TIMOTEOMAN ISKAY KAJ CARTA

1 Noqa Pabloqa Diospa munayninrayku Cristo Jesuspa apostolnin kani. Chaytaj Cristo Jesusnejta Dios kausayta qonanta nisqanman jina kashan.+ 2 Kay cartata qhelqamuyki munasqa wawáy Timoteo:+

Qanpaj kachun bendiciones, khuyakuy, sonqo tiyaykuytaj Tata Diosmanta, Señorninchej Cristo Jesusmantawan.

3 Diosman agradecekuni, pitachus llimphu sonqowan sirvini, imaynatachus ñaupa tatasniy ruwarqanku ajinata. Diosmanta tuta pʼunchay mañakuspa qanmanta yuyarikunipuni. 4 Waqasqaykita yuyarikuspa mayta rikuyta munayki, sonqoy kusiywan juntʼasqa kananpaj. 5 Yuyarikuni tukuy sonqo creesqaykimanta.+ Chay jina creeyqa ñaupajta awelitayki Loidapi rikukorqa, mamayki Eunicepipis. Allintataj yachani qanpis chay jina creeyniyojllataj kasqaykita.

6 Chayrayku yuyarichiyki, Diosmanta ruwanapaj japʼisqayki atiyta ninata jina laurarichinaykita, mayqentachus japʼerqanki makisniyta churaykushasojtiy.+ 7 Diosqa espiritunta qowarqanchej, mana manchalis kananchejpajchu,+ manaqa atiyniyoj,+ munakuyniyoj, allin yuyayniyojtaj kananchejpaj. 8 Chayrayku ama pʼenqakuychu Señorninchejmanta willayta,+ amallataj noqamantapis pʼenqakuychu. Noqaqa payrayku presochasqa kashani. Astawanpis sumaj willaykunarayku ñakʼarinaykipaj wakichisqa kay,+ Diospa atiyninpi atienekuspa.+ 9 Paymin salvawarqanchej, wajyawarqanchejtaj paypaj tʼaqasqa kananchejpaj.+ Chaytataj ruwarqa mana imata ruwasqanchejraykuchu, manachayqa munayninrayku, jatun khuyakuyninraykutaj.+ Chay jatun khuyakuynintaqa may unaymantaña Cristo Jesusnejta rikuchiwarqanchej. 10 Kunantajrí chayqa sutʼi rikukun, Salvawajninchej Cristo Jesús rikuchisqa kasqanwan.+ Paymin wañuyta atipan.+ Chantapis sumaj willaykunanejta+ sutʼinchawanchej imaynatachus kausayta tarinata,+ jinallataj mana ismoj cuerpoyoj kaytapis.+ 11 Noqaqa chayta willanaypaj churasqa karqani, jinallataj apóstol kanaypaj, yachachej kanaypajpis.+

12 Chayrayku kay tukuy imaswan ñakʼarishani chaypis+ mana pʼenqakunichu.+ Pipichus creeni chayta rejsini, yachanitaj imatachus payman saqepusqaytaqa juicio pʼunchaykama waqaychayta atisqanta.+ 13 Noqamanta uyarerqanki chay cheqa yachachiykunamanta chʼipakullaypuni,+ creeywan munakuywantaj. Chaykunaqa Cristo Jesuswan ujchasqa kaymanta jamun. 14 Chay valorniyoj japʼisqayki imastaqa, allinta waqaychay espíritu santoj yanapayninwan, mayqenchus noqanchejpi kashan chaywan.+

15 Yachankiña Asia provinciamanta+ tukuy saqerpariwasqankuta, Figelopis Hermogenespis. 16 Señorqa Onesiforoj wasinpi kajkunata+ khuyakuchun. Payqa sapa kuti kallpachawarqa, manataj carcelpi wisqʼasqa kasqaymanta pʼenqakorqachu. 17 Astawanpis Roma llajtapi kashaspa mayta maskʼawarqa tarinawankama. 18 Señor Jehová* Diosqa juicio pʼunchaypi payta khuyakuchun. Allinta yachanki Éfeso llajtapi imastachus ruwapuwasqanta.

