ZACARÍAS
1 Darío iskay watataña kamachishajtin,+ pusaj kaj killapi, Idoj allchhin Berekiaspa wawan profeta* Zacariasqa*+ Jehová Diosmanta kay willayta japʼerqa: 2 “Jehová Diosqa tatasniykichejpaj sinchʼita phiñakorqa.+
3 ”Paykunaman niy: ‘Angelesta kamachej Jehová Diosqa kayta nisunkichej: “Angelesta kamachej Jehová Diosqa nin: ‘Noqaman kutirikamuychej, noqapis qankunaman kutirikamusaj’,+ nispa nin angelesta kamachej Jehová Diosqa”’.
4 ”‘Ama tatasniykichej jinachu kaychej. Paykunamanqa ñaupa profetas willarqanku: “Angelesta kamachej Jehová Diosqa kayta nin: ‘Ama jina kaspa chay mana allin puriyniykichejta qonqaychej, chay sajra imasta ruwasqaykichejtapis’,+ nispa”’.
”‘Paykunatajrí mana uyariwarqankuchu, nitaj kasuwarqankuchu’,+ nispa nin Jehová Diosqa.
5 ”‘¿Maytaj kunan chay tatasniykichejri? ¿Chay profetaspis wiñaypajchu kausarqanku? 6 Jinapis kamachisniy profetaswan imatachus willacherqani, imatachus kamacherqani, chaykunaqa tatasniykichejpi juntʼakorqa, ¿icharí?’.+ Chayrayku paykunaqa noqaman kutirikamuwaspa nerqanku: ‘Angelesta kamachej Jehová Diosqa ruwasqaykuman jina, mana allinta purisqaykuman jina ruwawayku, ruwananta nisqanman jina’,+ nispa”.
7 Darío iskay watataña kamachishajtin,+ chunka ujniyoj killapi, nisunman sebat* killaj 24 pʼunchayninpi, Idoj allchhin Berekiaspa wawan profeta Zacariasqa Jehová Diosmanta kay willayta japʼerqa: 8 “Tutanqa mosqoypi jina rikorqani. Uj runa puka caballopi montasqa kashasqa, qaqa ukhupi, mirto sachʼas chaupipi mana kuyurispa. Qhepanpeqa puka caballos kashasqanku, pukarau caballos, yuraj caballos ima”.
9 Noqataj taporqani: “Wiraqochíy, ¿pikunataj kaykuna kankuri?”, nispa.
Parlashawarqa chay angeltaj kutichiwarqa: “Rikuchisqayki pikunachus kasqankuta”, nispa.
10 Mirto sachʼas chaupipi mana kuyurispa kasharqa chay runataj nerqa: “Kay runastaqa Jehová Dios kachamun jallpʼata muyumunankupaj”, nispa. 11 Paykunataj Jehová Diospa angelninta, pichus mirto sachʼas chaupipi kasharqa chay angelta nerqanku: “Jallpʼata muyumuykuña, jallpʼapeqa mana ima chʼajwapis kanchu, allintataj kausakushanku”,+ nispa.
12 Chantá Jehová Diospa angelnenqa taporqa: “Angelesta kamachej Jehová Diosníy, ¿maykʼajkamataj Jerusalenta, Judaj llajtasnintapis mana khuyakunkichuri?+ Paykunapajqa kay 70 watastaña phiñasqa kanki”,+ nispa.
13 Noqawan parlasharqa chay angelmantaj Jehová Diosqa kʼachamanta kuticherqa, sonqochaj palabraswantaj. 14 Parlashawarqa chay angeltaj niwarqa: “Kayta willamuy: ‘Angelesta kamachej Jehová Diosqa kayta nin: “Sonqo kʼajaywan Jerusalenta, Siontapis jarkʼakusaj, sonqo kʼajaywanpuni.+ 15 Phiñasqa kashani, manchay phiñasqapuni kashani ni ima llakiyniyoj nacionespaj.+ Llajtaypaj tumpa phiñasqalla kashajtiy,+ chay nacionesqa manchaytapuni paykunata ñakʼaricherqanku”,+ nispa’.
16 ”Chayrayku Jehová Diosqa kayta nin: ‘“Jerusalenta watejmanta khuyakusaj,+ chaypitaj wasiyta ruwanqanku.+ Jerusalenqa midina qʼaytuwan midisqa kanqa”,+ nispa nin angelesta kamachej Jehová Diosqa’.
17 ”Kaytapis willallaytaj: ‘Angelesta kamachej Jehová Diosqa kayta nin: “Llajtasneyqa watejmanta allin imaswan juntʼa kanqa. Jehová Diosqa watejmanta Sionta sonqochanqa,+ Jerusalentapis watejmanta ajllakonqa”,+ nispa’”.
18 Chantá qhawarispa tawa wajrasta rikorqani.+ 19 Chayrayku parlashawarqa chay angelta taporqani: “¿Imataj kay wajrasri?”, nispa. Paytaj kutichiwarqa: “Kay wajrasqa Judata,+ Israelta,+ Jerusalentawan+ chʼeqeracherqanku”,* nispa.
20 Chantá Jehová Diosqa rikuchiwarqa tukuy imata ruwayta yachaj tawa runasta. 21 Noqataj tapurerqani: “Paykunarí, ¿imata ruwanankupajtaj jamushanku?”, nispa.
Paytaj kutichiwarqa: “Kay wajrasqa Judata chʼeqeracherqanku, nitaj pipis paykunaman sayaykuyta aterqachu. Tukuy imata ruwayta yachaj kay tawa runastaj jamonqanku paykunata manchayta mancharichinankupaj, chay nacionespa wajrasninkuta uraman wijchʼuykunankupaj. Chay nacionesqa wajrasninkuta Judá jallpʼaj contranta oqharerqanku, chaypi tiyakojkunata chʼeqerachinankupaj”, nispa.
2 Qhawarispataj uj runata rikorqani, makinpi midina qʼaytuta+ japʼishajta. 2 Noqataj taporqani: “¿Mayman rishanki?”, nispa.
Paytaj kutichiwarqa: “Jerusalenta midej rishani, mashkhachus anchonman, mashkhachus largonman kasqanta yachanaypaj”,+ nispa.
3 Chantá noqawan parlasharqa chay angelqa karunchakorqa, waj angeltaj payta taripaj jamorqa. 4 Nerqataj: “Correspa jaqay joventa nimuy: ‘“Jerusalenpeqa mana perqasniyoj llajtaspi jina ashkha runas tiyakonqanku,+ ashkha uywaspis.+ 5 Noqataj muyuyninpi nina perqa jina kasaj,+ jatun kayniytaj chaupinman juntʼaykonqa”,+ nispa nin Jehová Diosqa’”.
6 Jehová Diosqa nin: “Jamuychej, jamuychej, chay norte lado* jallpʼasmanta ayqemuychej”,+ nispa.
Jehová Diosqa nin: “Qankunataqa cieloj tawa wayrasninwan aparacherqaykichej”.+
7 “Jampuy Sion. Babiloniaj warmi wawanwan tiyakoj Sion, ayqekamuy.+ 8 Angelesta kamachej Jehová Diosqa kayta nin, payqa jatunchasqa kaytawan noqata kachawarqa saqueasorqachej chay nacionesman.+ Payqa nin: ‘Pichus qankunata llankharejqa ñawi papayta llankhaykun.+ 9 Kunantaj contrankupi makiyta oqharisaj, esclavosnillankutaj paykunata suwakaponqanku’,+ nispa. Chaypi allinta yachankichej angelesta kamachej Jehová Dios noqata kachamuwasqanta.
