LAMENTACIONES
א [álef]*
1 Jerusalén llajtaqa runaswan juntʼa karqa, kunantaj llakiyta sapallan tiyasqa kashan.+
Payqa naciones ukhupi jatun llajta karqa, kunantaj viuda jina sapan rikhurin.+
Payqa provincias ukhupi reina karqa, kunantaj esclava kashan.+
ב [bet]
2 Tutantin waqasqanpi sutʼiyan.+ Waqaynenqa uyanta sururimun.
Tukuy qharisninmanta ni mayqenninku ladonpichu payta sonqocharinanpaj.+
Tukuy amigosnin payta wasanchanku,+ kunanqa enemigosnin kanku.
ג [guímel]
3 Judataqa presota apakapunku,+ may llakiypi kashan, esclavata jina sinchʼita ñakʼarichinku.+
Kunanqa naciones chaupipi tiyakunan kanqa.+ Paypajqa mana sonqo tiyaykuy kanchu.
Payta qhatiykachajkunaqa, llakiypi kashajtin payta japʼinku.
ד [dálet]
4 Sionman rej ñankunaqa llakisqa kashanku, ni pi fiestaman rej kasqanrayku.+
Llajtaj tukuy punkusnin pʼakisqa kashanku.+ Sacerdotesnenqa* phutisqa kashanku.
Doncellasnenqa sinchʼi llakisqa kashanku. Paytaj sonqo nanayta ñakʼarishan.
ה [he]
5 Enemigosnenqa paypa patronnin kanku. Enemigosnenqa ni ima phutiyniyoj kanku.+
Jehová Diospuni payta ñakʼarichin chay chhika juchasninrayku.+
Wawasnintaqa enemigosninku presosta apakapunku.+
ו [waw]
6 Sion llajtaj* jatun kaynin chinkapun.+
Kuraj kamachejkunasnenqa mana pastota tarej tarukas jina kanku.
Paykunaqa ñakʼayllataña purishanku japʼejpa ñaupaqenta.
ז [zayin]
7 Ajina ñakʼariypi kashaspa, mana wasiyoj kashaspa, Jerusalenqa yuyarikun
unay tiempospi tukuy laya* valorniyoj imasnin tiyapusqanmanta.+
Jerusalenpi tiyakoj runastaqa enemigon japʼikaporqa, nitaj pipis Jerusalenta yanapaj karqachu.+
Chaypacha enemigosnenqa thuñisqa kasqanta rikuspa asikorqanku.+
ח [jet]
8 Jerusalenqa maytapuni juchallikun.+
Chayrayku millachikunaman tukun.
Pikunachus respetaj kanku chaykunaqa, payta kʼumuykachachinku, qʼalallata rikusqankurayku.+
Jerusalenqa sonqo nanayta waqan,+ pʼenqakuspataj qhepaman kutirin, mana rikunankupaj.
ט [tet]
9 Juchata ruwasqanqa pʼachanpi yachakun.
Mana yuyaychakorqachu imachus qhatirinanta.+
Payqa manchay mancharinata urman. Ni pi sonqochaj kanchu.
Jehová Diosníy, qhawarimuy ari, kay jinata ñakʼarishani enemigoy runaykachasqanrayku.+
י [yod]
10 Enemigoqa Jerusalenpa tukuy valorniyoj imasninta apakapun.+
Jerusalenqa rikun waj naciones templonman yaykuykusqankuta,+
mayqenkunatachus kamacherqanki llajtaykiwan* mana chajrukunankuta chaykuna.
כ [kaf]
11 Jerusalenmanta tukuy runas llakisqa kashanku. Mikhunata* maskʼakushanku.+
Valorniyoj imasninkutaqa uj chhika mikhunallawan cambianku, mana yarqhaymanta wañunankupaj.
Jehová Diosníy, qhawarimuway, mana ni imapaj valej warmi* jinallaña kani.
ל [lámed]
12 Ñanta purej runas, ¿nichu sonqoykichej nanan?
Qhawariychej, reparaychejtaj.
¿Kay nanayniymanta aswan sinchʼi nanay kanmanchu?
Chay jina nanaytaqa Jehová Dios apachimuwan sinchʼi phiñakuynin pʼunchaypi.+
מ [mem]
13 Cielomantapacha ninata kachaykamuwan, tukuynin tullusniyta ruphaykuchinanpaj.+
Chakisniypaj uj chʼipata churaykuwan, mana munashajta qhepaman kutirichiwan.
Wijchʼusqa warmita jina rikhurichiwan.
