TITOMAN CARTA

1 Noqa Pabloqa Diospa kamachin kani, Jesucristoj apostolnintaj. Creeyniy, apóstol jina llankʼasqaypis, Diospa ajllasqasninpa creeyninkuman jina kashan, cheqa kajta allinta rejsisqayman jinataj. Chaytaj Diosta tukuy sonqo yupaychayman jina kashan. 2 Chay imasqa wiñay kausayta suyakuypi sayachisqa kashan.+ Mana jaykʼaj llullakoj Diostaj,+ may unaymantaña chay kausayta qonanta nerqa. 3 Payqa maychus tiemponpi chay nisqanta rejsicherqa, sumaj willaykunanejta. Chay ruwaytaj noqaman qosqa karqa,+ Salvawajninchej Diospa kamachisqanman jina. 4 Tito, kay cartata qhelqamuyki, qanqa creeypi waway jinapuni kanki.

Qanpaj jatun khuyakuy, sonqo tiyaykuytaj kachun Tata Diosmanta, Salvawajninchej Cristo Jesusmantawan.

5 Qanta Cretapi saqerqayki, imaschus cheqanchanaraj kashan chayta cheqanchanaykipaj. Jinallataj sapa llajtapi ancianosta churanaykipaj, kamachisusqayman jina. 6 Ancianoqa mana juchachana kanan tiyan, uj warmiyojlla. Creyente wawasninpis mana juchachanas kananku tiyan, ni millay kausaymanta, nitaj mana kasukoj kaymantapis.+ 7 Ancianoqa Diospa mayordomon kasqanrayku, mana juchachana kanan tiyan, chantapis mana kʼullu* runachu kanan tiyan,+ nitaj usqhayllata phiñarparikojchu,+ nitaj machaj runachu, nitaj wajkunata maqaj* runachu, nitaj payllapaj imatapis munapayaj runachu. 8 Astawanqa kanan tiyan: wasinman wajyarikuyta yachaj,+ allin kajta munakoj, allin yuyayniyoj,+ cheqan kajta ruwaj, Diosta mana wasanchaj,+ munayninwan mana atipachikoj ima.+ 9 Chantapis yachachishaspaqa, cheqa kaj palabramanta* chʼipakunan tiyan.+ Ajinamanta cheqa yachachiywan kallpachananpaj,*+ churanakojkunatapis pantasqankuta reparachinanpaj.+

10 Imaraykuchus ashkha kʼullu runas tiyan, qhasi manakaj imasta parlajkuna, chʼaukiyajkuna* ima. Paykunamanta wakintaj circuncidachikunapuni* kasqanta ninku.+ 11 Chay runaspa siminkuta wisqʼana tiyan. Imaraykuchus mana yachachinanku imasta yachachispa, wakin familiasta urmachishanku. Chaytataj ruwanku, paykunallapaj imatapis munasqankurayku. 12 Paykuna ukhumanta ujnin profetankupis* nerqa: “Cretamanta runasqa llullaspuni kanku, sajra phiña animales, mikhunawan mana sajsayta atej qhella runas”, nispa.

13 Chay nisqantaj jinapuni. Chayrayku paykunata* sinchʼita kʼamiy, creeypi sumaj sayasqa kanankupaj. 14 Nillaytaj judiospa llulla cuentosninkuta ama uyarinankuta, nillataj cheqa kajmanta wistʼuykoj runaspa kamachiykunasninkutapis. 15 Llimphu runaspajqa tukuy ima llimphu.+ Chʼichichasqa, mana creeyniyoj runaspajtajrí, mana imapis llimphuchu. Imaraykuchus yuyayninku, sonqonkupis chʼichichasqa kashan.+ 16 Paykunaqa tukuypa ñaupaqenpi Diosta rejsisqankuta ninku, jinapis ruwasqasninkuwanqa mana payta valechinkuchu.+ Imaraykuchus millay runas kanku, mana kasukojkuna, nitaj ima allin kajtapis ruwanankupaj jinachu kanku.

2 Chaywanpis qanqa, cheqa yachachiyman jinallapuni parlay.+ 2 Kuraj runasqa kachunku: munayninkuwan mana atipachikojkuna, allinpaj qhawasqas, allin yuyayniyoj, creeypi sinchʼi sayasqas, munakuywan juntʼasqas, may sumaj sayasqastaj. 3 Jinallataj kuraj warmispis, Dios jatunchasqa kananpaj jina kausakuchunku. Amataj qhasimanta tumpajkuna kachunkuchu, nitaj vinota ujyayman yachasqachu kachunku. Astawanqa allin kajta yachachejkuna kachunku. 4 Ajinamanta sipas warmista yuyaychayta atenqanku,* sapa ujpis qosankuta, wawasninkuta ima munakunankupaj. 5 Sipas warmista yuyaychayta atillanqankutaj allin yuyayniyoj, llimphu kausayniyoj, wasinkupi ruwanasninkuta allinta juntʼajkuna kanankupaj, jinallataj kʼachas kanankupaj, qosankuta kasukojkuna kanankupaj.+ Ajinamanta ama pipis Diospa palabranmanta sajrata rimananpaj.

