Perqapi qhelqasqa letras

Babiloniapeqa Belsasarñataj rey karqa. Payqa uj chʼisi uj fiestata ruwarqa Babiloniamanta mil kamachejkunasninpaj. Kamachisnintataj nerqa Jehová Diospa templonmanta Nabucodonosor apamusqa chay qori vasosta orqhomunankuta. Chay vasospitaj invitadosninwan vinota tomarqa, diosesnintataj yupaycharqa. Jinallapitaj fiestata ruwasharqanku chaypi uj runa maki rikhurimuspa perqapi qhelqayta qallarerqa.

Belsasartaj mayta mancharikuspa yatirista, yachayniyojkunatawan wajyachispa nerqa: “Pichus kay qhelqasqata sutʼinchawajqa, reinoypi kinsa kaj kamachej kanqa”, nispa. Paykunataj mana sutʼinchayta aterqankuchu. Chantá mikhusharqanku chayman reypa maman jamusqa nerqa: “Nabucodonosormanqa Daniel mosqoyninta sutʼinchaj. Pay qanmanpis chay qhelqasqata sutʼinchasonqa”, nispa.

Reytaj Daniel payman rejtin nerqa: “Kay palabrasta leespa sutʼinchawajtiykeqa, qori collarta kunkaykiman churaykuchisqayki, kay nacionpi kinsa kaj kamachej kanaykipajtaj churasqayki”, nispa. Danieltaj nerqa: “Ama imatapis qowaychu, jinapis kay qhelqasqa imachus niyta munasqanta sutʼinchasqayki. Tatayki Nabucodonosorqa mayta jatunchakoj, chayrayku Jehová Diosqa payta kʼumuykachacherqa. Qanqa imaspichus tatayki rikukusqanta yachashaspa Jehová Diosta pisipaj qhawanki templonmanta qori vasospi vinota tomaspa. Chayrayku Diosqa MENÉ, MENÉ, TEQUEL, PARSÍN nisqa letrasta qhelqacherqa. Chaytaj niyta munan Babiloniata medoswan persaswan japʼikapunankuta, qantaj niña reychu kanki”, nispa.

Babiloniaqa jatuchaj perqasniyoj karqa, mayuwan muyurisqataj. Chayrayku ni pi japʼikapunanpaj jina karqa. Jinapis chay chʼisi medoswan persaswan Babiloniaman yaykorqanku. Imajtinchus rey Ciroqa, soldadosnin Babiloniaj punkunman chayanankupaj, yakuta waj ladoman kacharparerqa. Soldadosnin punkuta kichasqata tarispataj Babiloniata japʼikaporqanku, reytapis wañucherqanku. Ajinamanta Ciroqa Babiloniapi rey karqa.

Payqa uj watataña kamachishaspa nerqa: “Jehová Dios niwan Jerusalenpi templonta sayarichinayta. Pi judiollapis yanapakuyta munan chayqa riyta atin”, nispa. Chayrayku ashkha judíos Jerusalén thuñikusqanmanta 70 watasninman kutiporqanku. Ajinamanta Diospa nisqan juntʼakorqa. Chantapis rey Ciroqa, Nabucodonosor templomanta apamorqa chay qori vasosta, qolqe vasosta, waj imasta ima kutichiporqa. Yachakunchej jina Jehová Diosqa rey Cironejta llajtanta yanaparqa.