AGEO

1 Rey Darío iskay watataña kamachishajtin, sojta kaj killaj ñaupaj kaj pʼunchayninpi Sealtielpa wawan Zorobabelqa,+ pichus Judamanta kamachej karqa, Jehozadacpa wawan Josuewan, pichus kuraj kaj sacerdote* karqa, profeta* Ageonejta*+ kay willayta Jehová Diosmanta japʼerqanku:

2 “Angelesta kamachej Jehová Diosqa kayta nin: ‘Kay runasqa nishanku: “Manaraj tiempochu Jehová Diospa wasinta* ruwanapajqa”,* nispa’”.+

3 Chantá Jehová Diosmanta watejmanta kay willayta japʼillarqankutaj profeta Ageonejta:+ 4 “Kay wasi kay jina thuñisqa kashajtin, ¿qankuna kʼachitu tablaswan tableasqa wasispi tiyakunaykichej tiempochu?+ 5 Angelesta kamachej Jehová Diosqa kayta nisunkichej: ‘Allinta repararikuychej imatachus ruwashasqaykichejta. 6 Ashkhata tarpuspapis pisillata oqharishankichej.+ Mikhuspapis mana sajsakunkichejchu. Ujyaspapis chʼakisqallapuni kashankichej. Ropata churakuspapis mana qʼoñikunkichejchu. Peonpis juskʼusniyoj wayaqallaman* ganakusqanta jallchʼan’”.

7 “Angelesta kamachej Jehová Diosqa kayta nisunkichej: ‘Allinta repararikuychej imatachus ruwashasqaykichejta’, nispa.

8 ”Jehová Diosqa nisunkichej: ‘Orqoman wichariychej, maderasta apaychej,+ wasiytataj ruwapuwaychej+ kusichinawanpaj, jatunchasqataj kanaypaj’,+ nispa”.

9 “Angelesta kamachej Jehová Diosqa nin: ‘Ashkhata oqhariyta munaspapis, pisillata oqharinkichej. Wasisniykichejman apajtiykichejtaj ujta phukuspalla chinkarparichini.+ ¿Imajtin? Wasiy thuñisqa kashajtin wasisnillaykichejta cuidaspa kashasqaykichejrayku.+ 10 Chayrayku cieloykichejqa manaña chhullachimunchu, jallpʼapis manaña poqonchu. 11 Noqataj jallpʼasniykichejta, orqosniykichejtawan chʼaki jallpʼaman tukuchini. Chayrayku pisiyan chʼaki mikhuykunasniykichej, mosoj vinoykichej, aceiteykichej, poqoj plantasniykichejpis. Qankunapis uywasniykichejpis ñakʼarishankichej, wasa pʼakikuyta trabajasqaykichejpis qhasilla’, nispa”.

12 Sealtielpa+ wawan Zorobabel,+ Jehozadacpa+ wawan kuraj kaj sacerdote Josué, tukuy runaspis Jehová Diosninkoj nisqanta uyarerqanku, profeta Ageoj parlasqantapis, Jehová Diosninku payta kachasqanrayku. Runastaj Jehová Diosta manchachikuyta qallarerqanku.

13 Chantá Jehová Diospa kachasqan Ageoqa, Jehová Diospa kamachisqanman jina runasman kayta willarqa: “Jehová Diosqa nin: ‘Noqa qankunawan kashani’,+ nispa”.

14 Ajinamanta Jehová Diosqa kallpacharqa+ Sealtielpa wawan Judapi kamachej Zorobabelta,+ Jehozadacpa wawan kuraj kaj sacerdote Josueta,+ tukuynin runastapis. Chayrayku angelesta kamachej Jehová Diosninkoj wasinta ruwayta qallarimorqanku.+ 15 Chayqa karqa rey Darío iskay watataña kamachishajtin,+ sojta kaj killaj 24 pʼunchayninpi.

2 Qanchis kaj killaj 21 pʼunchayninpi kay willayta Jehová Diosmanta japʼerqanku profeta Ageonejta:+ 2 “Ama jina kaspa tapuriy Sealtielpa wawan Judapi kamachej Zorobabelta,+ Jehozadacpa+ wawan kuraj kaj sacerdote Josueta,+ tukuynin runastawan: 3 ‘¿Mayqenniykichejtaj kay wasita* rikorqankichej manchay kʼachituraj kashajtin?+ Kunanrí, ¿imaynataj kay wasi? ¿Nichu chay ñaupa wasimanta nisqaqa kay waseqa mana imapischu?’,+ nispa.

4 ”Jehová Diosqa nin: ‘Zorobabel, kunanqa wapu kay, Jehozadacpa wawan kuraj kaj sacerdote Josué, qanpis wapullataj kay’, nispa.

”Jehová Diosqa nin: ‘Kay jallpʼapi tiyakojkunapis, tukuyniykichej wapusllataj kaychej,+ llankʼaychejtaj’, nispa.

