APOCALIPSIS

1 Kayqa Jesucristoj sutʼinchasqan* kashan Diosmanta japʼisqanman jina,+ kamachisninman+ rejsichinanpaj imaschus tumpamantawan kanan kashan chay imasta. Jesucristoqa angelninta kachamorqa kamachin Juanman,+ willananpaj imachus chay imas niyta munasqanta.* 2 Juanqa willarqa Diospa qosqan palabramanta,* Jesucristo willasqanmantawan. Payqa tukuy rikusqanta willarqa. 3 Kusisqamin pichus kay palabrasta jatunmanta leejqa. Kusisqallataj kanku pikunachus chayta uyarinku, chaypi qhelqasqa kaj imastataj kasukunku chaykunapis,+ señalasqa tiempo qayllapiña kasqanrayku.

4 Noqa Juanqa qhelqamushaykichej qankunaman Asia provinciapi kaj qanchis congregacionesman:*+

Qankunapaj jatun khuyakuy kachun, sonqo tiyaykuytaj “pichus kausashan, kausarqa, jamonqataj” chaymanta.+ Jinallataj qanchis espiritusmantapis,*+ pikunachus kamachina tiyananpa ñaupaqenpi kashanku chaykunamanta. 5 Jinallataj Jesucristomantapis, pichus Atienekunapaj jina Testigo,+ wañusqas ukhumanta Ñaupajta Kausarimoj,+ kay jallpʼapi reyespa Kamachejnintaj+ chaymanta.

Jesusqa munakuwanchej,+ yawarninwantaj juchasninchejmanta kacharichiwarqanchej.+ 6 Payqa reyestaj+ sacerdotestaj*+ kananchejpaj churawanchej Tatan Diosta sirvinanchejpaj. Jesuspaj kachun jatunpaj qhawasqa kay, atiypis wiñay wiñaynintinpaj. Amén.*

7 Qhawaychej, payqa phuyuswan jamonqa,+ tukuytaj payta rikonqanku, jinallataj payta tʼojsejkunapis. Kay jallpʼapi tukuy ayllustaj* payrayku llakiywan pechonkuta takakonqanku.+ Arí, amén.

8 Jehová* Diosqa nin: “Noqa kani Alfataj Omegataj,*+ pichus kausashan, kausarqa, jamonqataj chay, Tukuy Atiyniyojtaj”,+ nispa.

9 Noqa Juanqa hermanoykichej kani, Jesusta qhatisqanchejraykutaj qankunawan khuska aguantashani,*+ ñakʼarishani,+ qankunawan khuskataj Diospa Gobiernontapis japʼisaj.+ Noqaqa Patmos sutiyoj churupi* kasharqani Diosmanta Jesusmantawan parlasqayrayku. 10 Diospa espiritunwan juntʼa kaspa Señorpa pʼunchayninpi rikhurerqani, qhepaymantataj uj sinchʼi parlayta uyarerqani, cornetaj waqayninta jina. 11 Nimuwarqataj: “Rikusqaykitaqa uj kʼuyuna libropi* qhelqay, chaytataj qanchis congregacionesman apachiy: Efesoman,+ Esmirnaman,+ Pergamoman,+ Tiatiraman,+ Sardisman,+ Filadelfiaman,+ Laodiceamanpis”,+ nispa.

12 Pichus parlamushawasqanta rikunaypaj kutirikorqani. Kutirikuspataj rikorqani qanchis qori candelerosta.*+ 13 Chay candeleros chaupipitaj rikorqani runaj wawanman rijchʼakojta,+ chakisninkama jatun ropayojta, pechontaj qori chumpiwan chumpisqa kasharqa. 14 Umanpis chujchanpis yuraj karqa, yuraj millma jina, ritʼi jina. Ñawisnintaj nina lauray jina karqa.+ 15 Chakisnenqa chʼuwachasqa cobre jina lliphipirisharqa,+ hornopi unuyachisqa cobre jina. Parlasqantaj ashkha yakoj* sonaynin jina karqa. 16 Paña makinpeqa qanchis estrellasta japʼisharqa,+ siminmantataj puraj filoyoj jatun filo espada llojsimusharqa.+ Uyantaj mayta kʼancharej inti jina karqa.+ 17 Payta rikuspataj wañusqa jina chakisnin chayman wijchʼukorqani.

Paytaj paña makinwan llankhariwaspa niwarqa: “Ama manchachikuychu. Noqa kani Ñaupaj Kaj,+ Qhepa Kaj,+ 18 kausajtaj.+ Wañusqa kasharqani,+ kunantajrí kausashani, wiñaypaj wiñaynintinpajtaj kausasaj.+ Japʼishanitaj wañuypatawan Sepulturajtawan* llavesninta.+ 19 Chayrayku qhelqay imastachus rikusqaykita, imaschus kunan kashan, imastajchus kay imas qhepata kanqa chaykunatawan. 20 Chay qanchis estrellasta paña makiypi rikusqaykeqa, chay qanchis qori candelerospis Diospa pakasqa yachaynin kanku. Kaytataj niyta munan: Chay qanchis estrellasqa qanchis congregacionespi kaj ángeles kanku, chay qanchis candelerostaj qanchis congregaciones kanku.+

2 ”Éfeso+ congregacionpi kaj angelman+ qhelqay: Kay imasta nin pichus qanchis estrellasta paña makinpi japʼishan, qanchis qori candeleros* chaupintataj purishan chay:+ 2 ‘Yachani imastachus ruwasqaykita, sinchʼita llankʼasqaykita, aguantasqaykitapis.* Yachallanitaj sajra runasta mana rikuyta atisqaykita, apóstoles kayku nejkunatapis pruebaman churaspa llullas kasqankuta tarisqaykita,+ mana apostoleschu kasqankurayku. 3 Chantapis aguantashanki, sutiyrayku+ sinchʼita sayashanki, manataj saykʼunkichu.+ 4 Chaywanpis kayta contraykipi nini: Qanqa manaña ñaupajta jinachu Diosta munakunki.

5 ”’Chayrayku yuyarikuy maymantapachachus urmasqaykita, arrepientekuy,+ ñaupa ruwasqasniykitataj ruway. Manachus arrepientekunki chayqa,+ jamuspa candeleroykita+ apakapusaj maypichus kashan chaymanta. 6 Chaywanpis qanqa allinta kayta ruwashanki: Nicolaspa yachachiyninta qhatejkunaj* ruwasqasninkuta chejnikunki,+ noqapis chay imasta chejnikullanitaj. 7 Pichus ninriyojqa uyarichun imatachus espíritu santo congregacionesman nisqanta:+ Atipajmanqa+ kausay sachʼamanta+ mikhuchisaj, mayqenchus Diospa paraisonpi kashan chaymanta’.

8 ”Esmirna congregacionpi kaj angelman qhelqay: Kay imasta nin pichus ‘Ñaupaj Kaj, Qhepa Kajtaj’,+ pichus wañusqa kasharqa kausarinporqataj chay:+ 9 ‘Yachani sufrisqaykita, wajchataj kasqaykita, jinapis qhapaj kanki.+ Yachallanitaj qanpaj sajrata rimasqankuta judíos kasqankuta nejkuna, manataj judioschu kanku, astawanqa Satanaspa sinagogan* kanku.+ 10 Ama manchachikuychu imastachus sufrinayki kashan chaykunamantaqa.+ Diabloqa qankunamanta wakinta carcelman wisqʼaykuchillasonqachejpuni, sinchʼi pruebaman churasqa kanaykichejpaj, chunka diastataj ñakʼarinkichej. Wañupunaykikama tukuy sonqo kasukuy, noqataj kausay coronata qosqayki.+ 11 Pichus ninriyojqa uyarichun+ imatachus espíritu santo congregacionesman nisqanta: Pichus atipanqa chaytaqa,+ iskay kaj wañoyqa ni jaykʼaj imananqachu’.+

12 ”Pérgamo congregacionpi kaj angelman qhelqay: Kay imasta nin pichus puraj filoyoj jatun filo espadayoj kaj:+ 13 ‘Yachani tiyakusqaykita maypichus Satanaspa kamachina tiyanan kashan chaypi. Jinapis sutiymanta allinta chʼipakushallankipuni,+ noqapi creesqaykitataj mana negarqankichu+ ni atienekunapaj jina testigoy+ Antipaspa tiemponpipis, pitachus rikushajtiykichej wañucherqanku+ maypichus Satanás tiyakun chaypi.

14 ”’Chaywanpis kay imasllata contraykipi nini: Qanqa japʼikushallanki pikunachus Balaampa yachachiyninta+ japʼikunku chaykunata. Balaamqa Balacta+ yachaykucherqa imaynatachus israelitasta juchaman urmachinanta, santosman jaywasqa imasta mikhunankupaj, khuchichakuy juchata* ruwanankupajpis.+ 15 Qanqa japʼikushallankitaj Nicolaspa yachachiyninta* japʼikojkunatapis.+ 16 Chayrayku arrepientekuy. Manachus arrepientekunki chayqa, noqaqa usqhayllata jamuspa, paykunawan maqanakusaj simiymanta llojsimoj jatun espadawan.+

17 ”’Pichus ninriyojqa uyarichun imatachus espíritu santo congregacionesman nisqanta:+ Atipajmanqa+ pakasqa kaj maná+ nisqamanta qorisaj, qollasajtaj yuraj rumisituta, chay rumisitupitaj uj mosoj suti qhelqasqata, chay sutitaqa ni pipis rejsinchu, manachayqa pichus chayta japʼejlla’.

18 ”Tiatira+ congregacionpi kaj angelman qhelqay: Kay imasta nin Diospa Wawan, pejpatachus ñawisnin nina lauray jina kanku,+ chakisnintaj chʼuwachasqa cobre jina kanku+ chay: 19 ‘Yachani imastachus ruwasqaykita, munakusqaykita, creesqaykita, Diosta sirvisqaykita, aguantasqaykitapis.* Yachallanitaj kunallanraj ruwasqasniykipis ñaupaj ruwasqasniykimanta aswan sumaj kasqanta.

20 ”’Chaywanpis kayta contraykipi nini: Chay Jezabel+ warmita pichus profetisa kasqanta nin chayta qhawakushallanki. Payqa yachachisqasninwan kamachisniyta chʼaukiyashan* khuchichakuy juchaman*+ urmanankupaj, santosman jaywasqa imastataj mikhunankupaj. 21 Unaytaña suyani pesachikunanta, paytajrí mana pesachikuyta munanchu chay khuchichakuy juchanmanta.* 22 Chayrayku mana sayariyta atinankama onqoykuchisaj, pikunachus paywan qhenchachakunku chaykunatapis mayta ñakʼarichisaj, manachus chay warmi juchasta ruwachisqanmanta* pesachikonqanku chayqa. 23 Wawasnintapis wañuchej onqoywan wañurachisaj, ajinamanta tukuynin congregaciones yachanqanku noqa runaj sonqonta watusqayta, jinallataj sonqon ukhupi yuyasqantapis. Sapa ujniykichejmantaj ruwasqaykichejman jina qopusqaykichej.+

24 ”’Chaywanpis Tiatirapi kajkunamanta wakinniykichejman niykichej, tukuy pikunachus chay yachachiyta mana qhatinkichejchu, nitaj “Satanaspa llulla yachachiykunasnintapis”+ rejserqankichejchu chaykunaman: “Mana waj llasa qʼepitachu pataykichejman churamushaykichej. 25 Jinapis imachus kapusunkichej chaytaqa allinta japʼillaychejpuni jamunaykama.+ 26 Atipaspa tukukuykama kamachisqasniyta kasukojmanqa, atiyta qosaj nacionesta kamachinanpaj.+ 27 Imaynatachus Tataypis atiyta qowarqa ajinata. Chay atipajqa runasta fierro varawan kamachenqa,+ paykunataj tʼuru yurus jina phirisqa kanqanku. 28 Paymanqa sutʼiyay chʼaskata qollasajtaj.+ 29 Pichus ninriyojqa uyarichun imatachus espíritu santo congregacionesman nisqanta”’.

3 ”Sardis congregacionpi kaj angelman qhelqay: Kayta nin pichus Diospa qanchis espiritusninta,*+ qanchis estrellastawan japʼishan chay:+ ‘Yachani imastachus ruwasqaykita, kausashajman rijchʼakunki chaypis, wañusqa kashasqaykita.+ 2 Rijchʼarisqa kay.+ Kallpachaytaj imachus wañupoj jinaña kasharqa chayta. Imaraykuchus ruwasqasniykitaqa Diosniypa ñaupaqenpi mana allin tukuchasqatachu tarini. 3 Chayrayku yuyarikullaypuni imatachus japʼisqaykita, imatachus uyarisqaykitapis, chaytataj kasukullaypuni, arrepientekuytaj.+ Manachus rijchʼarinki chayqa, suwa jina jamusaj,+ nitaj yachankichu ima horastachus chayamunayta.+

4 ”’Chaywanpis Sardispeqa pisi runaslla tiyan, pikunachus ropankuta mana chʼichichakorqankuchu chaykuna.+ Paykunaqa yuraj ropasniyoj noqawan khuska purenqanku,+ chaypaj jina kasqankurayku. 5 Atipajqa+ yuraj ropasta churakonqa,+ manataj sutinta kausay libromanta chinkachisajchu,+ astawanqa Tataypa ñaupaqenpi, angelesninpa ñaupaqenpipis payta rejsisqayta nisaj.+ 6 Pichus ninriyojqa uyarichun imatachus espíritu santo congregacionesman nisqanta’.

