AMÓS
1 Kay kashan Amospa* parlasqasnin. Amosqa Tecoapi+ ovejasta uywajkunamanta ujnin karqa. Kay palabrasqa payman willasqa karqa uj mosqoypi jina, imachus Israelta qhatirinanmanta. Kay palabrasqa payman willasqa karqa, terremotomanta iskay watas ñaupajta,+ Judamanta rey Uziaspa+ tiemponpi, chantá Israelmanta rey Jeroboanpa+ tiemponpi, pichus Joaspa+ wawan karqa chaypa tiemponpi. 2 Amosqa nerqa:
“Jehová Diosqa Sionmantapacha león jina qhaparirimonqa.
Jerusalenmantapacha jatunmanta qhaparirimonqa.
Michejkunajpa pastosninkoqa chʼakiponqanku,
Carmelo orqo puntapis chʼakiponqa”,+ nispa.
3 “Jehová Diosqa kayta nin:
‘“Damasco kinsa kutista oqharikusqanrayku,* tawa kutista oqharikusqanrayku, imatachus nisqayta ruwasajpuni.
Paykunaqa Galaadta trillarqanku fierro trillanaswan.+
4 Chayrayku Hazaelpa+ wasinta ninawan japʼiykuchisaj.
Chay ninataj Ben-Hadadpa sumaj ruwasqa torresninta ruphaykonqa.+
5 Damascoj punku trancanasninta pʼakirasaj.+
Bicat-Avenpi tiyakojkunata chinkachisaj.
Bet-Edenpi kamachejtapis* chinkachillasajtaj.
Chantá Siriapi tiyakojkunaqa Quirman presos apasqa kanqanku”,+ nispa nin Jehová Diosqa’.
6 Jehová Diosqa kayta nin:
‘“Gaza kinsa kutista oqharikusqanrayku,+ tawa kutista oqharikusqanrayku, imatachus nisqayta ruwasajpuni.
Imaraykuchus paykunaqa uj grupotapuni presosta apakaporqanku,+ Edommantaj jaywaykorqanku.
7 Chayrayku Gazaj+ perqasninta ninawan japʼiykuchisaj.
Chay ninataj sumaj ruwasqa torresninta ruphaykonqa.
8 Asdodpi+ tiyakojkunata chinkachisaj.
Asquelonpi kamachejtapis* chinkachillasajtaj.+
Chantá Ecronpa contranta makiyta oqharisaj,+
filisteosmanta puchojkunataj tukuchisqa kanqanku”,+ nispa nin Tukuyta Kamachej Señor Jehová Diosqa’.
9 Jehová Diosqa kayta nin:
‘Tiro kinsa kutista oqharikusqanrayku,+ tawa kutista oqharikusqanrayku, imatachus nisqayta ruwasajpuni.
Imaraykuchus paykunaqa presos apasqa kajkunamanta uj grupotapuni Edomman jaywaykorqanku.
Paykunaqa mana yuyarikorqankuchu hermanospura trato ruwasqankumanta.+
10 Chayrayku Tiroj perqasninta ninawan japʼiykuchisaj.
Chay ninataj sumaj ruwasqa torresninta ruphaykonqa’,+ nispa.
11 Jehová Diosqa kayta nin:
‘Edom kinsa kutista oqharikusqanrayku,+ tawa kutista oqharikusqanrayku, imatachus nisqayta ruwasajpuni.
Payqa kikin hermanonta espadawan qhatiykorqa,+
manataj khuyakuyta munarqachu.
Payqa sinchʼita phiñakusqanrayku mana khuyakuspa paykunata mitharashallanpuni,*
paykunapajtaj phiñasqallapuni kashan.+
12 Chayrayku Temanta+ ninawan japʼiykuchisaj.
Chay ninataj Bozraj sumaj ruwasqa torresninta ruphaykonqa’,+ nispa.
13 Jehová Diosqa kayta nin:
‘“Ammonitas kinsa kutista oqharikusqankurayku,+ tawa kutista oqharikusqankurayku, imatachus nisqayta ruwasajpuni.
Paykunaqa jallpʼasninkuta jatunyachinankupaj, Galaadmanta onqoj warmispa wijsasninkuta phatacherqanku.+
14 Chayrayku Rabaj+ perqasninta ninawan japʼiykuchisaj.
Chay ninataj sumaj ruwasqa torresninta ruphaykonqa.
Maqanakuna pʼunchaypeqa guerraman yaykunankupaj uj qhapariy uyarikonqa.
Muyoj wayra kanqa chay pʼunchaypeqa sinchʼi wayra kanqa.
15 Reyninkutaj kuraj kamachisninwan khuska preso apasqa kanqa”,+ nispa nin Jehová Diosqa’.
2 ”Jehová Diosqa kayta nin:
‘“Moab kinsa kutista oqharikusqanrayku,*+ tawa kutista oqharikusqanrayku, imatachus nisqayta ruwasajpuni.
Payqa Edommanta reypa tullusninta ruphaykucherqa calman tukuchinanpaj.
2 Chayrayku Moabta ninawan japʼiykuchisaj.
Chay ninataj Queriyotpa+ sumaj ruwasqa torresninta ruphaykonqa.
Moabqa chʼajwa chaupipi wañonqa,
maqanakuman yaykunankupaj qhaparishajtinku, pututu waqashajtin.+
3 Paykunaj chaupinkumanta kamachejta* chinkachisaj.
Tukuynin kuraj kamachejkunasnintataj paytawan khuska wañurachisaj”,+ nispa nin Jehová Diosqa’.