Diantinta llakisqalla kani.*
נ [nun]
14 Payqa makisninwan juchasniyta yugota jina kunkayman wataykun.
Juchasneyqa kunkayman watasqa kashanku, kallpaytaj tukukapun.
Jehová Diosqa runaspa makinkuman jaywaykuwan, noqataj mana paykunaj contrankuta sayaykuyta atinichu.+
ס [sámekh]
15 Noqapi tiyakorqanku chay kallpasapa runasta tukuyninkuta Jehová Diosqa qhechuwan.+
May chhika runasta noqaj contrayta tantachin, jovenesniyta sarurachinanpaj.+
Jehová Diosqa uva sarunapi+ sarurparin Judajpa doncella wawanta.
ע [ayin]
16 Chay imasrayku waqashani.+ Ñawisniymanta waqay sururishan.
Sonqochawajkuna kallpachawajkunapis karupi kashanku.
Enemigo atipawasqaykurayku wawasneyqa manchay llakisqa kashanku.
פ [pe]
17 Sionqa makisninta pataman oqharin.+ Nitaj pipis payta sonqochaykurej kanchu.
Jehová Diosqa Jacobpa muyuyninmanta tukuy enemigosninta kamacherqa Jacobpa contranta sayaykunankuta.+
Paykunapaj Jerusalenqa manchay millachikunaman tukun.+
צ [sadé]
18 Jehová Diosqa cheqamin.+ Noqa kamachiykunasninta mana kasorqanichu.+
Tukuy runas, uyariwaychej, rikuychejtaj kay jinata ñakʼarishasqayta.
Doncellasniyta, jovenesniytapis presosta apakapunku.+
ק [qof]
19 Qharisniyta wajyakorqani, paykunataj wasanchawanku.+
Llajtapeqa sacerdotesniypis, kurajkunapis wañupunku
kausanankupaj mikhunata maskʼasqankupi.+
ר [resh]
20 Jehová Diosníy, manchay llakisqa kashani.
Chʼunchulasneyqa qʼewirakushan.
Sonqoyqa sinchʼi llakisqa kashan mana kasukusqayrayku.+
Wawasniytaqa jawapi espadawan wañurachinku.+ Wasi ukhupipis runasqa wañushallankupuni.
ש [shin]
21 Runasqa waqasqayta uyarinku. Mana pipis kanchu sonqocharinawanpaj.
Tukuy enemigosniy yachanku kay desgracia qhatiriwasqanta.
Paykunaqa manchay kusisqa karishanku, qan ajinata ruwawasqaykirayku.+
Jinapis chay willasqayki pʼunchaytaqa chayachimunkipuni,+ chaypachataj paykunataqa noqata jina desgracia qhatirenqa.+
ת [taw]
22 Chay tukuy sajra ruwasqasninkuta rikumuy, chantá paykunata castigay,+
imaynatachus noqatapis tukuy juchasniyrayku castigawarqanki ajinata.
Manchayta waqashani, sonqoypis nanawan.
א [álef]
2 Chay jinata Jehová Diosqa Sion llajtata* phiñakuyninwan pʼampaykun phuyuwan jinapuni.
Israelpa kʼachita kayninta cielomantapacha jallpʼaman choqaykamun.+
Diosqa phiñakuynin pʼunchaypi mana yuyarikorqachu chay chaki sarunanmanta.+
ב [bet]
2 Jehová Diosqa mana khuyarispa Jacobpa tukuy wasisninta chinkachin.
Sinchʼi phiñakuyninpi Judajpa* sumaj jarkʼachasqa lugaresninta urmaykuchin.+
Diosqa Judajpa warmi wawanpa gobiernonta,+ kuraj kamachejkunasnintapis+ pampaman wijchʼuspa kʼumuykachachin.
ג [guímel]
3 Diosqa sinchʼi phiñakuyninpi Israelpa tukuy atiyninta chinkacherqa.*
Israelpa enemigon qayllaykamushajtin Diosqa mana jarkʼakorqachu.+
Phiñakuynenqa nina jina laurarerqa Jacobpa contranpi, muyuyninpitaj tukuy ima kajta ruphaykorqa.+
ד [dálet]
4 Enemigopis kanman jina flechana arconta* matʼirin.* Paña makinta oqharin sajmamunanpajpacha.+
Pikunachus qhawayniykupi kʼacha runas karqanku chaykunata wañurachin.+
Sion llajtaj* toldonmantaj*+ phiñakuyninta ninata jina kachaykamun.+
ה [he]
5 Jehová Diosqa enemigoman jina tukun.+
Israelta kantumanta tukuchin.
Tukuynin torresninta tukuchin.
Tukuynin sumaj jarkʼachasqa lugaresninta phiriykun.
