PEDROJ ISKAY KAJ CARTAN

1 Noqa Simón Pedroqa Jesucristoj kamachin kani, apostolnintaj. Kayta qhelqamuykichej qankunaman, pikunachus may valorniyoj creeyta noqayku jinallataj japʼerqankichej, Diosninchejwan Salvawajninchej Jesucristowan cheqan kasqankurayku.

2 Diospa jatun khuyakuyninta, sonqo tiyaykuytapis astawan astawan japʼillaychejpuni, Diostawan Señorninchej Jesustawan allinta rejsisqaykichejwan.+ 3 Diospa atiynenqa tukuy ima necesitasqanchejta qowanchej,* payta tukuy sonqo yupaychaspa kausananchejpaj. Chay imastaqa Diosta allinta rejsisqanchejrayku japʼerqanchej. Paymin wajyawarqanchej jatun Dios kasqanrayku,+ kʼacha kasqanraykutaj. 4 Diosqa chay imasnejta qowarqanchej* may valorniyoj sumaj nisqasninta,+ kay mundoj millay kausayninmanta ayqesqanchejtawan, mayqenchus sajra munaymanta jamun chaymanta. Chay nisqasninnejta Diospa jatun kayninta japʼinaykichejpaj.+

5 Chayrayku tukuy atisqaykichejta kallpachakuychej,+ creeyniykichejman kʼacha kayta yapanaykichejpaj,+ kʼacha kasqaykichejmantaj yachayta,+ 6 yachasqaykichejmantaj munayniykichejwan mana atipachikuyta,+ munayniykichejwan mana atipachikusqaykichejmantaj aguantayta,* aguantasqaykichejmantaj Diosta tukuy sonqo yupaychayta,+ 7 Diosta tukuy sonqo yupaychasqaykichejmantaj familia jina munanakuyta, familia jina munanakusqaykichejmantaj tukuy runasta munakuyta.+ 8 Chay imaschus qankunapi kashanku, ashkhayashankutaj chayqa, Señorninchej Jesucristota allinta rejsiypi mana jinallachu kakunkichej, nitaj mana poqoj sachʼa jinachu kankichej.+

9 Sichus mayqellanpipis mana chay imas kanchu chayqa, ciego kashan, ñawisninta kʼanchaymanta wisqʼaykun,*+ ñaupa juchasninmanta llimphuchasqa kasqantapis qonqapun.+ 10 Chayrayku hermanos, astawanraj kallpachakuychej wajyasqas,+ ajllasqastaj kasqaykichejmanta sumajta japʼikunaykichejpaj. Chay imastachus ruwallankichejpuni chayqa, ni jaykʼaj urmankichejchu.+ 11 Chay jinamanta may bendecisqa kankichej, yaykunkichejtaj Señorninchej, Salvawajninchej Jesucristoj wiñay Gobiernonman.+

12 Chayrayku yachankichejña chaypis, cheqa kajta yachasqaykichejpi sinchʼi sayasqaña kankichej chaypis, kay imasta yuyarichiytapuni munaykichej. 13 Chaywanpis allin rijchʼawan, kay toldopi*+ kashajteyqa qankunaman kay imasta ujtawan yuyarichinay.+ 14 Allinta yachani pisimantawan kay toldoyta qhechunawankuta, Señorninchej Jesucristo niwasqanman jina.+ 15 Tukuy atisqayta ruwallasajpuni, wañupojtiy qankunallaña kay imasta yuyarikuyta* atinaykichejpaj.

16 Noqaykoqa Señorninchej Jesucristoj atiynintapis kutimunan tiempotapis* qankunaman rejsicherqayku, mana sumaj wakichisqa llulla cuentosman jinachu, manachayqa noqaykupuni jatun kayninta rikorqayku.+ 17 Payqa Tata Diosmanta allinpaj qhawasqa kayta, jatunchasqa kaytapis japʼerqa, may jatun Dios payman kayta nishajtin: “Kaymin munasqa Wawayqa, paytaqa allinpaj qhawani”,+ nispa. 18 Arí, chaytaqa cielomantapacha parlamojta uyarerqayku, paywan santo orqopi kashajtiyku.