4 Jehová Diosqa kayta nin:
‘Judá kinsa kutista oqharikusqanrayku,+ tawa kutista oqharikusqanrayku, imatachus nisqayta ruwasajpuni.
Paykunaqa Jehová Diospa leyninta qhesacharqanku,
kamachisqasnintapis mana kasukorqankuchu.+
Paykunataqa pantaykucherqa ñaupa tatasninku creerqanku chay llulleriosllataj.+
5 Chayrayku Judata ninawan japʼiykuchisaj.
Chay ninataj Jerusalenpa sumaj ruwasqa torresninta ruphaykonqa’,+ nispa.
6 Jehová Diosqa kayta nin:
‘Israel kinsa kutista oqharikusqanrayku,+ tawa kutista oqharikusqanrayku, imatachus nisqayta ruwasajpuni.
7 Paykunaqa pobre runaspa umankuta pampapi sarunku jallpʼatawan khuska,+
llampʼu sonqoyoj runaspa ñanninkutapis wisqʼaykunku.+
Paykunaqa santo sutiyta chʼichichanku
tatantaj wawantaj kikin sipaswan puñuykuspa.
8 Paykunaqa prenda japʼisqanku ropa patapi siriykunku,*+ tukuynin altares qayllapi,+
diosesninkoj templonpi tomanku chay vinotapis, multata orqhosqanku qolqewan rantinku’, nispa.
9 ‘Jinapis noqa tukucherqani tukuynin amorreosta paykunaj ñaupaqenkumanta.+
Amorreosqa cedro sachʼas jina altos karqanku, roble sachʼas jina kallpasapas karqanku.
Noqatajrí patapi kaj poqoykunasninta chinkacherqani, jallpʼa ukhupi kaj saphisnintapis.+
10 Noqa qankunataqa Egipto jallpʼamanta orqhomorqaykichej,+
chʼin jallpʼapitaj 40 watasta puricherqaykichej,+
amorreospa jallpʼasninkuta japʼikapunaykichejpaj.
11 Wakin wawasniykichejtaqa profetas* kanankupaj churarqani.+
Wakin jovenesniykichejtataj nazareos* kanankupaj churarqani.+
Israel nación, ¿chayqa ajinacharí?’, nispa nin Jehová Diosqa.
12 ‘Qankunatajrí nazareosman vinota tomachej kankichej.+
Profetasmantaj, “ama Diospa sutinpi willaychejchu” nispa kamachej kankichej.+
13 Qankunataqa maypi kajtiykichejpis pʼaltarpasqaykichej,
imaynatachus trigo* ruthusqawan cargasqa carreta imatapis saruspa pʼaltarparin ajinata.
14 Sumajta correyta yachajqa mana maymanpis ayqeyta atenqachu.+
Kallpasapa runapis mana kallpayoj rikhurenqa,
nitaj mayqen soldadopis salvakonqachu.
15 Flechana arcoyoj* soldadoqa mana puestonpi qhepakonqachu.
May apurayta correjpis mana ayqekonqachu.
Caballopi purej soldadopis mana salvakonqachu.
16 Chay pʼunchayqa aswan wapu soldadopis
qʼalalla ayqekonqa’,+ nispa nin Jehová Diosqa”.
3 “Israel nacionmanta kajkuna, uyariychej imatachus Jehová Dios qankunamanta nisqanta, tukuy pikunatachus Egipto jallpʼamanta orqhomorqa chay familiamanta kajkuna:
2 ‘Kay jallpʼapi tukuy familiasmantaqa qankunallata rejserqaykichej.+
Chayrayku cuentata mañasqaykichej tukuy pantasqasniykichejmanta.+
3 ¿Iskay runas khuska purillankumanchu, tinkunankupaj mana ñaupajmanta parlarikuspalla?
4 ¿Uj león montepi qhaparirinmanchu mana imapis japʼinanpaj kajtin?
¿Maltón leonpis juskʼunmantapacha qhaparimunmanchu mana ni imata japʼispalla?
5 ¿Uj pʼisqo trampawan japʼichikunmanchu mana pipis trampata churajtin?*
¿Trampaqa wisqʼakunmanchu mana imata japʼispalla?
6 Llajtapi pututu waqajtin, ¿manachu runasqa manchariywan kharkatitinku?
Llajtapi jatun llakiy kajtenqa, ¿manachu Jehová Dios chayta apachimun?
7 Tukuyta Kamachej Señor Jehová Diosqa mana imatapis ruwanqachu,
imatachus ruwayta munasqanta* profetasninman mana willaspallaqa.+
8 Leonqa qhaparirimun,+ ¿pitaj mana manchikonqachuri?
Tukuyta Kamachej Señor Jehová Diosqa parlamun, ¿mayqen profetataj chʼinlla kakunmanri?’.+
9 ‘Asdodpa sumaj ruwasqa torresninpi willamuychej.
Egipto jallpʼaj sumaj ruwasqa torresninpipis willamuychej.
Kayta nimuychej: “Samaria orqospa contranpi tantakuychej.+
Rikuychejtaj imachus chaypi kasqanta.
Chaypeqa tukuy ladospi tiyan chʼajwas, chʼaukiyanakuy ima.*+
10 Paykunaqa allin kajta mana ruwayta yachankuchu.
Paykunaqa sumaj ruwasqa torresninkupi qhapaj imasta waqaychanku, kallpankuman atienekuspa qhechusqankuta, wajkunata tukuchispa qhechusqankutawan”, nispa nin Jehová Diosqa’.
