqui cai llaquicunata rricushami Diospu Reino ñalla mandagrishcata yachanchi. Lucas 21:7, 10, 11, 31​ta liyi.

5. Diospu Reinoca ¿imatati cunun rracun? Shamuc funllacunapishi ¿imatati rranga?

Taita Diosmunda yachachishami Jesusca mundo enteropi achca gentecunata tandachichun. Chimi achca guaranga alli shunguta charic gentecunaca Jesusta cazunata yachacun. Jesuspu nishcata cazuccunallami salvaringacuna. Taita Dios cugrishcata japisha nishaca Jesustami cazuna canchi. Revelación 7:9, 14, 16, 17​ta liyi.

Guaranga guatacuna jipami Diospu Reinoca callaripi cuenta cai allpataca shuc alaja paraisota rranga. Chi jipami Jesusca mandanata Taita Diosmu vueltachinga (1 Corintios 15:24-26). Cai alli noticiacunataca ¿pimuti güillasha ningui? Salmo 37:10, 11, 29​ta liyi.