JOEL
1 Jehová Diosqa kayta nerqa Petuelpa wawan Joelman:*
2 “Kurajkuna, kayta uyariychej.
Nacionpi tukuy tiyakojkuna, kayta uyariychej.
¿Qankunaj tiempoykichejpi kay imas karqachu?
¿Ñaupa tatasniykichejpa tiemponkupi kay imas rikukorqachu?+
3 Kay imastaqa wawasniykichejman willaychej,
wawasniykichejtaj wawasninkuman willachunku,
paykunaj wawasninkutaj wawasninkuman willachunku.
4 Jatun langostaj puchuntaqa, lijrasniyoj* langosta mikhukapun,+
lijrasniyoj langostaj puchuntataj, mana lijrasniyoj langosta mikhukapun,
mana lijrasniyoj langostaj puchuntataj, tukuy imata oqoykoj langosta mikhukapun.+
5 Machasqa runas,+ rijchʼariychej, waqaychejtaj.
Vinota tomajkuna, tukuyniykichej llakikuychej.
Imaraykuchus miskʼi vinota simiykichejmanta qhechusunkichej.+
6 Nacionniymanqa uj jatun nación juntʼaykun, mana yupay atina runasniyoj.+
Chay nacionpa kirusnenqa leonpa kirusnin jina,+ quijadanpis leonpa quijadan jina.
7 Uva sachʼaytaqa qʼalata pampacharpan, higo sachʼaytapis qʼara kʼaspillataña saqerparin.
Chay sachʼasniytaqa qʼarallata saqerparin, uj ladomantaj wijchʼurparin,
ramitasninta qʼara kʼaspillata saqerpaspa.
8 Waqarikuychej, imaynatachus uj doncella* qhashqa ropata churaykukuspa,
munasqan* wañupusqanmanta waqan ajinata.
9 Jehová Diospa wasinmanqa manaña apankuchu chʼaki mikhuy ofrendasta,+ nitaj vino ofrendastapis.+
Sacerdotesqa* llakisqa kashanku, Jehová Diospa kamachisnenqa llakisqa kashanku.
10 Chajraqa qʼala pampachasqa kashan, jallpʼapis waqashan.+
Trigoqa* qʼala pampachasqa kashan, mosoj vinopis chʼakipun, aceitepis tukukapun.+
11 Trigowan cebadawan* mana kasqanrayku,
tarpojkunaqa mana yachakunkuchu imatachus ruwanankuta, uvasta pallajkunapis waqashanku.
Chajraqa qʼala pierdesqa kashan, ni ima cosechanapaj kanchu.
12 Uva sachʼaqa chʼakipun,
higo sachʼapis qawipun.
Granadapis, palmera sachʼapis, manzana sachʼapis chʼakipun.
Campomanta tukuy sachʼas chʼakipunku.+
Kusiypis runas ukhumanta chinkapun.
13 Sacerdotes, qhashqa telaswan maytʼuykukuspa* waqaychej.*
Altarpi* sirvejkuna, waqarikuychej.+
Diosniypa kamachisnin, jamuychej, qhashqa telaswan maytʼuykukuspa kaypi sutʼiyaychej.
Imaraykuchus Diospa wasinmanqa manaña apankuchu chʼaki mikhuy ofrendasta,+ nitaj vino ofrendastapis.+
14 Ayunota ruwanankuta kamachiychej. Uj sumaj tantakuyman runasta wajyachiychej.+
Jehová Diosniykichejpa wasinpi kurajkunata tantaykuychej, nacionmanta tukuy runastawan khuska,+
chaypi Jehová Diosmanta yanapata mañakuychej.
15 Ay, chay pʼunchayqa manchay llakiy kanqa.
Jehová Diospa pʼunchaynenqa qayllapiña kashan.+
Chay pʼunchayqa Tukuy Atiyniyoj Diosmanta tukuchiy jamonqa.
16 ¿Manachu mikhunanchejqa kikin ñawisninchejwan qhawashajtinchej chinkapun?
¿Manachu Diosninchejpa wasinmantaqa kusikuypis asiriypis chinkapullantaj?
17 Paykunaj tarpusqanku mujoqa chʼakipun.*
Despensasninkupis* chʼusajpacha kashan.
