GALATASMAN CARTA

1 Noqa Pabloqa mana runa kachamuwasqanraykuchu apóstol kani, nitaj pi runapis churawasqanraykuchu. Manachayqa Jesucristo,+ Tata Dioswan+ khuska apóstol kanaypaj churawasqanrayku. Diosmin Jesusta wañusqas ukhumanta kausarichimorqa. 2 Noqa Pabloqa Galaciapi kaj congregacionesman* qhelqamuykichej, noqawan kaj tukuy hermanoswan khuska.

3 Qankunapaj jatun khuyakuy kachun, sonqo tiyaykuytaj Tatanchej Diosmanta, Señor Jesucristomantawan. 4 Paymin kay sajra mundomanta*+ libranawanchejpaj juchasninchejrayku kausayninta qorqa,+ Tata Diosninchejpa munayninman jina.+ 5 Diosqa jatunchasqa kachun wiñaypaj wiñaynintinpaj. Amén.*

6 Diosqa Cristoj jatun khuyakuyninrayku wajyasorqachej. Qankunataj chay jina usqhayta Diosmanta karunchakushankichej, sumaj willaykunaman rijchʼakoj waj jina yachachiykunata japʼikunaykichejpaj.+ Chayta ruwaspaqa tʼukuchiwankichej. 7 Mana waj sumaj willaykuna kanchu. Manachayqa wakin runas Cristomanta sumaj willaykunata qʼewispa qankunata pantachiyta munanku.+ 8 Chaywanpis noqaykuchus chayri cielomanta uj angelchus, sumaj willaykunata willasqaykumantaña waj jina yachachiykunata willasunkichejman chayqa, maldecisqa kachun. 9 Ñaupajta nerqaniña, kunanpis ujtawan nillanitaj: Pillapis sumaj willaykunata japʼikusqaykichejmantaña, waj jina yachachiykunata willasunkichejman chayqa, maldecisqa kachun.

10 Noqaqa mana runaswanchu allinpaj qhawachikuyta munashani, manachayqa Dioswan. Arí, mana runastachu kusichiyta munashani. Runastarajchus kusichishayman chayqa, mana Cristoj kamachinchu kayman. 11 Hermanosníy, yachanaykichejta munani, qankunaman willasqay sumaj willaykunaqa, mana runasmantachu jamusqanta.+ 12 Imaraykuchus noqaqa mana runamantachu sumaj willaykunata japʼerqani, nitaj pi runapis yachachiwarqachu. Manachayqa kikin Jesucristo chay willaykunata sutʼinchawarqa.

13 Qankunaqa uyarerqankichejña judiospa religionninkupi kashajtiy,+ Diospa congregacionninta chinkarparichiyta munaspa, anchatapuni qhatiykachasqayta.+ 14 Noqaqa suyuypi kaj ashkha wiña masisniymanta nisqaqa, judiospa religionninkupi astawan ñauparisharqani. Ñaupa tatasniypa costumbresninkutapis tukuy sonqo juntʼaj kani.+ 15 Diosqa nacekunayta saqerqa, jatun khuyakuyninraykutaj wajyawarqa.+ Paymantaj allin rijchʼarqa, 16 noqa sumaj willaykunata waj nacionesmanta kajkunaman willanay,+ paykuna Wawanta rejsinankupaj. Chaypaj ajllashawajtin, noqaqa mana runaj yuyaychasqantachu maskʼarqani. 17 Nitaj Jerusalenmanpis wicharerqanichu, noqamanta aswan ñaupajta karqanku chay apostolesta tapukoj. Astawanqa Arabiaman rerqani, chaymantataj Damascoman kutirerqani.+

18 Kinsa watanmantaj Jerusalenman wicharerqani+ Cefasta*+ waturikoj. Paywanqa 15 diasta qhepakorqani. 19 Manataj waj apostolesta rikorqanichu, manachayqa Señorpa hermanon Santiagollata.+ 20 Kay imasmantaqa qhelqamushaykichej, Diospa ñaupaqenpi mana llullakuspa.

