JUANPA ÑAUPAJ KAJ CARTAN

1 Noqaykoqa qhelqamushayku kausayta qoj palabramanta,+ mayqenchus qallariymantapacha karqa chaymanta, mayqentachus uyarerqayku, mayqentachus ñawisniykuwan rikorqayku, mayqentachus qhawarqayku, makisniykuwantaj llankharerqayku chaymanta. 2 Wiñay kausayqa noqaykuman rejsichisqa karqa. Noqaykutaj chay wiñay kausayta+ rikorqayku, qankunamantaj chaymanta sutʼinchashayku,+ willashaykutaj. Chay wiñay kausayqa Tata Diosmanta jamun, noqaykumantaj rejsichisqa karqa. 3 Qankunamanpis willashayku imatachus rikusqaykuta, imatachus uyarisqaykutapis,+ qankunapis noqaykuwan ujchasqa kanaykichejpaj. Noqaykoqa ujchasqa kayku Tata Dioswan Wawan Jesucristowanpis.+ 4 Kay imasta qhelqamuyku mayta kusikunanchejpaj.

5 Jesusqa kayta willawarqayku, chaytataj qankunamanpis willamushayku: Diosqa kʼanchaymin,+ nitaj ima laqhapis paypeqa kanchu. 6 Sichus “paywan ujchasqa kashanchej” nishaspa laqhapi purishanchej chayqa, llullakushanchej, nitaj cheqa kajman jinachu kausakushanchej.+ 7 Sitajchus kʼanchaypi purishanchej, imaynatachus Diospis kʼanchaypi kashan ajinata chayqa, ujkuna ujkunawan ujchasqa kashanchej, Wawan Jesuspa yawarnintaj tukuy juchamanta llimphuchawanchej.+

8 Sichus ninchej “mana juchayojchu kanchej” nispa chayqa, noqallanchejtaj chʼaukiyakushanchej,*+ cheqa kajtaj mana noqanchejpichu kashan. 9 Diosqa cheqa Dios, cheqantaj. Sichus juchasninchejta rimarinchej chayqa, payqa juchasninchejta perdonawasun, tukuy sajra ruwaykunamantataj llimphuchawasun.+ 10 Sichus ninchej “mana juchallikunchejchu” nispa chayqa, Diosta llullapaj qhawachishanchej, palabrantaj mana noqanchejpichu kashan.

2 Wawitasníy, kay imasta qhelqamushaykichej ama uj juchata ruwanaykichejpaj. Sitajchus mayqellanpis uj juchata ruwan chayqa, tiyapuwanchej uj yanapawajninchej,* paytaj Tata Dioswan kashan, chayqa Jesucristo,+ pichus cheqan kajta ruwan chay.+ 2 Jesusqa juchasninchejrayku+ jaywasqa karqa+ Dioswan allinyakunanchejpaj,* manataj juchasninchejraykullachu, manachayqa mundontinpi kaj runaspa juchasninkuraykupis.+ 3 Sichus kamachisqasninta kasukullasunpuni chayqa, sutʼita reparasunchej payta rejsisqanchejta. 4 Sichus pipis ninman “payta rejsini” nispa, kamachisqasnintataj mana kasunchu chayqa, chay runaqa llulla, cheqa kajtaj mana paypichu kashan. 5 Pichus palabranta kasun chayqa, paypimin Diospa munakuynenqa cheqamanta juntʼa kashan.+ Chayta ruwajtinchejqa sutʼi yachakonqa paywan ujchasqa kashasqanchej.+ 6 Paywan ujchasqa kashasqanta nejqa, kausanan tiyan imaynatachus Jesús kausarqa ajinata.*+

7 Munasqa hermanosníy, mana mosoj kamachisqatachu qhelqamushaykichej, manachayqa chay ñaupa kamachisqallata, mayqenchus qallariymantapacha tiyapusorqachej chayllata.+ Chay ñaupa kamachisqaqa, uyarerqankichejña chay palabra kashan. 8 Chaywanpis uj mosoj kamachisqata qhelqamushaykichej, mayqentachus pay juntʼarqa, qankunapis juntʼashallankichejtaj chayta. Imaraykuchus laqhaqa chinkapushanña, cheqa kaj kʼanchaytaj kʼanchashanña.+

9 Pichus kʼanchaypi kashasqanta nishaspa hermanonta chejnikun chayqa,+ laqhallapiraj kashan.+ 10 Pichus hermanonta munakojtaj kʼanchayllapipuni kashan,+ nitaj imapis paytaqa urmachenqachu. 11 Pichus hermanonta chejnikojtaj laqhapi kashan, laqhapitaj purishan,+ nitaj yachanchu maymanchus rishasqanta,+ ñawisninta laqhallataj ciegoyachisqanrayku.