10 ”Sionpa warmi wawan, kusiywan qhapariy.+ Chayamushaniña,+ chaupiykipitaj tiyakusaj”,+ nispa nin Jehová Diosqa. 11 “Chay pʼunchayqa ashkha naciones Jehová Diosman ujchaykukonqanku,+ paykunaqa nacionniy kanqanku. Noqataj chaupiykipi tiyakusaj”. Chaypachataj yachanki angelesta kamachej Jehová Diospuni qanman kachamuwasqanta. 12 Jehová Diosqa Judata japʼikaponqa santo jallpʼapi paypata kananpaj, Jerusalentapis watejmanta ajllakaponqa.+ 13 Tukuynin runas Jehová Diospa ñaupaqenpi chʼinlla kachunku. Payqa tiyakunan santo lugarmantapacha jamushan munayninta ruwananpaj.
3 Chantá kuraj kaj sacerdote* Josueta+ rikuchiwarqa. Payqa Jehová Diospa angelninpa ñaupaqenpi sayasharqa. Pañanpitaj Satanás+ sayasharqa payman churanakunanpaj. 2 Jehová Diospa angelnintaj Satanasta nerqa: “Satanás, Jehová Dios kʼamisuchun.+ Jehová Dios kʼamisuchun, paymin Jerusalenta ajllakorqa.+ ¿Nichu kay runaqa ninamanta orqhosqa llantʼalla?”, nispa.
3 Josuetaj chay angelpa ñaupaqenpi chʼichi ropayoj sayasharqa. 4 Angeltaj ñaupaqenpi kasharqanku chaykunata nerqa: “Chʼichi ropanta lluchʼuychej”, nispa. Chantá Josueta nerqa: “Juchaykita qhechuykiña. Kunanqa sumaj ropata churasonqanku”,+ nispa.
5 Noqapis nerqani: “Sumaj uma maytʼunawan, llimphituwan umanta maytʼuykuychej”,+ nispa. Paykunataj chay llimphu uma maytʼunawan umanta maytʼuykorqanku, ropatapis churaykorqanku. Jehová Diospa angelnintaj chay qayllapi sayasharqa. 6 Chantá Jehová Diospa angelnenqa Josueman nerqa: 7 “Angelesta kamachej Jehová Diosqa kayta nin: ‘Sichus ñankunasniyta purinki, ruwanasniykitataj ñaupaqeypi juntʼanki chayqa, wasiypi juez kanki,+ wasi patiosniyta qhawanki.* Ñaupaqeymantaj yaykumojta saqellasqayki kaypi sayasqa kashanku chaykunatawan khuska’.
8 ”‘Kuraj kaj sacerdote Josué, ama jina kaspa uyariway, ñaupaqeykipi kashanku chaykunapis uyariwachunku. Chay runasqa uj señal kanku. Ijiy*+ sutiyoj kamachiyta pusamusaj.+ 9 Qhawariychej Josuej ñaupaqenman churasqay rumita. Kay rumilla qanchis ñawisniyoj. Chayman qhelqaykusaj, uj pʼunchayllapitaj kay jallpʼaj juchanta apakapusaj’,+ nispa nin angelesta kamachej Jehová Diosqa.
10 ”Angelesta kamachej Jehová Diosqa nin: ‘Chay pʼunchayqa sapa ujniykichej vecinoykichejta wajyarikunkichej, uva sachʼaykichej urapi, higo sachʼaykichej urapi karikunaykichejpaj’,+ nispa”.
4 Noqawan parlasharqa chay angelqa kutimuspa rijchʼarichiwarqa, imaynatachus puñusqata rijchʼarichinchej ajinata. 2 Chantá tapuwarqa: “¿Imatá rikushanki?”, nispa.
Noqataj kuticherqani: “Uj candelerota* oromanta,+ patanpi fuenteyojta, qanchis mecherosniyojta,+ qanchisniyojpuni. Chay patapi kaj mecherosqa qanchis tubosniyoj. 3 Ladonpitaj iskay olivo sachʼasta,+ ujninta chay fuentej paña ladonpi, ujnintataj lloqʼe ladonpi”, nispa.
4 Chantá parlashawarqa chay angelta taporqani: “Wiraqochíy, ¿ima niytá munan kay imasri?”, nispa. 5 Parlashawarqa chay angeltaj niwarqa: “¿Nichu yachanki ima niytachus munasqanta?”, nispa.
Noqataj kuticherqani: “Mana wiraqochíy”, nispa.
6 Chantá niwarqa: “Jehová Diosqa kayta Zorobabelman nin: ‘“Mana uj ejercitoj atiyninwanchu,+ nitaj atiywanchu kay imasqa ruwakonqa, manachayqa espirituywan”,+ nispa nin angelesta kamachej Jehová Diosqa. 7 Jatun orqo, ¿pipunitaj qan kasqanki? Zorobabelpa+ ñaupaqenpeqa pampachasqa kanki.+ Payqa aswan patapi kaj rumita apamonqa, runas kay jinata qhaparishajtinku: “Chay jina kʼachitupuni, chay jina kʼachitupuni”, nispa’”.
8 Jehová Diosqa watejmanta parlamuwaspa niwarqa: 9 “Kay wasej cimientosnintaqa Zorobabel churarqa,+ kunanqa payllataj ruwayta tukuchanqa.+ Chaypacha yachanki angelesta kamachej Jehová Dios qankunaman kachamuwasqanta. 10 ¿Pitaj ruwayta qallarikusqanta* rikuspa asikunri?+ Paykunaqa mayta kusikonqanku, Zorobabelpa makinpitaj plomadata* rikonqanku. Kay qanchisqa Jehová Diospa ñawisnin kanku, tukuy jallpʼatataj purimushanku”,+ nispa.
11 Chantá taporqani: “¿Ima niytá munan kay iskay olivo sachʼas, candeleroj paña ladonpi lloqʼe ladonpipis kashanku chaykunari?”,+ nispa. 12 Ujtawan tapullarqanitaj: “¿Ima niytá munan chay olivo rama* qʼapis, iskay qori tubosninta qʼellu aceiteta suruchishanku chaykunari?”, nispa.
13 Paytaj niwarqa: “¿Nichu yachanki ima niytachus munasqanta?”, nispa.
Noqataj kuticherqani: “Mana wiraqochíy”, nispa.
14 Payqa niwarqa: “Kaykunaqa jallpʼantinmanta Señorpa ladonpi sayasqa iskay ajllasqas kanku”,+ nispa.
5 Ujtawan qhawarispa uj kʼuyuna librota* phawaykachashajta rikorqani. 2 Angeltaj tapuwarqa: “¿Imatá rikushanki?”, nispa.
Noqataj kuticherqani: “Rikushani uj kʼuyuna librota phawaykachashajta. Chay kʼuyuna libroqa largonman jisqʼon metrosniyoj jina, anchonmantaj tawa metros khuskanniyoj”,* nispa.