21 Chaymantaqa rerqani Siria jallpʼaman, Cilicia jallpʼamanwan.+ 22 Chaywanpis Judeapi kaj congregacionesmanta Cristoj discipulosnenqa* mana rejsiwarqankuchu. 23 Paykunaqa uyarillaj kanku kayta nejta: “Religionninchejta chinkachiyta munaspa+ qhatiykachawaj kanchej chay runaqa,+ sumaj willaykunata kunan willashan”, nispa. 24 Ajinapi paykunaqa, Diosta noqarayku jatunchayta qallarerqanku.

2 Chantá 14 watasmanta Bernabewan+ Jerusalenman kuterqani, Titotapis pusallarqanitaj.+ 2 Chayman rerqani Señor rinayta niwasqanrayku. Chaypitaj may jatunpaj qhawasqa hermanoswan tantakorqani. Paykunamantaj willarqani ima sumaj willaykunatachus nacionesman willashani chayta. Imaraykuchus yachayta munarqani Diospaj llankʼasqay allillanchus manachus kasqanta. Mana jina kajtenqa ruwasqay qhasillachá kanman. 3 Chaywanpis noqawan kashaj Titoqa,+ griego kajtinpis mana tanqasqachu karqa circuncidachikunanpaj.*+ 4 Chayraykutaj congregacionpi rikhurej llulla hermanosqa sajrata parlayta qallarerqanku. Paykunaqa mana reparayllata congregacionman yaykumorqanku,+ Cristorayku kacharichisqaña kasqaykuta wateqanankupaj.+ Paykunaqa watejmanta Leypa esclavosninman tukuchiyta munawarqayku.+ 5 Chaywanpis paykunataqa ni uj chhikallantapis kasorqaykuchu.+ Ajinapi cheqa kaj sumaj willaykuna qankunawan kanallanpajpuni.

6 May jatunpaj qhawasqa karqanku chay hermanosqa,+ pikunachus manchay respetasqa karqanku chaykunaqa mana ima mosoj imatapis willawarqankuchu. Paykuna ñaupajta imaynachus kasqankumantaqa mana ima ruwanay kanchu. Imaraykuchus Diosqa mana runaj rijchʼaynintachu qhawan. 7 Chay hermanosqa repararqanku, mana judío* kajkunaman sumaj willaykunata willanaypaj kamachisqa kasqayta,+ imaynatachus Pedropis kamachisqa karqa judiosman* willananpaj ajinata. 8 Diosqa Pedroman atiyta qorqa judíos* ukhupi apóstol kananpaj. Diosllataj noqamanpis atiyta qowarqa naciones ukhupi apóstol kanaypaj.+ 9 Chantapis paykuna repararqanku, Dios jatun khuyakuyninta rikuchiwasqanta.+ Chayrayku Santiago,+ Cefas,* Juan imaqa noqata, Bernabetawan+ paña makinkuwan qʼapiriwarqayku. Paykunaqa congregacionpi uma jina karqanku, niwarqaykutaj: “Nacionesmanta kajkunaman qankuna willanaykichejqa allin, noqaykutajrí judío* kajkunaman willamusqayku”,* nispa. 10 Paykunaqa wajchasmanta yuyarikunaykutapuni niwarqayku. Noqataj chayta ruwanaypaj tukuy sonqo kallpachakuni.+

11 Chantá Cefas*+ Antioquiaman+ jamojtin, uyanpi niporqani mana allinta ruwasqanta. 12 Imaraykuchus Santiagoj+ kachamusqan runas niraj chayamushajtinku, payqa nacionesmanta kajkunawan mikhoj.+ Paykuna chayamojtinkutajrí, manaña chayta ruwarqachu. Astawanpis paykunamanta karunchakaporqa, judiosta* manchachikusqanrayku.+ 13 Chay waj judiospis Pedro jinallataj ruwarqanku. Paykunaqa pay jina puraj uyasman tukorqanku. Bernabetapis chay puraj uya kayninkuwan pantachillarqankutaj. 14 Paykuna mana cheqa kaj sumaj willaykunaman jinachu purishasqankuta rikorqani.+ Chayrayku Cefasta* tukuypa ñaupaqenpi nerqani: “Qanchus judío kashaspa nacionesmanta kajkuna jina kausanki chayqa, ¿imaynatataj nacionesmanta kajkuna, judío jina kausanankuta munankiri?”,+ nispa.