12 Wawitasníy, qhelqamushaykichej paypa sutinrayku juchasniykichej pampachasqaña kasqanrayku.+ 13 Tatas, qankunaman qhelqamushaykichej, pichus qallariymantapacha karqa chayta rejsisqaykichejrayku. Jóvenes, qankunaman qhelqamushaykichej Diablota+ atipasqaykichejrayku. Juchʼuy wawitas, qankunamanpis qhelqamushallaykichejtaj Tata Diosta rejsisqaykichejrayku.+ 14 Tatas, qankunaman qhelqamuykichej, pichus qallariymantapacha karqa chayta rejsisqaykichejrayku. Jóvenes, qankunaman qhelqamuykichej kallpayoj kasqaykichejrayku,+ Diospa palabran sonqoykichejpi kasqanrayku,+ Diablotapis atipasqaykichejrayku.+

15 Ama kay mundota munakuychejchu, nitaj kay mundopi kaj imastapis.+ Pichus kay mundota munakojqa, mana Tata Diosta munakunchu.*+ 16 Kay mundopeqa tiyan: aychaj sajra munaynin,+ ñawispa rikusqanta munapayay,+ kapuyninmanta runaykachaypis.* Chay imasqa mana Tata Diosmantachu jamun, manachayqa kay mundomanta. 17 Chantapis kay mundoqa tukukapushan, munayninpis tukukapushallantaj,+ Diospa munayninta ruwajrí wiñaypaj kausanqa.+

18 Wawitasníy, qhepa kaj horaña, uyarinkichej jinataj anticristoqa* jamushan,+ kunanpis ashkha anticristosña rikhurimunku,+ chayrayku yachanchej qhepa kaj horaña kasqanta. 19 Paykunaqa noqanchej ukhumanta llojserqanku, nitaj noqanchej jinachu karqanku.+ Sichus noqanchej jina kankuman karqa chayqa, noqanchejwan khuska kashankuman karqa. Paykunatajrí llojserqanku mana tukuychu noqanchej jina kasqanku sutʼi kananpaj.+ 20 Qankunaqa ajllasqa karqankichej Diospa espiritunnejta,+ tukuyniykichejtaj cheqa kajta rejsinkichej. 21 Qhelqamuykichej, manamin cheqa kajta mana rejsisqaykichejraykuchu,+ astawanqa rejsisqaykichejrayku, nitaj ima llulla kajpis cheqa kajmanta rikhurisqanrayku.+

22 ¿Pitaj chay llullari? ¿Manachu chay llullaqa nin Jesusqa mana Cristochu kasqanta?+ Chaymin anticristoqa,+ pichus Tata Diosta, Wawantawan negan chay. 23 Pillapis Diospa Wawanta negajqa, mana Tata Diospa ñaupaqenpi allinpaj qhawasqachu kashan.+ Pitajchus Diospa Wawanpi creesqanta nejqa,+ Tata Diospa ñaupaqenpi allinpaj qhawasqa kashan.+ 24 Imatachus qallariymantapacha uyarisqaykichejqa sonqollaykichejpipuni kachun.+ Sichus qallariymantapacha chay uyarisqaykichej sonqollaykichejpipuni kanqa chayqa, qankunapis Diospa Wawanwan Tata Dioswanpis ujchasqallapuni kankichej. 25 Chantapis pay kikin kayta qonawanchejta nerqa: Wiñay kausayta.+

26 Kay imasta qhelqamuykichej, qankunata chʼaukiyayta* munajkunamanta. 27 Qankunataqa Dios espiritunwan ajllasorqachej,+ chay espirituntaj qankunapi kashan, manataj wajkunarajchu yachachisunaykichej tiyan. Paypa espiritonqa cheqapuni, nitaj llullachu, tukuy imatataj yachachishasunkichej.+ Yachachisusqaykichejman jina paywan ujchasqallapuni kaychej.+ 28 Kunanqa wawitasníy, paywan ujchasqallapuni kaychej, pay rikuchisqa kajtin mana manchachikuspa parlananchejpaj,+ nitaj pʼenqakuspa paymanta karunchakunanchejpaj, paypa kutimunan tiempopi.* 29 Sichus yachankichej pay cheqan kasqanta chayqa, yachallankichejtaj pillapis cheqan kajta ruwajqa, paypa wawan kasqanta.+