11 Chayrayku Tukuyta Kamachej Señor Jehová Diosqa kayta nin:
‘Nacionta uj enemigo muyuykonqa.+
Payqa kallpaykita qhechusonqa,
sumaj ruwasqa torresniykipis saqueasqa kanqa’,+ nispa.
12 Jehová Diosqa kayta nin:
‘Imaynatachus ovejasta michejqa, leonpa siminmanta ovejitanpa iskay chakisnillantaña chayri ninrej puntallantaña qhechun,
ajinallatataj Israel nacionmanta kajkunapis pisilla salvasqa kanqanku.
Paykunaqa Samariapi kashanku sumachaj camaspi sirisqas,* sumachaj tiyanaspi* tiyasqas’.+
13 Angelespa kamachejnin, Tukuyta Kamachej Señor Jehová Diosqa nin: ‘Uyariychej, Jacobpa mirayninmantaj willaychej’,* nispa.
14 ‘Ima pʼunchaychus Israelpa tukuy juchasninmanta* cuentata mañasaj chay pʼunchayqa,+
Betelpa altaresninmantapis cuentata mañallasajtaj.+
Altarpa wajrasnenqa kʼutusqa kanqanku, pampamantaj urmanqanku.+
15 Noqa urmachisaj chiri tiempopaj ruwasqa wasita, jinallataj qʼoñi tiempopaj ruwasqa wasitapis’.
‘Marfilmanta ruwasqa wasisqa thuñisqa kanqanku,+
jatuchaj wasispis* chinkachisqas kanqanku’,+ nispa nin Jehová Diosqa”.
4 “Basanmanta wakas, kayta uyariychej,
pikunachus Samaria orqopi kashankichej chaykuna.+
Qankuna warmis, uyariychej, pikunachus pisichikojkunata engañankichej,+ wajcha runatapis sarunkichej chaykuna.
Qankunaqa qosasniykichejta* ninkichej: ‘Imallatapis tomanaykupaj apamuwayku’, nispa.
2 Tukuyta Kamachej Señor Jehová Diosqa santo kasqanrayku kayta juran:
‘“Pʼunchaykuna qayllamushan, chaypacha qankunaqa carniceroj ganchosninwan warkhusqa kankichej,
qankunamanta puchojkunataj anzueloswan warkhusqa kanqanku.
3 Qankunaqa sapa ujniykichej ñaupaqeykichejpi kaj perqa qʼasanta llojsinkichej.
Qankunaqa Harmonman wijchʼusqa kankichej”, nispa nin Jehová Diosqa’.
4 ‘Betelman jamuychej, contraypitaj oqharikuychej.*+
Guilgalman jamuychej, astawantaj contraypi oqharikuychej.+
Tutamanta apamuychej uywa wañuchisqa jaywanasta,+
kinsa dianmantaj apamuychej sapa chunka imasniykichejmanta ujta.*+
5 Levadurayoj tʼantata qʼolachiychej* agradecekunapaj ofrendata jina.+
Tukuy sonqo apamusqaykichej ofrendasmanta tukuyman willarakuychej.
Israel nacionmanta kajkuna, qankunamanqa chayta ruway gustasunkichej’, nispa nin Tukuyta Kamachej Señor Jehová Diosqa.
6 ‘Noqaqa tukuynin llajtasniykichejpi mana imatapis mikhunaykichejpaj qorqaykichejchu.
Tukuynin wasispipis tʼantata pisicherqani.+
Qankunatajrí mana noqaman kutimorqankichejchu’,+ nispa nin Jehová Diosqa.
7 ‘Chantapis noqaqa cosechapaj kinsa killa faltashajtin mana parachimorqanichu.+
Uj llajtapi paracherqani, waj llajtapitaj mana.
Paraqa jallpʼaj uj cheqallanta qarpaj,
mana paraj chayasqan cheqataj chʼakipoj.
8 Runasqa iskay chayri kinsa llajtasmanta chankaykachaspa* rej kanku waj llajtaman chaypi yakuta tomanankupaj,+
manataj chʼakiyninku kitakojchu.
Qankunatajrí mana noqaman kutimorqankichejchu’,+ nispa nin Jehová Diosqa.
9 ‘Qankunataqa castigarqaykichej sinchʼita ruphachimuspa, chajrasniykichejman onqoyta apachimuspa ima.+
Qankunaqa huertasniykichejta ashkhayacherqankichej, jinallataj uva huertasniykichejtapis.
Jinapis langostas mikhukaporqanku higo sachʼasniykichejta, olivo sachʼasniykichejtapis.+
Qankunatajrí ni chaywanpis noqaman kutimorqankichejchu’,+ nispa nin Jehová Diosqa.
10 ‘Egiptopi purerqa chay onqoyllatataj qankunaman apachimorqani.+
Jovenesniykichejtaqa espadawan wañucherqani,+ caballosniykichejtapis japʼikaporqani.+
Campamentosniykichej* millayta asnasqantapis senqaykichejkama chayachimorqani.+
Qankunatajrí mana noqaman kutimorqankichejchu’, nispa nin Jehová Diosqa.
11 ‘Sonqo nanayta phiriykorqaykichej,
imaynatachus Sodomata, Gomorratawan ruwarqani ajinata.+
Qankunataj ninamanta orqhosqa llantʼa jina karqankichej.
Jinapis mana noqaman kutimorqankichejchu’,+ nispa nin Jehová Diosqa.
12 Israel, ajinata qantaqa ruwaykusqayki.
Israel, ajinata ruwasunay kasqanrayku,
wakichikuy Diosniykiwan tinkunaykipaj.
13 Qhawariy, Diosmin orqosta ruwarqa,+ jinallataj wayratapis.+
Paymin runamanqa willan imatachus sonqonpi yuyasqanta.