3 Chantá niwarqa: “Kayqa tukuy jallpʼantinman chayaj maldición. Suwasqa+ mana castigasqachu kanku kay kʼuyuna libroj ujnin uyanpi qhelqasqa kasqanman jina. Llullakuspa jurajkunapis+ mana castigasqachu kanku kay kʼuyuna libroj ujnin uyanpi qhelqasqa kasqanman jina. 4 Angelesta kamachej Jehová Diosqa nin: ‘Noqa chayta apachimuni, yaykonqataj suwaj wasinman, llullakuspa sutiypi jurajpa wasinmanpis. Chay wasipi qhepakonqa, qʼalatataj tukuykonqa, maderasnintapis rumisnintapis’, nispa”.
5 Noqawan parlasharqa chay angelqa chimpaykamuwaspa niwarqa: “Ama jina kaspa qhawariy, qhawariy imachus rikhurimushasqanta”, nispa.
6 Noqataj taporqani: “¿Imataj chayri?”, nispa.
Paytaj kutichiwarqa: “Uj efá* midina rikhurimushan”, nispa. Chantá nillawarqataj: “Paykunaqa ajina rijchʼayniyoj kanku jallpʼantinpi”, nispa. 7 Chantá chay midinajta plomomanta* muyu tapanqa oqharisqa karqa, chay ukhupitaj uj warmi chukushasqa. 8 Angeltaj niwarqa: “Kay warmeqa Sajra Kajwan ninakun”, nispa. Chantá efá midina ukhuman watejmanta tanqaykorqa, chay plomomanta llasa tapawantaj kallpawan tapaykorqa.
9 Chantá qhawarispa rikorqani iskay warmista qayllaykamushajta, wayraj apasqan jina phawamusharqanku. Lijrasninkoqa* cigüeñajta jina karqa. Chay midinatataj pataman oqharerqanku. 10 Noqataj parlashawarqa chay angelta taporqani: “¿Maymantaj chay efá midinata apashankuri?”, nispa.
11 Angeltaj kutichiwarqa: “Sinar* jallpʼaman,+ chay warmipaj wasita ruwamunankupaj. Wasita ruwayta tukojtinkutaj, warmita chayman churanqanku, lugarninman”, nispa.
6 Chantá watejmanta qhawarispa rikorqani iskay orqos chaupimanta tawa carretasta llojsimushajta, chay orqosqa cobremanta karqanku. 2 Ñaupajta llojsimoj carretataqa puka caballos aysamusharqanku, iskay kaj carretataqa yana caballos+ aysamusharqanku, 3 kinsa kaj carretataqa yuraj caballos aysamusharqanku, tawa kaj carretatataj chʼejchi caballoswan lunku* caballoswan+ aysamusharqanku.
4 Noqawan parlasharqa chay angelta taporqani: “Wiraqochíy, ¿ima niytá munan kay carretasri?”, nispa.
5 Angeltaj kutichiwarqa: “Kaykunaqa kanku cieloj tawa espiritusnin,*+ jallpʼantinmanta Señorpa ñaupaqenman yaykusqankumanta llojsimushanku.+ 6 Yana caballosniyoj carretaqa norte lado* jallpʼaman rishan,+ yuraj caballostaj mar qochamanta aswan jaqayman rishanku, chʼejchi caballostaj sur lado* jallpʼaman rishanku. 7 Lunku caballostaj jallpʼanta purimunankupaj manaña suyakuyta atishankuchu”, nispa. Chantá nerqa: “Riychej jallpʼata muyumuychej”, nispa. Paykunataj jallpʼata muyumorqanku.
8 Chantá wajyawaspa niwarqa: “Norte lado jallpʼaman rejkunaqa Jehová Dios norte lado jallpʼapaj phiñasqa kasqanta tiyaykuchinku”, nispa.
9 Jehová Diosqa watejmanta parlamuwaspa niwarqa: 10 “Waj llajtapi presos kashanku chaykunamanta imatachus Heldaiwan, Tobiyawan, Jedayawan apamusqankuta japʼimuy. Chay pʼunchayqa yaykunki Sofoniaspa wawan Josiaspa wasinman, Babiloniamanta jamunku chaykunawan khuska. 11 Uj coronata* ruwanki qolqe metalmantawan qorimantawan. Chaytataj Jehozadacpa wawan kuraj kaj sacerdote Josuej+ umanman churanki. 12 Ninkitaj:
”‘Angelesta kamachej Jehová Diosqa nin: “Kayqa chay Ijiy*+ sutiyoj runa. Payqa lugarninmantapacha ijimonqa, Jehová Diospa templontataj ruwanqa.+ 13 Jehová Diospa templontaqa pay ruwanqa, jatunpaj qhawasqataj kanqa. Kamachina tiyananpi tiyaykuspa gobernanqa, chantapis kamachina tiyananpi sacerdote* kanqa.+ Chay iskaynin ruwanasta* juntʼanqa allin kausay kananpaj.* 14 Chay coronaqa* Jehová Diospa templonpi qhepakonqa yuyarikunapaj Helemmanta, Tobiyamanta, Jedayamanta,+ Sofoniaspa wawan Henmantawan. 15 Karupi kajkunataj jamuspa Jehová Diospa templonta ruwaysikonqanku”. Chaypi allinta yachankichej angelesta kamachej Jehová Diospuni qankunaman kachamuwasqanta. Chayqa juntʼakonqa Jehová Diosniykichejpa nisqanta tukuy sonqo kasukojtiykichej’”.
7 Rey Darío tawa watataña kamachishajtin, jisqʼon killapi, kislev* killaj tawa kaj pʼunchayninpi, Zacariasqa+ Jehová Diosmanta uj willayta japʼerqa. 2 Betelmanta runasqa Sarezerta, Réguem-Melecta, kamachisnintawan kacharqanku Jehová Diospa khuyakuyninta mañakamunankupaj. 3 Kay jinatataj tapumunankupaj angelesta kamachej Jehová Diospa wasinmanta* sacerdotesta, profetastawan: “¿Phishqa kaj killapi+ waqallasajtajchu? ¿Mana mikhusqachu kasaj chay chhika watasta jina?”, nispa.
4 Angelesta kamachej Jehová Diosmanta watejmanta uj willayta japʼerqani. Pay niwarqa: 5 “Nacionmanta tukuy runasta, sacerdotestawan niy: ‘Qankunaqa 70 watasta,+ phishqa kaj killapi, qanchis kaj killapiwan+ ayunaj kankichej, waqajtaj kankichej. ¿Noqapajchu ayunaj kankichej? 6 Mikhushaspa, ujyashaspataj, ¿manachu qankunallapaj mikhojtaj ujyajtaj kankichej? 7 ¿Manachu kasunaykichej karqa Jehová Dios ñaupa profetasnejta nisqanta,+ Jerusalenpi, muyuyninpi kaj llajtaspipis runas allinta tiyakushajtinku, Neguebpi, Sefelapipis runas tiyakushajtinku?’”.