Judaj warmi wawanmantaj astawan nanayta, llakiytawan yapaykun.
ו [waw]
6 Chʼujllantaqa imata jinalla pampacharparin,+ huerta ramadata jinalla.
Fiestanta chinkachipun.+
Jehová Diosqa Sionpi fiestasta, samarikuna pʼunchaykunatapis chinkachin, manaña ni pi yuyarikunanpaj.
Payqa sinchʼi phiñakuyninpi ni reytapis, ni sacerdotetapis khuyarinchu.+
ז [zayin]
7 Jehová Diosqa manaña altarninta* rikuyta munarqachu.
Templonta millaypaj qhawarqa.+
Sionpa sumaj ruwasqa torresninpa perqasnintapis enemigosninpa makinman jaywaykorqa.+
Enemigosnenqa Jehová Diospa wasinpi qhaparerqanku+ fiesta pʼunchaypi jina.
ח [jet]
8 Jehová Diosqa nerqaña Sion llajtaj* perqanta urmaykuchinanta.+
Payqa midina qʼaytuwan perqasta miderqaña.+
Thuñishajtintaj mana makinta kuyuricherqachu.
Perqasta, ura perqastapis llakisqata saqen.
Chay tukuyninkojta kallpanku pisiyapun.
ט [tet]
9 Punkusnenqa jallpʼa ukhuman chinkaykunku.+
Diosqa punku trancana barretasninta pʼakispa tʼunata ruwan.
Reyninpis kuraj kamachejkunasninpis waj nacionespi presos kashanku.+
Manaña ley kanchu. Profetasninpis* Jehová Diosmanta mosqoypi jina ni ima willayta japʼinkuñachu.+
י [yod]
10 Sion llajtaj* kurajkunasnenqa pampapi chʼinlla chukushanku.+
Qhashqa telata churakuspa umankuman jallpʼata qhallikushanku.*+
Jerusalenmanta doncellasqa kʼumuykukuspa pampakama umankuta chayachinku.
כ [kaf]
11 Chay jinata waqasqaypi ñawiypis niña ñawichu.+
Chʼunchulasneyqa qʼewirakushan.
Sonqoyqa maytapuni nanawan* llajtaypa warmi wawanta chay jina desgracia qhatirisqanmanta,+
wawaspis uña wawitaspis llajtaj plazasninpi llauchhiyaspa wijchʼukusqankumanta.+
ל [lámed]
12 Chay wawasqa mamasninkuta nishanku: “Mamáy, mikhunata munani, yakuta munani”,* nispa,+
llauchhiyaspataj wijchʼurakunku, imaynatachus llajtaj plazasninpi wañuy patapi kajkuna wijchʼukunku ajinata,
mamankoj makinkupitaj ñakʼayllataña samashanku.
מ [mem]
13 ¿Imaynatataj sutʼinchaykiman?
Jerusalenpa warmi wawan, ¿imawantaj kikinchaykiman?
Sion llajta,* ¿imawantaj kikinchaykiman sonqochasunaypaj?
Qhatirisunki chay desgraciaqa manchay jatun, mar qocha jinapuni.+ ¿Pitaj sanoyachisunkimanri?+
נ [nun]
14 Profetasniykeqa mosqoypi jina llulla imasta rikuspa, qhasi manakaj imasta rikuspa willasorqanku.+
Manataj juchaykita reparachisorqankuchu, reparachisunkumanchus karqa chayqa, mana waj nacionman apachikuwajchu karqa.+
Paykunaqa sigue chay llulla imasta, chay qhasi manakaj imasta willasorqanku.+
ס [sámekh]
15 Ñanta pasajkunaqa qanmanta burlakuspa makisninkuta tʼajllarikunku.+
Jerusalenpa warmi wawanta rikuspa, tʼukuspa silbarinku,+ umankutapis khiwiykacharinku, ninkutaj:
“¿Kay llajtatachu nerqanku ‘chhika sumaj kʼachitu llajta, jallpʼantinta kusichin’ nispa?”.+
פ [pe]
16 Tukuy enemigosniyki qanpa contraykita parlanku.
Paykunaqa silbarinku, kirusninkutapis kʼarurachinku, ninkutaj: “Chayqa chinkachinchej.+
Kay pʼunchaytaqa suyasharqanchejpuni.+ Chay pʼunchayqa chayamunña, rikunchejtaj”,+ nispa.
ע [ayin]
Mana khuyarispa qanta thuñisunki.+
Paymin enemigosniykiwan atipachisunki, enemigosniykitaj kusikunku. Payqa enemigosniykej kallpankuta* sinchʼiyachin.
