¿Navidadta ruway allillanchu kanman?

Sapa wata may chhika runas Navidad fiestata ruwanku. Wakin runasqa ninku chay fiestaqa familiawan, amigoswan ima kusirikunapaj, chayri Diosmanta yuyarikunapaj, wajchastapis yanapanapaj kasqanta. Chaykunata ruway allillan rijchʼakojtinpis, ¿imastawan Navidad fiestamanta yachanayki kanman?

Ashkha runas yuyanku Navidadpeqa, Jesuspa paqarikusqan pʼunchayta yuyarishasqankuta. Jinapis ashkha yachayniyoj runasqa, ima pʼunchaychus Jesús paqarikusqanta mana yachakusqanta ninku. Kay Los porqués del cristianismo libro nin: “Ñaupa tiempomanta cristianosqa, mana runaj ususninman jina ruwanankupaj, ima pʼunchaychus Jesús paqarikusqanta mana rejsicherqankuchu”, nispa. Chantapis Bibliaqa ni maypi ninchu Jesús diachakusqanta, nitaj diachakuman risqantapis. Astawanpis yachachisqasninman wañuyninta yuyarinankuta kamacherqa (Lucas 22:19).

Yachayniyoj runasqa ninku, kay Papá Noel, pino sachʼas, regalos, velas, takiykuna, wakichikun chay mikhuna, tukuy kʼachanchanapaj imaspiwan, runaj ususnillan kasqanta. Católico libro nin: “¿Yachanchejchu Navidadpi regalosta jaywanakuy, wasista, iglesiasta ima tʼikanchay runaj ususnillan kasqanta?”, nispa.

Ichá niwaj: “Navidad fiestata ruway, juchachu imatajri”, nispa. Chaywanpis tʼukuriy, ¿chay fiestata Dios allinpajchu qhawanman? Jehová Diosqa mana munanchu cheqa religión runaj ususninwan chajrukunanta. Payqa mana kasukoj israelitasman nerqa: “Fiestasniykichejta chejnikuni, millachikunitaj. [...] Karunchachiychej noqamanta chay chʼajwaspa takisqaykichejta”, nispa (Amós 5:21, 23).

¿Imaraykú israelitasman chayta nerqa? Sutʼincharina, israelitastaqa rey Jeroboam kamachisharqa, payqa Dan llajtapi, jinallataj Betel llajtapipis qorimanta ruwasqa waka uñasta churarqa. Israelitastataj chay lantiswan Jehovata yupaychanankuta nerqa, manaña Jerusalén temploman Jehovata yupaychaj rinankupaj. Chantapis chay reyqa waj fiestastawan rikhurichispa, sacerdotesta churarqa chay fiestasta ruwanankupaj (1 Reyes 12:26-33).

Israelitaspa ruwasqanku, ichá allillan kasqanta nisunman. Imajtinchus paykunaqa Jehovata yupaychanankupaj chayta ruwasharqanku. Chaywanpis imatachus Jehová Amosnejta, waj profetasnejta ima israelitasman nisqanqa, imaynatachus Jehová chay ruwasqankuta qhawasqanta sutʼinchawanchej. Chantá aswan qhepaman paykunata yuyaricherqa: “Noqa Tata Diosqa kasqay jinallapuni kani”, nispa (Malaquías 3:6). Kunankamapis Jehovaqa kasqan jinallapuni, kikillantapunitaj yuyashan. Chayrayku tʼukuriy, ¿Navidad fiestata ruway, Diosta kusichinmanchu?

Navidad fiestamanta chay tukuy imata yachaspa, ashkha runas niña chay fiestata ruwankuchu. Paykunaqa kusisqa kausakunku familiankuwan, amigosninkuwan ima tantakuspa, chayri wajkunata yanaparispa, chaytataj mana watapi uj kutillatachu ruwanku, manaqa ima ratollapis.