LEVÍTICO

1 Jehová Diosqa Moisesta wajyamorqa Dioswan tinkukuna toldomanta,+ nerqataj: 2 “Israelitasman* niy: ‘Pichus uywasninmanta Jehová Diosman jaywananpaj ofrendasta apamojqa, apamuchun wakasninmanta, ovejasninmanta chayri cabrasninmanta.+

3 ”’Sichus mayqellanpis wakasninmanta qʼolachina* ofrendata apamonqa chayqa, uj sano torillota apamuchun.+ Chaytaqa tukuy sonqo apamuchun+ Jehová Diospa ñaupaqenman, tinkukuna toldo punkuman. 4 Chantá makinta churanqa chay qʼolachina ofrendaj umanman. Diostaj chayta allinpaj qhawanqa, juchasnintapis perdonanqa.

5 ”’Chay torilloqa ñakʼasqa* kanqa Jehová Diospa ñaupaqenpi. Aaronpa wawasnin sacerdotestaj,*+ chay torilloj yawarninta Diosman jaywanqanku. Chantataj chay yawarwan chʼajchonqanku altarpa* muyuynintinta,+ mayqenchus kashan tinkukuna toldo punkupi chayta. 6 Chantá chay qʼolachina ofrendaj qaranqa chʼuskisqa* kanqa, aychanpis chhikan chhikan khuchurasqa kanqa.+ 7 Aaronpa wawasnin sacerdotestaj nina brasasta altarman+ apamonqanku, chay patamantaj llantʼata churaykonqanku. 8 Chay laurashaj llantʼa patamantaj chay torilloj khuchurasqa aychasninta, umanta, wirasnintawan* churaykonqanku.+ 9 Chʼunchulasnin, chakisnin imataj yakuwan mayllasqa kanqa. Sacerdotetaj chaykunata altarpi qʼolachenqa. Chayqa qʼolachina ofrenda, ninapi qʼolachina ofrenda, ima munayta qʼaparispa Jehová Diospa sonqonta tiyaykuchinanpaj.+

10 ”’Sichus mayqenpis ovejasmanta chayri cabrasmanta qʼolachina ofrendapaj apamonqa chayqa,+ apamuchun orqotapuni, maltón carnerota* chayri chivota mana iman imanasqata.+ 11 Chay uywaqa ñakʼasqa kanqa Jehová Diospa ñaupaqenpi, altarpa paña* ladonpi. Aaronpa wawasnin sacerdotestaj chay uywaj yawarninwan altarpa muyuynintinta chʼajchonqanku.+ 12 Chantá chay uywaj aychanqa khuchurasqa kanqa. Sacerdotetaj altarpi laurashaj llantʼa pataman churanqa chay uywaj aychasninta, umanta, wirasnintawan.* 13 Chʼunchulasnin, chakisnin imataj yakuwan mayllasqa kanqa. Sacerdotetaj chaykunata Diosman jaywanqa, altarpitaj qʼolachenqa. Chayqa qʼolachina ofrenda, ninapi qʼolachina ofrenda, ima munayta qʼaparispa Jehová Diospa sonqonta tiyaykuchinanpaj.

14 ”’Sichus pipis pʼisqosta Jehová Diospaj qʼolachina ofrendata jina apamonqa chayqa, jurkʼutasta chayri paloma irpasta apamuchun.+ 15 Sacerdotetaj chaykunata altarpi Diosman jaywanqa. Payqa sillunwan kunkanmanta kʼichirparispa wañuchenqa, chantá altarpi qʼolachenqa. Chaywanpis ñaupajtaqa yawarninta altarpa uj lado uyanman suruchenqa. 16 Buchisituntawan phurusnintawan orqhospataj altarpa ñaupaqenman choqaykonqa, inti llojsimuy ladoman, ushpha* wijchʼunaman.+ 17 Chantá chay palomataqa lijrasnin* chaynejmanta japʼispa kicharpanqa, mana iskayman tʼaqaspalla. Sacerdoteqa chayta altarpi qʼolachenqa laurashaj llantʼa patapi. Chayqa qʼolachina ofrenda, ninapi qʼolachina ofrenda, ima munayta qʼaparispa Jehová Diospa sonqonta tiyaykuchinanpaj.

2 ”’Sichus pipis chʼaki mikhuy ofrendata+ Jehová Diospaj apamonqa chayqa, sumaj ñutʼu jakʼuta apamuchun. Chay jakʼumanqa jichʼaykuchun aceiteta, patanmantaj churaykuchun yuraj inciensota.+ 2 Chaytataj jaywachun Aaronpa wawasnin sacerdotesman. Ujnin kaj sacerdotetaj chay aceiteyoj ñutʼu jakʼumanta uj makita orqhospa, altarpi qʼolachenqa* tukuynin yuraj inciensotawan, yuyarikuna ofrenda kananpaj.+ Chayqa ninapi qʼolachina ofrenda kanqa, ima munayta qʼaparispa Jehová Diospa sonqonta tiyaykuchinanpaj. 3 Chay chʼaki mikhuy ofrendamanta puchojqa Aaronpaj kanqa, wawasninpajwan.+ Chaytaj may llimphu kanqa+ Jehová Diospaj ninapi qʼolachina ofrendas ukhupi.

4 ”’Hornopi chayasqa chʼaki mikhuy ofrendata apamuspaqa, apamunkichej ñutʼu jakʼumanta aceitewan puñasqa* muyu tʼantasta* mana levadurayojta chayri mana levadurayoj tortillasta aceitewan jawisqasta.+

5 ”’Sichus paylapi chayasqa ofrendata apamunkichej chayqa,+ apamunkichej sumaj ñutʼu jakʼumanta aceitewan puñasqa tʼantata mana levadurayojta. 6 Chay tʼantata partiraspataj, patanman aceitewan jichʼaykunkichej.+ Chayqa chʼaki mikhuy ofrenda.

7 ”’Sichus mankapi chayasqa ofrendata apamunkichej chayqa, kanan tiyan sumaj ñutʼu jakʼumanta aceitewan puñasqa tʼanta. 8 Ajina wakichisqaña kajtintaj, chay ofrendataqa apamunkichej Jehová Diosman. Chaytataj sacerdoteman jaywankichej. Paytaj altarman apanqa. 9 Chantá sacerdoteqa chay chʼaki mikhuy ofrendamanta uj mashkhata orqhonqa yuyarikuna ofrendata jina,+ altarpitaj qʼolachenqa. Chayqa ninapi qʼolachina ofrenda kanqa, ima munayta qʼaparispa Jehová Diospa sonqonta tiyaykuchinanpaj.+ 10 Chay chʼaki mikhuy ofrendamanta puchojqa Aaronpaj kanqa, wawasninpajwan. Chaytaj may llimphu kanqa Jehová Diospaj ninapi qʼolachina ofrendas ukhupi.+

11 ”’Chay chʼaki mikhuy ofrendasta Jehová Diosman jaywanaykichejpajqa, amapuni levadurata churankichejchu.+ Jehová Diospajqa amapuni qʼolachinkichejchu ni levaduratapis,* nitaj miskʼitapis* ninapi qʼolachina ofrendasta jinaqa.

12 ”’Chay levaduratawan* miskʼitawanqa Jehová Diosman jaywayta atinkichej ñaupaj poqoy ofrendata jina.+ Chaywanpis amapuni altarpeqa qʼolachinkichejchu ima munayta qʼaparinanpaj.

13 ”’Tukuy chʼaki mikhuy ofrendataqa kachinchankichejpuni. Chʼaki mikhuy ofrendaykichejmanqa churankichejpuni Diosniykichejpa trato ruwasqan kachita. Tukuy ofrendasniykichejmanqa kachita churankichejpuni.+

14 ”’Tarpusqaykichejmanta ñaupaj kaj poqoyta chʼaki mikhuy ofrendata jina Jehová Diosman jaywankichej chayqa, sumaj poqosqa mosoj trigota* jankʼaspa apamunkichej, chhama chhamallata kutarqospa. Chayqa ñaupaj kaj poqochisqaykichejmanta chʼaki mikhuy ofrenda kanqa.+ 15 Chay ofrendaykichejmanqa jichʼaykunkichej aceiteta, patanmantaj churankichej yuraj inciensota. Chayqa chʼaki mikhuy ofrenda. 16 Sacerdotetaj chay aceitewan chajrusqa chhama chhamalla kutasqamanta uj chhikanta orqhospa, tukuynin yuraj inciensotawan qʼolachenqa, yuyarikuna ofrenda kananpaj.+ Chayqa kanqa Jehová Diospaj ninapi qʼolachina ofrenda.

3 ”’Sichus pipis khuska mikhurikuy ofrendata+ Jehová Diosman qonanpaj uywasninmanta apamunman uj wakata chayri uj torota chayqa, apamuchun sano kajta. 2 Chantá chay runaqa makinta churanqa chay uywaj umanman. Chay uywataj ñakʼasqa* kanqa tinkukuna toldo punkupi. Aaronpa wawasnin sacerdotestaj chay uywaj yawarninwan chʼajchonqanku altarpa muyuynintinta. 3 Payqa chay khuska mikhurikuy ofrendamanta wakin imasta jaywanqa Jehová Diospaj ninapi qʼolachina* ofrendata jina.+ Jaywanqa uywaj panza wiranta,+ tukuynin chʼunchula wirasninta, 4 iskaynin riñonesninta wirantinta, mayqenchus chʼillan chaynejpi kashan chayta, jinallataj hígado wirantapis. Chay hígado wirantaqa riñonesnintawan khuska orqhonqa.+ 5 Tukuy chaykunatataj Aaronpa wawasnenqa qʼolachenqanku altarpi, llantʼa patapi qʼolachina ofrenda kashan chaytawan khuska.+ Chayqa ninapi qʼolachina ofrenda, ima munayta qʼaparispa Jehová Diospa sonqonta tiyaykuchinanpaj.+

6 ”’Sichus pipis khuska mikhurikuy ofrendata Jehová Diosman apamunman ovejasninmanta chayri cabrasninmanta chayqa, apamuchun orqotapis chinatapis sano kajta.+ 7 Sichus uj maltón carnerota* apamunman chayqa, Jehová Diospa ñaupaqenman apamuchun. 8 Pichus chay uywata apamojqa makinta churanqa chay uywaj umanman. Chay uywataj ñakʼasqa kanqa tinkukuna toldo punkupi. Aaronpa wawasnin sacerdotestaj chay uywaj yawarninwan chʼajchonqanku altarpa muyuynintinta. 9 Payqa chay khuska mikhurikuy ofrendaj wirasninta jaywanqa Jehová Diospaj ninapi qʼolachina ofrendata jina.+ Orqhonqa uywaj wira chupanta wasa tullun kʼuchitumantapacha khuchuspa, panza wiranta, tukuynin chʼunchula wirasnintawan, 10 iskaynin riñonesninta wirantinta, mayqenchus chʼillan chaynejpi kashan chayta, jinallataj hígado wirantapis. Chay hígado wirantaqa riñonesnintawan khuska orqhonqa.+ 11 Tukuy chaykunatataj sacerdoteqa altarpi qʼolachenqa mikhuna* ofrendata jina. Chayqa Jehová Diospaj ninapi qʼolachina ofrenda.+

12 ”’Sichus pipis uj cabrata ofrendapaj apamunman chayqa, Jehová Diospa ñaupaqenman apamuchun. 13 Pichus chay uywata apamojqa makinta churanqa chay uywaj umanman. Chay uywataj ñakʼasqa kanqa tinkukuna toldo punkupi. Aaronpa wawasnin sacerdotestaj, chay uywaj yawarninwan chʼajchonqanku altarpa muyuynintinta. 14 Payqa kay imasta jaywanqa Jehová Diospaj ninapi qʼolachina ofrendata jina: uywaj panza wiranta, chʼunchula wirasninta,+ 15 iskaynin riñonesninta wirantinta, mayqenchus chʼillan chaynejpi kashan chayta, jinallataj hígado wirantapis. Chay hígado wirantaqa riñonesnintawan khuska orqhonqa. 16 Tukuy chaykunatataj sacerdoteqa altarpi qʼolachenqa mikhuna* ofrendata jina. Chayqa ninapi qʼolachina ofrenda, ima munayta qʼaparispa Diospa sonqonta tiyaykuchinanpaj. Chay uywaj tukuy wirasnenqa Jehová Diospaj kanqa.+

17 ”’Chayqa unaypaj uj kamachiy kanqa qankunapaj, mirayniykichejpajwan. Maypichá tiyakunkichej chaypeqa amapuni mikhunkichejchu wirata, nitaj yawartapis’”.+

4 Jehová Diosqa Moisesta ujtawan nerqa: 2 “Israelitasman kayta niy: ‘Sichus pipis mana reparakuspalla+ Jehová Diospa mayqen kamachisqantapis pʼakispa juchallikunman chayqa, kayta ruwanqa:

3 ”’Kuraj kaj sacerdotechus*+ juchallikuspa+ llajtantinta juchayojta rikhurichinman chayqa, Jehová Diosman apamuchun uj torillota sano kajta, juchanrayku jaywasqa kananpaj.+ 4 Chay torotaqa apamuchun Jehová Diospa ñaupaqenman, tinkukuna toldo punkuman.+ Chaypitaj chay toroj umanman makinta churaspa, Jehová Diospa ñaupaqenpi wañuchichun.+ 5 Chantá chay kuraj kaj sacerdoteqa,+ chay toroj yawarninmanta uj chhikanta apaykonqa tinkukuna toldo ukhuman. 6 Chaypitaj sacerdoteqa dedonta yawarman chhapuykurispa,+ qanchis kutita chʼajchonqa+ Jehová Diospa ñaupaqenpi, santo lugarpi, ukhu cortina chaynejpi. 7 Chantá sacerdoteqa yawarwan jawiykonqa sumaj qʼaparishaj incienso+ qʼoshñichina altarpa wajrasninta, Jehová Diospa ñaupaqenpi, tinkukuna toldo ukhupi. Tukuynin puchoj yawartataj jichʼaykonqa ofrenda qʼolachina* altar uraman.+ Chayqa kashan tinkukuna toldo punkupi.

8 ”’Chantá orqhonqa jucharayku ofrendapaj wañuchisqa toroj tukuy wirasninta: panza wiranta, chʼunchula wirasninta, 9 iskaynin riñonesninta wirantinta, mayqenchus chʼillan chaynejpi kashan chayta, jinallataj hígado wirantapis. Chay hígado wirantaqa riñonesnintawan khuska orqhonqa.+ 10 Tukuy chaytaqa orqhonqa imaynatachus khuska mikhurikuy ofrenda toromanta orqhokun ajinata.+ Chaytataj sacerdoteqa qʼolachenqa ofrenda qʼolachina altarpi.

11 ”’Chaymantataj chay toroj qaranta, aychasninta, umanta, chakisninta, chʼunchulasninta, akanta,+ 12 toroj tukuy imasnintawan campamentomanta* jawaman orqhochenqa llimphu lugarman, maypichus ushphata* jichʼakun chayman. Chaypitaj llantʼa patapi ruphachenqa.+ Chayqa ushphata jichʼakun chay lugarpi ruphachisqa kanan tiyan.

13 ”’Sichus tukuynin israelitas mana cuentata qokuspalla juchallikunkuman,+ nitaj reparakunkumanchu* Jehová Diospa ujnin kamachiyninta pʼakisqankuta chayqa,+ 14 juchankuta reparakuytawanqa uj torillota apamuchunku* jucharayku ofrendapaj. Chaytaqa apamuchunku tinkukuna toldo punkuman. 15 Israelitasmanta kurajkunaqa makisninkuta churachunku chay toroj umanman, Jehová Diospa ñaupaqenpi. Chay torotaj Jehová Diospa ñaupaqenpi ñakʼasqa* kanqa.

16 ”’Chantá kuraj kaj sacerdoteqa, chay toroj yawarninmanta uj chhikata apaykonqa tinkukuna toldo ukhuman. 17 Chaypitaj sacerdoteqa dedonta yawarman chhapuykurispa, qanchis kutita chʼajchonqa Jehová Diospa ñaupaqenpi, ukhu cortina chaynejpi.+ 18 Chantá yawarwan jawiykonqa altarpa wajrasninta.+ Chay altarqa kashan Jehová Diospa ñaupaqenpi, tinkukuna toldo ukhupi. Tukuynin puchoj yawartataj jichʼaykonqa ofrenda qʼolachina altar uraman. Chaytaj kashan tinkukuna toldo punkupi.+ 19 Chantá chay toroj tukuy wirasninta orqhospa, altarpi qʼolachenqa.+ 20 Chay torotaqa ruwanqa imaynatachus jucharayku ofrendapaj torota ruwarqa ajinata. Ajinata sacerdoteqa chay torota jaywanqa israelitas juchasninkumanta perdonta tarinankupaj.+ Juchasninkutaj perdonasqa kanqa. 21 Chaymantataj chay torota campamentomanta jawaman orqhospa, ruphachimonqa imaynatachus ñaupaj kaj torota ruphachimorqa ajinata.+ Chay toroqa jaywasqa kanqa tukuynin israelitaspa juchankurayku.+

22 ”’Sichus israelitaspa kamachejkunasninkumanta mayqenpis+ mana cuentata qokuspalla juchallikunman, juchayojtaj rikhurinman Jehová Diosninpa ujnin kamachiyninta pʼakisqanmanta 23 chayri sichus reparakunman Diospa kamachiyninta pʼakispa juchallikusqanta chayqa, uj chivitota apamuchun sano kajta, juchanrayku jaywananpaj. 24 Makinta chay chivitoj umanman churaytawantaj, ñakʼachun Jehová Diospa ñaupaqenpi, maypichus qʼolachina ofrendata ñakʼanku chaypi.+ Chayqa jucharayku ofrenda. 25 Chaymantataj sacerdoteqa jucharayku ofrendaj yawarninman dedonta chhapuykurispa, jawiykonqa ofrenda qʼolachina altarpa wajrasninta.+ Tukuynin puchoj yawartataj jichʼaykonqa ofrenda qʼolachina altar uraman.+ 26 Chantá chay chivitoj tukuynin wirasninta altarpi qʼolachenqa, imaynatachus khuska mikhurikuy ofrendaj wiranta qʼolachikun ajinata.+ Ajinata sacerdoteqa ruwanqa chay runa juchanmanta perdonta tarinanpaj. Juchantaj perdonasqa kanqa.

27 ”’Sichus israelitasmanta mayqen runallapis mana cuentata qokuspalla juchallikunman, juchayojtaj rikhurinman Jehová Diospa ujnin kamachiyninta pʼakisqanmanta+ 28 chayri sichus reparakunman imapipis juchallikusqanta chayqa, uj malta cabrata apamuchun sano kajta, juchanrayku ofrendata jina jaywananpaj. 29 Chantá chay jucharayku ofrendaj umanman makinta churachun, ñakʼachuntaj maypichus qʼolachina ofrendata ñakʼanku chaypi.+ 30 Chaymantataj sacerdoteqa chay ofrendaj yawarninman dedonta chhapuykurispa, jawiykuchun ofrenda qʼolachina altarpa wajrasninta. Chay tukuynin puchoj yawartataj jichʼaykuchun altar uraman.+ 31 Chantá chay ofrendaj tukuynin wirasninta orqhochun,+ imaynatachus khuska mikhurikuy ofrendaj wiranta orqhokun ajinata.+ Chantá sacerdoteqa chayta altarpi qʼolachenqa ima munayta qʼaparishajta, Jehová Diospa sonqonta tiyaykuchinanpaj. Ajinata sacerdoteqa ruwanqa chay runa juchanmanta perdonta tarinanpaj. Juchantaj perdonasqa kanqa.

32 ”’Sichus mayqenpis jucharayku ofrendapaj apamunman uj ovejata chayqa, apamuchun malta ovejata sano kajta. 33 Chay jucharayku ofrendaj umanman makinta churachun, ñakʼachuntaj jucharayku ofrendata jina, maypichus qʼolachina ofrendata ñakʼanku chaypi.+ 34 Chaymantataj sacerdoteqa jucharayku ofrendaj yawarninman dedonta chhapuykurispa, jawiykonqa ofrenda qʼolachina altarpa wajrasninta.+ Tukuynin puchoj yawartataj jichʼaykonqa altar uraman. 35 Chantá chay ovejaj tukuynin wirasninta orqhonqa, imaynatachus khuska mikhurikuy ofrenda maltón carneroj* wiranta orqhokun ajinata. Sacerdoteqa chay wirasninta altarpi qʼolachenqa, maypichus Jehová Diospaj ninapi qʼolachina ofrendas kashan chay patapi.+ Ajinata sacerdoteqa ruwanqa chay runa juchanmanta perdonta tarinanpaj. Juchantaj perdonasqa kanqa.+

5 ”’Sichus pipis rikunman mayqen runallatapis juchata ruwashajta chayri chay juchamanta yachanman chayqa, chay patapitaj uyarinman testigosta wajyashasqankuta*+ chay jucha sutʼinchakunanpaj, nitaj declaraj rinmanchu chayqa, chay runaqa juchayoj rikhurenqa, chay juchanmantataj cuentata qonqa.

2 ”’Sichus pillapis llojchirinman ima chʼichi kajtapis, kachun chʼichipaj qhawasqa wañusqa monte animalta, chʼichipaj qhawasqa wañusqa uywata chayri chʼichipaj qhawasqa wañusqa juchʼuy animalta*+ chayqa, paypis chʼichipaj qhawasqallataj kanqa. Mana reparakuspalla chayta llojchirejtinpis, chay runaqa juchayoj rikhurenqa. 3 Sichus pillapis mana reparakuspalla llojchirinman chʼichipaj qhawasqa runata+ chayri chʼichipaj qhawasqa imasta, chantá recién cuentata qokunman chayqa, juchayoj rikhurenqa.

4 ”’Sichus pipis mana allinta piensarikuspalla, nitaj reparakuspalla juranman allin kajta chayri mana allin kajta ruwananpaj, chantá recién cuentata qokunman mana allinta piensarikuspalla jurasqanta chayqa, juchayoj rikhurenqa.*+

5 ”’Sichus pipis chay imaspi juchallikunman chayqa, imaynamantachus juchallikusqanta rimarichun.+ 6 Chantapis pantasqarayku ofrendata Jehová Diosman apamuchun+ uj malta ovejata chayri uj malta cabrata jucharayku ofrendapaj. Sacerdotetaj chayta jaywanqa chay runa juchanmanta perdonta tarinanpaj.

7 ”’Sichus chay runajta mana qolqen kapunmanchu ovejata rantinanpaj chayqa, chay juchanrayku Jehová Diosman apamuchun iskay jurkʼutasta chayri iskay paloma irpasta,+ pantasqarayku ofrendapaj. Ujnenqa kanqa jucharayku ofrendapaj, ujnintaj kanqa qʼolachina* ofrendapaj.+ 8 Chaykunataqa sacerdoteman apachun. Sacerdotetaj ñaupajtaqa jucharayku ofrendapaj kashan chayta jaywanqa. Kunkanmanta sillunwan kʼichirparispa wañuchenqa, mana umanta pʼitispalla.* 9 Chantá jucharayku ofrendaj uj chhika yawarninwan chʼajchonqa altarpa uj lado uyanta. Puchoj yawartataj suruchenqa altar uraman.+ Chayqa jucharayku ofrenda. 10 Chantá sacerdoteqa qʼolachina ofrendapaj kajtañataj jaywanqa, imaynatachus ruwana kasqanman jina.+ Sacerdoteqa chaykunata jaywanqa chay runa juchanmanta perdonta tarinanpaj, juchantaj perdonasqa kanqa.+

11 ”’Sichus chay runajta mana qolqen kapunmanchu iskay jurkʼutasta chayri iskay paloma irpasta rantinanpaj chayqa, juchanrayku apamuchun uj kilo jina*+ sumaj ñutʼu jakʼuta jucharayku ofrendapaj. Chay jakʼumanqa ama churaykuchunchu aceiteta, nitaj yuraj inciensotapis, jucharayku ofrenda kasqanrayku. 12 Chayta sacerdoteman apamojtin, sacerdoteqa chay jakʼumanta uj makillata orqhospa, jaywanqa yuyarikuna ofrendata jina. Chaytaqa altarpi qʼolachenqa, maypichus Jehová Diospaj ninapi qʼolachina ofrendas kashan chay patapi. Chayqa jucharayku ofrenda. 13 Ajinata sacerdoteqa chayta jaywanqa chay runa juchanmanta perdonta tarinanpaj. Chay juchasmanta mayqenpis kachun chay juchanqa perdonasqa kanqa.+ Chay jaywanamanta puchojqa sacerdotepaj kanqa,+ imaynachus chʼaki mikhuy ofrendamanta puchojpis sacerdotepaj ajina’”.+

14 Chantá Jehová Diosqa Moisesman nillarqataj: 15 “Sichus mayqenpis mana cuentata qokuspalla Jehová Diospaj tʼaqasqa imaswan mana ruwananta ruwaspa juchallikunman chayqa,+ Jehová Diosman apamuchun uywasninmanta uj carnerota* sano kajta, pantasqarayku ofrendapaj.+ Mashkhachus chay carnero qolqepi* valenantaqa sacerdote nenqa. Chay qolqetaj kanan tiyan santo lugarpi mashkhachus uj siclo pesasqanman jina.+ 16 Chantapis chay runaqa Diospaj tʼaqasqa kajmanta pagachun, chay imaswan mana ruwananta ruwaspa juchallikusqanrayku, chay valorninmantaj sapa phishqamanta ujtawan yapaykuchun.+ Chaytataj sacerdoteman jaywachun, pantasqarayku ofrendapaj+ carnerotawan. Sacerdotetaj chay carnerota jaywanqa chay runa juchanmanta perdonta tarinanpaj, juchantaj perdonasqa kanqa.+

17 ”Sichus pipis Jehová Diospa kamachisqanta pʼakispa juchallikunman chayqa, mana reparakuspalla juchallikojtinpis juchayoj rikhurenqa, chay juchanmantataj cuentata qonqa.+ 18 Pantasqarayku ofrendapajtaj sacerdoteman apamuchun uywasninmanta uj carnerota sano kajta, sacerdote preciota churasqanman jina.+ Sacerdotetaj chayta jaywanqa chay runa perdonta tarinanpaj. Ajinamanta chay runaqa perdonasqa kanqa, mana cuentata qokuspalla, mana reparakuspallataj juchallikusqanmanta. 19 Chayqa pantasqarayku ofrenda. Chay runaqa Jehová Diospa contranpi juchallikorqa”.