7 ”Filadelfia congregacionpi kaj angelman qhelqay: Diospaj tʼaqasqa kaj,+ cheqan kaj,+ pichus Davidpa llaventa japʼin,+ punkutataj kicharin mana ni pi wisqʼayta atinanpaj jina, wisqʼaykuntaj mana ni pi kichariyta atinanpaj jina, paymin kayta nin: 8 ‘Yachani imastachus ruwasqaykita. Qhaway, ñaupaqeykipi uj punkuta kicharini,+ chaytataj ni pi wisqʼayta atinchu. Yachallanitaj pisi kallpayoj kasqaykita, nisqaytataj kasukusqaykita, sutiytapis ni imaynamanta negasqaykita. 9 Satanaspa sinagoganmanta kajkunata, pikunachus judíos kasqankuta ninku manataj judioschu kanku,+ manachayqa llullakushanku chaykunata jamuchisaj, ñaupaqeykipitaj qonqorichisaj. Paykunaman rejsichisaj qanta munakususqayta. 10 Noqa jina aguantasqaykirayku*+ jarkʼakusqayki prueba horapi,+ chaytaj tukuy jallpʼantinman chayamonqa, jallpʼapi tukuy tiyakojkunata pruebaman churananpaj. 11 Usqhayllata jamushani.+ Japʼillaypuni imachus kapusunki chayta, ama pipis coronaykita qhechusunanpaj.+

12 ”’Atipajtaqa Diosniypa templonpi uj machonta jina* churasaj, chaymantataj ni jaykʼaj llojsimonqachu. Paypa patanpitaj qhelqaykusaj Diosniypa sutinta,+ Diosniypa llajtanpa sutintawan. Chay llajtaqa Mosoj Jerusalén,+ chaytaj cielomanta uraykamun, Diosniymanta. Chantá mosoj sutiytapis qhelqaykullasajtaj.+ 13 Pichus ninriyojqa uyarichun imatachus espíritu santo congregacionesman nisqanta’.

14 ”Laodicea+ congregacionpi kaj angelman qhelqay: Kayta nin Amén* kajqa,+ pichus atienekunapaj jina cheqa+ testigo,+ pitachus Dios ñaupajta ruwarqa chay:+ 15 ‘Yachani imastachus ruwasqaykita, qanqa mana chirichu nitaj ruphachu kanki. Munayman chiripis ruphapis kanaykita. 16 As qʼoñilla kanki, mana chirichu,+ nitaj ruphachu.+ Chayrayku simiymanta ajtumusqayki. 17 Qanqa ninki: “Qhapaj kani,+ tukuy imata sayachikuni, nitaj imapis pisiwanchu”, nispa. Manataj yachakunkichu mana imayoj, khuyana, wajcha, ciego, qʼalallataj kashasqaykita. 18 Kayta yuyaychasqayki: Rantikuway ninapi chʼuwachasqa qorita qhapaj kanaykipaj. Rantikullawaytaj yuraj ropasta churakunaykipaj, ama pipis qʼalalla kasqaykita rikusunanpaj, ama pʼenqaypi rikhurinaykipaj.+ Rantikullawaytaj ñawisniykipaj pomadata,+ chaywan jawikuspa rikuyta atinaykipaj.+

19 ”’Tukuy pikunatachus munakuni chaykunataqa kʼamini,* jasutʼinitaj.+ Chayrayku juchasniykimanta pesachikuy,+ Diostataj tukuy sonqo sirviy. 20 Noqa punkupi sayashani, takamushanitaj. Sichus pipis wajyasqayta uyarispa punkuta kicharimuwan chayqa, wasinman yaykusaj, chantá chʼisin paywan mikhusaj, paytaj noqawan mikhonqa. 21 Atipajtaqa+ kamachina tiyanaypi noqawan khuska tiyaykuchisaj,+ imaynatachus noqapis atipaspa Tataywan khuska kamachina tiyananpi tiyaykorqani ajinata.+ 22 Pichus ninriyojqa uyarichun imatachus espíritu santo congregacionesman nisqanta’”.

4 Chay imaspa qhepantataj rikorqani cielopi uj punkuta kicharisqata. Ñaupaj kaj parlamojta uyarisqayqa cornetaj waqaynin jina karqa, nimuwarqataj: “Kayman wicharimuy, imaschus kananta rikuchisqayki”, nispa. 2 Chantá chay ratopacha Diospa espiritunwan juntʼa kaspa, rikorqani uj kamachina tiyanata cielopi kashajta, ujtaj chay kamachina tiyanapi tiyasharqa.+ 3 Chay tiyasqa kajtaj rijchʼakorqa jaspe rumiman,+ sardio rumimanwan.* Chay kamachina tiyanataqa uj kʼuychi* muyuykusharqa, esmeralda rumiman rijchʼasqa.+

4 Chay kamachina tiyanaj muyuyninpeqa 24 kamachina tiyanas karqa. Chay kamachina tiyanaspitaj 24 ancianosta+ tiyashajta rikorqani, yuraj ropasniyojta, umasninkupi qori coronasniyojta. 5 Chay kamachina tiyanamantaqa llojsimusharqa lliuj lliujkuna,+ parlaykuna, qhon qhonkuna.+ Kamachina tiyanaj ñaupaqenpitaj qanchis nina kʼanchanas laurasharqanku. Chaykunaqa Diospa qanchis espiritusninwan*+ ninakunku. 6 Kamachina tiyanaj ñaupaqenpeqa karqa mar qochaman rijchʼakoj vidrio jina,+ cristal jinataj.

Kamachina tiyanaj chaupinnejpi,* muyuyninpiwan tawa querubines*+ kasharqanku, ñawiswan juntʼa ñaupaqenkupi qhepankupipis. 7 Ñaupaj kaj querubinqa leonman+ rijchʼakorqa, iskay kaj querubintaj torilloman+ rijchʼakorqa, kinsa kaj querubintaj+ runa uyayoj jina karqa, tawa kaj querubintaj+ phawashaj aguilaman+ rijchʼakorqa. 8 Chay tawantin querubinesqa sapa ujninku sojta lijrasniyoj* karqanku, jawankupi ukhunkupitaj ñawiswan juntʼa.+ Paykunataj tuta pʼunchay mana saykʼuspa nishanku: “Santo, santo, santo Tukuy Atiyniyoj Jehová* Diosqa,+ pichus kausarqa, kausashan, jamonqataj chay”,+ nispa.

9 Sapa kuti maypachachus chay querubines jatunchanku, yupaychanku, graciastataj qonku chay kamachina tiyanapi tiyasqa kajta, pichus wiñaypaj wiñaynintinpaj kausan chayta,+ chaypacha 10 chay 24 ancianosqa+ kamachina tiyanapi tiyasqa kajpa ñaupaqenman qonqoriykukuspa yupaychanku, pichus wiñaypaj wiñaynintinpaj kausan chayta. Coronasninkuta kamachina tiyanaj ñaupaqenman choqaspa ninku: 11 “Jehová* Diosniyku, qanllamin jatunchanapaj jina kanki,+ yupaychanapaj jina,+ atiyta+ japʼinaykipaj jinataj, qanmin tukuy imata ruwarqanki,+ munayniykiraykutaj tukuy imapis rikhurerqa, ruwasqataj karqa”, nispa.

5 Chay kamachina tiyanapi tiyasqa kajpa+ paña makinpi rikorqani uj kʼuyuna librota,* puraj ladonpi qhelqasqata,* qanchis selloswantaj sumaj sellasqata. 2 Chantá rikorqani uj kallpasapa angelta jatunmanta qhaparishajta: “¿Pitaj chay kʼuyuna librota kicharinanpaj jina, sellosnintapis pʼakinanpaj jina kanman?”, nispa. 3 Manataj pipis ni cielopi, ni jallpʼapi, ni jallpʼa urapipis chay kʼuyuna librota kichariyta aterqachu, nitaj imachus qhelqasqa kasqantapis qhawaykuyta aterqachu. 4 Noqataj maytapuni waqarikorqani ni ujllapis kasqanmanta, chay kʼuyuna librota kichariyta atinanpaj jina, nitaj imachus qhelqasqa kasqantapis qhawaykuyta atinanpaj jina. 5 Ujnin ancianotaj niwarqa: “Amaña waqaychu. Judá ayllumanta* Leonqa,+ pichus Davidpa saphin kajqa+ atipan.+ Chayrayku payqa kʼuyuna librota, qanchis sellosnintawan kichariyta atin”, nispa.

6 Chantá kamachina tiyanaj chaupinpi, tawa querubinespa* chaupinpi, ancianospa chaupinpiwan+ rikorqani uj corderota*+ sayashajta, wañuchisqapis kanman karqa jina,+ qanchis wajrasniyojta, qanchis ñawisniyojtataj. Chay ñawisqa Diospa qanchis espiritusninwan*+ ninakunku, mayqenkunachus tukuy jallpʼantinman kachasqa karqanku chaykunawan. 7 Corderotaj chay ratopacha qayllaykuspa, kamachina tiyanapi tiyasqa+ kajpa paña makinmanta chay kʼuyuna librota japʼerqa. 8 Kʼuyuna librota japʼisqantawantaj chay tawantin querubines, chay 24 ancianospis+ Corderoj ñaupaqenpi qonqoriykukorqanku. Sapa ujninkutaj arpasniyoj karqanku, inciensowan juntʼa qori fuentesniyojtaj. Inciensoqa ninakun Diospaj tʼaqasqa kajkunaj mañakusqasninkuwan.+ 9 Uj mosoj takiytataj takinku:+ “Qanmin kʼuyuna librota japʼinaykipaj jina kanki, sellosninta kicharinaykipaj jinataj. Qanqa wañuchisqa karqanki, yawarniykiwantaj Diospaj runasta ranterqanki+ tukuy ayllusmanta, tukuy parlaykunamanta, tukuy laya* runasmanta, tukuy nacionesmantawan.+ 10 Paykunataqa churarqanki reyestaj+ sacerdotestaj kanankupaj Diosninchejta sirvinankupaj.+ Paykunaqa jallpʼata reyes jina kamachenqanku”,+ nispa.

11 Chantá rikorqani, uyarerqanitaj ashkha angelespa parlayninkuta kamachina tiyanaj muyuyninpi, querubinespa muyuyninkupi, ancianospa muyuyninkupiwan. Paykunataj karqanku chunka waranqa kutis chunka waranqas, waranqa waranqastaj,+ 12 jatunmantataj nisharqanku: “Wañuchisqa karqa chay Corderoqa+ japʼinanpaj jinapuni atiyta, qhapaj kayta, yachayta, kallpata, jatunpaj qhawasqa kayta, jatunchasqa kayta, bendiciontawan”,+ nispa.

13 Chantá uyarillarqanitaj tukuy ima ruwasqa kajta, cielopi, jallpʼapi, jallpʼa urapi,+ mar qochapi, chaykunapi tukuy ima kajkunatawan nishajta: “Kamachina tiyanapi tiyasqa kajpaj,+ Corderopajpis+ kachun bendecisqa kay, jatunpaj qhawasqa kay,+ jatunchasqa kay, atiytaj wiñaypaj wiñaynintinpaj”,+ nispa. 14 Chay tawantin querubinestaj nisharqanku: “Amén”,* nispa. Ancianostaj qonqoriykukuspa Diosta yupaycharqanku.

6 Chantá rikorqani Corderota*+ chay qanchis sellosmanta+ ujninta kicharishajta, uyarerqanitaj tawantin querubinesmanta*+ ujninta nejta, qhon qhonpis sonanman jina: “¡Llojsimuy!”,* nispa. 2 Rikorqanitaj uj yuraj caballota,+ chay caballopi lloqʼasqa kajtaj flechana arcota* japʼisharqa. Uj coronataj payman qosqa karqa.+ Chantá atipaspa llojserqa, atipanallanpajtaj.+

3 Iskay kaj sellota Cordero kicharejtintaj, uyarerqani iskay kaj querubinta+ nishajta: “¡Llojsimuy!”, nispa. 4 Chantá uj puka caballoñataj llojsimorqa, patanpi lloqʼasqa kajtaj atiyta japʼerqa jallpʼamanta allin kausayta chinkachinanpaj, ajinamanta ujkuna ujkunawan wañuchinakunankupaj, uj jatun espadataj payman qosqa karqa.+

5 Kinsa kaj sellota+ Cordero kicharejtintaj, uyarerqani kinsa kaj querubinta+ nishajta: “¡Llojsimuy!”, nispa. Rikorqanitaj uj yana caballota, patanpi lloqʼasqa kajtaj makinpi uj balanzata japʼisharqa. 6 Uyarerqanitaj uj parlayta jina tawa querubinespa chaupinkumanta nishajta: “Uj kilo* trigoqa uj denario* qolqepaj,+ kinsa kilo cebadataj* uj denario qolqepaj. Ama usuchiychu aceite de olivata, nitaj vinotapis”,+ nispa.