Paymin sutʼiyay kʼanchayta laqhaman tukuchin.+
Paymin jallpʼaj pata lugaresninta saruran.+
Paypa sutenqa angelesta kamachej Jehová Dios”.
5 “Israelitas, kayta uyariychej. Kay palabrastaqa uj llakiy takiyta jina contraykichejpi takisaj:
2 ‘Doncella Israelqa urman,
niñataj watejmanta sayariyta atinchu.
Paytaqa kikin jallpʼallanpitaj wijchʼusqata saqenku.
Mana kanchu pipis payta aysarejqa’.
3 ”Tukuyta Kamachej Señor Jehová Diosqa kayta nin:
‘Waranqa soldadoswan maqanakuman llojsej llajtaqa, pachaj soldadosllawanña qhepakonqa.
Pachaj soldadoswan maqanakuman llojsej llajtataj, chunka soldadosllawanña qhepakonqa. Ajina pasanqa israelitaswan’,+ nispa.
4 ”Jehová Diosqa kayta nin israelitasman:
‘Maskʼawaychej, kausallaychejpunitaj.+
5 Ama Betel ladoman riychejchu.*+
Ama Guilgalman riychejchu,+ nitaj Beer-Sebamanpis chimpaychejchu.+
6 Jehová Diosta maskʼaychej, kausallaychejpunitaj.+
Manachus chayta ruwankichej chayqa, payqa phiñakuspa nina jina Josej mirayninta ruphaykonqa.
Chay ninaqa Betelta ruphaykonqa, nitaj pipis wañuchiyta atenqachu.
7 Qankunaqa justiciata ajenjo jina* jayaman tukuchinkichej.
Cheqan kajtataj pampaman wijchʼunkichej.+
Paymin sinchʼi laqhata sutʼiyay kʼanchayman tukuchin.
Paymin pʼunchayta laqhaman tukuchin tutapis kanman jina.+
Paymin mar qocha yakusta tantaykun
jallpʼa pataman jichʼaykamunanpaj...+
9 Payqa ujllata kallpasapa runasta tukuchenqa.
Ajinamanta sumaj perqasniyoj lugaresta tukuchenqa.
10 Paykunaqa chejnikunku llajta punkupi juzganku chaykunata.
Mana llullakuspa parlajkunatapis chejnikullankutaj.+
11 Qankunaqa pobre runasmanta alquilerta* cobrankichej jallpʼapi tarpusqankumanta.
Trigonkutataj* impuestota jina japʼikapunkichej.+
Chayrayku qankunaqa manaña tiyankichejchu kʼutusqa rumiswan ruwasqa wasisniykichejpi.+
Nitaj sumaj uva huertasniykichejmanta vinotapis tomankichejchu.+
12 Noqaqa yachani may chhika kutistachus contrayta oqharikusqaykichejta,*
may jina sinchʼitachus juchallikusqaykichejtapis.
Qankunaqa cheqan runasta kʼumuykachachinkichej,
llukʼiyta japʼikunkichej,*
pobre runapajpis llajta punkupi mana justiciata ruwapuyta munankichejchu.+
13 Chayrayku allin yuyayniyoj kajkunaqa chay tiempopi chʼinlla kanqanku.
Imaraykuchus chay tiempoqa ñakʼariy tiempo kanqa.+
Chantá angelesta kamachej Jehová Diosqa qankunawan kanqa,
imaynatachus qankunawan kashasqanta ninkichej ajinata.+
15 Sajra kajta chejnikuychej, allin kajtataj munakuychej.+
Llajta punkupeqa justicia ruwakuchun.+
Ichapis ajinamanta angelesta kamachej Jehová Diosqa,
Josej mirayninmanta puchojkunata khuyakonqa’.+
16 ”Chayrayku angelesta kamachej Jehová Diosqa kayta nin, Jehovaqa kayta nin:
‘Tukuynin plazasninpi waqanqanku.
Tukuynin callesninpi “ay, ay” nenqanku.
Tarpoj runasta wajyanqanku llakikunankupaj.
Waqasqankumanta cobraj runastataj wajyanqanku llakiyta waqanankupaj’.
17 ‘Tukuynin uva huertaspi llakiyta waqanqanku,+
imaraykuchus noqa chaupiykita pasasaj’, nispa nin Jehová Diosqa.
18 ‘Ay, imanallanqankuchus Jehová Diospa pʼunchayninta mayta suyakojkunaqa.+
¿Imaynataj qankunapaj kanqa Jehová Diospa pʼunchaynin?+
Chay pʼunchayqa laqha kanqa kʼanchay kananmantaqa.+
19 Chay pʼunchayqa kanqa, imaynachus uj runa leonmanta ayqekuspa jukumariwanñataj tinkukun ajina.
Wasinman yaykojtintaj, makinwan perqaman arrimarikushajtin, katariñataj khanirparin ajina.
20 Jehová Diospa pʼunchayninpi kʼanchay kananmantaqa, laqhalla kanqa,
sutʼi kananmantaqa, llanthulla kanqa.
21 Noqaqa fiestasniykichejta chejnikuni, millaypajtaj qhawani.+
Sumaj tantakuykunasniykichejpi ofrendasniykichejpa qʼapaynintapis millachikuni.
Khuska mikhurikuy ofrendata jina sumaj wirayachisqa uywata jaywawajtiykichejpis, manapuni japʼikusqaykichejchu.+
23 Amaña uyarichiwaychejchu chay chʼajwaspa takisqaykichejta.
Amaña uyarichiwaychejchu chay cuerdasniyoj tocanaswan tocasqaykichejta.+
24 Justiciaqa yaku jina correrichun.+
Cheqan kajtaj mayumanta yaku jina mana tukukoj kachun.
