TESALONICENSESMAN ÑAUPAJ KAJ CARTA

1 Noqa Pabloqa Silvanowan*+ Timoteowan+ ima, kay cartata apachimushayku Tesalónica llajtapi kaj congregacionman.* Qankuna pikunachus Tata Dioswan, jinallataj Señor Jesucristowan ujchasqa kashankichej chaykunaman:

Qankunapaj jatun khuyakuy, sonqo tiyaykuytaj kachun.

2 Diosmanta mañakushaspaqa, payman graciasta qoykupuni tukuy qankunamanta yuyarikuspa.+ 3 Imaraykuchus Tata Diosninchejpa ñaupaqenpi yuyarikuykupuni, qankuna creeywan, jinallataj munakuywan llankʼasqaykichejmanta. Nillataj qonqaykuchu, Señorninchej Jesucristopi suyakusqaykichejrayku llakiykunapi sinchʼita sayasqaykichejtapis.+ 4 Hermanosníy, Diospa munakusqasnin, yachayku qankuna paypa ajllasqasnin kasqaykichejta. 5 Noqaykoqa mana simillawanchu sumaj willaykunata willarqayku, manaqa atiywan espíritu santowan, ni uj chhikanta iskayrayaspataj. Qankunaqa yachankichej allinniykichejrayku imayna runaschus qankuna ukhupi kasqaykuta. 6 Qankunataj noqayku jina,+ Señor jinataj+ kausakuyta yachakorqankichej. Imaraykuchus sinchʼi llakiykunapi kashaspapis,+ Diospa palabranta kusiywan japʼikorqankichej. Chay kusiytaj espíritu santomanta jamun. 7 Ajinamanta Macedoniapi, jinallataj Acaya lugarpi tukuy creejkunaman, imaynatachus kausananku kasqanta rikucherqankichej.

8 Macedoniamanta, jinallataj Acaya lugarmanta tukuy runas, qankunanejta Jehová* Diospa palabranta uyarinku. Diospi creesqaykichejtaj tukuynejpi uyarikushan.+ Chayrayku manaña imatawanpis ninayku kanchu. 9 Chay lugaresmanta runasqa, parlallankupuni imaynatachus qankunata ñaupaj kutipi rejsisqaykumanta. Paykunaqa parlallankutaj, imaynatachus santosniykichejta saqespa Diosman kutirikusqaykichejmanta,+ ajinamanta kausaj cheqa Diosta esclavos jina sirvinaykichejpaj. 10 Qankunaqa Diosman kutirikullarqankichejtaj, Wawanta cielomanta jamojta suyakunaykichejpaj.+ Paytaqa Dios wañusqas ukhumanta kausaricherqa. Arí, Jesusta. Paymin Diospa jamoj kʼajaj phiñakuyninmanta librawasunchej.+

2 Hermanosníy, yachankichej jina, qankunata watukoj jamusqaykoqa mana qhasipajchu karqa.+ 2 Yachallankichejtaj Filipos llajtapi sufrisqaykuta, maytataj ñakʼarichiwasqaykuta.+ Diostajrí kallpachawarqayku, sumaj willaykunata mana manchachikuspa qankunaman willanaykupaj.+ Chaytataj ruwarqayku manchay churanakuy chaupipi kashaspapis. 3 Imaraykuchus yuyaychasqaykoqa mana pantasqa yuyaykunamantachu jamun, nitaj millay munaymantachu. Manataj chʼaukiyashaykuchu.* 4 Astawanpis qankunaman parlayku, sumaj willaykunata qankunaman willanaykupaj Dios churawasqaykurayku. Manataj runasta kusichinaykupajchu parlayku, manachayqa Diosta kusichinaykupaj. Paymin sonqosniykuta rejsin.+

