MALAQUÍAS

1 Kayqa uj willay.

Kayqa Malaquiasnejta* Jehová Diosmanta Israelpaj uj willay.

2 Jehová Diosqa nin: “Qankunataqa munakuykichej”,+ nispa.

Qankunatajrí nishankichej: “¿Imaynapí yachaykuman munakuwasqaykutari?”, nispa.

Jehová Diosqa nin: “¿Manachu Esauqa Jacobpa hermanon karqa?+ Noqaqa Jacobta munakorqani, 3 Esautataj chejnikorqani.+ Tiyakusqan orqostaqa chʼimpachata saqerqani,+ herenciantaqa chʼinnejmanta kʼita alqospaj saqeporqani”,+ nispa.

4 “‘Thuñisqa karqanchej chaypis, kutispa chay thuñisqa wasisninchejta watejmanta sayarichimusunchejʼ nispa Edom nejtinpis, angelesta kamachej Jehová Diosqa nin: ‘Paykunaqa sayarichenqanku, noqataj thuñisaj. Paykunataqa nenqanku “sajra runaspa jallpʼan” “Jehová Diospa wiñaypaj juchachasqan runas” kasqankuta.+ 5 Qankunaqa chayta kikin ñawisniykichejwan rikuspa ninkichej: “Jehová Diosqa tukuynin Israel jallpʼapi jatunchasqa kachun”, nispa’”.

6 “‘Uj wawaqa tatanta jatunpaj qhawan,+ uj kamachipis patronninta jatunpaj qhawan. Chayrayku noqachus tataykichej kani chayqa,+ ¿maytaj jatunpaj qhawawasqaykichejri?+ Noqachus patronniykichej* kani chayqa, ¿maytaj respetowan qhawawasqaykichejri?’, nispa nisunkichej angelesta kamachej Jehová Diosqa, qankuna sacerdotesman.* Qankunaqa sutiyta pisipaj qhawankichej.+

”‘Chantá ninkichejraj: “¿Imata ruwaspataj sutiykita pisipaj qhawaykuri?”, nispa’.

7 ”‘Altarniypi* chʼichipaj qhawasqa mikhuyta jaywashawankichej’

”‘Chantá nishankichejraj: “¿Imata ruwaspataj qanta chʼichichaykuri?”, nispa’.

”‘¿Nichu qankunaqa ninkichej “Jehová Diospa mesantaqa+ pisipaj qhawayta atillanchej” nispa? 8 Qankunaqa ciego uywata jaywanata jina jaywashawaspa niyta yachankichej: “Mana juchachu”, nispa. Cojo uywata, onqosqa uywata jaywashawaspapis niyta yachallankichejtaj: “Mana juchachu”, nispa’”.+

“Ama jina kaspa kamachejniykiman chay jina uywasta jaywamuy. ¿Allin ñawiwanchu qhawasunkiman? ¿Kusisqachu japʼikusunkiman?”, nispa nin angelesta kamachej Jehová Diosqa.

9 “Kunantajrí ama jina kaspa Diosmanta mañakuychej, khuyakunawanchejta mañakuychej. Chay jina uywasta jaywajtiykichej, ¿kusisqachu ujnillaykichejtapis japʼikusunkichejman?”, nispa nin angelesta kamachej Jehová Diosqa.

10 “¿Mayqenniykichejtaj punkusllatapis wisqʼanman?*+ Nichá ninallatapis altarniypi mana qolqeraykoqa japʼichiwajchejchu”.+ Angelesta kamachej Jehová Diosqa nin: “Mana qankunawan kusisqachu kani. Nitaj ima ofrendaykichejpis kusichiwanchu”,+ nispa.

11 Angelesta kamachej Jehová Diosqa nin: “Inti llojsimuynejmantapacha inti yaykuynejkama suteyqa nacionespi jatunchasqa kanqa.+ Tukuynejpi jaywanasta qʼoshñichipuwanqanku, ofrendastapis sutiypi jaywanqanku. Chayqa llimphu jaywana kanqa. Suteyqa nacionespi jatunchasqa kanqa”,+ nispa.