צ [sadé]
18 Sion llajtaj* perqan, uyariy, runasqa sonqomantapacha Jehová Diosman qhaparikunku.
Waqayniykeqa tuta pʼunchay mayu jina puririchun.
Ama samariychu, ñawisniykimanta waqay surumullachunpuni.
ק [qof]
19 Sayariy, tutasnin waqay, guardiaspa turnosninku qallarejtin.
Waqaspa Jehová Diosman willakuy imachus sonqoykipi kasqanta.
Makisniykita oqharispa Diosmanta mañakuy wawasniyki kausanankupaj.
Wawasniykeqa yarqhaymanta jina tukuynin calle esquinaspi wijchʼukushanku.+
ר [resh]
20 Jehová Diosníy, qhawarimuy pitachus chay jinata castigasqaykita.
¿Warmisqa mikhuykullanqankuchu wawasninkuta? ¿Mikhuykullanqankuchu chay nacechikusqanku wawitasninkuta?+
¿Sacerdotesta, profetastapis wañuchillanqankuchu Jehová Diospa templonpi?+
ש [shin]
21 Jovenespa, kuraj runaspa wañusqa cuerposninkoqa callespi wijchʼurayashanku.+
Doncellasniyta, jovenesniytapis espadawan wañurachinku.+
Sinchʼi phiñakuyniykej pʼunchayninpi paykunata wañurachinki, mana khuyarispa chay jinata wañurachinki.+
ת [taw]
22 Mancharina imasta tukuynejmanta tantachimunki, fiesta pʼunchaypaj jina.+
Jehová Diospa phiñakuynin pʼunchaypeqa ni pi ayqerqachu, ni pi salvakorqachu.+
Enemigoyqa kantumanta tukuchin nacechikuspa uywarqani chay wawasniyta.+
א [álef]
3 Noqa rikuni imaynatachus runas ñakʼarisqankuta, Dios sinchʼita phiñakuspa castigasqanrayku.
2 Diosqa qharqowan, laqhapi purichiwan, mana kʼanchaypichu.+
3 Payqa diantinta makinta contrayta oqharin, kutin kutinta.+
ב [bet]
4 Payqa aychaytapis qaraytapis thantaykun,
tullusniytapis pʼakiran.
5 Muyuyniypi perqata ruwaykun. Jaya venenowan+ problemaswan ima muyuykuchiwan.
6 Mana munashajta laqha lugarespi japʼiwan, unayña wañusqa runasta jina.
ג [guímel]
7 Mana ayqenaypaj perqas chaupipi wisqʼaykuwan.
Cobremanta llasa cadenaswan wataykuwan.+
8 Mana ni imanakuyta atispa, qhaparispa yanapata mañakuni, paytaj mañakusqayta mana uyariyta munawanchu.+
9 Chaki purinasniyta chʼeqosqa rumiswan tapaykun.
Ñankunasniyta mana puriy atinata ruwaykun.+
ד [dálet]
10 Payqa jukumaripis kanman jina japʼinawanpaj wateqaykuwan, leonpis kanman jina pakakuspa suyaykuwan.+
11 Mana munashajta ñankunamanta orqhowan, qʼalatataj mitharawan.*
Kay jina llakiyta ruwawan.+
12 Flechana arconta* matʼirin,* flechanawanpajtaj churawan.
ה [he]
13 Flecha apaykachananmanta flechaswan riñonesniyta pasaykuchin.
14 Tukuy nacionespa asikunanku kani, diantinta takispa burlakuwanku.
15 Diosqa jaya imaswan juntʼaykuchiwan, ajenjotapis* tomachiwan.+
ו [waw]
16 Payqa tʼuna rumiswan* kirusniyta pʼakirachiwan.
Ushpha patapitaj sarurawan.+
17 Qan mana saqewankichu sonqo tiyasqa kanayta. Kusiy kausaytapis* qonqaniña.
18 Chayrayku nini: “Allinpaj qhawasqa kasqayqa chinkapun, manaña imatapis Jehová Diosmanta suyaniñachu”, nispa.
ז [zayin]
19 Diosníy, yuyarikuy llakisqa kasqayta, mana wasiyoj kasqaytapis.+ Yuyarikuy ajenjota* mikhusqayta, venenoyoj plantastapis.+
20 Noqa yachani chayta yuyarikunaykita, kʼumuykakamuspataj yanaparinawaykita.+
21 Sonqoypi chayta yuyarikuni, chayrayku pacienciakuspa suyakullasaj.+
ח [jet]