6 Jehová Diosqa Moisesman ujtawan nerqa: 2 “Uj runaqa Jehová Diospa contranpi juchallikun,+ maypachachus runa masinta engañan kay jinata: payman imatachus saqekusqanta japʼikapun,+ chayri uj prendata japʼikapun, chayri suwakun, chayri chʼaukiyaspa* imatapis japʼikapun, 3 chayri imatapis tarikusqanta pakaykun. Sichus chay runa llullakuspa ‘mana chayta ruwanichu’+ nispa juranman chayqa, kay jina kanan tiyan: 4 Chay imasta ruwaspa juchayoj rikhurin chayqa, runa masinman kutichipunan tiyan imatachus suwakusqanta, chʼaukiyaspa imatachus japʼikapusqanta, runa masinpa saqekusqanta, tarikuspa pakaykusqanta 5 chayri qhasimanta juraspa imatachus japʼikapusqanta. Payqa dueñonman tukuyninta kutichipuchun chayri pagapuchun.+ Chay valorninmantaj sapa phishqamanta ujtawan yapaykuchun. Chaytaqa kutichiponqa ima pʼunchaychus juchan yachakun chay pʼunchaypacha. 6 Chay runaqa pantasqarayku ofrendapaj Jehová Diosman apachun uywasninmanta uj carnerota,* sano kajta, sacerdote preciota churasqanman jina. Chaytataj sacerdoteman apanqa, pantasqarayku ofrendata jina.+ 7 Sacerdotetaj chayta Jehová Diosman jaywanqa, chay runa perdonta tarinanpaj. Ajinamanta chay runaqa perdonasqa kanqa imapichus juchayoj rikhurisqanmanta”.+

8 Chantá Jehová Diosqa Moisesman nillarqataj: 9 “Kayta kamachiy Aaronman, wawasninmanpis: ‘Kay leymin kanqa qʼolachina* ofrendapaj.+ Chay ofrendaqa altar patapi tutantin qʼolanqa sutʼiyamunankama. Ninaqa altarpi laurallanqapuni. 10 Sacerdoteqa churakonqa linomanta ruwasqa sacerdote ropanta,+ qʼala ukhunmantaj churakonqa linomanta ruwasqa cortonta.*+ Chayta churakuytawan orqhonqa altarpi qʼolachisqa ofrendaj ushphanta.*+ Chay ushphatataj altarpa ujnin ladonman churanqa. 11 Chaymantataj sacerdoteqa chay ropasninta lluchʼukonqa.+ Waj ropasta churaykukuytawantaj chay ushphata campamentomanta* jawaman apanqa, uj llimphu lugarman.+ 12 Altar patapeqa nina laurallanqapuni, manapuni wañunanchu tiyan. Sacerdoteqa sapa paqarin llantʼata yapanan tiyan.+ Chaymantaj churanqa qʼolachina ofrendata. Chay patapitaj qʼolachenqa khuska mikhurikuy ofrendaspa wirasninta.+ 13 Chay altar patapi ninaqa laurallanqapuni, manapuni wañonqachu.

14 ”’Kay leymin kanqa chʼaki mikhuy ofrendapaj.+ Chaytaqa Aaronpa wawasnin altarman apamuspa, Jehová Diospa ñaupaqenpi jaywanqanku. 15 Ujnin sacerdoteqa chay chʼaki mikhuy ofrendamanta aceiteyoj ñutʼu jakʼuta uj makita orqhonqa, jakʼu patamanta tukuynin yuraj inciensontinta. Chaytataj altarpi qʼolachenqa ima munayta qʼaparishajta, Jehová Diospa sonqonta tiyaykuchinanpaj.+ Chayqa yuyarikuna ofrenda kanqa. 16 Chay ofrendamanta puchojtaqa mikhonqanku Aaronwan wawasninwan.+ Paykunaqa mana levadurayoj tʼantasta mikhonqanku uj santo lugarpi, tinkukuna toldoj pationpi.+ 17 Chaytaqa amapuni levadurayojtachu chayachichunku,+ imaraykuchus noqa paykunaman qoni ninapi qʼolachina ofrendasniymanta.+ Chay chʼaki mikhuy ofrendaqa may llimphumin,+ jucharayku ofrenda jina, jinallataj pantasqarayku ofrenda jina. 18 Chay ofrendamantaqa mikhonqanku Aaronpa mirayninmanta tukuy qharis.+ Chayqa paykunapajpuni kanqa Jehová Diospaj ninapi qʼolachina ofrendasninmanta.+ Imallapis chay ofrendasman chayajqa Diospaj tʼaqasqa kanqa’, nispa”.

19 Jehová Diosqa Moisesta nillarqataj: 20 “Aarón kuraj kaj sacerdote jina churasqa kashajtin,+ paywan wawasninwanqa kay ofrendata Jehová Diosman jaywanqankupuni: Sumaj ñutʼu jakʼuta uj kilota jina.*+ Chaytaqa jaywanqanku chʼaki mikhuy ofrendata jina,+ khuskanta tutamanta, khuskantataj ña chʼisiyaykushajtinña. 21 Chay ofrendataqa Aarón paylapi chayachichun+ aceitewan puñasqata.* Chantá chay chayasqa ofrendata pʼakiraytawan, jaywachun aceitewan jichʼaykuspa, ima munayta qʼaparishajta Jehová Diospa sonqonta tiyaykuchinanpaj. 22 Chaytaqa jaywanqa pichus Aaronpa cuentanpi wawasninmanta ajllasqa kanqa+ kuraj kaj sacerdote kananpaj chay. Chay ofrendataqa tukuyninta Jehová Diospaj qʼolachenqanku. Chaytaj uj ley kanqa unay wataspaj. 23 Sacerdoterayku chʼaki mikhuy ofrendataqa tukuynintapuni qʼolachinanku tiyan, mana pipis chaytaqa mikhunanchu tiyan”, nispa.

24 Jehová Diosqa Moisesman ujtawan nillarqataj: 25 “Aaronta, wawasnintawan niy: ‘Kay ley kanqa jucharayku ofrendapaj.+ Maypichus qʼolachina ofrendata ñakʼanku,*+ chayllapitaj ñakʼanqanku jucharayku ofrendatapis Jehová Diospa ñaupaqenpi. Chay jaywanaqa may llimphupaj qhawasqa. 26 Mayqen sacerdotechus chayta juchasrayku jaywajqa, chay jaywanamanta mikhonqa.+ Chaytataj mikhonqa uj santo lugarpi, tinkukuna toldo patiopi.+

27 ”’Imallapis chay uywaj aychanman chayajqa, Diospaj tʼaqasqa kanqa. Sichus pillapis chay uywaj yawarninwan ropanman chʼallpaykuchikun chayqa, chay ropantaqa tʼajsanan tiyan uj santo lugarpi. 28 Sichus chay jaywana aycha tʼuru mankapi chayachisqa kanqa chayqa, chay mankaqa pʼakisqa kanan tiyan. Sichus uj cobre mankapi chayachisqa kanqa chaytaj, chay mankataqa sumajta khituspa yakuwan mayllachunku.

29 ”’Tukuy qharis, pikunachus sacerdotes kanku chaykunalla, chay jaywasqa aychataqa mikhonqanku.+ Chayqa may llimphupaj qhawasqamin.+ 30 Chaywanpis jucharayku ofrendaj aychantaqa, mana mikhuyta atinkuchu sichus yawarninta juchasmanta perdonta tarinapaj tinkukuna toldo ukhuman apaykunku chayqa, nisunman santo lugarman.+ Chayqa ninapi qʼolachisqa kanan tiyan.

7 ”’Kaymin pantasqarayku ofrendapaj leyqa.+ Chay ofrendaqa may llimphupaj qhawasqa. 2 Pantasqarayku ofrendataqa ñakʼanqanku* maypichus qʼolachina* ofrendasta ñakʼanku chaypi. Yawarninwantaj+ chʼajchonqanku altarpa muyuynintinta.+ 3 Sacerdotetaj tukuy wirasninta+ orqhonqa: wira chupanta, chʼunchula wirasninta, 4 iskaynin riñonesninta wirantinta, mayqenchus chʼillan chaynejpi kashan chayta. Chantá orqhollanqataj hígado wiranta riñonesnintawan khuska.+ 5 Chay wirastaqa sacerdote qʼolachenqa altarpi, Jehová Diospaj ninapi qʼolachina ofrendata jina.+ Chaymin pantasqarayku ofrenda kanqa. 6 Chay jaywasqa aychataqa mikhonqanku sacerdotes kanku chay qharislla.+ Mikhonqankutaj uj santo lugarpi. Chay aychaqa may llimphupaj qhawasqa.+ 7 Uj leylla kanqa jucharayku ofredapaj, jinallataj pantasqarayku ofrendapajpis. Chay jaywasqa aychataj, chayta jaywaj sacerdotepaj kanqa.+

8 ”’Piraykullapis qʼolachina ofrendata jaywaj sacerdoteqa, chay qʼolachina ofrendaj qaranta+ japʼikaponqa.

9 ”’Chʼaki mikhuy ofrendasmantaqa, kachun hornopi chayasqa, mankapi chayasqa chayri paylapi+ chayasqapis sacerdotepaj kanqa, pichus chaykunata jaywaj sacerdotepaj.+ 10 Chawa chʼaki mikhuy ofrendasmantaqa, aceitewan chajrusqapis+ kachun chayri mana imawan chajrusqapis kachun,+ Aaronpa wawasninpaj kanqa. Chaytaqa tukuyninku uj rejta japʼikonqanku.

11 ”’Kay leymin kanqa khuska mikhurikuy ofrendata+ Jehová Diosman jaywanapaj. 12 Sichus pipis khuska mikhurikuy ofrendata agradecekunanpaj apamonqa chayqa,+ chaytawan khuska apamuchun aceitewan puñasqa* muyu tʼantasta* mana levadurayojta, mana levadurayoj tortillasta aceitewan jawisqasta, jinallataj ñutʼu jakʼumanta ashkha aceitewan sumaj puñasqa muyu tʼantastapis. 13 Apamullachuntaj levadurayoj muyu tʼantasta, khuska mikhurikuy ofrendata agradecekunanpaj apamonqa chaytawan khuska. 14 Chay tukuynin tʼantasmantaqa ujtakama tʼaqanqa Jehová Diospaj. Chay tʼaqasqataj sacerdotepaj kanqa, pichus khuska mikhurikuy jaywana uywaspa yawarninta altarpi chʼajchonqa chaypaj.+ 15 Khuska mikhurikuy ofrendasnenqa, mayqentachus agradecekunanpaj apamun chay uywaj aychanqa, chay diapacha mikhusqa kanqa, ima diachus jaywasqa kanqa chay diapacha. Qʼayantinpajqa mana imatapis puchuchinanchu tiyan.+

16 ”’Sichus pipis imatachus ruwasaj nerqa chaymanta+ uj uywata apamun chayri qoyta munasqanrayku chay uywata aparimun chayqa,+ ima pʼunchaychus jaywanqa chay pʼunchayllataj chay uywaj aychanqa mikhusqa kanqa. Puchoj aychataqa qʼayantinpis mikhuyta atikullantaj. 17 Sichus kinsa pʼunchaykama chay aycha puchunrajpuni chayqa, tukuyninta ninapi ruphachenqanku.+ 18 Sichus kinsa pʼunchaymanta pipis chay khuska mikhurikuy ofrendamanta puchoj aychata mikhonqa chayqa, mana allinpajchu qhawasqa kanqa Diospa ñaupaqenpi. Chay jaywasqanpis qhasilla kanqa. Chay aychaqa chʼichipaj qhawasqa kanqa. Pichus chay aychata mikhojtaj chay juchanmanta cuentata qonqa.+ 19 Sichus chay aycha ima chʼichimanpis chayanman chayqa, ama pipis chay aychata mikhuchunchu. Chay aychaqa ninapi ruphachisqa kanan tiyan. Mana ima chʼichimanpis chayaj aychatataj, llimphupaj qhawasqa kajkunalla mikhonqanku.

20 ”’Sichus pipis chʼichipaj qhawasqa kashaspa, Jehová Diosman jaywasqa khuska mikhurikuy ofrendamanta mikhunman chayqa, chay runaqa wañuchisqa kanqa.+ 21 Sichus pipis chʼichipaj qhawasqa kajta llankhanman, kanman chʼichipaj qhawasqa runata,+ chayri chʼichipaj qhawasqa animalta,+ chayri ima millay chʼichitapis,+ chantataj khuska mikhurikuy ofrendata, mayqenchus Jehová Diospaj kashan chayta mikhunman chayqa, chay runaqa wañuchisqa kanqa’”.

22 Jehová Diosqa Moisesman nillarqataj: 23 “Israelitasman ajinata niy: ‘Ama mikhunkichejchu toro wirata, maltón carnero* wirata, nitaj cabra wiratapis.+ 24 Wañusqa uywaspa wiranwan chayri phiña animalpa japʼisqan uywaspa wiranwanqa imatapis ruwayta atillankichej. Chaywanpis amapuni mikhunkichejchu.+ 25 Sichus pipis jaywananpaj apasqan uywaj wiranta mikhuykakaponqa Jehová Diospaj ninapi qʼolachina ofrenda kanan kashajtin chayqa, wañuchisqa kanqa.

26 ”’Maypichá tiyakunkichej chaypeqa amapuni ima yawartapis mikhunkichejchu, ni phuruyojkunaj yawarninta, nitaj animalespa yawarnintapis.+ 27 Pichus ima yawarllatapis mikhojqa wañuchisqa kanqa’”.+

28 Chantá Jehová Diosqa Moisesman parlaspa nillarqataj: 29 “Israelitasman kayta niy: ‘Pichus khuska mikhurikuy ofrendata Jehová Diosman apamojqa, chay ofrendanmanta wakinta Jehová Diosman jaywanqa.+ 30 Chay uywaj wirantawan+ pechontawanqa kikin makisninwan apamonqa Jehová Diospaj ninapi qʼolachina ofrendata jina. Pechontaqa kayman jaqayman kuyuchenqa kuyuchisqa ofrendata jina Jehová Diospa ñaupaqenpi.+ 31 Chantá sacerdoteqa chay uywaj wiranta altarpi qʼolachenqa.+ Chay uywaj pechontaj Aaronpaj kanqa, wawasninpajwan.+

32 ”’Khuska mikhurikuy ofrendasniykichejmantaqa, uywaj paña piernanta sacerdotepaj tʼaqankichej.+ 33 Chay paña piernaqa Aaronpa wawanpaj kanqa, pichus khuska mikhurikuy ofrendaspa uywaj yawarninta, wirantawan jaywajpaj.+ 34 Israelitaspa khuska mikhurikuy ofrendasninkumantaqa noqa tʼaqakuni kuyuchisqa ofrenda pechota, sacerdotespaj tʼaqasqa piernatawan. Chaykunatataj qoni sacerdote Aaronman, wawasninmanwan. Chaytaj unaypaj uj ley kanqa israelitas juntʼanankupaj’, nispa”.+

35 Chayqa sacerdotespaj tʼaqasqa karqa Jehová Diospaj ninapi qʼolachina ofrendasmanta, nisunman Aaronpaj, wawasninpajwan, ima diachus Jehová Diospa sacerdotesnin kanankupaj churasqa karqanku chay diamantapacha.+ 36 Jehová Diosqa israelitasman kamacherqa chay imasta qonankuta Aaronman wawasninmanpis, ima diachus sacerdotes kanankupaj churasqa karqanku chay diamantapacha.+ Chayqa uj ley kashan unay wataspaj mirayninkoj mirayninkupajpis.

37 Chay leymin kashan qʼolachina ofrendapaj,+ chʼaki mikhuy ofrendapaj,+ jucharayku ofrendapaj,+ pantasqarayku ofrendapaj,+ sacerdotesta churana ofrendapaj,+ khuska mikhurikuy ofrendapajpis,+ 38 Jehová Dios Sinaí orqopi+ Moisesman kamachisqanman jina, ima pʼunchaychus Sinaí chʼin jallpʼapi israelitasman kamacherqa Jehová Diosman ofrendasninkuta jaywanankuta chay pʼunchay.+

8 Jehová Diosqa Moisesman nillarqataj: 2 “Kunanqa Aaronta, wawasnintawan+ pusay yupaychana toldo punkuman. Chantapis apay ropasta,+ santo aceiteta,*+ jucharayku ofrenda torota, iskay carnerosta,* canastapi mana levadurayoj tʼantastawan.+ 3 Chantá tukuy israelitasta tantachimuy tinkukuna toldo punkuman”, nispa.

4 Moisestaj ruwarqa Jehová Dios kamachisqanman jina. Israelitasqa tantakamorqanku Dioswan tinkukuna toldo punkuman. 5 Chaypitaj Moisesqa israelitasman nerqa: “Jehová Diosqa kayta ruwananchejta kamachiwanchej”, nispa. 6 Chaymanta Moisesqa Aaronta, wawasnintawan qayllaykuchimuspa paykunata yakuwan mayllarqa.+ 7 Chantá Aaronman camisonta+ churarqa, chumpiwantaj+ chumpiykorqa, patanmantaj mana mangasniyoj ropata+ churarqa, chaypa patanmantaj efodta*+ churarqa, sumajtataj chumpiykorqa efodpi kasharqa chay awasqa chumpiwan.+ 8 Chaypa patanmantaj churarqa pecherata.+ Chay pechera ukhumantaj churaykorqa Urim, Tumim*+ nisqa imasta. 9 Umantataj uma maytʼunawan+ maytʼuykorqa, chay uma maytʼunaj ñaupajninmantaj churarqa qorimanta ruwasqa lliphipej cintata, Diospaj tʼaqasqa kasqanta rikuchej santa señalta.*+ Chayta Moisesqa ruwarqa Jehová Dios payman kamachisqanman jina.

10 Chantá Moisesqa santo aceitewan chʼajchuykorqa Diosta yupaychana toldota, chaypi kaj tukuy imastawan,+ chaykunata Diospaj tʼaqananpaj. 11 Chay aceitellawantaj qanchis kutita chʼajchuykorqa altarta, tukuy imasnintawan, wirkhita, imapichus wirkhi churasqa kashan chaynintinta, tukuy chaykunata Diospaj tʼaqananpaj. 12 Chaymanta Moisesqa Aaronpa umanman santo aceiteta jichʼaykorqa, payta Diospaj tʼaqananpaj.+

13 Chantá Moisesqa Aaronpa wawasnintañataj qayllaykuchimuspa, paykunaman camisonesta churarqa, chumpiswantaj chumpiykorqa, umasninkutataj uma maytʼunaswan maytʼuykorqa.+ Chayta Moisesqa ruwarqa Jehová Dios payman kamachisqanman jina.

14 Chaymanta Moisesqa jucharayku ofrenda torota apamorqa. Aaronwan wawasninwantaj chay jucharayku ofrenda toroj umanman makisninkuta churarqanku.+ 15 Chantá Moisesqa chay torota ñakʼarqa.* Yawarninman+ dedonta chhapuykurispataj altarpa tukuy wajrasninta jawiykorqa, chay altarta juchamanta llimphuchananpaj. Chay puchoj yawartataj altar uraman jichʼaykorqa. Ajinamanta chay altarta llimphucharqa, chaypi ofrendasta jaywaspa juchasmanta perdonta tarinapaj. 16 Chaymanta Moisesqa orqhorqa tukuy chʼunchula wirasninta, hígado wirasninta, iskaynin riñonesninta wirantinta. Chaykunatataj altarpi qʼolacherqa.*+ 17 Chaymantataj Moisesqa kamacherqa ninawan ruphachimunankuta chay toroj qaranta, aychasninta, wanunta ima, campamentomanta* jawapi,+ Jehová Dios Moisesman kamachisqanman jina.

18 Chantá Moisesqa qʼolachina ofrendapaj carnerotañataj qayllaykuchimorqa. Aaronwan wawasninwantaj chay carneroj umanman makisninkuta churarqanku.+ 19 Chaymanta Moisesqa chay carnerota ñakʼarqa, yawarninwantaj chʼajchorqa altarpa muyuynintinta. 20 Chantá Moisesqa chay carneroj aychanta chhikan chhikanta khuchurarqa. Jinaytawantaj chay carneroj umanta, chay khuchurasqan aychanta, wirasnintawan* altarpi qʼolacherqa. 21 Chaymanta Moisesqa chay carneroj chʼunchulasninta, chakisnintawan yakuwan mayllaspa altarpi qʼolachillarqataj. Chayqa qʼolachina ofrenda karqa ima munayta qʼaparispa Diospa sonqonta tiyaykuchinanpaj. Chayqa Jehová Diospaj ninapi qʼolachina ofrenda karqa, Jehová Dios Moisesman kamachisqanman jina.

22 Chaymantataj chay ujnin carnerotañataj apamorqa, sacerdotesta churanapaj carnerota.+ Aaronwan wawasninwantaj chay carneroj umanman makisninkuta churarqanku.+ 23 Moisestaj chay carnerota ñakʼaspa, uj chhika yawarninwan Aaronpa paña ninrinpa ura puntanta jawiykorqa, jinallataj paña makinpa machu dedonta, paña chakinpa machu dedontawan. 24 Chantá Moisesqa Aaronpa wawasnintañataj qayllaykuchimuspa, uj chhika yawarwan jawiykorqa paña ninrisninkoj ura puntanta, paña makisninkoj machu dedosninkuta, paña chakisninkoj machu dedosninkutawan. Chay puchoj yawarwantaj chʼajchorqa altarpa muyuynintinta.+

25 Chaymanta Moisesqa orqhorqa chay carneroj wiranta, wira chupanta, chʼunchula wirasninta, hígado wiranta, iskaynin riñonesninta wirantinta, paña piernantawan.+ 26 Chantaqa Jehová Diospa ñaupaqenpi kasharqa chay canastamanta mana levadurayoj tʼantasta orqhorqa: mana levadurayoj muyu tʼantata,+ aceitewan ruwasqa tʼantata,*+ uj tortillatawan. Chaykunatataj churarqa wiras pataman, paña pierna pataman ima. 27 Tukuy chaykunatataj churarqa Aaronpa makinman, wawasninpa makisninkumanpis. Chantá kayman jaqayman kuyucherqa kuyuchisqa ofrendata jina Jehová Diospa ñaupaqenpi. 28 Chaykunata makisninkumanta oqhariytawantaj Moisesqa altarpi qʼolacherqa, qʼolachina ofrenda patapi, ima munayta qʼaparispa Diospa sonqonta tiyaykuchinanpaj. Chaykunaqa jaywasqa karqa sacerdotesta churanapaj. Chayqa Jehová Diospaj ninapi qʼolachina ofrenda karqa.

29 Chantá Moisesqa carneroj pechonta oqharispa kayman jaqayman kuyucherqa kuyuchisqa ofrendata jina Jehová Diospa ñaupaqenpi.+ Sacerdotesta churanapaj jaywasqa carneroj pechonqa Moisespaj karqa, Jehová Dios Moisesman kamachisqanman jina.+

30 Chantá Moisesqa altarpi kaj uj chhika santo aceitewan,+ uj chhika yawarwan ima chʼajchuykurerqa Aaronman, ropasninmanwan, jinallataj Aaronpa wawasninman, ropasninkumanpis. Ajinata Aaronta, wawasnintawan+ Diospaj tʼaqarqa, jinallataj ropasninkutapis.+

31 Chaymanta Moisesqa Aaronman, wawasninmanwan nerqa: “Dioswan tinkukuna toldo punkupi aychata chayachispa+ chay kikinpi mikhuychej, sacerdotesta churanapaj canastapi kaj tʼantastawan. Diosqa kay jinata kamachiwarqa: ‘Aaronwan wawasninwan chaykunata mikhonqanku’,+ nispa. 32 Puchoj aychatawan tʼantatawantaj ninapi ruphachinkichej.+ 33 Dioswan tinkukuna toldo punkumantaqa ama karunchakunkichejchu qanchis diasta, sacerdotes churasqa kasqaykichej pʼunchaykuna juntʼakunankama. Chay qanchis diaspi sacerdotes churasqa kankichej.*+ 34 Jehová Diosqa kamacherqa kay tukuy imasta ruwananchejta, imaynatachus kunan ruwanchej ajinata, juchasniykichejmanta perdonta tarinaykichejpaj.+ 35 Chayrayku qankunaqa Dioswan tinkukuna toldo punkupi kanaykichej tiyan tuta pʼunchay, qanchis diasta.+ Jehová Diospa kamachisqantataj sumajta juntʼaychej,+ ajinamanta ama wañunaykichejpaj. Ajinata ari Diosqa kamachiwarqa”, nispa.

