Números
8 Jehová Diosqa Moisesman nerqa: 2 “Aaronman kayta niy: ‘Candeleroj* qanchis mecherosninta japʼichispaqa, ñaupaqen ladoman kʼanchananpaj jinapuni churanki’,+ nispa”. 3 Aarontaj ajinata ruwarqa: Payqa candeleroj+ mecherosninta japʼiracherqa ñaupaqen ladoman kʼanchananpaj jina, Jehová Dios Moisesman kamachisqanman jina. 4 Chay candeleroqa oromanta karqa, chaupi kʼaspinmantapacha tʼikasninkama martillowan takasqa.+ Candeleroqa ruwasqa karqa Jehová Dios Moisesman mosqoypi jina rikuchisqanman jina.+
5 Jehová Diosqa Moisesman nillarqataj: 6 “Levitasta israelitas ukhumanta tʼaqay, paykunatataj llimphuchay.+ 7 Kay jinata paykunata llimphuchanki: Paykunaman chʼajchuykunki juchata llimphuchaj yakuwan. Paykunataj navajawan umankuta pʼajlakuchunku, cuerponkupi tukuy pelosninkutapis rasurakuchunku, ropasninkutapis tʼajsakuchunku.+ Ajinamanta llimphupaj qhawasqa kanqanku. 8 Chantá paykunaqa uj torillota+ aysamuchunku, apamullachunkutaj aceitewan chajrusqa ñutʼu jakʼuta, chʼaki mikhuy ofrendapaj.+ Qanpis uj torillota aysamullankitaj jucharayku ofrendapaj.+ 9 Chantataj levitasta qayllaykuchimunki tinkukuna toldoj ñaupaqenman, chantapis tukuynin israelitasta tantachimunki.+ 10 Levitasta Jehová Diospa ñaupaqenman qayllaykuchejtiyki, israelitasqa makisninkuta churachunku levitaspa umasninkuman.+ 11 Aarontaj levitasta jaywanqa kuyuchisqa ofrendata jina Jehová Diospa ñaupaqenpi,+ israelitaspa sutinkupi. Chaymantaraj levitasqa Jehová Diospaj ruwanasninkuta ruwayta qallarenqanku.+
12 ”Chantá levitasñataj torillospa umasninkuman makisninkuta churanqanku.+ Chantataj chay torillosqa Jehová Diosman jaywasqa kanqa, ujnenqa jucharayku ofrendapaj, ujnintaj qʼolachina* ofrendapaj, ajinamanta levitas perdonta tarinankupaj.+ 13 Levitastaqa sayachinki Aaronpa ñaupaqenpi, wawasninpa ñaupaqenpiwan. Jehová Diosmantaj paykunata jaywanki kuyuchisqa ofrendata jina. 14 Ajinata levitastaqa tʼaqapuwanki israelitas ukhumanta, noqajta kanankupaj.+ 15 Chantá levitasqa tinkukuna toldopi ruwanasta ruwanqanku. Ajinata levitasta llimphuchanki llimphupaj qhawasqa kanankupaj, paykunatataj jaywawanki kuyuchisqa ofrendata jina. 16 Paykunaqa entregasqaña kanku, israelitas ukhumanta noqapaj tʼaqasqaña kanku. Noqa paykunata ajllakuni israelitaspa tukuy kuraj wawasninkoj cuentanmanta.+ 17 Israelitaspa tukuy kuraj wawasninkoqa noqajta kanku, uywasninkoj ñaupaj kaj uñasninkupis noqajta kanku.+ Maypachachus Egiptopi tukuy kuraj wawasta wañucherqani chaypacha, noqa paykunata tʼaqakorqani.+ 18 Levitasta ajllakuni israelitaspa tukuy kuraj wawasninkoj cuentanmanta. 19 Levitasqa israelitas ukhumanta entregasqa kanqanku Aaronta, wawasnintawan sirvinankupaj, israelitaspa cuentanmanta tinkukuna toldopi ruwanasta ruwanankupaj,+ sacerdotestataj yanapanankupaj israelitas perdonta tarinankupaj. Ajinamanta israelitasqa santo lugarman mana qayllaykonqankuchu, nitaj ima castigopis paykunaman chayanqachu”.+
20 Moiseswan, Aaronwan, tukuy israelitaswanqa chay tukuyta juntʼarqanku Jehová Dios levitasmanta Moisesman kamachisqanman jina. 21 Levitasqa llimphuchakorqanku, ropasninkutapis tʼajsakorqanku.+ Chantataj Aaronqa paykunata kuyuchisqa ofrendata jina jaywarqa Jehová Diospa ñaupaqenpi.+ Chantá Aaronqa uj ofrendata jaywarqa levitas juchasninkumanta perdonta tarinankupaj, ajinamanta llimphuchasqa kanankupaj.+ 22 Chaymantataj levitasqa Dioswan tinkukuna toldopi imachus ruwana kajta ruwayta qallarerqanku. Chaytataj Aaronwan wawasninwan ruwacherqanku. Jehová Dios Moisesman levitasmanta kamachisqanman jina paykunawan ruwarqanku.
23 Chantá Jehová Diosqa Moisesman nerqa: 24 “Kayqa levitaspaj kanqa: Levita qharisqa 25 watasniyojmanta pataman tinkukuna toldopi imatachus ruwanankuta ruwayta qallarenqanku. 25 Cincuentayojmanta patamantaj chay ruwanasmanta llojsiponqanku, manaña chay ruwanasta ruwanqankuchu. 26 Paykunaqa hermanosninkuta yanapayta atinku, pikunachus tinkukuna toldopi ruwanasninkuta ruwanku chaykunata, chaywanpis manaña chaypi llankʼanankupunichu kanqa. Chayta ruwanki levitaswan ruwanasninkuwanpis”,+ nispa.