Jatuchaj llakiykuna ¿Dios sajra kasqantachu rikuchin?

WAKINKUNA NINKU: “Dios kay Jallpʼata kamachishan, jatuchaj llakiykuna kananpaj juchayoj, chaytaj may sajra kasqanta rikuchin”, nispa.

¿IMATÁ BIBLIA NIN? “Kay pachapi kaj chhika runastaj Kuraj Supaypa atiynimpi ka[shanku]” (1 Juan 5:19). Satanás Jallpʼata kamachisqanraykutaj, runasta pay jina kanankupaj tanqan. Chayrayku runasqa paykunallapi yuyanku, munapayajkuna kanku, nitaj imachus qhepaman kananmanta llakikunkuchu. Chaynejta Jallpʼanchej may chʼichichasqa kashan. Yachayniyoj runas nisqankuman jinataj, runaj ruwasqanqa jatuchaj llakiykuna kananpaj, sinchʼiyananpaj chayri chaykunapi astawan runas wañunankupaj yanapan.

Chantá, ¿imaraykú Dios, Kuraj Supay kamachinanta saqeshan? Chayta yachanapaj, qallariypi imachus kasqanta yuyarina. Ñaupa tatasninchejqa, Diospa kamachiyninta qhesacharqanku. May chhika runas, chayllatataj ruwanku. Ruwasqankuwantaj, Satanaspa makinman churakunku, pichus Diospa enemigon. Jesuspis, “kay pachata kamachejqa” Kuraj Supay kasqanta nerqa (Juan 14:30). Chaywanpis mana wiñaypajchu kamachenqa.

Jehováa Diosqa, Satanás runata ñakʼarichisqanta rikun, maytataj sonqonta nanachikun. Sutʼinchanapaj, Israel llajta ñakʼarisqan tiempomanta parlaspa, Bibliaqa Diosmanta nin: “Israelitas llakisqa kashajtinku, paypis llakisqallataj karqa”, nispa (Isaías 63:9). Chayrayku Diosqa, jatun khuyakuyninpi sajra kamachej Satanasta pisimantawan chinkarparichenqa. Churin Jesucristotapis, wiñaypaj kamachinanpaj reyta jina churanña.

¿IMATÁ YACHAKUNCHEJ? Satanasqa jatuchaj llakiykunata mana chinkachiyta atinchu, chaywanpis Jesusqa chinkachenqa. Jallpʼapi kashaspa, sinchʼi wayramanta discipulosninta jarkʼarqa. Biblia nin: “Jesusqa jatarimuytawan, wayrata kʼamerqa, qochatapis nerqa: Chʼin kay. Sayay, nispa. Wayrataj thañerqa, may chʼintaj karqa”, nispa. Discipulosnintajrí mancharisqas ninakorqanku: “¿Pitaj kay runari? Wayrapis, qochapis payta kasunku”, nispa (Marcos 4:37-41). Arí, Jesusqa Jallpʼata kamachishajtin, kasukoj runasta jatuchaj llakiykunamanta jarkʼanqapuni (Daniel 7:13, 14).