36 Aaronwan wawasninwantaj ruwarqanku imastachus Jehová Dios Moisesman kamacherqa tukuy chayta.

9 Pusaj kaj pʼunchaypi+ Moisesqa, Aaronta wawasnintawan wajyarqa, israelitaspa kurajkunasninkutawan. 2 Aaronmantaj nerqa: “Jucharayku ofrendaykipaj+ uj waka uñata apamuy sano kajta, apamullaytaj mana imanasqa carnerota* qʼolachina* ofrendapaj. Chaykunataqa jaywanki Jehová Diosman. 3 Israelitasmantaj niy: ‘Apamuychej uj chivota jucharayku ofrendapaj, jinallataj uj watayoj waka uñata, uj watayoj maltón carnerotawan sano kajkunata qʼolachina ofrendapaj. 4 Apamullaychejtaj uj torotawan uj carnerotawan khuska mikhurikuy ofrendapaj,+ chaykunata Jehová Diosman jaywanapaj. Chantá apamullaychejtaj chʼaki mikhuy ofrendata,+ aceitewan chajrusqata. Jehová Diosqa kunan pʼunchay qankunaman rikhurisonqachej’,+ nispa”.

5 Paykunataj apamorqanku imastachus Moisés apamunankuta kamacherqa chayta, Dioswan tinkukuna toldo punkuman. Chaymantataj tukuy israelitas qayllaykamuspa, Jehová Diospa ñaupaqenpi sayarqanku. 6 Chantá Moisesqa nerqa: “Ajinata Jehová Diosqa kamachin ruwanaykichejta, Jehová Diospa jatun kaynintaj qankunaman rikhurisonqachej”,+ nispa. 7 Chaymanta Moisesqa Aaronta nillarqataj: “Altarman qayllaykuspa Diosman jayway jucharayku ofrendaykita,+ qʼolachina ofrendaykitawan, qan perdonta tarinaykipaj,+ jinallataj familiaykipis.* Chantataj israelitaspa jaywanankuta+ jayway paykunapis perdonta tarinankupaj,+ Jehová Dios kamachisqanman jina”, nispa.

8 Chay ratopacha Aaronqa altarman qayllaykuspa, ñakʼarqa* juchasninrayku ofrendapaj waka uñata.+ 9 Chantá Aaronpa wawasnenqa payman jaywarqanku yawarta.+ Aarontaj dedonta chay yawarman chhapurispa, altarpa wajrasninta jawirarqa. Chay puchoj yawartataj altar uraman jichʼaykorqa.+ 10 Jinaspataj Aaronqa altarpi qʼolacherqa jucharayku ofrendapaj uywaj wiranta, riñonesninta, hígado wirasninta ima, Jehová Dios Moisesman kamachisqanman jina.+ 11 Chay uywaj aychanta, qarantawantaj campamentomanta* jawaman orqhospa ruphachimorqa.+

12 Chantá Aaronqa qʼolachina ofrendata ñakʼarqa. Wawasnintaj yawarta payman jaywarqanku, paytaj chay yawarwan chʼajchorqa altarpa muyuynintinta.+ 13 Chantá wawasnenqa jaywallarqankutaj chay qʼolachina ofrendaj aychasninta chhikan chhikan khuchurasqasta, umantawan. Aarontaj chaykunata altarpi qʼolacherqa. 14 Chaymantataj yakuwan mayllarqa chay uywaj chʼunchulasninta, chakisnintawan. Chaykunatataj altarpi qʼolacherqa, qʼolachina ofrenda patapi.

15 Chantá Aaronqa israelitaspa ofrendankuta jaywarqa: Israelitaspa juchasninkurayku ofrendamanta chivota ñakʼarqa. Chaytaqa jucharayku ofrendata jina jaywarqa imaynatachus waka uñata jaywarqa ajinallatataj. 16 Qʼolachina ofrendatapis jaywallarqataj, imaynatachus ruwana kasqanman jina.+

17 Chantá chʼaki mikhuy ofrendamantañataj+ uj maki juntʼata japʼispa altarpi qʼolacherqa, tutamanta qʼolachina ofrendatawan+ khuska.

18 Chaymanta Aaronqa khuska mikhurikuy ofrendamanta torotawan carnerotawan wañucherqa israelitasrayku. Wawasnintaj chay uywaspa yawarninta payman jaywarqanku, paytaj chay yawarwan chʼajchorqa altarpa muyuynintinta.+ 19 Toroj wirasninta,+ carneroj wira chupanta, chʼunchula wirasninta, riñonesninta, hígado wirasnintawanqa+ 20 churaykorqanku uywaspa pechosnin pataman. Aarontaj chay wirasta oqharispa altarpi qʼolacherqa.+ 21 Chay animalespa pechosnintawan paña piernasnintawantaj, Aaronqa kayman jaqayman kuyucherqa kuyuchisqa ofrendata jina Jehová Diospa ñaupaqenpi, Moisés kamachisqanman jina.+

22 Chaymanta Aaronqa israelitasta qhawarerqa, makisninta oqharispataj paykunata bendicerqa.+ Chantaqa jucharayku ofrendata, qʼolachina ofrendata, khuska mikhurikuy ofrendasta ima jaywaytawan, altarmanta jatariporqa.* 23 Chantá Moiseswan Aaronwanqa Dioswan tinkukuna toldoman yaykorqanku. Chaymanta llojsimuspataj israelitasta bendicerqanku.+

Jinallapi Jehová Diospa jatun kayninpa kʼanchaynin tukuy paykunaman rikhurerqa.+ 24 Chaymantataj Jehová Diosmanta nina lauray uraykamuspa,+ qʼolachina ofrendata, wirastawan altarpi qʼolaykuyta qallarerqa. Chayta rikuspa tukuy israelitasqa mayta tʼukuspa qhaparerqanku, pampakamataj kʼumuykukorqanku.+

10 Chantá Aaronpa wawasnin Nadabwan Abihuwanqa,+ sapa ujninku brasa apaykachanasninkuman churarqanku ninata, patanmantaj inciensota.+ Chantaqa mana jaywananku ninata Jehová Diospa ñaupaqenpi jaywayta qallarerqanku, mayqentachus Diosqa mana kamacherqachu jaywanankuta chayta.+ 2 Jehová Diospa ñaupaqenmantataj ujllata nina llojsimuspa, paykunata wañurparicherqa.+ Ajinamanta paykunaqa wañorqanku Jehová Diospa ñaupaqenpi.+ 3 Chantá Moisesqa Aaronta nerqa: “Jehová Diosqa ajinata nin: ‘Qayllaypi kajkunaqa yuyarikunanku tiyan llimphu kasqayta,+ tukuy israelitastaj jatunchanawanku tiyan’, nispa”. Aarontaj chʼinpacha qhepakorqa.

4 Chaymanta Moisesqa, Aaronpa tion Uzielpa+ wawasnin Misaelta, Elzafantawan wajyaspa, nerqa: “Jamuychej, orqhoychej kay hermanosniykichejta santo lugarmanta. Apaychej campamentomanta* jawaman”, nispa. 5 Paykunataj qayllaykuspa, chay wañusqasta camisonesnintinta aparqanku campamentomanta jawaman, Moisés paykunaman nisqanman jina.

6 Chaymanta Moisesqa Aaronta, chay ujnin wawasnin Eleazarta, Itamartawan nerqa: “Ama umaykichejta chʼichita japʼiychejchu, nitaj ropasniykichejtapis llikʼirakuychejchu+ llakisqa kasqaykichejta rikuchispa, ama qankunapis wañunaykichejpaj, amataj Diosqa phiñakunanpaj tukuy israelitaspaj. Pikunatachus Jehová Dios ninawan wañuchin chaykunamantaqa, tukuy israelita hermanosniykichej waqallanqanku. 7 Qankunaqa amapuni karunchakuychejchu Dioswan tinkukuna toldo punkumantaqa, manachayqa wañunkichej, imaraykuchus Jehová Diospa santo aceitenqa* qankunapi kashan”,+ nispa. Paykunataj Moisés nisqanman jina ruwarqanku.

8 Chantá Jehová Diosqa Aaronta nerqa: 9 “Qanpis chayri wawasniykipis tinkukuna toldoman yaykunaykichej kajtenqa, ama tomankichejchu vinota, nitaj ima machachej ujyanatapis,+ ama wañunaykichejpaj. Chayqa uj ley unay wataspaj churasqa kanqa qankunapaj, mirayniykichejpajwan. 10 Ajinamanta qankunaqa allinta reparayta atinkichej imachus santo kasqanta, imachus mana santochu kasqantapis, imachus llimphupaj qhawasqa kasqanta, imachus chʼichipaj qhawasqa kasqantapis.+ 11 Chantapis qankuna israelitasman yachachinkichej Jehová Diospa tukuy kamachiykunasninta, mayqenkunatachus Moisesman willarqa chaykunata”,+ nispa.

12 Chantá Moisesqa Aaronta, iskaynin qhepakoj wawasnin Eleazarta, Itamartawan nerqa: “Chʼaki mikhuy ofrendamanta wakinta Jehová Diosman ninapi qʼolacherqankichej.* Kunanqa puchojmanta mana levadurayoj tʼantata ruwaychej, chaytataj mikhuychej altar qayllapi.+ Chay puchoj ofrendaqa may llimphumin.+ 13 Chaytaqa mikhuychej uj santo lugarpi.+ Chayqa qanman, wawasniykimanwan qosqa kanku, Jehová Diospaj ninapi qʼolachina ofrendasmanta. Chayta Diosqa kamachiwarqa. 14 Chantapis uj llimphu lugarpi mikhullaychejtaj kuyuchisqa ofrenda pecho aychata, sacerdotespaj tʼaqasqa piernatawan.+ Chaytaqa mikhunkichej qan, qhari wawasniyki, warmi wawasniykipis.+ Chay imasqa qanman, qhari wawasniykimanwan qosqa karqa, israelitaspa khuska mikhurikuy ofrendasninkumanta. 15 Israelitasqa apamonqanku uywaj piernanta, pechontawan, jinallataj ninapi qʼolachinapaj wirasnintawan. Ajinata apamonqanku kuyuchisqa ofrendata Jehová Diosman jaywanapaj. Chay piernawan pechowanqa qanman, wawasniykimanpis qosqapuni kanqa,+ Jehová Dios kamachisqanman jina”, nispa.

16 Chaymanta Moisesqa mayta maskʼarqa jucharayku ofrenda chivota.+ Chay chivotataj qʼolaykuchisqankuña. Chayta yachaspa Moisesqa mayta phiñakorqa Aaronpa iskaynin qhepakoj wawasnin Eleazarpaj, Itamarpajwan, nerqataj: 17 “¿Imaraykutaj jucharayku ofrenda uywaj aychanta mana mikhorqankichejchu santo lugarpiri?+ Chayqa may llimphu karqa. Chayta Diosqa qankunaman qosorqachej, qankuna israelitaspa juchasninkuta apanaykichejpaj, chaywantaj paykuna perdonta tarinankupaj Jehová Diospa ñaupaqenpi. 18 Chay chivoj yawarnenqa mana santo lugarman apaykusqachu karqa.+ Chay jaywasqa aychataqa mikhunaykichej karqa santo lugarpi, Dios kamachiwasqanman jina”, nispa. 19 Aarontajrí Moisesman kuticherqa: “Israelitasqa jucharayku ofrendankuta, qʼolachina ofrendankutawan apamorqanku Jehová Diospa ñaupaqenman.+ Chaywanpis noqaqa mana mikhuymanchu karqa chay jaywasqa aychataqa. Qan yachanki imachus kay pʼunchay pasawasqanta. Sichus jucharayku ofrenda aychata mikhuyman karqa chayqa, ¿Jehová Diospajqa allinchu kanman karqa?”, nispa. 20 Moisestaj chayta uyarispa sonqo juntʼasqa qhepakorqa.

11 Chaymanta Jehová Diosqa Moisesman, Aaronmanwan nerqa: 2 “Israelitasman niychej: ‘Jallpʼa patapi kausaj animalesmantaqa kaykunata mikhuyta atinkichej:+ 3 Kutipakoj animalesta,* iskayman pʼalqasqa chaki sillusniyojta.

4 ”’Chaywanpis ama mikhunkichejchu kutipakullanku chaykunataqa chayri chaki sillusnillanku pʼalqasqa kashan chaykunataqa. Ujnenqa kashan camello, imaraykuchus camelloqa kutipakun, manataj chaki sillusnin pʼalqasqachu. Chayrayku chay animalqa chʼichipaj qhawasqa.+ 5 Damán+ nisqa kʼita qowitapis amallataj mikhunkichejchu, imaraykuchus damanqa kutipakun, chaywanpis chaki sillusnenqa mana pʼalqasqachu. Chayrayku chay animalqa chʼichipaj qhawasqa. 6 Liebre nisqa castilla qowipis kutipakun, chaywanpis chaki sillusnenqa mana pʼalqasqachu. Chayrayku chay animalqa chʼichipaj qhawasqa. 7 Khucheqa+ iskayman pʼalqasqa chaki sillusniyoj, chaywanpis mana kutipakunchu. Chayrayku chay animalqa chʼichipaj qhawasqa. 8 Chay animalespa aychankutaqa amapuni mikhunkichejchu, wañojtinkupis ama llojchinkichejchu. Chaykunaqa chʼichipaj qhawasqa animales kanku.+

9 ”’Yakupi kausajkunamantaqa kaykunata mikhuyta atinkichej: Aletasniyojtaj escamasniyojtaj kajkunata, mar qochamantapis, mayusmantapis.+ 10 Jinapis qankunapajqa millaypaj qhawasqa kanqa mar qochapipis mayuspipis mana aletasniyoj, nitaj escamasniyoj kajkuna, yakupi kaj tukuy juchʼuy animalesmantapis* kachunku chayri yakupi kaj waj animalespis kachunku. 11 Chaykunataqa millaypaj qhawankichej, amataj aychankutaqa mikhunkichejchu,+ wañojtinkupis millachikunkichej. 12 Yakupi kajkunamanta mana aletasniyoj, nitaj escamasniyoj kajkunaqa, qankunapaj millaypaj qhawasqa kanqa.

13 ”’Phawajkunamantaqa kaykunata ama mikhunkichejchu, millaypajtaj qhawankichej: aguilata,+ pescado mikhu aguilata, yana suwintuta,*+ 14 pukarau ankata,* imaymana waj yana ankasta, 15 imaymana qharqañasta, 16 surita,* chʼuseqata, gaviota nisqa leuqe leuqeta, imaymana mamanista, 17 juchʼuy jukuta, yana pilita, ninrisapa jukuta, 18 jatun kunkayoj pilita, jatun pikuyoj* pilita,* suwintuta, 19 cigüeñata, imaymana garzasta, abubilla pʼisqota, chiñita ima. 20 Pampapi purej lijrasniyoj* tukuy khurustapis millaypaj qhawankichej.

21 ”’Pampapi purej lijrasniyoj khurusmantaqa, mikhuyta atinkichej pampapi phinkiykachanankupaj iskay jatuchaj chakisniyoj kanku chaykunallata. 22 Chaykunamantaqa mikhuyta atinkichej kaykunata: tukuy laya* langostasta,+ sirpitasta, saltamontesta ima. 23 Tukuy waj phawaykachaj pampapi purej khurustataj, millaypaj qhawankichej. 24 Chaykunatachus mikhunkichej chayqa, chʼichipaj qhawasqa kankichej. Chay wañusqa animalesta llojchirejpis chʼichipaj qhawasqa kanqa chʼisiyaykunankama.+ 25 Pillapis chay wañusqa animalesta oqharejqa ropasninta tʼajsakunan tiyan,+ chʼisiyaykunankamataj chʼichipaj qhawasqa kanqa.

26 ”’Mayqen aminalespatachus chaki sillusnin pʼalqasqa jina, manataj iskayman partisqapunichu, nitaj kutipakunchu chayqa, chay animalesta chʼichipaj qhawankichej. Pichus chaykunata llojchejqa chʼichipaj qhawasqa kanqa.+ 27 Tawa chakisniyoj animalesmantaqa, chaki plantasninkuwan purejkunata* chʼichipaj qhawankichej. Pichus chay wañusqa animalesta llojchejqa chʼisiyaykunankama chʼichipaj qhawasqa kanqa. 28 Pichus chay wañusqa animalesta oqharejqa ropasninta tʼajsanan tiyan,+ paytaj chʼisiyanankama chʼichipaj qhawasqa kanqa.+ Qankunaqa chay animalesta chʼichipaj qhawankichej.

29 ”’Kay jallpʼa patapi kanku chay juchʼuy animalesmantaqa chʼichipaj qhawankichej kaykunata: tuju nisqa jatun jukʼuchata, jukʼuchata,+ tukuy laya lagartosta, 30 ararankhata, jatun lagartota, yaku ararankhata, lagartijata, camaleón lagartota ima. 31 Chay animalestaqa chʼichipaj qhawankichej.+ Pichus chay wañusqa animalesta llojchejpis, chʼichipaj qhawasqa kanqa chʼisiyaykunankama.+

32 ”’Imamanchus chay wañusqa animales urmaykonqa chaykunapis, chʼichillapajtaj qhawasqas kanqanku, kachun kʼullu vasos, kʼullu platos, waj kʼullu imas, ropas, qaras, qhashqa telas. Chay imasqa yakuman churasqas kanqanku, chʼichipajtaj qhawasqas kanqanku chʼisiyaykunankama. Chaymantaraj llimphupaj qhawasqa kanqanku. 33 Sichus chay wañusqa animal uj yuruman urmaykunman chayqa, chay yurutaqa pʼakinkichej, imachus chay yuru ukhupi kajpis chʼichipaj qhawasqa kanqa.+ 34 Sichus chay yurumanta yaku ima mikhunallamanpis jichʼaykukunman chayqa, chay mikhunaqa chʼichipaj qhawasqa kanqa. Chay yuruman ima ujyanapis jichʼaykusqa kajqa, chʼichillapajtaj qhawasqa kanqa. 35 Sichus imamanpis chay wañusqa animal urmaykonqa chayqa, chay imasqa chʼichipaj qhawasqa kanqanku. Hornopis kachun chayri qʼonchapis kachun thuñisqa kanan tiyan. Chaykunaqa chʼichipaj qhawasqa kanku, chʼichillapajpunitaj qhawankichej. 36 Sichus chay wañusqa animal yaku juturiman chayri uj estanqueman urmaykunman chayqa, chay juturiwan estanquewanqa mana chʼichipajchu qhawasqa kanqanku. Jinapis chay yakumanta chay wañusqa animalta orqhojqa, chʼichipaj qhawasqa kanqa. 37 Sichus chay wañusqa animal tarpuna mujuman urmaykonqa chayqa, chay mujoqa mana chʼichipajchu qhawasqa kanqa. 38 Sichus muju joqʼo kashajtin chay wañusqa animalpa imallanpis patanman urmaykunman chayqa, chay mujoqa chʼichipaj qhawasqa kanqa.

39 ”’Sichus mikhunaykichejpaj kaj uywa wañunman chayqa, pichus chayta llojchejqa chʼisiyaykunankama chʼichipaj qhawasqa kanqa.+ 40 Sichus pipis chay wañusqa uywaj imallantapis mikhunman chayqa, ropasninta tʼajsanan tiyan, chʼisiyanankamataj chʼichipaj qhawasqa kanqa.+ Chay wañusqa uywata apakapojpis ropasninta tʼajsanqa, chʼisiyaykunankamataj chʼichipaj qhawasqa kanqa. 41 Kay jallpʼa patapi chʼichipaj qhawasqa juchʼuy animalestaqa* amapuni mikhunkichejchu. Chaykunaqa millaypaj qhawasqa kanku.+ 42 Ama mikhunkichejchu chay juchʼuy animalesta, kachun pampapi qhatatakuspa purejkuna, tawa chakiswan purejkuna chayri ashkha chakiswan purejkunapis. Chaykunaqa millaypaj qhawasqa kanku.+ 43 Ama chay animalesnejtaqa millayman tukunkichejchu. Nitaj chaykunanejta chʼichichakunkichejchu, nillataj chʼichipaj qhawasqaman tukunkichejchu.+ 44 Noqa Jehová Diosniykichej kani.+ Chayrayku llimphuchakunaykichej tiyan llimphupaj qhawasqa kanaykichejpaj,+ noqaqa llimphu kani.+ Jallpʼa patapi kaj juchʼuy animaleswanqa, amapuni chʼichichakunkichejchu. 45 Noqamin Jehová Dios kani, noqa qankunata Egiptomanta orqhomorqaykichej Diosniykichej kanaypaj.+ Noqaqa llimphu kani,+ chayrayku qankunapis llimphus kanaykichej tiyan.+

46 ”’Kaymin leyqa kashan animalesmanta, jinallataj phawajkunamanta, yakupi kausajkunamanta, jallpʼa patapi aywirinku chay animalesmantapis. 47 Ajinamanta reparanaykichejpaj mayqenchus chʼichipaj qhawasqa kasqanta, mayqenchus llimphupaj qhawasqa kasqantapis, mayqentachus mikhunata, mayqentachus mana mikhunatapis’”.+

12 Jehová Diosqa Moisesman ujtawan nerqa: 2 “Israelitasman kayta niy: ‘Sichus uj warmi onqoj rikhurispa uj qhari wawitata nacechikun chayqa, chay warmeqa qanchis diasta chʼichipaj qhawasqa kanqa, imaynatachus killa yawarninpi chʼichipaj qhawasqa ajinata.+ 3 Chantá chay qhari wawita nacekusqanmanta pusaj pʼunchayninman, wawitaj jispʼanitanpa puntanmanta qaritan khuchusqa kanqa.+ 4 Chay warmitaj 33 diastawan yawarninmanta llimphuchakonqa. Chaykamaqa mana imatapis Diospaj tʼaqasqa kajta llojchenqachu, nitaj santo lugarman yaykuyta atenqachu, llimphuchakunan días juntʼakunankama.

5 ”’Sichus chay warmi uj warmi wawitata nacechikun chayqa, 14 diasta chʼichipaj qhawasqa kanqa, imaynatachus killa yawarninpi chʼichipaj qhawasqa ajinata. Chantataj 66 diastawan yawarninmanta llimphuchakonqa. 6 Chay warmeqa qhari wawitata chayri warmi wawitata nacechikusqanmanta llimphuchakunan pʼunchaykuna juntʼakojtin, tinkukuna toldo punkuman apamuchun uj watayoj maltón carnerota,* qʼolachina* ofrendapaj.+ Apamullachuntaj uj paloma irpata chayri uj jurkʼutata, jucharayku ofrendapaj. Chaykunataqa sacerdoteman apamonqa. 7 Sacerdotetaj chaykunata Jehová Diosman jaywanqa, chay warmi perdonta tarinanpaj. Ajinamanta chay warmeqa yawar apayninmanta llimphuchasqa kanqa. Chaymin leyqa kashan qhari wawata chayri warmi wawata nacechikoj warmipaj. 8 Sichus chay warmejta mana tiyapunmanchu ovejata apamunanpaj chayqa, apamuchun iskay jurkʼutasta chayri iskay paloma irpasta.+ Ujqa kanqa qʼolachina ofrendapaj, ujnintaj kanqa jucharayku ofrendapaj. Sacerdotetaj chaykunata jaywanqa, chay warmi juchanmanta perdonta tarinanpaj. Chay warmitaj llimphupaj qhawasqa kanqa’, nispa”.

13 Jehová Diosqa Moisesman, Aaronmanwan nillarqataj: 2 “Sichus uj runaj cuerponpi* ima punkiypis rikhurinman, chayri qarachaykukunman, chayri uj chʼejchisitu rikhurinman chayqa, ichapis lepra onqoy*+ kanman. Chayrayku chay runaqa sacerdote Aaronman rikuchikamunan tiyan, manachayrí Aaronpa wawasnin sacerdotesman.+ 3 Sacerdotetaj chay runaj cuerponpi imachus rikhurerqa chayta qhawanqa. Sichus chay cheqapi pelosnin yurajyanman, aychantaj tʼoqoykusqa kashanman chayqa, lepra onqoypuni. Sacerdoteqa chayta qhawaspaña nenqa chay runaqa chʼichipaj qhawasqa kasqanta. 4 Sichus chay runaj cuerponpi rikhurisqan chʼejchisitu yuraj kanman, manataj aychan tʼoqoyanmanchu, nitaj pelosninpis yurajyanmanchu chayqa, sacerdoteqa chay runata wajkunamanta karunchanqa* qanchis diasta.+ 5 Chay qanchis diasmanta sacerdoteqa ujtawan chay runata qhawallanqataj. Sichus chay runaj cuerponpi imachus rikhurerqa chay kikillanpuni, manataj astawan jatunyanchu chayqa, sacerdoteqa qanchis diastawan chay runata wajkunamanta karunchanqa.

6 ”Chay qanchis diasmanta sacerdoteqa ujtawan chay runata qhawallanqataj. Sichus chaykama chay chʼejchisitu chinkashanña, manataj astawan jatunyanchu chayqa, sacerdoteqa nenqa chay runa llimphupaj qhawasqa kasqanta.+ Cuerponpi rikhurerqa chayqa qarachalla karqa. Chay runataj ropasninta tʼajsakonqa, llimphupajtaj qhawasqa kanqa. 7 Chaywanpis sichus llimphupaj qhawasqa kananpaj sacerdoteman risqanmantaña chay qaracha astawan jatunyanman chayqa, ujtawan renqa sacerdotewan qhawachikamoj. 8 Sichus sacerdote qhawaspa rikun chay qaracha astawan jatunyasqanta chayqa, pay nenqa chay runa chʼichipaj qhawasqa kasqanta. Chayqa lepra onqoypuni.+

9 ”Sichus uj runapi lepra onqoy rikhurinman chayqa, sacerdoteman pusachunku. 10 Sacerdotetaj payta qhawanqa.+ Sichus chay runaj punkisqan yuraj kanman, pelosninpis yurajllataj kanman, chay punkisqanpitaj herida jina kicharikunman chayqa,+ 11 chay runaj onqoynenqa uj saphichasqa lepra onqoy. Sacerdoteqa nenqa chay runa chʼichipaj qhawasqa kasqanta. Chantapis chay runataqa manaña ujtawan qanchis diasmanta qhawanqachu,+ imaraykuchus chʼichipaj qhawasqaña. 12 Sichus lepra onqoy uj runaj cuerponman juntʼaykun, uma puntanmanta chaki puntankama sacerdote rikuyta atisqanman jina chayqa, 13 sitajchus sacerdoteqa qhawaspa rikun lepraqa chay runaj tukuy cuerponman juntʼaykusqanta chayqa, sacerdoteqa nenqa chay runa llimphupaj qhawasqa kasqanta,* chay lepra onqoynin yurajman tukusqanrayku. Chay runaqa llimphupaj qhawasqaña. 14 Chaywanpis sichus chay runaj cuerponpi maynejllapipis herida jina kicharikunman chayqa, chay runaqa chʼichipaj qhawasqa kanqa. 15 Sacerdoteqa chay runaj heridanta rikuspa, chʼichipaj qhawasqa kasqanta nenqa.+ Chay heridaqa chʼichipaj qhawasqa. Chayqa lepra onqoy.+ 16 Chantá sichus chay herida watejmanta yurajman tukonqa chayqa, chay runaqa sacerdoteman renqa. 17 Sacerdotetaj payta qhawanqa.+ Sichus chay herida yurajyasqaña kanqa chayqa, sacerdoteqa nenqa chay runa llimphupaj qhawasqa kasqanta. Chay runaqa llimphupaj qhawasqaña.

