FILIPENSESMAN CARTA

1 Noqa Pablowan Timoteowanqa, Cristo Jesuspa kamachisnin kayku. Kay cartata qhelqamuni, Filipospi+ Cristo Jesuspa discipulosninman,* pikunachus Diospaj tʼaqasqa kankichej chaykunaman, jinallataj ancianosman, siervos ministerialesmanpis:*+

2 Qankunapaj jatun khuyakuy kachun, sonqo tiyaykuytaj Tatanchej Diosmanta, Señor Jesucristomantawan.

3 Qankunamanta yuyarikuspa, Diosniyman graciasta qonipuni. 4 Chayta ruwani sapa mañakuspa.* Noqaqa tukuy qankunapaj kusiywanpuni Diosmanta mañakuni.+ 5 Imaraykuchus qankunaqa sumaj willaykuna willakunanpaj yanapakushankichej, chay willayta uyarisqaykichej pʼunchaymantapacha kunankama. 6 Kayta sutʼita yachani, qankunapi allin ruwayta qallarej Diosqa, chay ruwayta ruwanallantapuni Cristo Jesuspa pʼunchayninpi+ tukuchanankama.+ 7 Chayta qankunamanta yuyasqaytaj allinpuni. Imaraykuchus sonqoypi kashankichej. Tukuy qankunaqa presochasqa kashajtiy yanapawarqankichej.+ Yanapallawarqankichejtaj leymanta valekuspa, sumaj willaykuna ni ima jarkʼayniyoj willakunanpaj.+ Ajinamanta qankunaqa noqawan khuska Diospa jatun khuyakuyninta japʼerqankichej.

8 Diosqa yachan may jinatapunichus tukuy qankunata rikuyta munasqayta. Imaraykuchus noqapis Cristo Jesús jinallataj munakuykichej. 9 Diosmanta siga mañakullanipuni, munakuyniykichej astawan astawan wiñananta+ cheqa yachaypi,+ sumajta reparaypi+ ima. 10 Diosmanta mañakullanitaj, imaschus aswan allin imas kasqanta reparanaykichejta.+ Ajinamanta Cristoj pʼunchayninkama mana kʼaminas kanaykichejpaj, nitaj wajkunata urmachinaykichejpaj.+ 11 Diosmanta mañakullanitaj, Jesucristonejta cheqan ruwaykunata astawan astawan ruwanaykichejta.+ Ajinamanta Dios jatunchasqa, yupaychasqataj kananpaj.

12 Kunanqa hermanosníy, yachanaykichejta munani, imaschus pasawasqanqa sumaj willaykuna willakunallanpajpuni yanapakusqanta. 13 Ajinapi Romamanta reypa soldadosnin, jinallataj wajkunapis Cristorayku presochasqa kashasqayta+ uyarerqanku.+ 14 Señorta sirvishanku chay hermanosqa, casi tukuyninku kallpachasqa kanku, presochasqa kasqayrayku. Mana manchachikuspataj Diospa palabranmanta astawan astawan parlashanku.

15 Arí, wakenqa Cristomanta willashanku noqamanta envidiakusqankurayku, noqata atipayta munaspataj. Jinapis wakenqa allin sonqowan willashanku. 16 Paykunaqa munakuyniyoj kasqankurayku Cristomanta willashanku. Imaraykuchus yachanku, noqaqa yanapakunaypaj churasqa kasqayta, sumaj willaykuna ni ima jarkʼayniyoj willakunanpaj.+ 17 Chaywanpis chay ujkunaqa churanakuyta munaspa willashanku, manataj allin sonqowanchu. Paykunaqa presochasqa kashajtiypis ñakʼarichiyta munawanku. 18 ¿Imataj chayrayku kashan? Runasqa Cristomanta willakusqanta uyarishanku. Chayta willajkuna allin sonqowan willajtinkupis chayri manapis. Noqaqa chaymanta kusikuni, kusikullasajpunitaj. 19 Imaraykuchus yachani, chayqa salvanawanta. Chaytaj kanqa qankuna Diosmanta mañapuwasqaykichejrayku,+ jinallataj espíritu santowan Jesucristo yanapawasqanrayku.+ 20 Noqaqa yachani, suyakunitaj ni imaynamanta pʼenqachisqa kanayta. Astawanqa Cristota ñaupajta jina kunan jatunchani, mana manchachikuspa parlasqayrayku. Noqaqa* payta jatunchasaj kausaspapis chayri wañuspapis.+

