EFESIOSMAN CARTA

1 Noqa Pabloqa Diospa munayninrayku Cristo Jesuspa apostolnin kani. Kay cartata qhelqamuni Éfeso+ llajtapi Diospaj tʼaqasqa kajkunaman, pikunachus mana saqespa Cristo Jesusta qhatinku chaykunaman:

2 Qankunapaj jatun khuyakuy kachun, sonqo tiyaykuytaj Tatanchej Diosmanta, Señor Jesucristomantawan.

3 Jatunchasqa kachun Dios. Paymin Señorninchej Jesucristoj Tatan. Imaraykuchus payqa, Cristoj discipulosninman* imaymana bendicionesta cielopi qowanchej.+ 4 Diosqa niraj kay mundo qallarishajtin* ajllawarqanchej Cristowan khuska kananchejpaj. Ajinamanta paypa ñaupaqenpi munakuyta rikuchinanchejpaj, jinallataj paypaj tʼaqasqas, mana juchayojtaj kananchejpaj.+ 5 Diosqa ñaupajmantaña wawasninta jina ajllakuwarqanchej+ Jesucristonejta reconocenawanchejpaj.+ Payqa chayta ruwarqa imachus gustasqanman jina, munayninman jinataj.+ 6 Ajinamanta runas Diosta alabanankupaj. Imaraykuchus Diosqa jatun khuyakuyninta+ munasqa Wawannejta+ rikuchiwarqanchej. 7 Noqanchejqa Wawannejta preciowan kacharichisqa kanchej.+ Arí, juchasninchejqa paypa yawarninnejta pampachasqa kanku.+ Diospa jatun khuyakuynenqa may jatunpuni.

8 Diosqa chay jatun khuyakuyninta ashkhata qowarqanchej, tukuy yachaytawan tukuy entiendeytawan* ima. 9 Payqa munayninpa pakasqa yachayninta rejsichiwarqanchej.+ Chay pakasqa yachaytaj imachus payman gustasqanman jina, munayninman jinataj kashan. 10 Payqa munarqa wakichisqanman jina tukuy ima maychus kajta ruwakunanta. Chaytaj señalasqa tiempo juntʼakojtin kanqa. Ajinamanta tukuy ima Cristopi tantasqa kananpaj, cielopi kaj imas, kay jallpʼapi kaj imaspis.+ Arí, tukuy ima Cristopi tantasqa kanqa. 11 Noqaykoqa paywan ujchasqa kashayku. Diostaj ñaupajmantaña munayninman jina ajllawarqayku herenciata japʼinaykupaj.+ Imaraykuchus payqa tukuy imata munayninman jina ruwan. 12 Noqaykoqa Cristopi ñaupajta creejkuna kayku. Diostaj ñaupajmantaña ajllawarqayku, noqaykunejta jatunchasqa, yupaychasqa ima kananpaj. 13 Qankunapis cheqa kaj palabrata uyarisqaykichejtawan, Cristopi suyakullarqankichejtaj. Chay palabraqa kashan salvacionniykichejmanta sumaj willaykuna. Chaypi creesqaykichejtawantaj, Cristonejta sellasqa karqankichej+ espíritu santowan, mayqentachus Dios qonanta nerqa chaywan. 14 Chaytaj herenciata japʼinanchejpaj garantía jina.*+ Diosqa chayta ruwarqa llajtanta preciowan+ kacharichinanpaj,+ ajinamanta may jatunchasqa kananpaj.