7 Tawa kaj sellota Cordero kicharejtintaj, uyarerqani tawa kaj querubinta+ nishajta: “¡Llojsimuy!”, nispa. 8 Rikorqanitaj uj tunti qʼellu caballota, patanpi lloqʼasqa kajpa sutintaj Wañuy karqa. Sepulturataj* qhepitanta jamusharqa. Paykunamantaj atiy qosqa karqa jallpʼaj khuskanpa khuskanninta wañuchinankupaj, jatun espadawan, yarqhaywan,+ wañuchej onqoywan, jallpʼapi kaj phiña animaleswanpis.+

9 Phishqa kaj sellota Cordero kicharejtintaj, rikorqani altarpa*+ uranpi wañuchisqa kasqanku chaykunaj yawarninkuta,+ pikunachus wañuchisqa kasqanku Diospa palabranrayku, willarasqankuraykutaj chaykunajta.+ 10 Chay runaspa yawarninkutaj jatunmanta qhaparisharqa: “Tukuyta Kamachej Señor, santo kaj, cheqa Diostaj,+ ¿maykʼajkamataj jallpʼapi tiyakojkunata mana juzgankichu, nitaj pagachikunkichu wañuchiwasqaykumantari?”,+ nispa. 11 Señortaj sapa ujninkuman yuraj jatuchaj ropasta qorqa,+ nerqataj: “Uj chhikanta samarishaychej, kamachi masisniykichejwan hermanosniykichejwan mashkhachus kananku kashan, chay chhika kanankukama. Paykunapis qankuna jinallataj wañuchisqa kanankupajña kashanku”,+ nispa.

12 Rikullarqanitaj Corderota sojta kaj sellota kicharishajta, sinchʼi terremoto karqa, intipis yanayaykorqa qhashqa yana ropa jina,* killapis tukuynin pukayaykorqa yawar jina,+ 13 cielomanta estrellaspis jallpʼaman urmaramorqanku, imaynatachus kʼuku higospis urmaranku, sinchʼi wayra higo sachʼata thalarparejtin ajinata. 14 Cielotaj kʼuyuykukuspa chinkarerqa, imaynatachus kʼuyuna libro* kʼuyuykukun ajinata.+ Tukuynin orqostaj, yaku chaupipi kaj tukuynin churuspis,* maypichus karqanku chaymanta sikʼisqa karqanku.+ 15 Chantá jallpʼapi reyes, kuraj autoridades, comandantes, qhapajkuna, kallpayojkuna, tukuy kamachis, mana kamachis kajkunapis, pakaykukorqanku qaqa juskʼuspi, orqo chhanka chaupispipis.+ 16 Paykunaqa orqosta, chhankastapis kutin kutita qhaparikunku: “Pataykuman urmaykamuwayku,+ pakaykuwaykutaj kamachina tiyanapi tiyasqa kashan chaymanta,+ Corderoj+ kʼajaj phiñakuyninmantawan. 17 Kʼajaj phiñakuyninkoj jatun pʼunchaynenqa chayamunña.+ ¿Pitaj sayashaj kayta atinmanri?”,+ nispa.

7 Chantá rikorqani tawa angelesta jallpʼaj tawantin kʼuchusninpi* sayashajta. Chay angelesqa jallpʼaj tawa wayrasninta jarkʼasharqanku ama ima wayrapis jallpʼa pataman wayramunanpaj, nitaj mar qocha pataman, nitaj ima sachʼa patamanpis. 2 Waj angelta rikullarqanitaj inti llojsimuynejmanta wicharimushajta, kausaj Diospa sellon aparisqata. Chay angeltaj jatunmanta qhaparerqa chay tawa angelesta, pikunamanchus atiy qosqa karqa jallpʼata, mar qochatawan nanaykuchinankupaj chaykunata. 3 Nerqataj: “Amaraj imanaychejchu jallpʼata, nitaj mar qochata, nitaj sachʼastapis, Diosninchejpa kamachisninta frentesninkupi+ sellanaykukama”,+ nispa.

4 Uyarerqanitaj mashkhachus sellasqa kasqankuta, chay sellasqa kajkunaqa 144.000 karqanku+ israelitaspa tukuynin ayllusninkumanta:*+

9 Chantá rikorqani may chhika runasta, mana yupay atinata, tukuy nacionesmanta, tukuy ayllusmanta, tukuy laya* runasmanta, tukuy parlaykunamantawan.+ Paykunaqa sayasharqanku kamachina tiyanaj ñaupaqenpi, Corderoj* ñaupaqenpipis, yuraj jatun ropasniyoj,+ makisninkupi palmera ramas japʼirisqa.+ 10 Paykunaqa sinchʼita qhaparisharqanku: “Salvacionqa Diosninchejmanta jamun, pichus kamachina tiyanapi tiyasqa kashan+ chaymanta, Corderomantawan”,+ nispa.

11 Tukuynin angelestaj sayasharqanku kamachina tiyanaj muyuyninpi, ancianospa muyuyninpi,+ tawa querubinespa* muyuyninpiwan, chantá qonqoriykukuspa pampakama kʼumuykukorqanku kamachina tiyanaj ñaupaqenpi, Diostataj yupaycharqanku. 12 Nerqankutaj: “Amén.* Diosninchejpaj kachun yupaychasqa kay, jatunchasqa kay, yachay, agradecekuy, jatunpaj qhawasqa kay, atiy, kallpapis wiñaypaj wiñaynintinpaj.+ Amén”, nispa.

13 Chay ancianosmanta ujnintaj tapuwarqa: “Kay yuraj jatun ropasniyoj,+ ¿pikunataj kanku? ¿Maymantataj jamunku?”, nispa. 14 Noqataj chay ratopacha kuticherqani: “Señorníy, chaytaqa qan yachanki”, nispa. Paytaj niwarqa: “Kaykunaqa manchay ñakʼariymanta*+ llojsimojkuna kanku, jatun ropasninkutataj Corderoj yawarninpi tʼajsaspa yurajyacherqanku.+ 15 Chayrayku paykunaqa Diospa kamachina tiyananpa ñaupaqenpi kashanku, tuta pʼunchaytaj templonpi sirvishanku. Kamachina tiyanapi tiyasqa kajtaj+ toldonta* aysarenqa paykunaj patankuman.*+ 16 Manaña ujtawan yarqhachikonqankuchu, nitaj chʼakichikonqankuchu, nitaj intipis, nitaj ima qʼoñipis paykunata ñakʼarichenqachu.+ 17 Paykunataqa kamachina tiyanaj chaupinpi kaj Cordero+ michenqa,+ kausay yaku juturismantaj pusanqa.+ Diostaj tukuy waqayta ñawisninkumanta pichanqa”.+

8 Qanchis kaj sellota+ Cordero*+ kicharejtintaj, cieloqa media horata jina chʼinlla karqa. 2 Rikorqanitaj qanchis angelesta+ Diospa ñaupaqenpi sayashajta, paykunamantaj qanchis cornetas qosqa karqa.

3 Waj angeltaj chayamorqa inciensota qʼoshñichinapaj qorimanta brasa apaykachanayoj, altarpa+ qayllanpitaj sayaykorqa. Paymantaj ashkha incienso qosqa karqa+ qori altar+ patapi qʼoshñichinanpaj, mayqenchus kamachina tiyanaj ñaupaqenpi kasharqa chaypi, Diospaj tʼaqasqa kajkunaj mañakusqasninkuwan khuska. 4 Incienso qʼoshñitaj angelpa makinmanta Diospa ñaupaqenman wicharerqa, Diospaj tʼaqasqa kajkunaj mañakusqasninkuwan khuska.+ 5 Angeltaj chay ratopacha brasa apaykachanata japʼispa, altarpi kaj brasaswan* juntʼaykucherqa, jallpʼamantaj jichʼaykamorqa. Karqataj qhorurunkuna, parlaykuna, lliuj lliujkuna,+ terremototaj. 6 Chay qanchis angelestaj cornetasninkuta+ waqachinankupaj wakichikorqanku.

7 Ñaupaj kaj angelqa cornetanta waqacherqa. Karqataj granizowan ninawan, yawarwan chajrusqa, chaytaj jallpʼaman jichʼasqa karqa.+ Jallpʼa kinsaman tʼaqasqamanta ujnin kaj tʼaqantaj ruphaykorqa, sachʼaspis kinsaman tʼaqasqamanta ujnin kaj tʼaqan ruphaykullarqataj, tukuynin qʼomer qhoraspis ruphaykullarqataj.+

8 Iskay kaj angelñataj cornetanta waqacherqa. Ninawan laurarishaj jatun orqoman rijchʼasqataj mar qochaman choqaykusqa karqa.+ Mar qochamantataj kinsaman tʼaqasqamanta ujnin kaj tʼaqan yawarman tukuporqa.+ 9 Mar qochapi kausajkunamantataj kinsaman tʼaqasqamanta ujnin kaj tʼaqan wañorqa,+ barcosmantapis kinsaman tʼaqasqamanta ujnin kaj tʼaqan phirisqa karqa.

10 Kinsa kaj angeltaj cornetanta waqacherqa. Uj jatun chʼaskataj laurarishaj kʼanchana jina cielomanta urmaykamorqa, chaytaj chayarqa mayusmanta kinsaman tʼaqasqamanta ujnin kaj tʼaqaj patanman, yaku juturispa patanmanpis.*+ 11 Chay chʼaskaj sutenqa Ajenjo karqa. Yakusmantataj kinsaman tʼaqasqamanta ujnin kaj tʼaqanqa ajenjo jina* manchay jayaman tukorqa, ashkha runastaj chay yakuswan wañurarqanku jayayaykusqanrayku.+

12 Tawa kaj angeltaj cornetanta waqacherqa. Intimanta,+ killamanta, estrellasmantawan kinsaman tʼaqasqamanta ujnin kaj tʼaqantaj laqhayaykorqa,+ ajinamanta pʼunchayqa kinsaman tʼaqasqamanta ujnin kaj tʼaqan mana kʼanchayniyoj karqa, jinallataj tutapis.

13 Chantá rikorqani, uyarerqanitaj uj aguilata cielo chaupita phawashajta, jatunmantataj nishajta: “Ay, ay, ay+ jallpʼapi tiyakojkunamanta, kinsa cornetasraj waqananku kashan, chay kinsa cornetastaqa+ kinsa ángeles waqachinankupajña kashanku”, nispa.

9 Phishqa kaj angeltaj cornetanta+ waqacherqa. Rikorqanitaj uj chʼaska cielomanta jallpʼaman urmaykusqanta. Chinkay ukhoj*+ llavesnintaj payman qosqa karqa. 2 Chay chʼaskaqa* chinkay ukhuta kicharerqa, chay ukhumantataj qʼoshñi llojsimorqa, jatun hornoj qʼoshñin jina. Intipis airepis laqhayaykorqa,+ chay chinkay ukhumanta llojsimoj qʼoshñiwan. 3 Chay qʼoshñimantaqa langostas jallpʼaman llojsimorqanku,+ atiytaj paykunaman qosqa karqa, imaynatachus jallpʼapi alacranes atiyniyoj kanku chay jina atiyta. 4 Chay langostastaj kamachisqa karqanku, ama imananankupaj jallpʼapi kaj qʼomerkunata, nitaj ima qhoratapis, nillataj ima sachʼatapis, manachayqa runasllata, pikunajtachus frentesninkupi mana Diospa sellon kanchu chaykunallata.+

5 Chay langostasmanqa atiy qosqa karqa runasta phishqa killata ñakʼarichinankupaj, amataj wañuchinankupaj. Chay ñakʼarichisqankoqa karqa, imaynatachus alacrán+ wachʼiykuspa runata ñakʼarichin ajina. 6 Runasqa chay pʼunchaykunapi wañuyta maskʼanqanku, manataj tarenqankuchu. Wañuyta munanqanku, wañuytajrí paykunamanta ayqenqa.

7 Chay langostasqa rijchʼakorqanku wañuchinaku maqanakupaj wakichisqa caballosman.+ Umasninkupeqa qori coronas jina karqa, uyasninkutaj runaj uyan jina karqa. 8 Chujchasninkoqa warmispa chujchasnin jina karqa. Kirusninkutaj leonespa kirusnin jina karqa.+ 9 Pecherasninkutaj fierro pecheras jina karqa. Lijrasninkoj* sonasqanqa carretaspa sonasqan jina karqa, imaynatachus caballoswan wañuchinaku maqanakuman phawanku ajina.+ 10 Chupasninkoqa alacranespa chupasninku jina wachʼinasniyoj. Atiyninkutaj chupasninkupi kashan runasta phishqa killata ñakʼarichinankupaj.+ 11 Chinkay ukhuta qhawaj angeltaj+ paykunaj reyninku. Hebreo parlaypi sutenqa Abadón,* griego parlaypitaj Apolión.*

12 Ñaupaj kaj ay nisqa qhapareyqa pasanña. Chay imas qhepatataj iskaywanraj ay+ nisqa qhapariykuna jamushanku.