22 Jehová Diosqa munakuyninrayku* mana chinkasqatachu chinkachiwanchej.+
Khuyakuynenqa ni jaykʼaj tukukunchu.+
23 Khuyakuynenqa sapa paqarin mosojyan.+ Payqa tukuy tiempo atienekunapaj jinapuni.+
24 Noqa nerqani: “Jehová Diosmin herenciayqa,+ chayrayku pacienciakuspa suyakullasaj”,+ nispa.
ט [tet]
25 Jehová Diosqa kʼacha paypi suyakoj runawan,+ pichus mana saykʼuspa payta maskʼajwan.+
26 Jehová Diospa salvacionninta+ pacienciawan* suyakoyqa may sumajpuni.+
27 Runapajqa allinpuni joven kashaspa ñakʼarinanqa.+
י [yod]
28 Chʼinmanta sapallan tiyasqa kachun, Dios chay ñakʼariyta payman chayachimojtenqa.+
29 Qonqorikuspa siminta pampakama chayachichun.+ Ichapis salvasqaraj kanman.+
30 Maqajmanqa ujnin uyantawan jaywaykuchun. May jina pʼenqaypi rikhurichisqa kachun.
כ [kaf]
31 Jehová Diosqa mana wiñaypajchu saqerpariwasun.+
32 Ñakʼarichin chaypis, jatun munakuyninrayku khuyakullantaj.+
33 Payqa mana kusikunchu runasta llakichispa, nillataj ñakʼarichispapis.+
ל [lámed]
34 Diosqa manapuni allinpajchu qhawan kay imasta: jallpʼamanta tukuy presosta sarurayta,+
35 Aswan Patapi kaj Diospa ñaupaqenpi uj runapaj justiciata mana ruwapuyta,+
36 uj runa demandapi kashajtin justiciata mana ruwapunankupaj jarkʼaytapis.
Chay imasta Jehová Diosqa manapuni allinpajchu qhawan.
מ [mem]
37 Manachus Jehová Dios kamachinman chayqa, ¿pitaj imallapis ruwakunanta ninman, chanta chay nisqanta ruwachinman?
38 Aswan Patapi kaj Diospa siminmantaqa,
mana llojsimunmanchu allin imaswan khuska sajra imasqa.
39 ¿Runaqa quejakunanchu kanman juchasninrayku ñakʼarisqanmanta?+
נ [nun]
40 Allinta qhawarikuspa reparakuna imaynatachus purishasqanchejta,+ chantá Jehová Diosman kutirikuna.+
41 Cielopi kaj Diosmanta tukuy sonqo mañakuna, makisninchejta oqharispataj nina:+
42 “Noqaykoqa juchallikuyku, contraykita oqharikuyku,+ qantaj mana perdonawaykuchu.+
ס [sámekh]
43 Sinchʼi phiñasqa kasqaykirayku mana qayllaykamojta saqewaykuchu.+
Qhatiykachawayku, mana khuyarispataj wañuchiwayku.+
44 Qanman mana qayllaykamunaykupaj uj phuyuwan jarkʼaykuwayku, mañakuyniyku ama chayamusunanpaj.+
45 Nacionespa chaupinkupi qʼopata jina rikhurichiwayku, ni imapaj sirvejta jina”, nispa.
פ [pe]
46 Tukuy enemigosniyku contraykuta parlanku.+
47 Manchay mancharisqalla kayku, trampasllapi urmayku,+ chʼinman tukuyku, llakiytaj kashayku.+
48 Ñawisniymanta waqayqa mayus jinapuni jamurin, llajtaypa warmi wawan thuñisqa kasqanrayku.+
ע [ayin]
49 Ñawisneyqa mana saykʼuspa waqallanqapuni, mana samarispa.+
50 Ajinata waqasaj Jehová Dios cielomantapacha qhawarimuspa llajtanta rikumunankama.+
51 Llajtaypa tukuy warmi wawasninta ñakʼarishajta rikuspa mayta llakikuni.+
צ [sadé]
52 Enemigosneyqa pʼisqopis kayman jina qhasillamanta japʼiwanku.
53 Paykunaqa tʼoqopi wañuchiyta munawarqanku. Mana samarispa rumiswan chʼanqaykuwarqanku.
54 Yakoqa umaytapuni pʼampaykuwarqa, nerqanitaj: “Kaypichá wañusaj”, nispa.
ק [qof]
55 Jehová Diosníy, chay tʼoqo ukhumantapacha sutiykita oqharispa qhaparikamorqayki.+
56 Diosníy, qhaparikamusqayta uyarillaway ari. Qhaparikamushayki yanaparinawaykipaj, samarichinawaykipaj, ama mana uyarejman tukuychu ari.