15 Noqaqa uyarini qankuna Señor Jesuspi creesqaykichejta, Diospaj tukuy tʼaqasqa kajkunatapis munakusqaykichejta. Chayta uyarisqaymantapacha 16 qankunamanta Diosman graciasta qonipuni. Noqaqa qankunapaj Diosmanta mañakullanipuni. 17 Señorninchej Jesucristoj Diosnenqa, jatun kʼanchayniyoj Tata. Paymanta mañakuni atiyta qosunaykichejta qankuna yachayniyoj kanaykichejpaj, paypa sutʼinchasqan imastataj entiendenaykichejpaj. Ajinamanta payta sumajta rejsinkichej.+ 18 Paymin sonqoykichejpa ñawisninta kʼanchaykorqa. Ajinamanta yachanaykichejpaj, ima suyakuymanchus wajyasqa kasqaykichejta. Yachanallaykichejpajtaj ima jatuchaj bendicionestachus paypaj tʼaqasqa kajkunaman herenciata jina qonanta.+ 19 Chantapis yachanaykichejpaj, noqanchej creejkunapaj imayna jatunchus atiynin kasqanta.+ Chaytaj rikukun imaynatachus Dios jatun atiyninta apaykachasqanpi. 20 Diosqa chay atiywan Cristotapis wañusqas ukhumanta kausaricherqa. Chantá cielopi pañanman+ tiyaykucherqa, 21 tukuy gobiernosmanta, autoridadesmanta, atiyniyojkunamanta, kamachejkunamanta, tukuy sutismanta ima aswan patapi kananpaj.+ Ajina kanqa mana kay tiempollapichu,* manaqa jamoj tiempopipis. 22 Diosqa tukuy imata churarqa Cristoj chakisnin uraman.+ Chantapis payta churarqa tukuy imapi congregacionpa* uman kananpaj.+ 23 Congregacionqa paypa cuerpon,+ paywantaj juntʼa kashan. Paymin tukuy imata juntʼachin.

2 Pantasqaykichejpi, juchasniykichejpi wañusqa jina kashajtiykichejpis, Diosqa kausayta qosorqachej.+ 2 Qankunaqa ñaupajta kay mundoman jina* kausaj kankichej.+ Kay mundoj yuyayninta kamachejpa munasqantataj ruwaj kankichej.+ Chay yuyayqa+ wayra jina tukuynejpi kashan, mana kasukoj runaspitaj trabajashan. 3 Ñaupajtaqa chay runas jina kausaj kanchej. Imaraykuchus aychanchejpa munayninta ruwaj kanchej.+ Chantapis yuyayninchejman jina purej kanchej.+ Nacekusqanchejmantapachataj Diospa kʼajaj phiñakuyninta japʼinanchejpaj jina karqanchej,+ chay waj runas jina. 4 Chaywanpis Diosqa khuyakuyninpi may qhapaj.+ Mayta munakuwasqanchejraykutaj,+ 5 Cristowan khuska kanapaj kausayta qowarqanchej, juchasninchejpi wañusqa jina kashajtinchejpis.+ Qankunaqa Diospa jatun khuyakuyninrayku salvasqa kankichej. 6 Chantapis Cristo Jesuspa discipulosnin kasqanchejrayku, Diosqa Cristowan khuska kanapaj kausayta qowarqanchej. Jinallataj paywan khuskata cielopi tiyaykuchiwarqanchej.+ 7 Diosqa chayta ruwarqa jamoj tiempopi* may jatun khuyakuyninta rikuchinanpaj. Chaytataj rikuchenqa noqanchejpaj allin imasta ruwaspa, pikunachus Cristo Jesuspa discipulosnin kanchej chaykunapaj.

8 Qankunaqa Diospa jatun khuyakuyninrayku salvasqa kankichej creesqaykichejnejta.+ Chaytaj mana qankuna imata ruwasqaykichejraykuchu karqa, manachayqa Diospa regalon kasqanrayku. 9 Arí, mana ruwasqasniykichejraykuchu salvasqa kankichej,+ chaymanta mana pipis jatunchakunanpaj. 10 Noqanchejqa Diospa ruwasqan kanchej. Payqa allin imasta ruwanapaj ruwawarqanchej,+ Cristo Jesuspa discipulosnin kasqanchejrayku.+ Diosqa ñaupajmantaña chay allin ruwaykunata wakicherqa, noqanchej ruwananchejpaj.