13 Sojta kaj angeltaj+ cornetanta waqacherqa.+ Uj parlaytataj uyarerqani qori altarpa+ wajrasninmanta, mayqenchus Diospa ñaupaqenpi kashan chaymanta. 14 Chay cornetayoj sojta kaj angeltataj nerqa: “Éufrates jatun mayoj qayllanpi watasqa kashanku chay tawa angelesta phaskaramuy”,+ nispa. 15 Chay tawa angelestaj phaskarasqa karqanku, ima horapajchus, ima pʼunchaypajchus, ima killapajchus, ima watapajchus wakichisqa karqanku chaypaj, runasmanta kinsaman tʼaqasqamanta ujnin kaj tʼaqanta wañurachinankupaj.

16 Caballospi purej soldadosqa 200 millones karqanku. Noqa uyarerqani chay chhika kasqankuta. 17 Mosqoypi jina rikusqay caballosqa, jinallataj patankupi lloqʼasqa kajkunapis kay jina karqanku: Pecherasninkoqa nina jina puka karqa, jacinto jina azul, azufre jinataj qʼellu. Caballospa umasninkoqa leonespa umasninku jina karqa,+ simisninkumantataj llojsimusharqa ninawan, qʼoshñiwan, azufrewantaj. 18 Runasmanta kinsaman tʼaqasqamanta ujnin kaj tʼaqanqa wañuchisqa karqa kay kinsa castigoswan: caballospa simisninkumanta llojsimoj ninawan, qʼoshñiwan, azufrewantaj. 19 Chay caballospa atiyninkoqa simisninkupi, chupasninkupi kashan. Chupasninkoqa kataris jina kanku umasniyoj. Chaywantaj runasta ñakʼarichinku.

20 Chay castigoswan mana wañoj runasqa, mana pesachikorqankuchu makisninkoj ruwasqasninkumanta. Astawanqa supaykunata yupaychallarqankupuni, jinallataj santostapis qorimanta ruwasqata, qolqemanta, cobremanta, rumimanta, kʼullumantapis. Chay santosqa mana rikunkuchu, nitaj uyarinkuchu, nitaj purinkuchu.+ 21 Mana pesachikorqankuchu runasta wañuchisqankumanta, layqeriosta ruwasqankumanta, khuchichakuy juchankumanta,* nillataj suwakusqankumantapis.

10 Waj kallpasapa angelta rikullarqanitaj cielomanta uraykamushajta phuyuwan muyurisqata, uj kʼuychitaj* uman patapi kasharqa. Uyanqa inti jina karqa,+ chakisnintaj nina machones jina.* 2 Makinpeqa uj kʼuyuna librituta* kʼuyurasqata japʼisharqa. Paña chakintaqa mar qocha pataman churarqa, lloqʼe chakintataj jallpʼa pataman. 3 Sinchʼitataj qhaparerqa leonpis qhaparishanman jina.+ Qhaparejtintaj qanchis qhon qhonkunaj+ parlayninkuta uyarerqani.

4 Chay qanchis qhon qhonkuna parlasqankutawan noqaqa qhelqanaypajña kasharqani, jinallapi cielomanta+ uj parlayta uyarerqani nimuwajta: “Chay qanchis qhon qhonkuna imastachus parlasqankuta sellaykuy, amataj qhelqaychu”, nispa. 5 Chantá mar qocha patapi, jallpʼa patapipis sayashajta rikorqani chay angelqa, paña makinta cieloman oqharerqa. 6 Jurarqataj wiñaypaj wiñaynintinpaj kausaj Diospa sutinpi,+ pichus cielotawan, jallpʼatawan, mar qochatawan ruwarqa, chaykunapi kaj imastawan, chaypa sutinpi, nerqataj:+ “Suyakuna tiempo tukukunña. 7 Maypachachus qanchis kaj ángel+ cornetanta+ waqachinanpajña kashanqa chay pʼunchaykunapi Diospa pakasqa yachaynin+ juntʼakonqapuni, mayqentachus Dios sutʼincharqa sumaj willaykunata jina kamachi profetasninman*+ chay”, nispa.

8 Cielomanta parlamushawarqa chay parlayta watejmanta uyarerqani,+ nimuwarqataj: “Mar qocha patapi, jallpʼa patapitaj sayashaj angelpaman riy, makinpi kashan chay kicharisqa kʼuyuna librota japʼimuy”,+ nispa. 9 Chay angelpaman rispataj chay kʼuyuna librituta qonawanta nerqani. Paytaj niwarqa: “Japʼiy, mikhuykuytaj.+ Wijsaykita jayaykusonqa, simiykipitaj miskʼi kanqa, miskʼi jina”, nispa. 10 Noqataj chay angelpa makinmanta kʼuyuna librituta japʼispa mikhuykorqani.+ Simiypeqa miskʼi karqa, miskʼi jina,+ mikhuykojtiyrí wijsayta jayaykuwarqa. 11 Nimuwarqankutaj: “Watejmanta profeta jina parlanayki tiyan, tukuy laya* runasmanta, nacionesmanta, tukuy laya parlaykunamanta, ashkha reyesmantapis”, nispa.

11 Chantá varaman rijchʼasqa caña huecata+ jaywashawajtinku niwarqa: “Sayarispa midiy Diospa templonta, altarninta, chaypi yupaychajkunatawan. 2 Chay temploj jawanpi kaj patiotarí saqellay, ama midinkichu. Chayqa nacionesman qosqa karqa. Paykunataj santo llajtata+ chakisninkuwan saruranqanku 42 killasta.+ 3 Noqaqa iskay testigosniyta kachamusaj qhashqa ropasniyojta, 1.260 diasta profetas jina parlanankupaj”, nispa. 4 Paykunaqa kanku iskay olivo sachʼas,+ iskay candelerostaj,*+ sayashankutaj jallpʼaj Señorninpa ñaupaqenpi.+

5 Sichus pipis paykunata imanayta munan chayqa, paykunaj siminkumanta nina llojsimuspa enemigosninkuta ruphaykun. Paykunata imanayta munajkunaqa, ajinata wañuchisqa kananku tiyan. 6 Paykunaqa atiyniyoj kanku cielota wisqʼaykunankupaj,+ profetas jina parlanqanku chay pʼunchaykunapi ama paramunanpaj.+ Atiyniyojllataj kanku yakusta yawarman tukuchinankupaj,+ jallpʼatapis ñakʼarichinankupaj tukuy laya* castigoswan, mashkha kutistachus munasqankuta.

7 Testigos jina willayta tukojtinkuña, chinkay ukhumanta* llojsimoj millay animalqa, paykunawan maqanakuspa atipanqa, wañurachenqataj.+ 8 Ayasninkoqa* jatun llajtaj ancho callenpi wijchʼukonqanku, mayqenpichus Señorninkutapis rakhu kʼaspipi* wañucherqanku chaypi. Chay jatun llajtaqa ninakun Sodomawan Egiptowan. 9 Llajtasmanta, ayllusmanta,* tukuy laya parlayniyojkunamanta, nacionesmantawan kajkunaqa paykunaj ayasninkuta* rikonqanku kinsa pʼunchay khuskanniyojta,+ manataj saqenqankuchu pʼampasqa kanankuta. 10 Chay iskay profetasqa jallpʼapi tiyakojkunata ñakʼaricherqanku, chayrayku jallpʼapi tiyakojkunaqa wañusqankumanta mayta kusikonqanku, fiestachakonqankutaj, regalostapis apachinakonqanku.

11 Chay kinsa pʼunchay khuskanniyoj juntʼakojtin, Diosqa kausay samayta paykunaman phukuykorqa,+ paykunataj kausarimuspa sayarerqanku. Paykunata rikojkunataj mayta mancharikorqanku. 12 Chantá cielomanta uj sinchʼi parlayta uyarerqanku, paykunaman nimojta: “Kayman wicharimuychej”, nispa. Cielomantaj phuyupi wicharerqanku, enemigosninkutaj rikorqanku.* 13 Chay horapitaj sinchʼi terremoto karqa, llajtamantataj chunkaman tʼaqasqamanta ujnin kaj tʼaqan thuñikorqa. Terremotopeqa 7.000 runas wañurarqanku, puchojkunataj manchariywan cielopi kashaj Diosta jatuncharqanku.

14 Iskay kaj ay+ nisqa qhapareyqa pasanña. Kinsa kaj ay nisqa qhapariytaj usqhayllata jamushan.

15 Qanchis kaj angeltaj cornetanta+ waqacherqa. Cielopitaj sinchʼi parlaykuna uyarikorqa: “Diosninchejpata, Cristonpatawan+ Gobiernonqa+ runasta kamachishanña, payqa wiñaypaj wiñaynintinpaj rey jina kamachenqa”,+ nispa.

16 Chay 24 ancianostaj,+ pikunachus Diospa ñaupaqenpi kamachina tiyanasninkupi tiyasqa kasharqanku chaykunaqa, qonqoriykukuspa pampakama kʼumuykukorqanku, Diostataj yupaycharqanku. 17 Nerqankutaj: “Gracias Tukuy Atiyniyoj Jehová* Dios, jatun atiyniykita japʼisqaykirayku, rey jinataj kamachiyta qallarisqaykirayku.+ Qanqa kausanki,+ kausarqankitaj. 18 Tukuy nacionestaj phiñarikorqanku. Kʼajaj phiñakuyniykitaj jamorqa, señalasqa tiempopis chayamorqa wañusqas juzgasqa kanankupaj, jinallataj tʼinkata qopunaykipaj+ kamachi profetasniykiman,+ qanpaj tʼaqasqa kajkunaman, sutiykita manchachikojkunamanpis, pisipaj qhawasqapis jatunpaj qhawasqapis kachunku. Jallpʼata pierdechejkunatapis tukuchinaykipaj”,+ nispa.

19 Diospa templontaj* cielopi kicharikorqa, Diospa trato ruwasqan arcataj templo ukhupi+ rikukorqa. Karqataj lliuj lliujkuna, parlaykuna, qhon qhonkuna, terremoto, sinchʼi granizotaj.

12 Chantá uj jatun señal cielopi rikhurerqa: Uj warmi+ intiwan pʼachallisqa kasharqa. Chakisnin urapeqa killa kasharqa, uman patapitaj uj corona 12 estrellasniyoj. 2 Payqa onqoj kasharqa. Parto nanaywantaj qhaparikusharqa, nacechikunanpaj mayta ñakʼarispa.

3 Waj señal cielopi rikhurillarqataj: Uj jatun puka sierpe+ rikhurerqa qanchis umasniyoj, chunka wajrasniyojtaj, sapa umanpitaj coronayoj. 4 Chupanqa cielopi kaj estrellasmanta+ kinsaman tʼaqasqamanta ujnin tʼaqanta pichaspa jallpʼaman wijchʼuykamorqa.+ Chay sierpeqa sayaykorqa nacechikunanpajña kasharqa chay warmej ñaupaqenpi,+ nacechikojtinkama wawanta oqoykunanpaj.