”Angelesta kamachej Jehová Diosqa nin: ‘Noqa qankunawan kashani.+ 5 Yuyarikuychej Egiptomanta llojsimushajtiykichej imatachus nerqaykichej chayta.+ Espiritoyqa qankunallawanpuni kashan.*+ Ama manchachikuychejchu’”.+

6 “Angelesta kamachej Jehová Diosqa nin: ‘Tumpamantawanqa uj kutitawanraj kharkatichisaj cielosta, jallpʼata, mar qochata, chʼaki jallpʼatapis’,+ nispa.

7 ”Angelesta kamachej Jehová Diosqa nin: ‘Tukuynin nacionesta kharkatichisaj, tukuy nacionespa valorniyoj imasninkoqa kay wasiman yaykumonqanku.+ Noqataj kay wasita jatun kayniywan juntʼaykuchisaj’,+ nispa.

8 ”Angelesta kamachej Jehová Diosqa nin: ‘Qolqe metalqa noqajta, qoripis noqajta’, nispa.

9 ”Angelesta kamachej Jehová Diosqa nin: ‘Kay waseqa chay ñaupa wasimanta aswan kʼachitu kanqa’,+ nispa.

”Angelesta kamachej Jehová Diosqa nin: ‘Kay cheqapitaj sonqo tiyaykuyta qosaj’,+ nispa”.

10 Rey Darío iskay watataña kamachishajtin, jisqʼon killaj 24 pʼunchayninpi profeta Ageoqa Jehová Diosmanta kay willayta japʼerqa:+ 11 “Angelesta kamachej Jehová Diosqa kay jinata nin: ‘Ama jina kaspa sacerdotesta* leymanta kayta tapuriy:+ 12 “Sichus uj runa Diospaj tʼaqasqa aychata ropanpa ura kantunpi apan, chay ropantaj chayan tʼantaman, puka mikhunaman, vinoman, aceiteman, ima mikhuymanpis, ¿chay imas Diospaj tʼaqasqamanchu tukunman?”, nispa’”.

Sacerdotestaj kuticherqanku: “Mana”, nispa.

13 Chantá Ageoqa tapullarqataj: “Sichus uj runa wañusqa cuerpota llankhaspa chʼichipaj qhawasqa kashan, chay imastataj llankharin chayqa, ¿manachu chay llankhasqan imasqa chʼichillapajtaj qhawasqa kanqa?”,+ nispa.

Sacerdotestaj kuticherqanku: “Chʼichillapajtaj qhawasqa kanqa”, nispa.

14 Chantá Ageoqa nerqa: “Jehová Diosqa nin: ‘Kay llajtaqa ajina, kay nacionqa ajina ñaupaqeypi, makinkuwan tukuy ima ruwasqankupis ajinallataj. Chaypi jaywasqanku imasqa chʼichipaj qhawasqa’, nispa.

15 ”‘Ama jina kaspa, kunanmantapacha kay imaspi allinta tʼukuriychej: Niraj Jehová Diospa templonpi rumi perqasta perqakushajtin,+ 16 ¿imataj pasaj? Runasqa ashkha chʼaki mikhuyman rispa 20 canastasta oqhariyta munajtinku, chunka canastaslla kaj. Uvas chʼirwanaman rispataj 50 jarras vinota wisiyta yuyajtinku 20 jarras vinolla kaj.+ 17 Makisniykichejwan tukuy ima ruwasqaykichejtaqa castigarqani qʼoñi wayrawan, chajrasman yaykoj onqoywan,+ granizowan ima, nitaj mayqenniykichejpis noqaman kutirikamuwarqankichejchu’, nispa nin Jehová Diosqa.

18 ”‘Ama jina kaspa, kunanmantapacha kay imaspi allinta tʼukuriychej, kay jisqʼon killaj 24 pʼunchayninmantapacha, Jehová Diospa templonpa cimientosninta churakusqan pʼunchaymantapacha.+ Kay imaspi allinta tʼukuriychej. 19 ¿Mujoqa kanrajchu jallchʼana wasipi?+ Uva sachʼapis, higo sachʼapis, granada sachʼapis, olivo sachʼapis, ¿manarajcharí poqonkuchu? Noqaqa kunanmantapacha bendecisqaykichej’,+ nispa”.

20 Chay killaj 24 pʼunchayninpi Ageoqa Jehová Diosmanta waj willayta japʼillarqataj.+ Diosqa nerqa: 21 “Judapi kamachej Zorobabelta niy: ‘Cielotawan jallpʼatawan kharkatichisaj.+ 22 Reyespa kamachiyninkuta tukuchisaj, nacionespa gobiernosninkoj atiynintapis tukuchisaj.+ Carretasta, carretasta apajkunatapis tukuchisaj. Caballospis, caballospi montajkunapis hermanonkoj espadanwan wañuchisqa kanqanku’,+ nispa”.

23 “Angelesta kamachej Jehová Diosqa nin: ‘Sealtielpa+ wawan kamachiy Zorobabel,+ chay pʼunchayqa noqa kamachisqayki. Uj sellana anilloman jina tukuchisqayki, qantaqa noqa ajllakuyki’, nispa nin Jehová Diosqa. Chayta nin angelesta kamachej Jehová Diosqa”.