Job
13 ”Arí, chay tukuy imastaqa kikin ñawisniywan rikuni,
ninrisniywanpis uyarini, entiendenitaj.
2 Imatachus yachasqaykichejtaqa noqapis yachallanitaj.
Qankunamanta nisqaqa mana imapipis pisichu kani.
3 Astawanqa Tukuy Atiyniyoj Dioswanpuni parlariyta munani.
Diospa ñaupaqenpi mana juchayoj kasqayta sutʼinchayta munani.+
4 Qankunatajrí llullerioswan manakajpaj qhawachishawankichej.
Tukuyniykichej qhasi manakaj doctores kankichej.+
5 Chʼinyasqata chʼinyakuwajchej chayqa,
yachayniyoj kawajchej.+
6 Ama jina kaspa uyariychej kay nisqayta,
allinta uyariychej kutichikusqayta.
7 Diospa sutinpi, ¿ima sajratapis parlallawajchejchu?
Paypa sutinpi, ¿llullakullawajchejchu?
8 ¿Cheqa Diosman* sayasqachu kankichej?
¿Payman sayasqachu kayta munankichej?
9 Sichus Dios allin allinta qhawaykusunkichejman chayqa, ¿allin imastachu qankunapi tarinman?+
¿Runata jinallachu paytaqa chʼaukiyawajchej?*
10 Diosqa kʼamisonqachejpuni,
sichus puraj uyas kasqaykichejta pakayta munashankichej chayqa.+
11 ¿Nichu Diospa jatun kaynenqa kharkatichisunkichej?
¿Nichu paytaqa manchachikunkichej?
12 Sumajta yuyaychakuspa parlasqaykichejqa ushpha jinalla qhasi manakaj.
Chay parlasqaykichejqa mana valenchu, tʼurumanta ruwasqa jarkʼakuna escudos jinalla kanku.
13 Chʼin kaychej, noqañataj parlarisaj.
Chaymantaqa imapis qhatiriwachun.
14 Wañuy pataman churakusaj.
Wañunay kajtenqa wañusaj.
15 Dios wañuchiwanman chaypis, paypi atienekuyman.+
Paypa ñaupaqenpi sutʼita niyman mana juchayoj kasqayta.
16 Chaywanqa Dios salvawanman.+
Imaraykuchus ñaupaqenmanqa ni pi sajra runapis* yaykuyta atinchu.+
17 Parlasqayta allinta uyariychej.
Sutʼinchasqaytapis uyariychej.
18 Kunanqa wakichisqaña kashani juiciopi parlanaypaj.
Yachani mana pantashasqayta.
19 ¿Pitaj ima sajramantapis juchachawanmanri?
Chʼinlla kayman chayqa wañuyman.
20 Iskay imasllata mañakusqayki Diosníy.
Chaywanqa manaña qanmanta pakakusajchu.
21 Amaña ñakʼarichiwaychu ari.
Amaña manchachiwaychu ari.+
22 Munajtiykeqa qanraj tapumuway, noqataj kutichimusqayki.
Manachayrí noqa tapurimusqayki, qantaj kutichimuwanki.
23 ¿Imapitaj pantasqani? ¿Imapitaj juchallikusqani?
Willaway ari, imapichus mana kasukusqayta, imapichus juchallikusqaytapis.
24 ¿Imaraykutaj noqamanta uyaykita pakanki?+
¿Imaraykutaj enemigoykita jina qhawawanki?+
25 Noqaqa kayman jaqayman wayraj apaykachasqan laqhella kani, wayraj apaykachasqan pajalla kani.
¿Chanta imajtintaj mancharichiwanki? ¿Imajtintaj qhatiykachawanki?
26 Qanqa chay jinata juchachashallawankipuni.
Joven kashaspa juchallikusqaymantataj pagachishawanki.
27 Chakisniytaqa cepoman* japʼiykuchiwanki,
imaynatachus purisqaytapis allin allinta qhawashanki,
lastroytapis ujmanta uj qhawarispa purishanki.
28 Ajinata runaqa* qʼetayapunmanpis jina tukukapun,
thutaj tukusqan ropa jina.