18 ”Sichus uj runaj aychanpi sarna rikhurinman, sanoyapunmantaj, 19 sitajchus chay sanoyasqa cheqapi yurajta punkinman chayri yuraj pukata chʼejchiyanman chayqa, chay runaqa sacerdoteman rikuchikamuchun. 20 Sichus sacerdote chay onqoyta qhawaspa+ rikun aychan tʼoqoyasqanta, pelosninpis yurajyasqanta chayqa, sacerdoteqa nenqa chay runa chʼichipaj qhawasqa kasqanta. Chay sanoyasqa cheqapi rikhurejqa lepra onqoypuni. 21 Sichus sacerdote qhawaspa rikun chay cheqapi pelosnin mana yurajyasqanta, nitaj aychanpis tʼoqoyasqanta, manachayqa chinkashasqantaña chayqa, sacerdoteqa chay runata wajkunamanta karunchanqa qanchis diasta.+ 22 Sichus chay chʼejchisitu astawan jatunyan chayqa, sacerdoteqa nenqa chay runa chʼichipaj qhawasqa kasqanta. Chay runaqa lepra onqoyniyoj. 23 Sichus chay chʼejchisitu kikillanpuni, nitaj astawan jatunyanchu chayqa, sarnaj punkisqallan. Sacerdotetaj nenqa chay runa llimphupaj qhawasqa kasqanta.+

24 ”Sichus pipis ninawan ruphachikunman, chay ruphasqa aychan cheqapitaj rikhurinman yuraj puka chʼejchisitu chayri yuraj chʼejchisitu chayqa, 25 sacerdoteqa chayta qhawanqa. Sichus chay chʼejchiyasqapi pelosqa yurajman tukunman, aychanpis tʼoqoyasqa kanman chayqa, chay ruphasqa aychanpi lepra onqoy rikhurin, sacerdotetaj nenqa chay runaqa chʼichipaj qhawasqa kasqanta. Chayqa lepra onqoypuni. 26 Sichus sacerdote qhawaspa rikun chay chʼejchiyasqapi pelosnin mana yurajyasqanta, nitaj aychanpis tʼoqoyasqanta, manachayqa chinkashasqantaña chayqa, sacerdoteqa chay runata wajkunamanta karunchanqa qanchis diasta.+ 27 Chay qanchis diasmanta sacerdoteqa ujtawan chay runata qhawanqa. Sichus chay onqoy astawan jatunyan chayqa, sacerdoteqa nenqa chay runa chʼichipaj qhawasqa kasqanta. Chayqa lepra onqoypuni. 28 Sichus chay chʼejchisitu kikillanpuni, nitaj astawan jatunyanchu, manachayqa chinkapushan chayqa, chay punkisqaqa ruphasqa kasqanraykulla karqa. Sacerdoteqa nenqa chay runa llimphupaj qhawasqa kasqanta, imaraykuchus chay punkisqaqa ruphasqa kasqanraykulla karqa.

29 ”Sichus uj qharejta chayri uj warmejta umanpi chayri quijadanpi uj onqoy rikhurin chayqa, 30 sacerdoteqa chay onqoyta qhawanqa.+ Sichus aychan tʼoqoyasqa kashan, chay cheqapi pelosninpis qʼelluman tukuspa pisiyashan chayqa, sacerdoteqa nenqa chay runa chʼichipaj qhawasqa kasqanta, imaraykuchus uj onqoy rikhurin chujchanpi chayri barbanpi.* Chayqa lepra onqoypuni umanpi chayri quijadanpi. 31 Sichus sacerdote chay onqoyta qhawaspa rikunman chay runaj aychan mana astawan tʼoqoyasqanta, nitaj chaynejpi yana pelos kasqanta chayqa, sacerdoteqa chay runata wajkunamanta karunchanqa qanchis diasta.+ 32 Chay qanchis diasmanta sacerdoteqa ujtawan chay onqoyta qhawanqa. Sichus chay onqoy mana astawan jatunyanchu, nitaj pelosninpis qʼelluyanchu, nitaj astawan aychan tʼoqoyanchu chayqa, 33 chay runaqa umanta pʼajlakuchun chayri barbanta rasurakuchun, maynejpichus chay onqoy kashan chaynejllata ama pʼajlakuchunchu chayri ama rasurakuchunchu. Chaymantataj sacerdoteqa qanchis diastawan payta wajkunamanta karunchanqa.

34 ”Chay qanchis diasmanta sacerdoteqa chay onqoyta ujtawan qhawanqa. Sichus umanpi chayri barbanpi onqoy mana astawan jatunyanchu, nitaj aychanpis astawan tʼoqoyanchu chayqa, sacerdoteqa nenqa chay runa llimphupaj qhawasqa kasqanta. Chaymantataj chay runaqa ropasninta tʼajsanqa, llimphupajtaj qhawasqa kanqa. 35 Sichus chay onqoy astawan jatunyanman, llimphupaj qhawasqa kasqanmantaña chayqa, 36 sacerdoteqa ujtawan chay runata qhawanqa. Sichus chay onqoy astawan jatunyan chayqa, sacerdoteqa manaña qʼellu pelosta maskʼanqachu. Chay runaqa chʼichipaj qhawasqaña. 37 Sichus sacerdote qhawaspa rikun chay onqoy mana astawan jatunyasqanta, chay cheqapitaj yana pelos wiñasqantaña chayqa, niyta munan chay onqoyqa sanoyapusqantaña. Chay runaqa llimphuña. Sacerdotetaj nenqa chay runa llimphupaj qhawasqa kasqanta.+

38 ”Sichus uj qharejta chayri uj warmejta cuerpon* yurajta chʼejchiyanman chayqa, 39 sacerdoteqa chayta qhawanqa.+ Sichus chay chʼejchiyasqan oqeyasqa yuraj kanman chayqa, mana sajra onqoychu. Chay runaqa llimphupaj qhawasqa kanqa.

40 ”Sichus mayqen qharejta chujchasnin tʼakakunman, pʼajlataj rikhurinman chayqa, chay runaqa llimphupaj qhawasqa kanqa. 41 Sichus frenten patallamanta chujchasnin tʼakakunman, jinataj pʼajla frente rikhurinman chayqa, chay runapis llimphupaj qhawasqallataj kanqa. 42 Chantá sichus chay pʼajlanpi chayri frenten patapi yuraj puka llejti jina rikhurinman chayqa, lepra onqoypuni rikhurishan pʼajlanpi chayri frenten patapi. 43 Sacerdoteqa chay runata qhawanqa. Sichus chay runaj pʼajlanpi chayri frenten patapi llejti jina rikhurisqanpi yuraj pukata punkinman, lepra onqoyman rijchʼakojta chayqa, 44 chay runaqa lepra onqoyniyojpuni. Chayrayku chay runaqa chʼichipaj qhawasqa kanqa. Sacerdoteqa nenqa chay runa chʼichipaj qhawasqa kasqanta, umanpi chay onqoy rikhurisqanrayku. 45 Lepra onqoyniyoj runaqa ropasninta llikʼirakuchun, umantapis chʼichipachata japʼichun. Chantapis chay runaqa siminta* tapaykukuspa qhaparichun: ‘Chʼichi kani, chʼichi kani’, nispa. 46 Lepra onqoyniyoj kashaspaqa, chʼichipaj qhawasqallapuni kanqa. Chʼichipaj qhawasqa kasqanraykutaj wajkunamanta karupi tiyakonqa, campamentomanta* jawapi.+

47 ”Sichus lepra onqoy rikhurinman millmamanta chayri linomanta ruwasqa ropapi, 48 jinallataj millmamanta, chayri linomanta awasqa telaj qʼaytusninpi, chayri qaraspi, chayri qaramanta ima ruwasqapipis, 49 sitajchus chay onqoyqa chay ropapi, qaraspi, awasqa telaj qʼaytusninpi chayri qaramanta ima ruwasqapipis qʼomer qʼelluyasqa chayri pukayasqa kanman chayqa, lepra onqoypuni kashan. Chaytaqa apaspa sacerdoteman rikuchimuchunku. 50 Sacerdoteqa chay onqoyta qhawaytawan, chay onqoyniyoj imasta qanchis diasta waj lugarman churanqa.+ 51 Chay qanchis diasmanta chay onqoyta ujtawan qhawallanqataj. Sichus chay ropapi, awasqa telaj qʼaytusninpi, qarapi chayri qaramanta ima ruwasqapipis astawan jatunyanman chayqa, chay onqoyqa millay leprapuni kashan. Chay imasqa chʼichipaj qhawasqa kanqanku.+ 52 Payqa ninawan ruphaykuchenqa imaspichus chay onqoy rikhurin chay imasta, ropasta, millmamanta, chayri linomanta awasqata, chayri qaramanta ima ruwasqatapis, imaraykuchus chayqa millay lepra onqoy. Chay imasqa ruphachisqa kanqa.

53 ”Sichus sacerdote qhawaspa rikun chay ropaspi, chayri awasqa telaj qʼaytusninpi, chayri qaramanta ima ruwasqapipis chay onqoy mana astawan jatunyasqanta chayqa, 54 sacerdoteqa kamachenqa chay imasta tʼajsanankuta. Paytaj chay imasta ujtawan qanchis diasta waj lugarman churanqa. 55 Sumaj tʼajsasqa kasqanmanta qanchis diasninman sacerdoteqa ujtawan qhawanqa. Sichus chay onqoy kikillanpuni, nitaj jatunyanchu chayqa, chʼichipaj qhawasqa kanqa. Imapichus chay onqoy kashan chayqa ruphachisqa kanqa ismuykusqanrayku, jawanmantapis chayri ukhunmantapis kachun.

56 ”Sichus sumajta tʼajsasqankumantaña sacerdoteqa ujtawan qhawaspa rikunman chay onqoy chinkashasqantaña chayqa, sacerdoteqa chay cheqata kʼutonqa ropamantapis, qaramantapis chayri awasqa telamantapis. 57 Sichus chay ropaspi, awasqa telaspa qʼaytusninpi chayri qaramanta ruwasqa imaspi chay onqoy wajnejpiñataj rikhurinman chayqa, chayqa niyta munan chay onqoy astawan jatunyashasqanta. Chayrayku chay imasqa ruphachisqa kanqa.+ 58 Sichus tʼajsasqa kasqanmantaña chay onqoy chinkanman ropamanta, awasqa telaspa qʼaytusninmanta chayri qaramanta ima ruwasqamantapis chayqa, ujtawan tʼajsasqa kanqa, chantá llimphupaj qhawasqa kanqa.

59 ”Chaymin leyqa kashan imatachus ruwanamanta lepra onqoy rikhurejtin ropaspi, millmamanta, chayri linomanta awasqa telaspi, chayri qaramanta ruwasqa imaspipis. Ajinamanta sacerdote ninanpaj chay imas llimphupajchus chʼichipajchus qhawasqa kasqanta”.

14 Jehová Diosqa Moisesman ujtawan parlaspa nillarqataj: 2 “Kaymin leyqa kanqa lepra onqoyniyojkunapaj, ima diachus llimphupaj qhawasqa kanqanku chay diapaj. Leprayoj runaqa pusasqa kanqa sacerdoteman.+ 3 Sacerdotetaj campamentomanta* llojsispa, chay onqosqa runata qhawamonqa. Sichus rikonqa chay runa lepra onqoyninmanta sanoyasqantaña chayqa, 4 sacerdoteqa kamachenqa apamunanta kausashaj iskay pʼisqosta llimphupaj qhawasqasta, cedro kʼaspita, puka qʼaytuta, hisopo qhoratawan llimphuchasqa kananpaj.+ 5 Chantá sacerdoteqa kamachenqa ujnin pʼisqota wañuchinankuta, juturimanta orqhosqa yakuyoj tʼuru manka patapi. 6 Chaymantataj sacerdoteqa oqharenqa kausashaj pʼisqota, cedro kʼaspita, puka qʼaytuta, hisopo qhoratawan. Chaykunatataj joqʼochanqa wañuchisqa pʼisqoj yawarninwan, mayqenchus juturimanta orqhosqa yaku patapi wañuchisqa karqa chaywan. 7 Chantá qanchis kutita chay yawarwan chʼajchonqa lepra onqoyninmanta llimphuchakushan chay runata, nenqataj llimphupaj qhawasqa kasqanta, kausashaj pʼisqotataj kachariponqa.+

8 ”Llimphuchakushan chay runaqa ropasninta tʼajsakonqa, chujchasninta kʼutukonqa, cuerpontataj rasurakonqa, chantá bañakonqa. Ajinamanta llimphupaj qhawasqa kanqa. Chaymantaraj yaykonqa campamentoman, chaywanpis qanchis diastawanraj toldo wasinmanta* jawallapi tiyakonqa. 9 Qanchis kaj diapitaj umanta pʼajlakonqa, barbanta* rasurakonqa, ñawi cejasnintawan. Tukuy pelosninta rasurakuytawantaj bañakonqa, ropasnintapis tʼajsakonqa. Ajinamanta payqa llimphupaj qhawasqa kanqa.

10 ”Pusaj kaj pʼunchaypitaj apamonqa iskay maltón carnerosta* sano kajkunata, uj watayoj ovejatawan sano kajllatataj.+ Chʼaki mikhuy ofrendapajtaj+ apamonqa ñutʼu jakʼuta aceitewan chajrusqata, kinsa kilos khuskanniyojta jina,* apamullanqataj uj vaso* aceiteta.+ 11 Llimphupaj qhawasqa kasqanta nej sacerdoteqa, chay llimphuchakoj runata ofrendasnin aparisqata pusamonqa Jehová Diospa ñaupaqenman, tinkukuna toldo punkuman. 12 Sacerdoteqa pantasqarayku ofrendapaj+ ujnin kaj maltón carnerota jaywanqa, uj vaso* aceitetawan. Chaykunataqa kayman jaqayman kuyuchenqa kuyuchisqa ofrendata jina Jehová Diospa ñaupaqenpi.+ 13 Chaymantataj maltón carnerota ñakʼanqa,* maypichus ñakʼakun jucharayku ofrendata, qʼolachina* ofrendatapis chaypi,+ uj santo lugarpi. Imaynachus jucharayku ofrendaqa sacerdotepaj, ajinallataj pantasqarayku ofrendapis sacerdotepaj kanqa.+ Chayqa may llimphumin.+

14 ”Chaymantataj sacerdoteqa, pantasqarayku ofrendaj uj chhika yawarninwan jawiykonqa chay llimphuchakojpa paña ninrinpa ura puntanta, paña makinpa machu dedonta, paña chakinpa machu dedontawan. 15 Chantataj sacerdoteqa chay uj vaso* aceitemanta+ uj chhikata jichʼaykonqa lloqʼe makinman. 16 Jinaspataj sacerdoteqa chay lloqʼe makinpi kaj aceiteman paña maki dedonta chhapuykonqa. Chay dedonwantaj qanchis kutita chʼajchonqa Jehová Diospa ñaupaqenpi. 17 Chaymanta sacerdoteqa makinpi puchoj aceitewan jawenqa chay llimphuchakoj runaj paña ninrinpa ura puntanta, paña makinpa machu dedonta, paña chakinpa machu dedontawan, maynejkunapichus pantasqarayku ofrendaj yawarninwan jawerqaña chaykunaman. 18 Chaymantataj makinpi puchoj aceiteta, chay llimphuchakoj runaj umanman jichʼaykonqa. Chayta sacerdoteqa ruwanqa Jehová Diospa ñaupaqenpi, chay runa perdonta tarinanpaj.+

19 ”Chantá sacerdoteqa jucharayku ofrendata jaywanqa,+ chay runa chʼichipaj qhawasqa kasqanmanta perdonta tarinanpaj, ajinamanta chay runaqa llimphuchasqa kanqa. Chaymantaqa qʼolachina ofrendatañataj ñakʼanqa. 20 Chantataj sacerdoteqa chay qʼolachina ofrendata, chʼaki mikhuy ofrendatawan+ altarpi jaywanqa, chaywan chay runa perdonta tarinanpaj.+ Ajinamanta chay runaqa llimphupaj qhawasqa kanqa.+

21 ”Sichus chay runa wajcha kaspa mana atinmanchu apamuyta chay kamachisqa ofrendata chayqa, apamuchun uj maltón carnerollata pantasqarayku ofrendata jina kuyuchisqa ofrendapaj, chaywan perdonta tarinanpaj. Chantá chʼaki mikhuy ofrendapaj apamullachuntaj aceitewan chajrusqa sumaj ñutʼu jakʼuta, uj kilota jina,* uj vaso* aceitetawan. 22 Apamullachuntaj iskay jurkʼutasta chayri iskay paloma irpasta atisqanman jina. Ujnenqa kanqa jucharayku ofrendapaj, ujnintaj qʼolachina ofrendapaj.+ 23 Pusaj kaj pʼunchaypitaj+ tukuy chaykunata sacerdoteman apanqa llimphuchasqa kananpaj, tinkukuna toldo punkuman, Jehová Diospa ñaupaqenman.+

24 ”Sacerdotetaj pantasqarayku ofrendapaj+ maltón carnerota, uj vaso* aceitetawan kayman jaqayman kuyuchenqa kuyuchisqa ofrendata jina Jehová Diospa ñaupaqenpi.+ 25 Chaymanta sacerdoteqa chay maltón carnerota ñakʼanqa, mayqenchus pantasqarayku ofrendapaj chayta. Chay carneroj uj chhika yawarninta japʼispataj, chaywan jawenqa chay llimphuchakojpa paña ninrinpa ura puntanta, paña makinpa machu dedonta, paña chakinpa machu dedontawan.+ 26 Chantataj sacerdoteqa uj chhika aceiteta jichʼaykonqa lloqʼe makinman.+ 27 Chay lloqʼe makinpi kaj aceiteman paña maki dedonta chhapuykuspataj, qanchis kutita chʼajchonqa Jehová Diospa ñaupaqenpi. 28 Chaymanta sacerdoteqa makinpi kaj aceitewan jawiykonqa chay llimphuchakoj runaj paña ninrinpa ura puntanta, paña makinpa machu dedonta, paña chakinpa machu dedontawan, maynejkunapichus pantasqarayku ofrendaj yawarninwan jawerqaña chaykunaman. 29 Makinpi puchoj aceitetataj sacerdoteqa chay llimphuchakoj runaj umanman jichʼaykonqa. Chayta sacerdoteqa ruwanqa Jehová Diospa ñaupaqenpi, ajinamanta chay runa perdonta tarinanpaj.

30 ”Payqa jaywanqa jurkʼutasmanta ujninta chayri paloma irpasmanta ujninta, qoyta atisqanman jina,+ 31 mayqentachus apamuyta atin jucharayku ofrendata jina chayta. Ujnintataj qʼolachina ofrendata jina jaywanqa+ chʼaki mikhuy ofrendatawan khuska. Chay tukuy imasta sacerdoteqa ruwanqa Jehová Diospa ñaupaqenpi, ajinamanta chay llimphuchakoj runa perdonta tarinanpaj.+

32 ”Chaymin leyqa kashan pisi kapuyniyojkunapaj, lepra onqoyninkumanta llimphuchasqa kanankupaj”.

33 Chantá Jehová Diosqa Moisesman, Aaronmanwan nerqa: 34 “Maypachachus Canaán jallpʼaman+ yaykunkichej, qankunaman qosqaykichej chay jallpʼaman,+ chaypitaj sichus noqa mayqenpa wasinpipis lepra onqoyta rikhurichisaj chayqa,+ 35 chay wasiyojqa renqa sacerdoteman willamoj: ‘Wasiypi uj onqoy rikhurin lepraman rijchʼakoj’, nispa. 36 Sacerdotetaj kamachenqa manaraj chay onqoyta qhawamoj rishajtin chay wasita chʼusajchanankuta. Ajinamanta sacerdoteqa ama ninanpaj chay wasipi kaj tukuy imas chʼichipaj qhawasqa kasqanta. Chaymantaraj sacerdoteqa qhawaj yaykonqa. 37 Sichus sacerdote chay onqoyta qhawaspa rikunman perqapi rikhurisqanta qʼomer qʼelluyasqa tʼoqos chayri pukayasqa tʼoqos, chaytaj perqata tʼoqoyachisqanta chayqa, 38 sacerdoteqa chay wasi punkuman llojsimuspa punkuta wisqʼaykonqa. Kamachenqataj qanchis diasta ajina wisqʼasqa kananta.+

39 ”Chay qanchis diasmanta sacerdoteqa ujtawan chay wasita qhawamullanqataj. Sichus chay onqoy, wasi perqaspi astawan jatunyan chayqa, 40 sacerdoteqa kamachenqa chay onqoywan kaj rumista orqhospa llajtamanta jawaman wijchʼumunankuta, chʼichipaj qhawasqa lugarman. 41 Chantá chay wasi ukhuta tukuyninta rasphachenqa. Chay rasphasqankumanta jallpʼatataj llajtamanta jawaman jichʼamonqanku, chʼichipaj qhawasqa lugarman. 42 Chay rumista orqhosqankumantaj waj rumista churanqanku, chay wasi perqastataj waj tʼuruwan llutʼaykuchenqa.

43 ”Sichus chay onqoy ujtawan rikhurillantaj rumista orqhosqankumantaña, perqasta rasphasqankumantaña, tʼuruwanpis llutʼaykusqankumantaña chayqa, 44 sacerdoteqa yaykuspa ujtawan chay wasita qhawanqa. Sichus chay onqoy astawan jatunyan chayqa, millay leprapuni+ rikhurin chay wasipi. Chay waseqa chʼichipaj qhawasqa kanqa. 45 Sacerdoteqa chay wasita thuñichenqa. Chantá rumisninta, maderasninta, tukuy jallpʼatawan llajtamanta jawaman apachenqa, chʼichipaj qhawasqa lugarman.+ 46 Sichus pipis chay wasiman yaykunman wisqʼasqa kasharqa chay pʼunchaykunapi chayqa,+ chay runaqa chʼichipaj qhawasqa kanqa chʼisiyaykunankama.+ 47 Pillapis chay wasipi puñojqa ropasninta tʼajsakunan tiyan, pillapis chay wasipi mikhojqa ropasninta tʼajsakunallantaj tiyan.

48 ”Sichus sacerdote ujtawan qhawamuspa rikun chay onqoy mana astawan jatunyasqanta, chay wasi ujtawan llutʼasqa kasqanmantaña chayqa, sacerdoteqa nenqa chay wasi llimphupaj qhawasqa kasqanta, chay onqoy chinkapusqanrayku. 49 Chay wasi llimphuchasqa kananpaj sacerdoteqa oqharenqa iskay pʼisqosta, cedro kʼaspita, puka qʼaytuta, hisopo qhoratawan.+ 50 Ujnin kaj pʼisqotaqa wañuchenqa juturimanta orqhosqa yakuyoj tʼuru manka patapi. 51 Chaymantataj oqharenqa cedro kʼaspita, puka qʼaytuta, hisopo qhorata, kausashaj pʼisqotawan. Chaykunatataj joqʼochanqa wañusqa pʼisqoj yawarninwan, juturimanta orqhosqa yakuwan ima. Chaywantaj qanchis kutita chʼajchonqa wasi ladoman.+ 52 Ajinamanta chay wasita llimphuchanqa wañusqa pʼisqoj yawarninwan, juturimanta orqhosqa yakuwan, kausashaj pʼisqowan, cedro kʼaspiwan, hisopo qhorawan, puka qʼaytuwan ima. 53 Chantá chay kausashaj pʼisqota llajtamanta jawapi kachariponqa. Ajinata chay wasita llimphuchanqa, chay wasitaj llimphupaj qhawasqa kanqa.

54 ”Chaymin leyqa kashan lepra onqoy rikhurejtin umapi chayri barbapi,+ 55 ropapi+ chayri wasipi,+ 56 chantá cuerpopi ima punkiy rikhurejtin, qarachaykukojtin chayri chʼejchiyajtin.+ 57 Ajinamanta yachanapaj chʼichipajchus llimphupajchus qhawasqa kasqanta.+ Chaymin leyqa kashan lepra onqoymanta”.+

15 Jehová Diosqa Moisesman, Aaronmanwan nillarqataj: 2 “Israelitasman niychej: ‘Sichus uj qharejta jispʼananmanta qʼeya surumunman chayqa, chʼichipaj qhawasqa kanqa.+ 3 Sichus chay qʼeya surumullanqapuni chayri chay qʼeyarayku mana jispʼayta atenqachu chayqa, chay runaqa chʼichipaj qhawasqallapuni kanqa.