25 Israelitas, qankunaqa chʼin jallpʼaspi 40 watasta kashaspa,
¿apamuwarqankichejchu uywa wañuchisqasta, ofrendastapis?+
26 Kunanqa apakapunaykichej tiyan reyniykichej Sakutta, Kevantawan.
Chay santostaqa qankuna ruwakorqankichej diosniykichejpa estrellanman rijchʼakojta.
27 Chantá noqa presosta apachisqaykichej Damascomanta aswan karuman’,+ nispa nin Jehová sutiyoj Diosqa, paymin angelesta kamachejqa”.+
6 “Ay, imanallanqankuchus Sionpi tiyakojkunaqa, paykunaqa paykunallapi atienekunku.*
Imanallanqankuchus Samaria orqopi ni imata manchachikuspa tiyakojkunapis,+
paykunaqa sumaj rejsisqa nacionmanta manchay atiyniyoj runas kanku,
chay runaspi israelitasqa atienekunku.
2 Calné jallpʼaman chimpaspa qhawamuychej.
Chay lugarmantataj Jatun Hamat llajtaman riychej,+
chantá filisteospa Gat llajtankuman uraykuychej.
¿Chay llajtasqa aswan sumajchu kanku kay gobiernosmanta* nisqaqa?
¿Paykunaj jallpʼasninkoqa aswan jatuchajchu kanku jallpʼasniykichejmanta nisqaqa?
3 Qankunaqa mana piensayta munankichejchu ñakʼariy pʼunchay chayamunanpi,+
astawanqa ñakʼarichej gobiernos yaykunankuta munankichej.+
4 Qankunaqa aswan sumaj carnerosta* mikhurispa, sumaj wira torillosta ima mikhurispa+
marfilmanta+ ruwasqa camaspi siririkunkichej,* sumachaj tiyanaspitaj aysarikunkichej.+
5 Qankunaqa arpaj waqasqanta uyarispa takiykunata rikhurichinkichej.+
Chantá David jina waj clase tocanasta rikhurichinkichej.+
6 Qankunaqa jatuchaj copaspi vinota tomarikunkichej,+
aswan sumachaj aceiteswantaj cuerpoykichejta jawirikunkichej.
Manataj llakikunkichejchu imachus Joseta qhatirisqanmanta.+
7 Chayrayku qankunaqa presos apasqa kankichej, pikunachus presos apasqa kashanku chaykunaj ñaupaqenkuta.+
Sumachaj tiyanasninkupi aysarikojkunaj fiestankutaj tukukaponqa.
8 Angelesta kamachej Jehová Diosqa kayta nin: ‘Tukuyta Kamachej Señor Jehová Diosqa sutinrayku juran:+
“Jacob wapuykachasqanta chejnikuni,+
sumaj ruwasqa torresnintapis mana rikuyta munanichu,+
llajtataqa noqa enemigosninman jaywaykusaj, llajtapi tukuy ima kajtawan khuska.+
9 ”’”Sichus chunka runas uj wasipi qhepakunkuman chayqa, paykunapis wañullanqankutaj. 10 Paykunaj parientenkutaj* jamonqa apakapunanpaj, ujmanta uj ruphachinanpaj. Payqa wasi ukhumanta tullusninkuta orqhomonqa, chay wasi ukhu cuartospi kajtataj taponqa: ‘¿Pipis qanwan kanchu?’, nispa. Chay runataj kutichenqa: ‘Mana pipis kanchu’, nispa. Paytaj chay runata nenqa: ‘Chʼinlla kakuy. Mana Jehová sutita oqharina tiempochu’, nispa”.
11 Jehová Diosmin kamachiytaqa churan,+
paymin jatun wasitaqa phirenqa qʼopaman tukuchinankama,
juchʼuy wasitapis phirenqa rumi montonesllamanña tukuchinankama.+
12 ¿Caballosqa qaqantachu purinku?
¿Chay qaqapichu runaqa yuntawan llankʼan?
Qankunaqa justiciata venenoyoj plantaman tukuchinkichej,
cheqan kajpa poqoynintataj ajenjo jina* jayaman tukuchinkichej.+
13 Qankunaqa kusisqas kashankichej ni imapaj valej imaswan,
ninkichejtaj: “Noqanchejqa kallpayoj kasqanchejrayku may atiyniyoj kanchej”,+ nispa.
14 Israelitas, chayrayku qankunaj contraykichejta uj nacionta kachamusaj.+
Chay nacionqa qankunata ñakʼarichisonqachej Lebó-Hamatmantapacha*+ Arabá mayukama’, nispa nin angelesta kamachej Jehová Diosqa”.
7 Tukuyta Kamachej Señor Jehová Diosqa kayta rikuchiwarqa. Payqa may chhika langostasta kachamusqa, qhepa tarpusqa* chajra wiñayta qallarishajtin. Chay chajrataqa qhepata tarpusqanku, reypaj pastota* ruthusqankutawan. 2 Chay langostas nacionnintinmanta chajrasta mikhuyta tukusqankutawan noqa nerqani: “Tukuyta Kamachej Señor Jehová Diosníy, llajtaykimanta kajkunataqa perdonay ari.+ ¿Imaynatataj Jacobpa miraynin salvakonqari?* Paykunaqa mana kallpayoj kashanku”,+ nispa.