5 Yachankichej jina, ni jaykʼaj qankunata miskʼi simiwan llunkʼupayarqaykuchu, nitaj imata tariyta munaspachu kʼacha runasman tukorqayku.+ Diosqa chayta allinta yachan. 6 Manallataj runas jatunchanawaykutachu maskʼarqayku, ni qankuna, nitaj wajkunapis. Chaywanpis Cristoj apostolesnin kasqaykurayku, atiykuman karqa qankunapaj uj llasa qʼepi jina kayta.+ 7 Astawanqa qankunawan may kʼachas karqayku, imaynatachus uj mama wawitanta ñuñuchin, munakuywantaj cuidan ajinata. 8 Qankunata may jinatapuni munakusqaykurayku,+ mana Diospa sumaj willaykunasnillantachu qankunaman rejsichiyta munayku, manaqa kausayniykutapis qankunata yanapanaykupaj qoyta munayku.+

9 Hermanosníy, yuyarikunkichejchá sinchʼita llankʼasqaykuta, mayta kallpachakusqaykutapis. Diospa sumaj willaykunasninta qankunaman willashajtiyku, kausakunaykupaj tuta pʼunchay trabajarqayku, ni mayqenniykichejpaj llasa qʼepi jina kanaykupaj.+ 10 Qankuna testigos kankichej, jinallataj Diospis, qankunata yanapasqaykupi llimphus,* cheqan kajta ruwajkuna, mana kʼaminastaj kasqaykumanta. 11 Allintataj kayta yachankichej: Imaynatachus uj tata+ wawasninwan ruwan, ajinallatataj noqaykupis mana saykʼuspa sapa ujniykichejta kʼamerqayku, sonqocharqayku, yuyaycharqaykutaj.+ 12 Chayta ruwarqayku qankuna Diosta kusichinapaj jinallapuni kausanaykichejpaj.+ Paymin wajyasorqachej Gobiernonman yaykunaykichejpaj,+ jatun kayninpitaj kanaykichejpaj.+

13 Chayrayku noqaykoqa mana saykʼuspa Diosman graciasta qollaykupuni.+ Imaraykuchus Diospa palabranta qankunaman willajtiyku, qankunaqa chayta japʼikorqankichej mana runaspa palabranta jinachu, manachayqa Diospa palabranta jinapuni. Chay palabrataj qankuna creejkunata yanapashasunkichej. 14 Hermanosníy, imatachus ruwarqanku Judea llajtapi Diospa congregacionesnin, pikunachus Cristo Jesuswan ujchasqa kashanku chaykuna, ajinallatataj qankunapis ruwarqankichej. Imaraykuchus llajta masisniykichejqa qankunata ñakʼarichisorqachej,+ imaynatachus paykunatapis judío masisninku ñakʼarichishanku ajinata. 15 Chay ñakʼarichejkunaqa Señor Jesustapis wañucherqanku,+ jinallataj profetastapis.*+ Noqaykutataj qhatiykachawarqayku. Chantapis paykunaj ruwasqankoqa mana Diosta kusichinchu, tukuy runaj allinninpa contranpitaj kashan. 16 Paykunaqa jarkʼayta munawayku nacionesmanta kajkunaman ama willanaykupaj, ajinamanta mana salvasqa kanankupaj.+ Chayta ruwaspaqa astawan juchata yapakunku. Chayrayku Diospa phiñakuynenqa patankupiña kashan.+

17 Hermanosníy, runas qankunamanta karunchawajtiyku, uj pisi tiempota mana qankunata rikuyta aterqaykuchu, jinapis qankunamanta yuyarikusharqaykupuni. Uyaykichejta rikuytapuni munasqaykuraykutaj tukuy imata ruwarqayku. 18 Chayrayku qankunaman jamuyta munarqayku. Noqa Pabloqa iskay kutipi jamuyta munarqani. Satanastajrí ñanniykuman jarkʼaykunata churarqa. 19 Señor Jesuspa kutimunan tiempopi,* ¿imataj kanqa suyakuyniyku, kusikuyniyku chayri kusikuna coronayku paypa ñaupaqenpiri? ¿Manachu qankuna kankichej?+ 20 Arí, qankuna kankichej jatunchakunayku, kusikuyniykutaj.