4 ”’Chay qʼeya onqoyniyoj runa maypichus puñun chay camapis chʼichipaj qhawasqallataj kanqa. Chay runa imapichus tiyaykun chaypis chʼichipaj qhawasqallataj kanqa. 5 Pichus chay runaj camanta llojchejqa, ropasninta tʼajsakunan tiyan, yakuwantaj bañakunan tiyan. Chʼisiyaykunankamataj chʼichipaj qhawasqa kanqa.+ 6 Chay qʼeya onqoyniyoj runa imapichus tiyasqanpi pipis tiyaykojqa, ropasninta tʼajsakunan tiyan, yakuwantaj bañakunan tiyan. Chʼisiyaykunankamataj chʼichipaj qhawasqa kanqa. 7 Pichus chay qʼeya onqoyniyoj runaj cuerponta llankhajqa ropasninta tʼajsakonqa, yakuwantaj bañakonqa. Chʼisiyaykunankamataj chʼichipaj qhawasqa kanqa. 8 Sichus chay qʼeya onqoyniyoj runa uj llimphu runaman thoqaykunman chayqa, chay thoqaykuchikoj runaqa ropasninta tʼajsakuchun, yakuwantaj bañakuchun. Chʼisiyaykunankamataj chʼichipaj qhawasqa kanqa. 9 Sichus ima monturallamanpis* chay qʼeya onqoyniyoj runa montaykunman chayqa, chay monturaqa chʼichipaj qhawasqa kanqa. 10 Pichus chay runaj tiyaykusqan imasta llankhajqa, chʼisiyaykunankama chʼichipaj qhawasqa kanqa. Chantá pichus chay imasta apajqa ropasninta tʼajsakonqa, yakuwantaj bañakonqa. Chʼisiyaykunankamataj chʼichipaj qhawasqa kanqa. 11 Sichus chay qʼeya onqoyniyoj+ runa mana makisninta yakuwan mayllakuspalla pitapis llojchirinman chayqa, pitachus llojchirin chay runaqa ropasninta tʼajsakunan tiyan, yakuwantaj bañakunan tiyan. Chʼisiyaykunankamataj chʼichipaj qhawasqa kanqa. 12 Sichus chay qʼeya onqoyniyoj runa tʼurumanta ruwasqa imasta llankhanman chayqa, chay imasqa pʼakisqa kanqanku. Kʼullumanta kajtintaj yakuwan mayllasqa kanqa.+

13 ”’Sichus chay runaj jispʼananmanta manaña qʼeya surumunchu, manaqa sanoyapunña chayqa, chay runaqa qanchis diasta yupanqa llimphuchasqa kananpaj. Chantataj ropasninta tʼajsakonqa, purej yakuwantaj bañakonqa. Ajinamanta chay runaqa llimphupaj qhawasqa kanqa.+ 14 Pusaj kaj pʼunchaypitaj iskay jurkʼutasta chayri iskay paloma irpasta+ apariykukuspa, Jehová Diospa ñaupaqenman renqa, tinkukuna toldo punkuman. Chaypitaj sacerdoteman chaykunata qonqa. 15 Sacerdotetaj chaykunata Diosman jaywanqa, ujnintaqa jucharayku ofrendapaj, ujnintataj qʼolachina* ofrendapaj. Ajinata sacerdoteqa chay qʼeya suruyniyoj runata Jehová Diospa ñaupaqenpi llimphuchanqa.

16 ”’Sichus uj qharejta mujun llojsimunman chayqa, yakuwan cuerponta bañakuchun. Chʼisiyaykunankamataj chʼichipaj qhawasqa kanqa.+ 17 Sichus chay runaj mujun ima ropamanpis chayri ima qaramanpis chayanman chayqa, chay imastaqa yakuwan tʼajsanan tiyan. Chay imastaj chʼichipaj qhawasqa kanqanku chʼisiyaykunankama.

18 ”’Sichus uj qharejta mujun llojsinman warminwan puñuykojtin chayqa, iskayninku yakuwan bañakonqanku.+ Chʼisiyaykunankamataj chʼichipaj qhawasqas kanqanku.

19 ”’Sichus uj warmi killa yawarninwan kashanman chayqa, qanchis pʼunchayta chʼichipaj qhawasqa kanqa.+ Pichus chay warmita llojchejtaj chʼichipaj qhawasqallataj kanqa chʼisiyaykunankama.+ 20 Chay warmi killa yawarninwan kashaspa imaspichus puñun chay imasqa, chʼichipaj qhawasqa kanqa. Chantá imaspichus chay warmi tiyaykun chaykunapis chʼichipaj qhawasqallataj kanqa.+ 21 Sichus pillapis chay warmej camanta llankhanman chayqa, ropasninta tʼajsakunan tiyan, yakuwantaj bañakunan tiyan. Chʼisiyaykunankamataj chʼichipaj qhawasqa kanqa. 22 Pichus chay warmej tiyaykusqan imasta llankhajqa, ropasninta tʼajsakonqa, yakuwantaj bañakonqa. Chʼisiyaykunankamataj chʼichipaj qhawasqa kanqa. 23 Sichus chay warmi camapi chayri waj imaspi tiyaykorqa chayqa, chay imasta llankhajqa chʼichipaj qhawasqa kanqa chʼisiyaykunankama.+ 24 Sichus uj qhari warminwan puñuykushajtin warminpa killa yawarnin payman chayanman chayqa,+ chay qhareqa chʼichipaj qhawasqa kanqa qanchis diasta. Maypichus chay qhari puñonqa chay camapis chʼichipaj qhawasqallataj kanqa.

25 ”’Sichus uj warmejta yawarnin unayta jamunman+ manaraj killa yawarnin kashajtin+ chayri killa yawarnin aswan unaytaraj kanman chayqa, chay warmeqa chʼichipaj qhawasqa kanqa chay yawarnin sayanankama, imaynatachus killa yawarninpi chʼichipaj qhawasqa karqa ajinata. 26 Maypichus chay warmi yawar apayninwan kashaspa puñun chay camaqa chʼichipaj qhawasqa kanqa, imaynatachus killa yawarninpi chʼichipaj qhawasqa karqa ajinata.+ Imapichus chay warmi tiyaykun chaypis chʼichipaj qhawasqallataj kanqa, imaynatachus killa yawarninpi chʼichipaj qhawasqa ajinata. 27 Pichus chay imasta llankhajqa chʼichipaj qhawasqa kanqa. Chay llankhajqa ropasninta tʼajsakunan tiyan, yakuwantaj bañakunan tiyan. Chʼisiyaykunankamataj chʼichipaj qhawasqa kanqa.+

28 ”’Chay warmeqa qanchis diasta yupanqa maykʼajchus yawarnin sayanqa chaymantapacha. Chaymantaraj llimphupaj qhawasqa kanqa.+ 29 Pusaj kaj pʼunchaypitaj iskay jurkʼutasta chayri iskay paloma irpasta+ sacerdoteman apamonqa, tinkukuna toldo punkuman.+ 30 Sacerdotetaj chaykunata Diosman jaywanqa, ujnintaqa jucharayku ofrendapaj, ujnintataj qʼolachina ofrendapaj. Ajinata sacerdoteqa chay warmita llimphuchanqa Jehová Diospa ñaupaqenpi.+

31 ”’Qankunaqa israelitasta yanapankichej paykuna llimphupaj qhawasqa kanankupaj. Ajinamanta ama wañunankupaj yupaychana toldoyta chʼichichasqankurayku, mayqenchus paykuna ukhupi kashan chayta.+

32 ”’Chaymin leyqa kashan uj qharej jispʼananmanta qʼeya surumojtin chayri mujun llojsimusqanrayku chʼichipaj qhawasqa kajtin,+ 33 jinallataj uj warmej killa yawarnin jamojtin,+ chayri uj warmi yawar apaywan onqosqa kajtin, chayri uj qhari warmin chʼichipaj qhawasqa kashajtin paywan puñuykojtin’”.+

16 Jehová Diosqa Moisesman parlarqa, Aaronpa iskay wawasnin wañusqankumantaña. Paykunaqa wañorqanku Jehová Diosman qayllaykuspa mana ruwanankuta ruwasqankurayku.+ 2 Jehová Diosqa Moisesman nerqa: “Hermanoyki Aaronman niy, ama sapa munarispa yaykunanta Aswan Santo Lugarman,+ mayqenchus cortinaj wasanpi kashan chayman,+ nillataj arca nisqa cajaj tapanpa qayllanmanpis,+ ama paypis wañunanpaj.+ Noqaqa chay arcaj tapan patapi rikhurimusaj phuyupi.+

3 ”Aaronqa Aswan Santo Lugarman yaykunanpaj apamuchun uj torillota jucharayku ofrendapaj,+ uj carnerotawan* qʼolachina* ofrendapaj.+ 4 Aaronqa yakuwan bañakuytawan+ churakuchun sacerdote ropasta:+ linomanta ruwasqa camisonta,+ lino chumpita,+ ukhunmantaj lino cortota.*+ Chantá umanta maytʼuykukuchun linomanta ruwasqa uma maytʼunawan.+ Chaykunaqa llimphupaj qhawasqa ropas kanku.

5 ”Aaronqa israelitasmanta japʼenqa+ iskay chivitosta jucharayku ofrendapaj, uj carnerotataj qʼolachina ofrendapaj.

6 ”Chantá Aaronqa juchasninrayku ofrendapaj torota jaywanqa, pay perdonta tarinanpaj,+ jinallataj familianpis.*

7 ”Chantataj chay iskay chivitosta Jehová Diospa ñaupaqenman apamonqa, tinkukuna toldo punkuman. 8 Jinaspataj Aaronqa chay iskay chivitos patapi suerteta* choqanqa. Ujnenqa kanqa Jehová Diospaj, ujnintaj kanqa israelitaspa juchankuta apakapunanpaj.* 9 Mayqen chivitomanchus suerte chayanqa+ Jehová Diospaj kananpaj chay chivitotaqa, Aarón qayllaykuchimonqa jucharayku ofrendata jina jaywananpaj. 10 Mayqen chivitomanchus suerte chayanqa israelitaspa juchankuta apakapunanpaj* chay chivitotataj, kausashajta apamonqa Jehová Diospa ñaupaqenman, israelitas juchasninkumanta perdonta tarinankupaj. Chaymantataj chay chivitoqa chʼin jallpʼaman kacharisqa kanqa juchasta apakapunanpaj.*+

11 ”Aaronqa juchasninrayku ofrendapaj torota altarman qayllaykuchenqa, paypa juchasnin, familianpa* juchasninpis perdonasqa kananpaj. Chaymantaraj chay juchasninrayku ofrendapaj torota ñakʼanqa.*+

12 ”Chantaqa brasa apaykachanata+ oqharenqa, altarmanta nina brasasniyoj+ juntʼata Jehová Diospa ñaupaqenpi. Oqharillanqataj kutasqa sumaj qʼaparishaj inciensota+ iskay maki juntʼata. Chaykunatataj apaykonqa cortina wasaman.+ 13 Chantá chay nina brasasman chay inciensota jichʼaykonqa Jehová Diospa ñaupaqenpi.+ Chay inciensoj qʼoshñisqantaj trato ruwasqamanta arca+ nisqa cajaj tapanta+ pʼampaykonqa, ama Aarón wañunanpaj.

14 ”Chantá Aaronqa toroj uj chhika yawarninta japʼispa+ dedonwan chʼajchonqa chay arcaj tapanpa ñaupaqenman, inti llojsimuy ladoman. Qanchis kutita chay yawarta dedonwan chʼajchonqa arcaj tapanpa ñaupaqenman.+

15 ”Chaymantataj ñakʼanqa runaspa juchasninkurayku ofrendapaj chivitota.+ Yawarnintataj cortinaj wasanman+ apaykonqa. Chaypitaj chay yawarta chʼajchonqa+ arca nisqa cajaj tapanpa ñaupaqenman, imaynatachus toroj yawarninwan ruwarqa ajinata.

16 ”Ajinamanta Aaronqa Aswan Santo Lugarta llimphuchanqa israelitas chʼichipaj qhawasqa kasqankumanta, mana kasukusqankumanta, juchasninkumantawan.+ Chayta ruwanqa tinkukuna toldopaj, mayqenchus kashan israelitas ukhupi, chʼichipaj qhawasqa kayninku chaupipi chaypaj.

17 ”Aarón Aswan Santo Lugarman juchasmanta perdonta tarinanpaj yaykusqanmantapacha llojsimunankamaqa, ni pipis tinkukuna toldo ukhupi kananchu tiyan. Payqa chay ukhupi yawarta chʼajchonqa juchasnin perdonasqa kananpaj, jinallataj familianpata,*+ tukuy israelitaspatawan.+

18 ”Chaymantataj Jehová Diospa ñaupaqenpi kashan chay altarman+ llojsimonqa, chay altartañataj llimphuchaj. Chantá toroj uj chhika yawarninwan, chivitoj uj chhika yawarninwanpis altarpa tukuynin wajrasninta jawenqa. 19 Dedonwanpis qanchis kutita chay yawarta altarman chʼajchonqa. Ajinamanta altarta Diospaj tʼaqanqa israelitaspa chʼichi kayninkumanta llimphuchaspa.

20 ”Aswan Santo Lugarta, tinkukuna toldota, altartawan+ llimphuchayta tukuspa,+ kausashaj chivitota qayllaykuchimonqa.+ 21 Aaronqa chay kausashaj chivitoj umanman iskaynin makisninta churaspa, Diosman rimarenqa israelitaspa tukuy pantasqasninkuta, mana kasukusqankuta, tukuy juchasninkutawan. Ajinamanta chay juchasta chay chivitoj uman pataman churanqa.+ Chaymantataj chay chivitota apachenqa chaypaj kamachisqaña kashan chay runawan,* chʼin jallpʼaman kacharpamunanpaj. 22 Chay chivitoqa israelitaspa tukuy juchasninkuta chʼin jallpʼaman+ apanqa.+ Chay runataj chay chivitota chʼin jallpʼaman kacharparimonqa.+

23 ”Chantá Aaronqa tinkukuna toldoman yaykuspa, linomanta ruwasqa ropasninta orqhokonqa, mayqenkunatachus churakorqa Aswan Santo Lugarman yaykunanpaj chayta, chay kikinpitaj saqeponqa. 24 Aaronqa yakuwan bañakonqa+ uj santo lugarpi. Bañakuytawantaj waj ropasninta churaykukuspa+ qʼolachina ofrendanta+ jaywanqa, jinallataj israelitaspa qʼolachina ofrendankutapis.+ Ajinamanta pay perdonta tarinanpaj, israelitaspis perdonta tarinankupaj.+ 25 Chantá jucharayku ofrendaj wirasninta altarpi qʼolachenqa.

26 ”Pichus juchasta apakapunanpaj*+ chivitota kacharparimojqa ropasninta tʼajsakonqa, yakuwantaj bañakonqa. Chaymantaraj campamentoman* yaykuponqa.

27 ”Jucharayku ofrendapaj torowan, jucharayku ofrendapaj chivitowanqa, mayqenkunajtachus yawarninku Aswan Santo Lugarman apaykusqa karqa juchasmanta perdonta tarinapaj chaykunaqa, campamentomanta jawaman orqhosqa kanqanku. Chaypitaj qarasnin, aychasnin, akasnin ima ninawan ruphachisqa kanqa.+ 28 Pichus chaykunata ruphachimojqa ropasninta tʼajsakonqa, yakuwantaj bañakonqa. Chaymantaraj campamentoman yaykuponqa.

29 ”Kaymin qankunapaj uj ley kanqa unay wataspaj: Qanchis kaj killaj chunka kaj pʼunchayninpi, juchasniykichejrayku llakisqa kasqaykichejta rikuchinkichej,* amataj ima trabajotapis ruwankichejchu,+ ni kikin llajtayoj israelitaspis, nitaj qankunawan tiyakoj forasterospis. 30 Chay pʼunchaypeqa Dioswan allinyakunkichej,+ llimphupaj qhawasqa kanaykichejpaj. Ajinamanta qankunaqa tukuy juchasniykichejmanta llimphuchasqa kankichej Jehová Diospa ñaupaqenpi.+ 31 Chayqa uj samarikuna pʼunchay kanqa qankunapaj, may jatun pʼunchay. Chay pʼunchayqa juchasniykichejrayku llakisqa kasqaykichejta rikuchinkichej.+ Chayqa uj ley kanqa unaypaj.

32 ”Sacerdote kananpaj aceitewan jichʼasqa kajqa,+ pichus tatanpa cuentanmanta+ sacerdote kananpaj churasqa*+ kanqa chayqa, ofrendasta jaywanqa juchas perdonasqa kananpaj. Chaytaqa ruwanqa linomanta ruwasqa ropasta churakuspa,+ nisunman sacerdote ropasta.+ 33 Jinamanta payqa llimphuchanqa Aswan Santo Lugarta,+ tinkukuna toldota,+ altarta+ ima. Chay ofrendastaqa jaywallanqataj sacerdotespa juchasninku perdonasqa kananpaj, jinallataj tukuy israelitaspa juchasninkupis perdonasqa kananpaj.+ 34 Chayqa qankunapaj uj ley kanqa unay wataspaj.+ Chaytaqa watapi uj kutillata ruwakonqa, israelitas tukuy juchasninkumanta perdonta tarinankupaj”.+

Aarontaj imaynatachus Jehová Diosqa Moisesman kamacherqa chay kikinta ruwarqa.

17 Jehová Diosqa Moisesta nillarqataj: 2 “Aaronta, wawasninta, israelitastawan niy: ‘Jehová Diosqa kayta kamachin:

3 ”’“Sichus mayqen israelitallapis uj torota, uj maltón carnerota,* chayri uj cabrata campamento* ukhupi ñakʼanman,* chayri campamentomanta jawapi ñakʼanman chayqa, 4 chay runaqa juchayoj rikhurenqa. Chay uywataqa tinkukuna toldo punkuman apamunan karqa Jehová Diosman jaywananpaj, Jehová Diosta yupaychana toldoj ñaupaqenpi. Waj ladopi chay uywata ñakʼasqanrayku chay runaqa wañuchisqa kanqa. 5 Chay kamacheyqa kashan, israelitas amaña uywasninkuta campopi ñakʼanankupaj, manachayqa Jehová Diosman apamunankupaj tinkukuna toldo punkuman, sacerdoteman. Chaykunataqa khuska mikhurikuy ofrendasta jina Jehová Diosman jaywanqanku.+ 6 Sacerdotetaj chay uywaspa yawarninwan chʼajchonqa Jehová Diospa altarninta, mayqenchus kashan tinkukuna toldo punkupi chayta. Wirasnintataj qʼolachenqa* ima munayta qʼaparishajta Jehová Diospa sonqonta tiyaykuchinanpaj.+ 7 Chayrayku amaña qarakusta ruwachunkuchu* cabraman rijchʼakoj demoniosman,*+ mayqenkunatachus yupaychaspa qhenchachakushanku+ chaykunaman. Chayqa uj ley kanqa qankunapaj, mirayniykichejpajwan unay wataspaj”, nispa’.

8 ”Paykunaman nillaytaj: ‘Sichus mayqen israelitallapis, chayri qankunawan tiyakoj mayqen forasterollapis uj qʼolachina ofrendata, chayri ima ofrendallatapis waj ladopi jaywanman, 9 manataj apamunmanchu tinkukuna toldo punkuman Jehová Diosman jaywananpaj chayqa, chay runaqa wañuchisqa kanqa.+

10 ”’Sichus mayqen israelitallapis chayri qankunawan tiyakoj mayqen forasterollapis ima yawarllatapis mikhonqa chayqa,+ noqaqa chay yawarta mikhojpa contranpi kasaj, paytataj wañuchisaj. 11 Tukuy kausajpata kausaynenqa yawarninpi kashan.+ Noqaqa yawarta qoykichej altarpi jaywanaykichejpaj+ juchasniykichejmanta perdonta tarinaykichejpaj. Yawarpi kausay kasqanrayku, chaywan juchasniykichejmanta perdonta tariyta atinkichej.+ 12 Chayrayku israelitasman nerqani: “Ama mayqenniykichejpis yawarta mikhunkichejchu, qankunawan tiyakoj forasterospis+ nillataj yawarta mikhonqankuchu”,+ nispa.

13 ”’Sichus mayqen israelitallapis chayri qankunawan tiyakoj forasteropis, mikhunapaj monte animalta chayri phawajkunatapis japʼin chayqa, yawarninta suruchispa jallpʼawan pʼampaykuchun.+ 14 Tukuy kausajpata kausaynenqa yawarninpi kashan. Chayrayku israelitasman nerqani: “Ama mayqenniykichejpis mikhunkichejchu ni mayqen kausajpata yawarninta, imaraykuchus tukuy ima kausajpata kausaynenqa yawarninpi kashan. Pichus yawarta mikhojqa wañuchisqa kanqa”,+ nispa. 15 Sichus mayqen israelitallapis chayri forasteropis, wañusqa animalta tarisqanta mikhun chayri uj phiña animalpa wañuchisqan aychata mikhun chayqa,+ chay runaqa ropasninta tʼajsakuchun, yakuwantaj bañakuchun. Chʼisiyaykunankamantaj chʼichipaj qhawasqa kanqa, chaymantaraj llimphupaj qhawasqa kanqa.+ 16 Sichus mana ropasninta tʼajsakonqachu, nitaj bañakonqachu chayqa, juchanmanta cuentata qonqa’”.+

18 Jehová Diosqa ujtawan Moisesman nillarqataj: 2 “Israelitasman niy: ‘Noqa kani Jehová Diosniykichej.+ 3 Ama Egiptopi tiyakojkuna jina purinkichejchu, maypichus qankuna tiyakorqankichej chay runas jinaqa. Maymanchus noqa pusashaykichej chay Canaán jallpʼapi tiyakojkunaj ruwasqankutapis amallataj ruwankichejchu.+ Ama paykunaj costumbresninkuta ruwankichejchu. 4 Juiciopi nisqasniyta juntʼankichej, kamachisqasniytapis kasukunkichej, chaykunaman jinataj kausakunkichej.+ Noqalla Jehová Diosniykichej kani. 5 Kamachisqasniyta, juiciopi nisqasniytapis kasukunkichej. Pichus chayta ruwajqa kasukusqanrayku kausanqa.+ Noqamin Jehová Diosqa kani.

6 ”’Qankunamanta ni pi qharipis qaylla familianwan puñuykuchunchu.+ Noqamin Jehová Diosqa kani. 7 Ama tataykiwan puñuykunkichu, nillataj mamaykiwanpis puñuykunkichu. Payqa mamaykimin, amapuni paywanqa puñuykunkichu.

8 ”’Ama tataykej warminwanqa puñuykunkichu.+ Chayta ruwaspaqa tataykita pʼenqaypi rikhurichinki.

9 ”’Ama hermanaykiwan puñuykunkichu, tataykej warmi wawan kajtinpis chayri mamaykej warmi wawan kajtinpis, wasiykipipis nacekuchun chayri waj ladopipis nacekuchun.+

10 ”’Ama warmi allchhiykiwan puñuykunkichu, qhari wawaykej wawanpis kachun chayri warmi wawaykej wawanpis kachun. Chayqa qanllapajtaj pʼenqay kanqa.

11 ”’Ama puñuykunkichu tataykej warminpa warmi wawanwanqa, payqa tataykej wawan, qanpataqa hermanayki.

12 ”’Ama puñuykunkichu tataykej hermananwanqa, imaraykuchus payqa tataykej qaylla familian.+

13 ”’Ama puñuykunkichu mamaykej hermananwanqa, imaraykuchus payqa mamaykej qaylla familian.

14 ”’Ama tataykej hermanonta pʼenqaypi rikhurichinkichu warminwan puñuykuspaqa, imaraykuchus payqa tiayki.+

15 ”’Ama ñojchʼaykiwan* puñuykunkichu,+ payqa qhari wawaykej warmin. Chayrayku amapuni paywan puñuykunkichu.

16 ”’Ama puñuykunkichu hermanoykej warminwanqa,+ imaraykuchus hermanoykita pʼenqaypi rikhurichinki.

17 ”’Uj warmiwan casaraspaqa, ama warmi wawanwan puñuykunkichu.+ Amallataj puñuykunkichu warmiykej warmi allchhinwan, qhari wawanpa wawanpis kachun chayri warmi wawanpa wawanpis kachun. Paykunaqa qaylla familias kanku, chayrayku chayqa may millay ruwaypuni.*

18 ”’Warmiyki kausakushajtenqa ama hermananwan casarallankitajchu paywan puñuykunaykipajqa, ama paykunapura chejninakunankupaj.+

19 ”’Ama warmiykiwan puñuykunkichu killa yawarninrayku chʼichipaj qhawasqa kashajtin.+

20 ”’Ama puñuykunkichu runa masiykej* warminwanqa, ama chʼichipaj qhawasqa kanaykipaj.+

21 ”’Ama mirayniykimanta mayqentapis Mólek diosman jaywankichu.*+ Ama chayta ruwaspa Diosniykej sutinta pisipaj qhawankichu.+ Noqamin Jehová Diosqa kani.

22 ”’Ama qharipuraqa puñuykunkichejchu warmiwanpis puñuykushawajchej jinaqa.+ Chayqa may millay jucha.

23 ”’Uj qhareqa ama ima animalwanpis khuchichakuchunchu, ama chʼichipaj qhawasqa kananpaj. Nillataj uj warmipis uj animalpa ñaupaqenman sayaykuchunchu chay animalwan khuchichakunanpaj.+ Chayqa may millaypuni.