3 Chantá Jehová Diosqa piensarikorqa.*+ Jehová Diosqa niwarqa: “Chay rikusqaykitaqa mana apachimusajchu”, nispa.
4 Tukuyta Kamachej Señor Jehová Diosqa kayta rikuchiwarqa. Tukuyta Kamachej Señor Jehová Diosqa kamacherqa nacionnintin ninawan castigasqa kananta. Chay ninataj may chhika ukhu yakusta chʼakicherqa, nacionmanta uj cheqatataj qʼalatapuni ruphaykorqa. 5 Chantá nerqani: “Tukuyta Kamachej Señor Jehová Diosníy, ama chayta ruwaychu ari.+ ¿Imaynatataj Jacobpa miraynin salvakonqari?* Paykunaqa mana kallpayoj kashanku”,+ nispa.
6 Chantá Jehová Diosqa piensarikorqa.*+ Tukuyta Kamachej Señor Jehová Diosqa niwarqa: “Chay rikusqaykitapis nillataj apachimusajchu”, nispa.
7 Kayta rikuchillawarqataj. Jehová Diosqa plomadawan ruwasqa perqa patapi sayasharqa, makinpitaj plomadata japʼisharqa. 8 Chantá Jehová Diosqa tapuwarqa: “Amós, ¿imatá rikunki?”, nispa. Noqataj kuticherqani: “Uj plomadata”, nispa. Jehová Diostaj niwarqa: “Israel llajtay chaupiman uj plomadata churasaj. Niñataj ujtawan paykunata perdonasajchu.+ 9 Isaacpa pata lugaresnenqa+ chʼinpacha qhepakonqa, Israelpa templosninpis thuñisqa kanqanku.+ Jeroboanpa familiantapis espadawan tukuchisaj”,+ nispa.
10 Chantá Betelmanta sacerdote*+ Amasiasqa kay willayta apacherqa Israelmanta rey Jeroboanman:+ “Amosqa qanpa contraykipi sajra imasta wakichishan Israel chaupipi.+ Kay nacionmanta runasqa mana Amospa parlasqanta aguantankumanchu.+ 11 Amosqa kayta nishan: ‘Jeroboanqa espadawan wañuchisqa kanqa, Israelmanta runastaj jallpʼankumanta presos apasqa kanqanku’,+ nispa”.
12 Chantá Amasiasqa Amosta nerqa: “Yú, profeta* Amós, ripuy kaymanta. Judá jallpʼaman ayqekuy, chaypitaj kausanaykipaj ganakamuy.* Chaypi profeta jina willamuy.+ 13 Amañataj profeta jina Betelpi willayñachu.+ Betelqa reypa templon,+ reypa wasintaj”, nispa.
14 Amostaj Amasiasta nerqa: “Noqaqa mana profetachu karqani, nitaj profetaj wawanchu. Noqaqa ovejasta michej kani,+ higo sachʼastataj* cuidaj kani. 15 Chayllapi Jehová Diosqa ovejasta michishajtiy wajyamuwarqa. Jehová Diosqa niwarqa: ‘Rispa Israel llajtayman profeta jina willamuy’,+ nispa. 16 Chayrayku Jehová Diospa parlasqanta uyariy: ‘Qanqa nishanki: “Ama Israelpa contranta imatapis willaychu,+ amataj Isaacpa mirayninpa contranta imatapis parlaychu”,+ nispa. 17 Kaytamin Jehová Diosqa nin: “Warmiykeqa kay llajtapi khuchi warmiman* tukonqa. Qhari wawasniyki, warmi wawasniykipis espadawan wañuchisqa kanqanku. Jallpʼaykitapis midina qʼaytuwan midispa partinakonqanku. Qantaj chʼichipaj qhawasqa llajtapi wañunki, Israelmanta runastaj jallpʼankumanta presos apasqa kanqanku”,+ nispa’”.
8 Tukuyta Kamachej Señor Jehová Diosqa kayta rikuchiwarqa. Uj canastapi kasharqa higoswan palmera poqoykunawan. 2 Chantá pay tapuwarqa: “Amós, ¿imatá rikunki?”, nispa. Noqataj kuticherqani: “Uj canastata rikushani higosniyojta, palmera poqoykunasniyojtawan”, nispa. Chantá Jehová Diosqa niwarqa: “Israel llajtaypa castigo pʼunchaynin chayamunña. Niña ujtawan paykunata perdonasajchu.+ 3 Tukuyta Kamachej Señor Jehová Diosqa nin: ‘Chay pʼunchayqa templopi takiykuna llakiy takiykunaman tukonqanku.+ Tukuynejpi wañusqa cuerposllaña wijchʼurayanqanku. Chay lugarqa chʼinpacha kachun’, nispa.+
4 Kayta uyariychej qankuna, pikunachus wajcha runasta sarurankichej chaykuna,
kay nacionmanta llampʼu sonqoyojkunata llakiyman chayachejkuna.+
5 Qankunaqa ninkichej: ‘¿Maykʼajtaj killa rikhuriy* fiesta+ tukukonqa trigonchejta* vendenanchejpajri?
¿Maykʼajtaj samarikuna pʼunchay+ tukukonqa trigonchejta vendenanchejpajri?
Ajinamanta trigo midinasninchejta* juchʼuyyachisun,
preciontataj wicharichisun.
Ajinamanta balanzasninchejta mana allinman tukuchispa engañasun.+
6 Ajinamanta pisichikoj runataqa qolqewan rantirparisun,
pobre runatapis uj par jukʼutaswan* cambiarparisun,+
mana sirvej trigotataj* vendesun’, nispa.