6 Ajinallatataj qanpis yuyaychallaypuni jovenesllaraj kanku chay qharista, paykunapis allin yuyayniyoj kanankupaj.+ 7 Qanpis tukuy imapi allin kajta ruway, wajkuna qanmanta yachakunankupaj jina. Allin imastataj maychus kajta yachachiy.*+ 8 Parlasqaykeqa allin kachun, mana juchachanataj.+ Ajinamanta churanakojkunaqa, mana ima sajratapis contranchejpi niyta atenqankuchu, pʼenqaypitaj rikhurenqanku.+ 9 Esclavosqa patronesninkuta tukuy imapi kasukuchunku.+ Paykunata kusichinankupaj kallpachakuchunku, amataj siminakuchunkuchu. 10 Amallataj patronninkumanta imatapis suwachunkuchu.+ Astawanqa tukuy imapi atienekunapaj jina kachunku. Ajinamanta Salvawajninchej Diospa yachachiyninta tukuy imapi jatunpaj qhawachinankupaj.+

11 Diosqa jatun khuyakuyninta sutʼita rikuchin. Chaytaj tukuy laya* runasta salvacionman pusan.+ 12 Chay khuyakoyqa qhesachayta yachachiwanchej, Diospa munayninpa contranpi kaj imasta, kay mundoj sajra imasninta munapayayta ima.+ Chantá yachachillawanchejtaj, kay tiempopi* allin yuyaywan kausananchejta, cheqan kajta ruwaspa, Diosta yupaychaspataj.+ 13 Chaykamataj suyakunallapuni+ chay sumaj suyakuy juntʼakunanta, jinallataj Tukuy Atiyniyoj Dios, Salvawajninchej Jesucristopis jatun kʼanchayninkuta rikuchinankuta. 14 Cristomin noqanchejrayku kausayninta qorqa.+ Ajinamanta tukuy laya sajra imasta ruwaymanta librawarqanchej.*+ Llimphuchawarqanchejtaj paypa tʼaqasqa llajtan kananchejpaj, allin kajtataj tukuy sonqo ruwananchejpaj.+

15 Kamachinapaj atiyta japʼisqaykiman jina chay imasta parlallaypuni, yuyaychay,* juchata reparachiy.+ Ama saqeychu pipis pisipaj qhawasunanta.

3 Hermanosta yuyarichillaypuni kamachejkunata kasukunankuta, jinallataj autoridadestapis.+ Chantapis tukuy ima allin kajta ruwanankupaj wakichisqas kachunku. 2 Amataj pipajpis sajrata rimachunkuchu, nitaj chʼajwasta maskʼaj runaschu kachunku. Amallataj nisqankutapuni valechiyta munajkunachu kachunku,+ tukuy runaswantaj llampʼu sonqoyojpuni kachunku.+ 3 Noqanchejpis unayqa mana yuyayniyoj karqanchej, mana kasukojkuna, runaspis chʼaukiyawaj* kanchej. Chantapis tukuy laya* munapayaypa esclavon karqanchej, millay munaynillanchejtataj ruwayta munaj kanchej. Kausarqanchej sajra imasta ruwaspa, envidiakuspataj. Chantapis sajra runas karqanchej, purajmantataj chejninakoj kanchej.

4 Chaywanpis Salvawajninchej Diosqa, kʼacha kayninta,+ munakuyninta ima runasman rikucherqa. 5 Manataj cheqan imasta ruwasqanchejraykuchu salvawarqanchej,+ manaqa khuyakuyninrayku.+ Payqa mosoj kausaypaj llimphuchawarqanchej,+ espíritu santonwantaj mosojyachiwarqanchej.+ Chayta ruwaspataj salvawarqanchej. 6 Payqa chay espirituta mana michʼakuspa* qowarqanchej, Salvawajninchej Jesucristonejta.+ 7 Payqa chayta ruwarqa wiñay kausayta herenciata jina+ japʼiyta suyakunanchejpaj,+ mayqentachus pay qonawanchejta nerqa chayta. Chaytataj jatun khuyakuyninnejta japʼiyta atinchej,+ chay jatun khuyakuynejtamin payqa cheqan runaspaj qhawawanchej.

8 Chay palabrasqa atienekunapaj jinapuni. Munanitaj kutin kutita chay imasmanta parlanaykita. Ajinamanta Diospi creejkunaj yuyayninkoqa allin imasta ruwayllapipuni kananpaj. Chay imasqa sumajpuni, runastataj yanapan.

9 Chaywanpis ama satʼikuychu qhasi manakaj chʼajwasman, nitaj discutiychu ñaupa tataspa sutisninku qhelqakusqanmanta, amallataj satʼikuychu siminakuykunaman, nitaj Leymanta chʼajwasman. Chay imasqa qhasi manakajlla kanku, nitaj imapipis yanapakunchu.+ 10 Sichus pillapis llulla yachachiykunata yachachishan chayqa,*+ iskay kutikama payta kʼamiy.+ Mana kasukojtintaj, amaña paywan khuskachakuychu.+ 11 Imaraykuchus qanqa yachanki, chay runa cheqan ñanmanta wistʼuykapusqanta, juchallishasqantataj. Kikin juchantaj payta juchachan.

12 Artemasta chayri Tiquicota+ kachamusojtiy, tukuy atisqaykita ruway Nicópolis llajtaman jamuspa waturikunawaykipaj. Imaraykuchus chaypi chiri tiempota pasasaj. 13 Leymanta sumajta yachaj Zenasman, Apolosman ima, tukuy ima necesitasqankuta jaywariy, ama imapis paykunata ñanpi pisinanpaj.+ 14 Hermanosninchejpis allin imasta ruwayta yachachunku, wajkuna pisichikushajtinku yanaparinankupaj.+ Ajinamanta allin imasta ruwanqanku.+

15 Noqawan tukuy kajkuna napaykamusunku. Qanpis napaykapullawaytaj munakuwayku chay hermanosta, pikunachus creeypi hermanosninchej kanku chaykunata.

Diospa jatun khuyakuynin tukuy qankunawan kachun.