24 ”’Ama chay imasta ruwaspa chʼichichakuychejchu. Ñaupaqeykichejmanta qharqosaj chay nacionesqa chay imasta ruwaspa chʼichichakorqanku.+ 25 Chayrayku chay jallpʼaqa chʼichipaj qhawasqa kashan. Noqataj chay juchasninkurayku paykunata castigasaj. Chaypi tiyakojkunaqa kikin jallpʼankumanta qharqosqa kanqanku.+ 26 Qankunataj kamachisqasniyta, juiciopi nisqasniytapis kasukunaykichej tiyan.+ Ama chay millay imastaqa ruwankichejchu, ni kikin llajtayoj israelitaspis, ni qankunawan tiyakoj forasterospis.+ 27 Chay tukuy millay imastaqa ruwarqanku qankunamanta ñaupajta chay jallpʼapi tiyakojkuna.+ Chayrayku chay jallpʼaqa chʼichichasqa kashan. 28 Sichus chay jallpʼata mana chʼichichankichejchu chayqa, chay jallpʼamanta mana qharqosqachu kankichej, imaynatachus qankunamanta ñaupajta tiyakoj naciones qharqosqa kanqanku ajinataqa. 29 Sichus pipis chay millay imasmanta mayqellantapis ruwanman chayqa, tukuy chayta ruwajkunaqa wañuchisqa kanqanku. 30 Chayrayku qankunaqa kamachisqayta kasukunaykichej tiyan ama chay millay costumbresta ruwaspa, mayqenkunatachus qankunamanta ñaupajta ruwarqanku chaykunata.+ Ajinamanta ama chay imaswan chʼichichakunaykichejpaj. Noqamin Jehová Diosniykichejqa kani’”.

19 Jehová Diosqa ujtawan Moisesta nerqa: 2 “Tukuy israelitasman niy: ‘Noqa Jehová Diosniykichejqa llimphu kani,+ chayrayku qankunapis llimphus kanaykichej tiyan.

3 ”’Sapa ujpis jatunpaj qhawaychej* mamaykichejta, tataykichejtawan.+ Samarikuna pʼunchaykunasniyta, samarikuna watasniytapis ruwaychejpuni.+ Noqamin Jehová Diosniykichej kani. 4 Ama qhasi manakaj dioskunaman chimpaychejchu,+ amallataj ruwakuychejchu metal unuyasqamanta diosesta.+ Noqamin Jehová Diosniykichejqa kani.

5 ”’Khuska mikhurikuy ofrendata Jehová Diosman jaywaspaqa,+ Diospa ñaupaqenpi allinpaj qhawasqa kanaykichejpaj jina jaywankichej.+ 6 Chayqa chay diapacha mikhusqa kanan tiyan, manachayrí qʼayantinpis. Minchhantinpaj puchojtaj ninawan ruphachisqa kanqa.+ 7 Sichus chay puchoj aycha, minchhantin mikhusqa kanqa chayqa, chay ofrenda aychaqa chʼichipaj qhawasqa kanqa. Diosqa mana chayta japʼikonqachu. 8 Pichus chayta mikhojqa juchanmanta cuentata qonqa, Jehová Diospaj tʼaqasqa kajta chʼichichasqanrayku. Chayrayku chay runaqa wañuchisqa kanqa.

9 ”’Cosecha chayamojtenqa ama chajraykichejpa kantusninmanta tukuyninta ruthunkichejchu. Nillataj qhepakojtapis chajmakapunkichejchu.*+ 10 Ama uva huertaykichejmanta puchusqanta pallakapunkichejchu, nitaj pampaman tʼakakoj uvastapis oqharikapunkichejchu. Chaykunataqa saqellankichej wajcha runaswan*+ forasteroswan pallakunankupaj. Noqamin Jehová Diosniykichejqa kani.

11 ”’Ama suwakunkichejchu.+ Ama pitapis engañankichejchu.+ Ama qankunapura wasanchanakunkichejchu. 12 Ama sutiypi juraspa llullakunkichejchu,+ chayta ruwaspaqa Diosniykichejpa sutinta pisipaj qhawachiwajchej. Noqamin Jehová Diosqa kani. 13 Ama runa masiykita chʼaukiyankichu,*+ nitaj suwakunkichu.+ Ama peonniykej pagonta qʼayantinkama japʼikapunkichu.+

14 ”’Ama uj joqʼara* runataqa maldecinkichu. Ama uj ciego runaj ñaupaqenman imatapis urmananpaj churankichu,+ manachayrí Diosniykita manchachikunki.+ Noqamin Jehová Diosqa kani.

15 ”’Uj juiciopeqa ama mana cheqan kajta ruwankichu. Ama wajchaman kutikunkichu, nitaj qhapajpajpis uyata orqhonkichu.+ Runa masiykipajqa cheqan justiciata ruwapunki.

16 ”’Ama pimantapis llullasta parlaspa llajtaykipi purinkichu.+ Amallataj runa masiykita llullakuspa juchachankichu payta wañuy pataman churaspa.*+ Noqamin Jehová Diosqa kani.

17 ”’Ama hermanoykita sonqoykipi chejnikunkichu.+ Runa masiykita kʼamina kajtenqa kʼamiy,+ juchallikojtin ama qanpis juchayoj kanaykipaj.

18 ”’Ama runa masiykimanta vengakunkichu,+ nitaj chejnikunkichu. Runa masiykitaqa munakunki qan kikiykita jina.+ Noqamin Jehová Diosqa kani.

19 ”’Juntʼallaychejtaj kay kamachiykunasniytapis: Ama ima uywaykitapis waj laya* uywaykiwan cruzachinkichu.* Ama jallpʼaykipi tarpunkichu iskay laya mujusta chajruspa.+ Amallataj iskay rijchʼaj qʼaytusmanta awasqa ropata churakunkichu.+

20 ”’Ichá pi qharillapis uj sirvienta warmiwan puñuykunman, chay warmi waj qhariwan casarananpaj parlasqaña kashajtin. Chay warmitaj manaraj rantisqachu, nitaj kacharisqarajchu kanman chayqa, iskayninku castigasqas kanqanku. Chaywanpis mana wañuchisqachu kanqanku, imaraykuchus chay warmeqa manaraj kacharichisqachu karqa. 21 Chay qhareqa Jehová Diosman apamunan tiyan uj carnerota,* pantasqarayku ofrendata jina.+ Chaytaqa apamonqa tinkukuna toldo punkuman. 22 Sacerdotetaj chay carnerota Jehová Diosman jaywanqa, chay runa juchanmanta perdonta tarinanpaj. Chay juchantaj perdonasqa kanqa.

23 ”’May jallpʼamanchus pusashaykichej chayman yaykuspa frutata poqoj sachʼasta plantankichej chayqa, poqoynintaqa ama mikhunkichejchu kinsa watas juntʼata. Chay poqoynintaqa chʼichipaj qhawankichej, amataj qayllaykullankichejpischu. 24 Tawa watanmantaj tukuy poqoynin Diospaj tʼaqasqa kanqa. Qankunataj chayta kusiywan Jehová Diosman jaywankichej.+ 25 Phishqa watanmantaj chay sachʼaspa poqoyninta mikhuyta atinkichej, ajinamanta chay poqoytawan pallaspa cosechaykichejman yapankichej. Noqamin Jehová Diosniykichej kani.

26 ”’Ama ima aychatapis yawarnintinta mikhunkichejchu.+

”’Ama adivinos kaychejchu, amallataj layqaspis* kaychejchu.+

27 ”’Ama chujchaykichejtaqa patillasniykichej chaynejta rasurakuychejchu,* nitaj barbaykichejpa* kantusnintapis fierota kʼutukuychejchu.+

28 ”’Ama wañusqaraykoqa* cuerpoykichejta* imawanpis qʼallurakunkichejchu.+ Amallataj tatuajesta ruwakunkichejchu. Noqamin Jehová Diosqa kani.

29 ”’Ama warmi wawaykej honranta tʼakankichu khuchi warmiman* tukuchispa.+ Ajinamanta ama llajtayki chʼichichasqa kananpaj khuchi warmiswan, nitaj millay kausay llajtaykiman juntʼaykunanpaj.+

30 ”’Samarikuna pʼunchaykunasniyta,+ samarikuna watasniytapis ruwankichejpuni. Toldo wasiytaqa* respetowan* qhawankichej. Noqamin Jehová Diosqa kani.

31 ”’Ama aysirista tapukoj riychejchu,+ nitaj adivinostapis watukuychejchu,+ ama chaykunanejta chʼichipaj qhawasqa kanaykichejpaj. Noqamin Jehová Diosniykichejqa kani.

32 ”’Yuraj chujchayoj runaj ñaupaqenpi sayarikuy.+ Kuraj runataqa respetay,+ Diosniykitapis manchachikuy.+ Noqamin Jehová Diosqa kani.

33 ”’Jallpʼaykichejpi qankunawan tiyakoj forasterostaqa ama llakichinkichejchu.+ 34 Qankunawan tiyakoj forasterostaqa llajta masiykichejta jina qhawankichej,+ qankuna kikiykichejta jina munakunkichej, imaraykuchus qankunapis forasteros jinallataj Egiptopi tiyakorqankichej.+ Noqamin Jehová Diosniykichejqa kani.

35 ”’Maychus kajta ruwankichej imallatapis midishaspa chayri pesashaspa.+ 36 Balanzasniykichejqa cabal kanan tiyan, jinallataj pesasniykichejpis cabal kanan tiyan. Chʼaki mikhuy midinasniykichejpis cabal* kanan tiyan, jinallataj yaku* midinasniykichejpis cabal* kanan tiyan.+ Noqamin Jehová Diosniykichej kani, pichus Egiptomanta orqhomusorqachej chay. 37 Chayrayku qankunaqa kasukunaykichej tiyan tukuy kamachiykunasniyta, juiciopi tukuy nisqasniytapis, chaykunataqa juntʼankichejpuni.+ Noqamin Jehová Diosqa kani’”.

20 Jehová Diosqa Moisesman nillarqataj: 2 “Israelitasman kayta niy: ‘Sichus mayqen israelitallapis chayri qankunawan tiyakoj forasteropis mirayninmanta mayqentapis Mólek diosman jaywanqa* chayqa, wañuchisqapuni kanqa.+ Llajta masisnenqa rumiswan chʼanqaykuspa payta wañuchenqanku. 3 Noqaqa chay runaj contranpi kasaj, chay runatataj wañuchisaj. Payqa mirayninmanta kajta Mólek diosman jaywaspa, santo lugarniyta chʼichichan,+ llimphu sutiytapis pisipaj qhawan. 4 Sichus chay llajtayojkuna qhawakullanqanku chay runata Mólek diosman mirayninmanta mayqellantapis jaywajta, nitaj wañuchenqankuchu chayqa,+ 5 noqamin chay runaj contranpi kasaj, jinallataj familianpa contranpipis.+ Noqa chay runata wañuchisaj, pikunachus paywan khuska Mólek diosta yupaychaspa qhenchachakunku chaykunatapis.

6 ”’Sichus pipis rinman aysirista+ adivinosta tapukoj,+ chayta ruwaspataj waj dioseswan qhenchachakunman* chayqa, noqa chay runaj contranpi kasaj, wañuchisajtaj.+

7 ”’Qankunaqa llimphuchakunaykichej tiyan llimphus kanaykichejpaj,+ imaraykuchus noqamin Jehová Diosniykichej kani. 8 Kamachiykunasniyta kasukunaykichej tiyan, juntʼanaykichejtaj tiyan.+ Noqamin Jehová Diosqa kani, noqa qankunata noqapaj tʼaqashaykichej.+

9 ”’Sichus pipis tatanta chayri mamanta maldecin chayqa, wañuchisqa kanqa.+ Chay wañuyninmantaqa payllataj juchayoj kanqa* tatanta chayri mamanta maldecisqanrayku.

10 ”’Kaymin castigo kanqa uj qhari waj runaj warminwan qhenchachakojtin: Sichus pipis runa masinpa warminwan qhenchachakun chayqa, chay qhenchachakoj qhari, jinallataj chay qhenchachakoj warmipis wañuchisqas kanqanku.+ 11 Pichus tatanpa warminwan puñuykojqa tatanta pʼenqaypi rikhurichin.+ Chay qhareqa wañuchisqapuni kanqa, jinallataj chay warmipis. Chay wañuyninkumantaqa paykunallataj juchayoj kanqanku. 12 Sichus uj qhari ñojchʼanwan* puñuykunman chayqa, iskayninku wañuchisqas kanqanku. Chay ruwasqankoqa may millaypuni. Wañuyninkumantaqa paykunallataj juchayoj kanqanku.+

13 ”’Sichus qharipura puñuykunkuman uj warmiwan jina chayqa, iskayninku wañuchisqas kanqanku, imaraykuchus paykunaqa millay juchata ruwanku.+ Wañuyninkumantaqa paykunallataj juchayoj kanqanku.

14 ”’Sichus uj qhareqa uj warmiwan casaranman, chantá suegranwanpis puñuykullanmantaj chayqa, chayqa may millay ruwaypuni.*+ Chay qharitawan chay iskaynin warmistawanqa wañuchispa ninawan ruphaykuchinkichej,+ ama qankuna ukhupi chay millay ruway kanallanpajpuni.

15 ”’Sichus uj qhari ima animalwanpis khuchichakun chayqa, wañuchisqapuni kanqa. Chay animaltapis wañuchillankichejtaj.+ 16 Sichus uj warmi ima animalpa ñaupaqenmanpis sayaykunman chay animalwan khuchichakunanpaj chayqa,+ chay warmita wañuchinkichej, jinallataj chay animaltapis. Wañuyninkumantaqa paykunallataj juchayoj kanqanku.

17 ”’Sichus uj qhareqa hermananwan puñuykunman, tatanpa warmi wawan kajtinpis chayri mamanpa warmi wawan kajtinpis chayqa, chay ruwayqa manchay pʼenqaypuni.+ Paykunaqa wañuchisqa kanqanku israelitas rikushajtinku. Payqa hermananta pʼenqaypi rikhurichin. Chayrayku juchanmanta cuentata qonqa.

18 ”’Sichus uj qhari uj warmiwan puñuykunman killa yawarninpi kashajtin chayqa, paykunaqa chay yawarta pisipaj qhawasqankuta rikuchinku.+ Chayrayku paykunaqa wañuchisqas kanqanku.

19 ”’Ama puñuykunkichu mamaykej hermananwanqa, nillataj tataykej hermananwanpis, imaraykuchus pʼenqaypi rikhurichiwaj qaylla familiaykita.+ Chay juchata ruwajkunaqa, iskayniyku cuentata qonqanku. 20 Pichus tionpa warminwan puñuykojqa tionta pʼenqaypi rikhurichin.+ Paykunaqa juchankumanta cuentata qonqanku, mana wawasniyojtaj wañonqanku. 21 Sichus uj qhari hermanonpa warminwan casaranman chayqa, chay ruwasqanqa may millaypuni.+ Chay runaqa hermanonta pʼenqaypi rikhurichin. Chayrayku paykunaqa mana wawasniyoj wañonqanku.

22 ”’Qankunaqa tukuy kamachisqasniyta, juiciopi tukuy nisqasniytapis kasuychej,+ juntʼaychejtaj,+ ajinamanta mana qharqosqachu kankichej tiyakunaykichepaj pusashaykichej chay jallpʼasmanta.+ 23 Qankunaqa ama chay nacionespa costumbresninkuta ruwankichejchu, mayqenkunatachus ñaupaqeykichejmanta qharqosaj chaykunaj costumbresninkuta.+ Paykunaqa tukuy chay imasta ruwarqanku, chayrayku noqaqa paykunata millachikuni.+ 24 Qankunamantaj nerqaykichej: “Qankunaqa paykunaj jallpʼankuta japʼikapunkichej. Noqa chay jallpʼata qankunaman qosqaykichej herenciata jina, maypichus lechewan miskʼiwan jinantin tiyan chayta.+ Noqamin kani Jehová Diosniykichejqa, noqa tukuy llajtasmanta tʼaqaykichej”,+ nispa. 25 Qankunaqa sumajta reparanaykichej tiyan animalesmanta mayqenchus llimphupaj qhawasqa kasqanta, mayqenchus chʼichipaj qhawasqa kasqantapis, phawajkunamanta mayqenchus llimphupaj qhawasqa kasqanta, mayqenchus chʼichipaj qhawasqa kasqantapis.+ Ama chʼichichakuychejchu ni ima animalwanpis, ni phawajkunawanpis, nillataj pampapi qhatatakoj animaleswanpis, mayqenkunatachus noqa tʼaqani qankuna chʼichipaj qhawanaykichejpaj chaykunawan.+ 26 Qankunaqa ñaupaqeypi llimphus kanaykichej tiyan, imaraykuchus noqa Jehová Diosqa may llimphu kani.+ Noqamin qankunata tukuy llajtasmanta tʼaqashaykichej noqajta kanaykichejpaj.+

27 ”’Sichus pi qharipis, chayri pi warmipis aysiri kanman, chayri adivino* kanman chayqa, wañuchisqapuni kanqa.+ Llajta masisninkoqa paykunata rumiswan chʼanqaykonqanku wañuchinankukama. Chay wañuyninkumantataj paykunallataj juchayoj kanqanku’”.

21 Jehová Diosqa Moisesman nillarqataj: “Kayta niy Aaronpa wawasnin sacerdotesman: ‘Ama mayqen sacerdotepis chʼichichakuchunchu llajtanmanta mayqen runa wañusqamanpis* chimpaspa.*+ 2 Chaywanpis chʼichipaj qhawasqa kayta atin qaylla familian wañupojtin: maman, tatan, qhari wawan, warmi wawan chayri hermanon. 3 Jinallataj chʼichipaj qhawasqa kayta atin hermanan wañupojtin, sichus paywan tiyakorqa, nitaj pi qhariwanpis puñuykorqarajchu, nitaj casararqarajchu chayqa. 4 Chantapis amallataj chʼichichakuchunchu llajta masinpa warminpa ayanman* qayllaspa, ama chʼichipaj qhawasqa kananpaj. 5 Sacerdotesqa ama uj wañusqarayku umankuta pʼajlakuchunkuchu,+ nitaj barbankoj* kantusnintapis rasurakuchunkuchu, nillataj cuerponkutapis qʼallurakuchunkuchu.+ 6 Paykunaqa Diosninkoj ñaupaqenpi llimphus kachunku,+ amataj Diosninkoj sutintaqa pisipaj qhawachunkuchu,+ imaraykuchus paykunaqa Jehová Diospaj ninapi qʼolachina* ofrendasta jaywanku, Diosninkupaj nisqa tʼantata.* Chayrayku paykunaqa llimphus kananku tiyan.+ 7 Chantapis sacerdotesqa ama casarachunkuchu uj khuchi warmiwan,*+ nitaj qhariwanña puñuykoj warmiwanpis, nillataj divorciasqa warmiwanpis,+ imaraykuchus sacerdotesqa Diospaj tʼaqasqa kanku. 8 Sacerdotestaqa Diospaj tʼaqasqata jina qhawaychej,+ Diosniykichejpaj nisqa tʼantata jaywasqankurayku. Sacerdotesqa qankunapaj llimphupaj qhawasqa kananku tiyan, imaraykuchus noqa Jehová Diosqa llimphu kani,+ noqa qankunata tʼaqakuykichej.

9 ”’Sichus uj sacerdotej warmi wawan, khuchi warmi jina piwanpis puñuykun chayqa, tatanta pʼenqaypi rikhurichin, paypis pʼenqayllapitaj rikhurin. Paytaqa wañuchispa ninawan ruphaykuchinkichej.+

10 ”’Sacerdotes* ukhupi kuraj kaj sacerdote kananpaj churasqa kajqa,* pichus santo aceitewan* umanman jichʼasqa,+ sacerdote ropasta churakunanpajtaj churasqa kajqa,+ ama umanta chʼichita japʼichunchu, nitaj ropasnintapis llikʼirakuchunchu llakisqa kasqanta rikuchinanpaj.+ 11 Amataj qayllaykuchunchu ni mayqen runa wañusqaman,+ ni tatan wañupojtinpis, ni maman wañupojtinpis, ama chʼichipaj qhawasqa kananpaj. 12 Ama llojsichunchu Diosninpa toldo wasinmanta,* amallataj pisipaj qhawachunchu chay toldo wasinta,+ imaraykuchus paypa umanpi kashan Diosninpa santo aceiten,+ mayqenchus rikuchin sacerdote kasqanta chay. Noqamin Jehová Diosqa kani.

13 ”’Payqa casarakunan tiyan doncella warmillawan.+ 14 Mana casarayta atinchu uj viuda warmiwan, nitaj divorciasqa warmiwan, nitaj qhariwanña puñuykoj warmiwan, nillataj khuchi warmiwanpis, manachayqa casaranan tiyan llajtanmanta uj doncellawan. 15 Ajinamanta ama llajtan ukhupi mirayninta pʼenqaypi rikhurichinanpaj.+ Noqa Jehová Diosmin paytaqa tʼaqakushani’, nispa”.

16 Jehová Diosqa Moisesman nillarqataj: 17 “Aaronman niy: ‘Mirayniykimanta mayqen qharipis mana sanochu kajtenqa, mana jaykʼajpis qayllaykuyta atenqachu Diosninpaj nisqa tʼantata payman jaywajqa. 18 Mana qayllaykuyta atinchu kay jina qhari kajtenqa: ciego, cojo, uyan imanasqa,* uj lado jatun makiyoj chayri uj lado jatun chakiyoj, 19 chakin pʼakisqa chayri makin pʼakisqa, 20 moqo wasa, juchʼuy runita* chayri ñawin imanasqa, marayoj, kancha kancha onqoyniyoj* chayri runtusnin imanasqa.+ 21 Sacerdote Aaronpa mirayninmanta mana sanochu kajqa, mana altarman chimpayta atinchu Jehová Diospaj ninapi qʼolachina ofrendasta jaywaj. Mana sanochu kasqanrayku mana chimpayta atinchu Diosninpaj nisqa tʼantata jaywajqa. 22 Chaywanpis payqa mikhuyta atin Diosninpaj nisqa tʼantata, may llimphu kaj ofrendasmanta,+ jinallataj llimphu ofrendasmantapis.+ 23 Jinapis mana qayllaykuyta atinchu cortina chayman,+ nillataj altarmanpis+ mana sano runachu kasqanrayku. Payqa ama toldo wasiyta pisipaj qhawachunchu,+ imaraykuchus noqamin Jehová Diosqa kani, pichus paykunata* noqapaj tʼaqakuni chay’,+ nispa”.

24 Moisestaj tukuy chayta willarqa Aaronman, wawasninman, tukuy israelitasmanwan.

22 Jehová Diosqa ujtawan Moisesman nerqa: 2 “Aaronman wawasninmanwan niy israelitas apamuwanku chay llimphuchasqa imasta jatunpaj qhawanankuta.+ Ama sutiyta pisipaj qhawachunkuchu+ chay apamuwasqanku imasta chʼichichaspa. Noqamin Jehová Dios kani. 3 Paykunaman nillaytaj: ‘Kunanmanta qhepamanqa mirayniykichejmanta sichus mayqenpis chʼichipaj qhawasqa kashaspa llimphuchasqa imasta, mayqenkunatachus israelitas Jehová Diosman apamunku chay imasta tʼojpenqa chayqa, ñaupaqeymanta chinkachisqa kanqa.*+ Noqamin Jehová Diosqa kani. 4 Sichus Aaronpa mirayninmanta mayqen qharipis lepra onqoyniyoj+ kanman chayri jispʼananmanta qʼeya surumunman chayqa,+ llimphuchasqa imasta ama mikhuchunchu, llimphuchasqa kanankama.+ Runa wañusqata* llojchirisqanrayku chʼichipaj qhawasqa runata llankharej sacerdotepis+ amallataj chayta mikhuchunchu. Nillataj mikhuchunchu mujun llojsimojtin,+ 5 chayri juchʼuy animalesmanta* chʼichipaj qhawasqa kajkunata llankharejtin,+ chayri chʼichipaj qhawasqa runata llankharejtin.+ 6 Chay imasta llankhajqa chʼichipaj qhawasqa kanqa chʼisiyaykunankama. Payqa ama mikhuchunchu llimphuchasqa imasta, manaraj yakuwan bañakushaspaqa.+ 7 Inti yaykupojtintaj llimphupaj qhawasqa kanqa. Chaymantaraj llimphuchasqa imasta mikhonqa, imaraykuchus chayqa mikhunanpaj tʼaqasqa kashan.+ 8 Manallataj mikhunanchu tiyan wañusqataña tarisqan animalpa aychanta, nillataj uj phiña animalpa wañuchisqantapis, ama chaykunawan chʼichichakunanpaj.+ Noqamin Jehová Dios kani.

9 ”’Paykunaqa kamachisqayta kasukunanku tiyan, ama juchayoj rikhurinankupaj, nitaj wañunankupaj llimphuchasqa imasta chʼichichasqankurayku. Noqamin Jehová Diosqa kani, noqa paykunata tʼaqakushani.

10 ”’Llimphuchasqa imastaqa mana mikhunankuchu tiyan pikunachus mana sacerdote familiamantachu kanku* chaykuna.+ Sacerdotej wasinpi qhepakoj forasteropis chayri sacerdotej peonninpis manallataj mikhunanchu tiyan chay llimphuchasqa imastaqa. 11 Sichus sacerdoteqa uj runata qolqenwan rantikun chayqa, chay rantikusqan runaqa mikhuyta atillan chay llimphuchasqa imasta. Sacerdotej wasinpi nacekoj esclavospis paypa mikhunanta mikhuyta atillankutaj.+ 12 Sichus sacerdotej warmi wawan mana sacerdotewanchu casarakun chayqa,* mana mikhunanchu tiyan sacerdoteman qosqa llimphuchasqa imasta. 13 Sichus sacerdotej warmi wawan viuda qhepakunman chayri divorciakunman, nitaj wawasniyojchu kanman, tatanpa wasinmantaj kutipunman chayqa, tatanpa mikhunanta mikhuyta atillan,+ imaynatachus sipas kashaspa mikhoj ajinata. Mana sacerdote familiamantachu kajtajrí* chay mikhunataqa manapuni mikhunanchu tiyan.