19 Chayrayku mana iskayrayanchejchu Diospa tukuy ima nisqan juntʼakunanmanta. Qankunataj allinta ruwankichej chay tukuy imasta sumajta uyarispa, chay imasqa sonqoykichejpi laqhapi kʼanchaj mechero jina kanan tiyan+ (sutʼiyanankama, sutʼiyay chʼaska+ llojsimunankama). 20 Qankunaqa allinta yachankichej Diosmanta Qhelqasqapi tukuy ima willakusqanqa mana runaj yuyayninmantachu jamusqanta. 21 Diospa willasqanqa ni jaykʼaj runaj munayninmantachu jamorqa.+ Astawanqa runas espíritu santowan yuyaychasqa kaspa* Diospa sutinpi parlarqanku.+

2 Chaywanpis imaynatachus Israelpi llulla profetas karqa, ajinallatataj qankuna ukhupipis llulla yachachejkuna rikhurenqanku.+ Paykunaqa pakayllamanta tʼaqanakusta* rikhurichenqanku, chaytaj creesqaykichejta tukuchenqa. Paykunata preciowan ranterqa chay dueñotapis qhesachanqanku.+ Ajinata ruwasqankuraykutaj usqhayllata tukuchisqa kanqanku. 2 Ashkhas paykuna jinallataj mana pʼenqakuspa juchata ruwanqanku.*+ Chayraykutaj runasqa cheqa kaj ñanmanta sajrata rimanqanku.+ 3 Chantapis paykunallapaj imatapis munapayasqankurayku, llulla palabraswan tukuy imata qankunamanta orqhosonqachej. Chaywanpis may unayña nikorqa paykuna castigasqa kanankuta.+ Chay castigoqa mana qheparikonqachu, chinkachisqa kanankoqa chayamonqapuni.+

4 Diosqa juchallikoj angelesta+ castigarqa. Paykunataqa Tártaro*+ nisqa carcelman wijchʼuykorqa, tuta laqhapi cadenaswan wataykuspa,* juicionku chayamunankama.+ 5 Ñaupa tiempomanta runastapis* castigallarqataj.+ Chaywanpis cheqan kajta willaj Noeta salvarqa,+ waj qanchis runastawan khuska,+ maypachachus sajra runaswan juntʼa mundoman jatun parata parachimorqa chaypacha.+ 6 Sodoma, Gomorra llajtasta ushphaman tukuchispataj chay llajtasta juchacharqa.+ Ajinamantataj sajra runasman rikucherqa imaschus jamunanta.+ 7 Diosqa cheqan runa Lottapis librarqa.+ Lotqa mayta llakikorqa sajra runas* mana pʼenqakuspa juchata ruwasqankumanta.* 8 Chay cheqan runaqa paykuna ukhupi tiyakushaspa chay sajra ruwasqasninkuta rikorqa, uyarerqataj. Chayraykutaj sapa pʼunchay mayta llakikorqa. 9 Jehová* Diosqa sonqo kʼajaywan payta yupaychajkunata pruebamanta librayta yachan.+ Mana cheqan runastarí, juicio pʼunchaypi chinkachisqa kanankupaj waqaychan,+ 10 astawanraj wajkunaj cuerponkuta chʼichichayta maskʼajkunataqa,+ autoridadta pisipaj qhawajkunatapis.+

Paykunaqa machu machus kanku, kʼullus kanku.* Chayrayku mana manchachikunkuchu Dios jatunchan chaykunamanta sajrata rimaytaqa. 11 Angelestajrí aswan kallpayoj, atiyniyojtaj kaspapis Jehová* Diosta jatunpaj qhawasqankurayku,* mana chay llulla yachachejkunata sajra parlaykunawan juchachankuchu.+ 12 Chay runasqa mana yachasqanku imasmanta sajrata rimanku. Paykunaqa mana yuyayniyoj animales jina kanku.+ Animalesqa mana tʼukurispalla imatapis ruwanku, nacekunkutaj japʼisqastaj tukuchisqastaj kanankupaj. Chay runasqa sajra kausayninkurayku chinkachisqa kanqanku. 13 Sajra ruwasqasninkuraykutaj castigasqas kanqanku.

