TESALONICENSESMAN ISKAY KAJ CARTA

1 Noqa Pabloqa Silvanowan* Timoteowan ima,+ kay cartata apachimushayku Tesalónica llajtapi kaj congregacionman.* Qankuna pikunachus Tata Dioswan, jinallataj Señor Jesucristowan ujchasqa kashankichej chaykunaman:

2 Qankunapaj jatun khuyakuy, sonqo tiyaykuytaj kachun Tatanchej Diosmanta, Señor Jesucristomantawan.

3 Hermanosníy, qankunamantaqa Diosman agradecekunaykupuni tiyan. Imaraykuchus creeyniykichejqa manchayta wiñashan. Tukuyniykichej purajmanta munanakusqaykichejpis astawan wiñashan.+ 4 Chayrayku Diospa congregacionesninpi qankunamanta allinta parlayku.+ Imaraykuchus qhatiykachasqa kaspapis, llakiykunapi rikukuspapis sinchʼita sayankichej, creeyniyoj kasqaykichejtataj rikuchinkichej.+ 5 Chaytaj sutʼita rikuchin, Diosqa cheqantapuni juzgasqanta. Chaynejtataj qankunaqa Diospa Gobiernonta japʼinaykichejpaj jina qhawasqa kankichej. Chayraykutaj ñakʼarishankichej.+

6 Dios ajinata juzgasqanqa cheqanpuni. Imaraykuchus payqa, pikunachus qankunata ñakʼarichishasunkichej chaykunaman ñakʼariyllawantaj kutichenqa.+ 7 Qankunatajrí, pikunachus ñakʼarishankichej chaykuna, noqaykuwan khuska samarichisqa kankichej. Chaytaj kanqa Señor Jesús, atiyniyoj angelesninwan+ khuska cielomanta nina lauraypi rikhurimojtin.+ 8 Chaypachataj Diosta mana rejsejkunawan pagachikonqa, jinallataj Señorninchej Jesusmanta sumaj willaykunata mana kasukunkuchu chaykunawanpis.+ 9 Chaykunataqa Señorninchej juchachanqa. Paykunaqa wiñay wiñaypaj chinkachisqa kanqanku.+ Ajinamanta Señorpa ñaupaqenmanta, atiyninpa kʼanchayninmantawan chinkachisqa kanqanku. 10 Chaytaj kanqa Señorninchej ajllakusqasninwan* khuska jatunchasqa kananpaj jamojtin. Chay pʼunchayqa tukuy paypi creejkuna payta jatunpaj qhawanqanku, jinallataj qankunapis. Imaraykuchus qankunaqa willasqaykuta creerqankichej.

11 Chayrayku qankunapaj Diosmanta mañapuykupuni. Mañakuyku imapajchus wajyasqa karqankichej+ chaypaj jina Dios qhawasunaykichejta. Mañakullaykutaj Diosqa imaschus payta kusichin chay tukuy allin imasta atiyninwan juntʼananta, jinallataj creeyniykichejrayku imatachus ruwashasqaykichejtapis tukuchananta. 12 Chayqa Señorninchej Jesuspa sutin qankunanejta jatunchasqa kananpaj, qankunapis paywan khuska jatunchasqa kanaykichejpaj. Chay jatunchasqa kaytaj Diosninchejpa jatun khuyakuyninta rikuchenqa, jinallataj Señor Jesucristojtapis.

2 Kunanqa hermanosníy, Señorninchej Jesucristoj kutimunan tiempomanta,*+ noqanchejpis paywan khuska tantakunanchejmanta,+ kayta qankunaman niyku: 2 Pillapis Jehová* Diospa pʼunchaynin+ kaypiña kashasqanta nejtenqa, ama usqhayllata allin yuyayniykichejta chinkarparichinkichejchu, nitaj mancharikunkichejchu.+ Mana mancharikunaykichejchu tiyan, chay willay Diosmanta jamusqanta nejtinkupis chayri pimanta uyarejtiykichejpis chayri noqaykumantapis kanman jina cartapi leejtiykichejpis.

3 Ama piwanpis ni imaynamanta chʼaukiyachikuychejchu.* Imaraykuchus manaraj chay pʼunchay chayamushajtenqa, Diospa contranta oqharikojkuna+ ñaupajta rikhurenqanku, sajra runataj*+ sutʼiman orqhosqa kanqa. Chay runaqa chinkachisqa kanqa.+ 4 Payqa churanakoj runa. Chantapis dios sutiwan sutichasqa kajkunamanta aswan pataman oqharikun, jinallataj yupaychasqa kaj imasmantapis. Ajinamanta Diospa templonpi tiyaykun, tukuymantaj rikuchikun diospis kanman jina. 5 ¿Manachu yuyarikunkichej qankunallawanraj kashaspa chay imasta qankunaman nisqayta?

6 Kunantaj qankunaqa yachankichej, imachus chay runata jarkʼashasqanta. Ajinamanta pay maychus tiemponpi sutʼiman orqhosqa kananpaj. 7 Cheqamantapuni chay runaj sajra ruwaynenqa, mayqenchus pakasqallaraj kashan chay, trabajashanña.+ Chaywanpis chay sajra ruwaynenqa pakasqa kanqa, pichus jarkʼashan chay chinkapunankama. 8 Chaymantataj chay sajra runa* sutʼiman orqhosqa kanqa. Señor Jesustaj siminmanta llojsej atiywan*+ payta chinkarparichenqa. Chaytataj ruwanqa paypa kutimunan tiempo* sutʼi rikukojtin.+ 9 Chay sajra runaqa* Satanaspa atiyninwan rikhurimonqa.+ Ruwanqataj ashkha milagrosta, pantachej señalesta, tʼukuna imastataj.+ 10 Chantapis tukuy laya* mana cheqan kajwan chʼaukiyanqa.*+ Tukuy chay imastaj chinkayman rishanku chaykunapaj uj castigo jina kanqa. Imaraykuchus paykunaqa cheqa kajta mana japʼikorqankuchu, nitaj munakorqankuchu, chaynejta salvasqa kanankupaj. 11 Chayrayku Diosqa saqen, llulla yachachiywan chʼaukiyasqa kanankuta, llulleriosta creenankupaj.+ 12 Ajinamanta tukuy paykuna juchachasqa kanankupaj. Imaraykuchus paykunaqa cheqa kajpi mana creerqankuchu, astawanqa mana cheqan kajmanta kusikorqanku.