14 ”’Sichus uj qhari llimphuchasqa imasta pantaspa mikhunman chayqa, sacerdoteman wajta kutichipunan tiyan chay mikhusqanmanta. Chaymantaj yapanan tiyan mashkhatachus mikhusqanmanta phishqaman tʼaqaspa ujnintawan.+ 15 Sacerdotesqa ama chʼichichachunkuchu israelitas Jehová Diosman apamunku chay llimphuchasqa imasta.+ 16 Ajinamanta ama israelitasman castigota chayachinankupaj llimphuchasqa imasta mikhojta saqesqankurayku. Noqamin Jehová Diosqa kani, noqa paykunata tʼaqakushani’”.

17 Chantá Jehová Diosqa Moisesman nillarqataj: 18 “Kayta niy Aaronman, wawasninman, tukuy israelitasman ima: ‘Sichus uj israelita chayri paykunawan tiyakoj forastero, uj qʼolachina* ofrendata Jehová Diosman jaywananpaj apamonqa chayqa,+ ruwasaj nisqanta juntʼananpajpis kachun chayri aparimusqan ofrendapis kachun,+ 19 apamuchun orqo uywata sano kajta,+ torotapis, maltón carnerotapis* chayri chivotapis. Ajinamanta allinpaj qhawasqa kananpaj. 20 Amapuni apamunkichejchu mana sano uywataqa,+ chayqa mana yanapasonqachejchu allin ñawiwan qhawasqa kanaykichejpajqa.

21 ”’Sichus uj runa khuska mikhurikuy ofrendata+ Jehová Diosman apamonqa ruwasaj nisqanta juntʼananpaj chayri aparimuyta munasqanraykulla apamonqa chayqa, sano uywata apamunan tiyan wakatapis, ovejatapis chayri cabratapis. Ajinamanta allinpaj qhawasqa kananpaj. Chay uywaqa sano kanan tiyan. 22 Jehová Diosmanqa amapuni apamunkichejchu kay jina uywastaqa: ciegota, tullun pʼakisqata, iman qʼallusqata, sirkʼiyojta, qarachasniyojta chayri kancha kancha onqoyniyojta.* Ama ajina uywastaqa altarpi Jehová Diosman jaywankichejchu. 23 Sichus uj torota chayri uj ovejata aparimuyta munasqaykichejrayku apamunkichej chayqa, mana imananchu jatun chakiyojpis kasqan juchʼuy chakiyojpis kasqan. Sichus ruwasaj nisqaykichejmanta ofrendapaj chay jina uywasllatataj qonkichej chayqa, mana allinpaj qhawasqachu kanqa. 24 Amallataj Jehová Diosmanqa apamunkichejchu runtusnin* imanasqata, pʼaltasqata chayri capasqata. Llajtaykichejpeqa amapuni chay jina uywasta jaywankichejchu. 25 Forasterospa makinkumantapis amallataj japʼinkichejchu chay jina uywasta Diosniykichejman jaywasqa kananpaj.* Chay uywasqa mana sanoschu kanku, nitaj jaywanapaj allinchu kanku. Chayrayku chay uywasqa mana allinpaj qhawasqachu kanqanku’, nispa”.

26 Jehová Diosqa ujtawan Moisesman nerqa: 27 “Uña toritopis, uña carneritopis chayri uña chivitopis nacekojtenqa mamanwan kanqa qanchis pʼunchayninkama.+ Pusaj pʼunchayninmantataj qoyta atinkichej ofrendata jina, Jehová Diospaj ninapi qʼolachina ofrendata jina. 28 Ama uj pʼunchayllapi ñakʼankichejchu* uj wakata chayri uj ovejata uñantawan khuskaqa.+

29 ”Sichus Jehová Diosman agradecekunaykichejpaj uj uywata ñakʼankichej chayqa,+ chayqa kanan tiyan allinpaj qhawasqa kanaykichejpaj jina. 30 Chantapis chay uywaj aychantaqa chay diapacha mikhunkichej. Amapuni qʼayantinpajqa puchuchinkichejchu.+ Noqamin Jehová Diosqa kani.

31 ”Qankunaqa kamachisqasniyta kasuychej, juntʼaychejtaj.+ Noqamin Jehová Diosqa kani. 32 Ama llimphu sutiytaqa pisipaj qhawankichejchu.+ Noqaqa israelitas ukhupi llimphupaj qhawasqa kanay tiyan.+ Noqamin Jehová Diosqa kani, noqa qankunata tʼaqakushaykichej.+ 33 Noqa Egiptomanta orqhomorqaykichej Diosniykichej kanaypaj.+ Noqamin Jehová Diosqa kani”.

23 Jehová Diosqa Moisesman nillarqataj: 2 “Israelitasman kay jinata niy: ‘Jehová Diospaj ruwankichej chay fiestaspeqa+ wajyanakuspa tantakunkichej+ payta yupaychanaykichejpaj. Chay fiestasniytaj kaykuna kanku:

3 ”’Sojta diasta trabajankichej, qanchis kaj diatajrí samarikuna pʼunchay kanqa,+ may jatun pʼunchay. Chay diaqa ama ima trabajotapis ruwankichejchu, Diosta yupaychanaykichejpaj tantakunkichej. Maypichá tiyakunkichej chaypi, chay samarikuna pʼunchayqa Jehová Diospaj tʼaqasqa kanqa.+

4 ”’Kaykuna kanku Jehová Diospaj tʼaqasqa fiestasnin. Chay fiestaspaj wajyanakunkichej ima fechaspichus ruwakunan tiyan chaypi. 5 Ñaupaj kaj killaj 14 pʼunchayninpi,+ ña chʼisiyaykushajtinña* Jehová Diospaj Pascua Fiestata+ ruwankichej.

6 ”’Chay killallapitaj 15 pʼunchayninpi, Jehová Diospaj ruwankichej Mana Levadurayoj Tʼanta Fiestata.+ Chaypeqa qanchis diasta mana levadurayoj tʼantata mikhunkichej.+ 7 Ñaupaj kaj diapeqa Diosta yupaychanaykichejpaj tantakunkichej,+ amataj ima sinchʼi trabajotapis ruwankichejchu. 8 Qanchis diasta apamunkichej Jehová Diospaj ninapi qʼolachina* ofrendata. Qanchis kaj diapitaj Diosta yupaychanaykichejpaj tantakullankichejtaj, amataj ima sinchʼi trabajotapis ruwankichejchu’”.

9 Jehová Diosqa Moisesman nillarqataj: 10 “Israelitasman kayta niy: ‘May jallpʼatachus noqa qosqaykichej chayman chayaspa ñaupaj kaj poqochisqaykichej cebadata ruthuspaqa,+ uj gavillata* sacerdoteman apankichej.+ 11 Sacerdotetaj chay gavillata Jehová Diospa ñaupaqenpi kayman jaqayman kuyuchenqa, qankuna allin ñawiwan qhawasqa kanaykichejpaj. Sacerdoteqa chayta ruwanqa samarikuna pʼunchaypa qʼayantin. 12 Ima diachus chay gavillata sacerdote kuyuchipusonqachej, chay diallataj apamunkichej uj watayoj maltón carnerota* mana iman imanasqata, Jehová Diospaj qʼolachina ofrenda kananpaj. 13 Chantá apamullankichejtaj aceitewan chajrusqa sumaj ñutʼu jakʼuta, iskay kilosta jina.* Chaytaj Jehová Diospaj ninapi qʼolachina ofrenda kanqa, ima munayta qʼaparispa sonqonta tiyaykuchinanpaj. Chantá apamullankichejtaj casi uj litro* vino ofrendata. 14 Ima pʼunchaychus poqochisqasniykichejmanta Diosniykichejman ofrendata apamunkichej chaykamaqa, amaraj mikhunkichejchu mosoj granomanta* ruwasqa tʼantata, grano jankʼata chayri llullu granota. Chayqa unay wataspaj uj ley kanqa, qankunapaj mirayniykichejpajwan, maypichá tiyakunkichej chaypi.

15 ”’Ima diachus cebada gavillata kuyuchisqa ofrendapaj apamunkichej,+ chay samarikuna pʼunchaypa qʼayantinmantapacha yupankichej qanchis semanasta.* 16 Chay qanchis semanaspa qʼayantinkamaqa ruwakun 50 días.+ Chaypachataj Jehová Diosman jaywankichej mosoj trigo ofrendata.+ 17 Wasiykichejmanta apamullankichejtaj iskay tʼantasta kuyuchisqa ofrenda kananpaj. Chay tʼantastataj ruwankichej iskay kilos jina sumaj ñutʼu jakʼumanta. Chay tʼantastaqa levadurayojta ruwankichej.+ Chaytaj Jehová Diospaj kanqa ñaupaj kaj poqoymanta ruwasqa ofrenda.+ 18 Chay tʼantastawan khuska apamullankichejtaj uj watayoj qanchis sano corderosta, uj torillota, iskay carnerostawan.+ Chaykunaqa Jehová Diospaj qʼolachina ofrenda kanqa, chʼaki mikhuy ofrendankuwan khuska, vino ofrendasninkuwan khuska ima. Chayqa ninapi qʼolachina ofrenda, ima munayta qʼaparispa Jehová Diospa sonqonta tiyaykuchinanpaj. 19 Chantá apamunkichej uj maltón chivitota jucharayku ofrendapaj,+ uj watayoj iskay corderostataj khuska mikhurikuy ofrendapaj.+ 20 Sacerdotetaj chay iskay corderosta kayman jaqayman kuyuchenqa, ñaupaj kaj poqoymanta ruwasqa tʼantastawan khuska, kuyuchisqa ofrendata jina Jehová Diospa ñaupaqenpi. Chaytaj Jehová Diospaj llimphupaj qhawasqa kanqa, sacerdotepajtaj kanqa.+ 21 Chay kikin pʼunchayllapitaj wajyanakuspa tantakunkichej Diosta yupaychanaykichejpaj,+ amataj ima sinchʼi trabajotapis ruwankichejchu. Chayqa unay wataspaj uj ley kanqa, qankunapaj mirayniykichejpajwan, maypichá tiyakunkichej chaypi.

22 ”’Maypachachus cosecha chayamonqa chaypachaqa, ama chajraykichejpa kantusninmanta tukuyninta ruthukapunkichejchu. Nillataj qhepakojtapis chajmakapunkichejchu.*+ Chaykunataqa saqenkichej wajcha runaspaj,*+ forasterospajwan,+ paykuna chajmakunankupaj. Noqamin Jehová Diosniykichejqa kani’”.

23 Jehová Diosqa Moisesman nillarqataj: 24 “Israelitasman niy: ‘Qanchis kaj killapi ñaupaj kaj pʼunchay kashajtin, samarikuna pʼunchayta ruwankichej. Chay pʼunchayqa yuyarinapaj pʼunchay kanqa. Cornetas waqajtinku+ Diosta yupaychanaykichejpaj tantakunkichej. 25 Chay pʼunchaypeqa Jehová Diospaj ninapi qʼolachina ofrendata apamunkichej, amataj ima sinchʼi trabajotapis ruwankichejchu’, nispa”.

26 Jehová Diosqa ujtawan Moisesman nerqa: 27 “Chay qanchis kaj killallapitaj, chunka kaj pʼunchayninpi Perdonta Tarina Pʼunchay kanqa.+ Chaypachaqa Diosta yupaychanaykichejpaj tantakunkichej, juchasniykichejmanta llakisqa kasqaykichejtataj rikuchinkichej.*+ Apamunkichejtaj Jehová Diospaj ninapi qʼolachina ofrendata. 28 Chay pʼunchayqa ama ima trabajotapis ruwankichejchu. Chay pʼunchayqa Jehová Diosniykichejmanta perdonta tarinaykichej pʼunchay.+ 29 Pichus chay diapi juchanrayku mana llakisqa kasqanta rikuchejqa, wañuchisqa kanqa.+ 30 Chay día ima trabajotapis ruwajtaqa wañuchisaj. 31 Chay diaqa amapuni ima trabajotapis ruwankichejchu. Chayqa unay wataspaj uj ley kanqa, qankunapaj mirayniykichejpajwan, maypichá tiyakunkichej chaypi. 32 Chay diaqa qankunapaj samarikuna pʼunchay kanqa. Qanchis killaj jisqʼon pʼunchayninpi ña chʼisiyaykushajtinña, juchasniykichejmanta llakisqa kasqaykichejta rikuchinkichej.+ Chay samarikuna pʼunchaytaqa ruwankichej chʼisiyaykuymanta qʼayantin chʼisiyaykuykama”.

33 Jehová Diosqa Moisesman nillarqataj: 34 “Israelitasman kay jinata niy: ‘Chay qanchis kaj killallapitaj 15 pʼunchay kashajtin, qanchis días juntʼata Jehová Diospaj Chʼujllas Fiestata ruwankichej.+ 35 Ñaupaj kaj pʼunchaypeqa Diosta yupaychanaykichejpaj tantakunkichej, amataj ima sinchʼi trabajotapis ruwankichejchu. 36 Qanchis diasta apamunkichej Jehová Diospaj ninapi qʼolachina ofrendata. Pusaj kaj pʼunchaypitaj Diosta yupaychanaykichejpaj tantakunkichej,+ apamunkichejtaj Jehová Diospaj ninapi qʼolachina ofrendata. Chay pʼunchayqa uj sumaj tantakuy kanqa. Ama ima sinchʼi trabajotapis ruwankichejchu.

37 ”’Chaykuna kanku Jehová Diospaj tʼaqasqa fiestasnin.+ Chay fiestaspajqa wajyanakunkichej Diosta yupaychanaykichejpaj,+ Jehová Diospaj ninapi qʼolachina ofrendata apamunaykichejpaj: qʼolachina ofrendata,+ chʼaki mikhuy ofrendata,+ vino ofrendatawan,+ ima diachus jaywana kasqanman jina. 38 Chaywanpis Jehová Diosman jaywallankichejpuni samarikuna pʼunchaykunamanta ofrendasta,+ waj ofrendasta,+ ruwasaj nisqaykichejmanta ofrendasta,+ aparimusqaykichej ofrendastapis.+ Chaykunataqa Jehová Diosman jaywallankichejpuni. 39 Qanchis kaj killaj 15 pʼunchayninpi, cosechaykichejta oqharisqaykichejmantaña qanchis diasta+ Jehová Diospaj fiestata ruwapunkichej. Ñaupaj kaj pʼunchaypeqa samarikunkichej, jinallataj pusaj kaj pʼunchaypipis.+ 40 Ñaupaj kaj pʼunchaypeqa tantankichej sumaj sachʼaspa poqoyninta, palmera sachʼaspa ramasninta,+ ramarara sachʼaspa ramasninta, mayu patapi álamo sachʼaspa ramasninta ima. Ajinata qanchis pʼunchayta kusikunkichej+ Jehová Diosniykichejpa ñaupaqenpi. 41 Chay fiestataqa sapa wata qanchis kaj killapi Jehová Diospaj ruwapunkichej, qanchis diasta.+ Chayqa uj ley kanqa unay wataspaj, qankunapaj mirayniykichejpajwan. 42 Chay qanchis diasta chʼujllaspi tiyakunkichej.+ Tukuy israelitas chay chʼujllaspi tiyakunkichej. 43 Ajinamanta qhepaman jamoj tukuy mirayniykichej yachanankupaj,+ noqa israelitasta Egiptomanta orqhomushaspa chʼujllaspi tiyachisqayta.+ Noqamin Jehová Diosniykichejqa kani’”.

44 Moisestaj israelitasman willarqa chay fiestasta Jehová Diospaj ruwanankuta.

24 Jehová Diosqa Moisesman nillarqataj: 2 “Israelitasta kamachiy kʼanchachinapaj sumajnin aceite de olivata apamunankuta, ajinamanta candeleroj* mecherosnin kʼanchanallanpajpuni.+ 3 Aarón cuentayoj kanqa chay mecherosta kʼanchachinallanpajpuni Jehová Diospa ñaupaqenpi, inti yaykupusqanmantapacha sutʼiyamunankama. Ajinata kʼanchachenqa tinkukuna toldo ukhupi, cortinamanta jawapi, maypichus trato ruwasqamanta arca nisqa caja kashan chay jawapi. Kayqa unay wataspaj uj kamachiy kanqa, qankunapaj mirayniykichejpajwan. 4 Aaronqa chay mecherosta listotapuni japʼenqa oro puritumanta candeleropi,+ Jehová Diospa ñaupaqenpi kʼanchanallanpajpuni.

5 ”Sumaj ñutʼu jakʼumanta 12 muyu tʼantasta* ruwaspa chayachinki. Sapa ujqa kachun iskay kilos jina* jakʼumanta. 6 Chay tʼantastataj churanki Jehová Diospa ñaupaqenman, oro puritumanta ruwasqa mesa+ pataman iskay sukʼasta, sapa ladopi sojtata.+ 7 Sapa sukʼa patamantaj churanki puritu yuraj inciensota. Chay inciensotaj tʼantaj cuentanmanta jaywasqa kanqa,+ Jehová Diospaj ninapi qʼolachina* ofrenda kananpaj.* 8 Chay tʼantataqa sacerdote churanqapuni Jehová Diospa ñaupaqenman sapa samarikuna pʼunchay.+ Chayqa unay wataspaj uj trato kanqa israelitas juntʼanankupaj. 9 Chay tʼantasqa kanqa Aaronpaj, wawasninpajwan.+ Chaytataj mikhonqanku uj santo lugarpi.+ Chay tʼantaqa kashan Jehová Diospaj ninapi qʼolachina ofrendasmanta may llimphu, chaytaj kashan sacerdotepaj. Chayqa unay wataspaj uj ley kanqa”, nispa.

10 Israelitas ukhupi uj runa karqa, mamanmanta israelita, tatanmantataj egipcio.+ Chay runataj uj israelita runawan maqanakuyta qallarerqa campamento* ukhupi. 11 Chantá israelita mamayoj runaqa Diospa sutinpa* contranta parlarqa, maldicerqataj.+ Chayrayku chay runataqa Moisesman pusamorqanku.+ Chay runaj mamanpa sutenqa karqa Selomit, payqa Dibrijpa wawan karqa Dan ayllumanta.* 12 Chay runatataj wisqʼaykorqanku Jehová Dios imatachus ruwanankuta ninankama.+

13 Jehová Diostaj Moisesta nerqa: 14 “Campamentomanta jawaman orqhomuy sutiyta maldicej runata. Chay nisqanta uyarejkunataj makisninkuta churachunku chay runaj umanman. Chantataj tukuy israelitas rumiswan chʼanqaykuspa wañuchichunku.+ 15 Kunanqa israelitasman nillaytaj: ‘Pichus Diosninta maldicejqa chay juchanmanta cuentata qonqa. 16 Jehová Diospa sutinpa contranta parlajqa wañuchisqapuni kanqa.+ Paytaqa tukuy israelitas rumiswan chʼanqaykuspa wañuchenqanku. Forasteropis kachun israelitapis kachun wañuchisqapuni kanqa Diospa sutinpa contranta parlasqanrayku.

17 ”’Pichus runa masinta wañuchejqa wañuchisqallataj kanqa.+ 18 Pichus waj runaj uywanta wañuchejqa pagapunan tiyan uywamanta uywallawantaj.* 19 Sichus pipis runa masinta imanarpanman chayqa, paytapis kikillantataj ruwanqanku.+ 20 Sichus pipis pejpa tullunta pʼakinman chayqa, paypaj tullunpis pʼakisqallataj kanqa. Ñawimanta ñawi, kirumanta kiru. Imantachá waj runata nanachin, chayllatataj paytapis nanachenqanku.+ 21 Uj runaj uywanta wañuchejqa pagapunan tiyan.+ Pichus uj runata wañuchejtajrí wañuchisqallataj kanqa.+

22 ”’Chay kikin leyllataj kanqa forasterospaj, jinallataj chay kikin llajtayojkunapajpis.+ Noqamin Jehová Diosniykichejqa kani’”.

23 Moisés chay imasta israelitasman willajtin, paykunaqa Diospa sutinta maldicej runata campamentomanta jawaman orqhorqanku. Chaypitaj rumiswan chʼanqaykuspa wañucherqanku.+ Chayta israelitasqa ruwarqanku Jehová Dios Moisesman kamachisqanman jina.

25 Jehová Diosqa Sinaí orqopi kaytawan Moisesman nerqa: 2 “Israelitasman kayta niy: ‘May jallpʼatachus qosqaykichej chayman yaykuspañaqa,+ Jehová Diospaj samarikuna watata ruwankichej. Chay wataqa jallpʼata samarichinkichej.+ 3 Chay jallpʼaspi sojta watasta tarpunkichej, uva sachʼasniykichejpa ramasnintapis sojta watasta kʼutunkichej, jallpʼaj poqoynintapis sojta watasta oqharinkichej.+ 4 Qanchis kaj watapitajrí jallpʼata samarichinkichej. Chay wataqa Jehová Diospaj tʼaqasqa kanqa. Chay watapeqa ama imatapis jallpʼaykichejpi tarpunkichejchu, nitaj uva sachʼasniykichejpa ramasnintapis kʼutunkichejchu. 5 Chantá nillataj ruthunkichejchu chay wataspi poqoj kʼipa trigosta,* nillataj pallankichejchu uva sachʼasniykichejmanta uvastapis. Jallpʼaqa watantinta sumajta samarinan tiyan. 6 Jallpʼata samarichishankichej chay wataqa, imachus sapallanmanta poqojta mikhullankichej, jinallataj mikhonqanku qhari kamachisniykichej, warmi kamachisniykichej,* peonesniykichej, qankunawan tiyakoj forasterospis. 7 Chayta mikhullanqankutaj uywasniykichej, tukuy chay jallpʼaspi kaj kʼita animalespis. Imaschá chay jallpʼaspi poqonqa chay poqoykunaqa mikhunaykichejpaj kanqa.

8 ”’Qanchis kutita yupankichej qanchis samarikuna watasta. Jinamanta chay watasqa tukuyninpi kanqa 49 watas. 9 Phishqa chunka watapitaj, qanchis kaj killaj chunka pʼunchaynin kashajtin, wajramanta putututa sinchʼita waqachinkichej, Perdonta Tarina Pʼunchaypi.+ Chay pʼunchayqa tukuy jallpʼaykichejpi uyarikunan tiyan chay pututoj waqaynin. 10 Chay 50 wataqa Diospaj tʼaqasqa kanqa. Chay wataqa tukuyman willankichej, chay jallpʼaspi tiyakoj runas kacharichisqa kanankuta.+ Chay wataqa qankunapaj Kacharichina Wata kanqa. Sapa ujpis vendesqan jallpʼanta kutichichikaponqa, esclavo jina vendesqa kajpis familianman kutiponqa.+ 11 Chay 50 wataqa qankunapaj Kacharichina Wata sutichasqa kanqa. Chay wataqa ama imatapis tarpunkichejchu, nitaj ruthunkichejchu kʼipa trigostapis, nillataj pallankichejchu uva sachʼasniykichejmanta uvastapis.+ 12 Chay wataqa Kacharichina Wata kanqa. Qankunapajqa santo wata kanqa. Imachus jallpʼapi sapallanmanta poqon chayllata mikhunkichej.+

13 ”’Chay Kacharichina Watapeqa sapa ujpis vendesqan jallpʼanta kutichichikaponqa.+ 14 Sichus imatapis runa masiykichejman vendenkichej chayri runa masiykichejmanta rantikunkichej chayqa, ama aprovechakunkichejchu.+ 15 Runa masiykichejmanta jallpʼata rantispaqa, Kacharichina Watamantapacha mashkha watachus pasasqanman jina rantinkichej. Paytaj mashkha cosechasrajchus kanan kashan chayman jina vendesonqachej.+ 16 Qhepan kaj Kacharichina Watapaj ashkha watasraj faltan chayqa, chay jallpʼaqa astawan valenqa, pisi watasllaña faltan chaytajrí pisillaña valenqa. Jallpʼaqa vendekunan tiyan mashkha cosechasrajchus kanan kashan chayman jina. 17 Ni pipis aprovechakunanchu tiyan ni mayqen runa masinmanta.+ Diosniykichejta manchachikunaykichej tiyan,+ noqamin Jehová Diosniykichejqa kani.+ 18 Sichus kamachiykunasniyta, juiciopi nisqasniytapis kasukunkichej chayqa, ni imamanta manchachikuspa chay jallpʼapi tiyakunkichej.+ 19 Jallpʼaqa sumajta poqonqa,+ qankunataj chayta mikhunkichej sajsakunaykichejkama, ni imamanta manchachikuspataj tiyakunkichej.+

20 ”’Ichapis qankuna tapukunkichej: “¿Imatá mikhusun chay qanchis kaj watapi mana tarpuspari, nitaj cosechastapis oqharispari?”,+ nispa. 21 Noqa bendicionniyta apachimusqaykichej sojta kaj watapi. Chay watapi jallpʼaqa sumajta poqonqa, kinsa wata juntʼata mikhunaykichejpaj jina.+ 22 Pusaj kaj watapi tarpushajtiykichejqa, mikhushankichejraj sojta kaj watamanta rezago mikhuykunata. Chaytataj mikhullankichejpuni jisqʼon kaj watapi cosechanaykichejkama.

23 ”’Jallpʼataqa ama wiñaypaj vendenkichejchu,+ imaraykuchus noqajtamin jallpʼaqa.+ Qankunaqa forasteroslla noqapaj kankichej, jallpʼaypi tiyakoj forasteros jina.+ 24 Chayrayku ima jallpʼapis makiykichejman chayajtaqa saqenaykichej tiyan ñaupa dueñon watejmanta rantikapunanta.