Mikhuna jallchʼana wasisninkupis thuñikapun, trigo* chʼakipusqanrayku.
18 Uywaspis llakiyta waqanku.
Wakaspis tropa tropalla kayman jaqayman purinku ni imanakuyta atispa, mana pasto kasqanrayku.
Oveja tropaspis castigo kasqanrayku sufrinku.
19 ‘Jehová Diosníy, qanta qhaparikamusqayki,+
chʼin jallpʼasmanta pastota nina qʼalata ruphaykusqanrayku,
campomanta tukuy sachʼastapis nina ruphaykusqanrayku.
20 Kʼita animalespis qanta qhaparikamusunku,
yaku chʼakipusqanrayku,
chʼin jallpʼasmanta pastota nina qʼalata ruphaykusqanrayku’”.
2 “Sionpi putututa waqachiychej.+
Santo orqoypi qhapariychej maqanakuman yaykunaykichejpaj.
Nacionmanta tukuy runas kharkatichunku.
Jehová Diospa pʼunchaynin jamushan.+ Qayllapiña kashan.
2 Chay pʼunchayqa laqha kanqa, manchay laqhapuni kanqa.+
Chay pʼunchayqa phuyu juntʼa kanqa, manchay tuta laqhapuni kanqa,+
imaynatachus sutʼiyaymanta kʼanchayqa orqosllaman chayamun ajina.
Uj llajta tiyan manchay atiyniyoj, chay llajtayojkunaqa manchay ashkhapuni kanku.+
Mana jaykʼajpis chay llajta jinaqa karqachu,
nitaj jaykʼajpis kanqañachu,
wiñaypaj wiñaynintinpaj.
3 Ñaupaqentaqa tukuchej nina rin,
qhepantataj tukuy imata ruphaykoj nina rin.+
Ñaupaqenpi kaj jallpʼaqa Edén huertaman rijchʼakun,+
pasarpajtintaj, qhepanpi kaj jallpʼaqa qʼara pampa rikhurin,
ni ima paymantaqa librakunchu.
4 Paykunaqa caballosman rijchʼakunku,
guerraman rej caballos jinataj correnku.+
5 Paykunaqa rishaspa sonarinku, imaynatachus maqanakuna carretas orqos patata rishaspa sonarinku ajinata,+
imaynatachus chʼaki qhora ruphaykuspa sonarin ajinata.
Paykunaqa maqanakupaj wakichisqa atiyniyoj llajta jina kanku.+
6 Paykunanejta llajtasqa llakisqa kashanqanku.
Tukuyninkojta uyanku qʼelluman tukonqa.
7 Paykunaqa soldados jina maqanakuman yaykunku,
soldados jina perqasta wasaykunku.
Sapa ujninku cheqanta ñaupajman rinku,
nitaj ñanninkumanta wistʼuykunkuchu.
8 Paykunaqa mana tanqanakunkuchu.
Sapa ujninku cheqanta ñaupajman rinku.
Paykunamanta wakin, armaswan wañuchisqa kajtinkupis,
chay ujkunaqa cheqanta rillankupuni, mana pʼitikuspa.*
9 Paykunaqa llajtaman yaykuykunku. Paykunaqa perqa patasninta correnku,
wasi patasman wicharinku, suwas jina ventanasninta wasisman yaykuykunku.
10 Paykunaj ñaupaqenkupi jallpʼaqa kharkatitin, cielospis manchariywan ni imanakuyta atinkuchu.
Intipis killapis laqhayapunku.+
Estrellaspis niña kʼanchankuchu.
11 Jehová Diosqa soldadosninpa ñaupaqenpi jatunmanta parlanqa,+ imaraykuchus soldadosnenqa may chhika kanku.+
Parlasqanta juntʼajqa atiyniyoj.
Jehová Diospa pʼunchaynenqa manchay jatun, manchay mancharinataj.+
¿Pitaj aguantayta atinmanri?”.+
12 Jehová Diosqa nin: “Tiempo kanraj. Noqaman kutinpuychej tukuy sonqoykichejwan,+
ayunaspa,+ waqaspa, pesachikuspa ima.
13 Sonqoykichejta llikʼirakuychej,+ ama ropallaykichejtachu,+
Jehová Diosniykichejmantaj kutinpuychej.