15 Noqanchejqa nacekusqanchejmantapacha judíos kanchej, manataj nacionesmanta kajkuna jinachu juchasapas kanchej. 16 Yachanchej jina, runaqa mana leyman jina ruwasqanraykuchu cheqan runapaj qhawasqa, manachayqa Jesucristopi+ creesqanrayku.+ Chayrayku noqanchejqa Cristo Jesuspi creerqanchej. Ajinamanta Cristopi creesqanchejrayku cheqan runaspaj qhawasqa kananchejpaj, manataj leyman jina ruwasqanchejraykuchu. Imaraykuchus mana pipis leyman jina ruwasqanraykuchu cheqan runapaj qhawasqa kanqa.+ 17 Sichus Cristonejta cheqan runaspaj qhawasqa kayta maskʼashaspa, juchasapaspaj qhawasqa kanchej chayqa, ¿chay niytachu munan Cristo juchallikunapaj tanqawasqanchejta? ¡Ni imarayku! 18 Sichus ñaupajta thuñerqani chay imasllatataj sayarichini chayqa, leyta pʼakej runa kani. 19 Noqaqa leyta juntʼasqayrayku leypaj wañorqani,+ ajinamanta Diospaj kausanaypaj. 20 Cristowan khuska rakhu kʼaspipi* clavasqa kashani.+ Manañataj noqapajchu kausani,+ manachayqa Cristoj kamachin jina kausani.* Arí, noqaqa Diospa Wawanpi creesqayman jina kausashani.+ Paymin munakuwarqa, noqaraykutaj kausayninta qorqa.+ 21 Mana Diospa jatun khuyakuyninta qhesachanichu.+ Sichus runas leynejta cheqan runaspaj qhawasqa kankuman chayqa, Cristoqa qhasipaj wañorqa.+

3 ¡Ay mana yuyayniyoj Galaciamanta kajkuna! Qankunamanqa ñaupajtaña sutʼita yachacherqayku Jesucristo rakhu kʼaspipi* wañusqanmanta.+ ¿Pitaj umaykichejta muyuchisorqachejri?+ 2 Kayllata tapuriyta munaykichej: ¿Leyman jina ruwasqaykichejraykuchu Diospa espiritunta japʼerqankichej? Chayri, ¿uyarerqankichej chay sumaj willaykunapi creesqaykichejraykuchu?+ 3 ¿Chay jina wampuspunichu kankichej? Qallariypeqa Diospa espiritunpi atienekusharqankichej. ¿Imaraykutaj kunan runaj yuyayninman jina purishankichejri?+ 4 ¿Qhasipajchu chay chhikata ñakʼarerqankichej? Yachani mana qhasipajchu kasqanta. 5 Pichus Diospa espiritunta qosorqachej, milagrostapis* ruwan chay runaqa,+ ¿leyman jina ruwasqaykichejraykuchu chaykunata ruwan? Chayri, ¿uyarerqankichej chay sumaj willaykunapi creesqaykichejraykuchu? 6 ¿Manachu Abrahanpis “Jehová* Diospi creesqanrayku cheqan runapaj qhawasqa karqa”?+

7 Qankunaqa yachankichejña, creeyniyoj kajkunaqa Abrahanpa wawasnin kasqankuta.+ 8 Diosqa ñaupajtaña Palabranpi nerqa, waj nacionesmanta runasta creesqankunejta cheqan runaspaj qhawananta. Chayrayku ñaupajtaña Abrahanman kay sumaj willaykunata nerqa: “Qannejta tukuy naciones bendecisqa kanqanku”,+ nispa. 9 Abrahanqa creeyniyoj karqa. Chayrayku creeyniyoj kajkunaqa, paywan khuska bendecisqa kashanku.+