5 Warmeqa uj qhari wawata nacechikorqa,+ pichus tukuy nacionesta fierro varawan kamachenqa chayta.+ Chay wawataj Diosman oqharisqa karqa, pichus kamachina tiyananpi tiyashan chaypaman. 6 Chantá warmeqa chʼinnejman ayqekorqa, maypichus uj cheqata Dios paypaj wakichipun chayman. Chaypi payta 1.260 diasta mikhuchinankupaj.+

7 Chantá cielopi guerra qallarerqa: Miguelqa*+ angelesnintin sierpewan maqanakorqanku. Sierpepis angelesnintin maqanakullarqankutaj, 8 nitaj atipayta aterqankuchu,* niñataj cielopi kanankupaj jinachu karqanku. 9 Ajinapi chay jatun sierpetaqa+ uraman wijchʼuykamorqanku, chay ñaupa katarita,+ pichus sutichasqa Diablo,+ Satanastaj+ chayta. Payqa jallpʼapi kaj tukuy runasta chʼaukiyashan.*+ Paytaqa jallpʼaman wijchʼuykamorqanku,+ angelesnintapis paytawan khuska wijchʼuykamullarqankutaj. 10 Cielopitaj uj sinchʼi parlayta uyarerqani:

“Diosninchejqa salvacionta runaspaj apamun,+ atiynenqa rejsichikun, Gobiernontaj sayachisqaña kashan,+ Cristonpis atiyta japʼinña. Hermanosninchejta tumpaykojtaqa uramanña wijchʼuykunku, pichus tuta pʼunchay Diosninchejpa ñaupaqenpi paykunata tumpaykun chayta.+ 11 Hermanosninchejqa payta atiparqanku+ Corderoj* yawarninrayku,+ palabrata willasqankuraykutaj.+ Manataj wañuyta manchachikorqankuchu,+ ni wañuy patapi kashaspapis. 12 Chayrayku kusikuychej cielos, chaypi tiyakojkunapis. Ay jallpʼamanta, mar qochamantawan,+ Diabloqa qankunaman uraykamun manchay phiñasqa, paypaj pisi tiempollaña kasqanta yachaspa”.+

13 Chay sierpetaj jallpʼaman wijchʼusqa kasqanta rikuspa,+ qhari wawata nacechikoj warmita qhatiykacharqa.+ 14 Warmimantaj jatun aguilaj iskay lijrasnin*+ qosqa karqa chʼinnejman phawananpaj, mayqenchus paypaj wakichisqa kashan chay lugarman. Chaypeqa warmita mikhuchenqanku uj tiempota, iskay tiemposta, khuskan tiempotawan*+ katarimanta karupi.+

15 Kataritaj siminmanta yakuta phullchichimorqa warmej qhepanta, mayuta jinapuni, chay mayupi jeqʼeqakuspa wañunanpaj. 16 Jallpʼatajrí warmita yanapaj jamorqa, siminta kicharispataj ujyaykorqa sierpej phullchichimusqan mayuta. 17 Chayrayku sierpeqa maytapuni warmipaj phiñakuspa, rerqa warmej mirayninmanta puchojkunawan maqanakoj,+ pikunachus Diospa kamachisqasninta kasukunku, Jesusmantataj willanankupaj kamachisqa kanku chaykunawan.+

13 Chay sierpetaj sayaykorqa mar qocha tʼiyu patapi.

Chantá rikorqani uj millay phiña animalta+ mar qochamanta+ llojsimushajta, chunka wajrasniyojta, qanchis umasniyojta, sapa wajranpitaj uj coronayojta, umasnin patapitaj Diospaj sajrata rimaj sutisniyojta. 2 Chay millay phiña animalta rikusqayqa, chʼejchi leonman* rijchʼakorqa, chakisnintaj jukumarejta jina karqa, simintaj leonpa simin jina. Sierpetaj+ chay millay phiña animalman atiyninta qorqa, kamachina tiyananta, jatun atiytawan.+

3 Rikorqanitaj ujnin umanta wañunanpaj jina khuchusqata. Chay khuchusqantaj sanoyapusqa wañuchinanpaj jina kajtinpis,+ jallpʼantinmanta tukuy runastaj tʼukuspa chay millay phiña animalpa qhepanta rerqanku. 4 Sierpetataj yupaycharqanku chay millay phiña animalman atiyta qosqanrayku, chay millay phiña animaltapis yupaychallarqankutaj kay jinata: “¿Pitaj kay millay phiña animal jinari? ¿Pitaj paywan maqanakuyta atinmanri?”, nispa. 5 Paymanqa uj simi qosqa karqa mayta jatunchakuspa parlananpaj, Diospajtaj sajrata rimananpaj. Atiypis payman qosqa karqa 42 killasta+ munayninta ruwananpaj. 6 Simintataj kicharerqa Diospa contranta sajrata rimaspa,+ ajinamanta sajrata rimananpaj sutinpa contranta, wasinpa contranta, cielopi tiyakojkunaj contrantapis.+ 7 Diosqa saqerqa paypaj tʼaqasqa kajkunawan maqanakunanta, atipanantataj.+ Atiytataj japʼerqa kamachinanpaj tukuy ayllusta,* tukuy laya* runasta, tukuy laya parlayniyojkunata, tukuy nacionestawan. 8 Jallpʼapi tukuy tiyakojkunataj payta yupaychanqanku. Paykunaj sutisninkoqa mundoj qallariyninmantapacha* ni mayqenninkojta qhelqasqachu karqa Corderoj* kausay kʼuyuna libronpi,*+ pichus wañuchisqa karqa chaypajpi.+

9 Pichus ninriyojqa uyarichun.+ 10 Pichus presochasqa kananpaj kashan chayqa, presochasqa kanqa. Pichus espadawan wañuchejqa,* espadallawantaj wañuchisqa kanqa.+ Chayrayku Diospaj tʼaqasqa kajkunaqa+ aguantananku tiyan,*+ creenankutaj tiyan.+

11 Chantá waj millay phiña animalta rikullarqanitaj jallpʼamanta llojsimushajta, cordero jina iskay wajrasniyojta. Uj sierpe+ jinataj parlayta qallarerqa. 12 Ñaupaj kaj millay phiña animalpa+ tukuy atiyninwantaj paypa ñaupaqenpi kamachin. Jallpʼawan chaypi tiyakojkunawantaj yupaychachin chay ñaupaj kaj millay phiña animalta, mayqenchus wañunanpaj jina khuchusqa karqa sanoyaporqataj chayta.+ 13 Manchay jatuchaj señalesta ruwan, ninatapis cielomanta jallpʼaman uraykuchimun runaspa rikunanta.

14 Señalesta ruwananta saqesqankuwan jallpʼapi tiyakojkunata pantachin chay millay phiña animalpa ñaupaqenpi. Chaykamataj jallpʼapi tiyakojkunaman ruwanankuta nin chay millay phiña animalpa lantinta,*+ mayqenchus espadawan khuchusqa karqa kausarinporqataj chaypa lantinta.+ 15 Paytaqa saqerqanku chay millay phiña animalpa lantinman kausay samayta qonanta, ajinamanta chay millay phiña animalpa lantin parlananpaj, wañuchichinanpajtaj tukuy pikunachus chay millay phiña animalpa lantinta mana yupaychayta munankuchu chaykunata.

16 Kamachintaj tukuy runasta: pisipaj qhawasqa kajkunata, jatunpaj qhawasqa kajkunatapis, qhapajkunata, wajchastapis, mana kamachis kajkunata, kamachis kajkunatapis, marcasqa kanankupaj paña makisninkupi chayri frentesninkupi.+ 17 Ama pipis rantiyta chayri vendeyta atinanpaj, manachayqa pikunachus marcasqa kanku chay millay phiña animalpa sutinwan+ chayri sutinpa numeronwan+ chaykunalla. 18 Kaypajqa yachayniyoj kana tiyan: Allin yuyayniyojqa entiendechun chay millay phiña animalpa numeronta. Chay numeroqa runaj numerollan, numerontaj 666.+

14 Chantá rikorqani Sion+ orqo patapi Corderota*+ sayashajta, paywantaj 144.000 kasharqanku.+ Frentesninkupeqa qhelqasqa kashan paypa sutin, Tatanpa sutinpis.+ 2 Uyarerqanitaj cielomanta uj sonayta, ashkha yakuspa* sonayninta jina, sinchʼi qhon qhonpa sonayninta jinataj. Chay uyarisqay sonayqa takejkunaj takiyninkuman rijchʼakorqa, arpasninkuta waqachispa takinku chayman. 3 Paykunaqa uj mosoj takiyman rijchʼakojta takishanku+ kamachina tiyanaj ñaupaqenpi, tawantin querubinespa*+ ñaupaqenkupi, ancianospa+ ñaupaqenkupipis. Chay takiytaqa mana pipis takiyta aterqachu, manachayqa chay 144.000 kajkunalla,+ pikunachus jallpʼamanta rantisqa karqanku chaykunalla. 4 Paykunaqa mana warmiswan chʼichichakorqankuchu, mana piwanpis puñuykorqankuchu.+ Corderoj qhepantataj rishanku mayllamanpis rejtin.+ Paykunaqa runas ukhumanta rantisqa karqanku+ ñaupaj poqoy jina+ Diospaj, Corderopajpis. 5 Siminkupeqa mana ima llullakuypis karqachu. Mana kʼaminastaj kanku.+

6 Waj angelta rikullarqanitaj cielo chaupita* phawashajta, payqa wiñay wiñaypaj sumaj willaykunata jallpʼapi tiyakojkunaman willasharqa: tukuy nacionesman, tukuy ayllusman,* tukuy laya* parlayniyojkunaman, tukuy laya runasmanpis.+ 7 Chay angelqa jatunmanta nisharqa: “Diosta manchachikuychej, jatunchaychejtaj, juicio horan chayamusqanrayku.+ Chayrayku yupaychaychej pichus cielota, jallpʼata, mar qochata,+ yaku juturistawan* ruwarqa chayta”, nispa.

8 Chantá iskay kaj angelñataj nerqa: “¡Urmanña! ¡Jatun Babilonia+ urmanña!+ Payqa tukuy nacionesman ujyacherqa khuchichakuy juchata* ruwanapaj qʼoñirichej vinonta”,+ nispa.

9 Kinsa kaj angelñataj paykunaj qhepanta jatunmanta nerqa: “Sichus pipis chay millay phiña animalta,+ lantintawan* yupaychan, marcatataj churachikun frentenpi chayri makinpi chayqa,+ 10 paypis ujyallanqataj Diospa phiñakuyninmanta vinota, mayqenchus mana imawan chajrusqa kʼajaj phiñakuyninpa copanman jichʼasqa chayta.+ Ñakʼarichisqataj kanqa ninawan azufrewan+ ajllasqa angelespa rikunankuta, Corderoj rikunantapis. 11 Ñakʼariyninkumanta qʼoshñeqa pataman wicharenqa wiñaypaj wiñaynintinpaj.+ Pikunachus chay millay phiña animalta, lantintawan yupaychanku, pikunachus sutinpa marcantapis churachikunku chaykunaqa, tuta pʼunchay mana samarispa ñakʼarenqanku.+ 12 Chayrayku Diospaj tʼaqasqa kajkunaqa aguantananku tiyan,*+ pikunachus Diospa kamachisqasninta kasukunku, Jesuspi creesqankumantataj sinchʼita japʼikunku chaykuna”.+

13 Chantá cielomanta uj parlayta uyarerqani nimojta: “Kayta qhelqay: ‘Kusisqa kanku pikunachus kunanmantapacha Señorpa discipulosnin* kaspa wañojkunaqa.+ Arí, espíritu santoqa nin sinchʼi llankʼayninkumanta samarikunankuta, ruwasqasninku paykunawan khuska risqanrayku’, nispa”.

14 Chantá rikorqani uj yuraj phuyuta, chay phuyu patapitaj runaj wawanman rijchʼakoj+ tiyasharqa. Umanpeqa qori coronayoj kasharqa, makinpitaj filochasqa joseta japʼisharqa.

15 Waj angelñataj templomanta* llojsimorqa, phuyu patapi tiyasqa kajtataj jatunmanta nerqa: “Joseykita japʼispa ruthuy, ruthuna horaqa chayamunña, jallpʼaj poqoynenqa ñapis sumaj poqosqaña kashan”,+ nispa. 16 Phuyu patapi tiyasqa kajtaj josenta jallpʼaman apaykorqa, jallpʼataj ruthusqa karqa.

17 Waj angelñataj cielopi kaj templomanta llojsimorqa, paypis jatun filochasqa joseta japʼishallarqataj.

18 Altarmantataj waj ángel llojsimorqa, pejpa atiyninpichus nina kasharqa chay. Filochasqa joseta japʼisharqa chay angeltataj jatunmanta nerqa: “Filochasqa joseykita japʼispa jallpʼapi kaj uva chhullchusta* pallay, uvasqa poqosqaña kashanku”,+ nispa. 19 Chay angeltaj josenta jallpʼaman apaykuspa jallpʼamanta uvasta pallarqa. Chaytataj Diospa kʼajaj phiñakuyninpa jatun uva sarunanman choqaykorqa.+ 20 Chay uvasqa* llajta jawapi sarusqa karqa, uva sarunamantataj yawar llojsimuspa caballospa frenosninkukama chayarqa, purirerqataj 296 kilometrosta jina.*

15 Cielopeqa waj señalta rikorqani jatunta, tʼukunapaj jinata: Qanchis ángeles+ qanchis castigosta japʼisharqanku. Chaykunaqa qhepa kaj castigos kanku, chaykunawanqa Diospa phiñakuynin tukukonqa.+

2 Rikullarqanitaj vidriomanta mar qochaman rijchʼakojta+ ninawan chajrusqata. Rikullarqanitaj pikunachus chay millay phiña animalta, lantinta,*+ sutinpa numerontawan+ atiparqanku chaykunata.+ Paykunaqa sayasharqanku chay vidrio qocha chaynejpi, Diospa arpasnin japʼirisqa. 3 Takisharqankutaj Diospa kamachin Moisespa takiyninta,+ Corderoj*+ takiynintawan, kay jinata:

“Tukuy Atiyniyoj Jehová* Dios,+ ruwasqasniykeqa jatuchaj,+ tʼukunastaj kanku. Wiñaypaj wiñaynintinpaj Rey,+ ñankunasniykeqa cheqan kanku, cheqataj.+ 4 Jehová* Dios, ¿pitaj mana manchachikusunkimanchu? ¿Pitaj sutiykita mana jatunchanmanchu? Qanllamin atienekunapaj jina kanki.+ Tukuy naciones ñaupaqeykiman jamuspa yupaychasonqanku,+ cheqan kamachisqasniyki rejsichisqaña kasqankurayku”, nispa.