8 Zacariasqa watejmanta Jehová Diospa palabranta uyarerqa, kayta nejta: 9 “Tukuyta kamachej Jehová Diosqa kay jinata nin: ‘Cheqan justiciawan juzgaychej,+ purajmantataj munanakuychej,*+ khuyanakuychejtaj. 10 Ama chʼaukiyaychejchu* viudasta, wajcha wawasta,*+ forasterosta,+ nitaj pobrestapis.+ Nillataj sonqoykichejpi sajra kajta ruwanakunaykichejpaj wakichikuychejchu’,+ nispa. 11 Paykunatajrí manapuni uyariyta munarqankuchu,+ kʼullukorqanku,* mana kasukorqankuchu,+ ninrisninkutapis tapaykukorqanku mana uyarinankupaj.+ 12 Sonqosninkuta diamanteta jina* rumiyacherqanku,+ manataj kasukorqankuchu leyta, nitaj angelesta kamachej Jehová Dios espiritunnejta ñaupa profetasman willarqa chay palabrastapis.+ Chayrayku angelesta kamachej Jehová Diosqa manchayta phiñakorqa”.+
13 “Angelesta kamachej Jehová Diosqa nin: ‘Wajyashajtiy* paykunaqa mana uyarimuwarqankuchu,+ chayrayku noqapis qhaparikamushawajtinku mana paykunata uyarerqanichu.+ 14 Paykunataqa muyoj wayrawan tʼaqaracherqani mana rejsisqanku tukuy nacionesman.+ Tiyakorqanku chay naciontaj chʼimpacha qhepakorqa, mana pipis chayninta pasarqachu nitaj pasamorqachu,+ chay sumaj jallpʼata mancharinaman tukuchisqankurayku’, nispa”.
8 Angelesta kamachej Jehová Diosmanta watejmanta uj willayta japʼerqani. Pay niwarqa: 2 “Angelesta kamachej Jehová Diosqa nin: ‘Sonqo kʼajaywan Sionta jarkʼakusaj,+ manchay phiñasqa payta jarkʼakusaj’, nispa”.
3 “Jehová Diosqa kayta nin: ‘Sionman kutimusaj,+ Jerusalenpitaj tiyakusaj.+ Jerusalentaqa atienekunapaj llajta nenqanku.+ Angelesta kamachej Jehová Diospa orqontataj santo orqo nenqanku’,+ nispa”.
4 “Angelesta kamachej Jehová Diosqa kayta nin: ‘Jerusalén plazaspeqa watejmanta tiyarikonqanku awelitospis awelitaspis, sapa ujninku tojnunku japʼirisqa allin machitusña kasqankurayku.+ 5 Chay llajta plazaspeqa may chhika lloqallitus, may chhika imillitas pujllarenqanku’,+ nispa”.
6 “Angelesta kamachej Jehová Diosqa kayta nin: ‘Chay pʼunchaykunapi llajtaymanta puchojkunapaj mana atikunanpaj jina kajtinpis, ¿noqapajpis mana atikunanpaj jinallatajchu kanman?’, nispa nin angelesta kamachej Jehová Diosqa”.
7 “Angelesta kamachej Jehová Diosqa nin: ‘Llajtayta salvasaj inti llojsimuy lado jallpʼasmanta orqhomuspa, inti yaykuy lado jallpʼasmanta orqhomuspa.+ 8 Paykunata pusamusaj, Jerusalenpitaj tiyakonqanku.+ Paykunaqa nacionniy kanqanku, noqataj cheqa Diosninku kasaj,+ cheqan Diosninkutaj’, nispa”.
9 “Angelesta kamachej Jehová Diosqa kayta nin: ‘Wapus kaychej,+ qankuna profetaspa kay parlasqankuta uyarejkuna.+ Chayllatataj nerqanku angelesta kamachej Jehová Diospa wasinpa cimientosninta churashajtinku templota ruwanankupaj. 10 Niraj chay tiempo chayamushajtenqa mana pagakojchu ni runasmanpis ni uywasmanpis.+ Enemigosraykutaj jamuytapis riytapis manchachikoj kanku, tukuy runasta paykunapurata chejninachisqayrayku’, nispa.
11 ”Angelesta kamachej Jehová Diosqa nin: ‘Kay llajtamanta puchojkunataqa manaña unay jinachu ruwasaj.+ 12 Sonqo tiyasqa kaymanta muju tarpusqa kanqa. Uva sachʼaqa poqonqa, jallpʼapis sumajta poqochenqa,+ cielopis chhullachimonqa. Tukuy chaytaqa kay llajtamanta puchojkunaman herenciata jina qopusaj.+ 13 Judá nación, Israel nación, imaynatachus nacionesqa sutiykichejta oqharispa maldicerqanku,+ ajinallatataj sutiykichejta oqharispa bendicenqanku.+ Noqa qankunata salvasqaykichej. Ama manchachikuychejchu.+ Wapus kaychej’.+
14 ”Angelesta kamachej Jehová Diosqa kayta nin: ‘“Imaynatachus nerqani qankunaman ñakʼariyta apachimunayta ñaupa tatasniykichej phiñachiwasqankurayku, nitaj pesachikorqanichu”,+ nispa nin angelesta kamachej Jehová Dios, 15 “ajinallatataj kunanpis niniña Jerusalenpaj, Judá nacionpajpis allin kajta ruwapunayta.+ Ama manchachikuychejchu”’.+
16 ”‘Qankunaqa kay imasta ruwanaykichej tiyan: ama llullasta willanakuychejchu,+ punkusniykichejpi juzgashaspaqa cheqan kajta ruwaychej, runastapis yanapaychej allinta kausakunankupaj.+ 17 Ama sonqoykichejpi wakichikuychejchu sajra kajta ruwanakunaykichejpaj,+ amaña llullakuspa juraychejchu.+ Noqaqa chay tukuy imasta chejnikuni’,+ nispa nin Jehová Diosqa”.
18 Angelesta kamachej Jehová Diosmanta watejmanta uj willayta japʼerqani. Pay niwarqa: 19 “Angelesta kamachej Jehová Diosqa kayta nin: ‘Tawa kaj killapi+ ayunopis, phishqa kaj killapi+ ayunopis, qanchis kaj killapi+ ayunopis, chunka kaj killapi+ ayunopis Judá nacionpaj jatun kusiy kanqa. Kusikuy fiestas kanqa.+ Chayrayku cheqan kajta, allin kausaytapis munakuychej’.
20 ”Angelesta kamachej Jehová Diosqa kayta nin: ‘Uj pʼunchayqa llajtas, ashkha llajtasmanta runaspis jamonqanku. 21 Uj llajtapi tiyakojkunaqa waj llajtapi tiyakojkunaman nimonqanku: “Jaku. Jehová Diospa khuyakuyninta mañakamuna, angelesta kamachej Jehová Diosta maskʼamuna. Noqapis rillasajtaj”,+ nispa. 22 Ashkha llajtas, atiyniyoj nacionespis Jerusalenman jamonqanku angelesta kamachej Jehová Diosta maskʼaj,+ Jehová Diospa khuyakuyninta mañakoj’.
23 ”Angelesta kamachej Jehová Diosqa kayta nin: ‘Jaqay pʼunchaykunapeqa nacionesmanta tukuy laya* parlayniyoj chunka runas+ uj judío runaj ropanmanta* kallpawan japʼiykukonqanku, nenqankutaj: “Qankunawan riyta munayku.+ Uyariyku Dios qankunawan kashasqanta”,+ nispa’”.