21 Kausaspaqa Cristopaj kausani.+ Wañusaj chaytaj allinniypaj kanqa.+ 22 Chaywanpis aycha cuerpopi kausallasajpuni chayqa, Cristopaj astawan llankʼayta atisaj. Jinapis imatachus ajllakunaytaqa mana nisajchu. 23 Mana yachanichu kay iskaymanta mayqentachus ajllakunayta. Cristowan kanaypaj kacharichisqa kayta munani.+ Chayqa aswan sumajpuni kanman.+ 24 Chaywanpis qankunapajqa aswan allin kanman aycha cuerpopi kausanallaypuni. 25 Chayrayku yachani kausanallaytapuni. Arí, noqaqa tukuy qankunawan kallasajpuni, Diospaj llankʼasqaykichejpi ñauparinaykichejpaj, creeyniykichejpipis kusisqa kanaykichejpaj. 26 Ajinamanta noqa qankunaman kutimojtiy, aswan kusisqa kanaykichejpaj, Cristo Jesusta qhatisqaykichejrayku.

27 Cristomanta sumaj willaykunata willajkuna jina kausaychej.+ Ajinamanta noqa qankunata watukoj jamojtiypis chayri mana jamojtiypis, qankunaqa sumaj sayasqa, uj yuyaylla,+ ujchasqataj kankichej. Chantapis uj sonqolla kankichej, sumaj willaykunapi creenallaykichejpajpuni. 28 Contraykichejpi kajkunata ama manchachikuychejchu. Chay imasqa rikuchin paykuna chinkachisqa kanankuta,+ qankunataj salvasqa kanaykichejta.+ Chaytaj Diosmanta jamun. 29 Qankunaqa mana Cristopi creeyllatachu may allinpaj qhawanaykichej tiyan, manaqa payrayku ñakʼariytapis.+ 30 Imaynatachus llakiykunapi kaspa kallpachakojta rikuwarqankichej, ajinallatataj qankunapis llakiykunapi kaspa kallpachakushankichej.+ Qankuna yachankichej jina noqaqa kallpachakushallanipuni.

2 Qankunaqa Cristopi ujchasqa kashankichej. Wajkunata kallpachankichej, sonqochankichejtaj, paykunata munakusqaykichejrayku. Chantapis wajkunamanta llakikunkichej, paykunata munakunkichej, khuyakunkichejtaj. 2 Chaywanpis sonqoyta kusiywan juntʼachinaykichejpajqa uj sonqolla, kikin munakuyniyoj, sumaj ujchasqas, uj yuyayllataj kanaykichej tiyan.+ 3 Ama churanakojkuna,+ nitaj qhasimanta jatunchakojkunaqa+ kaychejchu. Astawanqa kʼumuykukoj sonqo kaspa, wajkunata qankunamanta aswan kurajta jina qhawaychej.+ 4 Ama allinnillaykichejtaqa maskʼaychejchu.+ Manachayqa wajkunaj allinninkutapis maskʼaychej.+

5 Imayna yuyaychus Cristo Jesuspi karqa, chay yuyayllataj qankunapipis kachun.+ 6 Payqa Diosman rijchʼakuspapis,+ mana yuyallarqapischu Dios jina kaytaqa.+ 7 Manachayqa tukuy kapuyninta saqerqa. Payqa esclavo jina karqa,+ runa jinataj nacekorqa.+ 8 Astawanpis payqa runa jinaña kaspa kʼumuykukorqa, wañunankamataj kasukorqa.+ Arí, payqa ñakʼarina kʼaspipi* wañorqa.+ 9 Chayrayku Diosqa payta churarqa, ñaupajpi karqa chaymanta aswan pataman.+ Chantapis Diosqa kʼacha kasqanrayku, tukuy sutismanta aswan patapi kaj sutita qorqa.+ 10 Ajinamanta Jesuspa sutinpi tukuy qonqorikunankupaj, cielopi kajkuna, kay jallpʼapi kajkuna, jallpʼa ukhupi kajkunapis.+ 11 Tukuyninkutaj runaspa ñaupaqenpi nenqanku Jesucristo Señor kasqanta.+ Ajinamanta Tata Dios jatunchasqa kananpaj.

