28 yachachiy
Moisés wawitata salvakun
QHAWARIY chay waqaq wawitata. Moisés sutikun. ¿Chay kʼacha sipasta riqsinkichu? Payqa Egiptomanta ñusta Faraonpa ususin karqa.
Mamanqa egipcios mana wañurpachinankupaq kimsa killata Moisesta pakarqa. Chaywanpis, ima ratullapis egipcios Moisesta tarirpanankuta yacharqa. ¿Imatataq wawitanta salvananpaq ruwarqa?
Yakupi tuytunanpaqjina juk canastata ruwaytawan, chayman Moisesta churarqa. Chaymanta Nilo mayuman qhura chawpiman saqimurqa. Chaymanta Moisespa mamanqa, Moisesta qhawananpaq María ususinta chaypi qhipakunanta nirqa.
Tumpamantawan Faraonpa ususin mayuman mayllakuq rirqa. Chayllapi chay canastata rikurqa. Juknin kamachinta chay canastata urqhumunanpaq kacharqa. Canastata kichariptintaq, ¡juk kʼacha wawita chaypi kachkasqa! Moisés wawitaqa llakiyta waqakuchkarqa. Chayta rikuspa Faraonpa ususinqa khuyarikurqa. Payqa mana uña wawitata wañuchiyta munarqachu.
Chaymanta María chimparqa. Dibujituta qhawariy. Mariaqa Faraonpa ususinta tapurqa: ‘¿Munawaqchu israelita warmita wawitata uywapusunanpaq waqyamunayta?’, nispa.
‘Ari riy waqyarinpuway’, nispa Faraonpa ususin kutichirqa.
Mariataq usqhayta mamanman willamurqa. Moisespa maman chayamuptintaq; Faraonpa ususin nirqa: ‘Kay wawata apaspa uywapuway ñuqataq pagapusqayki’, nispa.
Jinamanta mamallantaq Moisesta uywakun. Chaymanta mamanqa, Moisés wiñasqantawan Faraonpa ususinman apapurqa. Faraonpa ususintaq wawantajina uywakapurqa. Moisestaq Faraonpa wasinpi wiñakurqa.