10 Leyman jina ruwasqankupi atienekojkunaqa maldecisqa kanqanku. Qhelqasqa kashan: “Maldecisqa kachun qhelqasqa Leypa tukuy nisqasninta manapuni kasukojqa”,+ nispa. 11 Chantapis sutʼita yachanchej, Diosqa mana pitapis leynejtachu cheqan runapaj qhawasqanta.+ Imaraykuchus “cheqan runaqa creeyninrayku kausanqa”.+ 12 Leyqa mana creeypichu sayasqa kashan. Qhelqasqa kashan jina: “Leyta juntʼajqa Leynejta kausanqa”,+ nispa. 13 Qhelqasqallataj kashan: “Rakhu kʼaspipi warkhusqa kajqa, maldecisqa kachun”,+ nispa. Cristoqa chay Leypa maldicionninmanta kacharichiwarqanchej,+ cuentanchejmanta maldecisqa kaspa. Ajinamanta payqa rantiwarqanchej.+ 14 Chaytaj karqa Abrahanpa bendicionesnin Cristo Jesusnejta waj nacionesman chayananpaj.+ Ajinamanta creeyninchejrayku Diospa espiritunta japʼinanchejpaj, mayqentachus pay qonanta nerqa chayta.+

15 Hermanosníy, kaywan kikincharisqaykichej: Uj runalla uj tratota ruwajtinpis, mana pipis chay tratota chinkachiyta atinmanchu, nitaj imatapis yapaykuyta atinmanchu. 16 Diosqa Abrahanman, mirayninmanta kajmanwan sumaj imasta qonanta nerqa. + Mana qhelqasqapi ninchu, “mirayniykimanta kajkunamanwan” nispa, ashkhamantapis parlashanman jina. Manachayqa nin: “Mirayniykimanta kajmanwan”, nispa. Chayta nispaqa ujllamanta parlashan, chaytaj Cristo.+ 17 Leyqa mana chinkachiyta aterqachu Diospa trato ruwasqanta, nitaj imatachus qonanta nisqantapis. Chantapis Leyqa 430 watas qhepataraj rikhurerqa.+ 18 Sichus Dios herenciata leynejta qon chayqa, chay herenciaqa manaña Dios imatachus qonanta nisqannejtachu. Chaywanpis Diosqa kʼacha kasqanrayku, imatachus qonanta nisqannejta chay herenciata Abrahanman qorqa.+

19 Chanta, ¿imapajtaj Ley karqa? Leyqa churasqa karqa, runaspa sajra ruwasqasninkuta sutʼiman orqhonanpaj.+ Chaytaj karqa Abrahanpa mirayninmanta kaj chayamunankama,+ pimanchus Diosqa sumaj imasta qonanta nerqa chay. Diosqa chay Leyta angelesnejta+ Moisesman qorqa. Moisestaj chay Leyta runasman qorqa.+ 20 Tratota uj runalla ruwajtenqa, manaña waj runa necesitakunchu yanapananpaj. Ajinallataj Dioswanpis, payqa sapallan kasharqa imatachus qonanta nishajtin. 21 Chanta, ¿Leyqa imatachus Dios qonanta nisqanpa contranpichu kashan? ¡Ni imarayku! Leychus kausayta qonanpaj qosqa kanman karqa chayqa, leynejta cheqan runaspaj qhawasqa kasunman karqa. 22 Diospa Palabrantajrí, tukuy imata juchaj atiyninman jaywaykorqa. Ajinamanta Jesucristopi creejkuna, imatachus Dios qonanta nerqa chayta japʼinankupaj.