Payqa kʼacha sonqoyoj,* khuyakuyniyoj, pacienciayoj,*+ may jina munakuyniyojtaj.*+
Payqa ujtawan qhawarenqa ima ñakʼariytachus apachimusaj nisqanta, apachimunantachus manachus.
14 ¿Pi yachan? Ichapis payqa imatachus nisqanta manaña ruwanqachu, imatachus apachimusaj nisqantapis manaña apachimonqachu.*+
Ichapis payqa bendecisonqachej,
Jehová Diosniykichejman jaywanaykichejpaj chʼaki mikhuy ofrendata, vino ofrendatapis.
15 Sionpi putututa waqachiychej.
Ayunota ruwanankuta kamachiychej. Uj sumaj tantakuyman runasta wajyachiychej.+
16 Runasta tantaykuychej. Tantakamojkunata llimphuchaychej.+
Kuraj runasta tantaykuychej. Wawasta, ñuñoj wawastapis tantaykuychej.+
Noviopis ukhu cuartonmanta llojsimuchun, noviapis puñuna cuartonmanta llojsimuchun.
17 Altarwan temploj torrenwan kashanku chay chaupipi+
sacerdotes waqachunku, Jehová Diospa kamachisnin waqachunku. Kaytataj nichunku:
‘Jehová Diosníy, llajtaykimanta khuyarikuy ari.
Ama herenciaykitaqa runaspa asikunankuman tukuchiychu ari,
llajtaykita waj naciones gobernanankuta saqespa.
¿Imaraykutaj waj naciones ninanku kasqa, “¿maytaj chay Diosninku?” nispari?’.+
18 Chaypacha Jehová Diosqa jallpʼanta imata jina jarkʼakonqa.
Payqa llajtanta khuyakonqa.+
19 Jehová Diosqa llajtanmanta runasman nenqa:
‘Kunanqa apachimushaykichej trigota,* mosoj vinota, aceitetapis.
Qankunataj chaykunawan sumajta sajsakunkichej.+
Noqaqa mana saqesajchu naciones qankunamanta sigue asikunankuta.+
20 Norte ladomanta* jamojtaqa qankunamanta karuman apasaj.
Paytaqa ayqechisaj tʼajra chʼin jallpʼaman.
Paypa punterosnintaqa* inti llojsimuy ladopi kaj mar qochaman* ayqechisaj.
Qhepapi kajkunatataj inti yaykuy ladopi kaj mar qochaman* ayqechisaj.
Millayta qʼapasqanqa pataman wicharenqa.
Millayta asnasqanqa pataman wicharillanqapuni.+
Diosmin jatuchaj imasta ruwanqa’, nispa.
21 Jallpʼa, ama manchachikuychu.
Astawanpis kusirikuy, asirikuy, imaraykuchus Jehová Diosqa jatuchaj imasta ruwanqa.
22 Campo animales, qankunapis ama manchachikuychejchu.
Higo sachʼapis uva sachʼapis allin cargasqata poqonqanku.+
23 Sionpa wawasnin, qankunapis kusirikuychej, asirikuychejtaj Jehová Diosniykichejrayku.+
Payqa ñaupaj parasta necesitakusqanman jina parachinpusonqachej.
Payqa sumajta parachinpusonqachej,
ñaupaj parasta, qhepa parastapis, ñaupa tiempospi jina.+
24 Erasqa* chʼuwachasqa trigowan* juntʼa kanqa.
Uva sarunamantapis mosoj vino wasaykurimonqa, jinallataj aceitepis.+
25 Pasaj wataspi mana oqharisqaykichej cosechasta kutichipusqaykichej,
mayqenkunatachus mikhukaporqanku, lijrasniyoj* langostas, mana lijrasniyoj langostas, jatun langostas, tukuy imata oqoykoj langostas ima chaykunata.
Chaykunataqa noqa kachamorqani may chhika soldadosta jina.+
Paymin qankunapaj tʼukuna imasta ruwarqa.
Llajtayqa niña ujtawan pʼenqaypi rikhurenqachu.+
27 Qankunataj yachankichej noqa israelitas chaupipi kashasqayta,+
noqataj Jehová Diosniykichej kasqayta,+ mana waj kanchu.
Llajtayqa niña ujtawan pʼenqaypi rikhurenqachu.