9 Kayqa uj willay:
“Jehová Diosqa Hadrac jallpʼaj contranta willan,
astawanqa Damascoj contranta.+
2 Willallantaj ladonpi kaj Hamatpa contranta,+
Tiroj contranta,+ Sidonpa contrantapis,+ paykunaqa manchay yachayniyoj kanku.+
3 Tiroqa jarkʼakunanpaj sumaj perqasta* ruwakorqa.
Qolqe metalta ñutʼu jallpʼata jina tantaykorqa,
qoritapis callesmanta tʼuruta jina.+
5 Asquelonqa chayta rikuspa mayta mancharikonqa,
Gazaqa manchayta llakikonqa,
Ecronpis llakikullanqataj, atienekusqan llajta pʼenqaypi rikhurisqanrayku.
Gazaqa manaña reyniyojchu kanqa,
Asquelonpipis manaña runas tiyakonqankuchu.+
6 Asdodpeqa wajpa wawan tiyakaponqa,
filisteoj jatunchakusqantapis tukuchisaj.+
7 Siminmanta qhechusaj yawarchasqa imasta,
kirusninmantapis millachikuna imasta.
Payqa* kashallanqaraj Diosninchejpaj.
Capatazkunaqa* manaña chayninta pasanqankuchu.+
Chaytaqa* ñawisniywan rikuni.
9 Sionpa warmi wawan, manchayta kusikuy.
Jerusalenpa warmi wawan, atipasqaykimanta kusiywan qhapariy.
Reyniykeqa qanman jamushan.+
Payqa cheqan kajta ruwan, salvaciontataj apamushan,*
payqa kʼumuykukoj sonqoyoj,+ burropitaj montasqa jamushan,
maltón burropi, china burroj uñanpi.+
10 Maqanakuna carretata Efrainmanta chinkachisaj,
caballotapis Jerusalenmanta chinkachisaj.
Maqanakunapaj flechana arcopis* manaña kanqachu.
Paytaj allin kausaymanta nacionesman parlanqa.+
Pay kamachenqa ujnin mar qochamantapacha ujnin mar qochakama,
11 Warmi, tratota yawarwan ruwasqaykiwan
presosniykita chʼaki tʼoqomanta kacharichisaj.+
12 Suyakuyniyoj presochasqas, kutinpuychej sumaj perqasniyoj llajtaman.+
Kunan pʼunchay willasqayki:
‘Warmi, uj jinantawanraj tʼinkata qosqayki.+
13 Judataqa flechana arcoyta jina sumajta matʼiykusaj.*
Efrainqa kacharinay flecha kanqa.
Sion, wawasniykita rijchʼarichisaj,
Grecia, wawasniykej contranta.
Qantaqa* soldadoj espadanman jina tukuchisqayki’.
14 Jehová Diosqa paykunaj patankupi rikukonqa,
kacharisqan flechaqa rayo jina llojsimonqa.
Tukuyta Kamachej Señor Jehová Diosqa wajrata waqachimonqa,+
sur ladomanta* sinchʼi wayraswan jamonqa.
15 Angelesta kamachej Jehová Dios paykunata jarkʼakonqa,
paykunataj warakʼaj rumisninta oqoykonqanku, saruranqankutaj.+
Tomanqanku, chʼajwarenqankutaj vinotapis tomaykunkuman jina,
fuente jina juntʼas kanqanku,
16 Chay pʼunchayqa Jehová Diosninku paykunata salvanqa
tropa ovejasninta jina, llajtanta jina.+
Paykunaqa coronaj kʼachitu rumisnin jina kanqanku, pampanpi lliphipispa.+
17 Payqa manchay kʼachapuni,+
manchay kʼachitupunitaj.
Jovenestaqa mikhuy kallpachanqa,
doncellastapis mosoj vino kallpachanqa”.+
10 “Paray tiempopi Jehová Diosmanta parata mañakuychej.
Jehová Diosmin yana phuyusta rikhurichin,
runaspaj sumajta parachimun,+
tukuypajpis jallpʼata qʼomeryarichin.
Qhasi manakaj mosqoykunamanta parlanku,
qhasillata sonqochaytapis munanku.
Chayrayku runasqa ovejas jina puriykachanqanku,
mana michejniyoj kasqankuraykutaj ñakʼarenqanku.
3 Michejkunapaj phiñasqa kashani,
sajra kamachejkunamantapis* cuentata mañasaj.
Angelesta kamachej Jehová Diosqa qhawarimun tropa ovejasninta,+ Judá nacionta.
Paykunataqa maqanakupaj sumaj caballonman jina tukuchin.
4 Judamanta jamun kuraj kamachej,*
paymanta jamun yanapaj kamachej,*
paymanta jamun maqanakupaj flechana arco,*
paymanta llojsimunku tukuy cargoyoj kajkuna,* tukuyninku ujllapi.
5 Paykunaqa soldadosman jina tukonqanku,
maqanakupi kashaspa callespi tʼuruta saroj soldadosman jina.
Jehová Dios paykunawan kasqanrayku maqanakonqanku.+
Caballospi purejkunataj pʼenqaypi rikhurenqanku.+
6 Judá nacionta aswan sumajman tukuchisaj,
Josejpa familiantapis salvasaj.+
Paykunata kutichimusaj
khuyakusqayrayku.+
Paykunaqa manapis ni jaykʼaj wijchʼuymanchu karqa ajina kanqanku.+
Noqamin Jehová Diosninku kani, noqa paykunaman kutichisaj.
7 Efrainmanta kajkunaqa wapu soldadoman jina tukonqanku,
Sonqonkoqa kusirikonqa vinota tomajkunajta jina.+
Wawasninkoqa chayta rikuspa kusikonqanku,
sonqonkoqa Jehová Diosrayku kusikonqa.+
8 ‘Silbarisaj paykunata tantaykunaypaj.
Paykunata kacharichisaj,+ paykunataj ashkhayanqanku,
jina ashkhallapunitaj kanqanku.
9 Waj nacionesman mujuta jina tʼakarajtiypis,
paykunaqa chay karu lugarespi noqamanta yuyarikonqanku.
Wawasninkuwan khuska kausarispa kutimonqanku.
10 Egipto jallpʼamantapacha paykunata kutirichimusaj,
Asiriamantapacha tantamusaj.+
Pusasajtaj Galaad+ jallpʼaman, Libanomanpis.
Chaypitaj mana tukuyninkupaj campo kanqachu.+
11 Payqa mar qochanta pasashaspa ñakʼarichenqa,
mar qochapi qhollchoqeyasqanta wajtanqa.+
Niloj ukhu yakusnenqa chʼakiponqa.
Asiriaj jatunchakusqanqa chinkachisqa kanqa,
Egiptoj kamachina varanpis karunchakonqa.+
12 Noqa Jehová Diosqa noqanejta paykunata pataman oqharisaj,+
paykunataj sutiypi purenqanku’,+ nispa nin Jehová Diosqa”.
11 “Líbano, punkusniykita kichariy,
cedro sachʼasniykita nina ruphaykunanpaj.
2 Enebro sachʼa, waqay, cedro sachʼaqa urmanña.
Sumaj sachʼasqa pampachasqaña kanku.