12 Munasqa hermanosníy, noqa qankunawan kashajteyqa kasukojpuni kankichej. Kunantaj mana qankunawan kashajtiypis, astawanraj kasukunkichej. Ajinallatapuni sapa ujniykichej ruwaychej manchachikuywan, kharkatiywantaj. Ajinamanta salvacionta tarinaykichejpaj. 13 Diosqa qankunata kallpachasunkichej ruwayta munanaykichejpaj, ruwayta atinaykichejpajtaj. Chaytaj payta kusichisqanman jina kashan. 14 Tukuy imata ruwallaychejpuni mana thutuspa,+ nitaj churanakuspa.+ 15 Ajinamanta mana kʼaminas, mana juchayojtaj kanaykichejpaj. Jinallataj Diospa wawasnin+ jina mana chʼichiyoj kanaykichejpaj, kay tiempomanta sajra runas chaupipi, mana cheqan kajtataj ruwajkuna chaupipi kausaspapis.+ Qankunaqa paykuna ukhupi lliphipirishankichej, kay mundopi kʼanchajkuna jina.+ 16 Kausayta qoj palabramanta sinchʼita japʼikuychej.+ Ajinamanta Cristoj pʼunchayninpi kusisqa kanaypaj. Imaraykuchus yachani mana qhasitachu correshasqayta, nitaj qhasipajchu sinchʼita llankʼashasqayta. 17 Qankunaj creeyniykichejqa, tanqasorqachej Diosta sirvinaykichejpaj. Chaytaj payman uj jaywanata qoy jina. Noqaqa chay jaywasqaykichej patapi+ vino ofrenda jina jichʼasqa kashani.+ Ajina jichʼasqa kaspapis tukuy qankunawan khuska kusikuni. 18 Qankunapis noqawan khuska kikillantataj kusikunaykichej tiyan.

19 Señor Jesuspa munaynin kajtenqa, suyashani pisimantawan qankunaman Timoteota+ kachamuyta. Ajinapi qankunamanta yachaspa kallpachasqa kanaypaj. 20 Imaraykuchus qankunaman kachamunaypajqa, mana pipis Timoteo jina kanchu. Payqa tukuy sonqo yanapasonqachej. 21 Tukuy chay ujkunaqa paykunaj allinnillankuta maskʼanku, manataj Jesucristoj munaynintachu. 22 Yachankichej jina, Timoteoqa allin runa kasqanta rikucherqa. Imaraykuchus payqa noqawan khuska esclavo jina llankʼarqa sumaj willaykunata willaspa. Imaynatachus uj wawa tatanwan khuska llankʼan ajinata.+ 23 Chayrayku imachus noqawan kananta yachaytawan, payta kachamuyta munashani. 24 Jinallataj Señorpa munaynin kajtenqa, noqapis pisimantawan jamusaj.+

25 Chaywanpis kunanqa yuyani Epafroditota qankunaman kachamunay allin kasqanta. Payqa hermanoy, llankʼaj masiy, noqa jinataj Cristoj soldadon. Paytaqa qankuna kachamuwarqankichej noqata yanapanawanpaj.+ 26 Payqa tukuy qankunata mayta rikuyta munashasunkichej. Llakisqataj kashan onqosqa kasqanta yachasqaykichejmanta. 27 Arí, payqa onqosqapuni kasharqa, wañuy patapiñataj. Chaywanpis Diosqa payta khuyakorqa. Manataj payllatachu khuyarqa, manaqa noqatapis. Ajinamanta llakisqa kasqaymanta, ama astawan llakikunaypaj. 28 Chayrayku payta usqhayllata kachamushani. Ajinamanta payta rikuspa kusikunaykichejpaj, noqapis amaña anchata llakikunaypaj. 29 Payta kusiywan wajyarikuychej, imaynatachus Señorta qhatejkunata wajyarikuyta yachankichej ajinata. Pay jina hermanostaqa jatunpaj qhawallaychejpuni.+ 30 Epafroditoqa Cristopaj llankʼasqanrayku* casi wañorqa. Arí, payqa noqata yanapanawanpaj kausayninta wañuy pataman churarqa. Qankunaqa mana kaypichu kasqaykichejrayku mana yanapayta atiwarqankichejchu.+

3 Chayrayku hermanosníy, Señorpi kusikullaychejpuni.+ Qhelqamorqaykichejña chay imasmanta watejmanta qhelqamuspaqa, mana saykʼunichu. Imaraykuchus chayqa allinniykichejpaj.

2 Cuidakuychej alqos jina kajkunamanta, cuidakuychej sajra kajta ruwajkunamanta. Cuidakullaychejtaj circuncidasqa* kanaykichejta munanku chaykunamantapis.+ 3 Noqanchejmin cheqamanta circuncidasqa kanchej.+ Imaraykuchus Diostaqa espiritunpa yanapayninwan sirvinchej, imastachus Cristo Jesús ruwasqanmanta jatunchakunchej,+ manataj imaspichus runas atienekunku chaykunapichu atienekunchej.