7 Jehová Diosqa Jacobpa jatun kayninrayku juran:+
‘Ni jaykʼaj qonqasajchu tukuy ruwasqankuta.+
8 Chayta yachaspa nacionnintin kharkatitenqanku,
chaypi tukuy tiyakojkunataj llakiyta waqanqanku.+
¿Nichu tukuy ima Nilo mayu jina oqharikonqa?
¿Nichu Egiptomanta Nilo mayu jina wicharenqataj uraykonqataj?’,+ nispa.
9 Tukuyta Kamachej Señor Jehová Diosqa nin:
‘Chaupi pʼunchay kashajtin intita yaykuchipusaj.
Sutʼi pʼunchay kashajtintaj jallpʼata laqhayaykuchisaj.+
10 Fiestasniykichejta llakiyman tukuchisaj.+
Takiykunasniykichejtapis, llakiy takiykunaman tukuchisaj.
Qhashqa telaswan cinturasninkuta watachisaj, umasninkutataj pʼajlachisaj.
Llakiyta waqachisaj, kʼata wawankupis* wañupunman jina.
Chay tukuy ima tukukojtintaj sinchʼi llakiy kanqa’, nispa.
11 Tukuyta Kamachej Señor Jehová Diosqa nin: ‘Qhawaychej, pʼunchaykuna qayllamushan,
chaypachataj yarqhayta kay nacionman apachimusaj.
Mana tʼantamanta yarqhaytachu, nitaj yakumanta chʼakiytachu,
manachayqa Jehová Diospa palabranta uyariymanta yarqhayta.+
12 Paykunaqa chankaykachaspa* purenqanku ujnin mar qochamantapacha ujnin mar qochakama,
norte ladomantapacha* inti llojsimuy ladokama.
Paykunaqa tukuynejta purenqanku Jehová Diospa palabranta maskʼaspa, nitaj tarenqankuchu.
13 Chay pʼunchay kʼachita doncellasqa chʼakichikuspa desmayanqanku,
jovenespis chʼakichikuspa desmayallanqankutaj.
14 Paykunaqa urmanqanku, niñataj ujtawan sayarenqankuchu.+
Paykunaqa Samariaj juchanrayku juraspa ninku:+
“Dan, kausaj diosniykirayku jurani”,+ nispa.
“Beer-Seba ñanrayku jurani”,+ nispa’”.
9 Altar* patapi Jehová Diosta rikorqani.+ Paytaj niwarqa: “Pilarespa pata puntasninta wajtay, wasi punkustaj kuyurenqanku. Pilarespa pata puntasninta phawachiy, noqataj espadawan wañurachisaj llajtapi puchojkunata. Ayqekojkunaqa mana salvakonqankuchu, ayqeyta munajkunapis mana ayqeyta atenqankuchu.+
2 Pakakunankupaj Sepulturata* allakojtinkupis,
chaymanta paykunata makiywan orqhomusaj.
Cieloman wicharejtinkupis,
chaymanta uraykuchimusaj.
3 Carmelo orqo puntapi pakakamojtinkupis,
chaypi paykunata maskʼamusaj, apamusajtaj.+
Ukhu mar qochapi ñawisniy rikunanmanta pakakojtinkupis,
uj katarita kachasaj paykunata khanimunanpaj.
4 Paykunata enemigosninkoj jallpʼankuman presosta apakapojtinkupis,
chaypi espadata kamachisaj paykunata wañuchinanpaj, espadataj paykunata wañurachenqa.+
Noqa paykunataqa qhawamullasajpuni sajra imasta apachimunaypaj, manataj allin imastachu.+
5 Angelespa kamachejnin Tukuyta Kamachej Señor Jehová Diosqa, nacionta* llankharin,
naciontaj unuyapun.+ Chaypi tukuy tiyakojkunataj llakiyta waqanqanku.+
Tukuy nacionnintin Nilo mayu jina oqharikonqa,
Egiptomanta Nilo mayu jinataj uraykonqa.+
Paymin mar qocha yakusta tantaykun,
jallpʼa pataman jichʼaykamunanpaj...+
Paypa sutenqa Jehová’.+
7 Jehová Diosqa nin: ‘Israelmanta runas, ¿manachu noqapajqa cusitaspa wawasnin jina kankichej?’.
‘¿Manachu noqaqa Israelta Egipto jallpʼamanta orqhomorqani?+
¿Manachu filisteostapis Cretamanta orqhomorqani,+ siriostapis Quirmanta orqhomorqani?’.+
8 ‘Qhawaychej, noqa Tukuyta Kamachej Señor Jehová Diosqa juchasapa nacionta qhawamushani,
jallpʼa patamantataj chinkarparichisaj.+
Ajinapis Jacobpa miraynintaqa mana tukuynintachu chinkarparichisaj’,+ nispa nin Jehová Diosqa.
9 ‘Qhawariychej, uj kamachiyta qosaj,
Israel naciontataj thalasaj tukuy naciones ukhupi,+
imaynatachus uj suysunata thalanchej,
nitaj uj rumisitullapis pampaman tʼakakunchu ajinata.
10 Llajtaymanta tukuy juchasapas espadawan wañuchisqas kanqanku,
Paykunaqa ninku: “Ñakʼareyqa mana chayamuwasunchu, nitaj taripawasunchu”, nispa’.
11 ‘Chay pʼunchayqa Davidpa urmasqa chʼujllanta* sayarichisaj.+
Perqaspa lajrasqasnintataj allinchaykusaj,
raqaykunasnintapis* sayarichisaj.