11 Yuyarikuychej qankunaqa nacionesmanta kasqaykichejta. Runaswan “circuncidachikojkunaqa”,* “mana circuncidasqa kajkuna” nispa sutichasorqachej. 12 Chaypachaqa Cristota mana rejserqankichejchu. Chantapis Israel llajtamanta karupi karqankichej, manataj Dios imatachus qonanta nisqanmanta tratospichu karqankichej.+ Qankunaqa kay mundopi mana suyakuyniyoj, mana Diosniyojtaj kausasharqankichej.+ 13 Ñaupajtaqa Diosmanta karupi kasharqankichej. Kunantajrí Cristo Jesuspa discipulosnin kaspa, Cristoj yawarninnejta Diospa qayllanpi kashankichej. 14 Cristoqa allinyachejninchej.+ Payqa chay iskay gruposta ujllaman tukucherqa,+ paykunata tʼaqaj perqata urmachispa.+ 15 Payqa wañuyninnejta* Moisespa Leyninpi kaj kamachiykunata tukucherqa, mayqenchus chay iskay gruposta chejninacherqa chayta. Chaymantataj paykunata uj mosoj grupoman tukucherqa.+ Chay iskaynin gruposqa Cristoj discipulosnin kanku, paykunataqa pay allinyacherqa. 16 Chantapis payqa ñakʼarina kʼaspipi*+ wañusqannejta chay iskaynin gruposta Dioswan allinyacherqa. Ajinamanta chay iskay gruposta uj cuerpollaman tukuchinanpaj. Imaraykuchus payqa chejninakuyta wañuyninnejta chinkacherqa.+ 17 Payqa jamuspa allin kausaymanta sumaj willaykunata willasorqachej qankunaman, pikunachus Diosmanta karupi kasharqankichej chaykunaman, jinallataj qayllanpi kasharqanku chaykunamanpis. 18 Paynejtamin chay iskay gruposmanta kajkunaqa cielopi kaj Tatamanta mañakuyta atinchej. Imaraykuchus tukuyninchej Diospa espiritunta japʼinchej, mayqenchus ujlla chayta.

19 Chayrayku qankunaqa manaña waj llajtayoj runaschu kankichej, nitaj forasteroschu.+ Manachayqa Diospaj tʼaqasqa kajkunawan llajta masis kankichej,+ Diospa familianmantataj kankichej.+ 20 Qankunaqa apostolespa, jinallataj profetaspa*+ cimientonku patapi wasichasqa kankichej. Cimientopi esquina rumitaj Cristo Jesusmin.+ 21 Chay ruwasqa wasi, chantá tukuy imasninpis, sumaj ujchasqa kashan. Cristowan ujchasqa kaspataj,+ Jehová* Diospaj tʼaqasqa templon kananpaj wiñashan.+ 22 Ajinallatataj qankunapis Cristowan ujchasqa kasqaykichejrayku, tukuyniykichej khuska wasichasqa kashankichej. Ajinamanta chay wasipi Dios tiyakunanpaj espiritunnejta.+

3 Noqa Pabloqa presochasqa kashani+ Cristo Jesuspata kasqayrayku, qankuna nacionesmanta kajkunaj allinniykichejrayku ima. 2 Qankunaqa yachankichejñachá,+ qankunata yanapanaypaj kamachisqa kasqayta. Ajinamanta Diospa jatun khuyakuyninta japʼinaykichejpaj. 3 Arí, Diosqa pakasqa yachayninta rejsichiwarqa. Chaymantaqa uj chhikanta qhelqamorqaykichejña. 4 Kay qhelqamusqayta leespaqa, Diospa pakasqa yachayninta maykamachus rejsisqayta reparankichej.+ Chay pakasqa yachayqa Cristomanta kashan. 5 Ñaupa tiempopi, Diosqa mana chay pakasqa yachayta runasman sutʼincharqachu. Kunantajrí ajllasqa apostolesninman, profetasninman ima, espiritunnejta sutʼinchan.+ 6 Kaytaj chay pakasqa yachay kashan: Nacionesmanta kajkunaqa, pikunachus Cristo Jesuspa discipulosnin kanku chaykuna, Cristowan khuska herenciata japʼenqanku, uj cuerpollataj kanqanku.+ Paykunaqa imatachus Dios qonawanchejta nerqa, chayllatataj sumaj willaykunanejta japʼenqanku. 7 Noqaqa Diospa jatun khuyakuyninrayku chay pakasqa yachaypa kamachin kani. Diosmin chay regalota atiyninnejta qowarqa.+

