Jeremías
39 Judamanta rey Sedequiasqa jisqʼon watastaña kamachisharqa. Chaypachataj chunka kaj killapi Babiloniamanta rey Nabucodonosorqa,* tukuy ejercitonwan jamuspa Jerusalenta muyuykorqa.+
2 Rey Sedequías 11 watastaña kamachishajtintaj, tawa kaj killapi, jisqʼon kaj pʼunchaypi, Babiloniamanta soldadosqa, Jerusalenpa perqasninta urmaykuchispa llajtaman yaykuykorqanku.+ 3 Babiloniamanta reypa tukuy kuraj kamachisnintaj, yaykuykuspa Chaupi Punku nisqapi tiyaykukorqanku.+ Paykunaqa karqanku: samgar Nergal-Sarézer, rabsarís Nebo-Sarsekim,* rabmag* Nergal-Sarézer, Babiloniamanta reypa waj kuraj kamachejkunasnin ima.
4 Chayta rikuspa Judamanta rey Sedequiaswan tukuy soldadosninwanqa chay llajtamanta ayqekorqanku.+ Paykunaqa tutan llajtamanta llojserqanku reypa huertan chayninta, iskay perqasniyoj punkunta. Chantá Arabá ñanta ayqekorqanku.+ 5 Caldeo soldadostaj Sedequiasta qhatiykuspa taripamorqanku Jericó llajtaj chʼin pampasninpi.+ Payta japʼiytawantaj Babiloniamanta rey Nabucodonosorman* aparqanku, payqa kasharqa Riblapi,+ Hamat+ jallpʼapi. Chaypi rey Nabucodonosorqa Sedequiasta juzgarqa. 6 Chay Riblapi Babiloniamanta reyqa Sedequiaspa rikunanta wawasninta wañuchicherqa. Wañuchichillarqataj Judamanta tukuy kurajkunatapis.+ 7 Sedequiastataj ciegoyacherqa, chantá cobremanta cadenaswan wataykorqa Babiloniaman apananpaj.+
8 Chaymantataj caldeosqa ruphaykucherqanku reypa wasinta,* jinallataj chay llajtapi kaj wasistapis.+ Chantá Jerusalén llajtaj perqasninta urmaykucherqanku.+ 9 Guardiaspa kamachejninku Nebuzaradanqa+ Babiloniaman presosta apakaporqa Jerusalén llajtapi puchoj runasta, caldeos ladoman pasapoj runasta, jinallataj tukuy puchoj runastapis.
10 Jinapis guardiaspa kamachejninku Nebuzaradanqa, Judá jallpʼapi saqellarqa allin wajcha runasta, pikunachus ni imayoj karqanku chaykunata. Chay pʼunchayllataj paykunaman qorqa uva huertasta, jallpʼasta ima trabajanankupaj.*+
11 Babiloniamanta rey Nabucodonosorqa* guardiaspa kamachejninku Nebuzaradanta kamacherqa imatachus Jeremiaswan ruwananta. Payqa kamacherqa: 12 “Jeremiasta maskʼaj riy, cuidamuytaj. Paytaqa ama imanankichu. Astawanpis imatachus mañakususqanta jaywanki”,+ nispa.
13 Chayrayku guardiaspa kamachejninku Nebuzaradán, chantá rabsarís* Nebusazbán, rabmag* Nergal-Sarézer, jinallataj Babiloniamanta reypa tukuy kurajkunasninpis, kamacherqanku 14 Guardiaspa Pationkumanta+ Jeremiasta orqhomunankuta. Chantá paykunaqa Guedaliasman+ Jeremiasta jaywarqanku wasinman pusananpaj. Guedaliasqa Ahicampa+ wawan karqa, Safanpa+ allchhin. Ajinamanta Jeremiasqa chay llajtayoj runas ukhupi tiyakorqa.
15 Jeremías Guardiaspa Pationkupi+ preso kashajtin, Jehová Diosqa payman nerqa: 16 “Etiopiamanta Ébed-Melecman+ kayta willamuy: ‘Angelesta kamachej Israelpa Diosnin Jehovaqa kayta nin: “Imatachus kay llajtaman apachimunayta nerqani chaytaqa juntʼasajpuni, chayqa mana allin imaschu, manaqa ñakʼariy. Chay pʼunchay chayamojtintaj juntʼakojta rikunki”, nispa’.
17 ”Jehová Diosqa nin: ‘Chay pʼunchay noqa salvasqayki. Pikunatachus qan manchachikunki chay runaspa makinkumanpis, mana jaywasqachu kanki’, nispa.
18 ”Jehová Diosqa nin: ‘Noqa librasqaykipuni, mana wañuchisqachu kanki.+ Noqapi atienekusqaykirayku kausayniykita salvanki’,+ nispa”.