Job
41 ”¿Atiwajchu Leviatanta*+ anzuelowan japʼiyta?
¿Atiwajchu qallunmanta waskhawan wataykuyta?
2 ¿Atiwajchu senqanta waskhawan pasachiyta?
¿Atiwajchu fierro ganchowan quijadanta pasaykuchiyta?
3 ¿Leviatanqa rogakusonqachu khuyarinaykita?
¿Kʼachamantachu parlarisonqa?
4 Leviatanqa, ¿tratotachu qanwan ruwanman
wañunankama sirvisunanpaj?
5 ¿Pʼisqowan jinachu Leviatanwanqa pujllakuwaj?
¿Pujllanata jinachu wataykuwaj imillitasniyki pujllakunankupaj?
6 ¿Ranqherosqa qhechunakunkumanchu Leviatanta rantikapunankupaj,
chayri partinakunkumanchu?
7 ¿Atiwajchu qaranman juntʼaykuchiyta arpón* nisqa tʼojsinasta?+
¿Atiwajchu umanta juskʼurayta pescado japʼina tʼojsinaswan?
8 Makiykiwan llankharejtiykeqa,
qanwan qonakusqanta ni jaykʼaj qonqankichu, nitaj ujtawanpis llankhaykuyta yuyallankipischu.
9 Runasqa ni jaykʼaj Leviatanta atipankumanchu.
Qanqa Leviatanta rikuspallaraj mancharikuwaj.
10 Ni pipis Leviatantaqa phiñachiyta munanchu.
Ajinaqa, ¿pitaj noqaj contrayta sayaykunman?+
11 ¿Pitaj imatapis qowasqa kutichipunaypaj?+
Jallpʼantinpi tukuy ima kajqa noqajta.+
12 Kunanqa parlarisaj Leviatanpa chakisninmanta,
sinchʼi kallpanmanta, sumaj ruwasqa cuerponmantapis.
13 ¿Pitaj phatu* qaranta chʼuskisqa?
¿Pitaj simin chaynejman chimpaykullanman?
14 ¿Pitaj chay chhikan siminta kicharinman,
chay jina mancharina kirusniyojta?
15 Wasanpi escamasnenqa sinrulla,*
sumaj kʼaskanasqataj kashanku.
16 Escamasnenqa sumaj japʼinasqa kashanku,
chaupinkutaqa ni wayrapis pasanchu.
17 Allin kʼaskanasqa kashanku,
sumaj japʼinasqa kashanku, ni pipis kʼaskarachiyta atinmanchu.
18 Achhispaqa nina chispasta phawarachin,
ñawisninpis kʼancharin sutʼiyayta intej kʼanchaynin jina.
19 Siminmanta lliuj lliujkuna llojsimun,
nina chispaspis phawaramun.
20 Senqanmanta qʼosñi llojsirimun,
totorawan enqhasqa hornomanta jina.
21 Samaynillanwan carbonesmanpis ninata japʼiykuchin,
siminmantataj nina lauray llojsimun.
22 Kunkanpeqa may jina kallpayoj,
paywan tinkukojkunaqa maytapuni mancharikunku.
23 Wijsa qaranqa allin chojru,*
fierro metalmantapis kanman jina, mana chʼuskiy atina.
24 Sonqonqa rumi jina duro,
molino rumi jinapuni.*
25 Leviatán sayarejtenqa kallpasapaspis mayta mancharikunku.
Leviatanqa yakuta qhollchoqeyarichispa mancharinata kuyurin.
26 Payman ima espada chayajtinpis ni imananchu,
ni lanzapis, ni dardopis, nillataj flechapis.+
27 Leviatanpajqa fierropis paja jinalla,
cobrepis mullpha* kʼullu jinalla.
28 Flechaqa mana Leviatanta ayqechinchu.
Rumiwan warakʼajtinkupis, paypajqa pajawanpis warakʼankuman jinalla.
29 Kʼaspipis paypajqa paja jinalla,
jabalinata sonachisqankumantapis asikun.
30 Wijsa qaranqa filochasqa kʼanallasniyoj jina.
Tʼurupitaj jatun tabla jina* qhatatakun.+
31 Mar qochaman yaykuspaqa yakuta mayta qhollchoqeyarichin,
aceiteyoj mankapis tʼimpurishanman jina.
32 Mar qochapi purispaqa qhepanpi lliphipirishajta phosoqota saqen,
yakoqa yuraj chujchayojpis kanman jina.
33 Kay jallpʼapi mana waj animal kanchu Leviatán jinaqa.
Chay animalqa ni imata manchachikunanpaj ruwasqa karqa.
34 May mayta purej animalesmanpis payqa sayaykun.
Leviatanqa tukuynin sajra phiña animalespa reynin”, nispa.