23 Cristopi niraj creeshaspaqa, leypa atiyninpi kasharqanchej. Suyakusharqanchejtaj chay creey sutʼinchasqa kananta.+ 24 Ajinamanta Leyqa Cristoman pusawajninchej* karqa.+ Ajinapi Diosqa creeynejta cheqan runaspaj qhawanawanchejpaj.+ 25 Kunantajrí Cristopi creesqanchejrayku,+ manaña Ley pusanawanchejta necesitanchejchu.+

26 Arí, tukuy qankunaqa Cristo Jesuspi creesqaykichejrayku+ Diospa wawasnin kankichej.+ 27 Cristopi tukuy bautizasqa kajkunaqa, Cristo jina kankichej.+ 28 Chayrayku manaña imachu judío kay chayri griego kaypis,+ esclavo kay chayri mana esclavo kaypis,+ qhari kay chayri warmi kaypis.+ Imaraykuchus tukuy qankunaqa Cristo Jesuspi ujllaña kankichej. + 29 Sichus Cristojta kankichej chayqa, Abrahanpa miraynin kankichej.+ Diospa nisqanman jinataj+ herenciata japʼinkichej.+

4 Kayta nini: Herenciata japʼejchus juchʼuy wawallaraj chayqa, tukuy imamanta dueño kajtinpis, esclavo jinalla. 2 Imaraykuchus payta, wasintapis runas qhawananku tiyan, tatanpa nisqan pʼunchaykama. 3 Ajinallataj noqanchejwanpis, wawallaraj kashaspaqa kay mundoj yuyayninpa esclavosnin karqanchej.+ 4 Tiempo juntʼakojtintaj, Diosqa Wawanta kachamorqa. Chay Wawaqa uj warmimanta nacekorqa,+ leypa atiyninpitaj karqa.+ 5 Ajinamanta leypa atiyninpi kajkunata preciowan kacharichinanpaj,+ Diostaj wawasninpaj rejsikapunawanchejpaj.+

6 Kunantaj qankunaqa Diospa wawasnin kankichej. Chayrayku Diosqa espíritu santota+ sonqonchejman churarqa,+ mayqenchus Wawanpi kashan chayta. Chay espíritu santonejtataj, “¡ Abba,* Tatáy!” ninchej.+ 7 Chayrayku manaña esclavoschu kankichej, manachayqa Diospa wawasnin. Wawasnin kankichej chayqa, Diosqa herenciata qosonqachej.+

8 Chaywanpis manaraj Diosta rejsishaspaqa, mana dioseschu kanku chaykunaj esclavosnin karqankichej. 9 Kunantajrí Diosta rejsinkichejña chayri Diospa rejsisqasninña kankichej. Chanta, ¿imaraykutaj ujtawan kay mundoj qhasi manakaj imasninpa+ esclavosnin kayta munankichejri?+ 10 Qankunaqa sumajta waqaychankichej wakin diasta, wakin killasta,+ tiemposta, watasta ima. 11 Qankunata yanapanaypaj kallpachakusqay qhasi manakajlla kananmanta llakikuni.

12 Hermanosníy, noqa jina kanaykichejta mañakuykichej. Imaraykuchus noqapis qankuna jinallataj ñaupajta karqani.+ Qankunataj mana ima sajratapis ruwawarqankichejchu. 13 Yachankichej jina, onqoykusqayrayku sumaj willaykunata ñaupaj kutipi willarqaykichej. 14 Onqoykusqay qankunapaj uj prueba jina kajtinpis, qankunaqa mana pisipajchu qhawawarqankichej, nitaj millachikuwarqankichejchu.* Astawanqa Diospa angelninta jina, Cristo Jesusta jinataj japʼikuwarqankichej. 15 ¿Maypitaj kunan chay kusiyniykichej kashanri? Cheqatapuni niykichej: Atispaqa ñawiykichejtapis orqhokuspa qowankichejman karqa.+ 16 Kunanqa, ¿qankunaman cheqa kajta nisqayraykuchu enemigoykichejman tukuni? 17 Chay runasqa tukuy imata ruwanku sonqoykichejta suwanankupaj. Chaywanpis mana allinniykichejta munaspachu chayta ruwanku, manachayqa noqamanta karunchakunaykichejta munaspa. Chayta ruwanku paykunaman kʼaskakunaykichejpaj. 18 Sichus pipis allinniykichejta munaspa sonqoykichejta suwanman chayqa, may allin kanman. Chaytaj mana noqa qankunawan kashajtillaychu kanan tiyan. 19 Wawitasníy,+ qankunarayku watejmanta nanaykunawan kashani, nacechikoj warmi jina. Chay nanayniytaj, Cristoman rijchʼakunaykichejkama kanqa. 20 Munayman kunanpacha qankunawan kayta, qankunawan uj jinamanta parlanaypaj. Imaraykuchus mana yachanichu imatachus qankunawan ruwanayta.