28 Chantá tukuy laya* runasman espirituyta tʼakaykamusaj.+
Qhari wawasniykichej, warmi wawasniykichejpis profetas* jina parlanqanku.
Kuraj runasniykichejqa mosqokonqanku,
jovenesniykichejpis mosqoypi jina rikonqanku.+
29 Chay pʼunchaykunapeqa esclavosniymanpis esclavasniymanpis
espirituyta tʼakaykamusaj.
30 Cielopipis jallpʼapipis tʼukuna imasta ruwasaj.
Chaypi kanqa yawar, nina, oqharikushaj qʼoshñi ima.+
31 Inteqa laqhayaykonqa, killapis yawarman tukonqa,+
manaraj Jehová Diospa mancharina jatun pʼunchaynin chayamushajtin.+
32 Jehová Diospa sutinta tukuy oqharejkunaqa salvasqa kanqanku.+
Ayqekojkunaqa Sion orqopi, Jerusalenpi ima kashanqanku,+ Jehová Dios nerqa jina.
Paykunaqa salvakojkuna ukhupi kashanqanku, pikunatachus Jehová Dios wajyan chaykuna ukhupi”, nispa.
3 “Qhawaychej, chay pʼunchaykunapi, chay tiempopipis,
maypachachus Judamanta, Jerusalenmantawan preso apasqa kajkunata kutichimusaj chaypacha,+
2 noqaqa tukuy nacionesta tantaykusaj.
Paykunataqa Jehosafat* ura pampaman uraykuchisaj.
Chaypi paykunataqa juzgasaj,+
Israel llajtayta, noqaj herenciayta imatachus ruwaykusqankumanta.
3 Paykunaqa suertesta* choqaspa llajtayta partinakorqanku.+
Paykunaqa khuchi warmiwan* puñuykunankupaj uj lloqallituta vendej kanku.
Vinota tomanankupajtaj uj imillitata vendej kanku.
4 Tiro, Sidón, qankunapis filisteospa jallpʼasnin,
¿imajtintaj contraypi kashankichejri?
¿Imamantataj vengakushawankichejri?
Noqamanta vengakushawankichej chayqa,
noqaqa usqhayllata, chay ratotaj chay vengakusqaykichejta qankunallamantaj chayachimusqaykichej.+
5 Chayta ruwasaj qolqe metalniyta, qoriyta apakapusqaykichejrayku,+
aswan sumaj valorniyoj imasniyta templosniykichejman apaykusqaykichejrayku.
6 Qankunaqa Judapi, Jerusalenpi tiyakojkunata griegosman vendeykorqankichej,+
jallpʼankumanta karunchachinaykichejpaj.
7 Chaywanpis noqaqa paykunata kutichimusaj, may lugaresmanchus vendespa apacherqankichej chay lugaresmanta.+
Chay vengakusqaykichejtaqa qankunallamantaj chayachimusqaykichej.
8 Qhari wawasniykichejta, warmi wawasniykichejtapis Judamanta runasman vendeykusaj,+
paykunataj wawasniykichejta Sabamanta runasman vendenqanku, may karu nacionmanta runasman.
Jehová Diosmin chayta nin.
9 Naciones ukhupi kayta willamuychej:+
‘Guerrapaj wakichikuychej. Wapu soldadosniykichejta wajyachiychej.
Tukuy soldados tantakamuchunku. Maqanakuman puririchunku.+
10 Arado rejasniykichejta espadasman tukuchiychej, josesniykichejtapis tʼojsina lanzasman tukuchiychej.
Pisi kallpayoj runaqa nichun: “Kallpayoj kani”, nispa.
11 Qankuna, qayllapi kaj naciones, tukuyniykichej jamuspa yanapanakuychej. Tukuyniykichej tantakuychej’,+ nispa”.
Jehová Diosníy, wapu soldadosniykita chay lugarman uraykuchimuy.
12 “Nacionesqa oqharikuspa Jehosafat ura pampaman richunku.
Chaypi noqaqa tiyaykukusaj, qayllapi kaj tukuy nacionesta juzganaypaj.+
13 Chajrasqa poqosqaña kashanku, josewan ruthuychej.
Uva sarunaqa uvaswan juntʼa kashan, saroj uraykamuychej.+
Uva sarunasqa juntʼita kashanku, sajra ruwasqasninku ashkha kasqanrayku.
