¿Nerqachu Jesús, suwa runata paywan cielopi kananta?

Ashkha runas, Lucas 23:43 leespa chayta ninku. Diosmanta Qhelqasqa Biblia nisqanman jina, Jesusqa ladonpi warkhusqa suwa runaman nerqa: “Cheqatapuni niyki[: Kunampacha] noqawan Paraisopi kanki”, nispa. Chaywanpis waj Bibliaspi, jinata nin: “Cheqatapuni niyki kunan: Noqawan Paraisopi kanki”, nispa. ¿Nisharqachu Jesús, suwa runaman chay pʼunchay paywan cieloman rinanta? Mana. ¿Imaynatá yachanchej?

Ñaupajtaqa pikunallachus cieloman rinankuta qhawarina. Cieloman rinapaj ajllasqa cristianosqa, yakuwan, espíritu santowan ima bautizasqa kanku. Paykunaqa Jesuspa discipulosnin kanku, Diostaj wawasninkuta jina rejsikapun (Juan 3:3, 5). Chantapis Dios kamachisqanman jina kausanku. Kʼacha kaykunatataj rikuchinku, cheqan kausayniyoj, khuyakuyniyoj ima kaspa (1Corintios 6:9-11). Paykunaqa Diosman, Cristoman ima, wañunankukama cheqa sonqo kananku tiyan (Lucas 22:28-30; 2 Timoteo 2:12). Chayta juntʼajkunalla, kausarimuspa cieloman wicharenqanku. Chaypitaj Cristowan khuska reyes, sacerdotes ima waranqa watasta kanqanku (Apocalipsis 20:6).

Chaywanpis suwa runaqa, sajra imasta ruwarqa, chayraykutaj wañorqa (Lucas 23:32, 39-41). Jinapis Jesusman nerqa: “Yuyarikuwanki ari noqamanta, reinoykiman chayaspa”, nispa. Chayta nispaqa, Jesusta jatunpaj qhawasqanta rikucherqa (Lucas 23:42). Chaywanpis chay runaqa, mana bautizakorqachu, mana espíritu santowan ajllasqa cristianochu karqa, nitaj cheqan kausayniyoj kasqanta rikucherqachu. ¿Cheqamantachu Jesús cheqa sonqo discipulosninwan khuska cielopi kamachinanta ninman karqa? (Romanos 2:6, 7.)

Kaypi tʼukuriy. Uj runa qolqeykita suwasunki. Chaywanpis perdonta mañakusunki, nitaj policiaman apachinkichu. Chay runata, ¿familiaykita chayri negocioykita qhawananpaj churawajchu? Mana, ¿icharí? Chay llankʼaytaqa atienekusqayki runaman jaywawaj. Ajinallataj cieloman rinankupaj ajllasqa kajkunawanqa. Paykunaqa atienekunapaj jina kasqankuta, reyes kaspataj Diospa nisqanman jina ruwanankuta rikuchinanku tiyan (Apocalipsis 2:10). Chay suwa runataj, wañuy patapi kashaspa Jesusmanta llampʼu sonqowan khuyakuyta mañakojtinpis, niraj atienekunapaj jinachu karqa.

Chaywanpis, ¿nichu Jesús suwa runaman chay pʼunchaypacha paywan cielopi kananta nerqa? Mana. Jesusqa mana chayta ninmanchu karqa. Imajtinchus ni paypis chay pʼunchay cieloman wicharerqachu. Astawanpis “jallpʼaj sonqompi”, nisunman aya pʼampanapi kinsa pʼunchayta karqa (Mateo 12:40; Marcos 10:34). Chantapis Jesusqa, kausarispa 40 pʼunchaykunata Jallpʼapi kaytawanraj janaj pachaman wicharerqa (Hechos 1:3, 9).

Jina kajtin, ¿ima paraisomantá Jesús suwa runaman parlarqa? Paypaj kamachiyninpi Jallpʼa uj paraisoman tukojtin, chaypi kananpaj kausarimunanta nisharqa (Hechos 24:15; Apocalipsis 21:3, 4). Chay paraisomanta, chaypi kanaykipaj imastachus Dios mañasqanta ima astawan yachanaykipaj, Jehovaj testigosninwan parlariy.