21 Niwaychej, qankuna leypa atiyninpi kayta munajkuna: ¿Manachu Leypa nisqanta yachankichej? 22 Qhelqasqa kashan, Abrahanqa iskay wawasniyoj karqa, ujnenqa kamachi* warmipi,+ ujnintaj mana kamachi warmipi.+ 23 Kamachi warmej wawanqa, waj wawas jinalla nacekorqa.+ Mana kamachi warmej wawantajrí, Diospa nisqanman jina nacekorqa.+ 24 Chay imasqa aswan qhepaman juntʼakunanpaj karqa. Imaraykuchus chay warmisqa, iskay tratoswan ninakunku. Ñaupaj kaj tratoqa, Sinaí orqopi+ ruwakorqa. Chaytaj Agarwan ninakun. Chay tratopi kajkunaqa esclavos kanku. 25 Agarqa Sinaí orqowan+ ninakun, mayqenchus Arabiapi kashan chaywan. Chantá ninakullantaj kay tiempomanta Jerusalenwan. Imaraykuchus Jerusalenpis wawasninpis esclavos kanku. 26 Patapi kaj Jerusalenrí mamanchej, manataj kamachichu.

27 Qhelqasqa kashan: “Mana wawata rejsej warmi, kusikuy. Nacechikoj warmej nanayninta mana rejsej warmi, kusiywan qhapariy. Imaraykuchus saqerpayasqa warmej wawasnenqa aswan ashkha kanku, qosayoj warmej wawasninmanta nisqaqa”,+ nispa. 28 Hermanosníy, qankunaqa Isaac jinallataj Dios qonanta nisqanman jina wawas kankichej.+ 29 Waj wawas jinalla nacekojqa, espíritu santonejta nacekojta qhatiykacharqa.+ Ajinallataj kunanpis kashan.+ 30 Chaywanpis, ¿imatataj nin Diosmanta Qhelqasqapi? Chaypi nin: “Kamachi warmita, wawantawan wijchʼuy. Imaraykuchus kamachi warmej wawanqa, manapuni imatapis japʼenqachu mana kamachi warmej wawanpa herencianmantaqa”,+ nispa. 31 Noqanchejtaj hermanosníy, manamin kamachi warmej wawasninchu kanchej, manachayqa mana kamachi warmejta.

5 Ajina kacharichisqa kananchejpajqa, Cristo kacharichiwarqanchej. Chayrayku sinchʼita sayaychej,+ amataj ujtawan esclavo yugoman watachikuychejchu.+

2 Noqa Pablo kayta niykichej: Qankunachus circuncidachikunkichej* chayqa, Cristoj ruwasqanqa qankunapaj qhasi manakajlla kanqa.+ 3 Chantapis ujtawan nini: Tukuy circuncidachikoj qhareqa, Moisespa tukuynin Leyninta juntʼanan tiyan.+ 4 Sichus leyman jina cheqan runaspaj qhawasqa kayta munashankichej chayqa,+ Cristomanta tʼaqasqa kashankichej, nitaj paypa jatun khuyakuyninpichu kankichej. 5 Noqanchejrí creeyninchejnejta, Diospa espiritunnejta imalla cheqan runaspaj qhawasqa kayta suyakushanchej. 6 Cristo Jesuswan ujchasqa kajkunapajqa, ni circuncidasqa kaypis, ni mana circuncidasqa kaypis valenchu.+ Astawanqa creeyniyoj kaymin valen. Creeytaj munakuynejta rikuchikun.