8 Noqaqa Diospaj tʼaqasqa kajkunamanta aswan juchʼuymantapis, aswan juchʼuyraj kani.+ Jinapis Diosqa jatun khuyakuyninta rikuchiwarqa.+ Ajinamanta Cristoj mana yupay atina bendicionesninmanta sumaj willaykunata nacionesman willanaypaj. 9 Chantapis tukuy runasman rikuchinay tiyan, Diospa pakasqa yachayninpi+ wakichikusqan imaynatachus ruwakushasqanta. Chay yachayqa tukuy imata ruwaj Diospi unaymantapachaña pakasqa kasharqa. 10 Chaytaj karqa cielopi gobiernospis, autoridadespis congregacionnejta kunan rejsinankupaj Diospa imaymana yachayninta.+ 11 Chayqa kashan Diospa wiñay munayninman jina. Diosqa chayta wakicherqa Señorninchej Cristo Jesuspi juntʼakunanpaj.+ 12 Cristopi creesqanchejrayku mana manchachikuspa parlayta atinchej, mana manchachikuspataj Diosman qayllaykuyta atinchej.+ 13 Chayrayku mañakuykichej, qankunaj allinniykichejrayku ñakʼarisqaymanta ama llauchhiyanaykichejta. Imaraykuchus chayqa qankuna jatunchasqa kanaykichejpaj kashan.+

14 Chayrayku Tata Diospa ñaupaqenpi qonqorikuni. 15 Imaraykuchus paymin cielopi, jinallataj kay jallpʼapi tukuy familiasta rikhurichin. 16 Noqaqa Diosmanta mañakuni, sonqoykichejta, yuyayniykichejta ima+ espiritunpa atiyninwan kallpachananta, may jatun kayninman jina. 17 Diosmanta mañakullanitaj, creesqaykichejnejta Cristoqa munakuywan khuska sonqoykichejpi tiyakunanta.+ Jinallataj mañakuni sumaj saphichasqa,+ cimientopi sinchʼi sayasqataj kanaykichejta.+ 18 Ajinamanta Diospaj tukuy tʼaqasqa kajkunawan khuska sumajta entiendeyta atinaykichejpaj, cheqa kajpa anchonta, largonta, sayayninta, ukhunta ima. 19 Jinallataj Cristoj munakuyninta rejsinaykichejpaj,+ mayqenchus yachayta atipan chayta. Ajinamanta Diospa qosqan tukuy sumaj imaswan juntʼachisqa kanaykichejpaj.

20 Diosqa mañakusqanchejmantapis chayri yuyasqanchejmantapis, aswan ashkhataraj ruwayta atin.+ Chaytataj ruwan, noqanchejpi trabajashan chay atiyninman jina.+ 21 Diosmin wiñaypaj wiñaynintinpaj jatunchasqa kachun congregacionnejta, jinallataj Cristo Jesusnejtapis. Amén.*

4 Noqaqa Señorninchejrayku presochasqa kaspa,+ mañakuykichej imapajchus wajyasqa kasqaykichejman jina kausanaykichejta.+ 2 Arí, kʼumuykukojpuni kaychej,+ llampʼu sonqopuni kaychej. Chantapis pacienciayoj kaychej,+ purajmantataj munakuywan aguantanakuychej.+ 3 Chantapis qankunapura allinta kausakuychej. Ujchasqallapuni kanaykichejpajtaj mayta kallpachakuychej. Imaraykuchus espíritu santonejta ajina ujchasqa kashankichej.+ 4 Uj cuerpolla tiyan,+ Diospa espiritunpis ujlla,+ imaynatachus uj tʼinkalla tiyan+ ajina. Chay tʼinkata japʼinapajqa Dios wajyariwanchej. 5 Uj Señorlla tiyan,+ uj creeylla, uj bautismollataj. 6 Chantapis uj Dioslla tiyan, payqa tukuy runaspa Tatan. Paymin tukuy imamanta aswan patapi kashan, ruwanantapis tukuy noqanchejnejta ruwan, atiynintaj tukuypi trabajashan.