4 Jinapis noqaqa ni mayqen runa jina chay imaspi atienekuyta atiyman. Imaraykuchus 5 noqaqa nacekusqaymanta pusaj pʼunchayninman circuncidasqa karqani.+ Israelita kani, Benjamín ayllumanta.* Hebreo kani, tatamamaypis hebreos karqanku.+ Fariseo* karqani, chayraykutaj leytaqa sumajta juntʼaj kani.+ 6 Tukuy sonqo Diosta sirviyta munaspa congregacionta* qhatiykachaj kani.+ Leyta maychus kajta juntʼasqayraykutaj, ni pi runaj juchachanan karqani. 7 Chaywanpis imastachus sumaj valorniyojpaj qhawarqani chaykunataqa, Cristorayku qhasi manakajpaj qhawani.*+ 8 Cheqamantapuni tukuy imata qhasi manakajpaj qhawani, Señorniy Cristo Jesusmanta yachakuy may valorniyoj kasqanrayku. Payrayku tukuy imata saqeni, chaykunatataj qʼopata jina qhawani. Ajinamanta Cristowan sumajta masichakunaypaj, 9 jinallataj paypa discipulon jina qhawasqa kanaypaj. Noqaqa mana Leyta juntʼasqayraykuchu cheqan runapaj qhawasqa kani, manachayqa Cristopi creesqayrayku.+ Cheqan runapaj qhawasqa kaytaj, creeynejta Diosmanta jamun.+ 10 Noqaqa Cristota rejsiyta munani. Wañuymanta kausarichimorqa chay atiymantapis yachakuyta munani.+ Munallanitaj pay jina ñakʼariyta,+ pay jinallataj wañuytapis.+ 11 Chaytaqa tukuy sonqo ruwani, wañusqas ukhumanta ñaupajta kausarimojkunamanta kanaypaj.+

12 Niraj premiota japʼinichu, chantapis manaraj mana juchayoj runachu kani. Jinapis premiota japʼinaypaj ñaupajllamanpuni rishani.+ Imaraykuchus yachani Cristo Jesús chaypaj ajllawasqanta.*+ 13 Hermanosníy, mana yuyanichu chayta japʼisqaytaña. Chaywanpis kayta ruwani: Ñaupaj imasta qonqaspa,+ jamoj imasta japʼinaypaj ñaupajllamanpuni rishani.+ 14 Maytataj kallpachakushani premiota japʼinaypaj.+ Chay premiotaj cielopi kausay, chaytataj Dios qowasun pikunatachus Cristo Jesusnejta wajyawanchej chaykunaman.+ 15 Chayrayku pikunachus creeypi wiñay tukusqa kanchej chaykunaqa,+ imastachus nerqaykichej chayman jina yuyanachej. Mana ajinatachu yuyashankichej chaytaj, Dios ajinata yuyanaykichejpaj yanapasonqachej. 16 Chaywanpis maykamachus ñauparerqanchej, chayman jinallapuni maychus kajta purinachej.

17 Hermanosníy, tukuyniykichej noqa jina ruwaychej.+ Chantapis imayna kausaytachus qankunaman rikucherqayku, chayman jina kausajkunata qhawaspa kikinta ruwaychej. 18 Ashkhas Cristo ñakʼarina kʼaspipi* wañusqanta pisipaj qhawashanku. Paykunamantaqa sapa kuti parlaj kaykichej, ¿icharí? Chaywanpis kunanqa waqaspa paykunamanta parlaykichej. 19 Paykunaj diosninkoqa wijsanku, imasmantachus pʼenqakunankumantataj jatunchakunku. Yuyayninkoqa kay mundoj imasnillanpi kashan.+ Paykunaqa chinkachisqa kanqanku. 20 Noqanchejtajrí cielopi+ llajtayoj kanchej.+ Chantapis mayta suyakushanchej cielopi kaj salvawajninchej Señor Jesucristota.+ 21 Paymin pisi kallpa cuerponchejta waj jinaman tukuchenqa, lliphipej cuerpon jina kananpaj.+ Chaytataj jatun atiyninwan ruwanqa, mayqenwanchus tukuy imata paypa kamachiyninman churayta atin chaywan.+

4 Munasqa hermanosníy, qankunata mayta rikuyta munashaykichej. Qankunaqa kusikuyniy, tʼinkaytaj*+ kankichej. Chayrayku munasqa hermanosníy, Señorpi sinchʼita sayaychej,+ imaynatachus nerqaykichej ajinata.

2 Evodiatawan Sintiquetawan tukuy sonqo nini, Señorpi uj yuyaylla kanankuta.+ 3 Jinallataj qantapis, noqawan khuska tukuy sonqo llankʼaj hermanóy, mañakuyki chay hermanasninchejta yanapanallaykitapuni. Paykunaqa sumaj willaykunata willaspa tukuy atisqankuta noqawan khuska llankʼarqanku, jinallatataj llankʼarqa Clementepis, chay ujnin llankʼaj masisniypis. Paykunaj sutisninkoqa kausay libropi+ qhelqasqa kashan.

