Jeremías
8 Jehová Diosqa nin: “Chaypachaqa sepulturasmanta orqhonqanku Judamanta reyespa tullusninkuta, kuraj kamachejkunaj tullusninkuta, sacerdotespa tullusninkuta, profetaspa tullusninkuta, jinallataj Jerusalén llajtayojkunaj tullusninkutapis. 2 Chaykunatataj mastʼallata choqarparenqanku intej kʼanchayninman, killaj kʼanchayninman, jinallataj imaschus cielopi kan chay imaspa kʼanchayninmanpis. Paykunaqa tukuy chaykunata munakorqanku, sirverqanku, yupaycharqanku, maskʼarqankutaj. Chantapis tukuy chaykunaman qonqorikorqanku.+ Chayrayku chay tullustaqa ni pi oqharenqachu, nitaj pipis pʼampanqachu, astawanpis wanu jina jallpʼa patapi choqarayanqanku”,+ nispa.
3 Angelesta kamachej Jehová Diosqa nin: “Kay sajra nacionmanta puchojkunaqa, may lugaresmanchus paykunata apachisaj chay tukuynin lugarespi wañuyta ajllanqanku kausaymanta nisqaqa”, nispa.
4 “Paykunamanqa ninki: ‘Jehová Diosqa kayta nin:
“¿Paykunaqa urmaspa manañachu watejmanta sayarenqanku?
Sichus ujninku qhepaman kutirenqa chayqa, ¿nichu ujninpis kutirillanqataj?
5 ¿Imajtintaj kay Jerusalén llajta qhenchachakunanpaj atipakullanpuniri?
Paykunaqa llulleriosta sumajta japʼikunku.
Nitaj noqaman kutinpuyta munankuchu.+
6 Sumajta uyarerqani parlasqankuta, jinapis parlasqankoqa mana walejchu karqa.
Ni pipis sajra ruwasqanmanta pesachikuspa nerqachu: ‘¿Imatataj kayta ruwaniri?’,+ nispa.
Sapa ujninku imata jina aysakunku watejmanta rinankupaj maymanchus tukuy rinku chayman, imaynatachus caballoqa maqanakuman kachaykukun ajinata.
7 Cigüeñapis yachan ima tiempochus waj lugarman phawapunan kasqanta.
Jurkʼutaspis waj pʼisqospis tiemponpi kutinpunku.
Kay llajtaytajrí mana reparakunchu maykʼajchus noqa Jehová Dios paykunata juzganayta”,+ nispa’.
8 ‘¿Ima uyaykichejwantaj niwajchej “yachayniyoj kayku, Jehová Diospa leynintapis* rejsiyku” nispari?
Chay llulla secretariosqa* llulla imasllata lapizninkuwan qhelqarqanku.+
9 Yachayniyojkunaqa pʼenqaypi rikhurichisqa kanku.+
Paykunaqa mancharikonqanku, japʼichikonqankutaj.
Paykunaqa Jehová Diospa palabrasninta qhesacharqanku.
Chanta, ¿ima yachayniyojtaj kankuri?
10 Chayrayku warmisninkutaqa waj qharisman qopusaj,
jallpʼasninkutapis waj runasman qopusaj.+
Imaraykuchus paykunaqa juchʼuypis jatunpis engañaspa gananciata japʼinku.+
Tukuypuni chʼaukiyanku, profetasmantapacha sacerdoteskama.+
11 Paykunaqa llajtaypa warmi wawanpa nanasqasninta* patallanmanta jampiykuyta munanku:
“Allin kausay kan. Allin kausay kan”, nispalla.
Chaypajqa mana allin kausay kanchu.+
12 ¿Paykuna pʼenqakunkuchu millay imasta ruwasqankumanta?
Paykunaqa ni imaynata pʼenqakunkuchu.
Imachus pʼenqakuy kasqantapis mana yachankuchu.+
Paykunaqa urmanqanku urmajkunaj chaupinkuman.
Noqa castigajtiy paykunaqa chankaykachaspa* urmanqanku’,+ nispa nin Jehová Diosqa.
13 Jehová Diosqa nin: ‘Paykunata pallaytawan kantumanta tukuchisaj’.
‘Uva sachʼapeqa ni uj uva puchonqachu, higo sachʼapipis ni uj higo puchonqachu, laqhesninkupis chʼakiponqanku.
Tukuy ima qosqayta pierdenqanku’, nispa”.
14 “¿Imajtintaj kaypi chukushanchejri?
Tantaykukuspa yaykunachej sumaj perqasniyoj llajtasman,+ chaypi wañunanchejpaj.
Jehová Diosninchejqa noqanchejta tukuchiwasun.
Payqa venenoyoj yakuta qowanchej,+
Jehová Diospa contranta juchallikusqanchejrayku.
15 Allin kausay kananta suyarqanchej, nitaj ima allinpis jamorqachu.
Sanoyachisqa kananchej tiempota suyasharqanchej, jinapis manchariylla tiyan.+
16 Caballospa phur phur nisqankoqa Danmantapacha uyarikamun.
Caballosninku wi ji ji ji nispa nejtinku,
jallpʼantin kharkatitin.
Paykunaqa nacionman yaykuykamuspa tukuy ima kajta tukuchinku.
Paykunaqa llajtata* tukuchinku, tukuy chaypi tiyakojkunatapis”.
17 Jehová Diosqa nin: “Qankunaman katarista kachamushaykichej,
venenoyoj katarista, chay kataristaqa mana pipis umanta muyuchiyta atinmanchu.
Chay katarisqa khanisonqachejpuni”, nispa.
18 Llakiyniypajqa mana jampi kanchu.
Sonqoyqa manchayta nanawan.
19 Llajtaypa warmi wawanqa
yanapata mañakuspa karu nacionmantapacha qhaparikamun:
“¿Nichu Jehová Diosqa Sionpi kashan?
¿Nichu reyninpis chaypi kashan?”, nispa.
“¿Imajtintaj phiñachiwankichej santosniykichejta yupaychaspari?
¿Imajtintaj phiñachiwankichej waj llajtamanta qhasi manakaj diosesta yupaychaspari?”.
20 “Cosecha tiempopis tukukunña, qʼoñi tiempopis pasanña.
Chaywanpis noqanchejtaqa mana pipis salvawanchejchu”.
21 Llajtaypa warmi wawanpa nanasqasninrayku sonqoy nanawan.+
May llakisqa kashani.
Manchariywan kharkatitishani.
22 ¿Nichu Galaadpi ima balsamollapis* kasqa?+
¿Nichu chaypeqa doctorllapis kasqa?+
¿Imajtintaj llajtaypa warmi wawan mana sanoyanchuri?+