7 Qankunaqa ñaupajta allinta ruwasharqankichej.*+ ¿Pitaj mana saqesorqachejchu cheqa kajta kasukojtari? 8 Chay runaspa yuyasqankoqa mana wajyasojniykichej Diosmantachu jamun. 9 Pisi levaduralla tukuynin masata poqochin.+ 10 Yachani qankuna Señorpa discipulosnin kajkunaqa,+ noqa jina yuyanaykichejta. Pichus qankunata problemaspi rikhurichishasunkichej chay runatajrí,+ pipis kachun, ruwasqanman jina juchachasqa kanqa. 11 Hermanosníy, sichus circuncidachikuymanta yachachishallaymanpuni chayqa, mana pipis qhatiykachashawanmanchu. Jesús ñakʼarina kʼaspipi*+ wañusqanmanta yachachisqaypis, mana runasta phiñachinmanchu. 12 Munayman pikunachus qankunata pantachiyta munasunkichej chay runasqa capakunankuta.*

13 Hermanosníy, qankunaqa kacharichisqa kanaykichejpaj wajyasqa karqankichej. Chaywanpis kacharichisqa kasqaykichejqa, ama sajra munayniykichejta ruwanapajchu kachun.+ Astawanqa munakuywan esclavos jina purajmanta sirvinakuychej.+ 14 Imaraykuchus tukuynin Leyqa kay kamachiyllapi juntʼakun: “Runa masiykita munakunayki tiyan, qan kikiykita jina”.+ 15 Chaywanpis qankunapurachus khaninakushankichej,+ maqanakushankichej chayqa, pajtataj qankunapura tukuchinakuwajchej.+

16 Kayta niykichej: Diospa espiritunman jina kausallaychejpuni,+ ajinamanta mana sajra munayniykichejta ruwankichejchu.+ 17 Runaj sajra munaynenqa Diospa espiritunpa contranpi kashan. Diospa espirituntaj, chay sajra munaypa contranpi. Iskayninku churanakusqankuraykutaj qankunaqa imastachus ruwayta munasqaykichejta mana ruwankichejchu.+ 18 Sichus Diospa espiritun pusasunkichej chayqa, manaña leypa atiyninpichu kashankichej.

19 Runaj sajra munayninman jina ruwaykunaqa sutʼi rikukun. Kaykunataj kanku: khuchichakuy jucha,*+ millay imasta ruway, mana pʼenqakuspa juchata ruway,*+ 20 santosta yupaychay, layqerios,*+ chejninakuy, churanakuy, wajkunata sajra ñawiwan qhaway, phiñakuywan atipachikuy, chhoqonakuy,* tʼaqanakuy, runaspa yachachiyninta qhatiy,* 21 envidiakuy, machaykuykuna,+ millay fiestaspi puriy, chaykunaman rijchʼakoj waj imaspiwan.+ Chay imasmantaqa imatachus ñaupajtaña nerqaykichej, chayllatataj watejmanta niykichej: Chay imasta ruwajkunaqa, mana Diospa Gobiernonta herenciata jina japʼenqankuchu.+

22 Chaywanpis Diospa espiritunpa poqoynenqa: munakuyniyoj kay, kusikuyniyoj kay, sonqo tiyaykusqa kay,* pacienciayoj kay, kʼacha sonqoyoj kay, kʼacha kay,+ creeyniyoj kay, 23 llampʼu sonqoyoj kay, munayninchejwan mana atipachikoj kay+ ima. Chay imaspa contranpeqa,* mana ima leypis kanchu. 24 Cristo Jesuspata kajkunataj, aychaj sinchʼi sajra munayninta rakhu kʼaspipi* clavaykunku.+

25 Diospa espiritunman jina kausashanchej chayqa, chay espirituman jinallapuni maychus kajta kausanachej.+ 26 Ama noqallanchejpaj imatapis maskʼanachu,+ ujkuna ujkunawan atipanakusta rikhurichispa,+ ujkuna ujkunawantaj envidianakuspa.