Chay runasqa pʼunchay kashajtinpis, tukuy ima patapi kausaspa mayta kusikunku.+ Paykunaqa ropapi chʼichi jina kanku, uyapi tʼiri jinataj. Jatun mikhuykunapi qankunawan khuska mikhushaspataj, llulla yachachiyninkuwan runasta pantachispa kusikunku.+ 14 Ñawisninkoqa qhenchachakuywan juntʼa kashan,+ manataj juchata qonqayta atinkuchu. Pikunachus mana sinchʼi sayasqachu kashanku chaykunaj sonqonkutapis suwanku. Sonqonkoqa tukuy imata munapayaywan juntʼa kashan.* Paykunaqa maldecisqa wawas kanku. 15 Cheqan ñanta saqespataj pantachisqas kanku. Paykunaqa Beorpa wawan Balaampa ñanninta qhatinku,+ payqa sajra kajta ruwarqa pagota japʼinanmanta wañurisqanrayku.+ 16 Chaywanpis pantasqanmanta kʼamichikorqa.+ Mana parlaj burroqa runa jina parlaspa chay profetata* jarkʼarqa mana yuyayniyoj jina ruwashajtin.+

17 Paykunaqa mana yakuyoj pozos kanku, sinchʼi wayraj apaykachasqan phuyustaj. Paykunapajqa aswan sinchʼi laqha waqaychasqa kashan.+ 18 Paykunaqa may sumajman rijchʼakojta qhasi manakaj imasllata parlanku. Aychaj sajra munayninta rijchʼarichispa,+ mana pʼenqakuspa juchata ruwaspataj* wajkunaj sonqonkuta suwanku, pikunachus juchapi kausajkunamanta kunallanraj ayqekamunku chaykunajta.+ 19 Kacharichisqa kanankuta nejtinkupis, paykuna kikinku millay kausaypa esclavosnin kanku.+ Atipachikojqa atipajpa esclavonman tukun.*+ 20 Sichus Salvawajninchej Señor Jesucristota allinta rejsisqankurayku kay mundoj chʼichi imasninmanta ayqeytawanña,+ chay imaswan watejmanta chʼipaykuchikunku, atipachikunkutaj chayqa, ñaupajmanta nisqaqa qhepa kayninkoqa aswan mana allin.+ 21 Paykunapajqa aswan allin kanman karqa cheqan kaj ñanta mana allinta rejsinanku, chayta rejsispaña Diospa kamachiykunasninta japʼiytawan karunchakunankumantaqa.+ 22 Paykunapi juntʼakun kay nisqa:* “Alqoqa lansasqanta mikhukapullantaj, mayllasqa khuchipis tʼurupi suntʼimullantaj”,*+ nispa.

3 Munasqa hermanosníy, kaytawanqa iskay cartastaña qhelqamushaykichej. Kaypitaj ñaupaj cartaypi jinallataj yuyarichimushaykichej yuyayniykichejta rijchʼarichinaypaj.+ 2 Ajinamanta imastachus santo profetas ñaupajmantaña willasqankuta yuyarikunaykichejpaj, jinallataj Salvawajninchej Señorpa kamachisqantapis. Chaytaqa apostolesnejta* uyarerqankichej. 3 Ñaupajtaqa kaytaraj yachanaykichej tiyan: Qhepa pʼunchaykunapeqa asipayajkuna burlakuspa rikhurimonqanku, munayninkuman jinataj ruwanqanku.+ 4 Nenqankutaj: “¿Maytaj Cristoj jamusaj* nisqanri?+ Ñaupa tatasniyku wañuypi puñukapusqankumantapacha tukuy imapis kikillanpuni kakushan, imaynachus kay mundo ruwakushajtin karqa ajina”,+ nispa.