Basanmanta roble sachʼas, waqaychej.
Kʼiski sachʼasniyoj monteqa qʼala pampachasqaña.
3 Uyariychej, michejkunaqa waqashanku.
Jatunpaj qhawasqa kasqanku chinkapun.
Uyariychej, maltón leonesqa qhaparishanku.
Jordán mayu kantupi monte sachʼasqa pampachasqa kanku.
4 ”Jehová Diosneyqa kayta nin: ‘Wañuchisqa kanankupaj kashanku chay ovejasta michiy.+ 5 Rantikojkunaqa wañurachinku,+ nitaj juchayojchu rikhurinku. Vendeykojkunataj+ ninku: “Jehová Dios jatunchasqa kachun, kaywanqa qhapajyaykusaj”, nispa. Chay ovejasta michejkunaqa ni imaynitata paykunata khuyarinkuchu’,+ nispa.
6 ”Jehová Diosqa nin: ‘Kay nacionpi tiyakojkunataqa manaña ujtawan khuyakusajchu. Tukuy runasta runa masinkoj makinkuman, reyninkoj makinkuman jaywaykusaj. Paykunaqa tukuy nacionnintinta tukuchenqanku, nitaj makisninkumanta kacharichisajchu’, nispa”.
7 Wañuchisqa kanankupaj kasharqanku chay ovejasta michiyta qallarerqani.+ Tropamanta llakisqa kajkuna, qankunarayku chayta ruwarqani. Iskay tojnusta oqharerqani: ujnintaqa Kʼacha nispa suticharqani, ujnintataj Ujchay nispa suticharqani,+ chay tropa ovejastataj michej churakorqani. 8 Uj killallapi kinsa michejkunata wijchʼorqani manaña paykunawan pacienciakuyta atispa. Paykunapis chejnikullawarqankutaj. 9 Ajinapitaj nerqani: “Manaña michisqaykichejchu. Wañunanpaj kashan chay ovejaqa jina wañuchun. Manaña kausananpaj jina kashan chaypis wañullachuntaj. Puchojkunataj paykunapura aychasninkuta mikhunakuchunku”, nispa. 10 Chantá Kʼacha nisqa tojnuyta+ japʼispa pʼakirarqani. Ajinamanta tukuy llajtaswan tratota ruwasqayta pʼakerqani. 11 Chay pʼunchay pʼakisqa karqa. Tropamanta llakisqa kajkunataj qhawashawarqanku, repararqankutaj chayqa Jehová Diosmanta uj willay kasqanta.
12 Chantá paykunata nerqani: “Munaspaqa pagoyta qopuwaychej. Mana munaspaqa jina japʼikapuychej”, nispa. Paykunataj pagapuwarqanku 30 qolqesta.*+
13 Chantá Jehová Diosqa niwarqa: “Qolqe churanaman choqaykamuy chay jina sumaj valorniyojta qhawawaspa pagawasqankuta”,+ nispa. Chayrayku chay 30 qolqesta japʼispa Jehová Diospa wasinpi qolqe churanaman choqaykamorqani.+
14 Chantá Ujchay nisqa tojnuytañataj+ pʼakerqani, ajinamanta Judawan Israelwan allinta kausakusqankuta pʼakerqani.+
15 Jehová Diostaj niwarqa: “Kunanqa ni imapaj valej michejpa imasninta oqhariy.+ 16 Noqaqa saqellasaj kay nacionpi uj michej rikhurinanta. Payqa mana cuidanqachu wañunankupajña kashanku chay ovejastaqa.+ Uña ovejitastapis mana maskʼamonqachu, nanasqa kajkunatapis mana jampiykonqachu,+ sano ovejastapis mana mikhuchenqachu. Astawanqa wira ovejaspa aychasninkuta mikhukaponqa,+ sillusninkutapis orqhoranqa.+
17 Ay qhasi manakaj michejniymanta,+ tropa ovejasta saqerajmanta.+
Uj espada wajtaykonqa ujnin makinta, paña ñawintawan.
Makenqa qʼalata chʼakiponqa,
paña ñawinpis qʼalata ciegoyaponqa”.*
12 Kayqa uj willay:
“Kayqa Israelmanta Jehová Diospa parlasqan”, nispa nin Jehová Diosqa.
2 “Jerusalentaqa uj copaman tukuchisaj, chaytaj muyuyninmanta tukuy llajtasta chankaykachachenqa.* Judaj contranpi, Jerusalenpa contranpipis uj cerco kanqa.+ 3 Chay pʼunchayqa Jerusalenta uj llasa rumiman tukuchisaj tukuynin llajtaspaj. Chay rumita tukuy oqharejkunaqa mayta nanaykuchikonqanku,+ jallpʼantinmanta tukuy nacionestaj contranpi tantaykusqa kanqanku”.+ 4 Jehová Diosqa nin: “Chay pʼunchayqa tukuynin caballosta manchaykuchisaj, chay caballospi montasqa kajkunatapis locoyachisaj. Judá naciontaqa sumajta qhawasaj, llajtaspa tukuynin caballosninkutataj ciegoyachisaj. 5 Judamanta kurajkunataj* sonqonkupi nenqanku: ‘Jerusalenpi tiyakojkunaqa angelesta kamachej Jehová Diosninkumanta jamoj kallpa noqanchejpaj kanku’,+ nispa. 6 Chay pʼunchayqa Judamanta kurajkunata llantʼa chaupipi brasasman tukuchisaj, gavillas* chaupipi laurarishaj ninaman tukuchisaj,+ ruphaykonqankutaj muyuyninkumanta tukuynin nacionesta, paña ladoman lloqʼe ladomanpis.+ Jerusalenmanta runastaj watejmanta Jerusalén llajtankupi tiyakonqanku.+
7 ”Jehová Diosqa Judaj toldo wasisninta* ñaupajta salvanqa, ajinamanta Davidpa familianmanta* kajkuna, Jerusalenpi tiyakojkunapis, Judamanta nisqa ama aswan jatunpaj qhawasqa kanankupaj. 8 Chay pʼunchay Jehová Diosqa Jerusalenpi tiyakojkunata jarkʼanqa.+ Paykunamanta aswan llauchhi kajqa* chay pʼunchay David jina kanqa. Davidpa familiantaj Dios jina kanqa, ñaupaqenkuta rej Jehová Diospa angelnin jina.+ 9 Chay pʼunchayqa Jerusalenwan maqanakoj tukuy nacionesta chinkarparichisajpuni.+
10 ”Davidpa familianman, Jerusalenpi tiyakojkunamanpis espirituyta tʼakaykamusaj. Paykunaqa ñaupaqeypi allinpaj qhawasqa kanqanku, rogakuwanqankutaj. Pitachus tʼojsisqankuta rikonqanku,+ paymantataj mayta waqanqanku kʼata wawankumanta jina,* sonqo nanayta waqanqanku kuraj wawankumanta jina. 11 Chay pʼunchay Jerusalenpa waqasqanqa may sinchʼi kanqa, Meguidó+ pampaspi Hadadrimonpi waqasqanku jina. 12 Nacionnintin waqanqanku, sapa familia waj wajta waqanqanku: Davidpa mirayninmanta familia wajta, warmisninkupis wajta, Natanpa+ mirayninmanta familia wajta, warmisninkupis wajta, 13 Levijpa mirayninmanta familia+ wajta, warmisninkupis wajta, simeitaspa familianku+ wajta, warmisninkupis wajta, 14 jinallataj tukuynin puchoj familiaspis, sapa familia waj wajta, warmisninkupis wajta.