12 “Qankunatajrí sutiyta chʼichichankichej,*+ ninkichejtaj: ‘Jehová Diospa mesanqa chʼichichasqa kashan. Chaypi kashan chay ofrendasqa, chay mikhunasqa pisipaj qhawasqa kanku’,+ nispa. 13 Qankunaqa nillankichejtaj: ‘Kayta ruwaspaqa saykʼuykuña’, nispa. Pisipajtaj chay ruwanasta qhawankichej”, nispa nin angelesta kamachej Jehová Diosqa. “Qankunaqa apamunkichej suwasqa uywasta, cojosta, onqosqasta. Chay jina uywasta regalota jina apamuwankichej. ¿Chay apamusqaykichejta japʼikullaymanchu?”,+ nispa nin Jehová Diosqa.

14 “Maldecisqa kachun sajra sonqoyoj runaqa, pichus tropanpi sano orqo uywan kapushajtin, Jehová Diospaj imallatapis ruwasaj nin, chantá uj mana sano uywanta jaywan. Noqaqa jatun Rey kani.+ Suteyqa naciones ukhupi manchachikunapaj jina, jatunchanapaj jinataj kanqa”,+ nispa nin angelesta kamachej Jehová Diosqa.

2 “Sacerdotes, kay kamacheyqa qankunapaj.+ 2 Sichus mana uyariyta munawankichejchu, sutiytapis mana tukuy sonqochu jatunchankichej chayqa, maldecisqaykichej,+ bendicionesniykichejtapis maldicionesman tukuchisaj.+ Chayta mana tukuy sonqochu ruwasqaykichejrayku bendicionestaqa maldicionesman tukuchini”, nispa nin angelesta kamachej Jehová Diosqa.

3 “Chayta ruwasqaykichejrayku tarpusqaykichej mujuta mana poqochisajchu.+ Fiestasniykichejpi jaywasqaykichej uywaspa akasnintaqa uyasniykichejman laqʼaykusqaykichej, aka wijchʼunamantaj wijchʼusqa kankichej. 4 Chaypi yachankichej noqa kay kamachiyta qankunaman qosqayta Leviwan tratota ruwasqay ama chinkapunanpaj”,+ nispa nin angelesta kamachej Jehová Diosqa.

5 “Chay tratoyqa kausay trato karqa, allin kausay trato. Chaykunataqa payman qorqani manchachikunawanpaj.* Payqa manchachikuwarqa, sutiytaqa tukuy sonqo jatunpaj qhawarqa. 6 Cheqa kajmanta leyta yachacherqa,+ nitaj jaykʼajpis sajrata parlarqachu. Noqawan allinta kausakorqa, cheqan kajta ruwaspataj karqa.+ Ashkhasta mana allin ñanmanta kutiricherqa. 7 Yachayqa sacerdotej siminpipuni kanan tiyan. Leymantaqa payta tapukunanku tiyan.+ Paymin angelesta kamachej Jehová Diospa willarajnin.

8 ”Chaywanpis qankunallataj ñanmanta karunchakunkichej. Qankunanejta ashkhas leyta mana kasunkuchu.+ Qankunaqa Leviwan tratota ruwasqayta pisipaj qhawankichej”,+ nispa nin angelesta kamachej Jehová Diosqa. 9 “Chayrayku pisipaj qhawachisqaykichej, kʼumuykachachisqaykichejtaj tukuynin runaspa ñaupaqenpi. Qankunaqa mana ñankunasniyta purerqankichejchu, astawanqa wakillanpaj leyta valecherqankichej”.+

10 “¿Nichu tukuyninchej uj tatayojlla kanchej?+ ¿Nichu tukuyninchejta uj Dioslla ruwawarqanchej? ¿Chanta imajtín purajmanta wasanchanakunchej+ ñaupa tatasninchejwan ruwasqan tratota pisipaj qhawaspari? 11 Judaqa wasanchan. Israelpipis Jerusalenpipis millay imas ruwakun. Judaqa Jehová Diospa llimphu kayninta* chʼichichan,+ Diospaj munasqa kashajtinpis. Waj llajtayoj diospa warmi wawanwan casaraykun.+ 12 Jehová Diosqa chayta ruwajta Jacobpa toldo wasisninmanta* chinkachenqa, pipis kachun, ofrendatapis angelesta kamachej Jehová Diosman jaywachun”.+