5 Paykunaqa yachashaspa mana yachajman tukunku. Yachanku cieloqa may unaymantaña kasqanta, jallpʼapis Diospa palabrannejta yakumanta tʼaqasqa kasqanta, yaku chaupipitaj kasqanta.+ 6 Chay imasnejta, chay tiempomanta mundoqa chinkachisqa karqa yakuwan pʼampasqa kaspa.+ 7 Kunan kashan chay cielopis jallpʼapis Diospa palabrannejllatataj ninapaj jallchʼasqa kashanku. Juicio pʼunchaykama waqaychasqa kashanku, maypachachus sajra runas chinkachisqa kanqanku chaykama.+

8 Chaywanpis munasqa hermanosníy, ama kayta qonqaychejchu: Jehová* Diospajqa uj pʼunchay waranqa watas jina, waranqa watastaj uj pʼunchay jinalla.+ 9 Jehová* Diosqa mana latʼuchu nisqanta juntʼananpaj,+ wakin runas yuyanku jinaqa. Astawanpis qankunawan pacienciakun. Mana munanchu ni pi chinkachisqa kananta. Astawanqa munan tukuy arrepientekunankuta.+ 10 Jehová* Diospa pʼunchaynintaj+ suwa jina jamonqa.+ Chaypachataj cieloqa sinchʼita sonaspa ujllata chinkanqa.+ Cielopi kaj imas, jallpʼapi kaj imaspis manchay rupha kaspa unuyaponqanku. Jallpʼapis imaschus chaypi ruwakusqanpis sutʼipi rikhurenqanku.+

11 Tukuy chay imas ajinata unuyapunankuta yachaspa, imayna runaschus kanaykichejpi tʼukuriychej. Qankunaqa llimphu kausayniyoj runas kanaykichej tiyan. Diosta tukuy sonqo yupaychasqaykichejtataj ruwasqasniykichejwan rikuchinaykichej tiyan. 12 Chantapis Jehová* Diospa pʼunchaynin+ chayamunanta rijchʼarisqas suyaychej, ama qonqaspataj.* Chay pʼunchaypi cieloqa ninawan tukuchisqa kanqa.+ Cielopi kaj imas, jallpʼapi kaj imaspis sinchʼi kʼajaypi unuyaponqanku. 13 Noqanchejtajrí mosoj cielota, mosoj jallpʼatawan suyakushanchej, pay qonanta nisqanman jina.+ Chaypitaj cheqan kausaylla kanqa.+

14 Chayrayku munasqa hermanosníy, chay imasta suyakushasqaykichejrayku, tukuy atisqaykichejta ruwaychej Diosqa llimphusta, mana imanasqasta, paywan allinpi kashajtataj taripasunaykichejpaj.+ 15 Chantapis Señorninchejpa paciencianta salvacionta jina qhawaychej. Munasqa hermanonchej Pablopis ajinallatataj qhelqamusorqachej, yachayta japʼisqanman jina.+ 16 Chaymantaqa tukuynin cartasninpi qhelqarqa. Chaywanpis qhelqasqanmanta wakin imasqa, mana entiendeyta atikullanchu. Chaytataj mana allinta entiendejkuna,* mana sinchʼi sayasqa kajkunapis qʼewishanku, imaynatachus Diosmanta Qhelqasqapi waj imastapis qʼewinku ajinata. Chaytaj paykuna kikinku chinkachisqa kanankupaj kanqa.

17 Chayrayku munasqa hermanosníy, kay imasta ñaupajmantaña yachaspa, allinta qhawakuychej ama paykuna jina sajra runaspa* pantayninkuwan apachikunaykichejpaj, nitaj sinchʼita sayasqaykichejmanta urmanaykichejpaj.+ 18 Astawanpis Salvawajninchej Señor Jesucristoj jatun khuyakuyninta astawan japʼillaychejpuni, paytataj rejsillaychejpuni. Paymin jatunchasqa kachun kunanpis, wiñay wiñaypajpis. Amén.*