2 Reyes
3 Achabpa* wawan Jehoramqa+ Samariapi Israelta rey jina kamachiyta qallarerqa. Chaypacha rey Jehosafatqa 18 watastaña Judapi kamachisharqa. Jehoramqa 12 watasta rey jina Israelta kamacherqa. 2 Jehoramqa Jehová Diospa qhawayninpi sajra imasta ruwallarqataj, pero mana tatamaman jinapunichu. Payqa urmacherqa Baalta yupaychanapaj rumi pilarta, mayqentachus tatan ruwacherqa chayta.+ 3 Jinapis Jehoramqa Nebatpa wawan Jeroboanpa juchasninta ruwallarqataj, mayqenwanchus israelitasta juchaman urmacherqa chayta.+ Jehoramqa chay juchasta ruwallarqapuni.
4 Moabmanta rey Mesaqa ashkha ovejasta uywaj, chayrayku Israelpa reyninmanqa impuestota pagaj 100.000 corderosta,* 100.000 mana millman ruthusqa carnerostawan.* 5 Achab wañupusqantawan+ Moabmanta reyqa Israelpa reyninpa contranta oqharikorqa.+ 6 Chaypacha rey Jehoramqa Samariamanta llojsispa Israelmanta tukuynin soldadosta tantaykucherqa. 7 Chantapis Jehoramqa Judamanta rey Jehosafatman uj willayta apacherqa, kay jinata: “Moabmanta reyqa contrayta oqharikun. ¿Noqawan khuska riwajchu Moabwan maqanakamoj?”, nispa. Jehosafattaj kuticherqa: “Arí risaj.+ Noqaqa qanwan khuska risaj, soldadosniypis soldadosniykiwan khuska renqanku, caballosniypis caballosniykiwan khuska”,+ nispa. 8 Chantá taporqa: “¿Mayqen ñantataj wicharisun?”, nispa. Paytaj kuticherqa: “Edompa chʼin pampasninta rej ñanta”, nispa.
9 Ajinata Israelmanta reyqa purirerqa Judamanta reywan khuska, Edommanta reywan khuska.+ Paykunaqa qanchis diasta purispa karunta muyumorqanku, yakutaj niña karqachu ni soldadosninkupaj ni apasqanku animalesninkupajpis. 10 Israelmanta reytaj nerqa: “Ima desgraciataj kayri. Jehová Diosqa kinsantin reyesta wajyachimuwanchej moabitaspa makinkuman jaywaykunallawanchejpaj”, nispa. 11 Jehosafattaj taporqa: “¿Nichu kaypi kanman Jehová Diospa profetan paywan Jehová Diosta tapuchikunanchejpaj?”,+ nispa. Israelmanta reypa ujnin kamachintaj nerqa: “Arí kan, Safatpa wawan Eliseo.+ Payqa Eliaspa makinman yakuta jichʼaj”,*+ nispa. 12 Jehosafattaj nerqa: “Pay willawasunman imatachus Jehová Dios nisqanta”, nispa. Ajinapitaj Israelmanta reyqa Jehosafatwan khuska, jinallataj Edommanta reywan khuska Eliseojman uraykorqanku.