5 Chay qhepata rikorqani, cielopi kicharikushajta+ Dios chaypi kashasqanta rikuchej toldoj*+ santo lugarninta.* 6 Chay santo lugarmantataj qanchis ángeles llojsimorqanku qanchis castigos japʼirisqas,+ llimphu lliphipirishaj linowan pʼachallisqas, pechosninkutaj qori chumpiswan chumpisqas. 7 Chay tawantin querubinesmanta* ujnintaj chay qanchis angelesman jaywarqa qanchis qori fuentesta, Diospa kʼajaj phiñakuyninwan juntʼasta,+ pichus wiñaypaj wiñaynintinpaj kausan chaypata. 8 Chay santo lugarmantaj qʼoshñi juntʼaykorqa, Diospa jatun kayninrayku,+ atiyninraykutaj. Manataj pipis chay santo lugarman yaykuyta aterqachu, chay qanchis ángeles japʼisharqanku chay qanchis castigos+ tukukunankama.

16 Santo lugarmantataj*+ uj sinchʼi parlayta uyarerqani, chay qanchis angelesman nejta: “Rispa jallpʼaman jichʼaykamuychej Diospa kʼajaj phiñakuyninta chay qanchis fuentesmanta”,+ nispa.

2 Ñaupaj kaj angeltaj rispa fuentenmanta jallpʼaman jichʼaykamorqa.+ Uj nanachej millay sarnataj runasta ñakʼaricherqa,+ pikunachus millay phiña animalpa marcanwan karqanku,+ lantintataj* yupaychasharqanku chaykunata.+

3 Iskay kaj angeltaj fuentenmanta mar qochaman jichʼaykamorqa.+ Mar qochataj wañusqa runaj yawarninman jina tukorqa.+ Mar qochapi tukuy kausajkunataj wañorqanku.+

4 Kinsa kaj angeltaj fuentenmanta mayusman, yaku juturismanpis* jichʼaykamorqa,+ chaykunataj yawarman tukorqanku.+ 5 Chantá yaku patapi kaj angelta uyarerqani nimojta: “Qanmin cheqa Dios kanki,+ pichus kausashanki, kausarqankitaj chay.+ Qanmin cheqan kanki kay juiciosta ruwasqaykirayku.+ 6 Paykunaqa qanpaj tʼaqasqa kajkunaj yawarninkuta jichʼarqanku, profetaspatawan.+ Chayrayku paykunaman yawarta ujyacherqanki,+ chaypaj jina kasqankurayku”,+ nispa. 7 Altartapis uyarerqani nejta: “Arí, Tukuy Atiyniyoj Jehová* Dios,+ juiciosniykeqa cheqa kanku, cheqantaj”,+ nispa.

8 Tawa kaj angeltaj fuentenmanta intiman jichʼaykorqa,+ intimantaj atiy qosqa karqa runasta ninawan qʼasparachinanpaj. 9 Runastaj chay sinchʼi kʼajaywan qʼasparasqa karqanku. Chaywanpis Diospa sutinpa contranta sajrata rimarqanku, chay castigoswan jasutʼinanpaj atiyniyojpa contranta. Mana pesachikorqankuchu, nitaj payta jatuncharqankuchu.

10 Phishqa kaj angeltaj fuentenmanta millay phiña animalpa kamachina tiyananman jichʼaykamorqa. Kamachisqan cheqastaj laqhayaykorqa,+ runastaj nanaywan qallusninkuta khanirakorqanku. 11 Cielopi kaj Diospa contrantataj sajrata rimarqanku nanayninkurayku, sarnasninkuraykutaj, manataj ruwasqasninkumanta pesachikorqankuchu.

12 Sojta kaj angeltaj fuentenmanta jatun Éufrates mayuman+ jichʼaykamorqa. Yakusnintaj chʼakiporqa+ ñanta wakichinanpaj inti llojsimuynejmanta jamoj reyespaj.+

13 Rikorqanitaj sierpej+ siminmanta, millay phiña animalpa siminmanta, llulla profetaj siminmantawan kinsa millay willaykunata llojsimushajta jampʼatusman rijchʼasqata. 14 Chaykunaqa kanku supaykunaj willayninku, jatuchaj señalestataj ruwanku.+ Jallpʼantinmanta reyesman rinku, paykunata tantaykunankupaj guerraman,+ Tukuy Atiyniyoj Diospa jatun pʼunchayninpi kanqa chayman.+

15 “Noqaqa suwa jina jamushani.+ Kusisqamin pichus rijchʼarisqallapuni kajqa,+ manataj ropanta lluchʼukojqa, ama qʼalalla purinanpaj, nitaj pipis pʼenqayninta rikunanpaj”.+

16 Chay reyestataj tantaykorqanku, hebreo parlaypi Armagedón* nisqa cheqapi.+

17 Qanchis kaj angeltaj fuentenmanta wayraman jichʼaykorqa. Chantá santo lugarmanta,+ kamachina tiyanamanta uj sinchʼi parlay nimorqa: “¡Ñapis ruwakunña!”, nispa. 18 Karqataj lliuj lliujkuna, parlaykuna, qhon qhonkuna, sinchʼi terremototaj. Chay jina manchay sinchʼi terremotoqa mana jaykʼajpis karqarajchu, runas kay jallpʼapi kasqankumantapacha.+ 19 Jatun llajtaqa+ kinsaman tʼaqakorqa, nacionespa llajtasninkutaj thuñisqa karqanku. Diostaj yuyarikorqa Jatun Babiloniamanta,+ sinchʼi kʼajaj phiñakuyninpa vinonta copanmanta ujyaykuchinanpaj.+ 20 Tukuy churuspis* ayqerqanku, orqospis chinkarerqanku.+ 21 Chantá cielomanta runasman jatuchaj granizos urmamorqanku,+ sapa granizoqa uj talento jina* llasa karqa. Runastaj chay granizorayku Diospa contranta sajrata rimarqanku,+ chay castigo manchay sinchʼi kasqanrayku.

17 Qanchis fuentesniyoj karqanku chay qanchis angelesmanta ujnenqa jamuspa niwarqa:+ “Jaku, rikuchimusqayki atiyniyoj khuchi warmej* castigonta,* payqa ashkha yakus patapi tiyasqa kashan.+ 2 Jallpʼamanta reyesqa chay warmiwan khuchichakuy juchapi* purerqanku,+ jallpʼapi tiyakojkunapis khuchichakuy juchanpa* vinonwan machaykorqanku”,+ nispa.

3 Espíritu santowantaj chʼinnejman pusawarqa. Chaypitaj rikorqani uj warmita, uj puka millay phiña animalpa patanpi tiyasqata. Chay animalqa Diospa contranta sajrata rimaj sutiswan juntʼa kasharqa, qanchis umasniyoj, chunka wajrasniyojtaj. 4 Chay warmeqa kulli* ropayoj+ puka ropayojtaj kasharqa, kʼachanchasqataj kasharqa qoriwan, may valorniyoj rumiswan, perlaswanpis.+ Makinpitaj japʼisharqa uj qori copata millachikuna imaswan juntʼata, khuchichakuy juchanmanta* millay imaswanpis. 5 Frentenpitaj qhelqasqa karqa mana yachay atina suti: “Jatun Babilonia, khuchi warmispa maman,+ jallpʼapi kaj millay imaspatapis maman”.+ 6 Rikorqanitaj chay warmeqa Diospaj tʼaqasqa kajkunaj yawarninkuwan machasqa kashasqanta, Jesuspa testigosninpa yawarninkuwanpis.+

Chay warmita rikuspaqa maytapuni tʼukorqani. 7 Angeltaj niwarqa: “¿Imajtín tʼukunkiri? Noqa willasqayki chay mana yachay atina yachayta chay warmimanta,+ jinallataj warmita apaj chay millay phiña animalmantapis, mayqenchus qanchis umasniyoj, chunka wajrasniyojtaj chaymanta.+ 8 Chay rikusqayki millay phiña animalqa karqa, manañataj kanchu, jinapis chinkay ukhumanta*+ llojsimunanpajña kashan, chinkaymantaj riponqa. Jallpʼapi tiyakojkunataj, pikunajtachus sutisninku kausay kʼuyuna libropi* mana qhelqasqachu kashan+ qallariymantapacha,* chay runasqa tʼukonqanku rikuspa imaynatachus chay millay phiña animalqa karqa, manañataj kanchu, jinapis kutimonqa chayta.

9 ”Kaypajqa yachayniyoj* kana tiyan: Chay qanchis umasqa+ ninakunku qanchis orqoswan, chay orqos patapitaj chay warmi tiyasqa kashan. 10 Qanchis reyes tiyan: Phishqaqa urmankuña, ujqa kashan, ujnintaj niraj chayamunchu, chayamuspatajrí uj pisi tiempollata kanan tiyan. 11 Chay millay phiña animaltaj, mayqenchus karqa, manañataj kanchu,+ chay animalpis pusaj kaj rey kashan, chay qanchis reyesmantataj rikhurimun, chinkaymantaj renqa.

12 ”Chay chunka wajrasta rikusqaykeqa ninakun chunka reyeswan, chaykunaqa manaraj kamachishankuchu, jinapis atiyta japʼenqanku uj horallata reyes jina kanankupaj millay phiña animalwan khuska. 13 Chay reyesqa uj yuyayniyojlla kaspa, kallpankuta, atiyninkutawan chay millay phiña animalman qonku. 14 Paykunaqa Corderowan* maqanakonqanku,+ Corderotaj paykunata atipanqa+ señorkunaj Señornin, reyespa Reynintaj kasqanrayku.+ Paywan khuska kajkunaqa, pikunachus wajyasqa, ajllasqa kanku, tukuy sonqotaj kasukunku chaykunapis atipallanqankutaj”.+

15 Pay nillawarqataj: “Chay rikusqayki yakusqa, maypichus chay khuchi warmi tiyashan chaykunaqa ninakunku tukuy laya* runaswan, ashkha runaswan, nacioneswan, tukuy laya parlayniyojkunawanpis.+ 16 Chay rikusqayki chunka wajras,+ jinallataj chay millay phiña animalpis,+ chay khuchi warmita+ chejnispa tukuy imanta qhechonqanku, qʼalallatataj saqerpayanqanku. Aychanta mikhuykonqanku, ninawantaj qʼalata ruphaykuchenqanku.+ 17 Diosmin sonqonkuman churarqa paypa munayninta ruwanankupaj.+ Ajinamanta paykunaqa uj yuyaylla kaspa, chay millay phiña animalman gobiernonkuta qonqanku,+ Diospa nisqan juntʼakunankama. 18 Chay rikusqayki warmitaj+ ninakun jatun llajtawan, mayqenchus reina jina jallpʼapi kaj reyesta kamachishan chaywan”.

18 Chay qhepata rikorqani waj angelta cielomanta uraykamushajta jatun atiywan, jallpʼataj kʼancharerqa jatun kayninpa kʼanchayninwan. 2 Paytaj jatunmanta qhaparerqa: “¡Urmanña! ¡Jatun Babilonia urmanña!+ Chay llajtataj supaykunaj wasinman tukun, chaypitaj pakakunku tukuy supaykuna, jinallataj tukuy chejnisqa millay pʼisqospis.+ 3 Tukuy nacionesqa machaykorqanku khuchichakuy juchapaj qʼoñirichej vinonwan,+ jallpʼapi kaj reyespis khuchichakuy juchapi* paywan purerqanku,+ jallpʼapi kaj comerciantespis* qhapajyarqanku, pay chay jina qhapaj kaypi mana pʼenqakuspa kausasqanrayku”.

4 Chantá cielomanta waj parlayta uyarerqani nimojta: “Llojsipuychej chay llajtamanta noqajta kajkuna,+ sichus mana munankichejchu chay llajtawan khuska juchallikuyta chayqa, sitajchus mana munankichejchu paypa castigosninwan castigasqa kayta chayqa.+ 5 Juchasnenqa cielokamapuni tauqaykukun,+ Diostaj yuyarikun sajra ruwasqasninta.+ 6 Payta ruwaychej imaynatachus wajkunata ruwarqa ajinata.+ Chay ruwasqasninmanta iskay jinastawan payman qopuychej.+ Ima copapichus+ ujyanata wakicherqa, chay copallapitaj iskay jinastawan paypaj wakichipuychej.+ 7 Imaynatachus pay jatunchakorqa, mana pʼenqakuspataj qhapaj kaypi kausarqa, chayman jina payman qopuychej ñakʼariyta, waqaytawan. Payqa sonqonpi nishallanpuni: ‘Noqaqa reina jina kamachishani, nitaj viudachu kani, nitaj jaykʼajpis waqasajchu’,+ nispa. 8 Chayrayku uj pʼunchayllapi castigosnin jamonqa: wañuy, waqay, yarqhaypis. Ninawantaj ruphasqata ruphachisqa kanqa.+ Payta juzgaj Jehová* Diosqa kallpayojmin.+

9 ”Jallpʼapi kaj reyestaj, pikunachus paywan khuchichakuy juchapi* purerqanku, paywantaj qhapaj kaypi mana pʼenqakuspa kausarqanku chaykunaqa, ruphaykusqanpa qʼoshñinta rikuspa waqanqanku, llakiywantaj pechonkuta takakonqanku. 10 Paypa ñakʼariyninmanta manchariywan karullapi sayaykukuspa nenqanku: ‘¡Llakiy ari! ¡Llakiy ari qanpaj jatun Babilonia llajta,+ kallpasapa llajta! ¡Imaynapitaj uj horallapi castigoyki chayamusunkiri!’, nispa.

