Ciertochu ¿Bibliapi tiyishca alli noticiacunaca Diospu can?

1. Bibliataca ¿piti escribirca?

Bibliapimi cai allpallapiti alli, maravillata causanata güillan (Salmo 37:29). Bibliaca 66 uchilla librocunatami charin. Cai librocunataca Taita Diosta sirvic 40 jaricunami escribirca. Callari pichca librocunataca 3 mil 500 guatacuna guashamumi Moises escribirca. Cutin tucuri librotaca mil 900 guatacuna guashamumi apostol Juan escribirca. Bibliapi tiyishca yuyicunaca Taita Diosmundami shamun. Taita Diosca cai jaricunamu paipu yuyita cushami escribichirca (2 Samuel 23:2). Cai jaricunaca mana paipu yuyicunatachu escribirca Taita Diospu yuyicunatami escribirca. Chimundami Bibliaca Diospu Palabra can. 2 Timoteo 3:16 y 2 Pedro 1:20, 21​ta liyi.

Cai uchilla peliculata rricui: Bibliataca ¿piti escribirca?

2. Bibliataca ¿imamundati Diospu Palabra ninchi?

Bibliaca Taita Diosmundami shamun. Chimi Bibliaca shamuc funllacunapi ima tucugrishcata güillan. Gentecunaca chitaca na yachi pudinchichu (Josué 23:14). Taita Diosllami chitaca rri pudin. Isaías 42:9 y 46:10​ta liyi.

Biblia Diospu Palabra cashcamundami mana cutishuc librocuna cuenta can. Tuqui gentecuna Bibliata charichunmi achca shimicunapi llucshishca. Bibliata 40 jaricuna escribicpishi Bibliaca shuc solo yuyitami charin.a Bibliaca Taita Dios ñucunchita juyishcata rricuchin, ñucunchi alli causachunshimi ayudan. Chimundami achca gentecunaca Biblia Diospu Palabra cashcata crincuna. 1 Tesalonicenses 2:13​ta liyi.

Cai uchilla peliculata rricui: Bibliataca ¿imamundati Diospu Palabra can ninchi?

3. Bibliaca ¿imatati yachachin?

Bibliaca alaja, alli noticiacunatami charin. Taita Dios imata cugrishcatashimi yachachin. Bibliaca gentecuna imamunda guañushcata, cai allpa imamunda mana alaja, maravilla cashcatashimi yachachin. Shinaitimi güillan Taita Dios shamun funllacunapi cai allpaguan imata rragrishcata cutin alaja, maravillata causangapu. Revelación (Apocalipsis) 21:4, 5​ta liyi.

Bibliaca leycunata, alli yuyicunata, alaja consejocunatashimi charin. Shinaiti Bibliaca yachachinmi Taita Dios gentecunata imashina tratashcata. Chita rricushami pai ima laya cashcata yachi pudinchi. Inshaca Bibliallami Taita Diosta mas rricsingapu, paipu amigo cangapushi ayudan. Salmo 19:7, 11; Santiago 2:23 y 4:8​ta liyi.

4. Bibliata alli intindingapuca ¿imati ayudi pudin?

Gentecuna Bibliata alli intindichunca Jesusca Bibliamunda guaquin versocunata rricuchishami alli intindichidor carca. Shinaitimi cai folletoshi Bibliata alli intindingapu ayudan. Lucas 24:27, 45​ta liyi.

Seguromi quiquinca Taita Diospu alli noticiacunamunda mas yachasha ningui. Pero guaquin vecinocunaca Biblimundaca na uyasha ningacunachu, guaquincunacari fiñaringacunami. Shinashi quiquinca Taita Diosmunda yachanataca na saquinachu cangui. Bibliamunda yacheshallami mana guañushalla para siempre causangui. Juan 17:3​ta liyi.