13 “Chantá wajtapis ruwallankichejtaj, chayraykutaj Jehová Diospa altarnenqa pʼampasqa kashan waqaywan, llakiywan, jikʼun jikʼunta waqaywan. Chaynejta Diosqa mana ofrendasniykichejta qhawarimunchu, nitaj ima jaywasqaykichejtapis allinpajchu qhawan.+ 14 Qankunataj tapunkichejraj: ‘¿Imarayku?’, nispa. Jehová Diosqa warmiykita wasanchasqaykimanta testigo, piwanchus jovenniykipi casarakorqanki. Payqa compañerayki kashanpis, paywan uj tratonejta ujchasqa kashankipis.*+ 15 Jinapis wakenqa mana chayta ruwarqankuchu. Paykunaqa Diospa llajtanpi wawasniyoj kayta munarqanku. Paykunaqa Diospa espiritunman jinaraj ruwanku. Qankunapis sonqoykichejta sumajta qhawarikuychej, amataj jovenniykichejpi casarakusqaykichej warmita wasanchaychejchu. 16 Noqaqa divorciota chejnikuni”,+ nispa nin Israelpa Diosnin Jehovaqa. “Wajkunata ñakʼarichejkunatapis chejnikuni”, nispa nin angelesta kamachej Jehová Diosqa. “Sonqoykichejta allinta qhawarikuychej, amataj wasanchaj runas kaychejchu.+

17 ”Qankunaqa parlasqaykichejwan Jehová Diosta saykʼuchinkichejña.+ Chantá nishankichejraj: ‘¿Ima nisqaykuwan saykʼuchiykuri?’, nispa. ¿Nichu qankunaqa nishankichej ‘Jehová Diosqa sajrata ruwajkunata allin runaspaj qhawan, paykunataqa allillanpaj qhawan’+ nispa? ¿Nichu qankuna nishankichej, ‘¿maytaj justiciata ruwaj Diosri?’ nispa?”.

3 Angelesta kamachej Jehová Diosqa nin: “Noqaqa willajniyta kachamusaj, payqa ñaupaqeypi ñanta pichanqa.*+ Maskʼashankichej chay cheqa Señorqa ujllata templonman jamonqa.+ Tratomanta willarajpis jamonqa, paytaqa kusiywan suyashankichej. Payqa jamonqapuni”, nispa.

2 “Chaywanpis, ¿pitaj chay jamunan pʼunchayta aguantanmanri? ¿Pay rikhurimojtin pitaj sayasqallapuni kayta atinmanri? Payqa metalta chʼuwachajpa ninan jina kanqa, tʼajsadorespa ushpha yakunku+ jinataj.* 3 Payqa tiyaykukonqa qolqe metalta chʼuwachaj runa jina,+ llimphuchaj runa jina, llimphuchanqataj Levijpa wawasninta. Paykunataqa qorita jina, qolqe metalta jina llimphuchanqa. Paykunataj Jehová Diosman ofrendata jaywaj cheqan runas kanqanku. 4 Judajtawan Jerusalenpatawan ofrendankoqa maytapuni Jehová Diosta kusichenqa, ñaupa tiempospi jina, unay wataspi jina”.+

5 Angelesta kamachej Jehová Diosqa nin: “Qankunaman qayllaykamuspa juzgasqaykichej. Usqhayllata juchachasaj layqasta,*+ qhenchachakojkunata, llullakuspa jurajkunata,+ juchachallasajtaj pikunachus peonesta,+ viudasta, mana tatayojkunata+ chʼaukiyanku* chaykunata, pikunachus forasterosta+ mana yanapariyta munankuchu chaykunatapis.* Kay runasqa mana manchachikuwankuchu”, nispa.

6 “Noqa Jehová Dios kani, kikillanpuni kani.+ Qankunataj Jacobpa wawasnin kankichej, manaraj tukuchisqachu kankichej. 7 Ñaupa tatasniykichejpa tiemponkumantapacha kamachisqasniymanta karunchakunkichej, nitaj kasukunkichejchu.+ Noqaman kutirikamuychej, noqapis qankunaman kutirikamusaj”,+ nispa nin angelesta kamachej Jehová Diosqa.

Qankunataj ninkichejraj: “¿Imata ruwaspataj qanman kutirikamuykumanri?”, nispa.

8 “¿Runallaqa atinmanchu Diosmanta suwakuyta? Qankunatajrí suwashawankichej”.

Chantá nishankichejraj: “¿Maykʼajtaj qanmanta suwarqaykuri?”, nispa.