Noqa watejmanta sayarichisaj unay tiempospi karqa ajina kananpaj.+
12 Ajinamanta llajtayqa kausashankuraj chay edomitasta kamachenqa,+
tukuy nacionestapis, pikunachus sutiyta apanku chaykunata’, nispa nin Jehová Diosqa, pichus kayta ruwan chay.
13 Jehová Diosqa nin: ‘Pʼunchaykuna qayllamushan,
chaypachataj niraj cosechata oqhariyta tukushajtinku llankʼana tiempoña kanqa.
Niraj uvasta sarushajtinkutaj tarpuna tiempoña kanqa.+
14 Israelmanta kajkunataqa presos apasqa kasqankumanta kutichimusaj.+
Paykunaqa chʼin llajtasta watejmanta jatarichenqanku, chaypitaj tiyakonqanku.+
Uvasta plantanqanku, chay uvasmanta vinotataj tomanqanku.+
Huertasta ruwakonqanku, chay huertaspi poqosqantataj mikhonqanku’,+ nispa.
15 Jehová Diosniykeqa nin: ‘Noqa paykunata jallpʼankuman plantasaj,
nitaj jaykʼajpis tʼirasqachu kanqanku,
qorqani chay jallpʼamantaqa’,+ nispa”.
Amós suteqa niyta munan uj qʼepi kay chayri uj qʼepita apay.
Chayri “juchata ruwasqanrayku”.
Hebreo parlaypeqa nin, “kamachina tojnuta japʼejtapis”.
Hebreo parlaypeqa nin, “kamachina tojnuta japʼejtapis”.
Mithay: waj lugarespi ninku wikhay, tʼisay.
Chayri “juchata ruwasqanrayku”.
Hebreo parlaypeqa nin, “juezta”.
Chayri “abarcasrayku”.
Siriy: waj lugarespi ninku winkuy.
Glosariopi profeta nisqata leeriy.
Glosariopi nazareo nisqata leeriy.
Ichá kallanmantaj karqa “cebada”.
Flechana arco: waj lugarespi ninku camba flecha.
Ichá nillanmantaj “trampaman chimpananpaj mana imatapis churajtinku”.
Chayri “imachus sonqonpi pakasqa kasqanta”.
Chayri “engañanakuy ima”.
Siriy: waj lugarespi ninku winkuy.
Chayri “Damasco llajtamanta tiyanaspi”.
Chayri “Jacobpa mirayninpa contranta testigo jina parlaychej”.
Chayri “Israel contrayta oqharikusqanmanta”.
Ichá nillanmantaj “may chhika wasispis”.
Chayri “patronesniykichejta”.
Chayri “juchata ruwaychej”.
Chayri “diezmoykichejta”.
Chayri “ruphachiychej”.
Chankaykachay: waj lugarespi ninku tharpiykachay, aylinkachay, thamaykachay.
Campamentoqa ashkha toldo wasis.
Hebreo parlaypeqa nin, “Ama Betelta maskʼaychejchu”.
Ichá nillanmantaj “Beteltaj mana allinman tukonqa”.
Glosariopi ajenjo nisqata leeriy.
Kimá nisqa chʼaskasqa ichapis Pléyades chʼaskas, chay chʼaskasqa Tauro chʼaskas ukhupi kashanku.
Kesil nisqa chʼaskasqa ichapis Orión ninku chay chʼaskas.
Chayri “impuestota”.
Ichá kallanmantaj karqa “cebada”.
Chayri “juchasta ruwasqaykichejta”.
Chayri “chʼinlla kanaykichejpaj qolqeta japʼikunkichej”.
Chayri “Ruphachina”.
Chayri “paykunaqa ni imamanta llakiyniyoj kanku”.
Gobiernosmanta nispaqa ichá parlashan Judá gobiernomanta, Israel gobiernomantawan.
Carnero: waj lugarespi ninku mocho, oveja toro.
Siriy: waj lugarespi ninku winkuy.
Hebreo parlaypeqa nin, “tatanpa hermanon”.
Glosariopi ajenjo nisqata leeriy.
Chayri “Hamatman yaykunamantapacha”.
Qhepa tarpuy nispaqa enero, febrero killaspi tarpusqankumanta parlashan.
Hebreo parlaypeqa nin, “henota”.
Hebreo parlaypeqa nin, “sayarenqari”.
Chayri “pesachikorqa”.
Hebreo parlaypeqa nin, “sayarenqari”.
Chayri “pesachikorqa”.
Glosariopi sacerdote nisqata leeriy.
Chayri “mosqoypi jina willaykunata japʼej”.
Chayri “tʼantaykita ganakamuy”.
Chayri “sicómoro higo sachʼastataj”.
Khuchi warmi nispaqa parlashan qhariswan puñuykoj warmimanta, astawanqa qolqerayku.
Killa rikhuriy: waj lugarespi ninku mosoj killa.
Ichá kallanmantaj karqa “cebada”.
Hebreo parlaypeqa nin, “efanchejta”. Yanapa B14 nisqata leeriy.
Chayri “abarcaswan”.
Ichá kallanmantaj karqa “cebada”.
Chayri “sapan wawankupis”.
Chankaykachay: waj lugarespi ninku tharpiykachay, aylinkachay, thamaykachay.
Chayri “pata ladomantapacha”.
Glosariopi altar nisqata leeriy.
Chayri “Seolta”. Glosariopi sepultura nisqata leeriy.
Chayri “jallpʼata”.
Chayri “muyu techota”.
Chayri “toldo wasinta”.
Raqay: waj lugarespi ninku laqayas.
Sutʼuy: waj lugarespi ninku chʼaqay.
Hebreo parlaypeqa nin, “tukuy lomastaj unuyaponqanku”.