7 Diosqa sapa ujninchejman jatun khuyakuyninta rikuchiwarqanchej. Chaytaj rikukun imaynatachus Cristo ruwanapaj atiyta qowasqanchejpi.+ 8 Diosmanta Qhelqasqapi nin: “Payqa pataman wicharispa presosta apakaporqa, runastataj regalosta jina qorqa”,+ nispa. 9 Chanta, ¿ima niytataj munan “wicharerqa” nispari? ¿Manachu chayqa niyta munan ñaupajtaqa jallpʼaman uraykamusqanta? 10 Pichus jallpʼaman uraykamorqa chayllataj cielomanta+ aswan pataman wicharerqa,+ tukuy ima juntʼakunanpaj.

11 Pay qorqa chay regalosmanta wakenqa kanku apóstoles,+ profetas,+ sumaj willaykunata willajkuna,+ michejkuna, yachachejkuna+ ima. 12 Paykunaqa kashanku, Diospaj tʼaqasqa kajkunata cheqan ñanman kutirichinankupaj,* wajkunata sirvinankupaj, Cristoj cuerponta wiñachinankupaj ima.+ 13 Chaytaj kanqa, tukuyninchej creeypi ujlla kananchejkama, Diospa Wawantataj sumajta rejsinanchejkama. Ajinamanta wiñay tukusqa runas kananchejpaj,+ imaynachus Cristo kasqanman jina. 14 Ajinapi manaña wawas jinachu kasunchej. Imaraykuchus wajkunata chʼaukiyaj* runaspa llulla yachachiyninkuta qhatejkunaqa, wayrawan, yakoj qhollchoqeyasqanwan ima kayman jaqayman apaykachachikoj barco jina kanku.+ 15 Noqanchejrí mana llullakuspa* parlananchej tiyan, munakuytataj rikuchinanchej tiyan. Ajinamanta Cristo jina kausaspa, tukuy imapi wiñay tukusqa kasunchej. Imaraykuchus Cristoqa cuerpoj uman.+ 16 Paynejtamin cuerpoj tukuy imasnin+ sumaj ujchasqa kashan, purajmantataj yanapanakunku cuerpo necesitasqanman jina. Cuerpoj sapa uj iman ruwananta sumajta juntʼajtin, cuerpoqa sumajta wiñan, munakuypi sumaj sayasqa kananpaj.+

17 Chayrayku kayta niykichej, Señorpa sutinpitaj sinchʼita mañakuykichej: Amaña kay mundomanta runas jina kausallaychejpunichu.*+ Imaraykuchus paykunaqa qhasi manakaj yuyasqankuman jinalla kausanku.+ 18 Paykunaj yuyayninkoqa laqhayasqa kashan, Dios qoyta munawanchej chay kausaymantataj karunchasqa kashanku. Ajinapi kashanku Diosta mana rejsiyta munasqankurayku, rumi sonqostaj kasqankurayku. 19 Paykunaqa ni imamanta pʼenqakuspa juchata ruwayman* qokunku.+ Ajinamanta tukuy imaymana millay imasta ruwanankupaj, chaykunawan mana sajsayta atispa.

20 Qankunatajrí yachakorqankichej, Cristoqa mana ajinachu kasqanta. 21 Qankunaqa Jesusta uyarerqankichej, paynejtataj yachachisqa karqankichej. Imaraykuchus cheqa kajqa paypi kashan. 22 Qankunaqa yachakorqankichej, ñaupa kausayniykichejta,+ ñaupa ruwasqasniykichejtapis saqenaykichej kasqanta. Imaraykuchus chay ñaupa kausayniykichejqa, aswan mana allinman tukushan, munayniykichejwan chʼaukiyachikusqaykichejrayku.+ 23 Qankunaqa yuyayniykichejta* mosojyachinallaykichejpuni tiyan.+ 24 Mosoj runa kaywantaj pʼachallikuychej,+ mayqenchus Diospa munayninman jina ruwasqa karqa chaywan. Chaytaj ruwasqa kashan cheqa justiciaman jina, cheqa creeyman jinataj.

