2 Crónicas
15 Diospa espiritonqa jamorqa Odedpa wawan Azariasman. 2 Chayrayku Azariasqa Asawan tinkoj rerqa, nerqataj: “Asá uyariway, tukuynin Judá, tukuynin Benjaminpis uyariwaychej. Sichus qankuna Jehová Diosllawanpuni kankichej chayqa,+ paypis qankunallawanpuni kanqa. Sichus payta maskʼankichej chayqa, payqa tarichikusonqachej.+ Payta saqerparinkichej chaytaj, paypis saqerparillasonqachejtaj.+ 3 Israel nacionqa unayta cheqa Diosta* mana yupaycharqachu, nitaj pi sacerdotepis runasman yachachejchu, ni leytapis kasojchu kanku.+ 4 Llakiypi kaspataj Israelpa Diosnin Jehovaman kutirikuspa payta maskʼarqanku, Diostaj paykunawan tarichikorqa.+ 5 Chaypachasqa mana viajanapaj allinchu karqa. Ashkha chʼajwas karqa, tukuy llajtasmanta runas paykunapura chʼajwasharqanku. 6 Diosqa imaymana llakiykunawan tukuy runasta musphaykachacherqa. Chayrayku nacionesqa purajmanta chinkachinakusharqanku, llajtaspis kikinta ruwanakusharqanku.+ 7 Kunantaj qankunaqa kallpachakuychej, amataj saykʼuychejchu,+ chay ruwasqaykichejmantaqa tʼinkata japʼinkichejpuni”, nispa.
8 Asaqa chay nisqanta uyariytawan, profeta Odedpa nisqantapis uyariytawan mana manchachikuspa chay millay santosta chinkacherqa tukuynin Judá nacionmanta,+ Benjamín ayllumanta,* Efraín orqospi japʼikaporqa chay llajtasmantapis. Jehová Diospa altarnintapis arreglaykorqa, mayqenchus Jehová Diospa torrenpa ñaupaqenpi karqa chayta.+ 9 Chantá Asaqa tantachimorqa tukuy runasta Judamanta Benjaminmantawan. Tantachimullarqataj paykunawan tiyakorqanku chay tukuynin forasterosta Efrainmanta, Manasesmanta, Simeonmantapis.+ Chaykunamanta ashkhas repararqanku Jehová Diosqa Asawan kashasqanta, chayrayku Israelmanta jampuspa Asaman ujchakorqanku. 10 Chay tukuyninku Jerusalenpi tantakorqanku rey Asá 15 watastaña kamachishajtin, kinsa kaj killapi. 11 Chay pʼunchay paykunaqa Jehová Diospaj qʼolacherqanku* 700 wakasta, 7.000 ovejastawan. Chay uywasqa maqanakupi qhechusqanku karqa. 12 Chantapis uj tratota ruwarqanku ñaupa tatasninkoj Diosninku Jehovata tukuy sonqonkuwan, tukuy kausayninkuwan* sirvinankupaj.+ 13 Sitajchus pillapis Israelpa Diosnin Jehovata mana sirvinchu chayqa, wañuchisqa kananta nerqanku jatunpis juchʼuypis kachun, qharipis warmipis kachun.+ 14 Ajinata paykunaqa jatunmanta parlaspa, kusisqa qhaparirispa, cornetasta, pututustawan waqachispa Jehová Diosman jurarqanku payta sirvinankuta. 15 Judamanta tukuy runasqa mayta kusikorqanku chay jurasqankumanta, chaytaqa tukuy sonqopuni jurarqanku. Paykunaqa Jehová Diosta tukuy atisqankuta maskʼarqanku, Diostaj paykunawan tarichikorqa,+ tukuynejpitaj paykunaman allin kausayta qorqa.+
16 Asaqa awelitan Maacatapis+ reina kasqanmanta orqhorparerqa, kʼullu posteta* yupaychananpaj manchay millay santota ruwachisqanrayku.+ Asaqa chay millay santota urmachispa tʼunata ruwarpaytawan Cedrón wayqʼopi ruphaykuchimorqa.+ 17 Waj diosesta yupaychanapaj pata lugarestaj Israelpi+ kakushallarqapuni.+ Jinapis Asaqa tukuy kausayninpi Diosta tukuy sonqo yupaycharqa.+ 18 Asaqa cheqa Diospa wasinman apamorqa imastachus tatanwan khuska Diospaj tʼaqarqanku chay imasta: qolqeta, qorita, ashkha imastawan.+ 19 Mana ima maqanakupis karqachu Asá 35 watasta kamachinankama.+