13 Jehová* Diospa munakusqan hermanosníy, qankunamantaqa Diosman agradecekunaykupuni tiyan. Imaraykuchus Diosqa qallariymantapacha ajllasorqachej+ salvasqa kanaykichejpaj. Payqa espiritunwan paypaj tʼaqakusorqachej,+ cheqa kajpi creesqaykichejrayku. 14 Diosqa chay salvacionpaj, sumaj willaykunata willasqaykunejta wajyasorqachej. Ajinamanta Señorninchej Jesucristo jina jatunchasqa kanaykichejpaj.+ 15 Chayrayku hermanos, sinchʼita sayaychej,+ imastachus yachakusqaykichejmantataj japʼikuychej.+ Chaykunataqa yachakorqankichej wajkunamanta uyarispa chayri cartaykunejta. 16 Tatanchej Diosqa munakuwanchej,+ jatun khuyakuyninraykutaj wiñaypaj sonqochawanchej, sumaj suyakuyta ima qowanchej.+ Noqayku mañakuyku Diospis, Señorninchej Jesucristopis 17 qankunata sonqochasunaykichejta, kallpachasunaykichejtataj.* Ajinamanta allin kajtapuni ruwanaykichejpaj, parlanaykichejpajtaj.

3 Chayrayku hermanosníy, Jehová* Diosmanta mañapullawaykupuni,+ paypa palabran tukuynejman usqhayta chayanallanpajpuni.+ Mañakullaychejtaj chay palabra jatunchasqa kananta, imaynatachus qankuna ukhupi jatunchasqa kashan ajinata. 2 Diosmanta mañapullawaykutaj, may sajra runasmanta jarkʼanawaykupaj.+ Imaraykuchus mana tukuy runaschu creejkuna kanku.+ 3 Señortajrí nisqanta juntʼanpuni. Paymin kallpachasonqachej, Diablomantataj jarkʼasonqachej. 4 Chantapis Señorta qhatisqaykurayku, noqaykoqa qankunapi atienekuyku. Yachayku imastachus kamachisqaykuta juntʼashasqaykichejta, juntʼanallaykichejtapunitaj. 5 Señorqa sonqoykichejta aysallachunpuni Diosta munakunaykichejpaj,+ sinchʼitataj sayanaykichejpaj. Ajinamanta Cristota sirvinallaykichejpajpuni.+

6 Kunanqa hermanosníy, Señor Jesucristoj sutinpi kamachiyku, mana kasukoj hermanosmanta karunchakunaykichejta.+ Paykunaqa mana noqaykumanta yachakusqaykichejman jinachu* purishanku.+ 7 Qankunatajrí, yachankichej noqayku jina ruwanaykichej kasqanta.+ Imaraykuchus noqaykoqa qankunawan kashaspa, mana paykuna jinachu mana kasukojkuna karqayku. 8 Nitaj pejpa mikhunantapis qhasimanta mikhorqaykuchu.*+ Astawanpis tuta pʼunchay jumpʼi suruyta trabajarqayku, qankunapaj mana llasa qʼepi jina kanaykupaj.+ 9 Atiykuman karqa qankunamanta imatapis mañakuyta, chaywanpis mana chayta ruwarqaykuchu. + Ajinamanta qankunapis noqayku jinallataj ruwanaykichejpaj.+ 10 Qankunawan kashajtiykoqa kayta kamachej kayku: “Pichus mana trabajayta munajqa, amallataj mikhuchunchu”,+ nispa. 11 Noqayku uyariyku qankunamanta wakenqa mana kasukuspa purishasqankuta,+ ni imapi trabajaspa. Astawanpis satʼikushanku, imapichus ni ima ruwananku kanchu chayman.+ 12 Chay jina runasmanqa Señor Jesucristoj sutinpi kamachiyku, yuyaychaykutaj trabajanankuta, mana wajkunaj ruwanankuman satʼikuspa. Ajinamanta ganakusqankuwan mikhunankupaj.+

13 Qankunataj hermanosníy, allin kajta ruwaspa ama saykʼuychejchu. 14 Sichus pipis kay cartapi nisqaykuta mana kasunchu chayqa, chay runata señalaychej, amañataj paywan masichakuychejchu.+ Ajinamanta pʼenqakunanpaj. 15 Jinapis paytaqa ama uj enemigota jinachu qhawaychej. Astawanqa uj hermanota jina yuyaychallaychejpuni.+

16 Sonqo tiyaykuyta qoj Señorqa, tukuy imaymanamanta qankunaman sonqo tiyaykuyta qollachunpuni.+ Señorqa tukuy qankunawan kachun.

17 Noqa Pabloqa kikin makiywan qhelqamuspa napaykamuykichej.+ Tukuy cartasniypeqa ajinatapuni qhelqani, noqapuni qhelqamusqayta yachanaykichejpaj.

18 Señorninchej Jesucristoj jatun khuyakuynin tukuy qankunawan kachun.