57 Qhaparikamorqayki chay pʼunchay qayllaykamuwarqanki. Niwarqankitaj: “Ama manchachikuychu”, nispa.
ר [resh]
58 Jehová Diosníy, juiciopi kashajtiy kutikuwarqanki, qan salvawarqanki.+
59 Jehová Diosníy, qan rikumunki imastachus ruwawasqankuta. Ama jina kaspa justiciata ruwapuway ari.+
60 Qan rikumunki imastachus vengakuspa ruwawasqankuta, contraypi tukuy ima wakichisqankutapis.
ש [sin o shin]
61 Jehová Diosníy, qan uyarinki imaynatachus burlakuwasqankuta, contraypi tukuy imata wakichisqankutapis.+
62 Uyarillankitaj enemigosniy imastachus parlakuwasqankuta, contrayta diantinta chhichinakusqankutapis.
63 Paykunata qhawariy. Paykunaqa sayaspapis chukuspapis takispa burlakuwanku.
ת [taw]
64 Jehová Diosníy, qanmin paykunata pagachinki chay ruwasqasninkumanta.
65 Qanmin paykunata kʼullu* runasman tukuchinki. Ajinata paykunataqa maldecinki.
66 Jehová Diosníy, sinchʼi phiñakuyniykipi paykunata qhatiykachanki, kay jallpʼamantataj chinkasqata chinkachinki.
א [álef]
4 Sumajnin qoripis manaña lliphipinchu.+
Chay jinata temploj rumisnenqa+ tukuynin calle esquinaspi wijchʼukushan.+
ב [bet]
2 Sionpa munasqa wawasnintaqa, sumajnin qorita jina manchay valorniyojpaj qhawaj kanku.
Kunantaj tʼurumanta yurusta jinallaña qhawanku,
manka llutʼajpa ruwasqanta jinallaña.
ג [guímel]
3 Kʼita alqosraj uñasninkuta chuchuchinku.
Llajtaypa warmi wawantaj sajrayapun,+ chʼin lugarespi tiyan chay surisman* rijchʼakun.+
ד [dálet]
4 Ñuñoj wawitaspa qallunkupis siminkuman* kʼaskaykapun chʼakichikusqankupi.
Wawasqa tʼantata mañakunku,+ nitaj pipis jaywarinchu.+
ה [he]
5 Sumaj mikhunasta mikhoj kanku chaykunapis, mikhunamanta jina callespi wijchʼukunku.+
Puka pʼachasta churakuspa wiñarqanku chaykunapis,+ ushpha patapi wijchʼusqa kashanku.
ו [waw]
6 Llajtaypa warmi wawantaqa allin sinchʼita castiganku, ni Sodomatapis juchanmanta chay jinata castigarqankuchu.+
Sodomataqa ujllata chinkacherqanku, nitaj pipis yanaparqachu.+
ז [zayin]
7 Llajtaypa warmi wawanpa nazareosnenqa*+ ritʼimantapis aswan llimphus karqanku, lechemantapis aswan yuraj karqanku.
Cuerponkoqa coralesmantapis* aswan puka karqa. Paykunaqa zafiro rumis jina lliphipej kanku.
ח [jet]
8 Kunantaj yanamantapis* aswan yanas kanku.
Callespeqa manaña paykunata rejsinkuchu.
Aycha qarankoqa tullusninkuman kʼaskaykuspa kʼusuykapun,+ chʼaki kʼullu jinapuni.
ט [tet]
9 Espadawan wañuchisqa kajkunataqa aswan allin rin yarqhaywan wañojkunamanta nisqaqa.+
Yarqhaywan wañojkunaqa pisimanta pisi wañushanku, espadawanpis tʼojsisqa kankuman jina, campospi mana mikhuna kasqanrayku.
י [yod]
10 Khuyakoj warmispis kikin makisnillankuwantaj wawasninkuta waykʼuykunku.+
Chay wawasninkuta mikhuykunku llajtaypa warmi wawan chinkachisqa kashajtin.+
כ [kaf]
11 Jehová Diosqa sinchʼita phiñakun.
Chay laurarishaj phiñakuyninta kachaykamun.+
Sionpi ninata japʼiykuchin, cimientosninta qʼalata ruphaykuchin.+
ל [lámed]
12 Ni jallpʼamanta reyespis ni mayqen runaspis yuyarqankuchu
enemigosqa Jerusalenpa punkusninta yaykunankuta.+
מ [mem]
13 Ajina qhatirerqa profetasninpa juchasninkurayku, sacerdotesninpa pantasqasninkurayku.+
Paykunaqa chay llajta chaupipi cheqan runaspa yawarninkuta jichʼarqanku.+
נ [nun]
14 Paykunaqa ciegos jina+ callespi puriykachanku.
Yawarpuru kasqankurayku chʼichipaj qhawasqa kanku.+
Chayrayku ni pi paykunaj ropankuta llankhaykuyta atinchu.