13 ”Chay pʼunchayqa uj pozo allasqa kanqa, Davidpa familianmanta kajkunapis Jerusalenpi tiyakojkunapis llimphuchasqa kanankupaj juchankumanta, chʼichipaj qhawasqa kasqankumantapis”.+
2 Angelesta kamachej Jehová Diosqa nin: “Chay pʼunchayqa nacionmanta chinkachisaj santospa sutisninkuta,+ manaña yuyarisqachu kanqanku. Nacionmanta chinkachillasajtaj profetasta,+ millay imasta ruwachej atiytawan. 3 Sichus uj runa ujtawan profeta jina parlanman chayqa, tatanpis mamanpis, pikunachus payta rikhuricherqanku, nenqanku: ‘Kunanqa wañunki, Jehová Diospa sutinpi llullasta parlasqaykirayku’, nispa. Chantá tatanpis mamanpis, pikunachus payta rikhuricherqanku, tʼojserpanqanku profeta jina parlasqanrayku.+
4 ”Chay pʼunchay profetasqa, pʼenqakonqanku profetas jina parlayta mosqoypi jina rikusqankumanta. Pelomanta ruwasqa profeta ropasninkutapis mana churakonqankuchu+ wajkunata engañanankupaj. 5 Sapa ujninkutaj nenqanku: ‘Mana profetachu kani, chajra runa kani. Jovenniypi uj runa rantikapuwarqa’, nispa. 6 Sichus pipis tapunman ‘¿imanakorqankitajri? Chay jina heridasniyki kasqa cuerpoykipeqa’* nispa chayqa, payqa kutichenqa ‘kay heridasniytaqa amigosniypa* wasinpi ruwaykuwanku’ nispa”.
7 Angelesta kamachej Jehová Diosqa kayta nin: “Espadáy, michejniypa contranta rijchʼariy,+
amigoy kashan chay runaj contranta.
Michejta wañuchiy,+ ovejastaj chʼeqerasqa* kachunku.+
Mana kasuy runaspa contranpi makiyta oqharisaj”, nispa.
8 Jehová Diosqa nin: “Tukuynin nacionnintinpi
sapa kinsamanta iskay wañuchisqa kanqanku,
ujlla mana wañuchisqachu kanqa.
9 Chay mana wañojkunatataj ninanta pasachisaj.
Paykunataqa qolqe metalta jina chʼuwachasaj,
qorita jina allinta qhawaykusaj.+
Paykunaqa sutiyta oqharenqanku,
noqataj kutichimusaj.
Noqaqa nisaj: ‘Paykunaqa llajtay kanku’, nispa.+
Paykunataj nenqanku: ‘Diosniykoqa Jehová’, nispa”.
14 “Uj pʼunchay chayamushan, chay pʼunchayqa Jehová Diospa pʼunchaynin. Chay pʼunchayqa tukuy imaykita chaupiykipi* partinakuspa apakaponqanku. 2 Tukuynin nacionesta tantamusaj Jerusalenwan maqanakunankupaj. Llajtata japʼikaponqanku, wasista chʼusajchanqanku, warmistapis violanqanku. Llajtamantaqa khuskantapuni presosta jina apakaponqanku, puchoj runastaj mana llajtamanta tukuchisqachu kanqanku.
3 ”Jehová Diosqa llojsimuspa chay nacioneswan maqanakonqa,+ imaynatachus maqanakuna pʼunchaypi maqanakun ajinata.+ 4 Chay pʼunchay chakisnenqa Olivos orqopi+ kanqa, Jerusalenpa chimpanpi, inti llojsimuy ladopi. Chay Olivos orqotaj iskayman partikonqa, chaupinpitaj jatun mayu kichakonqa inti llojsimuy ladomantapacha inti yaykuy ladokama.* Khuskan orqoqa norte ladoman* kuyurenqa, khuskantaj sur ladoman.* 5 Qankunataj chay orqosniy chaupipi kaj mayuman ayqenkichej. Chay mayoqa Azelkama chayanqa. Imaynatachus Judapi rey Uzías kamachishajtin jallpʼa kharkatitisqanrayku ayqekorqankichej, ajinata ayqekunkichej.+ Jehová Diosniytaj jamonqa, tukuy llimphupaj qhawasqa kajkunataj paywan kanqanku.+
6 ”Chay pʼunchayqa mana ima lliphipej kʼanchaypis kanqachu:+ Tukuy imasqa chhullunkasqa* kanqa. 7 Chay pʼunchayqa Jehová Diospa pʼunchaynin nisqa kanqa.+ Ni pʼunchaypis ni tutapis kanqachu. Chʼisiyaykuytataj kʼanchay kanqa. 8 Chay pʼunchayqa kausay yakus+ Jerusalenmanta llojsimonqa:+ Khuskanqa inti llojsimuy mar qocha* ladoman,+ khuskantaj inti yaykuy mar qocha* ladoman.+ Chayqa kanqa qʼoñi tiempopi, chiri tiempopipis. 9 Jehová Diosqa tukuy jallpʼantinmanta Rey kanqa.+ Chay pʼunchayqa Jehová Dioslla yupaychasqa kanqa,+ sutillan jatunchasqa kanqa.+
10 ”Tukuy nacionqa Arabaman+ jina tukonqa, Guebamantapacha+ Rimonkama,+ Jerusalenpa sur ladonpi. Jerusalentaj pataman oqharisqa kanqa, lugarninman.+ Runastaj watejmanta chaypi tiyakonqanku Benjamín Punkumantapacha+ Ñaupa Punkunejkama, Esquina Punkukama, Hananel Torremantapacha+ reypa uva sarunasninkama. 11 Jerusalenpeqa watejmanta runas tiyakonqanku, niñataj jaykʼajpis juchachasqachu kanqa thuñisqa kananpajqa.+ Chaypitaj ni imamanta manchachikuspa tiyakonqanku.+
12 ”Jerusalenwan maqanakorqanku chay tukuynin nacionesta Jehová Diosqa kay jinata castiganqa:+ Aychasninkoqa sayasqallaraj kashajtinku qʼetayaykonqa, ñawisninkupis ñawi tʼoqosninkupi qʼetayaykonqa, qallunkupis siminkupi qʼetayaykonqa.
13 ”Chay pʼunchay Jehová Diosqa sinchʼi manchariyta paykunaman chayachimonqa. Sapa ujqa runa masinta makinmanta japʼenqa, makintataj oqharenqa runa masinpa contranpi.*+ 14 Judapis Jerusalenpi maqanakullanqataj. Muyuyninpi kaj tukuy nacionesmantataj kapuyninkuta qhechonqanku: qorita, qolqe metalta, ashkha ropastawan.+
15 ”Chay jina castigoqa chayamullanqataj caballosman, mulasman, camellosman, burrusman, chay campamentosmanta* tukuynin animalesmanpis.