3 Reparaychej imaynatapunichus Tata Dios munakuwasqanchejta,+ Diospa wawasnin sutichasqa kananchejpaj.+ Wawasninpunitaj kanchej. Chayrayku kay mundomanta runasqa mana rejsiwanchejchu,+ Diosta mana rejsisqankurayku.+ 2 Munasqa hermanosníy, kunanqa Diospa wawasnin kanchej,+ jinapis manaraj yachakunchu imachus aswan qhepaman kananchejta.+ Yachanchejtaj pay rikuchisqa kajtenqa pay jina kananchejta, imaraykuchus rikusunchej imaynapunichus pay kasqanta. 3 Pichus paypi atienekojqa pay kikin llimphuchakun,+ imaynachus paypis llimphu kashan ajinata.

4 Pichus juchata ruwashallanpuni chayqa, Diospa leyninta pʼakishan. Juchaqa Diospa leyninta pʼakiymin. 5 Qankunaqa yachallankichejtaj Jesusqa juchanchejta llimphuchananpaj jamusqanta,+ manataj paypeqa ima juchapis kanchu. 6 Pichus paywan ujchasqallapuni kajqa, mana juchata ruwallanpunichu.+ Pichus juchata ruwayman yachasqa kajtaj, mana payta rikunchu, nitaj rejsinchu. 7 Wawitasníy, ama piwanpis chʼaukiyachikuychejchu.* Pichus cheqan kajta ruwajqa, cheqan runamin, imaynachus Jesuspis cheqan ajina. 8 Pichus juchata ruwallajpuneqa Diablomantamin, Diabloqa qallariymantapacha juchallikun.+ Chayrayku Diospa Wawanqa jamorqa Diabloj ruwasqasninta tukuchinanpaj.+

9 Pichus Diospa wawan kajqa, mana juchata ruwallanpunichu+ Diospa espíritu santon* paypi kasqanrayku, nitaj juchata ruwallanmanpunichu Diospa wawan kasqanrayku.+ 10 Kay jinamanta rejsinchej Diospa wawasninta, Diabloj wawasnintapis: Pichus mana cheqan kajta ruwajqa, manamin Diospa wawanchu. Hermanonta mana munakojpis, nillataj Diospa wawanchu.+ 11 Qallariymantapacha qankunaqa kay willayta uyarerqankichejña: Purajmanta munanakunanchej kasqanta.+ 12 Manataj Caín jinaqa kananchejchu tiyan, payqa Diabloj wawan kaspa hermanonta wañucherqa.+ Chanta, ¿imaraykú wañucherqari? Ruwasqasnin sajra kasqanrayku,+ hermanonpa ruwasqasnintaj cheqan karqa.+

13 Hermanosníy, ama tʼukuychejchu kay mundomanta runas chejnisojtiykichejqa.+ 14 Noqanchejqa kayta yachanchej: Wañusqa kasharqanchej,+ kunantaj kausashanchej hermanosninchejta munakusqanchejrayku.+ Pichus hermanonta mana munakojqa wañusqallaraj kashan.+ 15 Pichus hermanonta chejnikojqa runa wañuchi,+ qankunataj yachankichej ni mayqen runa wañuchipis wiñay kausayniyojchu kananta.+ 16 Kay jinamanta yachanchej imachus munakuy kasqanta: Jesucristoqa noqanchejrayku kausayninta jaywarqa,+ noqanchejpis hermanosninchejrayku kausayninchejta jaywanallanchejtaj tiyan.+ 17 Sichus pipis wajkunata yanaparinanpaj tiyapushajtin, hermanonta pisichikojta rikuspa mana khuyarikuyta munanchu chayqa, ¿imaynatataj nisunman Diosta munakusqantari?+ 18 Wawitasníy, hermanosninchejtaqa ama simillamantachu munakuna,+ astawanpis munakusqanchejqa ruwasqasninchejpi sutʼi yachakuchun,+ tukuy sonqotaj kachun.+

19 Ajinamanta yachasun cheqa kajmanta kasqanchejta, manataj iskayrayasunchu Dios munakuwasqanchejmanta. 20 Sonqonchej imallamantapis juchachawajtinchejqa, yuyarikuna Diosqa sonqonchejmanta aswan kuraj kasqanta, tukuy imatataj yachasqanta.+ 21 Munasqa hermanosníy, sonqonchej mana juchachawajtinchejqa, mana manchachikuspa Dioswan parlarikuyta atinchej.+ 22 Jinallataj imatapis paymanta mañakojtinchejqa, payqa qowasunpuni+ kamachisqasninta kasukusqanchejrayku, imachus payta kusichisqantapis ruwasqanchejrayku. 23 Kaytamin payqa kamachiwanchej: Wawan Jesucristoj sutinpi creenanchejta,+ purajmantataj munanakunanchejta,+ pay kamachiwasqanchejman jina. 24 Chantapis pichus kamachisqasninta kasukojqa Dioswan ujchasqa kashan, Diostaj paywan ujchasqa kashan.+ Qowasqanchej espiritunejtataj yachanchej noqanchejwan ujchasqa kashasqanta.+