4 Señorpi kusikuychejpuni. Ujtawanpis nillaykichejtaj: ¡Kusikuychej!,+ nispa. 5 Tukuy runas rikuchunku mana nisqaykichejtapuni valechiyta munaj runaschu kasqaykichejta.*+ Señorqa qayllallapi kashan. 6 Ama imamantapis llakikuychejchu.+ Astawanpis tukuy imapaj Diospa yanapayninta mañakuychej. Paymantaqa tukuy sonqo mañakuychej, rogakuspa, graciasta qospataj.+ 7 Diostaj sonqo tiyaykuyta qosonqachej,+ mayqentachus runas mana entiendeyta atinkuchu chayta. Ajinamanta payqa sonqoykichejta,+ yuyayniykichejtawan Cristo Jesusnejta waqaychanqa.

8 Chayrayku hermanosníy, kay imaspi yuyallaychejpuni:* tukuy ima cheqa kajpi, tukuy ima jatunpaj qhawasqa kajpi, tukuy ima cheqan kajpi, tukuy ima llimphu kajpi, tukuy ima kʼacha kajpi, tukuy ima sumajpaj qhawasqa kajpi, tukuy ima allin kajpi, jinallataj jatunchanapaj jina kaj imaspipis.+ 9 Ruwaychej imastachus noqamanta yachakusqaykichejta, japʼikusqaykichejta, uyarisqaykichejta, jinallataj imastachus ruwasqayta rikusqaykichejtapis.+ Sonqo tiyaykuyta qoj Diostaj qankunawan kanqa.

10 Señorpi anchatapuni kusikuni, ujtawan noqamanta yuyarikusqaykichejrayku.+ Qankunaqa mana noqata qonqakapuwarqankichejchu. Jinapis ni imaynamanta yanapawayta atisharqankichejchu. 11 Chaytaqa mana imapis pisiwasqanraykuchu nishani. Imaraykuchus noqaqa yachasqa kani, imayna kaspapis imachus tiyapuwasqanwan sonqo juntʼasqa* kayta.+ 12 Yachani wajcha jina kausakuyta,+ qhapaj jina kausakuytapis. Kausayniypeqa yachakuni: sajsasqa kayta, yarqhasqa kaytapis, tukuy imayoj kayta, mana imayoj kaytapis. 13 Tukuy imapaj kallpayoj kani, Dios atiyta qowasqanrayku.+

14 Chaywanpis qankunaqa allinta ruwarqankichej llakiyniypi yanapawaspa. 15 Filiposmanta hermanosníy, kaytapis yachankichej: Ñaupajtaqa qankunaman sumaj willaykunata willarqaykichej, chantataj Macedoniamanta riporqani. Chaypachaqa ni mayqen congregacionpis yanapawarqachu, nitaj yanapasqaytapis japʼikorqankuchu. Manachayqa qankunalla yanapawarqankichej.+ 16 Imaraykuchus Tesalonicapi kashajtiy, imachus pisiwasqanpaj iskay kutita yanapata apachimuwarqankichej. 17 Noqaqa mana ima regalotapis qonawaykichejtachu maskʼashani. Astawanqa munani allin ruwasqasniykichej Diospa ñaupaqenpi astawan ashkhayananta. 18 Chaywanpis kunanqa ni ima pisiwanchu, necesitasqaymantapis astawanraj kapuwan. Imaraykuchus Epafroditowan+ apachimuwasqaykichejta japʼiniña. Chaytaj ima munay qʼapashaj jaywana jina,+ Diospaj ñaupaqenpitaj allinpaj qhawasqa. 19 Chayta apachimuwasqaykichejmanta Diosneyqa qhapaj kapuyninman jina, tukuy ima pisichikusqaykichejta Cristo Jesusnejta qosonqachej.+ 20 Tata Diosninchejqa wiñaypaj wiñaynintinpaj jatunchasqa kachun. Amén.*

21 Napaykapuwaychej Diospaj tukuy tʼaqasqa kajkunata, pikunachus Cristo Jesuspa discipulosnin kanku chaykunata. Noqawan kashanku chay hermanospis napaykamusunkichej. 22 Diospaj tukuy tʼaqasqa kajkunapis napaykamullasunkichejtaj, astawanqa Cesarpa kamachina wasinpi kajkuna.+

23 Señor Jesucristoj jatun khuyakuynin sonqoykichejpi kachun.