2 Crónicas

5 Ajinata Salomonqa tukucharqa imastachus Jehová Diospa wasinpaj ruwanan karqa chay imasta.+ Chantá Salomonqa apamorqa imastachus tatan David Diospaj tʼaqarqa chay imasta,+ jallchʼaykorqataj qolqe metalta, qorita, tukuynin waj imastawan cheqa Diospa* wasinman, valorniyoj imasta jallchʼana cuartosman.+ 2 Jaqay tiempopi Salomonqa tantacherqa Israelmanta kurajkunata, ayllusmanta* tukuynin kamachejkunata, jinallataj Israel familiasmanta tukuy umas kajkunatapis. Paykunaqa Jerusalenman jamorqanku Jehová Diospa trato ruwasqan arcata apamunankupaj Davidpa Llajtanmantapacha,+ nisunman Sionmantapacha.+ 3 Israelmanta tukuy runasqa fiestapaj* tantakorqanku reypa ñaupaqenpi, qanchis kaj killapi ruwakun chay fiestapi.+

4 Ajinamanta Israelmanta tukuy kurajkuna jamorqanku, levitastaj* arcata oqharerqanku.+ 5 Chantá paykunaqa apamorqanku arcata, tinkukuna toldota,+ imaschus toldopi Diospaj tʼaqasqa karqa chay tukuy imastawan. Chay tukuy imastaqa sacerdoteswan, levitaswan* apamorqanku. 6 Rey Salomonpis, payman jamunankupaj wajyachimorqa chay tukuynin israelitaspis, arcaj ñaupaqenpi kasharqanku. May chhika ovejasta, wakasta Diospaj qʼolacherqanku,*+ may chhikapuni karqa mana yupay atina. 7 Chantá sacerdotesqa Jehová Diospa trato ruwasqan arcata lugarninman apaykorqanku, wasej aswan ukhu kaj cuartonman, nisunman Aswan Santo Lugarman, querubinespa* lijrasninku* uraman.+ 8 Querubinespa lijrasninkoqa kicharisqa kasharqanku arcaj patanpi, ajinamanta querubinesqa arcatawan arcaj kʼaspisnintawan+ llanthusharqanku. 9 Arcaj kʼaspisnenqa jatuchaj karqa, puntasnenqa Santo Lugarmantapacha rikukoj, chay ukhu kaj cuartoj ñaupaqenmantapacha, jinapis jawamantaqa mana rikukojchu. Chaypitaj chay imasqa kunankama kashan. 10 Arca ukhupeqa ni ima karqachu, chay iskay pʼalta rumislla* karqa. Chay rumistaqa Moisés arcaman churasqa Horebpi kashajtinku,+ chaytaj karqa Jehová Dios israelitaswan tratota ruwashajtin,+ Egiptomanta llojsimushajtinku.+

11 Sacerdotesqa santo lugarmanta llojsimorqanku. (Chaypi kasharqanku chay sacerdotesqa tukuyninku llimphuchakorqanku+ mayqen grupomanta kajtinkupis).+ 12 Chaypacha tukuynin takej levitasqa,+ fino telaswan vistisqa kasharqanku, japʼisharqankutaj platillosta, cuerdasniyoj tocanasta, arpasta ima. Sayasharqankutaj altarpa qayllanpi inti llojsimuy ladopi, paykunataqa takichisharqanku Asaf,+ Hemán,+ Jedutún,+ wawasninku, hermanosninku ima. Paykunawan khuskataj 120 sacerdotes cornetasta tocasharqanku.+ 13 Cornetasta tocajkuna, takejkunapis ujllapi khuska Jehová Diosta alabasharqanku, graciastataj qosharqanku. Paykunaqa cornetasta, platillosta, chay waj tocanastawan sinchʼita tocaspa Jehová Diosta alabasharqanku “kʼacha kasqanrayku, munakuynin wiñaypaj kasqanrayku”.+ Chay ratopachataj Jehová Diospa wasinman phuyu juntʼaykorqa.+ 14 Sacerdotesqa phuyu juntʼaykusqanrayku mana chaypi qhepakuyta aterqankuchu ruwanasninkuta ruwanankupaj. Cheqa Diospa wasinmanqa Jehová Diospa jatun kaynin juntʼaykorqa.+