6 Hermanosníy, sichus qankunamanta pillapis wistʼuykushan, manataj reparakunchu chayqa, qankuna creeypi wiñay tukusqa kajkuna, chay runata cheqan ñanman kutirichimuychej. Chaytataj ruwaychej llampʼu sonqowan.+ Jinapis qankuna kikiykichejta allinta qhawarikuychej,+ ama qankunapis urmanaykichejpaj.+ 2 Llakiykunapi kaspaqa purajmanta yanapanakuychej.+ Ajinamanta Cristoj leyninta juntʼankichej.+ 3 Pillapis mana ima kaspa may kasqanta yuyakun chayqa,+ pay kikinta chʼaukiyakushan.* 4 Sapa ujpis imastachus ruwasqanta allinta qhawaykurichun.+ Ajinamanta paypa ruwasqanmanta kusikonqa mana wajkunawan kikinchakuspalla.+ 5 Imaraykuchus sapa uj ruwananta juntʼanan tiyan.*+

6 Chantapis pichus Diospa palabranmanta yachachisqa kajqa, yachachejninwan tukuy imapi yanapanakuchunku.+

7 Ama chʼaukiyakuychejchu: Ni pipis Diosmanta burlakuyta atinchu. Runaqa imatachá tarpun, chayllatataj oqharenqa.+ 8 Pichus aychaj munayninman jina tarpojqa, wañuyta* oqharenqa. Diospa espiritunman jina kausajrí, wiñay kausayta japʼenqa.+ 9 Chayrayku mana saykʼuspa allin kajta ruwanallapuni. Imaraykuchus mana saykʼuspaqa, maychus tiemponpi poqoyta oqharisunchej.+ 10 Chayrayku atishaspaqa, tukuypaj allin kajta ruwana, astawanqa creeypi hermanosninchejpaj.

11 Kay cartataqa kikin makiywan qhelqamuykichej. Qhawariychej imayna jatuchaj letraswanchus qhelqamusqayta.

12 Wajkunawan allinpaj qhawachikuyta munajkunaqa, circuncidachikunaykichejpaj* obligayta munasunkichej. Chaytataj ruwanku Cristorayku* mana qhatiykachasqa kanallankupaj. 13 Circuncidasqa kajkunapis, mana Moisespa Leyninta juntʼankuchu.+ Jinapis qankuna circuncidachikunaykichejta munanku, chayta ruwachisusqaykichejmanta jatunchakunankupaj. 14 Chaywanpis noqaqa ni jaykʼaj imamantapis jatunchakuyta munaymanchu. Jatunchakuspataj Señorninchej Jesucristollamanta jatunchakusaj,+ pichus ñakʼarina kʼaspipi* wañorqa chaymanta. Paynejtamin kay mundoqa noqapaj wañun,* noqataj kay mundopaj wañuni. 15 Imaraykuchus circuncidasqa kayqa mana imachu. Mana circuncidasqa kaypis nillataj imachu.+ Astawanpis Diospa mosoj ruwasqanmin aswan allin.+ 16 Kay kamachisqaman jina maychus kajta tukuy purejkunapajqa, sonqo tiyaykuy, khuyakuytaj kachun. Paykunamin Diospa llajtan Israelmanta kanku.+

17 Kunanmantapacha amaña pipis umayta nanachiwachunchu. Imaraykuchus cuerpoypi tʼirisniy tiyapuwan, chaytaj Jesuspa kamachin kasqayta rikuchin.+

18 Hermanosníy, Señorninchej Jesucristoj jatun khuyakuynin sonqoykichejpi kachun. Amén.*