14 May chhika runas, may ashkha runaspuni kashanku Juzgana ura pampapi.
Jehová Diospa pʼunchaynenqa Juzgana ura pampaman chayamonqaña.+
15 Intipis killapis laqhayaponqanku.
Estrellaspis niña kʼanchanqankuchu.
16 Jehová Diosqa Sionmantapacha león jina qhaparirimonqa,
Jerusalenmantapacha jatunmanta parlamonqa.
Chaypacha cielowan jallpʼawanqa manchariywan ni imanakuyta atenqankuchu.
Jehová Diostajrí llajtanpaj pakakunan kanqa,+
Israel nacionpaj jarkʼachasqa lugarnin kanqa.
17 Qankunaqa chaypacha yachankichej noqa Jehová Diosniykichej kasqayta, Sion santo orqoypitaj tiyakusqayta.+
Jerusalenqa santo lugar kanqa.+
Chayrayku waj llajtayoj runasqa* niña jaykʼajpis chayninta pasanqankuchu.+
18 Chay pʼunchayqa orqosmanta miskʼi vino sutʼurimonqa.*+
Lomasmantapis lecheqa yaku jina uraykurimonqa.
Judá nacionpa tukuy mayusnintataj yaku correrenqa.
Jehová Diospa wasinmantaqa yaku phullchirimonqa,+
chay yakutaj Acacias wayqʼota qarpanqa.
19 Egiptoqa chʼin lugarman tukonqa.+
Edompis tʼajra chʼin jallpʼaman tukonqa.+
Chayqa kanqa Judá nacionta mana khuyarispa ñakʼarichisqankurayku,+
Judá jallpʼapi mana juchayoj runaspa yawarninkuta jichʼasqankurayku.+
20 Judá nacionpitajrí runas tiyakullanqankupuni.
Jerusalenpipis runas tiyakullanqankupuni, wiñaypaj wiñaynintinpaj.+
21 Paykunataqa mana juchayojpaj qhawasaj, ñaupajta mana ajinatachu paykunata qhawarqani chaypis.+
Jehová Diostaj Sionpi tiyakonqa”.+
Joel suteqa niyta munan Jehovamin Diosqa.
Lijra: waj lugarespi ninku ala.
Chayri “uj sipas”.
Chayri “qosan”.
Glosariopi sacerdote nisqata leeriy.
Ichá kallanmantaj karqa “cebada”.
Cebada: waj lugarespi ninku grano.
Hebreo parlaypeqa nin, “wataykukuspa”.
Chayri “pechoykichejta takakuychej”.
Glosariopi altar nisqata leeriy.
Chayri “palasninku urapi chʼakipun”.
Chayri “Jallchʼana wasisninkupis”.
Ichá kallanmantaj karqa “cebada”.
Pʼitiy: waj lugarespi ninku tʼipiy.
Kʼacha sonqoyoj: waj lugarespi ninku jatun sonqoyoj.
Chayri “mana usqhayllata phiñarparikoj”.
Hebreo parlaypeqa niyta munan mana tukukoj munakuy, mana tukukoj kʼacha kay. Glosariopi mana tukukoj munakuy nisqata leeriy.
Chayri “apachimusaj nisqanmantapis pesachikonqa”.
Ichá kallanmantaj karqa “cebada”.
Chayri “Pata ladomanta”.
Hebreo parlaypeqa nin, “Uyanqa”.
Chay mar qochaqa sutikun Wañusqa qocha.
Chay marqa sutikun mar Mediterráneo.
Glosariopi era nisqata leeriy.
Ichá kallanmantaj karqa “cebada”.
Lijra: waj lugarespi ninku ala.
Chayri “tukuy rijchʼaj”.
Glosariopi profeta nisqata leeriy.
Jehosafat suteqa niyta munan Jehovamin juezqa.
Chʼeqerachiy: waj lugarespi ninku tʼaqarachiy.
Glosariopi suerte nisqata leeriy.
Khuchi warmi nispaqa parlashan qhariswan puñuykoj warmimanta, astawanqa qolqerayku.
Chayri “mana rejsisqa runasqa”.
Sutʼuy: waj lugarespi ninku chʼaqay.