Números
36 Galaadpa mirayninmanta uma kajkunaqa qayllakorqanku Moisesman, israelitasmanta kurajkunaman ima. Galaadqa Makirpa+ wawan karqa, Makirtaj Manasespa wawan karqa, Manasestaj Josejpa wawan karqa. 2 Chay uma kajkunaqa qayllaykuspa nerqanku: “Wiraqochíy, Jehová Diosqa kamachisorqa suerteta* choqaspa israelitasman jallpʼasta partinaykita.+ Chantapis wiraqochíy, Jehová Diosqa kamachillasorqataj hermanoyku Zelofehadpa jallpʼasninta warmi wawasninman qopunaykita.+ 3 Kunanqa sichus chay warmi wawasnin waj ayllumanta* israelita qhariswan casarakonqanku chayqa, herencia jallpʼasninkoqa tatasniykoj herencianmanta qhechusqa kanqa. Chay jallpʼasqa mayqen ayllumanta kajkunawanchus casaranqanku chayman pasaponqa. Ajinamanta suertepi chayawarqayku chay jallpʼasqa pisiyaponqa. 4 Israelitaspaj Kacharichina Wata+ chayamojtinpis, chay warmispa herencia jallpʼankoqa, ima ayllumanta kajkunawanchus casarakonqanku chay ayllupaj kaponqa. Ajinamanta chay jallpʼasqa manaña tatasniykoj ayllunpatañachu kanqa”, nispa.
5 Chaymanta Moisesqa israelitasman kamacherqa Jehová Diospa nisqanta: “Josejpa mirayninpa ayllunmanta kajkunaqa maychus kajllata parlashanku. 6 Jehová Diosqa kayta kamachin Zelofehadpa wawasninpaj: ‘Paykunaqa pillawanpis casarakuyta atinku, chaywanpis casarakunanku tiyan tatankoj ayllunmanta kaj qharisllawan. 7 Israelitaspa herencia jallpʼankoqa mana uj ayllumanta waj aylluman pasananchu tiyan. Tukuy israelitasqa ñaupa tatasninkoj ayllunman chayaj jallpʼata japʼinanku tiyan. 8 Israelita ayllus ukhupi sichus uj warmejta herencia jallpʼan tiyapun chayqa, tatanpa ayllunmanta kaj qharillawan casaranan tiyan.+ Ajinamanta israelitas ñaupa tatasninkoj jallpʼasninkuta japʼinallankupajpuni. 9 Herencia jallpʼasqa mana uj ayllumanta waj aylluman pasananchu tiyan. Tukuy israelita ayllusqa paykunalla jallpʼasninkuta japʼinanku tiyan’, nispa”.
10 Zelofehadpa warmi wawasnenqa, Jehová Dios Moisesman kamachisqanman jina ruwarqanku.+ 11 Paykunaqa tatankoj hermanosninpa wawasninkuwan casarakorqanku. Zelofehadpa chay warmi wawasnenqa karqanku Mahlá, Tirzá, Hoglá, Milcá, Noá ima.+ 12 Paykunaqa Josejpa wawan Manasespa familiasninmanta kaj qhariswan casarakorqanku. Ajinamanta herencia jallpʼankoqa tatankoj ayllun ukhullapipuni karqa.
13 Chay kamachiykunata, chay leyestawan Jehová Diosqa Moisesman kamacherqa israelitasman willananpaj, Moab chʼin pampaspi, Jordán mayu qayllapi, Jericó chimpapi.+