11 ”Jallpʼapi kaj comerciantespis paymanta waqanqanku, llakikonqankutaj, manaña pipis tukuy vendenasninkuta rantej kasqanrayku. 12 Chay vendenasninkoqa kanku: qori, qolqe metal, may valorniyoj rumis, perlas, sumaj lino telas, kulli telas,* seda telas, puka telas, qʼapayniyoj maderamanta ruwasqa imas, chantá marfilmanta, sumaj maderamanta, cobremanta, fierromanta, marmolmantawan tukuy laya* ruwasqa imas, 13 canela, Indiamanta ima munay qʼapaj qhoras, incienso, perfumasqa aceite, yuraj incienso, vino, aceite de oliva, sumaj jakʼu, trigo, wakas, ovejas, caballos, carretas, esclavos, runaspa kausayninpis. 14 Chay munasqayki sumaj imasqa saqerparisunku, sumaj miskʼi mikhunasniykipis sumachaj imasniykipis qanmanta chinkarinku, niña jaykʼajpis ujtawan tarisqachu kanqanku.

15 ”Chay imasta vendej comerciantesqa, pikunachus payrayku qhapajyaykorqanku chaykunaqa, karullapi sayaykukuspa ñakʼariyninmanta manchariywan waqanqanku, llakikonqankutaj 16 kay jinata: ‘¡Llakiy ari! ¡Llakiy ari jatun llajtapaj! Pʼachallisqa karqa sumaj linowan, kulli ropaswan, puka ropaswan. Sumaj kʼachanchasqataj karqa qori kʼachanchanaswan, may valorniyoj rumiswan, perlaswanpis.+ 17 ¡Imaynapitaj uj horallapi chay chhika qhapaj kapuynin tukuchisqa karqari!’, nispa.

”Barcospa tukuy capitanesninkupis, barcospi tukuy purejkunapis, tukuy marinerospis, jinallataj mar qochapi kausayta maskʼakojkunapis karullapi sayaykukorqanku. 18 Ruphaykusqanpa qʼoshñinta qhawaj jinataj qhaparerqanku: ‘¿Mayqen llajtataj kanman kay jatun llajta jinari?’, nispa. 19 Umasninkuman jallpʼata qhallarakuspataj* qhaparerqanku, waqarqanku, llakikorqanku, nerqankutaj: ‘¡Llakiy ari! ¡Llakiy ari jatun llajtapaj! Mar qochapi barcosniyoj kajkunaqa qhapajyaykorqanku paypa qhapaj kayninrayku. ¡Imaynapitaj uj horallapi tukuchisqa karqari!’,+ nispa.

20 ”Kusikuy cielo,+ payta chay jina qhatirisqanmanta, kusikuychej qankunapis Diospaj tʼaqasqa kajkuna,+ apóstoles, profetaspis. Diosqa qankunarayku payta castigan”.+

21 Uj kallpasapa angeltaj uj rumita oqharerqa jatun molino rumiman rijchʼasqata, mar qochamantaj wijchʼuykorqa, nerqataj: “Jatun Babilonia llajtaqa ajinata usqhayllata uraman wijchʼuykusqa kanqa, nitaj jaykʼajpis ujtawan tarisqachu kanqa.+ 22 Manaña jaykʼajpis qanpeqa ujtawan uyarikonqachu arpawan takejkunaj takiyninku, ni qenaj waqayninpis, ni cornetaj waqayninpis, nitaj waj takejkunaj takiyninkupis. Nitaj jaykʼajpis qanpi ujtawan tarikonqachu trabajajkunaqa, nillataj jaykʼajpis qanpi ujtawan uyarikonqachu molino rumej jakʼusqanqa. 23 Nitaj jaykʼajpis qanpi ujtawan mechero kʼanchanqachu, nillataj jaykʼajpis qanpi ujtawan uyarikonqachu ni novioj parlasqanpis ni noviaj parlasqanpis. Comerciantesniykeqa jallpʼantinmanta aswan atiyniyoj runas karqanku, qantaj layqeriosniykiwan+ tukuy nacionesta chʼaukiyarqanki.* 24 Chay llajtapeqa tarikorqa profetaspa yawarnin, Diospaj tʼaqasqa kajkunaj yawarnin,+ jinallataj jallpʼapi wañuchisqa karqanku chay tukuyninkoj yawarninpis”.+

19 Chay qhepata cielopi ashkha runaspa parlasqankuta jina uyarerqani nishajta: “¡Jehová Diosta jatunchaychej!*+ Salvasqa kay, jatunchasqa kay, atiypis Diosninchejpatamin. 2 Juiciosnenqa cheqa kanku, cheqantaj.+ Payqa chay atiyniyoj khuchi warmita* castigan, mayqenchus jallpʼata pierdecherqa khuchichakuy juchanwan* chayta. Paymantaqa vengakun kamachisninta wañuchisqanrayku”,+ nispa. 3 Chay ratopachataj ujtawan nerqanku: “¡Jehová Diosta jatunchaychej!*+ Babiloniaj qʼoshñenqa wiñaypaj wiñaynintinpaj wicharillanqapuni”,+ nispa.

4 Chantá chay 24 ancianos,+ jinallataj tawantin querubinespis*+ qonqoriykukuspa Diosta yupaycharqanku, pichus kamachina tiyanapi tiyasqa kashan chayta. Nerqankutaj: “¡Amén!* ¡Jehová Diosta jatunchaychej!”,*+ nispa.

5 Kamachina tiyanamantapis uj parlay nimorqa: “Diosninchejta jatunchaychej tukuy kamachisnin,+ payta manchachikojkuna, jatunpaj qhawasqa kajkuna, pisipaj qhawasqa kajkunapis”,+ nispa.

6 Uyarerqanitaj ashkha runaspa parlasqankuta jina, ashkha yakuspa sonasqanta jina, sinchʼi qhon qhonkunaj sonasqanta jinataj nishajta: “¡Jehová Diosta jatunchaychej!*+ ¡Tukuy Atiyniyoj Jehová* Diosninchejqa+ rey jina kamachiyta qallarinña!+ 7 Kusikuna jatun kusiywan, paytataj jatunchana, Corderoj* casamientonqa chayamunña, noviantaj wakichisqaña kashan. 8 Corderoj novianmanqa pʼachallikunanpaj qosqa karqa sumaj llimphu lliphipirishaj lino. Chay sumaj linoqa ninakun Diospaj tʼaqasqa kajkunaj cheqan ruwasqasninkuwan”,+ nispa.

9 Angeltaj niwarqa: “Kayta qhelqay: ‘Kusisqa kanku Corderoj casamiento jatun mikhuyninman wajyarisqa kajkunaqa’,+ nispa”. Chantá nillawarqataj: “Kaykunaqa Diospa cheqa palabrasnin kanku”, nispa. 10 Chayta uyarispa chakisnin chayman qonqoriykukorqani payta yupaychanaypaj. Paytaj niwarqa: “¡Imatá ruwashanki! ¡Ama chayta ruwaychu!+ Noqaqa kamachi masillayki kani, hermanosniykejtawan, pikunachus Jesusmanta willanankupaj kamachisqa kanku chaykunajta.+ ¡Diosta yupaychay!+ Profeta jina willayqa, Jesusmanta cheqa kajta willanapaj kashan”,+ nispa.

11 Cielota kichasqata rikorqani, jinallamanta uj yuraj caballo rikhurimorqa.+ Patanpi lloqʼasqa kajtaj sutikun Atienekunapaj jina,+ Cheqa Kajtaj.+ Payqa juzgantaj maqanakuntaj cheqan kajman jina.+ 12 Ñawisnenqa nina lauray jina,+ umanpitaj ashkha coronas tiyan. Sutenqa qhelqasqa kashan, nitaj pipis rejsinchu, manachayqa paylla. 13 Yawarwan pukachasqa* ropayoj kashan, kay sutiwantaj rejsinku: Diospa Palabran.+ 14 Cielomanta soldadospis qhepanta risharqanku yuraj caballospi, sumaj llimphu yuraj linowan pʼachallisqas. 15 Paypa siminmantaqa llojsimushan uj jatun filo espada+ nacionesta wañuchinanpaj. Paykunataqa fierro varawan kamachenqa.+ Chantapis uvasta sarun Tukuy Atiyniyoj Diospa sinchʼi kʼajaj phiñakuyninpa uva sarunanpi.+ 16 Ropanpitaj moqon patannejpi kay suti qhelqasqa kashan: Reyespa Reynin, señorkunaj Señornintaj.+

17 Chantá rikullarqanitaj uj angelta intipi sayashajta, paytaj jatunmanta qhaparispa wajyarqa, cielo chaupita* phawaj tukuy pʼisqosta: “Jamuychej, tantakamuychej Diospa jatun mikhuyninman.+ 18 Mikhuychej reyespa aychasninta, comandantespa aychasninta, kallpasapa runaspa aychasninta,+ caballospa aychasninta, chay caballospi purejkunaj aychasninta,+ tukuypa aychasnintapis, mana esclavo kajkunajta, esclavo kajkunajtapis, pisipaj qhawasqa kajkunajta, jatunpaj qhawasqa kajkunajtapis”, nispa.

19 Rikorqanitaj chay millay phiña animalta, jallpʼamanta reyesta, paykunaj soldadosninkutawan tantasqata, maqanakunankupaj chay caballopi lloqʼasqa kajpa contranta, soldadosninpa contrantapis.+ 20 Chay millay phiña animaltaj presochasqa karqa, llulla profetapis+ paywan khuska presochasqallataj karqa, pichus paypa ñaupaqenpi señalesta ruwaspa chʼaukiyarqa* millay phiña animalpa marcanta churachikojkunata,+ jinallataj lantinta* yupaychajkunatapis chay.+ Iskayninkutaj kausashaj wijchʼuykusqa karqanku azufrewan laurashaj nina qochaman.+ 21 Puchojkunataj wañuchisqa karqanku, caballopi lloqʼasqa kajpa siminmanta llojsej jatun espadawan.+ Tukuynin pʼisqostaj chaykunaj aychasninkuwan sajsaykorqanku.+

20 Rikorqani uj angelta cielomanta uraykamushajta, makinpitaj japʼisharqa chinkay ukhoj* llaventa,+ uj jatun cadenatawan. 2 Payqa sierpeta japʼiykorqa,+ chay ñaupa katarita,+ pichus Diablo,+ Satanastaj+ chayta. Wataykorqataj 1.000 wataspaj. 3 Wijchʼuykorqataj chinkay ukhuman,+ wisqʼaykuspataj sellaykorqa, amaña nacionesta chʼaukiyananpaj* chay 1.000 watas tukukunankama. Chay qhepatataj kacharisqa kanqa uj pisi tiempollata.+

4 Rikorqani kamachina tiyanasta, chaykunapi tiyajkunamantaj atiy qosqa karqa juzganankupaj. Arí, rikorqani pikunachus Jesusmanta testigos jina willasqankurayku, Diosmanta parlasqankuraykutaj wañuchisqa karqanku* chaykunata, pikunachus mana yupaycharqankuchu chay millay phiña animalta, nitaj lantintapis,* nillataj frentesninkupi, ni makisninkupi marcachikusqankuchu chaykunata.+ Paykunaqa kausarimorqanku, Cristowantaj reyes jina kamacherqanku 1.000 watasta.+ 5 Chaymin ñaupaj kaj kausarimoyqa.+ Chay waj wañusqastaj+ mana kausarimorqankuchu chay 1.000 watas tukukunankama. 6 Ñaupaj kaj kausarimuypi kausarimojkunaqa kusisqa kanku, Diospaj tʼaqasqataj.+ Iskay kaj wañoyqa+ mana paykunata imananqachu,+ astawanpis Diospata, Cristojtawan sacerdotesninku kanqanku,+ paywantaj reyes jina kamachenqanku chay 1.000 watasta.+

7 Chay 1.000 watas tukukojtinkamataj Satanasqa presochasqa kasqanmanta kacharisqa kanqa. 8 Llojsenqataj chʼaukiyananpaj* jallpʼaj tawantin kʼuchusninpi* kaj nacionesta, Gogtawan Magogtawan. Ajinamanta guerrapaj paykunata tantaykunanpaj. Paykunaqa may chhika kanku, mar qochapi kaj tʼiyu jina. 9 Tukuy jallpʼanta aywirimuspataj, muyuykorqanku Diospaj tʼaqasqa kajkunaj campamentonkuta,* chay munasqa llajtatawan. Cielomantataj nina uraykamuspa paykunata qʼolarparerqa.*+ 10 Paykunata chʼaukiyarqa chay Diablotaj wijchʼuykusqa karqa azufre nina qochaman, maypichus chay millay phiña animalwan+ llulla profetawan kasharqankuña chayman.+ Paykunaqa tuta pʼunchay, wiñaypaj wiñaynintinpaj ñakʼarichisqa kanqanku.*