2 Chayrayku wawáy,+ Cristo Jesuspi kashan chay jatun khuyakuywan kallpachakullaypuni. 2 Imastachus noqamanta uyarerqanki, waj testigospa siminkumantapis uyarerqanki chaykunataqa,+ atienekunapaj jina runasman yachachiy. Ajinamanta paykunapis sumaj wakichisqa kanqanku wajkunaman yachachinankupaj. 3 Cristo Jesuspa sumaj soldadon jina+ ñakʼarinaykipaj wakichisqa kay.+ 4 Ni mayqen soldadopis ima negociomanpis* satʼikunchu,* pichus soldado kananpaj pusarqa chayta kusichiyta munan chayqa. 5 Atipanaku pujllaykunapipis mana pimanpis coronata jaywallankuchu, manachus kamachikusqanman jina pujllan chayqa.+ 6 Jumpʼi suruyta chajrapi llankʼaj runaqa, payraj ñaupajta poqoyninta mikhunan tiyan. 7 Imatachus nishayki chaypi tʼukurillaypuni. Señorqa tukuy imata entiendechisonqa.*

8 Yuyarikuy Jesucristoqa wañusqas ukhumanta kausarichisqa kasqanta,+ Davidpa mirayninmanta kasqantapis.+ Chay sumaj willaykunatamin noqaqa willashani.+ 9 Chay imasrayku ñakʼarishani, sajrata ruwaj runa jinataj carcelpi kashani.+ Diospa palabrantajrí mana cadenaswan watasqachu kashan.+ 10 Chayrayku tukuy imata sigue aguantashani Diospa ajllakusqasninrayku.+ Ajinamanta paykunapis Cristo Jesusnejta salvacionta tarinankupaj, wiñaypajtaj jatunchasqa kanankupaj. 11 Kay nisqaqa atienekunapaj jina: Sichus paywan khuska wañusun chayqa, paywan khuskallataj kausasun.+ 12 Sichus aguantallasunpuni chayqa,* paywan khuskallataj reyes jina kamachisun.+ Payta mana rejsisqanchejta nisun chayqa, paypis mana rejsiwasqanchejta nillanqataj.+ 13 Sichus wasanchanchej chaypis nisqanta juntʼallanqapuni. Payqa imaynachus kasqanman jinapuni tukuy imata ruwan.

14 Chay imasta paykunaman yuyarichillaypuni, Diospa ñaupaqenpitaj paykunata kamachillaypuni ama palabrasmanta churanakunankuta. Chayqa qhasi manakajllapuni, uyarejkunata mana allinman chayachisqanrayku.* 15 Tukuy atisqaykita ruway Diospa ñaupaqenpi allinpaj qhawasqa kanaykipaj, ni imamanta pʼenqakoj llankʼaj runa kanaykipaj, cheqa kaj palabratataj maychus kajta yachachinaykipaj.+ 16 Diospa contranpi kashan chay qhasi manakaj parlaykunatataj qhesachay.+ Chay parlaykunaqa astawan astawan Diosta pisipaj qhawachenqa. 17 Chay jina parlaykunaqa gangrena onqoy jina juntʼaykonqa. Himeneowan Filetowanqa ajinata parlanku.+ 18 Paykunaqa cheqa kajmanta tʼaqakuspa nishanku wañusqas kausarimusqankutaña.+ Chaywantaj wakinpa creeyninkuta mana allinman tukuchishanku. 19 Jinapis Diospa churasqan sumaj cimientoqa allinta sayashan, kay jina qhelqasqayojtaj kashan: “Jehová* Diosqa paypata kajkunata rejsin”,+ “pichus Jehová* Diospa sutinta oqharispa mañakojqa,+ mana cheqan kaj ruwaykunamanta tʼaqakuchun”, nispa.

20 Uj jatun wasipeqa mana qori vasosllachu, nitaj qolqe vasosllachu tiyan, kallantaj kʼullu vasospis tʼuru vasospis. Wakinkunaqa jatun pʼunchayllapi oqharinapaj kanku, wakintaj ima ratollapis oqharinapaj. 21 Chayrayku ima ratopis oqharinapaj vasos jina kajkunamanta karunchakojqa, jatun pʼunchayllapi oqharinapaj vaso jina kanqa, Diospaj tʼaqasqa, dueñonpaj may sumaj, tukuy allin ruwaykunapajtaj wakichisqa. 22 Chayrayku imastachus jóvenes munapayanku chaykunamanta ayqey. Astawanqa cheqan kajta ruway, creey, munakuyniyoj kay, sonqo tiyasqataj kay,* pikunachus llimphu sonqowan Señorpi atienekunku chaykunawan khuska.