ס [sámekh]
15 Runasqa paykunata qhaparinku: “Riychej kaymanta. Chʼichipaj qhawasqa runas. Riychej kaymanta, chinkaychej kaymanta. Ama tʼojpiwaykuchu”, nispa.
Paykunaqa mana wasiyoj rikhurinku, nitaj yachankuchu maymanchus rinankuta.
Nacionesmanta runaspis ninku: “Mana noqanchejwan khuska tiyankumanchu.+
פ [pe]
16 Paykunataqa Jehová Dios chʼeqerachin.*+
Payqa manaña allin ñawiwanchu paykunata qhawanqa.
Runasqa mana sacerdotesta respetanqankuchu,+ kuraj runastapis mana khuyanqankuchu”,+ nispa.
ע [ayin]
17 Ñawisniykoqa saykʼusqaraj kashan qhasillata yanapata mañakuspa purisqaykumanta.+
Manchaytapuni maskʼarqayku uj nacionta yanaparinawaykupaj, chay naciontaj mana salvayta atiwarqaykuchu.+
צ [sadé]
18 Enemigosqa tukuynejpi noqaykuta wateqaspa purisharqanku,+ niña plazasniykupipis purimuyta aterqaykuñachu.
Wañunayku pʼunchayqa qayllaykamunña. Kausayniykoqa tukukapun, tukuchisqa kanaykoqa chayamun.
ק [qof]
19 Qhatiykachawarqayku chaykunaqa phawaj aguilasmantapis aswan ligeros karqanku.+
Paykunaqa orqospi qhatiykachawarqayku. Chʼin pampaspitaj pakakuspa suyaykuwarqayku.
ר [resh]
20 Chay jatun tʼoqonkuman urmaykun,+ pichari kausay samayta qowaj kanchej chay, Jehová Diospa ajllakusqan.+
Paymanta nej kanchej: “Nacionespa chaupinpi, paypa llanthunpi tiyakusun”, nispa.
ש [shin]
21 Uz jallpʼapi tiyakoj Edompa+ warmi wawan, kusikuy, allinta kausakuy.
Qanmanpis copata jaywallasonqankutaj,+ qantaj machaykuspa qʼalalla purinki.+
ת [taw]
22 Sion llajta,* chay juchaykimanta castigachikusqaykeqa tukukapunña.
Payqa niña presota jina waj nacionman apachisonqachu.+
Chaywanpis Edompa warmi wawan, payqa juchaykitañataj qhawarimonqa,
juchasniykita sutʼiman orqhonqa.+
5 Jehová Diosníy, yuyarikuy kay jina llakiy qhatiriwasqaykumanta.
Qhawarimuy, rikumuytaj kay jina kʼumuykachachisqa kasqaykuta.+
2 Herenciaykutaqa mana rejsisqa runasman jaywaykunku, wasisniykutapis waj llajtayoj runasman qopunku.+
3 Mana tatayoj wajchas rikhuriyku. Mamasniykupis viudas jina kashanku.+
4 Tomanaykupajqa yakullaykutataj rantinayku tiyan.+ Kikin llantʼallaykutataj rantinayku tiyan.
5 Qhatiykachawayku chaykunaqa kunkaykumanta japʼinawaykupajña kashanku.
Manchay saykʼusqaña kashayku, ni samarikojtapis saqewaykuchu.+
6 Noqaykoqa Egiptoj+ makinman, Asiriaj+ makinman churakuyku, mikhunata* qonawaykupaj.
7 Ñaupa tatasniykoqa juchallikorqanku, paykunaqa unayña wañupunku, noqaykutaj juchasninkumanta pagashayku.