25 Chayrayku imaymana chʼaukiyayta saqespaña, sapa ujniykichej runa masiykichejwan cheqa kajta parlaychej.+ Imaraykuchus tukuyninchej uj cuerpollamanta kanchej.+ 26 Phiñakuspaqa ama juchallikuychejchu.+ Ama inti yaykunankama phiñasqallapuni kaychejchu.+ 27 Amallataj Diabloj munayninman jina ruwaychejchu.+ 28 Suwakojqa amaña suwakuchunchu. Astawanqa sinchʼita trabajachun, makisninwan allin kajta ruwaspa.+ Ajinamanta pisichikojkunaman imatapis qoriyta atinanpaj.+ 29 Ama simiykichejmantaqa ima millay parlaypis llojsichunchu.+ Astawanqa allin kajllata parlaychej, uyarejkuna chaywan kallpachasqa kanankupaj.+ 30 Chantapis Diospa espíritu santonta ama llakichiychejchu.+ Qankunaqa chaywan sellasqa karqankichej,+ kacharichina pʼunchaypi preciowan kacharichisqa kanaykichejpaj.+

31 Qankunamanta wijchʼuychej jaya sonqo kayta,+ rabiakuyta, kʼajaj phiñakuyta, qhaparqachayta, sonqota nanachinapaj jina parlayta,+ jinallataj tukuy sajra kajtapis.+ 32 Astawanqa ujkuna ujkunawan kʼachas, may khuyakuyniyojtaj kaychej.+ Tukuy sonqo purajmanta perdonanakuychej, imaynatachus Diospis Cristonejta tukuy sonqo perdonasorqachej ajinata.+

5 Chayrayku Diospa munasqa wawasnin kaspa, pay jina ruwaychej.+ 2 Jinallataj munakuypi puriychej,+ imaynatachus Cristopis munakuwarqanchej* ajinata.+ Payqa noqanchejrayku* kausayninta qorqa, Diosman ima munayta qʼaparishaj jaywanata jina.+

3 Ama parlallaychejpischu khuchichakuy juchamanta,* imaymana millay imasmanta, nitaj munapayaymantapis.+ Imaraykuchus chaykunaqa mana Diospa kamachisninpaj jinachu kanku.+ 4 Qankuna ukhupeqa nillataj kananchu tiyan: pʼenqayta puriy, wampu parlaykuna, millay chansas ima.+ Imaraykuchus chay imasqa mana walejchu kanku. Astawanqa Diosman graciasta qoychej.+ 5 Qankunaqa kayta yachankichej, reparankichejtaj: Cristojtawan Diospatawan Gobiernonkupeqa mana ima herenciatapis japʼenqachu khuchichakuy juchapi* urmaj runa,+ millay imasta ruwaj runa, nitaj munapayaj runapis,+ imaraykuchus munapayayqa santosta yupaychaywan ninakun.+

6 Ama piwanpis qhasi manakaj parlaykunawan chʼaukiyachikuychejchu.* Chay imasraykumin mana kasukojkunapaj Diospa kʼajaj phiñakuynin jamonqa. 7 Chayrayku ama paykuna jina ruwaychejchu.* 8 Qankunaqa ñaupajta laqhapi karqankichej. Kunantajrí Señorpata kasqaykichejrayku+ kʼanchaypi kashankichej.+ Chayrayku kʼanchaypa wawasnin jinallapuni kausaychej. 9 Imaraykuchus kʼanchaypi kausakoyqa niyta munan, tukuy imapi kʼacha kay, cheqan kajta ruway, cheqa kajman jinataj kausakuy.+ 10 Imaschus Señorta kusichisqanta reparallaychejpuni.+ 11 Amañataj laqha kajpa qhasi manakaj ruwaykunasninta ruwaysikuychejchu.+ Astawanqa chay ruwaykuna sajra kasqanta sutʼiman orqhoychej. 12 Imaraykuchus runaspa pakaypi ruwasqasninkumanta uj chhikanta parlayllapis pʼenqay. 13 Kunanqa tukuy ima sutʼipi rikhurishan kʼanchaynejta, tukuy ima sutʼinchakusqantaj kʼanchayman tukupun. 14 Chayrayku kayta nikun: “Puñuyniykimanta rijchʼariy. Sayariy wañusqas ukhumanta.+ Cristotaj kʼanchaykusonqa”,+ nispa.

