Jueces

8 Chantá Efraín ayllumanta* kajkunaqa Gedeonta nerqanku: “¿Imaraykutaj mana wajyachiwarqaykuchuri? ¿Imaraykú mana willawarqaykuchu madianitaswan maqanakoj rishasqaykitari?”,+ nispa. Ajinata paykunaqa phiñakuspa Gedeonwan siminakorqanku.+ 2 Gedeontaj paykunaman kuticherqa: “Noqaj ruwasqayqa mana imapischu qankunaj ruwasqaykichejmanta nisqaqa. Qankuna Efraín ayllumanta kajkuna chay pisi ruwasqaykichejqa astawanraj valen,+ noqayku Abí-Ezermanta+ kajkuna ashkhata ruwasqaykumanta nisqaqa.* 3 Diosqa madianitaspa kuraj kamachejkunasninkuta Orebta, Zeebtawan+ makisniykichejman jaywaykorqa. ¿Imatataj noqa aswan allinta ruwasqani qankuna ruwasqaykichejmantari?”, nispa. Chayta uyarispa Efraín ayllumanta kajkunaqa manaña phiñakorqankuchu.

4 Gedeonwan 300 soldadosninwanqa, Jordán mayuman chayaspa mayuta chimparqanku. May saykʼusqasña kaspapis, enemigosninkuta qhatiykullarqankupuni. 5 Chantá Gedeonqa Sucotpi tiyakojkunamanta mañakorqa: “Ama jina kaspa, tʼantata qoripuwaychej ari noqawan jamoj soldadosniyman. Paykunaqa may saykʼusqaña kashanku. Noqaykoqa Madianmanta reyesta qhatiykushayku Zebahta, Zalmunatawan”, nispa. 6 Sucotmanta kuraj kamachejkunatajrí nerqanku: “¿Zebahta, Zalmunatawan japʼinkichejñachu soldadosniykiman tʼantata qonaykupaj?”, nispa. 7 Gedeontaj paykunaman kuticherqa: “Chayta niwasqaykichejrayku, Jehová Dios Zebahtawan Zalmunatawan makisniyman jaywaykojtin, kayman kutimuspa chʼin jallpʼamanta khishkaswan, khishka qhoraswantaj seqʼospa aychasniykichejta llikʼirasqaykichej”,+ nispa. 8 Chantá Penuelmanñataj wicharispa, kikillantataj mañakorqa chaypi tiyakojkunamantapis. Penuelpi tiyakojkunatajrí, Sucotpi tiyakojkuna jinallataj kuticherqanku. 9 Gedeontaj paykunaman nerqa: “Paykunata atipaytawan kutimuspa, kay torreykichejta urmachisaj”,+ nispa.

10 Zebahwan Zalmunawanqa Carcorpi kasharqanku, uj 15.000 soldadosninkuwan. Paykunalla puchorqanku inti llojsimuy ladomanta,+ 120.000 soldados wañuchisqas karqanku chaykunamanta. 11 Gedeonqa toldospi* tiyakojkunaj ñaninkuta wicharillarqapuni, Nobahmanta Jogbehamantawan+ inti llojsimuy ladonta. Chantataj enemigosninkoj campamentonkuman* kaymanta jinalla yaykuykorqanku. 12 Madianitaspa iskaynin reyesninku Zebahwan Zalmunawantaj ayqekorqanku. Gedeontajrí qhatiykuspa paykunata japʼimorqa. Campamentonkupi kaj soldadostaj mancharikuspa ni imanakuyta aterqankuchu.

13 Chaymanta Joaspa wawan Gedeonqa, maqanakumanta kutiporqa Heresman wicharej ñanninta. 14 Kutipushaspataj Sucotmanta uj joventa japʼerqa. Payta tapojtintaj, chay jovenqa Sucotmanta kuraj kamachejkunajta, kurajkunajta sutisninkuta qhelqaspa jaywarqa, 77 runaspa sutisninkuta. 15 Chantá Gedeonqa Sucotmanta runasman rispa nimorqa: “Kayqa Zebahwan Zalmunawan. Qankunaqa paykunarayku burlakuwaspa niwarqankichej: ‘¿Zebahta, Zalmunatawan japʼinkichejñachu saykʼusqa soldadosniykiman tʼantata qonaykupaj?’,+ nispa”. 16 Chantá Gedeonqa Sucotmanta kurajkunata japʼiytawan, chʼin jallpʼamanta khishkaswan, khishka qhoraswan ima seqʼorqa.+ 17 Chaymantataj Penuelpi torreta thuñimorqa,+ chay llajtamanta qharistapis wañurachimorqa.