4 Munasqa hermanosníy, ama ima willaytapis creellaychejchu,+ astawanpis allinta qhawariychej chay willaykuna Diosmantachus manachus kasqanta,+ ashkha llulla profetas kay mundopi rikhurisqanrayku.+

2 Kay jinapi yachankichej uj willay Diosmantachus manachus kasqanta: Sichus ima willayllapis sutʼinchanman Jesucristoqa runaman tukuspa jamusqanta chayqa, chay willaymin Diosmantaqa kashan.+ 3 Ima willaytajchus Jesús mana jamusqanta sutʼinchan chayqa, chay willayqa mana Diosmantachu kashan.+ Chayqa anticristoj* willaynin, qankunataj uyarerqankichejña chay imasta ninanta,+ kunantaj chay nisqanqa kay mundopi uyarikushan.+

4 Wawitasníy, qankunaqa Diosmanta kankichej, llulla profetastataj atiparqankichej,+ qankunawan ujchasqa kajqa aswan atiyniyoj,+ kay mundowan ujchasqa kajmanta nisqaqa.+ 5 Chay llulla profetasqa kay mundomanta kanku.+ Chayrayku kay mundopi kaj imasllamanta parlanku, kay mundomanta runastaj paykunata uyarinku.+ 6 Noqanchejqa Diosmanta kanchej. Pichus Diosta rejsejqa uyariwanchej.+ Pichus mana Diosmanta kajtaj mana uyariwanchejchu.+ Chay jinamanta reparanchej mayqen willaychus cheqan kasqanta, mayqen willaytajchus llulla kasqanta.+

7 Munasqa hermanosníy, purajmanta munanakunallapuni.+ Munakoyqa Diosmantamin, wajkunata munakojtaj Diospa wawan, Diostataj rejsin.+ 8 Wajkunata mana munakojqa mana Diosta rejsinchu, Diosqa munakuymin.+ 9 Kay jinamanta Diosqa munakuyninta rikuchiwarqanchej: Diosqa kʼata Wawanta*+ kay mundoman kachamorqa paynejta kausayta japʼinanchejpaj.+ 10 Kaymin munakoyqa: Diosqa Wawanta kachamorqa juchasninchejrayku jaywasqa kananpaj, ajinamanta Dioswan allinyakunanchejpaj.* Payqa chayta ruwarqa munakuwasqanchejrayku, manataj noqanchej munakusqanchejraykuchu.+

11 Munasqa hermanosníy, ajinatachus Dios munakuwarqanchej chayqa, noqanchejpis purajmanta munanakunallanchejtaj tiyan.+ 12 Diostaqa ni jaykʼaj pipis rikorqachu.+ Sichus purajmanta munanakullanchejpuni chayqa, Diosqa noqanchejpi kashan, munakuynintaj noqanchejpi juntʼa kashan.+ 13 Kay jinamanta yachanchej paywan ujchasqa kashasqanchejta, paytaj noqanchejwan ujchasqa kashasqanta: Espiritunta qowasqanchejrayku. 14 Chantapis noqayku kikin rikorqayku, willashaykutaj Tata Diosqa Wawanta kachamusqanta kay mundomanta runaspa salvajnin kananpaj.+ 15 Pichus tukuy sonqo nin “Jesusqa Diospa Wawan” nispa chayqa,+ Diosqa paywan ujchasqa kashan, paytaj Dioswan ujchasqa kashan.+ 16 Noqanchejtaj yachanchej, creenchejtaj Dios munakuwasqanchejta.+

Diosqa munakuymin.+ Pichus munakuspallapuni kausajqa, Dioswan ujchasqa kashan, Diostaj paywan ujchasqa kashan.+ 17 Chay jinamanta munakoyqa noqanchejpi juntʼa kashan, mana manchachikuspa juicio pʼunchaypi parlananchejpaj.+ Kay mundopeqa noqanchejpis Jesucristo jinallataj kanchej. 18 Munakuypeqa mana manchachikuy kanchu.+ Munakuywan juntʼa kayqa manchachikuyta ayqechin,* imaraykuchus manchachikoyqa ni imata ruwajta saqewanchejchu.* Chayrayku manchachikojqa manaraj munakuywan juntʼachu kashan.+ 19 Noqanchejqa munakunchej, Dios ñaupajta munakuwasqanchejrayku.+

