Tawa jóvenes Diosta kasukorqanku

Nabucodonosorqa Judamanta kurajkunaj wawasninta Babiloniaman apakaporqa. Paykunata qhawananpajtaj, kamachina wasipi sirvejkunaj kurajninku Azpenasta churarqa. Paytataj nerqa chay wawas ukhumanta aswan sanito jovenesta, aswan umitayoj kajkunata maskʼananta. Paykunatataj kinsa watata yachachinanku karqa Babiloniapi autoridades kanankupaj. Paykunaqa babiloniospa parlayninkupi leeyta, escribiyta, parlayta ima yachakunanku karqa. Reypa mikhunanmantataj mikhunanku karqa. Chay jovenesmanta tawaqa karqanku: Daniel, Hananías, Misael, Azarías ima. Azpenastaj paykunata babiloniospa parlayninkupi suticharqa Beltsasar, Sadrac, Mesac, Abednego nispa. Chay jovenesqa manapuni Diosmanta karunchakorqankuchu.

Paykunaqa Jehová Diosta kasukuytapuni munarqanku. Chayrayku reypa mikhunanta mana mikhuyta munarqankuchu. Imajtinchus reyqa Diospa Leyninpi chʼichipaj qhawasqa imasta mikhoj. Chayrayku Azpenasta nerqanku: “Ama reypa mikhunanta qowaykuchu”, nispa. Azpenastaj nerqa: “Mana mikhuspaqa tulluyankichej. Reytaj noqata wañuchiwanqa”, nispa.

Danieltaj sumajta yuyaychakuspa nerqa: “Chunka diasta qʼomerkunallata, yakullatawan qowayku. Chantá kikinchawasqayku reypa mikhunanta mikhojkunawan”, nispa. Azpenastaj “ya” nerqa.

Chunka diasninmantaj, Danielwan amigosninwanqa waj jovenesmanta nisqa aswan sanitos karqanku. Jehová Diosqa mayta kusikorqa kasukusqankumanta. Danielmantaj yachayta qorqa mosqoypi jina rikusqan imasta, mosqoykunatawan sutʼinchananpaj.

Kinsa watanmantaj, Azpenasqa tukuy jovenesta reyman pusarqa. Reytaj paykunawan parlaspa repararqa Danielwan, Hananiaswan, Misaelwan, Azariaswan imalla aswan yachayniyoj kasqankuta. Chayrayku paykunata ajllarqa kamachina wasinpi trabajanankupaj. Chantapis payqa wakin imasta ruwananpaj paykunawan yuyaychachikoj. Chay tawa jovenesqa Jehová Diosmanta yachayta japʼisqankurayku, reypa yachayniyoj runasninmanta, yatirisninmanta aswan yachayniyoj karqanku.

Danielwan, Hananiaswan, Misaelwan, Azariaswanqa mana wasinkupichu kasharqanku. Jinapis mana qonqaporqankuchu Jehová Diospa kamachisnin kasqankumanta. Qanpis, sapallayki kashaspa Jehová Diosmanta yuyarikuypuni.