Jehovaqa khuyakuyniyoj, perdonaj ima

ÑAUPAJ KAUSAYNIY:

Montreal llajtapi, wajcha runas ukhupi wiñakorqani. Pusaj hermanosmanta sullkʼa kaj kani. Tatayqa sojta killitayoj kashajtiy wañuporqa. Chayrayku mamallay uywakuwarqayku.

Wawamantapacha drogasman, qolqerayku pujllayman, maqanakuyman ima yachasqa karqani. Suwa runas chaupipi wiñakorqani. Chunka watayojña kashaspaqa, phisu warmispata, qolqeta manoj runaspatawan kamachinku karqani. Runasta engañaspaqa, kusisqa kaj kani. Chayqa vicioy jina karqa.

Chunka tawayojña kashaspaqa, runasta engañanapaj churasqa karqani. Ashkha relojesta, anillosta, waj imasta ima rantej kani. Qoripi bañasqalla kajtinpis, 3 gramoyojpis kanman jina pasachej kani (chaytaj 14 quilates). Chaytaqa noqalla churaykoj kani. Chantataj callespi, jatuchaj tiendaspa jawasninpiwan vendemoj kani. ¡Uj rato qolqeta japʼej kani! Uj kuteqa, uj diallapi 10.000 dolaresta ganarqani.

Suwa jovencitosta yanapaj internadomanta 15 watayoj wijchʼuchikamorqani. Mana yacharqanichu maymanchus rinayta. Wakin kutisqa callespi puñoj kani, manaqa parquespi, chayri mayqen rejsisqaypa wasinpi.

Mana allinta purisqayrayku, wakin kutisqa policiawan japʼichikorqani. Paykunataj runasta engañasqaymanta, mana permisoyoj vendesqaymantawan multawaj kanku. Nitaj wisqʼawajchu kanku, imaraykuchus mana suwasqatachu vendej kani. Ni pita, nitaj imatapis manchachikojchu kani. Qolqeta manoj runaspajpis trabajaj kani. Wakin kutisqa manusninkuta cobramunaypaj armayoj rej kani. Maleantespajpis trabajallarqanitaj.

BIBLIAMAN JINA KAUSAYNIYTA TIJRACHISQAY:

Bibliamantaqa 17 watayoj kashaspa parlajta uyarerqani. Chaypachaqa tanta warmiywan tiyakusharqani. Paytaj Jehovaj testigosninwan Bibliamanta yachakuyta qallarerqa. Noqarí Bibliaj kamachiykunasnin mana allinchu kasqanta yuyaj kani. Chayrayku waj warmiwan riporqani.

Chay qhepa tanta warmiypis Bibliamanta yachakuyta qallarillarqataj. Yachakusqanman jina aswan kʼachaman, aswan pacienciayojman ima tukorqa. Chayqa maytapuni tʼukuchiwarqa. Uj pʼunchay, Jehovaj testigosnin tantakuyninkuman wajyariwarqanku. Chaypeqa tukuyninku kʼachas karqanku, kusiywantaj napaykuwarqanku. Ajina runastaqa ni jaykʼajpis rikorqanichu. Ni familiaypis ajinata munakuwajchu. Chaytaj sonqoyta kuyuricherqa. Chayrayku “¿Bibliamanta yachakuyta munawajchu?” niwajtinkoqa, chay rato “arí” nerqani.

Manachus Bibliaqa wañuymanñachá karqa. Qolqerayku pujllaspa, 50.000 dólares manu rikhurerqani. Chayrayku iskay suwaswan, suwaj rinaykupaj parlarerqayku. ¡Walejtachá mana rerqanichu! Imajtinchus ujninta wañurpacherqanku, ujnintataj carcelman wisqʼaykorqanku.

Bibliamanta yachakusqayqa, kausayniyta cheqanchanay kasqanta reparachiwarqa. Bibliaqa 1 Corintios 6:9, 10 versiculopi nin: “Suwaspis, michʼaspis, machajkunapis, maldecejkunapis, chʼawkiyajkunapis manapuni Diospa reinontaqa herenciata jina japʼenqankuchu”, nispa. Chay versiculota leeytawanqa waqarikorqani. Kausayneyqa nipuni allinchu kasharqa (Romanos 12:2). Wapulla purej kani, llulla runataj kaj kani.

Jinapis Bibliapeqa yachakorqani, Jehová khuyakuyniyoj, perdonaj ima kasqanta (Isaías 1:18). Chayrayku sonqomantapacha yanapata mañakorqani, viciosniyta qonqanaypaj, kausayniytataj allinchanaypaj. Diospa yanapayninwanqa, kausayniyta pisimanta pisi cheqanyacherqani. Qhepa tanta warmiywanpis casarakorqani.

Iskay chunka tawa watayoj kanaypajqa, casarasqaña, kinsa wawasniyojtaj karqani. Paykunata uywanaypaj, trabajota necesitarqani. Mana escuelata tukucharqanichu, nitaj ima trabajomantapis sumajta yacharqanichu. Chayrayku Jehovamanta ujtawan yanapata mañakorqani. Chantá trabajota maskʼaj rerqani. Japʼinawankupajqa, kausayniyta cheqanyachiyta, tukuy sonqotaj trabajayta munasqayta nej kani. Wakin kutisqa, Bibliata estudiashasqaytapis nej kani. Nitaj pipis japʼiyta munawarqachu. Ajinapi, ujtawan trabajota maskʼaj rerqani. Chaypitaj contratajman kausayniymanta willarillarqanitaj. Paytaj niwarqa: “Mana yachanichu imaraykuchus, jinapis contratasqayki”, nispa. Jehová mañakusqayta uyariwarqa. Pisi tiemponmantaj, warmiywan khuska Jehovaj testigosninman tukorqayku.

BENDICIONESTA JAPʼISQAY:

Manachus Bibliaj yuyaychasqanta japʼikuyman karqa chayqa, unayñachá wañuyman karqa. Jesús yachachisqanman jina kausakusqayrayku, familiaywan kusisqa kausakuyku. Sonqoypis niña juchachawanchu. Imajtinchus Jehová Dios perdonawasqanta yachani.

Sapa killa 70 horasta runasman Bibliamanta yachachini. Chaytataj 14 watastaña ruwani. Niraj unaychu, warmiypis kikillantataj ruwashan. Chantapis pasaj 30 wataspi, trabajoymanta 22 runasta Jehovaj testigosninman tukunankupaj yanaparqani. Jatuchaj tiendasmanqa rillanipuni. Manaña runasta engañajchu rini. Astawanpis sapa atispa kusiy kausaymanta runasman willarini, maypichus suwasqa niña kanqankuchu (Salmo 37:10, 11).