¿Mayqen religionpitaj atienekuwaj?

Ichapis uj religionpi imata rikusqaykirayku, ni mayqen religionpis sumajchu kasqanta ninki. Chaywanpis uj religionpi atienekuwaj. Jesusqa, Jallpʼapi kashaspa wakin runasta discipulosnin kanankupaj ajllarqa, Diospa nisqanman jina kausanankupajtaj yachacherqa. Kunanpis, cheqa cristianos kallantaj, paykunataj Cristoj yachachisqanman jina kausanankupaj tukuy sonqo kallpachakunku. ¿Pikunataj kanku?

Estelaqa, pimantachus parlarqanchejña, nin: “Jehovaj testigosnin yachachiwajtinku, Bibliata entiendeyta qallarerqani. Juan 8:32 nisqantaj cheqapuni kasqanta repararqani. Chaypi nin: ‘Cheqa kajta rejsinkichej, chay cheqa kajtaj kacharichisonqachej’, nispa”.

Renepis nin: “Jehovaj testigosnenqa, mana Dioschu runata ñakʼarichishasqanta Bibliawan yachachiwarqanku. Chantapis sajra kaj kananta saqejtinpis, pisimantawan chaykunata tukuchinanta sutʼinchawarqanku”.

Mana cheqanta kausajkunaqa aywirishanku, paykuna jina mana kanapajtaj mayta kallpachakuna tiyan. Chaywanpis atikun. Ashkha runas, Diospa yachachisqanman jina kausanankupaj, Bibliata entiendeyta munanku. Jehovaj testigosnintaj, sapa semana may chhika runasta mana cobraspalla wasinkupi yachachinku. Ashkha runas, imatachus Biblia yachachisqanta entiendeshanku. Jinamantataj Diosman qayllaykushanku, aswan kusisqataj kausakushanku.a

Jehovaj testigosninwan parlarejtiyki, imaraykuchus chay religionman yaykusqankuta tapuriy. Imatachus yachachisqankuta ukhunchay, imaynatachus kausasqankutapis qhawariy. Chantá mayqen religionchus allin kasqanta reparay.