Números

22 Israelitasqa chaymanta rispallapuni Moab chʼin pampaspi toldo wasisninkuta* armarqanku. Chayqa kashan Jericó chimpapi, Jordán mayu qayllapi.+ 2 Ziporpa wawan Balacqa+ yacharqa imatachus israelitas amorreosta ruwasqankuta. 3 Moabitaspis mayta mancharikorqanku israelitas may chhika kasqankumanta. Paykunaqa israelitasta rikuspa manchariywan wañusharqankuña.+ 4 Chayrayku moabitasqa Madianmanta kurajkunaman nerqanku:+ “Kay chhika runasqa qʼalatachá jallpʼanchejta tukuchenqanku, imaynatachus uj toro pastota tukuchin ajinata”, nispa.

Chaypacha Moabpeqa Ziporpa wawan Balac rey kasharqa. 5 Paytaj Beorpa wawan Balaamman+ runasta kacharqa. Balaamqa tiyakusharqa llajtan Petorpi, chaytaj kashan Éufrates mayu qayllapi. Balacqa kayta Balaamman nichimorqa: “Egiptomanta may chhika runas llojsimunku, paykunaqa tukuy kay jallpʼasman juntʼaykamunku,+ ñaupaqeypitaj tiyakushanku. 6 Kunanqa jamuy ari kay runasta maldecipunawaykipaj.+ Paykunaqa noqamanta aswan atiyniyoj kanku. Ichapis paykunata atipayman, kay jallpʼasmantataj qharqoyman. Noqa allinta yachani qan pitapis bendicejtiykeqa bendecisqa kasqanta, maldicejtiykitaj maldecisqa kasqanta”, nispa.

7 Moabmanta kurajkunawan Madianmanta kurajkunawanqa qolqe aparisqa rerqanku adivinasqanmanta paganankupaj. Ajinata paykunaqa Balaampaman rerqanku.+ Chayaspataj payman willarqanku imatachus Balac nisqanta. 8 Balaamtaj paykunaman nerqa: “Kunan chʼisi kaypi puñukuychej. Noqataj qʼaya nisqaykichej imatachus Jehová Dios niwanqa chayta”, nispa. Ajinapi Moabmanta kuraj kamachejkunaqa chay chʼisi Balaampajpi puñukorqanku.

9 Chantá Diosqa Balaamman nerqa:+ “¿Pikunataj kanku qanwan kashanku chay runasri?”, nispa. 10 Balaamtaj Diosman* kuticherqa: “Kay runastaqa kachamusqa Moabmanta Ziporpa wawan rey Balac, kayta willanawankupaj: 11 ‘Egiptomanta may chhika runas llojsimuspa, tukuy kay jallpʼasman juntʼaykamushanku. Kunanqa jamuy ari kay runasta maldecipunawaykipaj.+ Ichapis paykunawan maqanakuspa kaymanta paykunata qharqoyman’, nispa”. 12 Diostajrí Balaamman nerqa: “Ama chay runaswan riychu. Ama israelitasta maldecinkichu, imaraykuchus paykunataqa noqa bendecini”,+ nispa.

13 Qʼayantintaj Balaamqa tutamanta jatarispa Balacpa kachasqan kuraj kamachejkunata nerqa: “Nacionniykichejman kutipuychej. Jehová Diosqa mana munanchu qankunawan rinayta”, nispa. 14 Moabmanta kuraj kamachejkunataj kutipuspa Balacman willamorqanku: “Balaamqa mana munanchu noqaykuwan jamuyta”, nispa.

15 Balactajrí watejmanta waj kuraj kamachejkunatañataj kacharqa. Paykunaqa aswan ashkha karqanku, aswan jatunpaj qhawasqastaj ñaupajta kachasqasninmanta nisqaqa. 16 Paykunataj Balaamman rispa willamorqanku: “Ziporpa wawan Balacqa kayta nimusunki: ‘Ama jina kaspa jamuwaypuni ari, ama mana niwaychu. 17 Noqaqa imatachus munanki chayta qosqayki, imatachus mañawanki chayta ruwapusqayki. Chayrayku jamullay ari, kay runasta maldecipuway’, nispa”. 18 Balaamtajrí Balacpa kamachisninman kuticherqa: “Sichus Balac wasinta qolqewan orowan juntʼata qowanman chaypis, noqaqa manapuni ni juchʼuytapis ni jatuntapis ruwaymanchu Jehová Diosniypa kamachiwasqanta pʼakispaqa.+ 19 Ama jina kaspa, qankunapis kunan chʼisi kaypi qheparikuychej ari. Noqataj Jehová Diosta waturisaj, imatawanchus niwanqa”,+ nispa.