13 Eliseotaj Israelmanta reyman nerqa: “¿Imatá qanwan ruwanay kasqa?+ Riy ari tataykej profetasninman, mamaykej profetasninmanpis”,+ nispa. Israelmanta reytaj Eliseota nerqa: “Mana chaychu. Jehová Diosqa kinsantin reyesta wajyachimuwayku moabitaspa makinkuman jaywaykunallawaykupaj”, nispa. 14 Eliseotaj nerqa: “Kausaj Jehová Diospa sutinpi jurani, paymin angelesta kamachej, paytamin noqaqa sirvini,* paypa sutinpi jurani: Manachus Judamanta rey Jehosafat+ kaypi kashanman chayqa, qantaqa ni qhawarillaykimanpischu, ni uyarillaykimanpischu.+ 15 Kunanqa arpata tocayta yachaj runata pusamuychej”,+ nispa. Chay runa arpata tocayta qallarejtintaj Jehová Diospa espiritonqa* Eliseoman jamorqa.+ 16 Eliseotaj nerqa: “Jehová Diosqa nin: ‘Kay mayupi* larqʼasta allaychej sinrullata.* 17 Kaytamin Jehová Diosqa nin: “Qankunaqa mana wayrata rikunkichejchu ni paratapis. Kay mayumantaj yaku juntʼaykonqa,+ qankunataj chay yakuta tomankichej, uywasniykichejpis, waj animalesniykichejpis”, nispa’. 18 Chaytaj Jehová Diospaj qhawayninpeqa mana imapischu.+ Payqa Moab naciontapis makiykichejman jaywaykonqa.+ 19 Qankunataj sumaj perqasniyoj llajtasninta, jinallataj aswan sumaj llajtasnintapis tukuyninta thuñinkichej,+ sumaj sachʼasnintapis tukuyninta urmachinkichej, tukuynin yaku juturisnintapis pʼampaspa chʼakichinkichej, tukuynin sumajta poqoj jallpʼasninkumanpis rumista juntʼaykuchinkichej”,+ nispa.
20 Chantá tutamanta chʼaki mikhuy ofrendata jaywana horasta jina,+ yakoqa ujllata Edom ladomanta chayaykamorqa, chay mayumantaj juntʼaykorqa.
21 Tukuy moabitastaj uyarerqanku chay kinsa reyes paykunawan maqanakoj jamusqankuta. Chayrayku tukuynin qharista tantarqanku, pikunachari maqanakupaj armasta apaykachayta yachaj kanku chaykunata. Tukuyninkutaj nacionninkoj lindesninkupi* sayaykorqanku. 22 Moabitas tutamanta sayarejtinkutaj inteqa yakuta lliphipichisharqa. Moabitasqa chimpa ladomanta yakuta yawarta jina pukallata rikorqanku. 23 Paykunataj nerqanku: “Kayqa yawarpuni. Reyesqa purajmantachá espadawan wañuchinakorqanku. Moabitas, jaku saqueamuna”,+ nispa. 24 Moabitas israelitaspa campamentonkuman* yaykojtinkutaj, israelitasqa sayarispa wañuchiyta qallarerqanku, moabitastaj ayqekorqanku.+ Israelitastaj qhepankuta rispa Moab nacionman yaykusqankuman jina moabitasta wañuracherqanku. 25 Israelitasqa moabitaspa llajtasninkuta urmacherqanku, sapa ujninkutaj sumajta poqoj jallpʼasninkuman uj rumitakama choqarqanku, tukuynin jallpʼasninkuman rumista juntʼaykucherqanku. Tukuynin yaku juturistapis pʼampaspa chʼakicherqanku,+ tukuynin sumaj sachʼastapis urmacherqanku.+ Quir-Haréset llajtaj+ rumi perqasnillanña sayasharqa. Warakʼasniyoj soldadostaj chay llajtata muyuykuspa warakʼaykorqanku chay llajtata atipanankupaj.
26 Moabmanta reytaj chay maqanakupi atipachikushasqanta reparaspa 700 runasta tantarqa espadasniyojta, paykunaqa maqanaku chaupinta pasayta munarqanku Edompa reynin kasharqa chaykama,+ manataj aterqankuchu. 27 Chayrayku Moabmanta reyqa kuraj wawanta japʼispa, mayqenchus paypa cuentanmanta rey kanan karqa chay wawanta perqa patapi jaywanata jina ruphaykucherqa.+ Soldadostaj maytapuni israelitaspaj phiñakorqanku. Chayrayku manaña maqanakupi tinkorqankuchu, nacionesninkumantaj kutiporqanku.