23 Chantapis qhasi manakaj wampu siminakuyta qhesachay.+ Yachanki jina chayqa chʼajwasllata rikhurichin. 24 Señorpa kamachenqa mana churanakunanchu tiyan. Astawanqa tukuywan kʼacha kanan tiyan,*+ yachachinanpajpis wakichisqa kanan tiyan. Contranpi ima sajrata ruwajtinkupis mana imatapis ruwarparinallanchu tiyan,+ 25 mana kasukojkunata llampʼu sonqowan yachachinan tiyan.+ Ichapis Diosqa arrepientekunankuta saqenqa, cheqa kajta allinta rejsinankupaj.+ 26 Ajinamanta yuyayninkuman churakunankupaj, Diabloj trampanmantataj* ayqenankupaj. Diabloqa paykunata kausashajta japʼerqa munayninta ruwanankupaj.+

3 Jinapis kayta yachanayki tiyan: Qhepa pʼunchaykunapeqa+ kausay may llakiy kanqa, maytataj sajrayanqa. 2 Runasqa paykunallata munakonqanku, qolqeta munakonqanku, alaracos kanqanku, jatunchakonqanku, Diospa contranta, wajkunaj contrantapis sajrata rimanqanku, tatasninkuta mana kasukonqankuchu, malagradecidos kanqanku, wasanchajkuna kanqanku, 3 mana munakuyniyoj kanqanku, mana uj yuyayllaman chayayta munanqankuchu, wajkunamanta llullakuspa parlanqanku, munayninkuwan atipachikonqanku, manchay phiñas kanqanku, allin kajta mana munakonqankuchu, 4 amigosninkoj contranpi sayaykonqanku, kʼullus kanqanku,* mayta runaykachanqanku, Diosta munakunankumantataj munaynillankuta ruwanqanku, 5 Diosta tukuy sonqo yupaychajkunaman rijchʼakullanqanku, manataj chayman jinachu kausanqanku.+ Paykunamantaqa karunchakuy. 6 Chay jina runasmanta engañajkuna rikhurinku, engañoswantaj wasisman yaykuspa creeypi pisi kallpa warmispa sonqonkuta suwanku, pikunachus jucha qʼepirisqa kanku, imaymana munapayaykunawan apaykachachikunku, 7 tukuy tiempotaj yachakuspallapuni kanku, manataj jaykʼajpis cheqa kajta allinta rejsiyta atinkuchu chaykunata.

8 Imaynatachus Janeswan Jambreswan Moisespa contranpi sayaykorqanku, ajinallatataj chay runaspis cheqa kajpa contranpi sayaykushallankupuni. Chay runaspa yuyayninkoqa qʼala chʼichichasqa kashan. Diostaj paykunata qhesachan, mana creeyman jina purisqankurayku. 9 Chaywanpis paykunaqa manaña astawan ñaupajman renqankuchu. Wampus kasqankutaqa tukuy reparanqanku, imaynachus Janeswan Jambreswan karqa ajinata.+ 10 Qantajrí kunankama sumajta qhatishanki yachachisqayta, imaynatachus kausasqayta,+ imatachus kausayniypi ruwayta munasqayta, creesqayta, pacienciayta, munakuyniyta, aguantasqaytapis.* 11 Yachankitaj Antioquiapi, Iconiopi,+ Listrapi+ qhatiykachasqa kasqayta, ñakʼarisqaytapis.+ Tukuy chaykunata aguantarqani, Señortaj tukuy chaykunamanta librawarqa.+ 12 Cristo Jesuspa discipulosnin jina* Diosta tukuy sonqo yupaychaspa kausayta munajkunaqa, tukuyninku qhatiykachasqallataj kanqanku.+ 13 Engañaj sajra runasrí, astawan astawan sajrayanqanku, wajkunata engañaspa, paykunapis engañachikuspa.+

14 Qantajrí qhatillaypuni imastachus yachakusqaykita. Chayta creenaykipajqa sonqoykiman chayajta yachachisorqanku.+ Qan yachanki pikunamantachus chay imasta yachakusqaykita, 15 nacekusqaykimantapacha*+ Diospa qhelqasqa Palabranta rejsisqaykitapis.+ Chay imasqa yachayniyojman tukuchiyta atisunkiman, Cristo Jesuspi creesqaykirayku salvacionta tarinaykipaj.+ 16 Diosmanta tukuy Qhelqasqaqa Diospa yuyaychasqan kashan,+ may sumajtaj yachachinapaj,+ kʼaminapaj,* tukuy imata cheqanchanapaj,* imachus allin kasqanman jina yachachinapajpis.+ 17 Ajinamanta Diospa kamachenqa allin yachachisqa kananpaj, sumaj wakichisqataj kananpaj tukuy ima allin kajta ruwananpaj.