25 ”’Sichus mayqen llajta masiykipis wajchayaspa jallpʼanta vendenman chayqa, aswan qaylla familian jamuspa, chay vendesqan jallpʼata watejmanta rantipunan tiyan.+ 26 Pejpatachus mana qaylla familian kanchu chay jallpʼanta rantipunanpaj, chaywanpis sichus pay kikin qhapajyanman, qolqentaj tiyapunmanña chay jallpʼanta watejmanta rantikapunanpaj chayqa, 27 maykʼajchus venderqa chay watamantapacha yupanqa mashkha watasñachus pasasqanta. Chantá mashkha watasrajchus qhepan kaj Kacharichina Watapaj faltan chay watasllamantaña qolqeta kutichenqa, pimanchus venderqa chayman. Ajinamanta rantikaponqa chay jallpʼanta.+

28 ”’Sichus mana qolqen kapunchu chay jallpʼanta watejmanta rantikapunanpaj chayqa, chay jallpʼaqa pichus rantikojpa makinpi qhepakonqa Kacharichina Watakama.+ Kacharichina Watapitaj chay jallpʼataqa ñaupa dueñon japʼikaponqa.+

29 ”’Sichus pipis wasinta perqawan muyuykusqa llajtapi vendenman chayqa, vendesqanmanta watankamalla atin watejmanta rantikapuyta.+ Vendesqanmanta uj wata juntʼakunankamalla atin watejmanta rantikapuyta. 30 Sichus chay wasita vendej runa mana chay watapi watejmanta rantikapunchu chayqa, chay waseqa pichus rantikojpa makinpi qhepakaponqa, paypata, mirayninpatawan kanqa unay wataspaj. Manataj kutichiponqachu Kacharichina Watapipis. 31 Chaywanpis mana perqawan muyuykusqa ranchospi wasistaqa maykʼajllapis watejmanta rantikapuyta atenqanku, imaynatachus jallpʼata watejmanta rantikapuyta atinku ajinata. Kacharichina Watapitaj chay waseqa dueñonman kutichisqa kanqa.

32 ”’Chaywanpis levitasqa* llajtasninku+ ukhupi wasisninkuta watejmanta rantikapuyta atillanku maykʼajllapis. 33 Sichus uj levita chay llajtasninku ukhupi wasinta mana watejmanta rantikapuyta atinchu chayqa, chay wasita rantejqa Kacharichina Watapi payman kutichipunan tiyan,+ imaraykuchus levitaspataqa chaylla kapun israelitas ukhupi tiyakunankupaj.+ 34 Levitaspa llajtasninkoj muyuyninpi pasto jallpʼasninkoqa+ mana vendeyta atikunchu. Chayqa levitaspaj wiñaypaj kanqa.

35 ”’Sichus qayllaykipi tiyakoj llajta masiyki wajchayanman, kausakunanpajtaj mana ganakuyta atinmanchu chayqa, qan yanaparinayki tiyan+ uj forasterota jina chayri llajtaykipi tiyakoj forasterota jina,+ ajinamanta qankunawan tiyakunallanpajpuni. 36 Paymantaqa ama interesta mañankichu, nitaj paymanta aprovechakunkichu,+ manachayqa Diosniykita manchachikunki.+ Ajinamanta chay llajta masiykeqa qankunawan tiyakullanqapuni. 37 Qolqeta manusqaykimantapis ama interesta mañankichu,+ ima mikhunata manuspapis ama kurajta mañakapunkichu. 38 Noqamin kani Jehová Diosniykichejqa, noqa Egiptomanta orqhomorqaykichej+ Canaán jallpʼata qosunaykichejpaj, Diosniykichejtaj kanaypaj.+

39 ”’Sichus mayqen llajta masiykipis wajchayaspa qanman vendekusunkiman chayqa,+ ama esclavota jina trabajachinkichu.+ 40 Paytaqa qhawanki peonniykita jina+ chayri qankunawan tiyakoj forasterota jina. Payqa qanpaj trabajanqa Kacharichina Wata chayamunankama. 41 Chay watataj wasiykimanta riponqa wawasninwan.* Kutiponqataj familianman, ñaupa tatasninmanta japʼisqan herencia jallpʼanman.+ 42 Tukuy israelitasqa noqaj esclavosniy kanku, noqa paykunata Egiptomanta orqhomorqani.+ Chayrayku ama wajman vendekuchunkuchu esclavos kanankupaj. 43 Chantapis ama paykunata ñakʼarichinkichu,+ manachayqa Diosniykita manchachikunki.+ 44 Sichus munankichej esclavosniyoj kayta chayri esclavasniyoj kayta chayqa, paykunaqa kananku tiyan muyuyniykichejpi kaj nacionesmanta. Chay nacionesmanta rantikuyta atinkichej uj esclavota chayri uj esclavata. 45 Chantapis esclavosta rantikuyta atillankichejtaj qankunawan tiyakoj forasteros kajkunamanta,+ jinallataj llajtaykichejpiña miraj familiasninkumantapis. Paykunata rantikuyta atinkichej qankunajta kanankupaj. 46 Qankuna wañupojtiykichejtaj, chay esclavosniykichejtaqa wawasniykichej japʼikaponqanku herenciata jina. Ajinamanta paykunaqa wawasniykichejpa esclavosnillanpuni kanqanku. Chaywanpis israelita masiykichejtaqa amapuni ñakʼarichinkichejchu.+

47 ”’Sichus mayqen forasteropis chayri qankuna ukhupi tiyakoj forasteropis qhapajyanman, ujnin israelita masiykichejtaj wajchayaspa vendekunman chay forasteroman, chayri qankuna ukhupi tiyakoj forasteroman, chayri forasteroj familianman chayqa, 48 vendekusqanmantaña derechoyojllapuni kanqa watejmanta rantisqa kananpaj. Mayqen hermanonpis rantikapuyta atin.+ 49 Rantikapuyta atillantaj tion, tionpa wawan chayri mayqen qaylla familianpis.*

”’Sichus pay qhapajyan chayqa, pay kikin pagaspa rantikuyta atin.+ 50 Chaypajqa rantejninwan khuska allinta yupanqanku ima watapichus vendekusqanmantapacha Kacharichina Watakama.+ Mashkhapichus vendekusqanqa chay watasman jina kanqa.+ Chay tiempopi mashkha diastachus trabajasqanmanta precioqa uj peón mashkhatachus ganan chayman jina kanqa.+ 51 Sichus ashkha watasraj Kacharichina Watapaj faltan chayqa, chay faltasqan watasman jina qolqeta pagapuchun llojsipunanpaj. 52 Sichus pisi watasllaña Kacharichina Watapaj faltan chayqa, mashkha watachus faltasqanta yupaspa chayman jina pagapuchun llojsipunanpaj. 53 Patronninpaj trabajashajtenqa uj peón jina qhawasqa kanan tiyan. Amataj saqenkichu patronnin ñakʼarichinanta.+ 54 Sichus kay leyman jina mana pay kikinmanta pagakuyta atinchu llojsipunanpaj chayqa, Kacharichina Watallapiña llojsiponqa wawasninwan.*+

55 ”’Israelitasqa esclavosniy kanku, paykunaqa esclavosniypuni kanku, noqa paykunata Egiptomanta orqhomorqani.+ Noqamin Jehová Diosniykichejqa kani.

26 ”’Ama ruwakunkichejchu qhasi manakaj dioskunataqa,+ nillataj ima santotapis.+ Ama yupaychana rumi pilaresta sayachinkichejchu. Llajtaykichejpeqa ama chʼeqosqa rumista sayachinkichejchu+ chaykunaman kʼumuykukunaykichejpaj.+ Noqamin kani Jehová Diosniykichejqa. 2 Ruwankichejpuni samarikuna pʼunchaykunasniyta, samarikuna watasniytapis. Toldo wasiytapis* respetowan* qhawankichej. Noqamin kani Jehová Diosqa.

3 ”’Sichus leyesniyman jina kausakunkichej, kamachiykunasniytapis juntʼankichej, chaykunatataj kasukunkichej chayqa,+ 4 maychus tiemponpi sumajta parachinpusqaykichej.+ Chajrasniykichejtaj sumajta poqonqa,+ fruta sachʼasniykichejpis sumajta poqollanqataj. 5 Trigo trillanaykichejqa uvas pallanaykichej tiempokama kanqa. Uvas pallanaykichejpis tarpuy tiempokama kanqa. Tʼantatapis mikhunkichej sajsakunaykichejkama, ni imamanta manchachikuspataj jallpʼaykichejpi tiyakunkichej.+ 6 Chay jallpʼapi allin kausayta qosqaykichej,+ ni pita manchachikuspataj puñukunkichej.+ Noqa chay jallpʼata jarkʼasaj phiña animalesmanta, nitaj pipis espadawan jamonqachu qankunawan maqanakoj. 7 Qankunaqa enemigosniykichejta ayqechinkichej. Paykunataqa espadawan wañurachinkichej. 8 Qankunamanta phishqalla 100 runasta ayqechinkichej, jinallataj 100 runaslla 10.000 runasta ayqechinkichej. Ajinamanta enemigosniykichejqa ñaupaqeykichejpi wañuranqanku espadawan tʼojsisqas.+

9 ”’Noqa qankunata bendecisqaykichej,* noqa mirachisqaykichej, ashkhayachisqaykichejtaj.+ Qankunawan uj tratota ruwasqaytapis juntʼasajpuni.+ 10 Pasaj watamanta rezagota mikhushallajtiykichejraj, chay rezagotaqa jawaman orqhonaykichej kanqa mosoj poqoyta waqaychanaykichejpaj. 11 Qankuna chaupiman churasaj yupaychana toldoyta,+ nitaj qhesachasqaykichejchu. 12 Qankunaj chaupiykichejpi purisaj, Diosniykichejtaj kasaj.+ Qankunataj llajtay kankichej.+ 13 Noqamin kani Jehová Diosniykichejqa, noqa qankunata Egiptomanta orqhomorqaykichej amaña paykunaj esclavosnin kanaykichejpaj. Noqa yugoykichejta pʼakerqani, umaykichejtataj patata oqharichispa puricherqaykichej.

14 ”’Chaywanpis sichus qankuna mana uyariwankichejchu, nitaj tukuy kay kamachiykunata juntʼankichejchu,+ 15 sitajchus kamachisqasniyta qhesachankichej,+ juiciopi nisqasniytapis mana valechinkichejchu, ajinamanta tukuy kamachiykunasniyta mana juntʼankichejchu, tratoytapis pʼakinkichej chayqa,+ 16 noqapis qankunawan kayta ruwasaj: llakiykunata apachimusqaykichej, jinallataj tuberculosis onqoyta, calenturata* ima. Chaykunawantaj ñawisniykichejta laqhayachisaj, kallpaykichejtapis pisiyachisaj. Tarpuspapis qhasillata tarpunkichej, imajtinchus enemigosnillaykichej poqochisqaykichejtaqa mikhukaponqanku.+ 17 Noqa qankunaj contraykichejpi kasaj, enemigosniykichejtaj atipasonqachej.+ Qankunata chejnisojkunaqa chakinku uraman churasonqachej,+ qankunataj ni pejpa qhatiykusqallan ayqenkichej.+

18 ”’Sichus chay tukuywanpis manapuni uyariwankichejchu chayqa, qanchis kutitawan castigasqaykichej juchasniykichejmanta. 19 Noqa tukuchisaj wapu wapu purispa runaykachasqaykichejta. Cielota wisqʼaykusaj mana paramunanpaj,*+ jallpʼasniykichejtapis mana poqojta ruwasaj.* 20 Kallpaykichejtaqa qhasillata tukuchinkichej, imaraykuchus jallpʼaykichejpeqa mana imapis poqonqachu,+ fruta sachʼasniykichejpis nillataj poqonqachu.

21 ”’Sichus contrallaypipuni kankichej, nipunitaj uyariwankichejchu chayqa, juchasniykichejmanta uj qanchis kutitawan castigasqaykichej. 22 Jallpʼasniykichejman apachimusaj phiña animalesta,+ wawasniykichejta mikhukapunankupaj,+ uywasniykichejtapis mikhukapunankupaj. Ajinamanta qankunaqa pisillaña kankichej, ñankunasniykichejpis chʼinpacha kanqa.+

23 ”’Sichus chay tukuywanpis manapuni kʼamisqayta uyariwankichejchu,+ contrallaypipunitaj kankichej chayqa, 24 noqapis qankunaj contraykichejpi kasaj. Uj qanchis kutitawantaj castigasqaykichej juchasniykichejmanta. 25 Enemigosniykichejtaqa espadawan jamuchisaj qankunawan maqanakunankupaj, tratoyta pʼakisqaykichejmanta+ qankunata castiganaypaj. Sichus llajtasniykichej ukhuman pakakoj ayqekunkichej chayqa, noqa chayman onqoykunata apachimusqaykichej,+ qankunataj enemigoykichejpa makinman urmankichej.+ 26 Mikhunata pisichisqaykichej+ chaypachaqa, chunka warmis uj hornollapi tʼantata chayachenqanku. Chay tʼantatataj pesaspa may pisillata sapa ujman partisonqachej.+ Qankunataj chayta mikhunkichej, nitaj sajsakunkichejchu.+

27 ”’Sichus ajina kashajtinpis, manapuni uyariwankichejchu, contrallaypipunitaj kankichej chayqa, 28 noqaqa astawanraj contraykichejpi kasaj.+ Uj qanchis kutitawantaj castigasqaykichej juchasniykichejmanta. 29 Jinamanta qankunaqa mikhukapunkichej qhari wawasniykichejta, warmi wawasniykichejtapis.+ 30 Noqataj thuñirasaj maypichus santosniykichejta yupaychankichej chay pata lugaresta,+ incienso altaresniykichejtapis. Qankunaj ayasniykichejtaqa* tauqarasaj chay mana kausayniyoj millay santosniykichej*+ pataman. Qankunata millachikuspa waj ladoman kutirisaj.+ 31 Llajtasniykichejta thuñirasaj,+ yupaychana lugaresniykichejtapis chʼinpachata saqesaj. Sumaj qʼapaj ofrendasniykichejtapis manaña muskhirisajchu. 32 Llajtaykichejta chʼinman tukuchisaj,+ chayman tiyakoj jamonqanku chay enemigosniykichejtaj tʼukushaj qhepakonqanku.+ 33 Qankunata waj nacionesman tʼaqarasqaykichej,+ enemigosniykichejta espadawan jamuchisaj qankunawan maqanakunankupaj.+ Jallpʼaykichejtaj chʼinpacha qhepakonqa,+ llajtasniykichejpis thuñisqa kanqa.

34 ”’Enemigosniykichejpa jallpʼankupi kanaykichejkamaqa jallpʼasniykichej samarikonqanku, ñaupajta mana samarikusqankumanta. Chaypacha jallpʼaqa samarikonqa ñaupajta mana samarikusqanmanta.+ 35 Jallpʼaqa chʼinpacha qhepakuspa samarikonqa, qankuna chaypi tiyakushajtiykichej mana samarichisqaykichejmanta.

36 ”’Pikunachus enemigosniykichejpa jallpʼankupi kausankichejraj chaykunaman,+ sinchʼi manchachikuyta churasaj sonqosniykichejman. Ayqenkichejtaj uj sachʼa laqheta urmajta uyarispalla. Ajinata qankunaqa ayqenkichej pipis espadawan qhatiykushasunkichejman jina. Qankunaqa ni pejpa qhatiykusqallan urmankichej.+ 37 Qankunapuralla takanakuspa urmankichej pipis espadawan qhatiykushasunkichejman jina ni pejpa qhatiykusqallan. Nitaj enemigosniykichejman sayaykuyta atinkichejchu.+ 38 Ajinamanta qankunaqa waj nacionespa jallpʼankupi wañunkichej.+ Enemigosniykichejpa jallpʼankoqa oqoykusonqachej. 39 Chantá qankunamanta puchojkunaqa enemigosniykichejpa jallpʼankupi juchasninkurayku ñakʼarenqanku.+ Paykunaqa tatasninkoj juchasninkurayku ñakʼarenqanku.+ 40 Chaypacha rimarenqanku contrayta churakusqankuta,+ wasanchawasqankuta, contraypitaj juchallikusqankuta, tatasninkupis kikillantataj ruwasqankuta,+ 41 chayrayku noqapis contrankupi kasqayta,+ enemigosninkoj jallpʼanmantaj wijchʼuykusqayta.+

”’Chaypacha ichapis rumi sonqosninkuta llampʼuyachenqanku,+ juchasninkumantataj paganqanku. 42 Noqataj yuyarikusaj tratota ruwasqaymanta Jacobwan,+ Isaacwan,+ Abrahanwan+ ima. Yuyarikullasajtaj ima jallpʼatachus qankunaman qonayta nerqani chaymantapis. 43 Mana jallpʼankupi kanankukamaqa, chay jallpʼaqa chʼinpacha qhepakuspa samarenqa, ñaupajta mana samarisqanmanta.+ Chaykamataj paykunaqa juchasninkumanta paganqanku juiciopi nisqasniyta mana kasukusqankurayku, kamachiykunasniytapis mana valechisqankurayku.+ 44 Tukuy chaywanpis, enemigosninkoj jallpʼankupi kashajtinkupis ni jaykʼaj paykunata qhesachasqataqa qhesachasajchu,+ nitaj wijchʼusajchu paykunata tukuchinaykamaqa. Chaytachus ruwayman chayqa, paykunawan trato ruwasqayta pʼakiyman,+ imaraykuchus noqamin kani Jehová Diosninkoqa. 45 Chantapis allinninkupaj yuyarikullasajtaj ñaupa tatasninkuwan tratota ruwasqayta,+ pikunatachus Egiptomanta orqhomorqani waj naciones rikushajtinku chaykunawan.+ Ajinamanta Diosninku kanaypaj. Noqamin Jehová Diosqa kani’”.

46 Chaykuna kanku Jehová Diospa kamachiykunasnin, juiciopi nisqasnin, leyesninpis, mayqenkunatachus Moisesman Sinaí orqopi qorqa israelitasman willananpaj chaykuna.+

27 Jehová Diosqa Moisesman nillarqataj: 2 “Israelitasman kay jinata niy: ‘Sichus pipis imatachus ruwasaj nisqanta juntʼananpaj,+ uj runa mashkhachus valen chay kikin preciota Jehová Diosman pagananta nin chayqa, kay jina kanqa: 3 Qharismantaqa 20 watasniyojmanta 60 watasniyojkama, 50 siclos* qolqeta paganqa, santo lugarpi mashkhachus uj siclo pesasqanman jina. 4 Warmismantataj 30 siclos qolqeta paganqa. 5 Chantá phishqa watasniyojmanta 20 watasniyojkama qharismantaqa 20 siclos qolqeta paganqa, warmismantataj chunka siclos qolqeta. 6 Uj killayojmanta phishqa watasniyojkama qharismantaqa phishqa siclos qolqeta paganqa, warmismantataj kinsa siclos qolqeta.

7 ”’Sojta chunka watasniyojmanta pataman qharismantaqa 15 siclos qolqeta paganqa, warmismantataj chunka siclos qolqeta. 8 Sichus chay runa may wajcha kaspa, mana pagayta atinchu mashkhatachus pagananta chayqa,+ sacerdoteman rinan tiyan sacerdote ninanpaj mashkhatachus pagananta. Sacerdotetaj mashkhatachus pagananta tanteanqa chay runa pagayta atisqanman jina.+

9 ”’Sichus pipis llimphupaj qhawasqa uywata Jehová Diosman qonanta nin chayqa, chay uywaqa Jehová Diospaj tʼaqasqa kanqa. 10 Chay uywataqa mana cambiayta atinchu waj uywawan, ni aswan allin kajwan, nitaj mana allin kajwanpis. Sichus chay uywata waj uywawan cambianman chayqa, chay iskaynin uywas Diospaj tʼaqasqa kanqa. 11 Jehová Diosman mana jaywanapaj jina chʼichipaj qhawasqa uywata+ qonanta nin chaytaj, chay uywataqa sacerdoteman apanqa. 12 Sacerdotetaj nenqa chay uywa mashkhachus valesqanta, allinchus manachus kasqanman jina. Chay uywaj preciontaj sacerdote nisqanman jina kanqa. 13 Sichus maykʼajllapis chay uywata watejmanta rantikapuyta munan chayqa, mashkhachus chay uywa valen chay kikinta pagachun, chay valorninmantaj phishqaman tʼaqaspa ujnintawan yapachun.+

14 ”’Sichus pipis wasinta Jehová Diospaj tʼaqasqa kananpaj qon chayqa, sacerdote chay wasita qhawarispa nenqa mashkhachus valesqanta, allinchus manachus kasqanman jina. Chay wasej preciontaj sacerdotej nisqanman jina kanqa.+ 15 Sichus chay wasita qojqa watejmanta rantikapuyta munan chayqa, mashkhachus chay wasi valen chay kikinta pagachun, chay valorninmantaj phishqaman tʼaqaspa ujnintawan yapachun. Ajinamanta chay waseqa chay runajllatapuni kanqa.

16 ”’Sichus pipis jallpʼanmanta uj cheqata Jehová Diospaj tʼaqasqa kananpaj qon chayqa, precionqa kanan tiyan mashkha mujuwanchus tarpukusqanman jina. Kinsa quintal jina* grano* mujuwan tarpukoj jallpʼaqa, 50 siclos qolqe valenqa. 17 Sichus chay jallpʼanta Diospaj tʼaqasqa kananpaj Kacharichina Watapi+ qon chayqa, chay jallpʼaj precionqa pachallanpuni kanqa. 18 Sitajchus chay jallpʼanta Diospaj tʼaqasqa kananpaj Kacharichina Watamanta qhepataña qon chayqa, sacerdoteqa preciota churanqa mashkha watasllañachus qhepan Kacharichina Watapaj faltasqanman jina. Chayman jinataj precionta bajanqa mashkhachus valerqa chaymanta.+ 19 Sichus chay jallpʼanta Diospaj tʼaqasqa kananpaj qojqa maykʼajllapis watejmanta rantikapuyta munan chayqa, mashkhachus chay jallpʼa valen chay kikinta pagachun, chay valorninmantaj phishqaman tʼaqaspa ujnintawan yapachun. Ajinamanta chay jallpʼaqa payllapatapuni kanqa. 20 Sichus chay jallpʼanta mana watejmanta rantikapunchu, chay jallpʼataj waj runaman vendesqa kanman chayqa, manaña jaykʼajpis watejmanta rantikapuyta atenqachu. 21 Maypachachus chay jallpʼa Kacharichina Watapi kacharichisqa kanqa chaypacha, chay jallpʼaqa Jehová Diospaj kanqa, paypaj tʼaqasqa jallpʼa. Chay jallpʼatataj sacerdotes japʼikaponqanku.+

22 ”’Sichus pipis rantisqan jallpʼata Jehová Diospaj tʼaqasqa kananpaj qon, manataj herencian jallpʼachu kanman chayqa,+ 23 sacerdoteqa nenqa chay jallpʼa mashkhachus valesqanta, mashkha wataschus qhepan Kacharichina Watapaj faltasqanman jina. Chay kikin pʼunchayllapitaj chay runaqa sacerdotej nisqanman jina paganqa.+ Chay pagasqan qolqetaj Jehová Diospaj tʼaqasqa kanqa. 24 Pichus jallpʼata vendejqa Kacharichina Watapi chay jallpʼanta japʼikaponqa, pay ñaupa dueñon kasqanrayku.+

25 ”’Imapis mashkhachus valen chaytaqa, tanteakonqa santo lugarpi mashkhachus uj siclo pesasqanman jina. Sapa sicloqa 12 gramos pesan.*

26 ”’Tukuy uywaspa ñaupaj kaj uñasninkoqa Jehová Diospata kanku,+ chayrayku mana pipis payman qonanta nenqachu. Waka uñapis chayri oveja uñapis kachun Jehová Diospataña kanku.+ 27 Sichus chʼichipaj qhawasqa uywa kanman chayqa, rantikapuyta atenqa mashkhachus valesqanta pagaspa. Chay valorninmantaj phishqaman tʼaqaspa ujnintawan yapachun.+ Sichus mana rantikapunman chayqa, chay uywaqa vendesqa kanqa mashkhachus valesqanman jina.

28 ”’Sichus pipis kapuyninmanta Jehová Diosman wiñaypaj qopunman runasta, uywasta chayri jallpʼasninta chayqa, chaykunataqa mana vendekapuyta atinchu, nitaj watejmanta rantikapuytapis. Chaykunaqa Jehová Diospaj tʼaqasqaña kanku, may llimphutaj kanku.+ 29 Nillataj pipis kacharichiyta atinchu wañuchisqa kananpaj juchachasqa runataqa.*+ Chay runaqa wañuchisqapuni kanan tiyan.+

30 ”’Jallpʼapi poqosqanmanta sapa chunkamanta ujqa*+ Jehová Diospaj kanqa, chajra poqoymanta, sachʼaspa poqoyninmantapis. Chayqa Jehová Diospaj tʼaqasqamin. 31 Sichus pipis sapa chunkamanta ujta qosqanmanta maykʼajllapis rantikapuyta munan chayqa, chay qosqan mashkhachus valen chayta pagachun, chay valorninmantaj phishqaman tʼaqaspa ujnintawan yapachun. 32 Wakasmanta, ovejasmanta, cabrasmanta imaqa sapa chunkamanta ujta Jehová Diosman qonkichej. Chaypajqa uywasniykichejta yupashaspa,* sapa chunka kajta Diospaj tʼaqankichej. 33 Allinpis kachun mana allinpis kachun ama ajllankichejchu, nitaj wajwan cambiankichejchu. Sichus chay uywata waj uywawan cambiawajchej chayqa, chay iskaynin uywas Diospaj tʼaqasqa kanqanku.+ Nitaj watejmanta rantikapuyta atinkichejchu’”.

34 Chay kamachiykunata Jehová Diosqa Sinaí+ orqopi Moisesman qorqa israelitaspaj.