“Qankunaqa sapa chunkamanta ujta* mana apamuwankichejchu, qonawaykichej kashan chaytapis mana qowankichejchu. 9 Qankunaqa suwashawankichej, chayrayku maldecisqapuni kashankichej.* Nacionnintin suwaykushawankichej. 10 Sapa chunkamanta ujta cabalta apamuychej jallchʼana wasiman,+ wasiypi mikhuna kananpaj.+ Ama jina kaspa, chayta ruwaspa pruebaman churawaychej, rikunkichejtaj cieloj punkusninta qankunapaj kicharimusqayta.+ Bendicionestataj tʼakaykamusqaykichej* ni ima pisisunaykichejkama”,+ nispa nin angelesta kamachej Jehová Diosqa.

11 “Qankunarayku tukuy imata tukuchejta* kʼamisaj, paytaj mana chajrasniykichejpa poqosqanta tukuchenqachu. Huertasniykichejpi uva sachʼasniykichejpis poqoyniyoj kanqa”,+ nispa nin angelesta kamachej Jehová Diosqa.

12 “Tukuy nacionesqa kusisqa runas nisonqachej.+ Qankunaqa kusisqa nacionman tukunkichej”, nispa nin angelesta kamachej Jehová Diosqa.

13 “Qankunaqa millaykunasta contraypi parlankichej”, nispa nin Jehová Diosqa.

Chantá nishankichejraj: “¿Maykʼajtaj noqaykupura contraykita parlarqaykuri?”,+ nispa.

14 “Qankunaqa ninkichej: ‘Diosta sirveyqa qhasi manakajlla.+ Niwasqanchejtaqa qhasillata ruwanchej. Angelesta kamachej Jehová Diospa ñaupaqenpi qhasillata llakisqa purinchej. 15 Kunanqa jatunchakojkunata kusisqas kasqankuta ninchej. Sajra imasta ruwajkunataqa allin rin.+ Diosta pruebaman churallanku, nitaj ima castigotapis japʼinkuchu’, nispa”.

16 Chay tiempopi Jehová Diosta manchachikojkunaqa paykunapura parlarikorqanku, sapa ujpis amigonwan. Jehová Diostaj paykunata uyarisharqa, parlasqankuta sumajta uyarisharqa. Paypa ñaupaqenpitaj uj libro qhelqasqa karqa,+ Jehová Diosta manchachikojkunapis sutinpi tʼukurejkunapis* yuyarisqa kanankupaj.+

17 Angelesta kamachej Jehová Diosqa nin: “Paykunata sumaj llajtaman+ tukuchisaj chay pʼunchayqa noqajta kanqanku.+ Paykunata khuyakusaj, imaynatachus uj tataqa payta sirvej wawanta khuyakun ajinata.+ 18 Qankunaqa watejmanta sutʼita reparankichej pichus cheqan runa kasqanta, pitajchus sajra runa kasqanta,+ pichus Diosta sirvisqanta, pitajchus mana sirvisqantapis”, nispa.

4 Angelesta kamachej Jehová Diosqa nin: “Uj pʼunchayqa parisqa* horno jina chayamushan.+ Chay pʼunchayqa jatunchakojkuna, sajra imasta ruwajkunapis tukuyninku chʼaki qhora jina kanqanku. Chay jamoj pʼunchayqa paykunata ruphaykonqa, ni uj saphinkutapis ni uj ramankutapis puchonqachu. 2 Justiciataj inti jina qankunata kʼanchamusonqachej, qankuna sutiyta jatunchajkunata.* Chay kʼanchaynenqa sanoyachisonqachej. Qankunataj wirayachisqa torillos jina phinkiykacharinkichej”.

3 “Qankunaqa sajra runasta sarunkichej. Chayta ruwasaj chay pʼunchay paykunaqa chakisniykichej urapi jallpʼa jina kanqanku”, nispa nin angelesta kamachej Jehová Diosqa.

4 “Yuyarikuychej kamachiy Moisesman qosqay Leyta, Horebpi kamachiykunata, juiciopi nisqasniytawan qosqayta, tukuynin Israel kasukunanpaj.+

5 ”Niraj Jehová Diospa jatun tʼukuna pʼunchaynin+ chayamushajtin profeta* Eliasta+ kachamusqaykichej. 6 Payqa tataspa sonqonkuta wawaspa sonqonkuman jina tukuchenqa,+ wawaspa sonqonkutataj tataspa sonqonkuman jina.* Ajinamanta ama jamuspa jallpʼata tukuchinaypaj”.

(Kaypi tukukun Hebreopi Arameopi Qhelqasqas, qallarintaj Griegopi Qhelqasqas).