Ñawiriqkuna yachayta munanku

¿Uña wawitasta bautizanachu tiyan?

▪ “Mayta phutikurqani hermanituy John, limbo nisqapi kachkasqanmanta”, nirqa Victoria. ¿Imaraykú phutikurqa? Pay nin: “Johnqa, mana bautizasqa wañupurqa, chayraykutaq limbo nisqapi wiñaypaq ñakʼarinanta niwarqa juk sacerdote”, nispa. ¡Chayraykuchá may phutisqa kachkarqa! Chaywanpis, ¿Biblia uña wawitas mana bautizasqas wañupuspa, wiñaypaq ñakʼarinankutachu yachachin?

Bibliaqa, cristianos bautizakunankutapuni yachachin. Chayrayku Jesús discipulosninman kamachirqa: “Tukuy laya runasta yachachisqasniyman tukuchimuychej, bautizaspa Dios Tataj sutimpi, Churej sutimpi, Santo Espíritoj sutimpiwan, yachachispataj qankunaman kamacherqaykichej chayta, paykunapis waqaychanankupaj”, nispa (Mateo 28:19, 20, Qheshwa Biblia). Kay versículo nisqanmanjina, bautizakuyta munaqqa, Jesuspa discipulonraq kanan tiyan, nisunman Jesusta riqsinan tiyan, qhipantataq riyta akllanan tiyan. Chaytataq juk uña wawaqa, mana akllayta atinchu.

Chaywanpis wakinqa, Jesuspa nisqan uña wawaspaqpis kasqanta ninku. Juk pastor luterano Richard P. Bucher nirqa: “Tukuy bautizasqas kananku tiyan, uña wawaspis. [...] Mana bautizakuspaqa, juchankumanta mana perdonasqaschu kanqanku, wiñaypaqtaq ñakʼarinqanku”, nispa. Chay nisqan Jesuspa nisqanwan, kimsaniqmanta churanakun.

Ñawpaq kaq, Jesusqa mana uña wawitas bautizakunankuta yachachirqachu. ¿Imaraykú chayta ninchik? Jesusqa, Diospa kamachiykunasninmanta discipulosninman mayta yachachirqa. Chaytataq ruwaq discipulosnin sumaqta entiendenankupaq (Mateo 24:42; 25:13; Marcos 9:34-37; 10:35-45). Chantá, ¿imaraykú ni juk kutillatapis uña wawitasta bautizanata nirqachu? ¿Qunqarqachu? ¡Mana! Uña wawitasta bautizana kaptinqa, pay kamachinmanchá karqa.

Iskay kaq, Jesusqa ni jaykʼaq wañusqas ñakʼarichkasqankuta nirqachu. Astawanpis Eclesiastés 9:5 nisqanta allinta yacharqa, chaypi nin: “Kawsashajkunaqa wañunankuta yachakunku; wañusqasrí mana imatapis yachankuchu”, nispa. Jesusqa, wañusqas purgatoriopi, limbopi, infiernopi, wak lugarespi ima, mana ñakʼarichkasqankuta yacharqa. Chayrayku wañusqas ni imata yachasqankuta, juk sinchi puñuypijina kachkasqankuta yachachirqa (Juan 11:1-14).

Kimsa kaq, Jesusqa “tukuy pʼampasqa[s]” kawsarimunankuta yachachillarqataq (Juan 5:28, 29). Chaykunamantataq may chhika mana bautizasqas kawsarimunqanku. Diospa leyesnintataq yachakunqanku, paraisopitaq wiñaypaq kawsakunqanku (Salmo 37:29).a

Tukuchanapaq: Bibliaqa, uña wawitasta bautizanata mana yachachinchu.

[Sutʼinchaynin]