Jesusqa “kausayta qoj tʼanta”

Jesusqa Galilea qochaj inti llojsimuy ladonpi, uj milagrota ruwaspa ashkha runasman tʼantata mikhucherqa. Chayrayku Jesusta reyninkupaj churayta munarqanku. Jesustajrí ayqekorqa. Chantá chay chʼisi, Jesusqa qochapi yaku patanta purerqa, Pedropis yaku patanta purillarqataj. Pedroqa pisi creeyniyoj kasqanrayku yakuman casi chinkaykorqa, Jesustaj payta yanaparqa. Chantapis Jesusqa chay chʼisi wayrata thañicherqa, ichapis yachachisqasninpa botenku mana yakuman chinkaykunanpaj.

Qʼayantenqa Jesuswan yachachisqasninwan Capernaumman rerqanku. Chaytaj Galilea qocha chimpapi kashan. Qhepankutataj Jesús milagrota ruwasqanmanta mikhoj runas chayarqanku. Chay runasqa Jesusta nerqanku: “Yachachejníy, ¿maykʼajtaj kayman chayamorqankiri?”, nispa. Jesustajrí paykunata kʼamerqa, ujtawan tʼantata mikhuyta munasqankuraykulla payta maskʼasqankumanta. Chayrayku Jesús paykunaman nerqa: “Ama pʼosqoj mikhunaraykuchu llankʼaychej, manachayqa wiñay kausayta qoj mikhunarayku”, nispa. Chantá chay runasqa Jesusta taporqanku: “¿Imatataj ruwasqayku Dios allinpaj qhawanawaykupajri?”, nispa (Juan 6:25-28).

Paykunaqa ichapis Diospa Leynillanta juntʼananku kasqanta yuyarqanku. Jesustajrí nerqa: “Dios allinpaj qhawasunaykichejpajqa, noqapi creenaykichej tiyan, Paymin noqataqa kachamuwan”, nispa. Paykunatajrí Jesuspi mana creerqankuchu. Astawanpis nerqanku: “¿Ima milagrotataj rikuchiwasqayku qanpi creenaykupaj? ¿Imatataj ruwankiri? Ñaupa tatasninchejqa chʼinnejpi maná nisqata mikhorqanku, Diosmanta Qhelqasqapi nisqanman jina: ‘Payqa cielomanta tʼantata mikhunankupaj qorqa’, nispa” (Juan 6:29-31; Salmo 78:24).

Jesusqa runas milagrosta ruwananta mañakojtinku nerqa: “Cheqatapuni niykichej: Cielomanta tʼantataqa mana Moiseschu qosorqachej, Tataymin cielomanta cheqa kaj tʼantataqa qosunkichej. Diospa tʼantanqa cielomanta uraykamun, kay mundomantaj kausayta qon”, nispa. Chay runasqa mana entienderqankuchu. Chayrayku nerqanku: “Señor, chay tʼantataqa qollawaykupuni”, nispa (Juan 6:32-34). Chanta, ¿ima tʼantamantataj Jesús parlasharqa?

Jesusqa nerqa: “Wiñay kausayta qoj tʼantaqa noqa kani. Qhepayta jamojqa ni jaykʼaj yarqhachikonqachu, noqapi creejtaj ni jaykʼaj chʼakichikonqachu. Noqaqa nerqaykichejña: ‘Qankunaqa rikushawaspapis mana noqapi creenkichejchu’, nispa. [...] Mana munayniyta ruwanaypajchu cielomanta uraykamuni, manachayqa kachamuwajniypa munayninta ruwanaypaj. Kachamuwajneyqa munan, chay qowasqan runasmanta mana ujtapis chinkachinayta, astawanqa munan qhepa kaj pʼunchaypi paykunata kausarichinayta. Tataypa munaynenqa kay: Pichus Diospa Wawan kasqayta reparaspa noqapi creejqa wiñay kausayniyoj kanqa”, nispa (Juan 6:35-40).

Runastajrí chayta uyarispa phiñarikorqanku, ajinatataj thutorqanku: “¿Imajtintaj kay runa nishan, ‘noqa cielomanta uraykamoj tʼanta kani’ nispari?” (Juan 6:41). Chay runasqa mana Diospa Wawanta jinachu qhawarqanku, nerqankutaj: “¿Manachu kayqa Josejpa wawan Jesuslla? ¿Manachu tatantapis, mamantapis rejsinchej?”, nispa (Juan 6:42).

Chayrayku Jesús nerqa: “Amaña qankunapura thutuychejchu. Mana pipis qhepayta jamuyta atinmanchu, manachus kachamuwaj Tatay pusamunman chayqa, noqataj qhepa kaj pʼunchaypi payta kausarichisaj. Profetaspa qhelqasqankupi nin: ‘Tukuyninkutaj Jehová Diospa yachachisqasnin kanqanku’, nispa. Tatayta uyarispa paymanta yachakojkunaqa, qhepayta jamunku. Ni pi runapis Tataytaqa rikunchu, noqalla paytaqa rikuni, paymin noqataqa kachamuwan. Cheqatapuni niykichej: Noqapi creejqa wiñay kausayta japʼenqa”, nispa (Juan 6:43-47; Isaías 54:13).

Jesusqa Nicodemoman willarqaña, pichus paypi creejqa wiñay kausayta tarinanta. Arí, Diosqa kʼata Wawan Jesusta kachamorqa, “pillapis paypi creejqa mana wañunanpaj, manachayqa wiñay kausayniyoj kananpaj” (Juan 3:15, 16). Jesustaj payman jamorqanku chay runasman nerqa, paynejta wiñay kausayta tariyta atisqankuta. Chaytatajrí maná nisqa tʼantata mikhuspaqa mana tarinkumanchu karqa, nitaj ruwasqanku tʼantata mikhuspapis. Chayrayku Jesús nerqa: “Noqaqa wiñay kausayta qoj tʼanta kani”, nispa (Juan 6:48).

Chantá Jesusqa yachacherqa Capernaummanta sinagogapiñataj. Chaypeqa pay cielomanta tʼanta kasqanta nerqa. Runastajrí chayta uyarispa astawan phiñarikorqanku. Chaymantataj qhepanta yachakusunchej.