18 Chantá Gedeonqa, Zebahtawan Zalmunatawan taporqa: “¿Imaynataj karqanku Tabor orqopi wañucherqankichej chay runasri?”, nispa. Paykunataj kuticherqanku; “Paykunaqa qanman rijchʼakorqanku. Sapa ujninku reypa wawanman rijchʼakorqa”, nispa. 19 Gedeontaj nerqa: “Paykunaqa hermanosniy karqanku, mamaypa wawasnin. Kausaj Jehová Diospa sutinpi juraspa niykichej: Paykunatachus mana wañuchiwajchejchu karqa chayqa, manallataj noqapis wañuchiykichejmanchu karqa”, nispa. 20 Chayta niytawan kuraj wawan Jeterta kamacherqa: “Kay runasta wañurachiy”, nispa. Chaywanpis Jeterqa as jovenllaraj kasqanrayku manchachikorqa, nitaj espadanta orqhorqachu. 21 Zebahwan Zalmunawantaj Gedeonta nerqanku: “Qhari kanki chayqa,* qan kikin wañuchiwayku”, nispa. Gedeontaj chay rato Zebahtawan Zalmunatawan+ wañucherqa. Chantataj camellosninkoj kunkasninkupi killaman rijchʼakoj kʼachanchas kasharqa chaykunata orqhorqa.

22 Chay qhepata israelitasqa Gedeonta nerqanku: “Qanqa madianitasmanta kacharichiwayku.+ Kunanqa qan kamachiwayku ari, chaymantataj wawasniykipis, allchhisniykipis kamachiwasqayku”, nispa. 23 Gedeontajrí paykunaman kuticherqa: “Mana noqachu, nitaj wawaychu qankunata kamachisonqachej. Manachayqa Jehová Dioslla kamachisonqachej”,+ nispa. 24 Chaywanpis Gedeonqa nillarqataj: “Ujllata mañakusqaykichej. Sapa ujniykichej qowaychej senqaman churakuna anillota, maqanakupi qhechusqaykichejta”, nispa. (Chay senqaman churakuna qori anillostaqa chay enemigosninku apaykachaj kanku, ismaelitas kasqankurayku).+ 25 Paykunataj kuticherqanku: “Ya, qosqayku”, nispa. Chayta niytawan uj jatun ropata pampaman mastʼarparqanku. Chaymantaj churarqanku maqanakupi qhechusqanku senqaman churakuna anillosta. 26 Gedeonman qorqanku chay qori anillosqa 19 kilos* pesarqa. Chantapis wajllata qorqanku killaman rijchʼakoj kʼachanchasta, aretesta, Madianmanta reykunaj kulli* ropasninkuta, camellospa kunkasninkupi kaj kʼachanchasta+ ima.

27 Chantá Gedeonqa chay qoriwan uj efodta* ruwarqa.+ Chaytataj Ofrá+ llajtanman churarqa tukuy rikunankupaj. Tukuy israelitastaj chayta yupaychayta qallarerqanku uj santota jina.*+ Gedeonpajpis, wasinmanta kajkunapajpis chayqa uj trampa jina karqa.+

28 Ajinata israelitasqa madianitasta+ atipaykorqanku. Chaymantapacha madianitasqa manaña ujtawan paykunaj contrankupi oqharikorqankuchu. Chaymanta qhepamanqa Gedeón kausakushajtin, 40 watasta allin kausay karqa chay jallpʼaspi.+

29 Joaspa wawan Jerubaalqa*+ wasinman tiyakoj riporqa.

30 Gedeonqa ashkha warmisniyoj kasqanrayku, 70 qhari wawasniyoj karqa. 31 Sichem* llajtayoj tanta warminpipis* qhari wawan tiyapullarqataj. Gedeontaj payman Abimélec+ sutita churarqa. 32 Joaspa wawan Gedeonqa ashkha watasta allinta kausakorqa, allin viejituñataj wañuporqa. Paytaqa pʼamparqanku tatan Joaspa sepulturanpi, abí-ezritaspa llajtanku Ofrapi.+

33 Gedeón wañupusqantawan, israelitasqa watejmanta Baal santosta yupaychallarqankutaj.*+ Paykunaqa Baal-Berit santota ajllakorqanku diosninku kananpaj.+ 34 Israelitasqa Jehová Diosninkumanta qonqaporqanku,+ muyuyninkupi kaj tukuy enemigosninkoj makisninkumanta kacharichishajtinpis.+ 35 Gedeonpa familiantapis mana khuyarqankuchu,* israelitasrayku allin imasta ruwashajtinpis. Gedeontaqa Jerubaal nillajtaj kanku.+