3 Chayrayku qankunamanta yachaytapuni munaspa, Atenaspi+ sapayku qhepakunaykuta nerqayku. 2 Hermanonchej Timoteotataj+ qankunaman kachamorqayku. Payqa Diospa kamachin,* Cristomanta sumaj willaykunatataj willan. Payta kachamorqayku qankunata kallpachasunaykichejpaj, sonqochasunaykichejpaj, ajinamantataj creeyniykichej sinchʼi kananpaj. 3 Ajinapi mana pipis chay ñakʼariykunarayku llauchhiyananpaj. Imaraykuchus qankuna yachankichej chay imastaqa ñakʼarinanchejpuni kasqanta.+ 4 Qankunawan kashajtiykoqa, ñaupajmantaña nej kayku ñakʼarinanchejta. Qankuna yachankichej jinataj, chayqa ajinapuni.+ 5 Chayrayku qankunamanta yachaytapuni munaspa, Timoteota qankunaman kachamorqani. Ajinamanta yachanaypaj may jinatachus Diospi atienekusqaykichejta.+ Ichapis Diabloqa+ imaynallamantapis juchaman urmanaykichejpaj tanqasorqachej. Jina kajtin, noqaykoj ruwasqaykoqa qhasi manakajpaj kanman karqa.

6 Kunanqa Timoteo chaymanta kutimunña.+ Paytaj allin imasta willawayku may jinatachus Diospi atienekusqaykichejmanta, munakuyniyoj kasqaykichejmanta ima. Willallawaykutaj qankuna munakuywan sapa kuti yuyarikuwasqaykuta. Jinallataj willawayku mayta rikuyta munawasqaykuta, imaynatachus noqaykupis qankunata mayta rikuyta munayku ajinata. 7 Chayrayku hermanosníy, imaymana llakiykunapi,* ñakʼariykunapi kashaspapis, qankuna mayta Diospi atienekusqaykichejrayku sonqochasqa kayku.+ 8 Noqaykoqa sumaj kallpachasqa kashayku, qankuna Señorpi sinchʼita sayasqaykichejrayku. 9 Noqaykoqa maytapuni qankunamanta Diosman agradecekuyku. Imaraykuchus qankunaqa mayta kusichiwayku. 10 Tuta pʼunchay Diosmanta tukuy sonqo mañakuyku qankunata rikunaykupaj.* Mayta mañakullaykutaj creeyniykichej kallpachasqa kananpaj imatachus necesitasqaykichejpi yanapanaykupaj.+

11 Tatanchej Dios, Señorninchej Jesús ima, ñanta kicharichunku qankunaman jamunaykupaj. 12 Chantapis Señorqa qankunapura munanakusqaykichejta, tukuy runasta munakusqaykichejtapis wiñachichun, ashkhayachichuntaj,+ imaynatachus noqaykoj munakuyniykupis qankunapaj ashkhayan ajinata. 13 Ajinamanta Señorninchej Jesús, tukuy ajllasqa kajkunawan* khuska kutimunan tiempopi,*+ sonqoykichej kallpachasqa kanqa Tata Diosninchejpa ñaupaqenpi.+ Jinallataj mana kʼaminas, llimphustaj kankichej.

4 Hermanosníy, qankunaqa Diosta kusichinapaj jina kausakushankichej, imaynatachus qankunaman yachacherqayku ajinata.+ Chaywanpis kunanqa Señor Jesuspa sutinpi mañakuyku, yuyaychaykutaj, chayta astawan ruwanallaykichejtapuni. 2 Qankunaqa yachankichej, Señor Jesuspa sutinpi imastachus kamachisqaykuta.

