Armagedonmanta: ¿imatá runas yuyanku?

“Reyes[t]a tantaykorqanku, hebreo parlaypi Armagedón nisqa cheqapi.” (APOCALIPSIS 16:16.)

¿IMAPITAJ “Armagedón” rimayta uyarispa yuyanki? Ichapis jatun llakiy jamunanpi. Kay rimay Bibliapi uj kutillata rikhurejtinpis, telepi, radiopi ima chaymanta mayta uyarikun, religionta kamachejkunapis chaymanta mayta parlallankutaj.

¿Imastachus Armagedonmanta parlakusqan, Bibliaj nisqanwan kikinchu? Kay tapuypa kutichiyninta yachayqa may allin. Imaraykuchus Armagedonmanta cheqata yachayqa, mana manchachikunaykipaj, qhepaman imachus kananmanta kusikunaykipaj ima yanapasonqa, Diosmantataj mana sajrata yuyankichu.

Armagedonmanta imatachus nikusqanta kinsanejmanta qhawarina, chantá Bibliaj nisqanwan kikinchay.

1. ¿ARMAGEDÓN JATUN LLAKIYTA RUNA RIKHURICHISQANCHU?

Periodistasqa, wakin kuti “Armagedón” rimayta oqharinku runa jatuchaj llakiykunata rikhurichisqanmanta parlanankupaj. Sutʼincharinapaj, iskay jatuchaj maqanakuykunamanta parlanankupaj oqharinku. Estados Unidoswan, Unión Sovieticawan bombaswan maqanakunankuta yuyashajtinku, telepi, radiopi ima “armagedón” kananta uyarikorqa. Kay pʼunchaykunapi yachayniyoj runasqa, aire, yaku ima chʼichichasqa kasqanrayku, Jallpʼanchej uj pʼunchay qʼoñitatananta ninku chaytataj “armagedonwan ninakusqanta” kikinchanku.

¿Ima ninayantaj chay? Jallpʼamanta, kausaymanta ima, qhepaman imachus kananqa runaj makinpi kashasqanta ninayan. Kamachejkunachus mana sumaj yuyaywan imatapis ruwanqanku chayqa, Jallpʼanchej wiñaypaj chinkachisqa kanqa.

¿Imatá Biblia yachachin? Jehová, runas Jallpʼata chinkachinankuta mana saqenanta. Biblia niwanchej Jehová Diosqa,a Jallpʼata “ama chʼusajlla kanampaj, manachayqa kawsayniyojkuna chaypi tiyakunankupaj” ruwasqanta (Isaías 45:18). Jallpʼata chinkachinankuta saqenanmantaqa, “kay pachata phirejkunata[...] tukuch[enqa]” (Apocalipsis 11:18).

2. ¿ARMAGEDÓN UJ JATUN LLAKIYCHU?

Wakin kuti periodistasqa, “Armagedón” rimayta oqharinku, jatuchaj llakiykunamanta parlanankupaj. Sutʼincharinapaj, 2010 watapi uj noticiaspi “Haití llajtapi ‘Armagedón’” kasqanta nerqanku. Chay noticiaspeqa, chay suyupi jallpʼa ikhakuy kasqanrayku ashkha runas wañusqankuta, kapuyninkuta chinkachisqankuta, manchay ñakʼariy kasqanta ima nikorqa. Waj periodistas, cinemanta directores ima, “Armagedón” rimayta oqharinku mana imachus ñaupajpi kasqanmanta parlanallankupajchu, manaqa imachus qhepaman kananmanta parlanankupajpis. Sutʼincharinapaj, uj chʼaska chayri uj planeta Jallpʼawan chocajtin, “Armagedón” kananta yuyanku.

¿Ima ninayantaj chay? Armagedonqa, tukuy runasta mana suyashajtillanku wañuchinanta, jarkʼakunankupajtaj mana ni imata ruwayta atinankuta niyta munan.

¿Imatá Biblia yachachin? Armagedonqa, mana tukuy runastachu wañuchenqa, manaqa sajra runasllata. Biblia nin: “Manaña sajra runas kanqankuchu”, nispa (Salmo 37:10).

3. ¿ARMAGEDONPI DIOS JALLPʼATA CHINKACHENQACHU?

Ashkha runas allin kajwan sajra kajwan maqanakunankuta creenku, Jallpʼanchej chinkachisqa kananpaj. Estados Unidospi kay consultora Princeton Survey Research Associates tapurisqanman jina, pachajmanta tawa chunka runas “Armagedonpi nisunman jatun maqanakuypi” Jallpʼa chinkachisqa kananta nisqanku.

¿Ima ninayantaj chay? Jallpʼapi mana wiñaypaj kausanapajchu ruwasqa kasqanchejta, nitaj Jallpʼapis wiñaypaj kananpajchu ruwasqa kasqanta. Diosqa, ima ratollapis wañunanchejpaj ruwawasqanchejta.

¿Imatá Biblia yachachin? Cheqamanta nisunman Dios “kay pachata cimientosnimpi sayach[isqanta] mana jaykʼaj kuyuchisqa kanampaj” (Salmo 104:5). Jallpʼapi pikunachus kausanankumanta parlaspa Biblia nin: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa (Salmo 37:29).

Bibliaqa, imatachus runas Armagedonmanta nisqankuta mana yachachinchu. Chantá, ¿imatá yachachin?

[Sutʼinchaynin]