TAPANMANTA | ¿DIOS YUYARIKUSUNKICHU?
¿Dios yuyarikusunkichu?
“Noqa wajcha, llakisqataj kani; ama qonqawaychu Señor” (Salmo 40:17). (CHAYTAQA ISRAELITASPA REYNIN DAVID, 3100 WATAS JINA UNAYÑA NERQA)
“Paypajqa tukuy naciones uj sutʼoj yaku jinalla.” (ISAÍAS 40:15, QB)
¿Imaraykú David yuyarqa, Dios paymanta yuyarikusqantapuni? ¿Dios yuyarikusunkichu? Ashkha runasqa, “Tukuy Atiyniyoj Diosqa nichá noqaykumanta yuyarikullanpischu”, nispa ninku. ¿Imaraykú ajinata yuyanku?
Wakenqa chayta yuyanku, Dios runasmanta aswan patapi kasqanrayku. Chay jina patapipuni “Paypajqa tukuy naciones uj sutʼoj yaku jinalla, pesaspi uj chhika ñutʼu jakʼitu jinalla” kanku (Isaías 40:15, Qheshwa Biblia). Uj qhelqaj runa, pichus Diospi mana creenchu kayta nerqa: “Pi kasqanchejtapuni yuyasunman Dios imatachus ruwasqanchejpi interesakun ninapajri”, nispa.
Wakin runastaj juchata ruwasqankurayku, “ima uyaywan Dios yanapanawanta mañakuymanri”, nispa ninku. Uj runa Jim sutiyoj nin: “Mana imamantapis phiñarpakojlla kanaypaj Dios yanapanawanta mayta mañakoj kani. Jinapis sapa kuti rabiawan atipachikullajpuni kani. Kay jina sajra kasqayrayku nichá Diospis yanapayta munawanñachu nej kani”, nispa.
¿Dios may karupipunichu kashanman, mana yuyarikunawanchejpaj? ¿Jina juchasapa runasmanta yuyarikunmanchu? Diospa yanapayninwan kay tapuykunaman kutichisunman. Payqa Biblianejta sutʼita niwanchej yuyarikuwasqanchejtapuni, nitaj karupichu kasqanta. Hechos 17:27 nin: “Diosqa mana karupichu kashan sapa ujninchejmanta”, nispa. Kay qhepan kaj tawa yachaqanaspi parlarisun imatachus Biblia chaymanta yachachisqanta. Chantá imaynasmantachus qanmanta, jinallataj tukuyninchejmanta Dios yuyarikuwasqanchejta.