11 Rikorqanitaj uj jatun yuraj kamachina tiyanata, chaypi tiyasqa kajtawan.+ Ñaupaqenmantataj jallpʼapis cielopis ayqekorqanku,+ niñataj ujtawan rikhurerqankuchu. 12 Rikorqanitaj wañusqasta, pikunachus kanku jatunpaj qhawasqa kajkuna, pisipaj qhawasqa kajkunapis chaykunata, kamachina tiyanaj ñaupaqenpi sayashajta, kʼuyuna librostaj* kicharikorqanku. Waj kʼuyuna libropis kicharikullarqataj: Kausay kʼuyuna libro.+ Kʼuyuna librospi qhelqasqa kasqanman jinataj, wañusqasqa juzgasqa karqanku ruwasqasninkuman jina.+ 13 Mar qochapis paypi kaj wañusqasta jaywaporqa. Wañuypis Sepulturapis* paykunapi kaj wañusqasta jaywapullarqankutaj. Sapa ujninkutaj juzgasqa karqanku ruwasqasninkuman jina.+ 14 Wañuywan Sepulturawanqa* nina qochaman wijchʼuykusqa karqanku.+ Chay nina qochaqa+ ninakun iskay kaj wañuywan.+ 15 Chantapis pikunachus kausay libropi mana qhelqasqa kajkunaqa+ nina qochaman wijchʼuykusqa karqanku.+

21 Rikullarqanitaj uj mosoj cielota, uj mosoj jallpʼatawan.+ Chay ñaupaj cielopis chay ñaupaj jallpʼapis chinkarisqankuña,+ mar qochapis manaña kanñachu.+ 2 Rikullarqanitaj santo llajtata, Mosoj Jerusalenta, cielomanta Diosmantapacha uraykamushajta,+ wakichisqata qosanpaj kʼachanchasqa noviata jina.+ 3 Chantá uyarerqani kamachina tiyanamanta uj sinchʼi parlayta nimojta: “Diospa toldonqa* runas chaupipi kashan. Payqa paykunawan khuska tiyakonqa, paykunataj paypa llajtan kanqanku. Diosmin paykunawan kanqa.+ 4 Payqa ñawisninkumanta tukuy waqayta pichanqa,+ manañataj wañuy kanqachu,+ nitaj llakiypis, nitaj waqaypis, nitaj nanaypis.+ Chay ñaupaj kaj imasqa chinkapunña”, nispa.

5 Kamachina tiyanapi tiyasqa kajqa+ nerqa: “Tukuy imata mosojyachishani”,+ nispa. Nillarqataj: “Qhelqay, kay palabrasqa atienekunapaj jina kanku, cheqataj kanku”, nispa. 6 Niwarqataj: “¡Juntʼakunña! Noqa kani Alfataj Omegataj,* qallariytaj tukukuytaj.+ Pichus chʼakichikojmanqa yaku juturimanta* qhasilla qorisaj kausayta qoj yakuta.+ 7 Pichus atipajqa kay imasta herencianpaj japʼenqa, noqataj Diosnin kasaj, paytaj waway kanqa. 8 Chaywanpis manchalis, mana creejkuna,+ millay kausayniyoj kajkuna, runata wañuchejkuna,+ khuchichakuy juchapi* purejkuna,+ layqeriosta ruwajkuna, santosta yupaychajkuna, tukuy llullaspis+ wijchʼuykusqa kanqanku ninawan azufrewan laurashaj qochaman.+ Chayqa ninakun iskay kaj wañuywan”.+

9 Chay qanchis angelesmanta, pikunachus qanchis fuentesta qhepa kaj qanchis castigoswan juntʼasta japʼisharqanku,+ chaykunamanta ujnenqa jamuspa niwarqa: “Jaku, rikuchimusqayki noviata, Corderoj* warminta”,+ nispa. 10 Chay angelqa espíritu santowan manchay jatun orqo pataman pusawarqa, rikuchiwarqataj santo llajta Jerusalenta, cielomanta Diosmantapacha uraykamushajta,+ 11 Diospa jatun kayninwan.+ Lliphipirisqanqa rijchʼakorqa may valorniyoj rumiman, chʼuwa cristal jina lliphipirishaj jaspe rumiman.+ 12 Jatun alto perqayoj karqa, 12 punkusniyoj. Chay punkuspeqa 12 ángeles kasharqanku, chay punkuspitaj qhelqasqa kasharqa Israelpa 12 ayllusninpa* sutisninku. 13 Inti llojsimuynejmanqa kinsa punkus karqa, norte ladomanpis* kinsa punkus, sur ladomanpis* kinsa punkus, inti yaykuynejmanpis kinsa punkusllataj.+ 14 Llajtaj perqanqa 12 cimiento rumisniyoj karqa, chaykunapitaj kasharqa 12 sutis, Corderoj 12 apostolesninpa sutisninku.+

15 Noqawan parlajqa qorimanta caña huecata japʼisharqa, chaywan midinanpaj llajtata, punkusninta, perqantawan.+ 16 Chay llajtaqa cuadrado karqa, largonman, anchonmanpis chhikankamalla karqa. Paytaj llajtata chay caña huecawan miderqa, karqataj 2.200 kilómetros jina.* Largonwan, anchonwan, sayayninwanpis chhikankamalla karqanku. 17 Perqanta midillarqataj, chaytaj karqa 64 metros,* runaj midinanman jina, angelpa midinanman jinataj. 18 Chay perqanqa jaspe rumimanta+ ruwasqa karqa. Llajtataj chʼuwa qorimanta karqa, chʼuwa vidrioman rijchʼasqa. 19 Llajtaj perqa cimientosnenqa kʼachanchasqa kasharqa tukuy laya* valorniyoj rumiswan: ñaupaj kaj cimientoqa jaspe karqa, iskay kajtaj zafiro, kinsa kajtaj calcedonia, tawa kajtaj esmeralda, 20 phishqa kajtaj sardónica, sojta kajtaj sardio, qanchis kajtaj crisólito, pusaj kajtaj berilo, jisqʼon kajtaj topacio, chunka kajtaj crisoprasa, chunka ujniyoj kajtaj jacinto, chunka iskayniyoj kajtaj amatista. 21 Chay 12 punkuspis 12 perlas karqanku. Sapa punkoqa uj perlallamanta ruwasqa kasharqa. Llajtaj ancho callentaj chʼuwa qorimanta karqa, sutʼi vidrio jina.

22 Chay llajtapeqa mana ima templotapis rikorqanichu, Tukuy Atiyniyoj Jehová* Diosmin+ chay llajtaj templonqa, jinallataj Corderopis. 23 Chay llajtaqa mana intiwan kʼanchachikunanchu tiyan, nillataj killawanpis, Diospa jatun kaynin kʼanchaykusqanrayku,+ Corderotaj kʼanchanan kasqanrayku.+ 24 Nacionesqa chay kʼanchayninrayku purenqanku,+ jallpʼamanta reyestaj chay llajtaman apamonqanku jatun kayninkuta. 25 Punkusnenqa ni jaykʼaj wisqʼakonqachu, chaypeqa pʼunchayllaña kanqa, manañataj tutaqa kanqachu.+ 26 Chay llajtamanqa nacionespa jatun kayninkuta, jatunpaj qhawasqa kayninkutawan apamonqanku.+ 27 Chaymanqa manapuni yaykonqachu ni ima chʼichi kajpis, nitaj millay imasta ruwajkunapis chayri llullakojkunapis.+ Chaymanqa yaykonqanku pikunachus Corderoj kausay kʼuyuna libronpi* qhelqasqa kajkunalla.+

22 Chay angeltaj rikuchiwarqa kausayta qoj yakuyoj mayuta,+ cristal jina chʼuwitata, chay mayoqa llojsimusharqa Diospa kamachina tiyananmanta, Corderojmantawan,*+ 2 uraykamusharqataj llajtaj ancho callenpa chaupinta. Mayoj puraj chimpanpitaj kausay sachʼas karqa, chay sachʼasqa sapa wata 12 kutista poqoj kanku, ujta sapa killa. Chay sachʼaspa laqhesnenqa nacionesta jampinapaj karqa.+

3 Manaña ima maldicionpis kanqañachu. Manachayqa Diospa kamachina tiyanan, Corderojtawan+ chay llajtapi kashanqa. Kamachisnintaj Diosta sirvenqanku, 4 uyanta rikonqanku,+ sutintaj frentesninkupi qhelqasqa kanqa.+ 5 Chantapis manaña tutaqa kanqañachu,+ nitaj ima kʼanchanawanpis kʼanchachikunankuchu kanqa, nitaj intiwanpis, paykunataqa Jehová* Diosmin kʼanchaykonqa.+ Paykunataj reyes jina kamachenqanku wiñaypaj wiñaynintinpaj.+

6 Angeltaj niwarqa: “Kay palabrasqa atienekunapaj jina kanku, cheqataj kanku.+ Jehová* Diosqa, pichus profetasta yuyaycharqa parlanankupaj,+ chay Diosmin angelninta kachamun kamachisninman rikuchinanpaj imaschus tumpamantawan kanan kasqanta. 7 Usqhayllata jamushani.+ Kusisqamin pichus kay kʼuyuna libropi* willakusqan palabrasta kasukojqa”,+ nispa.

8 Noqa Juanqa kay imasta rikorqani, uyarerqanitaj. Chayta uyarispa, rikuspataj qonqoriykukorqani chay imasta rikuchiwaj angelpa chakisnin chayman, payta yupaychanaypaj. 9 Paytaj niwarqa: “¡Imatá ruwashanki! ¡Ama chayta ruwaychu! Noqaqa kamachi masillayki kani, hermanosniyki profetaspatawan, jinallataj pikunachus kay kʼuyuna libropi kaj palabrasta kasukunku chaykunajtawan. Diosta yupaychay”,+ nispa.

10 Chantá nillawarqataj: “Ama sellaykuychu kay kʼuyuna libropi willakusqan palabrastaqa, señalasqa tiempoqa qayllapiña kashan. 11 Mana cheqan kajta ruwajqa mana cheqan kajta ruwallachunpuni, chʼichi kajtaj chʼichillapuni kachun. Cheqan kajta ruwajtajrí cheqan kajta ruwallachunpuni, Diospa qhawayninpi llimphu kajpis llimphullapuni kachun.

12 ”‘Usqhayllata jamushani tʼinka aparisqa, sapa ujman qopunaypaj ruwasqanman jina.+ 13 Noqa kani Alfataj Omegataj,*+ ñaupaj kajtaj qhepa kajtaj, qallariytaj tukukuytaj. 14 Kusisqa kanku jatuchaj ropasninkuta tʼajsajkunaqa,+ paykunaqa kausay sachʼasmanta mikhuyta atenqanku,+ llajtamantaj punkusninta+ yaykuyta atenqanku. 15 Jawapeqa kashanku alqos,* layqeriosta ruwajkuna, khuchichakuy juchapi* purejkuna, runata wañuchejkuna, santosta yupaychajkuna, jinallataj pikunachus llullakuyta munakunku, llullakuymantaj yachasqa kanku chaykuna’.+

16 ”‘Noqa Jesusqa angelniyta kachamorqani qankunaman kay imasta willasunaykichejpaj, congregacionespa allinninkupaj. Noqa kani Davidpa saphin, miraynintaj,+ sutʼiyayta lliphipirej chʼaskataj’”.+

17 Espíritu santopis noviapis+ nishallankupuni: “¡Jamuy!”, nispa. Pichus chayta uyarejtaj “¡Jamuy!” nichun. Pichus chʼakichikojtaj jamuchun.+ Pichus munajpis kausayta qoj yakuta qhasilla ujyachun.+

18 “Kay kʼuyuna libropi willakusqan palabrasta tukuy uyarejkunaman kayta nini: Sichus pipis kay qhelqasqasman imallatapis yapaykunman chayqa,+ Diosqa payman yapaykonqa kay kʼuyuna libropi qhelqasqa kashan chay castigosta.+ 19 Sitajchus pipis kay kʼuyuna libropi willakusqan palabrasmanta imallantapis orqhonman chayqa, Diosqa mana saqenqachu kay kʼuyuna libropi willakusqan imasta japʼikunanta: Mana mikhojta saqenqachu kausay sachʼasmanta,+ nillataj yaykojta saqenqachu santo llajtaman.+

20 ”Kay imasta willajqa nin: ‘Usqhayta jamushani’,+ nispa”.

“¡Amén!* Jamuy Señor Jesús”.

21 Señor Jesuspa jatun khuyakuynin Diospaj tʼaqasqa kajkunawan kachun.