3 Kaymin Diospa munaynenqa: qankuna llimphu kausayniyoj kanaykichej,+ khuchichakuy juchamantataj*+ tʼaqakunaykichej. 4 Sapa ujniykichej yachanaykichej tiyan, imaynatachus cuerpoykichejta kamachiyta.+ Ajinamanta cuerpoykichej llimphullapuni kananpaj,+ allinpaj qhawasqataj. 5 Qankunaqa ama Diosta mana rejsej runas jinaqa kaychejchu.+ Paykunaqa sinchʼi munapayaywan qʼoñirisqa kanku.+ 6 Ama pipis chay imaspeqa hermanonta sajrata ruwachunchu, nitaj paypa derechonta saruchunchu. Imaraykuchus Jehová* Diosqa chay imasta ruwajkunata jasutʼenqa. Chaytaqa ñaupajmantaña nerqayku, sumajtataj sutʼincharqayku. 7 Imaraykuchus Diosqa mana millay imasta ruwanapajchu wajyawarqanchej, manachayqa llimphus kanapaj.+ 8 Chayrayku kay yachachiyta mana valechej runaqa, mana runatachu pisipaj qhawan, manachayqa Diosta.+ Paymin espíritu santonta qankunaman qosunkichej.+

9 Familia jina munanakunaykichejmanta+ qhelqamunaykoqa anchaña kanman. Imaraykuchus Diosqa purajmanta munanakunaykichejta yachachisorqachej.+ 10 Cheqamanta qankunaqa, tukuy Macedoniapi kaj hermanospaj chayta ruwashankichejña. Chaywanpis hermanosníy, mañakuyku astawanraj munakuypi wiñanaykichejta. 11 Jinallataj tukuy atisqaykichejta allinta kausakuyta maskʼaychej,+ amataj wajkunaj ruwanasninkuman satʼikuychejchu.+ Chantapis imaynatachus kamachisqaykuman jina llankʼaychej.+ 12 Ajinamanta runaspa ñaupaqenkupi allinta purinaykichejpaj,+ manataj imapipis pisisqachu kanaykichejpaj.

13 Hermanosníy, wañuypi puñushajkunapaj+ ima suyakuychus kasqanta yachanaykichejta munayku. Ajinamanta ama anchata llakikunaykichejpaj, imaynatachus mana suyakuyniyoj kajkuna anchata llakikunku ajinata.+ 14 Sichus Jesuspa wañusqanpi, kausarimusqanpi ima creenchej chayqa,+ creellanchejtaj Dios kausarichimunanta, pikunachus Jesuspa discipulosnin* kashaspa wañupunkuña chaykunata. Ajinamanta Jesuswan khuska kanankupaj.+ 15 Jehová* Diospa palabranman jina kayta niyku: Señorpa kutimunan tiempopi,* noqanchej ukhumanta pikunachus kausashanqankuraj chaykunaqa, mana ñaupaykonqankuchu, pikunachus wañupunkuña chaykunataqa. 16 Señorqa cielomanta uraykamonqa uj kamachiywan, arcangelpa+ vozninwan, Diospa cornetanpa waqayninwantaj. Pikunachus wañupunkuña chay discipulosnintaj, ñaupajta kausarichisqa kanqanku.+ 17 Chaymantataj noqanchej kausashajkunaqa, phuyuspi oqharisqa kasunchej,+ paykunawan khuska kanapaj, Señorwantaj cielopi tinkunapaj.+ Ajinamanta Señorwan wiñaypaj kasunchej.+ 18 Chayrayku kay palabraswan purajmanta sonqochanakullaychejpuni.

5 Kunanqa hermanosníy, tiemposmanta, señalasqa pʼunchaykunamanta ima, qankunaman imatapis qhelqamunayqa anchaña kanman. 2 Imaraykuchus qankunaqa allinta yachankichej, Jehová* Diospa pʼunchaynenqa,+ imaynatachus uj suwa tuta jamun ajinata jamunanta.+ 3 Maypachachus runas nishanqanku, “tukuy imapis allillan, ni imamanta llakikuna kanchu” nispa, chaypacha paykunaj tukukuyninkoqa ujllata chayamonqa,+ imaynatachus nacechikoj warmiman nanaynin chayarparimun ajinata. Paykunataj ni imaynamanta ayqeyta atenqankuchu. 4 Qankunarí hermanosníy, mana suwas jina laqhapichu kashankichej, chay pʼunchay ujllata taripasunaykichejpajqa. 5 Imaraykuchus tukuy qankunaqa, kʼanchaypa wawasnin kankichej,+ pʼunchaypa wawasnintaj. Noqanchejqa mana tutajtachu kanchej, nillataj laqhayaypatachu.+