16 ”Jerusalenwan maqanakorqanku chay tukuynin nacionesmanta puchojkunaqa sapa wata wicharimonqanku+ Reypa ñaupaqenpi kʼumuykukunankupaj,* angelesta kamachej Jehová Diospa ñaupaqenpi kʼumuykukunankupaj,+ Chʼujllas Fiestatapis ruwanankupaj.+ 17 Sichus pipis kay jallpʼapi chay nacionesmanta mana Jerusalenman wicharimonqachu Reypa ñaupaqenpi kʼumuykukunanpaj, angelesta kamachej Jehová Diospa ñaupaqenman chayqa, mana chay nacionpi paranqachu.+ 18 Egipto nacionchus mana wicharimonqachu, nitaj kayman yaykumonqachu chayqa, manallataj chay nacionpipis paranqachu. Astawanqa Jehová Dios castiganqa, ima castigowanchus castiganqa Chʼujllas Fiestata ruwanankupaj mana wicharimoj nacionesta chay castigollawantaj. 19 Chaymin castigoqa kanqa Egiptoj juchanmanta, tukuynin nacionespa juchankumantapis, Chʼujllas Fiestata ruwaj mana wicharimusqankumanta.
20 ”Chay pʼunchay caballospa campanillasninpi kay jina qhelqasqa kanqa: ‘Jehová Diosmin llimphoqa’.+ Jehová Diospa wasinpi mankaspis*+ altarpa ñaupaqenpi fuentes+ jina kanqanku. 21 Jerusalenpi, Judapi tukuy mankasqa* llimphupaj qhawasqa kanqanku, angelesta kamachej Jehová Diospata kanqanku. Uywa wañuchisqasta jaywaj jamojkunaqa yaykumuspa wakin mankaspi waykʼonqanku. Chay pʼunchayqa manaña cananeos* kanqachu angelesta kamachej Jehová Diospa wasinpi”.+
Glosariopi profeta nisqata leeriy.
Zacarías suteqa niyta munan Jehová yuyarikun.
Yanapa B15 nisqata leeriy.
Chʼeqerachiy: waj lugarespi ninku tʼaqarachiy.
Chayri “pata lado”.
Glosariopi kuraj kaj sacerdote nisqata leeriy.
Chayri “wasi patiosniymanta cargoyoj kanki”.
Ijiy: waj lugarespi ninku chʼillchiy, retoñay.
Chayri “Uj candelabrota”.
Chayri “Pitaj juchʼuy imasta”.
Hebreo parlaypeqa nin, “rumita, estañota”.
Olivo rama nispaqa ashkha aceitunasniyoj olivo ramasmanta parlashan.
Glosariopi kʼuyuna libro nisqata leeriy.
Hebreo parlaypeqa nin, “largonman 20 codosniyoj, anchonmantaj chunka codosniyoj”. Uj codoqa 44,5 centímetros karqa. Yanapa B14 nisqata leeriy.
Efá nispaqa uj canastamanta parlashanman chayri waj imamanta, chaytaj karqa uj efata midinapaj. Uj efaqa karqa 22 litrosniyoj. Yanapa B14 nisqata leeriy.
Chayri “titimanta”.
Lijra: waj lugarespi ninku ala.
Sinar nispaqa Babiloniamanta parlashan.
Lunku: waj lugarespi ninku alqa.
Glosariopi espíritu nisqata leeriy.
Chayri “pata lado”.
Chayri “ura lado”.
Chayri “Allin sumaj coronata”.
Ijiy: waj lugarespi ninku chʼillchiy, retoñay.
Glosariopi sacerdote nisqata leeriy.
Chay iskaynin ruwanas nispaqa parlashan gobernananmanta, sacerdote kananmantawan.
Chayri “Chay iskaynin ruwanas allinpi kanqanku”.
Chayri “Chay allin sumaj coronaqa”.
Yanapa B15 nisqata leeriy.
Chayri “templonmanta”.
Hebreo parlaypeqa niyta munan mana tukukoj munakuy, mana tukukoj kʼacha kay. Glosariopi mana tukukoj munakuy nisqata leeriy.
Chayri “engañaychejchu”.
Chayri “mana tatayoj wawasta”.
Chayri “tercos karqanku”.
Ichá nillanmantaj “duro rumita jina”. Chaytaj kanman karqa esmeril rumi.
Hebreo parlaypeqa nin, “Pay wajyashajtin”.
Chayri “tukuy rijchʼaj”.
Chayri “ropanpa ura kantunmanta”.
Uj aylloqa uj familiamanta miraj ashkha familias kanku.
Chayri “ura perqata”.
Payqa nispaqa parlashan 6 versiculopi filisteomanta.
Chayri “Tropa soldados jina”.
Chayri “Ñakʼarichejkunaqa”.
Chaytaqa nispaqa llajtanpa ñakʼarisqanmantasina parlashan.
Chayri “atipajtaj”, “salvasqataj”.
Flechana arco: waj lugarespi ninku camba flecha.
Mayu nispaqa Éufrates mayumanta parlashan.
Hebreo parlaypeqa nin, “sarusaj”.
Qantaqa nispaqa Sionmantasina parlashan.
Chayri “ura ladomanta”.
Glosariopi altar nisqata leeriy.
Hebreo parlaypeqa nin, “Terafim santosqa”.
Llullasllata nispaqa ichapis parlashan imaymana layqeriosmanta.
Hebreo parlaypeqa nin, “chivosmantapis”.
Hebreo parlaypeqa nin, “esquina torre”. Uj runata esquina torre nispaqa importante kasqanta nishan, patrón kasqanta.
Chayri “clavo”. Uj runata clavo nispaqa yanapakoj kasqanta nishan, uj kamachej kasqanta.
Flechana arco: waj lugarespi ninku camba flecha.
Chayri “capatazkuna”.
Chay qolqesqa qolqe metalmanta ruwasqa karqanku.
Hebreo parlaypeqa nin, “laqhayaponqa”.
Hebreo parlaypeqa nin, rúaj. Glosariopi espíritu nisqata leeriy.
Chankaykachay: waj lugarespi ninku tharpiykachay, aylinkachay, thamaykachay.
Chay kurajkunaqa karqanku uj ayllumanta kurajkuna.
Chayri “marqʼas”.
Chayri “carpa wasisninta”.
Chayri “mirayninmanta”.
Chayri “Paykunamanta miskʼajqa”.
Chayri “sapan wawankumanta jina”.
Hebreo parlaypeqa nin, “makisniyki chaupipi”. Kanman pechonpipis wasanpipis.
Chayri “munakuwajkunaj”.
Chʼeqeray: waj lugarespi ninku tʼaqaray.
Chaupiykipi nispaqa Jerusalenmanta parlashan.
Hebreo parlaypeqa nin, “mar qocha ladokama”.
Chayri “pata ladoman”.
Chayri “ura ladoman”.
Chayri “mana kuyuspa”. Chirirayku sayarpankumanpis jina.
Chay mar qochaqa sutikun Wañusqa qocha.
Chay marqa sutikun mar Mediterráneo.
Chayri “uj runataj waj runata maqanqa”.
Campamentoqa ashkha toldo wasis.
Chayri “Reyta yupaychanankupaj”.
Chayri “jatun simiyoj mankaspis”.
Chayri “jatun simiyoj mankasqa”.
Ichá nillanmantaj “vendejkuna”.