15 Chayrayku allinta qhawarikuychej imaynatachus kausashasqaykichejta.* Ama wampus jina kausaychejchu, manachayqa yachayniyojkuna jina. 16 Tiempoykichejta ama usuchiychejchu.*+ Imaraykuchus sajra pʼunchaykunapi kausashanchej. 17 Chayrayku amaña mana yuyayniyojkuna jina kaychejchu. Astawanqa allinta reparaychej imachus Jehová* Diospa munaynin kasqanta.+ 18 Chantapis ama vinowan machaykuychejchu,+ imaraykuchus chayqa mana allin imastapuni ruwachiwanchej. Astawanqa Diospa espiritunwan juntʼasqallapuni kaychej. 19 Qankunapura* parlaychej salmoswan, Diosta alabanapaj takiykunawan, yupaychanapaj takiykunawan ima.+ Chantapis Jehovata* sonqoykichejpi takiykunawan alabaychej.+ 20 Tukuy imamanta Tata Diosninchejman agradecekuychejpuni,+ Señorninchej Jesucristoj sutinpi.+

21 Cristota sonqomantapacha jatunpaj qhawasqaykichejrayku purajmanta kasunakuychej.+ 22 Casarasqa warmisqa qosankuta kasukuchunku,+ Señorta jina. 23 Imaraykuchus qosaqa warminpa uman,+ imaynatachus Cristopis congregacionpa uman+ ajina. Congregacionqa paypa cuerpon, paytaj salvajnin. 24 Imaynatachus congregacionqa Cristota kasukun, ajinallatataj warmispis qosankuta tukuy imapi kasukuchunku. 25 Qosas, warmiykichejta munakullaychejpuni,+ imaynatachus Cristopis congregacionta munakorqa ajinata. Congregacionraykutaj payqa kausayninta qorqa.+ 26 Payqa chayta ruwarqa congregacionta Diospaj tʼaqananpaj, mayqentachus Diospa palabranwan llimphucharqa, yakuwanpis mayllashanman jina chayta.+ 27 Ajinamanta payqa congregacionta kʼancharishajta pay kikinman pusaykunanpaj: mana chʼichiyojta, mana kʼusuyojta, ni iman imanasqatataj,+ manachayqa llimphuta, mana kʼaminatataj.+

28 Ajinallatataj qosaspis warminkuta munakunanku tiyan, cuerponkuta jina. Warminta munakojqa pay kikinta munakun. 29 Manapuni pipis kikin cuerpontaqa chejnikunchu. Astawanpis cuerponta mikhunawan kallpachan, munakuntaj, imaynatachus Cristopis congregacionwan ruwan ajinata. 30 Payqa chayta ruwan cuerponmanta kasqanchejrayku.+ 31 “Chayrayku qhareqa tatanta, mamantawan saqespa, warminman ujchaykukonqa,* iskayninkutaj ujllaña kanqanku”.*+ 32 Chay pakasqa yachayqa+ jatunmin. Chayta parlashani Cristomanta, congregacionmantawan.+ 33 Chaywanpis sapa ujniykichej warmiykichejta munakunaykichej tiyan,+ qankuna kikiykichejta jina. Warmitajrí qosanta sonqomantapacha respetanan tiyan.+

6 Wawas, tataykichejta, mamaykichejtawan kasuychej,+ Señor munasqanman jina. Imaraykuchus chayta ruwayqa allin.* 2 “Tataykita, mamaykitawan respetay”.+ Chaymin ñaupaj kaj kamachiy, kay bendiciontataj apamun: 3 “Ajinamanta allin risonqa, kay jallpʼapitaj unayta kausakunki”. 4 Tatas, ama wawasniykichejta phiñachiychejchu.+ Astawanpis paykunata uywaychej, Jehová* Dios nisqanman jina cheqanchaspa,+ yachachispataj.*+