4 Diospa ñaupaqenpi, Cristo Jesuspa ñaupaqenpipis, pichus rikuchisqa kajtin,+ Gobiernonpitaj+ kamachishajtin kausajkunata, wañusqastapis+ juzganqa,+ paypa ñaupaqenpi kayta kamachiyki: 2 Diospa palabranta usqhayllata willay+ allin tiempopi, mana allin tiempopipis, juchata reparachiy,+ kʼamiy, allinninmanta yuyaychay mayta pacienciakuspa, sumajta yachachispataj.+ 3 Uj tiempo kanqa, chaypachataj cheqa yachachiyta mana uyarillaytapis munanqankuchu.+ Astawanpis munasqankuman jina yachachejkunata maskʼakonqanku, uyariyta munasqallankuta yachachichikunankupaj.+ 4 Manaña cheqa kajta uyarenqankuchu, llulla cuentosllataña uyarenqanku. 5 Qantajrí tukuy imapi yuyayniykipi kay, ñakʼariykunata aguantay,+ sumaj willaykunata willallaypuni, imatachus Diospaj ruwanaykitapis allinta juntʼay.+

6 Noqaqa ñapis vino ofrenda jinaña jichʼasqa kashani,+ kacharichisqa kanay pʼunchayqa+ qayllitapiña kashan. 7 Sumaj maqanakupi maqanakuni,+ atipanakupi correytapis tukuniña,+ creeypitaj sinchʼita sayani. 8 Kunanmantapacha noqapaj waqaychasqa kashan cheqan runaspaj kaj corona.+ Chaytaqa premiota jina jamoj pʼunchaypi Señor qowanqa.+ Paymin cheqan kaj juezqa.+ Mana noqallamanchu qowanqa, manaqa rikuchisqa kananta mayta suyakushanku chaykunamanpis.

9 Tukuy atisqaykita ruway usqhayllata jamunaykipaj. 10 Demasqa+ kay mundoj imasninta* munakusqanrayku saqerpariwaspa Tesalonicaman ripun. Crescenteqa Galaciaman ripun, Titotaj Dalmaciaman. 11 Lucaslla noqawan kashan. Jamuspaqa Marcostawan pusamuy, payqa Diospaj llankʼasqaypi mayta yanapawan. 12 Tiquicotaqa+ Efesoman kachani. 13 Jamoj jinaqa Troaspi Carpoman saqekorqani chay qhatanayta aparinpuwanki, kʼuyuna librostawan,* astawanqa qarapi qhelqasqasta.

14 Cobrewan llankʼaj Alejandroqa ashkha sajra imasta ruwawarqa. Jehová* Diosmin ruwasqanmanta pagachikonqa.+ 15 Qanpis paymanta allinta qhawakuy. Payqa willasqaykuman anchatapuni churanakorqa.

16 Ñaupaj demandaypi parlashajtiy mana pipis noqawan karqachu, tukuy saqerpariwarqanku. Mana munaymanchu chaymantaqa Dios cuentata mañananta. 17 Señortajrí noqawan kasharqa, kallpachawarqataj noqanejta tukuynejpi allinta willakunanpaj, tukuy nacionestaj uyarinankupaj.+ Leonpa siminmantapis librasqa karqani.+ 18 Señorqa tukuy sajra kajmanta librawanqa, cielopi kaj Gobiernonpi kanaypajtaj salvawanqa.+ Paymin jatunchasqa kachun wiñaypaj wiñaynintinpaj. Amén.*

19 Napaykapuway Priscata,* Aquilatawan,+ Onesiforoj wasinpi kajkunatapis.+

20 Erastoqa+ Corintopi qhepakun, Trofimotataj+ onqosqata Miletopi saqerqani. 21 Imaynatapis jamuypuni manaraj chiri tiempo chayamushajtin.

Napaykamusunku Eubulo, Pudente, Lino, Claudia, tukuy hermanospis.

22 Señorqa allin sonqoyoj kasqaykita bendecichun. Jatun khuyakuynenqa qankunawan kachun.