20 Diostaj chay chʼisi Balaamman nerqa: “Sichus chay runas qanta wajyasoj jamunku chayqa, paykunawan rillay. Jinapis imatachá noqa nisqayki chayllata parlanki”,+ nispa. 21 Balaamqa qʼayantin tutamanta jatarikuspa china burronta caronaykuytawan* Moabmanta kuraj kamachejkunawan rerqa.+

22 Balaamqa burronpi montasqa risharqa, iskay kamachisninta pusariykukuspa. Diostajrí mayta phiñakorqa Balaam rishasqanmanta. Chayrayku Jehová Diospa angelnenqa ñanpi sayaykorqa payta jarkʼananpaj. 23 Balaampa burrontaj rikorqa Jehová Diospa angelninta, espada oqharisqa ñanpi sayashajta. Chayrayku ñanmanta llojsinayarqa. Balaamtajrí ñanman kutiykuchimunanpaj burronta seqʼoyta qallarerqa. 24 Chantá Jehová Diospa angelnenqa, uva huertas chaupinta rej kʼullku ñanpiñataj sayaykorqa. Chay ñanqa puraj ladonpi rumi perqayoj karqa. 25 Burrotaj Jehová Diospa angelninta rikorqa, perqaman kʼaskaykuspataj Balaampa chakinta perqaman ñitʼiykorqa. Chayrayku Balaamqa watejmanta burronta seqʼoyta qallarerqa.

26 Jehová Diospa angelnintaj aswan ñaupajman rispa uj kʼullku ñanpiñataj sayaykorqa. Chay ñanmantaqa mana karqachu ni pañaman ni lloqʼeman llojsinapaj. 27 Burroqa Jehová Diospa angelninta rikuytawan pachanpi lastʼarparqa.* Balaamtaj mayta phiñakuspa burronta tojnunwan seqʼollarqapuni. 28 Chantá Jehová Diosqa burrota parlaricherqa.*+ Burrotaj Balaamta nerqa: “¿Imanarqaykitaj noqa qanta kay kinsa kutitaña seqʼonawaykipajri?”,+ nispa. 29 Balaamtaj burronman kuticherqa: “Qanqa sonsopis kayman jina burlakushawanki. Sichus makiypi uj espada kanman chayqa, kunitan wañuchiykiman”, nispa. 30 Burrotaj Balaamman nerqa: “Noqaqa qanpa burroyki kani, qanqa unaymantapachaña noqapi purinki. ¿Maykʼajllapis noqaqa ajinata ruwajchu kayki?”, nispa. Balaamtaj kuticherqa: “Mana”, nispa. 31 Chantá Jehová Diosqa Balaampa ñawisninta kicharerqa.+ Balaamtaj rikorqa Jehová Diospa angelnin ñanpi espada oqharisqa sayashajta. Rikuspataj chay ratopacha qonqoriykukuspa pampakama kʼumuykukorqa.

32 Jehová Diospa angelnintaj Balaamta nerqa: “¿Ima nispataj burroykita kay kinsa kutita seqʼonkiri? Noqamin qanta jarkʼasoj llojsimuni. Rishasqaykeqa mana munasqayman jinachu.+ 33 Burroykeqa noqata rikuwaspa kinsa kutita ñaupaqeymanta ladeakorqa.+ Sichus ñaupaqeymanta mana ladeakunman karqa chayqa, qantaqa wañuchiykimanña karqa, burrollaykita mana wañuchiymanchu karqa”, nispa. 34 Balaamtaj Jehová Diospa angelninman nerqa: “Noqaqa juchallikuni. Mana yacharqanichu ñanpi sayaykuspa jarkʼashawasqaykita. Sichus kay rishasqay qanpaj mana allinchu chayqa, kaymanta kutiripusaj”, nispa. 35 Jehová Diospa angelnintajrí Balaamman nerqa: “Rillay chay runaswan. Chaywanpis imatachus noqa nisqayki chayllata parlanki”, nispa. Ajinamanta Balaamqa rillarqapuni Balacpa kachasqan kuraj kamachejkunawan.

36 Balaam jamushasqanta yachaytawan Balacqa usqhayllata rerqa payta taripaj Moabpi kaj ujnin llajtaman. Chay llajtaqa kashan Arnón kantupi, Moab jallpʼaj tukukuyninpi. 37 Taripaspataj Balacqa Balaamman nerqa: “Chay jinata wajyachimuyki. ¿Imaraykutaj mana jamuwarqankichuri? ¿Manachu yuyarqanki jamojtiykeqa imatachus munasqaykita qosunayta?”,+ nispa. 38 Balaamtajrí Balacman kuticherqa: “Pero kaypiña kaneqa. Chaywanpis mana munasqaytachu imatapis parlasaj. Imatachus Dios niwanqa chayllata parlasaj”,+ nispa.

39 Chaymanta Balaamqa Balacwan rerqa Quiryat-Huzotman. 40 Chaypitaj Balacqa wakasta, ovejasta ima ñakʼarqa.* Chay aychamanta wakintataj Balaamman qorqa, paywan kasharqanku chay kuraj kamachejkunamanwan. 41 Qʼayantin paqarintaj Balacqa Balaamta pusarqa Bamot-Baalman. Chay patamanta Balaamqa tukuy israelitasta rikorqa.+