8 Kunanqa esclavospa makinpi kashayku, nitaj pipis makisninkumanta kacharichiyta atiwaykuchu.
9 Mikhunatapis kausayniykuta wañuy pataman churaspa tarikuyku,+ chʼinnejpi espadayoj runas kasqankurayku.
10 Yarqhaywan ñakʼarisqaykurayku calentura* oqhariwayku. Aycha qaraykoqa horno jinapuni rupha kashan.+
11 Warmisniykutaqa Sionpi pʼenqayta kʼumuykachachinku.* Doncellasniykutapis Judá llajtaspi kikinta ruwallankutaj.+
12 Kuraj kamachejkunataqa makinkumanta warkhorqanku,+ kurajkunatapis mana respetarqankuchu.+
13 Jovenesqa maki molinota apashanku, wawasqa ashkha llantʼata qʼepisqankupi urmashanku.
14 Kurajkunaqa niña llajta punkupichu kashanku,+ jovenespis niña takiyninkuta tocarikunkuchu.+
15 Manaña sonqoykupi kusiy kanchu, tusuykunasniykupis llakiyman tukupun.+
16 Coronapis umaykumanta urmapun. Juchallikusqaykurayku llakiy noqaykupajqa.
17 Chayrayku sonqoyku nanawayku.+
Chay imasrayku ñawisniykupis chharpuyapun.+
18 Sion orqo chʼinman tukusqanrayku,+ atojkunallaña chaypi purinku.
19 Qantajrí Jehová Diosníy, kamachina tiyanaykipi wiñaypaj tiyasqa kanki.
Gobiernoykeqa wiñaypaj wiñaynintinpaj kanqa.+
20 ¿Imajtintaj wiñaypaj qonqawaykuri? ¿Imajtintaj chay chhika unayta saqerpariwaykuri?+
21 Jehová Diosníy, qanman kutirichiwayku, noqaykutaj chay rato qanman kutinpusqayku.*+
Tukuy imapis unay tiempospi jina kachun ari.+
22 Qantajrí chejnisqata chejnikapuwayku.
Kunankamataj noqaykupaj manchay phiñasqallapuni kashanki.+
Capítulo unomanta capítulo cuatrokama llakiy takiykuna kanku. Sukʼasqataj kashan hebreo abecedariomanta letraswan.
Glosariopi sacerdote nisqata leeriy.
Hebreo parlaypeqa nin, “Sionpa warmi wawanpa”.
Chayri “tukuy rijchʼaj”.
Hebreo parlaypeqa nin, “congregacionniykiman”.
Hebreo parlaypeqa nin, “Tʼantata”.
Warmi nispaqa Jerusalén llajtamanta parlashan.
Hebreo parlaypeqa nin, “onqosqalla kani”.
Hebreo parlaypeqa nin, “Sionpa warmi wawanta”.
Hebreo parlaypeqa nin, “Judajpa warmi wawanpa”.
Hebreo parlaypeqa nin, “tukuy wajrasta kʼutorqa”.
Flechana arco: waj lugarespi ninku camba flecha.
Hebreo parlaypeqa nin, “sarurin”.
Hebreo parlaypeqa nin, “Sionpa warmi wawanpa”.
Chayri “carpanmantaj”.
Glosariopi altar nisqata leeriy.
Hebreo parlaypeqa nin, “Sionpa warmi wawanpa”.
Glosariopi profeta nisqata leeriy.
Hebreo parlaypeqa nin, “Sionpa warmi wawanpa”.
Qhalliy: waj lugarespi ninku qhallay.
Hebreo parlaypeqa nin, “Higadoyqa jallpʼaman tʼakarpakun”.
Hebreo parlaypeqa nin, “¿Maypitaj tiyan granowan vinowan?”.
Hebreo parlaypeqa nin, “Sionpa doncella wawan”.
Hebreo parlaypeqa nin, “wajrankuta”.
Hebreo parlaypeqa nin, “Sionpa warmi wawanpa”.
Mithay: waj lugarespi ninku wikhay, tʼisay. Ichá nillanmantaj “barbechasqa jallpʼata jina saqerpawan”.
Flechana arco: waj lugarespi ninku camba flecha.
Hebreo parlaypeqa nin, “sarurin”.
Glosariopi ajenjo nisqata leeriy.
Chayri “tʼiyuwan”.
Hebreo parlaypeqa nin, “Sumaj imasta”.
Glosariopi ajenjo nisqata leeriy.
Hebreo parlaypeqa niyta munan mana tukukoj munakuy, mana tukukoj kʼacha kay. Glosariopi mana tukukoj munakuy nisqata leeriy.
Hebreo parlaypeqa nin, “chʼinlla”.
Chayri “terco”.
Chayri “avestrucesman”.
Chayri “paladarninkuman”.
Glosariopi nazareo nisqata leeriy.
Glosariopi coral nisqata leeriy.
Chayri “qhechimichamantapis”.
Chʼeqerachiy: waj lugarespi ninku tʼaqarachiy.
Hebreo parlaypeqa nin, “Sionpa warmi wawan”.
Hebreo parlaypeqa nin, “tʼantata”.
Chayri “kʼaja onqoy”.
Chayri “abusanku”.
Kutinpusqayku: waj lugarespi ninku kutinpusajku.