20 Sichus pipis “Diosta munakuni” nishaspa hermanonta chejnikun chayqa, chay runaqa llulla.+ Sichus rikusqan hermanonta mana munakunchu chayqa,+ ¿imaynatataj munakunman mana rikusqan Diostari?+ 21 Payqa kayta kamachiwarqanchej: Pichus Diosta munakojqa hermanontapis munakullachuntaj.+

5 Pichus creen Jesusqa Cristo kasqanta chayqa, Diospa wawan.+ Pichus Diosta munakojqa, Diospa wawasnintapis munakullantaj. 2 Kay jinamanta yachanchej Diospa wawasninta munakusqanchejta:+ Diosta munakojtinchej, kamachisqasnintapis kasukojtinchej. 3 Diosta munakoyqa kamachisqasninta kasukuymin,+ kamachisqasninta kasukuytaj atina jinalla.+ 4 Pichus Diospa wawan kajqa, kay mundota atipan.+ Kay mundotaqa creesqanchejwan atipanchej.+

5 ¿Pitaj kay mundota atipanman?+ ¿Manachu Jesusqa Diospa Wawan kasqanta creejlla?+ 6 Jesucristomin yakunejta, yawarnejtataj jamorqa, manataj yakullawanchu jamorqa,+ manachayqa yakuwantaj yawarwantaj.+ Diospa espirituntaj chayta willashan,+ imaraykuchus Diospa espiritonqa cheqa kajta willan. 7 Kinsamin kanku willajkunaqa: 8 Diospa espiritun,+ yaku,+ yawar+ ima. Kinsantinkutaj ujllata willanku.

9 Noqanchejqa runaj willasqanta japʼikunchej, Diospa willasqantajrí aswan kurajmin. Diospuni Wawanmantaqa willashan. 10 Diospa Wawanpi creej runaqa chay willayta sonqonpi japʼikun. Diospi mana creej runataj Diosta llullapaj qhawachin,+ imatachus Dios Wawanmanta willasqanta mana creesqanrayku. 11 Kaymin chay willayqa: Diosqa wiñay kausayta+ qowanchej, chay kausaytaj Wawanpi kashan.+ 12 Diospa Wawanwan ujchasqa kajqa wiñay kausayniyoj. Diospa Wawanwan mana ujchasqa kajqa mana wiñay kausayniyojchu.+

13 Kay imasta qankunaman qhelqamuykichej, yachanaykichejpaj wiñay kausayniyoj kasqaykichejta,+ pikunachus Diospa Wawanpa sutinpi creenkichej chaykunaman.+ 14 Kaymin Diospi atienekusqanchejqa:+ Imatapis munayninman jina mañakojtinchejqa, pay uyariwanchej.+ 15 Sichus yachanchej imatapis mañakojtinchej uyarinawanchejta chayqa, yachallanchejtaj chay mañakusqanchejtapis japʼinanchejta, chay imasta paymanta mañakusqanchejrayku.+

16 Sichus pipis hermanonta rikunman mana wañuyman apaj juchata ruwashajta chayqa, Diosmanta mañapuchun, Diostaj kausayta qonqa.+ Chayqa mana wañuyman apaj juchata ruwajkunapaj. Tiyallantaj wañuyman apaj juchapis.+ Chay juchata ruwajpajqa noqa nini ama Diosmanta mañapunanta. 17 Mana cheqan ruwaykunaqa juchamin.+ Jinapis kallantaj mana wañuyman apaj juchapis.

18 Kayta yachanchej: Pichus Diospa wawan kajqa mana juchata ruwaspachu kan, astawanpis paytaqa Diospa Wawan* allinta qhawan,* Diablotaj ni imanayta atinchu.*+ 19 Yachanchej Diosmanta kasqanchejta, mundontintaj Diabloj makinpi kasqanta.+ 20 Yachallanchejtaj Diospa Wawan jamusqanta,+ paytaj allin yuyayta qowanchej cheqa Diosta rejsinanchejpaj. Wawan Jesucristonejta cheqa Dioswan ujchasqa kashanchej.+ Paymin cheqa Diosqa, wiñay kausaytaj.+ 21 Wawitasníy, karunchakuychej qhasi manakaj dioskunamanta.+