5 Esclavos, patronesniykichejta tukuy sonqo kasukuychej,+ paykunata respetaspa, manchachikuspataj, imaynatachus Cristota kasukunkichej ajinata. 6 Amataj wajkunaj rikunallankutachu chayta ruwaychej, runasllawan allinpaj qhawachikuyta munaspa.+ Manachayqa Cristoj esclavosnin jina kasukuychej, Diospa munayninta tukuy sonqo, tukuy kallpawantaj ruwaspa.+ 7 Patronesniykichejta tukuy sonqo sirviychej, Jehová* Diostapis sirvishawajchej jina,+ manataj runasta jinachu. 8 Imaraykuchus yachankichej jina, sapa uj allin kajta ruwasqanmanta, allin kajllatataj Jehová* Diosmanta japʼenqa,+ esclavo kajpis chayri mana esclavo kajpis. 9 Patrones, qankunapis esclavosniykichejwan kikillantapuni ruwaychej, ama paykunata manchachispa. Yachankichej jina, paykunajtapis qankunajtapis Patronniykichejqa cielopi kashan.+ Paytaj tukuyta uj rejllata qhawan.

10 Kunanqa kaytawan niykichej: Señormanta atiyta japʼiychej+ jatun kallpannejta. 11 Diospa qosqan maqanakuna ropata tukuyninta churakuychej.+ Ajinamanta Diabloj trampasninman ama urmanaykichejpaj. 12 Imaraykuchus mana runaswanchu maqanakushanchej,+ manachayqa gobiernoswan, autoridadeswan, kay laqha mundopi kamachejkunawan, cielopi kaj may chhika demonioswan ima.+ 13 Chayrayku Diospa qosqan maqanakuna ropata tukuyninta churakuychej.+ Ajinamanta sajra pʼunchay chayamojtin sinchʼita sayanaykichejpaj. Chantá tukuy imata ruwayta tukuytawan, sumaj sayasqas kanaykichejpaj.

14 Chayrayku sinchʼita sayallaychejpuni, cheqa kajwan chumpiwan jina matʼita chumpiykukuspa.+ Justiciatataj pecherata jina churakuychej.+ 15 Dioswan allinyakunamanta sumaj willaykunata,* jukʼutata jina* chakisniykichejman churakuychej.+ 16 Chay tukuymanta astawanqa, creeyniykichej uj jatun jarkʼakuna escudo jina kachun.+ Chaywanqa Diabloj tukuy laurashaj flechasninta thasnuyta atinkichej.+ 17 Chantapis salvación monterata umaykichejman churakuychej.+ Espiritoj espadantataj makiykichejpi japʼiychej. Chayqa Diospa palabran.+ 18 Chantapis sapa pʼunchay Diosmanta mañakullaychejpuni+ espiritunwan yanapachikuspa,+ tukuy laya mañakuywan, rogakuywantaj. Chayrayku rijchʼarisqallapuni kaychej. Diospaj tʼaqasqa kajkunapajtaj mana saykʼuspa mañapullaychejpuni. 19 Noqapajpis Diosmanta mañapullawaychejtaj. Ajinamanta simiyta kicharejtiy, Diospa pakasqa yachayninmanta sumaj willaykunata mana manchachikuspa willayta atinaypaj.+ 20 Diosmin chayta willanaypaj kachamuwan.+ Chayrayku cadenaswan watasqa kashani. Diosmanta mañapuwaychej, sumaj willaykunamanta mana manchachikuspa maychus kajta willanaypaj.

21 Munasqa hermanonchej Tiquicoqa+ Señorpa sumaj kamachin, pay willasonqachej imastachus ruwashasqayta, imaynachus kashasqaytapis.+ 22 Payta qankunaman kachamushani, imaynachus kashasqaykuta yachanaykichejpaj, sonqochasunaykichejpajtaj.

23 Tukuy hermanospaj kachun sonqo tiyaykuy, munakuy, creeytaj, Tata Diosmanta, Señor Jesucristomantawan. 24 Señorninchej Jesucristota wiñaypaj munakuywan munakojkunapajqa, Diospa jatun khuyakuynin kachun.