Qillqaqkunap nisqanku

Munasqa ñawiriq:

‘Qhipayta jamuy.’ (Marcos 10:21.) Jinamanta Jesús paypa qhipanta purinanchikpaq sapa jukninchikman waqyariwanchik. Qam, ¿chay waqyariyman kasukuchkankichu? Jina kaptinqa, jatuchaq tʼinkakunata japʼinki. ¿Imaraykutaq?

Jehovaqa, kʼata Churinta kawsayta quwananchikpaq, qhispichiwananchikpaq ima, Jallpʼaman kachamurqa (Juan 3:16). Jesustaq ñuqanchikrayku wañurqa chantapis, imaynatachus sumaqta kawsakunanchikta rikuchiwanchik. Jesús ruwasqanwanqa, Jehovata kasukuyta, sunqunta kusichiyta munasqanta ima, rikuchirqa. Chantapis, Tatanjina kananchikpaq yachachiwanchik. Parlasqanwan, ruwasqanwanpis Jehovap kayninta, munayninta ima, sumaqmanta rikuchirqa (Juan 14:9).

Bibliaqa, Jesús ‘kikin’ kananchikpaq, ‘qhipantataq rinanchikpaq’ ima, yachachiwanchik (1 Pedro 2:21). Jehovawan allinta apanakunapaq, allin kawsayninchikpi kanapaq, wiñay kawsay ñanpi purinapaq ima, Jesuspa qhipanta sumaqta qhawarispa purina tiyan.

Kayta ruwanapaqqa, Jallpʼapi Jesuspa kawsayninta astawan riqsinanchik tiyan. Chaypaqqa, Biblia imatachus Jesusmanta parlasqanta sumaqta ñawirispa, tʼukurinanchik tiyan. Jinamanta, Jesuspa tukuy nisqanpi, ruwasqanpi ima, sumaqta tʼukurispa, kawsayninchikpi payjina ruwasunchik. Astawanpis, imaynatachus paypa qhipanta puriyta atisqanchikta aswan sutʼita qhawasunchik.

Kay librota ñawirispa, Jesusta Jehovata ima, astawan sinchita munakunaykita munayku, jinamanta chay munakuyniyki Jesuspa purisqanpi sumaqta purinaykipaq tanqasunanta munayku. Chayta ruwaptiyki, Jehovap sunqunta wiñay wiñaypaq kusichinki.