6 Chayrayku ama chay ujkuna jinaqa puñunachu.+ Astawanqa rijchʼarisqa,+ yuyayninchejpitaj kana.+ 7 Imaraykuchus puñojkunaqa tuta puñunku. Machajkunapis tutan machasqa purinku.+ 8 Noqanchejrí pʼunchaypa wawasnin kaspa, yuyayninchejpipuni kana. Creeytawan munakuytawan pecherata jina churakuna. Suyakusqanchej salvaciontataj monterata jina churakuna.+ 9 Imaraykuchus Diosqa mana castiganawanchejpajchu* ajllawarqanchej. Astawanqa ajllawarqanchej, Señorninchej Jesucristonejta salvasqa kananchejpaj.+ 10 Paymin noqanchejrayku wañorqa.+ Ajinamanta kausaspapis chayri wañuspapis,* paywan khuska kausananchejpaj.+ 11 Chayrayku qankunapura sonqochanakullaychejpuni, kallpachanakuychejtaj,+ imaynatachus ruwashankichej ajinata.

12 Kunanqa hermanosníy, mañakuyku qankuna ukhupi sinchʼita llankʼajkunata respetanaykichejta. Paykunaqa Señorpa llankʼayninpi ñaupajman pusasunkichej, yuyaychasunkichejtaj. 13 Chantapis llankʼasqankurayku paykunata mayta munakuychej, sumajpajtaj qhawaychej.+ Qankunapura allinta kausakuychej.+ 14 Hermanosníy, mañakullaykutaj mana kasukojkunata kʼaminaykichejta,*+ llakisqa* kajkunata sonqochanaykichejta, llauchhiyajkunata yanapanaykichejta, tukuypajtaj pacienciayoj kanaykichejta.+ 15 Ama pipis sajramanta sajrallawantaj kutichichunchu.+ Astawanqa kallpachakullaychejpuni qankuna ukhupi allin kajta ruwanaykichejpaj, jinallataj wajkunapajpis.+

16 Kusikullaychejpuni.+ 17 Mana saykʼuspa Diosmanta mañakullaychejpuni.+ 18 Tukuy imamanta agradecekuychej.+ Chaymin Diospa munaynenqa qankunapaj, Cristo Jesusta qhatisqaykichejrayku. 19 Ama jarkʼaychejchu Diospa espiritun qankunapi trabajananta.+ 20 Diospa sutʼinchasqantaqa ama pisipaj qhawaychejchu.+ 21 Tukuy imata allinta qhawaykuychej.+ Imachus allin kajmantataj chʼipakuychej. 22 Tukuy laya* sajra kajmanta tʼaqakuychej.+

23 Sonqo tiyaykuyta qoj Dios qankunata tʼaqachun payta sirvinaykichejpaj. Hermanosníy, tukuy yuyayniykichej, tukuy kausayniykichej, tukuy cuerpoykichejpis mana juchachana kachun, Señorninchej Jesucristoj kutimunan tiempopi.*+ 24 Wajyasojniykichejqa chayta ruwanqapuni, imaraykuchus payqa nisqanta juntʼanpuni.

25 Hermanosníy, noqaykupaj Diosmanta mañapullawaykupuni.+

26 Tukuy hermanosta llimphu sonqowan muchʼaykuspa napaykuychej.

27 Señorpa sutinpi kamachiykichej, kay cartata tukuy hermanospaj leenaykichejta.+

28 Señorninchej Jesucristoj jatun khuyakuynin qankunawan kachun.